སྨྲ་སྒོའི་མཚོན་ཆའི་རྣམ་བཤད་སྨྲ་བའི་རྒྱན་

ཡོང་ཁུངས་Wikipedia

༄༅། །སྨྲ་བའི་སྒོ་མཚོན་ཆ་ལྟ་བུའི་བསྟན་བཅོས་ཀྱི་རྣམ་བཤད་སྨྲ་བའི་རྒྱན་བཞུགས་སོ། ། ན་མོ་ལོ་ཀི་ཤྭ་ར་ཡ། ཐུགས་རྗེའི་དབང་ཕྱུག་སྤྱན་རས་གཟིགས་དབང་པོ། །རྨ་བྱའི་ཁྲིར་འཁོད་སྨིན་ལེགས་དྲུག་བཟུང་ནས། །རིག་པའི་གནས་རྣམས་ཀུན་གྱི་བརྡ་སྤྲོད་པ། །འཇིག་རྟེན་དབང་ཕྱུག་དེ་ལ་ཕྱག་འཚལ་ལོ། །དོན་དམ་དབྱིངས་ཀྱི་ཡི་གེ་བརྗོད་བྲལ་ཡང༌། །གཉིས་སྣང་འཁྲུལ་པའི་བློ་ལ་བརྗོད་བཅས་སུ། །གང་ཤར་བརྗོད་པ་ཀུན་གྱི་གཞིར་གྱུར་པ། །མིང་ཚིག་ཡི་གེའི་ཚོགས་རྣམས་འདིར་བཤད་བྱ། །སྡེ་སྣོད་ཤེས་པའི་ལང་ཚོ་རྒྱས་གྱུར་ཀྱང༌། །ཐ་སྙད་གཞུང་བརྒྱའི་སྐྱེ་མཆེད་མི་མཚར་ན། །དཔྱོད་ལྡན་མཛའ་བོའི་ཡིད་རབ་འདྲེན་མི་ནུས། །དེ་ཕྱིར་མཁས་པའི་སྐྱེ་མཆེད་འདི་མཚར་བྱ། །ཞེས་མཆོད་པར་བརྗོད་པ་དང༌། རྩོམ་པར་དམ་བཅའ་བ་སྔོན་དུ་བཏང་ནས། གང་བཤད་པར་བྱ་བ་ནི་སྨྲ་བའི་སྒོ་མཚོན་ཆ་ལྟ་བུ་ཞེས་བྱ་བའི་བསྟན་བཅོས་རྩོད་པ་དང་བྲལ་བ་དེའོ། །ཇི་ལྟར་འཆད་པ་ནི། སྤྱི་དོན་གྱི་སྒོ་ནས་གོ་བ་སྐྱེད་ཅིང༌། བསྡུས་དོན་གྱི་སྒོ་ནས་ཚོམས་བཅད་དེ་དཀའ་བའི་གནས་ལ་ལར་ཚིག་གི་དོན་ཡང་རྒྱ་ཆེར་སྦྱར་བའི་ཚུལ་གྱིས་སོ། །གང་ལ་བརྟེན་ནས་འཆད་ན། མཁས་པའི་དབང་པོ་རོང་ཟོམ་ཆོས་ཀྱི་བཟང་པོ་ཞེས་བྱ་བ། ལུས་གཅིག་ལ་ཀུ་ས་ལི་དང་པཎྜི་ཏའི་སྐྱེ་བ་གཉིས་བཟུང་བར་གྲགས་པ་དེས་མཛད་པའི་འགྲེལ་པ་ལ་བརྟེན་ནས་སོ། །འདི་ལ་དོན་གསུམ་སྟེ། མཚན་གྱི་དོན་དང༌། འགྱུར་གྱི་ཕྱག་དང༌། གཞུང་གི་དོན་ནོ། །གསུམ་པ་ལ་གསུམ་སྟེ། བཤད་པ་ལ་འཇུག་པ། བཤད་པ་ཉིད་ཉེ་བར་དགོད་པ་བཤད་པ་མཐར་ཕྱིན་པའི་བྱ་བའོ། །དང་པོ་ལ་གཉིས་ལས། མཆོད་པར་བརྗོད་པ་ནི། སྨྲ་མཆོག་གཙོ་ལ་ཕྱག་འཚལ་ནས། །ཞེས་སོ། །རྩོམ་པར་དམ་བཅའ་བ་ནི། སྨྲ་བའི་ཡན་ལག་རྫོགས་དོན་དུ། །ངག་གི་འདུ་བྱེད་གང་དེ་ཡི། །ཚོགས་པ་བདག་གིས་བཤད་པར་བྱ། །ཞེས་སོ། །གཉིས་པ་བཤད་པ་ཉིད་ཉེ་བར་དགོད་པ་ལ་གསུམ་སྟེ། ཡི་གེའི་ཚོགས་དང༌། མིང་གི་དང༌། ཚིག་གི་ཚོགས་སོ། །དང་པོ་ལ་གསུམ་སྟེ། མདོར་བསྟན། རྒྱས་པར་བཤད། ཡི་གེའི་ངེས་ཚིག་བཤད་པའོ། །དང་པོ་ལ་གཉིས་ཏེ། རྒྱུ་མདོར་བསྟན་པ་དང༌། ངོ་བོ་མདོར་བསྟན་པའོ། །དང་པོ་ནི། ཁོག་པ་མགྲིན་པ་རྐན་དང་ལྕེ། །སྣ་དང་སྤྱི་བོ་སོ་དང་མཆུ། །ཞེས་པས་ནི་གནས་བསྟན་ཏོ། །དེ་ལས་ཇི་ལྟར་འབྱུང་བའི་ཚུལ་ནི། སྤྱི་དང་རེ་རེའི་ཆ་དག་ལས། །ཕྲད་དང་ཅུང་ཟད་ཕྲད་པ་དང༌། །དོག་པ་དང་ནི་ཡངས་པ་ནས། །ཞེས་པའོ། །དེ་ཡང་ཕྲད་པ་ནི། ལྕེ་རྐན་སོ་དང་མཆུ་རྣམས་སོ། །ཅུང་ཟད་ཕྲད་པ་ནི། མགྲིན་སྣ་སྤྱི་བོ་དང་ཁོག་པ་རྣམས་སོ། །དོག་པ་ནི། མགུལ་བ་དང༌། སྣ་དང༌། སྤྱི་བོ་རྣམས་སོ། །ཡངས་པ་ནི། རྐན་དང༌། སོ་དང༌། ལྕེ་དང༌། མཆུ་དང༌། ཁོག་པ་རྣམས་སོ། །གཉིས་པ་ངོ་བོ་མདོར་བསྟན་པ་ལ། རྩ་བའི་ང་རོ་བདུན་དུ་བསྟན་པ་དང༌། དེའི་རབ་ཏུ་དབྱེ་བ་རྒྱས་པར་བཤད་པ་དང༌། རྩ་བའི་ང་རོ་དཔེས་བསྟན་པའོ། །དང་པོ་ནི། །དྲང་པོ་སྒྲེང་དང་བཀུག་པ་དང༌། །བསྟོད་པ་དང་ནི་སྨད་པ་དང༌། །བསྒྲིམས་དང་ཀློད་པའི་ང་རོ་འབྱུང༌། །ཞེས་པའོ། །འདི་ཡང་ཨ་ནས་ལིའི་བར་ཏེ། བདུན་པོ་དེ་ལ་ནི་རང་བཞིན་གྱི་ཡི་གེ་ཞེས་བཤད་དོ། །ཨ་ཨི་ཨུ་ནི་རྩ་བའི་ཡི་གེ་དང༌། ལྷག་མ་བཞི་ནི་ཕན་ཚུན་སྦྱར་བའི་ཡི་གེའོ། །དེ་ལ་ཨ་དང་ཨི་སྦྱར་བ་ལས་ཨེ་འབྱུང་བ་དང༌། ཨ་དང་ཨུ་སྦྱར་བ་ལས་ཨོ་འབྱུང་བ་དང༌། ཨ་ཉིད་བསྒྲིམས་ཤིང་ཚེག་དྲག་དང་སྦྱར་བ་ལས་རྀ་འབྱུང་བ་དང༌། ཨ་ཉིད་ཀློད་དེ་འདྲེན་པ་ནི་ལྀ་ཡིན་པ་རྣམས་སོ། །དབྱངས་བདུན་པོ་ལ་རྩ་བའི་ཡི་གེ་དང༌། སྦྱར་བའི་ཡི་གེ་གཉིས་སུ་ཕྱེ་བ་དེ་བཞིན་དུ། གསལ་བྱེད་རྣམས་ལའང་གཉིས་སུ་དབྱེ་བར་བྱ་བ་ལས། སྡེ་པ་ལྔ་པོའི་ཐ་མ་ལྔ་སྤངས་པའི་ཉི་ཤུ་དང༌། ཧ་དང་ཀྵ་སྟེ་ཉེར་གཉིས་པོ་ནི་རྩ་བ་ཡིན་ལ། ཇི་སྐད་དུ། ཨེ་ཨ་ཡའོ། །ཞེས་འབྱུང་བ་ལྟར་ཡ་ནི་ཨི་དང་ཨ་སྦྱར་བ་ལས་བྱུང་བ་ཡིན་ལ། ཇི་སྐད་དུ། ཨོ་ཨ་ཝའོ། །ཞེས་འབྱུང་བ་ལྟར་ཝ་ནི་ཨུ་དང་ཨ་སྦྱར་བ་ལས་བྱུང་བ་ཡིན་ཞིང༌། ར་དང་ལ་ནི་ང་རོའི་སྐབས་སུ་བཤད་པ་དང་མཚུངས་ལ། ཤ་ཥ་ས་གསུམ་ནི་ར་དང་མཚུངས་པ་ཡིན་ཏེ། རྣམ་བཅད་དང་སྦྱར་བ་ལས་བྱུང་བ་ཡིན་པའི་ཕྱིར། ཇི་སྐད་དུ། རྣམ་པར་བཅད་བྱ་ཙའམ་ཚ་ལ་ཤའོ། །ཞེས་སོགས་འབྱུང་བ་ལྟར་རོ། །ང་ཉ་ཎ་ན་མ་ལྔ་ནི་ཨཾ་ཞེས་བྱ་བའི་ནང་དུ་འདུས་པ་ཡིན་ཏེ། ཇི་སྐད་དུ། ང་ཉ་ཎ་ན་མ་རྣམས་སྣ་ལྡན་ནོ། །ཞེས་གསུངས། དེ་ལྟར་ན་རྩ་བའི་ཡི་གེ་ནི་དབྱངས་གསུམ་དང་གསལ་བྱེད་ཉེར་གཉིས་ཏེ་ཉེར་གཉིས་པོ་དེ་ཡང་ཞིབ་མོར་བརྟགས་ན་རྩ་བའི་ཡི་གེ་བཅུ་གཅིག་ཡིན་ཏེ། སྡེ་པ་ལྔའི་གསུམ་པ་རྣམས་ནི་ཀ་ལ་སོགས་པ་དང་པོ་རྣམས་དང་ཨ་ལྡན་པ་ཡིན་ལ། གྷ་ལ་སོགས་པའི་བཞི་པ་རྣམས་ནི་གསུམ་པ་རྣམས་དང་ཧ་ལྡན་པ་ཡིན་ཞིང༌། ཀྵ་ཡང་ཨ་དང་ཀའི་ཆ་ཡིན་པའི་ཕྱིར། དེ་ལྟར་ན་སྡེ་པ་ལྔའི་དང་པོ་གཉིས་པ་རྣམས་དང་ཧ་དང་བཅུ་གཅིག་གོ །དབྱངས་གསུམ་པོའི་རྩ་བ་ཡང་ཨ་ཁོ་ནར་འདུས་པས་དེ་ལྟར་ན་བཅུ་གཉིས་སོ། །བཅུ་གཉིས་པོ་ཡང་ཞིབ་མོར་བརྟགས་ན་རྩ་བའི་ཡི་གེ་བདུན་ཁོ་ན་ཡིན་ཏེ། ཁ་ལ་སོགས་པ་གཉིས་པ་རྣམས་ཀྱང་ཀ་ལ་སོགས་པའི་དང་པོ་རྣམས་ཀྱི་སྒྲའི་ཆ་དང་འབྱུང་ཁུངས་གཅིག་པའི་ཕྱིར། དེ་ལྟར་ན་ཨ་དང་སྡེ་པ་ལྔའི་ཐོག་མ་རྣམས་དང་ཧ་རྣམས་སོ། །འདི་དག་ལ་ཨ་ཀ་ཙ་ཊ་ཏ་པ་ཧ་ཞེས་བྱའོ། །བདུན་པོ་དེ་ཐམས་ཅད་ཀྱི་རྩ་བ་ཡང་ཨ་ཁོ་ནར་འདུས་པས་ཨ་ནི་ཡི་གེ་ཐམས་ཅད་ཀྱི་རྩ་བ་དང་ཕྱི་མོའོ། །གཉིས་པ་དབྱེ་བ་རྒྱས་པར་བཤད་པ་ལ་བཞི་སྟེ། ང་རོ་བཅུ་དྲུག་ཏུ་དབྱེ་བ། བརྒྱ་རྩ་གཉིས་སུ་དབྱེ་བ་དང༌། བརྒྱ་དང་བཅུ་གཉིས་སུ་དབྱེ་བ་དང༌། དེ་ལྟར་དབྱེ་བའི་རྒྱུ་མཚན་བཤད་པའི་སྒོ་ནས་ཞར་བྱུང་གཞན་ཡང་བསྟན་པའོ། །དང་པོ་ནི། དྲང་པོ་བཀུག་དང་སྨད་པ་དང༌། །བསྒྲིམས་པ་དང་ནི་ཀློད་པ་ལ། །གྭར་དང་ཙྭང་གིས་ཕྱེ་བ་དང༌། །ཞེས་པ་ལྔ་པོ་དེ་ལ་རིང་ཐུང་གི་དབྱེ་བས་གཉིས་གཉིས་སུ་ཕྱེ་ནས་བཅུ་དང༌། སྒྲེང་དང་བསྒྲེངས་ཏེ་གཏུགས་པ་དང༌། །སྟོད་དང་བསྟོད་དེ་སྨད་པ་དང༌། །སྣ་ལྡན་རྣམ་པར་བཅད་པ་ཡིས། །ང་རོ་བཅུ་དྲུག་དག་ཏུ་འདོད། །ཅེས་པ་དབྱངས་ཡིག་བཅུ་དྲུག་ཏུ་གྲགས་པ་དེ་ཉིད་ཡིན་ལ། ཀ་ལཱ་པར་བཅུ་བཞིར་བཤད་པ་ནི། ཨཾ་དང་ཨ་གཉིས་མི་འདྲེན་པ་ཡིན་ལ། དེའི་ཤེས་བྱེད་ཀྱང་རྗེས་སུ་ང་རོ་དང་རྣམ་བཅད་གཉིས་ནི་གསལ་བྱེད་ལས་བྱུང་བ་ཡིན་ལ། ཨ་གཉིས་པོ་ནི་དེ་དག་བརྗོད་པའི་རྟེན་ཙམ་དུ་བཤད་པ་ཡིན་གྱི། རང་གི་ངོ་བོའི་ནང་དུ་མ་འདུས་པ་མེད་དོ། །གཉིས་པ་ལ་གཉིས་ཏེ། གསལ་བྱེད་ལྔ་བཅུ་རྩ་བཞིར་དབྱེ་བ་དང༌། གསལ་བྱེད་བཞི་བཅུ་རྩ་བརྒྱད་དུ་དབྱེ་བའོ། །དང་པོ་ནི། ང་རོ་དག་གིས་གསལ་བྱེད་ནི། །དྲང་པོ་བཀུག་དང་སྨད་པ་ལ། །ཞེས་པ་ནི་རྩ་བའི་དབྱངས་གསུམ་པོ་ལའོ། །འདྲེན་པའི་རིང་ཐུང་གསུམ་ཡོད་དེ། །ཞེས་པ་ཐུང་ངུ་དང་རིང་པོ་དང་ཤིན་ཏུ་རིང་པོའོ། །དེ་ལ་ཆེ་འབྲིང་རྣམ་པ་གསུམ་ཞེས་པ་གསུམ་པོ་དེ་རེ་རེ་ལའང་གསུམ་གསུམ་དུ་ཕྱེ་བ་སྟེ། གསུམ་པོའི་ཁྱད་པར་ནི་འོག་ནས། ཨུད་ཏད་ཏ་ནི་མཚུངས་གཉིས་གཅིག །ཅེས་པའི་སྐབས་སུ་འབྱུང་ངོ༌། །འདི་ཡང་སྲབ་འཐུག་གིས་ཕྱེ་བ་ཡིན་གྱི། རིང་ཐུང་གི་དབྱེ་བ་ནི་མ་ཡིན་ནོ། །དེ་ལྟར་དགུ་པོ་དེ་རེ་རེ་ལ་སྣ་ལྡན་ལྔ་པོ་གང་རུང་དང་ལྡན་མི་ལྡན་གཉིས་གཉིས་སུ་ཕྱེ་བས་བཅོ་བརྒྱད་དུ་འགྱུར་ལ། བཅོ་བརྒྱད་པ་ཕྲག་གསུམ་བསྡོམས་པས་ལྔ་བཅུ་རྩ་བཞིའོ། །ཞེས་འཆད་པ་ནི། དེ་དགུ་སྣ་ལྡན་བཅོ་བརྒྱད་དོ། །ཞེས་པའོ། །གཉིས་པ་བཞི་བཅུ་རྩ་བརྒྱད་དུ་དབྱེ་བ་ནི། གསལ་བར་བྱ་བ་འདི་ལྟ་སྟེ། །སྒྲེང་དང་སྟོད་ལ་ཐུང་བ་སྟེ། །སྒྲིམ་དང་ཀློད་ལ་རིང་པོའོ། །ཞེས་པ་དབྱངས་ཡིག་རྫས་ཀྱི་སྒོ་ནས་དགུ་ཡོད་པ་ལས། རྩ་བའི་ཡི་གེ་གསུམ་ལ་བཅོ་བརྒྱད་ཕྲག་གསུམ་གསུམ་དུ་ཕྱེ་བ་དེའི་ལྷག་མ་དྲུག་ཡོད་པ་ལས་ཨེ་ཨོ་གཉིས་ལ་ཐུང་ངུ་མི་སྲིད་ཅིང༌། རྀ་ལྀ་གཉིས་ལ་རིང་པོ་མི་སྲིད་པས་བཞི་པོ་རེ་རེ་ལ་གཉིས་གཉིས་སུ་ཕྱེ་ཞིང༌། གཉིས་པོ་རེ་རེ་ལའང་ཆེ་འབྲིང་ཆུང་ངུ་གསུམ་གསུམ་དུ་ཕྱེ་བས་དྲུག་ཏུ་འགྱུར་ཞིང༌། དྲུག་པོ་རེ་རེ་ལ་སྣ་ལྡན་ཡིན་མིན་གཉིས་གཉིས་སུ་ཕྱེ་བས་བཅུ་གཉིས་སུ་འགྱུར་ཞེས་པའོ། །དེ་ལྟར་ན་བཅུ་གཉིས་པ་ཚན་པ་བཞི་ལ་བཞི་བཅུ་རྩ་བརྒྱད། སྔ་མའི་བཅོ་བརྒྱད་ཕྲག་གསུམ་དང་བསྡོམས་པས་བརྒྱ་དང་གཉིས་སོ། །ཞེས་སྟོན་པ་ནི། བཅུ་གཉིས་ཡིན་ཏེ་བརྒྱ་རྩ་གཉིས། །ཞེས་པའོ། །དེ་ལྟར་བཤད་པ་ན་གོང་དུ་དབྱངས་ཡིག་བཅུ་དྲུག་ཏུ་བཤད་ཀྱང་འདིར་གསལ་བའི་དབྱེ་བ་འཆད་པ་ན་བཅུ་བཞི་ཉིད་དུ་འདུས་པ་ཡིན་ཏེ། རྗེས་སུ་ང་རོ་ལ་ནི་སྣ་ལྡན་གྱི་མིང་གིས་བཏགས་ནས་གོང་མ་བཅུ་བཞི་པོ་དང་སྦྱོར་བར་བྱེད་ཀྱི། ལོགས་སུ་མ་བགྲངས་པའི་ཕྱིར་དང༌། རྣམ་བཅད་ནི་དབྱེ་བར་མ་བཤད་པའི་ཕྱིར། དེ་མི་འཆད་པའི་རྒྱུ་མཚན་ཡང་སྣ་ལྡན་གྱི་སྦྱོར་ཚུལ་ལ་དཔགས་ནས་ཤེས་ནུས་པ་ལ་བསམས་པའོ། །དེ་ལྟར་བརྒྱ་རྩ་གཉིས་ཀྱི་གྲངས་ངེས་བཤད་པ་དེ་ལ་འདི་ལྟར་རྒོལ་བ་བྱུང་ན་ལན་ལྡོན་དཀའ་བ་ཡིན་ཏེ། དེ་ཡང་འདི་ལྟར། དཔྱོད་པ་དང་ལྡན་པ་དག་ན་རེ། དབྱངས་ཡིག་བརྒྱ་རྩ་གཉིས་ཀྱི་གྲངས་ངེས་དེ་འཐད་པ་མ་ཡིན་ཏེ། རྩ་བའི་དབྱངས་གསུམ་ལ་སྣ་ལྡན་གྱི་སྦྱོར་ཚུལ་ཇི་ལྟར་ཡོད་པ་དེ་དབྱངས་ལྷག་མ་བཞི་ལ་ཡང་སྦྱོར་དགོས་པར་མཚུངས་པའི་ཕྱིར་དང༌། སྣ་ལྡན་གང་ལ་སྦྱོར་བའི་གཞི་དེ་ལ་རྣམ་བཅད་ཀྱི་སྦྱོར་ཚུལ་ཡོད་པར་ཡང་མཚུངས་པའི་ཕྱིར་ཞེས་པའོ། །རྀ་ལྀ་གཉིས་ལ་རིང་པོ་མི་འབྱུང་ཞེས་པའི་དོན་ནི། ཤིན་ཏུ་རིང་པོ་མེད་པ་ལ་འཆད་དགོས་པ་ཡིན་ཏེ། དེ་ལས་གཞན་དུ་སྤྱིར་རིང་པོ་མེད་པ་ལ་བཤད་ན། བཅུ་གཉིས་ཡིན་ཏེ། ཞེས་པ་འཆད་མི་ཤེས་པའི་ཕྱིར་དང༌། བརྒྱ་དང་གཉིས་འོང་དོན་མེད་པའི་ཕྱིར། འོ་ན་དེ་གཉིས་ལ་དེ་མེད་པའི་རྒྱུ་མཚན་ཅི་ཞེ་ན། རྀ་ལྀ་གཉིས་ལ་ཤིན་ཏུ་རིང་པོ་བརྗོད་ན་ཨིར་འགྱུར་བའི་ཕྱིར། ཞེས་ཤོང་སྟོན་གསུངས་ལ། ས་སྐྱ་པའི་གསུང་གིས་ནི། ལྀ་རྒྱུད་མེད་ཅེས་བྱ་བ་ཡིན་པས་རིང་པོ་མེད་མོད་ཀྱི། ཤིན་ཏུ་རིང་པོ་ཡོད་ལ། རྀ་ལ་ནི་གསུམ་ཀ་ཡོད་དོ། །ཞེས་གསུངས་པ་གཞུང་འདི་དང་འགལ་ཡང་སྡེབ་སྦྱོར་གྱི་བསྟན་བཅོས་ཀྱི་ལུགས་སོ་ཞེས་བཤད་པར་བྱའོ། །གསུམ་པ་བརྒྱ་རྩ་བཅུ་གཉིས་སུ་དབྱེ་བ་ནི། སྤྱིར་ནི་བརྒྱ་དང་བཅུ་རྩ་གཉིས། །རང་གནས་དང་ནི་བཅུ་གསུམ་སྟེ། །ཞེས་པ་བརྒྱ་རྩ་གཉིས་པོའི་སྟེང་དུ་ཡི་གེ་རྣམས་ཀྱི་ཐུན་མོང་གི་འབྱུང་ཁུངས་ཁོག་པ་ལ་སོགས་པ་བརྒྱད། རྐྱེན་གྱི་རྣམ་པ་གང་ཡང་རུང་བ་གཅིག་གིས་སྐྱེད་པའི་ཆ་ཤས་གཅིག་སྟེ་དགུ་བསྣན་པས་བརྒྱ་དང་བཅུ་རྩ་གཅིག ། རང་གནས་ཀྱི་སྐྱེད་པ་གཙོ་ཆེ་བ་དང་བཅུ་གཉིས་སོ། །བཅུ་གསུམ་ཞེས་འབྱུང་བ་ལྟར་ན་ཡི་གེ་རང་ཉིད་བསྣན་པའོ། །ཞེས་འཆད་པ་དག་སྣང་མོད་ཀྱང་ཡི་གེ་མ་དག་པས། སྤྱིར་ནི་བརྒྱ་དང་བཅུ་རྩ་གཅིག །རང་གནས་དང་ནི་བཅུ་གཉིས་སོ། །བཞི་པ་ནི། ཡི་གེ་གཅིག་གི་རྣམ་པའི་ཆ། །ངག་གི་འདུ་བྱེད་ཚོགས་པའོ། །ཞེས་པ་ནི་རང་གནས་འདྲེན་པའི་རྒྱུ་མཚན་ཏེ། ཡི་གེ་གཅིག་ཅེས་པ་གསལ་བྱེད་ཀྱི་དབང་དུ་བྱས་པའོ། །ལྔ་པ་ཞར་བྱུང་ནི། དུས་གཅིག་ཏུ་ནི་བཅུ་གཅིག་གམ། །ཞེས་བཤད་མ་ཐག་པ་བཅུ་གཅིག་པོ་དེའོ། །སྣ་ལྡན་དང་ནི་བཅུ་གཉིས་ཏེ། །ཞེས་པ་སྣ་ལྡན་གྱི་ཡི་གེ་རྣམས་ཀྱི་དབང་དུ་བྱས་པའོ། །རང་གི་གནས་དང་བཅུ་གསུམ་མོ། །ཞེས་པ་རང་གནས་ཤས་ཆེ་བའི་དབང་དུ་བྱས་པ་ཡིན་གྱི། འབྱུང་གནས་བརྒྱད་ཀྱི་ནང་དུ་མ་འདུས་པ་མེད་དོ། །གསུམ་པ་ང་རོ་དཔེས་བསྟན་པ་ལ་གཉིས་ཏེ། ལུས་ཀྱི་རྣམ་འགྱུར་གྱི་དཔེས་བསྟན་པ་དང༌། ཕྱི་རོལ་གཟུགས་དབྱིབས་ཀྱི་དཔེས་བསྟན་པའོ། །དང་པོ་ནི། མཚོན་འདེབས་གར་དང་ལས་བྱེད་དང༌། །སྟབས་འགྲོས་ལྟ་སྟངས་བྱེ་བྲག་དང༌། །རྐང་ལག་མིག་གི་འགྱུར་བག་གིས། །ལུས་ཀྱི་འདུ་བྱེད་བདུན་པོ་ལྟར། །ངག་གི་འདུ་བྱེད་དེ་བཞིན་ནོ། །ལུས་ཀྱི་འདུ་བྱེད་བདུན་པོ་ནི། །ཐད་ཀར་བལྟ་དང་གྱེན་དུ་བལྟ། །དེ་བཞིན་བཟློག་སྟེ་བལྟ་བ་དང༌། །བསྟོད་དེ་བལྟ་དང་སྨད་དེ་བལྟ། །བསྒྲིམས་དང་ཀློད་དེ་བལྟ་བ་ལྟར། །གར་ལ་སོགས་པ་དེ་བཞིན་ནོ། །ཞེས་པའོ། །གཉིས་པ་ནི། དེ་སྟོན་དབྱིབས་ཀྱི་གནས་ལུགས་ཀྱང༌། །མདའ་དང་བསེ་རུ་གླང་ཆེན་སྣ། །གདུགས་དང་རྐང་རྟེན་ལྟ་བུ་དང༌། །མེ་རི་ཆུ་ཡི་དཀྱིལ་འཁོར་ལྟར། །ཐད་ཀ་ཟུར་དང་ཟུར་ལོགས་དང༌། །སྟེང་འོག་རང་གི་ལུས་རྣམས་ལས། །གནས་པའི་བརྡའ་འདིར་ཤེས་པར་བྱ། །ཞེས་པའོ། །གཉིས་པ་རྒྱས་པར་བཤད་པ་ལ། ཡི་གེའི་རྒྱུ་རྒྱས་པར་བཤད་པ་དང༌། རང་གི་ངོ་བོ་རྒྱས་པར་བཤད་པའོ། །དང་པོ་ལ་གཉིས་ཏེ། ཡི་གེ་རྣམས་རྒྱུ་བདུན་ལས་ཇི་ལྟར་འབྱུང་བའི་ཚུལ་དང༌། རྒྱུ་བདུན་པོའི་རང་བཞིན་ངེས་པར་བྱ་བའོ། །དང་པོ་ནི། དེས་བསྟན་བརྡའ་ཅན་འབྱུང་བ་ན། །ལྕགས་རྣམས་ལ་ནི་ཁབ་ལེན་བཞིན། །རྣམ་རྟོག་དབང་གིས་གནས་རྣམས་གཡོ། ཇི་ལྟར་གནས་གཞི་མེད་བཞིན་དུ། །མཁའ་ལ་འདབ་སྐྱོད་རླུང་འབྱུང་ལྟར། །རྣམ་པར་རྟོག་པ་སྐྱོད་པ་ན། །ལུས་ལ་རབ་ཏུ་གཡོ་བར་འགྱུར། །གཡོ་རླུང་རབ་ཏུ་གཡོས་པ་ཡིས། །བྱེད་པ་ཀུན་ཏུ་བསྐྱོད་པ་ན། །དོག་དང་ཡངས་པའི་གནས་རྣམས་སུ། །ཕྲད་དང་ཅུང་ཟད་ཕྲད་པར་བྱེད། །དེའི་ཚེ་ནི་ཤྭ་ས་ཞེས་པའི། །རླུང་དང་ལྷན་ཅིག་འབྱུང་བ་སྟེ། །ཇི་ལྟར་གཟུགས་ལ་འབྱུང་བ་བཞིན། །ང་རོ་ལ་ནི་བརྟེན་བཞིན་དུ། །རྣམ་རྟོག་རང་གི་སྣང་ཆ་ལས། །གཟུགས་བརྙན་བཞིན་དུ་ཆ་མཉམ་སྐྱེ། །ཞེས་པའོ། །གཉིས་པ་རྒྱུ་བདུན་པོའི་རང་བཞིན་ངེས་པར་བྱ་བ་ལ་གཉིས་ཏེ། སྤྱིར་བསྟན་པ་དང་སོ་སོར་བཤད་པའོ། །དང་པོ་ནི། གནས་རྣམས་དང་ནི་བྱེད་པ་དང༌། །རྣམ་པར་རྟོག་དང་རླུང་གཉིས་དང༌། །ང་རོ་གསལ་བྱེད་སྣང་ཆ་ཡིས། །ངག་གི་འདུ་བྱེད་ཀུན་ཏུ་བསྐྱེད། །གཉིས་པ་སོ་སོར་བཤད་པ་ནི། །རྒྱུ་བདུན་དག་ལས་འབྱུང་བ་ནི། །གནས་རྣམས་གཞི་ཡི་རྒྱུད་ཡིན་ཏེ། །བྱེད་པ་འབྱིན་པར་བྱེད་པའི་རྒྱུ། །དེ་བཞིན་རྣམ་རྟོག་བསྐུལ་བའི་རྒྱུ། །ཇི་ལྟར་ཤིང་ལས་རླུང་བཞིན་དུ། །བྱེད་པ་སྐྱོད་རྒྱུ་བ་ཡ་ཏའོ། །སྐྱེས་བུ་དང་ནི་བཞོན་པ་བཞིན། །ལྷན་ཅིག་འབྱུང་རྒྱུ་ནི་ཤྭ་ས། །ང་རོ་རྣམས་དང་གསལ་བྱེད་ནི། །ཀུན་ཏུ་ཁྱབ་པར་འགྲོ་བའི་རྒྱུ། །སྣང་ཆ་འདྲ་བར་འབྱུང་བ་ནི། །སྐལ་བ་མཉམ་པའི་རྒྱུ་ཞེས་བྱ། །ཞེས་པའོ། །དེ་ཡང་འདི་ལྟར། གཞིའི་རྒྱུ་དང༌། འབྱིན་པའི་རྒྱུ་དང༌། སྐུལ་པའི་རྒྱུ་དང༌སྐྱོད་པའི་དང༌། ལྷན་ཅིག་འབྱུང་བའི་དང༌། ཀུན་ཏུ་འགྲོ་བའི་དང༌། སྐལ་པ་མཉམ་པའི་རྒྱུ་སྟེ་བདུན་ནོ། །དེ་ལ་ས་སྐྱ་པཎྜི་ཏའི་གསུང་གིས། དང་པོ་བཞི་སྔོན་དུ་འགྲོ་བའི་རྒྱུ་དང༌། ཕྱི་མ་གསུམ་སྐལ་བ་མཉམ་པའི་རྒྱུར་བཞེད། དབུས་པ་བློ་གསལ་གྱིས་ནི། ཇི་སྐད་དུ། བཞི་ནི་སྔོན་དུ་འགྲོ་བའི་རྒྱུ། །ལྷག་མ་ལྷན་ཅིག་འབྱུང་བར་བཞེད། །ཡང་ན་རྣམ་རྟོག་ཉེར་ལེན་རྒྱུ། །ལྷག་མ་ལྷན་ཅིག་བྱེད་པར་ཤེས། །ཞེས་བཤད་དོ། །འདིར་བརྟགས་པ་ནི། ཁོག་པ་དང་མགྲིན་པ་ལ་སོགས་པ་ཡི་གེ་གང་ནས་འབྱུང་བའི་གནས་ལ་ནི་གཞིའི་རྒྱུ་ཞེས་བྱ་ལ། དཔེར་ན། དྲིལ་བུའི་སྒྲ་གང་ནས་འབྱུང་བའི་སྦུབས་དང་འདྲའོ། །རྐན་ལྕེ་སྦྱར་བ་དང༌། སོ་ལྕེ་སྦྱར་བ་དང༌། མཆུ་གཉིས་སྦྱར་བ་ལྟ་བུ་ལ་ནི་འབྱིན་པར་བྱེད་པའི་རྒྱུ་ཞེས་བྱ་ལ། དྲིལ་བུའི་ལྕེ་དང་འདྲའོ། །ཀུན་སློང་གི་རྣམ་པར་རྟོག་པ་ལ་ནི་སྐུལ་བའི་རྒྱུ་ཞེས་བྱ་ལ། དེ་ནི་དྲིལ་བུ་བསིལ་བར་བྱེད་པའི་སྐྱེས་བུ་དང་འདྲའོ། །བ་ཡ་ཏ་ཞེས་བྱ་བའི། རླུང་ལ་ནི་སྐྱོད་པར་བྱེད་པའི་རྒྱུ་ཞེས་བྱ་ལ། དྲིལ་བུའི་ལྕེ་སྐྱོད་པར་བྱེད་པའི་རླུང་གི་ཤུགས་དང་འདྲའོ། །བཞི་པོ་དེ་དག་ནི་རང་འབྲས་ཡི་གེའི་སྔ་རོལ་དུ་ངེས་པར་འབྱུང་དགོས་པས་སྐྱེད་པའི་རྒྱུ་ཡིན་ལ། ནི་ཤྭ་ས་ཞེས་བྱ་བ་ནི་དབུགས་ཀྱི་སྐད་དོད་ཡིན་ལ། དེ་ནི་ལྷན་ཅིག་འབྱུང་བའི་རྒྱུ་ཡིན་ཏེ། ཡི་གེའི་སྒྲ་རྣམས་ནི་དབུགས་དང་རྐན་ལྷན་ཅིག་སྐྱེ་འགག་བྱེད་པའི་ཕྱིར་དང༌། དབུགས་ཀྱི་རྟ་ལ་ཞོན་པའི་ཕྱིར་དབྱངས་བདུན་དང་གསལ་བྱེད་བཅོ་བརྒྱད་པོ་རྣམས་ལ་ནི་ཀུན་ཏུ་འགྲོ་བའི་རྒྱུ་ཞེས་བྱ་ལ། འབྲས་བུ་འབྱུང་འགྱུར་གཟུགས་གང་ན་ཡོད་པ་དེ་ན་རྒྱུ་འབྱུང་བའི་གཟུགས་ཀྱིས་ཁྱབ་པ་བཞིན་ནོ། །རྟོག་པ་ལ་དབྱངས་གསལ་གྱི་ཡི་གེ་དེ་དང་དེར་སྣང་བའི་ཤེས་རྣམ་ལ་ནི་སྐལ་བ་མཉམ་པའི་རྒྱུ་ཞེས་བྱ་སྟེ། ཡི་གེ་རང་རང་གི་རིགས་འདྲའི་རྒྱུན་སྔ་མ་ཡིན་པའི་ཕྱིར། དཔེར་ན་བྱད་བཞིན་དང་དེའི་གཟུགས་བརྙན་བཞིན་ནོ། །དེ་ཡང་འདི་ལྟར་ཤེས་དགོས་ཏེ། ཡི་གེ་དངོས་ནི་རྣམ་པར་རྟོག་པ་ལ་དེ་དང་དེར་སྣང་བའི་ཤེས་རྣམ་ལ་བྱ་ལ། དེ་ལས་གཟུགས་བརྙན་གྱི་ཚུལ་དུ་བྱུང་བའི་སྒྲ་ཉན་ཤེས་ཀྱིས་ཐོས་པ་དེ་ནི་ཡི་གེའི་གཟུགས་བརྙན་ནམ་འབྲས་བུ་ཡིན་གྱི། ཡི་གེ་དངོས་མ་ཡིན་ནོ། །དེ་ལྟར་ན་ཡི་གེ་དངོས་དང༌། དེ་ཀུན་ནས་སློང་བའི་རྟོག་པ་དང༌། ཡི་གེ་དེའི་འབྲས་བུར་གྱུར་པའི་སྒྲ་སྙན་ཉན་ཤེས་ཀྱིས་ཐོས་པ་དང་གསུམ་མོ། །དོན་དེ་ལ་དགོངས་ནས། ཡི་གེ་ཀུན་སློང་ཤེས་པ་ལས། །སྐྱེ་ལ། ཞེས་དང༌། ཤེས་པས་སྒྲ་སྐྱེའོ། །དེ་ཡི་ཁྱད་པར་ཅན་དེ་ནི། །སྣང་བས་ངེས་པར་འགྱུར་བ་ཡིན། །ཞེས་གསུངས་སོ། །དེ་ལྟ་མོད་ཀྱི་གཞུང་འདིར་ཡི་གེའི་འབྲས་བུ་ལ་ཡི་གེར་བཏགས་ནས། ཡི་གེ་དངོས་སུ་འཆད་རྒྱུ་དེ་སྐལ་བ་མཉམ་པའི་རྒྱུར་བཤད་དོ། །གཉིས་པ་ཡི་གེ་རྒྱས་པར་བཤད་པ་ལ། གནས་ཀྱི་ཡི་གེ་རྒྱས་པར་བཤད་པ་དང༌། རྩ་བའི་ཡི་གེ་རྒྱས་པར་བཤད་པའོ། །དང་པོ་ལ་ལྔ་སྟེ། འབྲས་བུའི་དབྱེ་བ། གྲངས་ཀྱི་དབྱེ་བ། གནས་ཀྱི་དབྱེ་བ། འདྲེན་པའི་དབྱེ་བ། འབྱིན་པའི་རྐྱེན་བཤད་པའོ། །དང་པོ་ནི། དེ་ལ་གདངས་ཀྱི་བྱེ་བྲག་ནི། །རྒྱུ་རྣམས་དག་གིས་ཕྱེ་བ་སྟེ། །སྔོན་དུ་སོང་བར་རིག་པར་བྱ། །དེ་ལ་རྒྱུ་དང་རང་བཞིན་ནོ། །ཞེས་པ་རྒྱུ་ནི་བཤད་མ་ཐག་པ་བདུན་དང༌། རང་བཞིན་ནི་ང་རོ་བདུན་པོ་དེའོ། །གཉིས་པ་ནི། ང་རོ་དྲང་པོ་ལས་བྱུང་བ། །ཀ་སོགས་སྡེ་ནས་རིམ་བཞིན་དུ། །སྡེ་ལྔ་དག་དང་ཨནྟཥྛ། །ཨུསྨ་ཤྭ་དང་མཐར་ཟད་དོ། །ཞེས་པ་སྡེ་པ་ལྔ་ནི་ང་རོ་དྲང་པོ་ཨ་ཐུང་ཞུགས་པ་དག་གོ། །ཨནྟཥྛ་ཞེས་པ་མཐར་གནས་ཏེ་སྡེ་པའི་མཐའ་ན་གནས་པས་སོ། །མཚན་གཞི་ནི་ཡ་ར་ལ་ཝ་བཞིའོ། །ཨུསྨ་ཥ་ནི་དྲོ་བ་སྟེ། དེ་དག་འདོན་པ་ན་དབུགས་དྲོ་བ་འབྱུང་བའི་ཕྱིར། མཚན་གཞི་ནི་ཤ་ཥ་ས་ཧ་དང་བཞིའོ། །མཐར་ཟད་ཅེས་པ་ནི། ཀྵ་ཡིག་གི་མིང་ཡིན་ལ། དེ་ཡང་ཀྵྱནྟ་ཞེས་པ་མཐར་ཟད་པ་དང་མ་ལུས་པ་ལ་འཇུག་པས་སོ། །དེ་ལྟར་ན་སུམ་ཅུ་རྩ་བཞི་པོ་དེ་དག་ལ་གནས་ཀྱི་ཡི་གེ་ཞེས་ཀྱང་བྱ། མིང་གི་ཡི་གེ་ཞེས་ཀྱང་བྱ། ཕོའི་ཡི་གེ་ཞེས་ཀྱང་བྱའོ། །ཞེས་སྟོན་པ་ནི། གནས་ཀྱི་ཡི་གེ་སུམ་ཅུ་སྟེ། །མིང་དང་ཕོ་ཞེས་གྲགས་པའོ། །ཞེས་པའོ། །དེ་ཡང་སྤྱིར་ཡི་གེ་ལ་སྒྲའི་ཡི་གེ་དང༌། གནས་ཀྱི་ཡི་གེ་ཞེས་བྱ་བ་གཉིས་སུ་འབྱེད་ཅིང༌། དེ་ཡང་དབྱངས་ཀྱི་ང་རོ་རྣམས་ལ་ནི་སྒྲའི་ཡི་གེ་ཞེས་བྱའོ། །གསུམ་པ་གནས་ཀྱི་དབྱེ་བ་ནི། དེ་ལ་དང་པོའི་སྡེ་པ་དང༌། ཨུསྨ་ཤྭའི་བཞི་པ་ནི། །བཅད་པར་བྱས་པ་མགྲིན་པ་ལས། །གཉིས་པ་དང་ནི་ཨནྟཥྛའི། །དང་པོ་ཨུསྨའི་དང་པོ་རྣམས། །རྐན་ལས་རབ་ཏུ་འབྱུང་བ་ཡིན། །གསུམ་པ་དག་དང་ཨནྟཥྛའི། །གསུམ་པ་ཨུསྨའི་གཉིས་པ་རྣམས། །སྤྱི་བོ་ལས་ནི་རབ་ཏུ་འབྱུང༌། །བཞི་པ་དང་ནི་ཨནྟཥྛའི། །བཞི་པ་ཨུསྨའི་གསུམ་པ་རྣམས། །སོ་ཡི་ཆ་ལས་ཀུན་ཏུ་འབྱུང༌། །ལྔ་པ་དང་ནི་ཨནྟཥྛའི། །གཉིས་པ་མཆུ་ལས་འབྱུང་བ་ཡིན། །མཐར་ཟད་མགུལ་དང་སྤྱི་བོ་ལས། །ཞེས་པའོ། །དེ་ཡང་གཞུང་འདིའི་ལུགས་ལ་མཐར་གནས་ཀྱི་གོ་རིམ་ནི། ཡ་ཝ་ར་ལ་ཞེས་འདོན་དགོས་པར་སྣང་བས་གཞན་དང་མི་མཚུངས་པ་ཉིད་དུ་གོ་བར་བྱའོ། །བཞི་པ་འདྲེན་པའི་དབྱེ་བ་ནི། སྡེ་ལྔ་དག་ལས་ལྔ་ལྔ་པོ། །དང་པོ་རང་གནས་དྲག་པོ་སྟེ། །གཉིས་པ་འབྲིང་དང་སྤྱི་བོའི་ཆ། །གསུམ་པ་རྣམས་ནི་ཞན་པ་སྟེ། །མཧཱ་པྲཱ་ཎ་ཞེས་བྱ་བའི། །བཞི་པ་རང་གནས་ཁོང་ནས་ཏེ། །ཨ་ནུ་སྭ་ར་ཞེས་བྱ་བའི། །ལྔ་པ་རང་གནས་སྣ་ལས་འབྱུང༌། །ཞེས་པའོ། །དེ་ཡང་མཧཱ་པྲཱ་ཎ་ཞེས་པ་ནི་སྲོག་ཆེན་པོ་ཞེས་བྱ་བ་ཡིན་ལ། དེའི་དོན་ཡང་གོང་དུ་ང་རོ་ལ་དགུར་དབྱེ་བའི་སྐབས་སུ། ང་རོ་གཉིས་ཀྱི་གདངས་ཅན་ལ་ཆེན་པོར་བཤད་པ་དེ་ཉིད་དོ། །ཨ་ནུ་སྭ་ར་ཞེས་པ་ནི། རྗེས་དབྱངས་སམ་རྗེས་སུ་ང་རོ་ཞེས་པ་ཡིན་ལ། དེ་ཡང་སྡེ་པ་ལྔའི་ཐ་མ་ལྔ་པོ་དེ་སྐབས་ལ་ལ་ཞིག་ཏུ། ཀླད་སྐོར་རམ། ཐིག་ལེའི་རྣམ་པ་ཅན་དུ་འདྲི་དགོས་པའི་རྒྱུ་མཚན་གྱིས་དེ་སྐད་ཅེས་བྱའོ། །འོ་ན་ཀླད་སྐོར་ལ་གཟུགས་གཅིག་ལས་མེད་པས། ང་ཉ་ཎ་ན་མ་བཞིའི་ཁྱད་པར་གང་གིས་དབྱེ་ཞེ་ན། ཇི་སྐད་དུ། མ་གསལ་བྱེད་ལ་རྗེས་སུ་ང་རོའོ། །སྡེ་པ་ལ་དེའི་སྡེ་པའི་ལྔ་པར་ཡང་ནའོ། །ཞེས་གསུངས་ལ། ཇི་ལྟར་ཀློག་པའི་ཚུལ་ཡང༌། ཡི་གེའི་མདོ་ལས། འོག་ཏུ་རང་གི་རིགས་མཐོང་ན། །ཐ་མའི་ཡི་གེའི་དབང་དུ་བཀླག། །ཤད་ཡོད་ན་ནི་དེ་ཉིད་དེ། །ཤད་མེད་ན་ནི་འོག་མ་བཙན། །ཞེས་འཆད་དོ། །ལྔ་པ་འབྱིན་པའི་རྐྱེན་བཤད་པ་ནི། མགུལ་དང་སྣ་དང་ཀླད་པའི་སྦུབས། །དོག་པ་ཡིན་ཏེ་ཡངས་པ་གཞན། །རྐན་དང་སོ་དང་ལྕེ་དང་མཆུ། །ཕྲད་པ་ཡིན་ཏེ་གཞན་ཞེས་བྱ། །ཞེས་པའོ། །གཉིས་པ་རྩ་བའི་ཡི་གེ་རྒྱས་པར་བཤད་པ་ལ་བཞི་སྟེ། ཡི་གེའི་ལྡང་ཚད་བཤད་པ་དང༌། འདྲེན་པའི་ཁྱད་པར་བཤད་པ་དང༌། གནས་ཀྱི་ཁྱད་པར་བཤད་པ་དང༌། སྤྱིའི་དོན་བསྡུ་བའོ། །དང་པོ་ནི། གནས་ཆའི་ཡི་གེ་ཇི་སྙེད་ཀྱང༌། །ང་རོ་གཅིག་གིས་བཅིངས་པ་ལ། །དེ་ལ་ཡི་གེ་གཅིག་ཅེས་བརྗོད། །ཤིན་ཏུ་ཕྲ་བའི་རྣམ་པའི་ཆ། །དེ་ཡང་ཡི་གེ་གཅིག་ཅེས་བྱ། །ཞེས་པ་སྤྱིར་ཡི་གེ་ལ་གནས་སྐབས་ཆ་ནས་གཉིས་ཏེ། དབྱངས་གཅིག་གིས་བཅིངས་པའི་ཡི་གེ་དང༌། མིང་གི་མཐའི་ཡི་གེའོ། །དང་པོ་ནི། ཨོཾ་ཞེས་པ་ལྟ་བུ་ལ་ཡི་གེ་མང་པོ་འདུས་ཀྱང་ང་རོ་གཅིག་གིས་བཅིངས་པས་ཡི་གེ་གཅིག་ཏུ་འཇོག་པ་ལྟ་བུ་ཡིན་ལ། གཉིས་པ་ནི། དཔེར་ན་གཟུགས་རྣམས་བཤིག་ན་རྡུལ་ལ་ཕྲ་རབ་ཀྱི་མཐར་ཐུག་སྟེ། དེ་ལས་ཕྲ་བ་མེད་པ་བཞིན་དུ་མིང་རྣམས་བཤིག་ན་ཤིན་ཏུ་ཕྲ་བའི་མཐར་ཐུག་པ་གསལ་བྱེད་བཅོ་བརྒྱད་ཀྱི་ཆ་ལྟ་བུའོ། །དེ་ལྟ་མོད་ཀྱི་ཚིགས་སུ་བཅད་པ་ལ་སོགས་པའི་ཡི་གེ་བགྲང་བ་ནི་དབྱངས་གཅིག་གིས་བཅིངས་པ་རྣམས་བགྲང་བ་ཡིན་ནོ། །གཉིས་པ་འདྲེན་པའི་ཁྱད་པར་ནི། སྒྲ་འདི་དག་ལ་འདྲེན་པའི་ཆ། །ཨལྤ་པྲ་ཎ་གཉིས་གཅིག་ཡིན། །མཧཱ་པྲ་ཎ་གཅིག་གཉིས་ཡིན། །ཨ་ནུ་སྭ་ར་རྔུབ་པའི་སྒྲ། །བི་སརྫ་ནི་བཅད་པའོ། །ཧྲ་ས་ཐ་མལ་སྒྲ་ཡིན་ཏེ། །དཱྀརྒྷ་དག་ནི་གཉིས་ཀྱི་ཡུན། །པོ་ནུཏྟ་ནི་དེ་བཞིན་གསུམ། །ཨུཏཏྟ་ནི་མཚུངས་གཉིས་གཅིག ། ཨུ་ནུཏྟ་ནི་ཕྱེད་ཆ་ཡིན། །སྭ་ར་ཏ་ནི་རང་སྒྲའོ། །སྣ་ལྡན་ཨ་ནུ་སྭ་རའི་ཆ། །ཨ་ལྡན་ཨ་མེད་ཅེས་བྱ་བ། །ཆེ་བ་དག་དང་ཆུང་བའི་མིང༌། །དྲང་པོ་དག་ལ་ཇི་ལྟ་བར། །ང་རོ་གཞན་ལ་དེ་བཞིན་ནོ། །ཞེས་པ་ཨལྤ་པྲ་ཎ་ནི་སྲོག་ཆུང་ཞེས་པ་སྟེ། ཧཱུྃ་དང༌། ཕཊ་ལྟ་བུའོ། །མ་ཧཱ་པྲ་ཎ་ནི་སྲོག་ཆེན་ཞེས་པ་སྟེ། གྷ་དང་ཛྷ་ལྟ་བུའོ། །ཨ་ནུ་སྭ་ར་ནི་རྗེས་དབྱངས་ཏེ། འདི་ལ་རྔུབ་པའི་སྒྲར་བཤད་པ་ནི་ཨོཾ་ལྟ་བུ་ལ་འགྲིག་ཀྱང་ཧཱུྃ་ལྟ་བུ་ལ་ཅུང་དཀའ་བས་དཔྱད་པར་བྱའོ། །བི་སརྫ་ཞེས་པ་ནི་རྣམ་བཅད་དེ། དྲག་པོར་གཅོད་པ་ཞེས་བྱ་བའི་དོན་ནོ། །འོ་ན་རྣམ་བཅད་འབྱུང་བའི་རྒྱུ་དང་གནས་སྐབས་གང་ཞེ་ན། མཚམས་སྦྱོར་དང་པོ་ལས། སྡེ་ཚན་རྣམས་ཀྱི་དང་པོ་དང༌། གཉིས་པ་དང༌། ཤ་ཥ་ས་རྣམས་ནི་སྒྲ་དང་མི་ལྡན་པའོ། །ཞེས་ཡི་གེ་བཅུ་གཉིས་ནི་སྒྲ་དང་མི་ལྡན་པར་བཤད་ཅིང༌། གཞན་རྣམས་ནི་སྒྲ་དང་ལྡན་པའོ། །ཞེས་ལྷག་མ་ཉི་ཤུ་པོ་སྒྲ་དང་ལྡན་པར་བཤད་པ་ལས་སྒྲ་མེད་རྣམས་ཀྱི་གོང་དུ་ཚེག་དྲག་བྱུང་ན་གོང་མ་དྲག་པོར་བརྗོད་ཅིང༌། དེ་ཡང་ཙ་ཚ་གཉིས་ཀྱི་ཤ་དང༌། ཊ་ཋ་གཉིས་ཀྱི་ཥ་དང༌། ཏ་ཐ་གཉིས་ལ་ས་དང༌། ཀ་ཁ་གཉིས་ལ་ལྕེ་རྩ་ཅན་དང༌། པ་ཕ་གཉིས་ལ་མཆུ་ཅན་དུ་འགྱུར་བ་དང༌། ཤ་ཥ་ས་རྣམས་ལ་རང་གཟུགས་སུ་འགྱུར་བར་བཤད་དོ། །དེ་ཡང་རྣམ་བཅད་ཀྱི་རྒྱུ་ནི་ར་དང་ས་སྲོག་མེད་གཉིས་ཡིན་ཏེ། ཇི་སྐད་དུ། རེ་ཕ་དང་ས་དག་གིས་རྣམ་པར་བཅད་བྱའོ། །ཞེས་འབྱུང་བས་སོ། །དེ་ལྟར་ན་རྣམ་བཅད་ཀྱི་རྒྱུ་དང༌། དེ་ལས་བྱུང་བའི་རྣམ་བཅད་རང་སོར་འཇོག་དགོས་པ་དང༌། དེ་ཡི་གེ་གཞན་དུ་འགྱུར་བ་དང༌། དེ་གང་དུ་བྱུང་བའི་ཡི་གེ་དེ་དྲག་པོར་བཅད་ནས་ཀློག་པའི་ཚུལ་རྣམས་ཁོང་དུ་ཆུད་པར་བྱའོ། །ཁ་ཅིག་རྣམ་བཅད་དང༌། ང་རོ་གཉིས་ཀ་ཡི་གེ་མ་ཡིན་པར་འདོད་པ་ལ་ནི། དབྱངས་ཡིག་བཅུ་དྲུག་ཏུ་བཤད་པ་མི་འཐད་པར་ཐལ་བ་དང༌། རྣམ་བཅུ་དབང་ལྡན་ལ་ཡི་གེ་བཅུ་མ་ཚང་བར་ཐལ་བ་དང༌། སྡེབ་སྦྱོར་རིན་ཆེན་འབྱུང་གནས་ལས། གསལ་བྱེད་སུམ་ཅུ་རྩ་གསུམ་པོའི་སྟེང་དུ་ང་རོ་དང་རྣམ་བཅད་དང་ལྕེ་རྩ་ཅན་དང་མཆུ་ཅན་དེ་བཞི་བསྣན་ནས་གསལ་བྱེད་སུམ་ཅུ་རྩ་བདུན་དུ་བཤད་པ་མི་འཐད་པར་ཐལ་བ་དང༌། ཀ་ལཱ་པར། རྣམ་པར་བཅད་བྱ་ཙའམ་ཚ་ལ་ཤའོ། །ཞེས་སོགས་དང་འགལ་ལོ། །འདིར་ཧྲ་ས་སོགས་གསུམ་ནི་ཐུང་ངུ་དང་རིང་པོ་དང༌། ཤིན་ཏུ་རིང་པོ་སོགས་ཀྱི་མིང་ཡིན་ལ། ཨུ་ཏཏྟ་ནི་ཀ་གཉིས་བརྩེགས་ལྟ་བུ་སྲོག་གཅིག་ལས་མེད་པ་རྣམས་ཡིན་ལ། དེ་ཡང་གོང་གི་ཨལྤ་པྲ་ཎ་དང་མི་འདྲ་བའི་ཁྱད་པར་ནི་འདྲ་མཚུངས་མ་ཡིན་པའི་ཡི་གེ་གཉིས་གྲལ་དུ་བཤིབས་པ་དང༌། འདྲ་མཚུངས་ཀྱི་ཡི་གེ་གཉིས་བརྩེགས་པའི་ཁྱད་པར་རོ། །ཨ་ནུཏྟ་ཏ་ཞེས་པ་ནི་ཡི་གེ་ཕྱེད་པ་ལ་ཆུང་ངུ་ཞེས་བྱ་བའི་ཆ་ཤས་སུ་བཞག་པའོ། །དཔེར་ན་ཕཊ་ཅེས་པ་ལ་ཊ་ཕྱེད་ཀྱི་སྒྲར་ཀློག་དགོས་པ་བཞིན་ནོ། །ས་རི་ཏ་ཞེས་པ་ནི་སྐྱེད་བསྐྱུངས་གང་ཡང་མ་བྱས་པའི་རང་སྒྲའོ། །ཨ་ནུ་སྭ་ར་ནི་རྗེས་དབྱངས་སོ། །ཨ་ལྡན་དང་ཨ་མེད་ཅེས་པ་ནི་ཨ་ཤས་ཆེ་ཆུང་ལ་བྱ་བ་ཡིན་གྱི། ཨ་གཏན་མེད་ནི་མ་ཡིན་ནོ་ཞེས་འགྲེལ་པས་འཆད་ལ། དབུས་པ་བློ་གསལ་ནི། དེ་ལྟར་བཤད་ན་ཀ་ལཱ་པ་དང༌། མི་མཐུན་པས་སྔར་བཤད་པའི་ཡི་གེ་ཉི་ཤུ་དང༌། བཅུ་གསུམ་ལ་རིམ་པ་བཞིན་དུ་འཆད་དགོས་སོ། །ཞེས་གསུང་ངོ༌། །གསུམ་པ་གནས་ཀྱི་ཁྱད་པར་ནི། དེ་ལ་ཅུང་ཟད་གནས་ཆ་ནི། །རྐན་དང་མགུལ་པའི་ཆ་དག་ལས། །སྒྲེང་དང་བཀུག་པའི་ང་རོ་འབྱུང༌། །དེ་བཞིན་མཆུ་ལ་བསྟོད་སྨད་དོ། །བསྒྲིམས་པ་སྤྱི་བོའི་ཆ་ལས་ཏེ། །ཀློད་པ་དག་ནི་སོ་ཡིན་