ཨ་ཁྱུང་ངག་དབང་མཁྱེན་རབ་

རྗེ་འདི་ནི་ཨ་ཁྱུང་དྲུང་རམས་པ་མཁས་མཆོག་ཡེ་ཤེས་ཀྱི་སྤྲུལ་སྐུ་ཡིན། སྐུ་གཞོན་ནུའི་དུས་སུ་གྲུབ་ཆེན་ངག་དབང་བློ་བཟང་བསྟན་འཛིན་དང་། རྔ་རྒོད་ནམ་མཁའ་སེང་གེ། མཁན་ཆེན་དྲུང་ཡིག་བློ་བཟང་རྒྱ་མཚོ་སོགས་མཁས་གྲུབ་དམ་པ་མང་པོ་སློབ་དཔོན་དུ་བསྟེན་ནས་མདོ་སྔགས་ཀྱི་གཞུང་ཆེན་སྤྱི་དང་། ཁྱད་པར་དུ་སུམ་རྟགས། སྙན་ངག སྡེབ་སྦྱོར་སོགས་ལ་མཁས་པའི་ཡང་རྩེར་སོན། བིས་པ་ངག་དབང་མི་ཕམ་ཟླ་བ་མཆོག་གིས་རྗེ་འདི་ལས་སྙན་ངག་སྦྱངས་བརྩོན་མཛད། མདོ་སྨད་ཁ་གྱ་ཚོ་དྲུག་གི་ཨ་ཁྱུང་སྒོམ་གྲྭ་ཐར་པ་གླིང་ཕྱག་བཏབ། ཆོས་བསྟོད་དང་རྣམ་ཐར་སོགས་པོད་གཅིག་ལྗགས་རྩོམ་གནང་། རྗེ་ངག་དབང་མཁྱེན་རབ་འདི་ཉིད་ཀྱི་རྣམ་ཐར་མ་མཇལ་བས་འཁྲུངས་ལོ་དང་འདས་ལོ་ཁ་གསལ་མ་འཁོད་ཀྱང་། རྗེ་གང་གི་སློབ་དཔོན་དང་སློབ་མའི་ལོཚིགས་ལ་བལྟས་ན་རབ་བྱུང་བཅུ་གསུམ་པར་བྱུང་བའི་མཁས་པ་ཞིག་ཡིན།
༼དུང་དཀར་ཚིག་མཛོད་ཆེན་མོ་༽ལས་བཏུས།