ཨ་མཆོད་འཇམ་དཔལ་ཚུལ་ཁྲིམས།

ཨ་མཆོད་འཇམ་དཔལ་ཚུལ་ཁྲིམས་ནི་བོད་མདོ་ཁམས་རྫ་ཆུ་ཁ་བའི་འབུམ་གསར་སྡེ་བར་འཁྲུངས། ཡབ་ཀྱི་མཚན་ལ་སྦྱིན་པ་དང་ཡུམ་གྱི་མཚན་ལ་ནམ་མེ། ཆུང་དུས་འབུམ་གསར་དགོན་པའི་ཆོས་སྒོར་ཞུགས། དགོན་པའི་ཆོ་ག་ཕྱག་ལེན་ཡོངས་སུ་རྫོགས་པར་མཁས་པར་གྱུར། ༡༩༩༡་ལོར་བོད་ནས་རྒྱ་གར་དུ་འབྱོར་རྗེས་བྷིར་སུ་ཇ་སློབ་གྲྭར་ཨིན་ཡིག་སྦྱོང་བ་བྱས། དེའི་སྐབས་སུ་ཨ་མྱེ་རྨ་ཆེན་བོད་ཀྱི་རིག་གཞུང་ཞིབ་འཇུག་ཁང་གི་གོ་སྒྲིག་ཞུས་པའི་བཙན་བྱོལ་བོད་མིའི་རྩོམ་པ་པོའི་ཚོགས་ཆེན་ཐེངས་དང་པོ་ལ་ཞུགས། ༡༩༩༤་ལོར་མཚན་ཉིད་གྲ་ཚང་དུ་དགེ་འོས་སྐབས་གཉིས་པར་ཚུད་རྒྱུགས་འཕྲོད་ནས་ལོ་གཉིས་དེར་དགེ་འོས་སློབ་སྦྱོང་བྱས། ༡༩༩༦་ལོར་ཆོད་གན་བཞིན་མེའོ་དབུས་བོད་མིའི་སློབ་གྲྭར་དགེ་རྒན་གྱི་ལས་ཀ་བྱས། དེའི་སྐབས་སུ་སྒྲ་སྒྲུབ་རིག་པ་ཞེས་པའི་གསར་གཏོད་རང་བཞིན་གྱི་དཔེ་དེབ་དེ་དབུ་བརྩམས། ༢༠༠༣་ལོར་རྒྱ་གར་ལྷོ་ཕྱོགས་ཧུན་སུར་དབུས་བོད་མིའི་སློབ་གྲྭར་གནས་སྤར་ཐོབ་ནས་ད་ལྟ་བར་དུ་དགེ་རྒན་གྱི་ཕྱག་ལས་གནང་བཞིན་ཡོད། ཁོང་ནི་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་པའི་གདམ་འདེམས་ཀྱི་ཐོབ་ཐང་ཡོད་པའི་ཚོགས་མི་ཡིན་ཞིང་། ༢༠༡༣་ལོར་སོག་ཡུལ་དང་། ༢༠༡༦་ལོར་ནོར་ཝེ། ༢༠༡༩་ལོར་ཕ་རན་སི་བཅས་སྔ་རྗེས་སུ་རྒྱལ་སྤྱིའི་བོད་རིག་པའི་ཞིབ་འཇུག་ཚོགས་ཆེན་ཐེངས་༡༣་པ་དང་། ༡༤་པ། ༡༥་པ་བཅས་ལ་མཉམ་ཞུགས་གནང་།