སྲང་
བོད་ཀྱི་ལྗིད་ཚད་རྩི་བའི་ཚད་གཞི་ཞིག་སྟེ་ནས་འབྲུ་དྲུག་ལ་སེ་བ་གང་། སེ་བ་ཉི་ཤུ་ཐམ་པ་ལ་ཞོ་གང་། ཞོ་བཅུ་ལ་སྲང་གང་སྟེ་སྤོར་གང་། དེ་བཞི་ལ་ཉག་གང་། ཉག་ཉི་ཤུ་ཐམ་པ་སྟེ་སྲང་བརྒྱད་ཅུ་ཐམ་པ་ལ་ཁལ་གཅིག་ཏུ་རྩིས་། དེ་ལ་དེང་སང་གི་རྒྱ་གྲངས་ལྟར་ན་རྒྱ་མ་བདུན་དང་སྲང་ལྔ་ཡོད་། རྗེ་ཙོང་ཁ་པའི་རྣམ་ཐར་《བདེ་ལེགས་ཆར་འབེབས་》ལས་། ལྷ་ས་སྨོན་ལམ་ཆེན་མོ་འཛུགས་པ་གནང་སྐབས་ལྷ་ས་གྲོང་ཁྱེར་གྱི་མར་ཁལ་གཅིག་ལ་རྒྱ་ནག་ལུགས་ཀྱི་ཁྲོམ་སྲང་བརྒྱད་ཅུ་ཐམ་པ་དང་། མར་ཉག་གང་ལ་རྒྱ་ནག་ལུགས་ཀྱི་ཁྲོམ་སྲང་བཞི་རེ་ཡོད་པ་དང་། ཇ་ལྷ་སའི་སྨར་ཞོ་གང་ལ་རྒྱ་ནག་ལུགས་ཀྱི་ཁྲོམ་སྲང་གང་ཡིན་པར་གསུངས་། འདི་ནི་མར་དང་ཚ་སོགས་ཀྱི་ལྗིད་ཚད་འདེགས་པའི་ཚད་གཞི་ཡིན་། གསེར་དངུལ་དང་སྨན་གྱི་སྲང་ཚད་འཇལ་པའི་ཚད་གཞི་ནི་འདི་དང་མི་འདྲ་། གསེར་དངུལ་གྱི་ལྗིད་འདེགས་ཚད་གཞི་ནི་བོད་སིལ་བུའི་དུས་སྐབས་སུ་གཙང་གི་ཚོང་འདུས་མགུར་མོའི་ཚད་གཞི་ནི་། ནས་འབྲུ་ལ་སེ་བ་གང་དང་། སེ་བ་བརྒྱད་ལ་ཞོ་གང་། ཞོ་བརྒྱད་ལ་སྲང་གང་། གསེར་སྲང་གང་ལ་དངུལ་སྲང་དོ་། གསེར་སྲང་བཞི་ལ་དངུལ་སྲང་བརྒྱད་དེ་དངུལ་བྲེ་གང་། གསེར་སྲང་བཅུ་དྲུག་དང་དངུལ་ཁོང་སུམ་ཅུ་སོ་གཉིས་ལ་གསེར་བྲེ་གང་ཡིན་ཅིང་། ཡོན་རྒྱལ་རབས་ཀྱིས་བོད་ལ་དབང་བསྒྱུར་སྐབས་རྟ་ལེགས་པ་གཅིག་ལ་དངུལ་བྲེ་གང་སྟེ་དངུལ་སྲང་བརྒྱད་ཡིན་པར་《སི་ཏུ་བྱང་ཆུབ་རྒྱལ་མཚན་གྱི་བཀའ་ཆེམས་》ལས་གསལ་། ཡང་བོད་སྨན་གྱི་སྲང་ཚད་རྩི་སྟངས་ནི་། ནས་འབྲུ་དྲུག་ལ་སེ་བ་གང་། སེ་བ་ཉི་ཤུ་ཐམ་པ་ལ་ཞོ་གང་། ཞོ་བརྒྱད་ལ་སྲང་གང་། སྲང་དོ་ལ་ཕྱོར་བ་གང་། ཕྱོར་བ་དོ་ལ་སྙིམ་་པ་གང་། སྙིམ་པ་དོ་ལ་བྲེ་ཕྱེད་། སྙིམ་པ་བཞི་སྟེ་སྲང་བཅུ་དྲུག་ལ་བྲེ་གང་དུ་རྩི་བར་གནའ་རབས་ཀྱི་སྨན་གཞུང་འགའ་ཞིག་ལས་བཤད་།
༼དུང་དཀར་ཚིག་མཛོད་ཆེན་མོ་༽ལས་བཏུས།