ཨ་ལྕེ་དྭངས་བཟང་

སྤྱི་ལོའི་དུས་རབས་བཅུ་དགུ་པའི་དུས་མཇུག་ཏུ་བྱུང་བའི་ལྷ་མོ་མཁས་ཅན་དྭངས་བཟང་ནི་སྐྱོར་མོ་ལུང་ལྷ་མོཚོགས་པ་གསར་འཛུགས་བྱེད་མཁན་གྲས་ཤིག་ཡིན་འདུག ཁོང་གི་ཟླ་བོ་པདྨ་བསྟན་འཛིན་དང་མཉམ་དུ་སྐྱོར་མོ་ལུང་ཁུལ་ནས་མི་ཁག་གཅིག་བསྡུ་རུབ་ཀྱིས་ལྷ་མོའི་འཁྲབ་གཞུང་འགྲོ་བ་བཟང་མོ་དང་། པདྨ་འོད་འབར། གཟུགས་ཀྱི་ཉི་མ་སོགས་སྦྱངས་ཏེ་འཁྲབ་སྟོན་བྱས་པར་བརྟེན་ཁོང་ཚོར་དྭངས་བཟང་ལྷ་མོ་ཚོགས་པ་ཞེས་མིང་ཐོབ། ལྷ་མོ་འཁྲབ་སྐབས་ལུས་ཀྱི་འཁྲབ་འཁྱེར་དང་། ངག་གི་རྣམ་ཐར་མགྲིན་འགུགས། འཁྲབ་གཞུང་བར་སེང་དུ་བཞད་གད་སློང་བ་སོགས་དམིགས་བསལ་གྱི་ཁྱད་ཆོས་དུ་མ་ལྡན་ལ། ལྷག་པར་འཁྲབ་སྟངས་འཁྲུག་ཆ་དོད་པར་བརྟེན་ལྟད་མོ་བ་ཚོས་དགའ་པོ་བྱེད་ཀྱི་ཡོད། དྭངས་བཟང་ལྷ་མོ་ཚོགས་པ་དེས་སྐོར་བསྐྱོད་འཁྲབ་སྟོན་བྱས་ཏེ་དབྱར་དུས་སུ་བོད་དབུས་གཙང་ཁུལ་དང་། དགུན་དུས་ལྷོ་མོན་འབྲུག་འབྲས་སོགས་སུ་འགྲོ་གོ་ཡོད། ཏཱ་ལའི་བླ་མ་སྐུ་ཕྲེང་བཅུ་གསུམ་པའི་སྐུ་དུས་སུ་སྐྱོར་མོ་ལུང་ལྷ་མོ་བ་ཞོ་སྟན་གཟིགས་འབུལ་ཞུ་བར་གཏན་འབེབས་གནང་ཡང་ཁོང་ཚོས་ས་ཞིང་མ་བླངས་པར་སྐོར་བསྐྱོད་འཁྲབ་སྟོན་ཁོ་ན་བྱས་སྟབས་ཁ་རྒྱུན་དུ། སྐྱོར་མོ་ལུང་པ་ཕ་གཞིས་འཛིན་པ་ལས། ལུ་གུ་འཁྲིད་དེ་གནས་བཟང་སྐོར་བ་དགའ། ཞེས་ཤོད་སྲོལ་བྱུང་། ཨ་ལྕེ་དྭངས་བཟང་ནི་གཟུགས་བྱད་ལེགས་ལ་སྐད་གདངས་སྙན་པ། གསར་གཏོད་ཀྱི་སྙིང་སྟོབས་ལྡན་པ། སྐབས་འཕྲལ་ཚིགས་བཅད་གསར་རྩོམ་ཐུབ་པ་སོགས་ཡོད་ཐོག ཁོང་ལ་བུ་མོ་གཡུ་ལོ་སྒྲོལ་མ་ཟེར་བ་ཞིག་ཡོད་པ་དེ་ཡང་གཟུགས་བྱད་ལེགས་ལ་སྐད་སྙན་པ། ལྷ་མོ་འཁྲབ་འཁྱེར་དོད་པ་བཅས་སྐད་གྲགས་ཆོད་པ་ཞིག་བྱུང་སྐད།
༼དུང་དཀར་ཚིག་མཛོད་ཆེན་མོ་༽ལས་བཏུས།