ནོ། །ཞེས་པའོ། །བཞི་པ་སྤྱིའི་དོན་བསྡུ་བ་ནི། འདི་དག་གིས་ནི་བཅིངས་པས་ན། །ཆ་ནི་སྔོན་དུ་བརྗོད་པ་ཡིན། །མི་དེ་མུ་དོ་རྀ་ལྀ་ཡི། །སྒྲ་ཡི་ཆ་དང་ཅི་རིགས་སྦྱར། །ཨ་ཡི་ཆ་ནི་བདུན་དུ་བཅད། །ལྷག་མ་རྣམ་པའི་ཆ་ཞེས་བྱ། །དེ་དག་རེ་རེའི་ཆ་ཡིན་ཏེ། །གང་གང་ཕན་ཚུན་བརྟེན་པ་ནི། །ཀུན་ལ་ཁྱབ་ཕྱིར་སྤྱི་ཡི་ཆ། །དེ་དག་ཡི་གེའི་བྱེ་བྲག་སྟེ། །ཞེས་པའོ། །འདི་དག་གི་ངག་དོན་ནི། དབྱངས་ཡིག་ཨ་ལ་མཚོན་ན་རང་གི་ཆ་དང༌། རྣམ་པའི་ཆ་གཉིས་འབྱུང་ལ། གཉིས་པ་ལ་ཡང་རང་གི་ཆ་དང༌། སྤྱིའི་རྣམ་པའི་ཆ་ཞེས་བྱ་བ་གཉིས་སོ། །དང་པོ་ནི། ཨ་ཞེས་པ་ལྟ་བུ་དང༌། གཉིས་པ་ནི། ཨི་ཨུ་ཨེ་ཨོ་ཞེས་པ་ལྟ་བུའོ། །གསུམ་པ་ནི་ཨོཾ་ཞེས་པ་ལྟ་བུའོ། །དེ་དག་གསལ་བྱེད་སོ་སོ་ལ་ཞུགས་པའི་དབང་གིས། ཀ་ཀི་ཞེས་བྱ་བ་ལ་སོགས་པར་འགྱུར་རོ། །གསུམ་པ་ཡི་གེའི་ངེས་ཚིག་ནི། རྣམ་གྲངས་དུ་མ་མེད་པ་དང༌། །མིང་ཚིག་གསལ་བར་བྱེད་པ་དང༌། དོན་རྣམས་རྗོད་པར་བྱེད་པའི་ཕྱིར། །ཡི་གེ་ཞེས་ནི་བརྗོད་པ་ཡིན། །རང་བཞིན་ལས་དང་དགོས་ཆེད་ཀྱི། །ངེས་ཚིག་ཡིན་ཏེ་གོ་རིམ་བཞིན། །ཚོགས་དང་ལུས་དང་འདུས་པ་ནི། །རྣམ་གྲངས་དག་སྟེ་དེ་བཞིན་སྦྱར། །ཞེས་པའོ། །དེ་ཡང་གོ་རིམ་བཞིན་དུ། ཨཀྵ་ར་ཞེས་པ་དང༌། བྱཉྫཱ་ན་ཞེས་པ་དང༌། ཝརྣ་ཞེས་བྱ་བའི་སྒྲ་ལས་དྲངས་པའོ། །ཅིའི་ཕྱིར་ཚོགས་ཞེས་བྱ་ན། ཀཱ་ཡ་ཞེས་བྱ་བའི་སྒྲ་ལ་ཚོགས་དང༌། ལུས་དང༌། འདུས་པ་ཞེས་བྱ་བ་ཡིན་ལ། མིང་ཚིག་གཉིས་ཀྱི་སྐབས་སུ་ཡང་དེ་བཞིན་དུ་སྦྱར་རོ། །ཞེས་པའི་དོན་ཏོ། །སྤྱིར་ཡི་གེ་ལ་གཉིས་ཏེ། དོན་དམ་པའི་དང༌། ཀུན་རྫོབ་པའིའོ། །འདིར་བཤད་པ་འདི་དག་ནི་ཕྱི་མའི་དབང་དུ་བྱས་པ་ཡིན་ལ། དང་པོ་ནི། སྤྱི་ཙམ་ནས་ཡི་གེའི་མཆོག་ཡིན་ཀྱང་སྒྲས་བརྗོད་དུ་ཡོད་པ་མ་ཡིན་ཏེ། ཇི་སྐད་དུ། ཨ་ནི་ཡིག་འབྲུ་ཀུན་གྱི་མཆོག །དོན་ཆེན་ཡི་གེ་དམ་པ་ཡིན། །ཁོང་ནས་འབྱུང་བ་སྐྱེ་བ་མེད། །ཚིག་ཏུ་བརྗོད་པ་སྤངས་པ་སྟེ། །ཞེས་གསུངས་སོ། །དོན་དམ་པའི་ཡི་གེ་ལ་ཨ་གཅིག་པུས་ཁྱབ་པ་མ་ཡིན་ཏེ། ཡུམ་གྱི་མདོ་ལས་དོན་དམ་པའི་ཡི་གེ་བཞི་བཅུ་རྩ་གཉིས་བཤད་པ་དང༌། དང་པོའི་སངས་རྒྱས་ལས། དོན་དམ་པའི་དབྱངས་གསལ་གྱི་ཡི་གེ་དྲུག་ཅུ་རེ་གཉིས་སུ་མེད་པར་འདུས་པའི་བདག་ཉིད་ལ་སྟོང་པ་ཉིད་དང་སྙིང་རྗེ་དབྱེར་མེད་པའི་སྐུ་དང༌། དོན་དམ་པའི་དཔལ་ལྡན་དུས་ཀྱི་འཁོར་ལོ་ཞེས་བཤད་པ་ཡིན་པས་སོ། །དོན་དམ་པའི་དབྱངས་གསལ་དྲུག་ཅུ་པ་དེ་སྒྲས་བརྗོད་དུ་མེད་ཀྱང་བརྡས་སྟོན་པ་ནི། གྲི་གུག་དང༌། དབྱུག་པ་དང༌། ཐོང་གཤོལ་དང༌། ཐིག་ལེ་དང༌། རྣམ་བཅད་ཀྱི་གཟུགས་ཀྱི་བརྡས་སྟོན་པར་བཤད་ལ། བརྡ་དེ་དག་ཀྱང་དོན་དམ་པར་བརྗོད་མེད་ཀྱི་བརྡ་ཡིན་མོད། ཐ་སྙད་དུ་བརྡ་དེ་དག་ཕྱོགས་གཅིག་ཏུ་སྤུངས་པ་ན་ཨེ་ཝཾ་གི་གཟུགས་སུ་གྲུབ་ཅིང༌། དེ་ཡང་དོན་དམ་པའི་དབྱངས་གསལ་དྲུག་ཅུ་པོ་ཐམས་ཅད་འདུས་པའི་བདག་ཉིད་ཅན་ཡིན་ཏེ། དབྱངས་སུམ་ཅུ་རྩ་གཅིག་ཏུ་འདུས་པ་ཝྃ་དང༌། གསལ་བྱེད་སུམ་ཅུ་རྩ་གཅིག་ཏུ་འདུས་པའི་ཨེའི་གཟུགས་སུ་གྲུབ་པས་སོ། །དེ་ཡང་ཝཾ་ནི་སྟོང་པ་ཆེན་པོ་ཡི་གེ་ལྔའི་བདག་ཉིད་ཅན་ཏེ། དབྱངས་ཡིག་སུམ་ཅུ་པོ་སྡེ་ཚན་ལྔར་བཅད་པ་ལས་སོ། །ཨེ་ཡིག་ནི་ཐིག་ལེ་སྟོང་པ་ཡི་གེ་དྲུག་གི་བདག་ཉིད་ཅན་ཏེ། གསལ་བྱེད་སུམ་ཅུ་པོ་སྡེ་ཚན་དྲུག་ཏུ་བཅད་པ་ལས་སོ། །དེ་ལྟར་བརྗོད་བཅས་ཀྱི་ཨེ་ཝཾ་གིས་ནི་བརྗོད་མེད་དོན་དམ་པའི་ཨེ་ཝཾ་མཚོན་ལ། དོན་དེ་ཡང་གློ་བུར་གྱི་དྲི་མ་མཐའ་དག་དང་བཅས་པའི་ཚེ་གཞི་དུས་ཀྱི་དུས་ཀྱི་འཁོར་ལོ་དང༌། དག་ལ་མ་དག་པའི་སྐབས་སུ་ལམ་དུས་ཀྱི་དང༌། ཤིན་ཏུ་དག་པའི་སྐབས་སུ་འབྲས་དུས་ཀྱི་འཁོར་ལོ་སྟེ། གསུམ་ཀ་ཡང་དོན་དམ་པའི་དབྱངས་གསལ་འདུས་པའི་བདག་ཉིད་ཡིན་ཏེ། ཇི་སྐད་དུ། རྣལ་འབྱོར་དཔལ་ལྡན་དུས་འཁོར་ཀ་ཕྲེང་ལྡན་པའི་ཨ་འདུས་ལས་ཏེ་མི་རྣམས་སྒྲོལ་བའི་དོན་དུའོ། །ཞེས་གསུངས་སོ། །ཡང་དེ་བཞིན་དུ་དོན་དམ་པའི་རྣམ་བཅུ་དབང་ལྡན་གྱི་ཡི་གེ་བཅུ་པོ་ཡང་དེ་བཞིན་ཉིད་ཀྱི་ངོ་བོར་གནས་པ་ཡིན་ཏེ། ཇི་སྐད་དུ། རྣམ་བཅུ་དབང་ལྡན་ཆེ་བ་པོ། །ཐོག་མ་མེད་པ་སྤྲོས་མེད་དག།།དེ་བཞིན་ཉིད་དག་དག་པའི་བདག །ཅེས་གསུངས་སོ། །དེ་ཉིད་སྒྲིབ་པ་དང་བཅས་པའི་ཚེ་མ་དག་པའི་འཇིག་རྟེན་ཁམས་ཀྱི་རྒྱུར་སྣང་བ་ཡིན་ཏེ། ཡཾཾ་ལས་རླུང་གི་དཀྱིལ་འཁོར་ནས། ཧ་ལས་གཟུགས་མེད་ཁམས་ཀྱི་སྲིད་པ་དང༌། རྣམ་བཅད་ལས་ཉི་མ་དང༌། ཐིག་ལེ་ལས་ཟླ་བར་འཆར་བའི་ཕྱིར། མདོར་ན་དོན་དམ་པའི་ཡི་གེ་ལ་ནི་ཡི་གེའི་སྒྲ་བཤད་དང་པོ་ཚང་བ་ཡིན་ཏེ། ཇི་སྐད་དུ། དོན་ཆེན་ཡི་གེ་དམ་པ་སྟེ། །ཞེས་གསུངས་པ་དེ་ཡང༌། དོན་ཆེན་འགྱུར་མེད་དམ་པ་ཡིན། །ཞེས་བྱ་བའི་དོན་ཡིན་པས་སོ། །ཀུན་རྫོབ་པའི་ཡི་གེ་ལ་ནི་སྒྲ་བཤད་གསུམ་ཀ་ཚང་བ་དེའི་ཚེ་ཡི་གེ་དང་མིང་ལ་གཞི་མཐུན་མི་སྲིད་པ་མ་ཡིན་ཏེ། ཤ་ས་དང༌། ཕ་དང་མ་སོགས་ལ་མིང་ཡང་དེ་ལས་གཞན་མེད་པའི་ཕྱིར་དང༌། མངོན་པའི་མཛོད་ལས། ཡི་གེ་མིང་གི་ཆུང་མཐར་ཡང་གསུངས་པ་ཡིན་ནོ། །འོ་ན་ཡི་གེས་བརྗོད་བྱའི་དོན་མི་སྟོན་པར་ཚད་ལྡན་མང་པོ་དག་གིས་བཤད་པ་མ་ཡིན་ནམ་ཞེ་ན། དེ་དག་གི་བསམ་པ་ནི། དཔེར་ན་བུམ་པ་ཞེས་བརྗོད་པའི་མིང་དེའི་ཆ་ཤས་སུ་གྱུར་པའི་ཨུ་དང་མ་ལ་སོགས་པ་རྣམས་ཀྱིས་དེའི་བརྗོད་བྱའི་དོན་ལྟོ་ལྡིར་བ་མི་སྟོན་པ་ལ་བསམས་པའོ། །དེ་ལྟར་ཡི་གེའི་རྣམ་གཞག་འདི། །དེ་བཞིན་ཤེས་ན་ཀུན་རྫོབ་དང༌། །དེ་ཉིད་དམ་པའི་དོན་རིག་ནས། །དེ་བཞིན་གཤེགས་སྙིང་དོན་ཤེས་འགྱུར། །སྨྲ་བའི་སྒོ་མཚོན་ཆ་ལྟ་བུའི་རྣམ་པར་བཤད་པ་སྨྲ་བའི་རྒྱན་ཞེས་བྱ་བ་ལས་ཡི་གེ་རྣམ་པར་བཤད་པའི་ལེའུ་སྟེ་དང་པོའོ།། །།གཉིས་པ་མིང་གི་ཚོགས་བཤད་པ་ལ་གསུམ་སྟེ། མིང་གི་རྒྱུ་དང༌། ངོ་བོ་དང༌། དབྱེ་བའོ། །དང་པོ་ནི། ཇི་ལྟར་རྡུལ་དང་གོང་བུ་བཞིན། །ཡི་གེ་འདུས་པར་གྱུར་པ་ན། །མིང་ནི་རབ་ཏུ་གྲུབ་པར་འགྱུར། །ཞེས་པའོ། །གཉིས་པ་ནི། གང་ཞིག་རྣམ་ཆ་འདུས་པ་ཡིས། །དོན་གྱི་ངོ་བོ་ཉིད་བརྗོད་ན། །རྣམ་ཆ་མང་ངམ་ཉུང་གྱུར་ཀྱང༌། །དེ་ནི་མིང་ཞེས་རབ་ཏུ་བརྗོད། །ཅེས་པ་སྟེ། དཔེར་ན། ལྟོ་ལྡིར་བའི་མིང་བུམ་པ་ལྟ་བུ་ལ་རང་གི་གདགས་གཞིར་གྱུར་པའི་ཡི་གེ་ལྔ་འདུ་དགོས་པ་བཞིན་ནོ། །གཞུང་འདིས་ནི་གསལ་བྱེད་ཀྱི་ཡི་གེ་མ་ལྟ་བུ་ཡང་མིང་དུ་ངེས་པར་བསྟན་པ་ཡིན་ཏེ། རང་གི་ཆ་ཤས་ཡི་གེ་གཉིས་འདུས་ནས་དོན་གྱི་ངོ་བོ་བརྗོད་པའི་ཕྱིར། དེས་དབྱངས་ཡིག་རིང་པོ་དང༌། ཤིན་ཏུ་རིང་པོའང་མཚོན་པར་ནུས་ལ། ཨ་ཐུང་ལ་ནི་དོན་གྱི་ངོ་བོ་སྟོན་པ་ཡོད་ཀྱང༌། རྣམ་ཆ་འདུས་པ་ཞེས་བྱ་བ་དེ་མ་ཚང་བས་ཏེ་འདིར་བསྟན་གྱི་མིང་དུ་མ་གཞག་གོ། དེས་དེ་སྟོན་པ་ཡིན་ཏེ། དོན་དམ་བརྗོད་མེད་ཀྱི་ཨ་དང༌། ཀུན་རྫོབ་བརྗོད་བཅས་ཀྱི་ཨ་ཞེས་པའི་དོན་སྤྱི་གསལ་བ་གཉིས་ཀ་ལ་ཨ་ཞེས་བརྗོད་པའི་སྒྲ་སྤྱི་གསལ་བ་དེ་ལས་གཞན་པའི་སྟོན་བྱེད་ཀྱི་ངག་མེད་པའི་ཕྱིར། གཉིས་པ་དབྱེ་བ་ལ་བཞི་སྟེ། མདོར་བསྟན་པ་དང༌། རྒྱས་པར་བཤད་པ་དང༌། རྩོད་པ་སྤང་བ་དང༌། དོན་ལྡན་བྱེ་བྲག་ཏུ་བཤད་པའོ། །དང་པོ་ནི། དེ་ཡང་མིང་གི་ཐོག་མ་དང༌། །རྗེས་སུ་གྲུབ་པ་རྣམ་པ་གཉིས། །ཞེས་པ་སྟེ། ཐོག་མར་གྲུབ་པ་དང༌། རྗེས་སུ་གྲུབ་པ་ཞེས་བྱ་བའི་མིང་ངོ༌། །གཉིས་པ་ནི། ཐོག་མ་འདོད་རྒྱལ་མིང་ཡིན་ཏེ། །རྗེས་གྲུབ་དག་ནི་དོན་ལྡན་དང༌། །རྣམ་པ་གཉིས་ཀར་འདོད་པ་ཡིན། །དེ་ནི་ངེས་ཚིག་ཡོད་མེད་དོ། །གང་ཞིག་གཞན་ལ་མ་བརྟེན་པར། །བླ་དྭགས་གང་བྱས་ཐོག་མའོ། །དེ་ལ་བརྟེན་པ་རྗེས་གྲུབ་པ། །འདོད་རྒྱལ་དོན་ལྡན་གཉིས་སུ་འདོད། །ཅེས་པའོ། །གསུམ་པ་རྩོད་པ་སྤང་བ་ནི། འདོད་རྒྱལ་གྱི་མིང་ལ་གཉིས་ཡོད་ན་ཐོག་མའི་འདོད་རྒྱལ་ཁོ་ན་ལ་གྲུབ་པའི་མིང་ཞེས་ཟེར་བའི་རྒྱུ་མཚན་ཅི་ཞེ་ན། འདོད་རྒྱལ་དག་ཏུ་མཚུངས་མོད་ཀྱི། །མ་བརྟེན་ཕྱིར་ན་གྲུབ་པ་སྟེ། །མིང་གཞན་གང་ལ་མ་བསྟེན་པར། །གཞན་གྱི་འགལ་བ་མེད་ཕྱིར་རོ། །ཞེས་པ་སྟེ། ཐོག་མའི་མིང་དེ་ལྟར་བཏགས་པ་ལ་མཚན་མ་གཞན་གྱིས་གནོད་པ་མེད་ཅེས་པའི་དོན་ཡིན་ལ། མིང་དོན་གྱི་འབྲེལ་པ་ཚད་མས་གྲུབ་པར་ཡང་བཞག་དཀའ་བ་ཡིན་ཏེ། མིང་ཐམས་ཅད་བརྗོད་འདོད་ཀྱི་དབང་གིས་འཇུག་པའི་ཕྱིར། འོ་ན་ཅི་ཞེ་ན། བརྡ་མ་སྦྱར་གོང་དུ་དེ་གཉིས་ཀྱི་འབྲེལ་བ་ཚད་མས་མི་འགྲུབ་ཀྱང༌། བརྡ་སྦྱར་ཕྱིན་ཆད་ཐ་སྙད་ཀྱི་གྲགས་པས་འགྲུབ་པ་ཡིན་ལ། དེའི་ཚེ་ཡང་ཚད་མ་མི་སྲིད་པ་མ་ཡིན་ཏེ། ཐ་སྙད་འབའ་ཞིག་གྲུབ་ཀྱི་གཏན་ཚིགས་ཡང་དག་ལ་བརྟེན་པའི་རྗེས་དཔག་གིས་འགྲུབ་པས་སོ། །འོ་ན་རྩོད་པ་གཉིས་པ་གྲུབ་པ་དང༌། རྗེས་གྲུབ་ཀྱི་མིང་གཉིས་མིང་གཞན་ལ་བརྟེན་མི་བརྟེན་གྱི་ཁྱད་པར་འབྱུང་བ་ཅི་ཞེ་ན། འཐད་པ་སྒྲུབ་པའི་རིགས་པ་དག །ཆོས་ཉིད་ལ་ནི་བརྟེན་པ་བཞིན། །དོན་ལྡན་མིང་ཡང་དེ་བཞིན་དུ། །འདོད་རྒྱལ་ཐོག་མ་ཉིད་ལ་བརྟེན། །ཅེས་པ་སྟེ། དོན་ལྡན་གྱི་མིང་ནི། ཁྱི་དཀར་པོ་ལ་དུང་ཞེས་བཏགས་པ་ལྟ་བུ་ཡིན་ལ། དེར་འདོགས་པའི་རྒྱུ་མཚན་ནི་དཀར་བ་ཡིན་ལ། དེའི་ཁྱབ་འབྲེལ་ནི་དཀར་པོ་ལ་དུང་ཞེས་འདོད་རྒྱལ་ཐོག་མར་བཏགས་འདུག་པའི་རྒྱུ་མཚན་གྱིས་ཡིན་ཞིང༌། ཐོག་མར་ནི། དེ་ལ་དེའི་མིང་གིས་འདོགས་པའི་རྒྱུ་མཚན་གང་ཡང་མེད་ཅིང༌། མེད་བཞིན་དུ་དེར་བཏགས་པ་ལ་གནོད་བྱེད་ཀྱང་ཡོད་པ་མ་ཡིན་ནོ། །དེ་འདོད་རྒྱལ་དུ་སྒྲུབ་པའི་དཔེ་ནི་ལ་མེ་ལྡན་དུ་སྒྲུབ་པ་ལ་དུ་བ་ཡོད་པ་རྟགས་སུ་བཀོད་པ་ནི་འཐད་པ་སྒྲུབ་པའི་རིགས་པ་ཡིན་ལ། དེའི་ཁྱབ་འབྲེལ་ནི་ཆོས་ཉིད་ཀྱིས་འགྲུབ་པ་ཡིན་ཏེ། དུ་བ་མེ་ཁོ་ན་ལས་སྐྱེ་བ་ཆོས་ཉིད་ཡིན་པས་སོ། །ཞེས་པའི་དོན་ནོ། །སྤྱིར་ཆོས་ཉིད་ཅེས་པ་ནི་ཆོས་ཀྱི་གནས་ཚུལ་ལ་ཟེར་བ་ཡིན་ལ། དེ་ལའང་གཉིས་ཏེ། ཀུན་རྫོབ་ཀྱི་དང༌། དོན་དམ་པའི་གནས་ཚུལ་ལོ། །འདིར་ནི་དང་པོའི་དབང་དུ་བྱས་པ་ཡིན་ཏེ། གནས་ཚུལ་གཉིས་པའི་དབང་དུ་བྱས་ན་དེ་དེ་ལས་འབྱུང་བར་མི་འགྲུབ་པའི་ཕྱིར་རོ། །རྩོད་པ་གསུམ་པ་འདོད་རྒྱལ་གསུམ་ཀ་ལ་ངེས་ཚིག་མི་འཇོག་པའི་རྒྱུ་མཚན་ཅི་ཞེ་ན་རྗེས་སུ་གྲུབ་པའི་འདོད་རྒྱལ་ནི། །ལོག་པར་བསྒྲུབ་ཕྱིར་ངེས་ཚིག་བཞག། །འདོད་རྒྱལ་ཐོག་མའི་མིང་གང་ཡིན། །ངེས་ཚིག་གཞི་མེད་ཆོས་ཉིད་བཞིན། །ཞེས་པའོ། །དེ་ཡང་རྗེས་གྲུབ་ཀྱི་འདོད་རྒྱལ་ནི་ཁྱི་ནག་པོ་ལ་དུང་ཞེས་བཏགས་པ་ལྟ་བུ་ཡིན་ལ། དེ་ལ་ངེས་ཚིག་བཤད་དུ་ཡོད་པ་མ་ཡིན་ཏེ། དེ་ཡོད་ན་དཀར་བའི་ཕྱིར། ཞེས་ཟེར་དགོས་པ་ལས། དེ་ལྟར་བཤད་ན་ཕྱིན་ཅི་ལོག་ཏུ་