ཨ་རིག་དགེ་བཤེས་བྱམས་པ་འོད་ཟེར་

མཚན་གཞན་ཨ་རིག་དགེ་བཤེས་བྱམས་པ་དགེ་ལེགས་རྒྱལ་མཚན་ནམ་རྒྱལ་མཚན་འོད་ཟེར་ཡང་ཞུ། རྗེ་འདི་ནི་རབ་བྱུང་བཅུ་གཉིས་པའི་མེ་རྟ（༡༧༢༦）ལོར་འཁྲུངས། སྐུ་ན་ཆུང་ངུའི་དུས་ནས་རྒྱ་ལི་སྤྲུལ་སྐུ་བློ་བཟང་བསྟན་དར་མཆོག་གི་སྐུ་གམ་དུ་བཅར་ནས་ཡི་གེ་འབྲི་ཀློག་གིས་མཚོན་ཆོས་བཀའ་མང་དུ་གསན་སྦྱོང་མཛད། དགུང་ལོ་བཅུ་བདུན་ལ་ཕེབས་པ་ཆུ་ཁྱི（༡༧༤༢）ལོར་དབུས་སུ་ཕེབས། སེར་བྱེས་སུ་ལོ་བཅུ་གསུམ་རིང་མདོ་སྔགས་ཀྱི་གཞུང་ཆེན་མོ་ལ་ཐུགས་གཉེར་མཛད། ཕུར་བུ་ལྕོག་དུ་ལོ་དྲུག་གི་རིང་རྗེ་ངག་དབང་བྱམས་པའི་དྲུང་ནས་ཟབ་ཆོས་གསན་པ་དང་སྒོམ་སྒྲུབ་མཛད། དགུང་ལོ་ཞེ་བཞི་པ་རབ་བྱུང་བཅུ་གསུམ་པའི་ས་གླང（༡༧༦༩）ལོར་རྭ་རྒྱ་དགོན་བཀྲ་ཤིས་ཀུན་བདེ་གླིང་ཕྱག་བཏབ། སེར་བྱེས་ལྟར་གྱི་འཆད་ཉན་བཙུགས། རི་བོ་དན་ཏིག་ཏུ་མཚམས་ཁང་དང་ཇོ་ཁང་སོགས་གསར་བཞེངས་ཀྱིས་དེར་སྒོམ་སྒྲུབ་མཛད་པ་དང་དགོན་སྡེ་དར་བར་སྤེལ། རབ་བྱུང་བཅུ་གསུམ་པའི་ཆུ་ཕག（༡༨༠༣）ལོར་སྐུ་གཤེགས།
༼དུང་དཀར་ཚིག་མཛོད་ཆེན་མོ་༽ལས་བཏུས།