འགྱུར་བས་སོ། །ཆོས་ཉིད་བཞིན་ཞེས་པ་ཆོས་ཉིད་ཀྱི་རིགས་པ་དེ་རིགས་གཞན་ལ་བརྟེན་མི་དགོས་པ་དཔེར་བྱས་པའོ། །བཞི་པ་དོན་ལྡན་བྱེ་བྲག་ཏུ་བཤད་པ་ལ་གཉིས་ཏེ། མདོར་བསྟན་པ་དང༌། རྒྱས་པར་བཤད་པའོ། །དང་པོ་ནི། དེ་ཡིན་ཕྱིར་དང་དེ་ཡོད་ཕྱིར། །དེ་ལ་ཕན་བྱེད་དེ་བྱེད་ཕྱིར། །དེ་བྱའི་ཕྱིར་དང་དེ་འདྲའི་ཕྱིར། །དེ་དེའི་ཕྱིར་དང་དེ་ཉིད་ཕྱིར། །དེ་ཡི་མིང་ནི་དེ་སྐད་ཅེས། །རྟགས་ཀྱི་སྒོའམ་མེད་ཀྱང་རུང༌། །སྐབས་ཀྱི་མཐུ་ཡི་ངེས་ཚིག་བརྗོད། །ཅེས་པ་དོན་ལྡན་གྱི་ངེས་ཚིག་བརྒྱད་བསྟན་པ་ལས་ལྷས་བྱིན་པ་དེ་ཡིན་པའི་ཕྱིར་ལྷས་སྦྱིན་ཞེས་བྱའོ་ཞེས་དང༌། གསེར་དེ་ཡོད་པའི་ཕྱིར་གསེར་ཅན་ཞེས་བྱ་བ་དང༌། ཁ་ཟས་དེ་ལ་བརྒྱུད་ནས་ཕན་པའི་ཕྱིར་ཁ་ཟས་སོ་ཞེས་བྱ་བ་དང༌། རྐང་པའི་ནད་དེ་བྱེད་པའི་ཕྱིར་ལྟེང་ཀ་རྐང་ནད་ཅན་ཞེས་བྱ་བ་དང༌། མང་པོས་དེ་བཀུར་བར་བྱ་བའི་ཕྱིར་མང་པོས་བཀུར་བ་དང༌། ལྷ་དེ་དང་འདྲ་བའི་ཕྱིར་ལྷ་ཞེས་བྱ་བ་དང༌། ལྟོ་ལྡིར་བ་དེ་བུམ་པ་དེ་ཡིན་པའི་ཕྱིར་བུམ་པ་ཞེས་བྱ་བ་དང༌། ཙན་དན་གྱི་མེ་དེ་ཚ་བ་དེ་ཉིད་ཀྱི་ཕྱིར་མེ་ཞེས་བྱའོ། །ཞེས་པ་ལྟ་བུ་རྣམས་སོ། །རྟགས་ཀྱི་སྒོ་ཡོད་མེད་ཀྱི་དོན་ནི། ཞིང་དང་ལྡན་པའི་ཕྱིར་ཞིང་པ་ཞེས་བྱའོ་ཞེས་པ་ལྟ་བུ་ཕོ་རྟགས་དང༌། མེ་ཏོག་འཛིན་པའི་ཕྱིར་མེ་ཏོག་མ་ཞེས་བྱའོ། །ཞེས་པ་ལྟ་བུ་མོའི་རྟགས་སམ། ཡང་ན་བྱས་ཞེས་པ་ལྟ་བུ་དེས་བྱས་པ་དང་དེ་བྱས་པ་ལྟ་བུ་གཉིས་ཀ་ལ་འཇུག་པས་སྐབས་སྟོབས་ཀྱིས་ཤེས་དགོས་པ་ཡིན་གྱི། རྟགས་ཀྱི་སྒོ་དངོས་སུ་ཡོད་མེད་ལ་མ་རག་པའོ། །གཉིས་པ་རྒྱས་པར་བཤད་པ་ལ། བསྟན་པ་དང༌། བཤད་པ་གཉིས་ལས། དང་པོ་ནི། ཡིན་དང་ངོ་བོ་སྒྲུབ་པ་དང༌། །དངོས་པོའི་རྐྱེན་ནི་དངོས་ཀྱི་མིང༌། །ལྷག་མ་བཏགས་པ་ཞེས་བྱའོ། །ཞེས་པ་དེ་ཡིན་ཕྱིར་ཞེས་པས་བསྟན་པའི་ཡིན་པ་སྒྲུབ་པ་དང༌། དེ་དེའི་ཕྱིར་ཞེས་པས་བསྟན་པའི་ངོ་བོ་སྒྲུབ་པ་དང༌། དེ་ཉིད་ཕྱིར་ཞེས་པས་བསྟན་པའི་དངོས་པོའི་རྐྱེན་དང་གསུམ་ནི་དངོས་མིང་དང༌། གསུམ་པོ་དེའི་ལྷག་མ་དེ་ཡོད་ཕྱིར་ཞེས་སོགས་ཀྱིས་བསྟན་པ་རྣམས་ནི་བཏགས་པའི་མིང་ཞེས་བྱའོ། །གཉིས་པ་བཤད་པ་ལ་གཉིས་ཏེ། དངོས་མིང་གསུམ་བཤད་པ་དང༌། བཏགས་མིང་ལྔ་བཤད་པའོ། །དང་པོ་ནི། རང་གི་ངོ་བོ་ངེས་ཚིག་དང༌། །བཏགས་པའི་མིང་གཞན་སྤོང་བྱེད་དང༌། །རང་གི་ཁྱད་པར་གཞན་སེལ་བས། །ཡིན་དང་ངོ་བོ་སྒྲུབ་པ་དང༌། །དངོས་པོའི་རྐྱེན་རྣམས་གོ་རིམ་བཞིན། །ཞེས་པ་སྟེ། དངོས་མིང་གསུམ་པོའི་ངེས་ཚིག་བཤད་མ་ཐག་པ་དེ་ཉིད་དོ། །གཉིས་པ་ནི། རྟེན་ལ་བརྟེན་པར་བཏགས་པ་དང༌། །བརྒྱུད་པའི་རྒྱུ་ལ་འབྲས་བུ་དང༌། །དངོས་ཀྱི་རྒྱུ་ལ་དེ་བཞིན་དང༌། །འབྲས་བུའམ་བྱ་བར་གྱུར་པ་ལ། །དེ་ལ་རྒྱུ་མིང་བཏགས་པ་དང༌། །དཔེ་གཞན་གྱི་ནི་མིང་དག་དང༌། །དོན་འདི་དག་གི་སྒོ་ནས་ནི། །ཡོད་དང་དེ་ལ་ཕན་པ་དང༌། །བྱེད་དང་ལས་སུ་གྲུབ་པ་དང༌། །འདྲ་བར་སྦྱར་དང་རིམ་བཞིན་ནོ། །ཞེས་པ་གོང་དུ་བཤད་མ་ཐག་པའི་བཏགས་མིང་ལྔ་དང་སྦྱར་བར་བྱ་བ་ཡིན་ནོ། །མདོར་ན་མིང་ལ་འདོད་རྒྱལ་དང༌། དོན་ལྡན་གཉིས། དང་པོ་ལ། ཐོག་མའི་དང༌། རྗེས་གྲུབ་ཀྱི་འདོད་རྒྱལ་ཏེ་གཉིས་ཡོད་པ་ལས་གཉིས་ཀ་དངོས་མིང་དང༌། དོན་ལྡན་ལ་བརྒྱད་ཡོད་པ་ལས། གསུམ་དངོས་མིང་དང༌། ལྔ་བཏགས་མིང་ངོ༌། །ཞེས་ཁོང་དུ་ཆུད་པར་བྱ་ཞིང་ཡང་ན་མིང་ལ་གཉིས་ཏེ། གྲུབ་པ་དང༌། རྗེས་གྲུབ་བོ། །དེ་ལའང་གཉིས་ཏེ། འདོད་རྒྱལ་དང༌། དོན་ལྡན་ནོ། །དང་པོ་ལའང་གཉིས་ཏེ། འདོགས་པའི་རྒྱུ་མཚན་དང༌། བཏགས་པ་ལ་དགོས་པ་ཡོད་ཀྱང་དངོས་ལ་གནོད་བྱེད་མེད་པ་གསུམ་དང༌། དངོས་ལ་གནོད་བྱེད་ཀྱང་ཡོད་པ་ལྔའོ། །ཞེས་ཀྱང་བཟུང་བར་བྱའོ། །དེ་ལ་འདི་སྙམ་དུ། མིང་འདི་དག་རང་རང་གི་དོན་དུ་བརྡ་སྦྱར་བ་དེ་དང་དེ་ལ་དངོས་པོའི་དབང་གིས་འཇུག་པ་ཡིན་ནམ། བརྗོད་འདོད་ཀྱི་དབང་གིས་འཇུག་པ་ཡིན་ཞེ་ན། འདི་ལ་ལུགས་གཉིས་ཏེ། མུ་སྟེགས་བརྡ་སྤྲོད་པའི་ལུགས་དང༌། བདག་ཉིད་ཆེན་པོ་ཆོས་ཀྱི་གྲགས་པའི་ལུགས་སོ། །དང་པོ་ནི། མིང་ལ་གསུམ་སྟེ། འདོད་རྒྱལ་བའི་དང༌། རྒྱུ་མཚན་ཅན་གྱི་དང༌། སྐྱེས་བུའི་འདོད་པ་ཙམ་གྱིས་སྦྱར་བའི་མིང་རྣམས་སོ། །དང་པོ་ནི། མེ་དང༌། ཤིང་ཞེས་བྱ་བ་ལ་སོགས་པ་རྣམས་སོ། །གཉིས་པ་ནི། སྒྲ་བཤད་འཇུག་གི་རྒྱུ་མཚན་ཡོད་ཅིང༌། དངོས་ལ་གནོད་བྱེད་མེད་པ་རྣམས་ཏེ། དཔེར་ན། རི་བོང་ཅན་ལ་བསིལ་ཟེར་ཅན་དང༌། ཀུན་དའི་གཉེན་ལ་སོགས་པའི་མིང་དང༌། ཉིན་མོར་བྱེད་པ་ལ་ཚ་ཟེར་ཅན་དང༌། རྟ་བདུན་རྒྱལ་པོ་ལ་སོགས་པའི་མིང་གིས་བཏགས་པའོ། །གསུམ་པ་ནི་མི་བླུན་པོ་ལ་བ་གླང་དང༌། བྲམ་ཟེའི་ཁྱེའུ་ལ་མེར་བཏགས་པ་ལྟ་བུའོ། །དེ་ལྟར་གསུམ་ལས། དང་པོ་གཉིས་དངོས་མིང་དང༌། ཕྱི་མ་བཏགས་མིང་དུ་འདོད་ལ། དེ་ཡང་ཐོག་མཐའ་གཉིས་ནི་སྐྱེས་བུའི་བརྗོད་འདོད་ཙམ་གྱིས་སྦྱར་བ་ཡིན་གྱི། མིང་དོན་ལ་འབྲེལ་བ་མེད་པའི་ཕྱིར་དངོས་པོའི་དབང་གིས་འཇུག་པ་མ་ཡིན་ལ། བར་པ་ནི་སྒྲ་དོན་ལ་དངོས་པོའི་འབྲེལ་པ་གྲུབ་པའི་ཕྱིར་དངོས་པོའི་དབང་གིས་འཇུག་པ་ཡིན་ནོ། །དེའི་ཕྱིར་དངོས་པོའི་དབང་གིས་འཇུག་པའི་དོན་རྣམས་མིང་དེ་དང་དེའི་བརྗོད་རུང་མ་ཡིན་པར་དམ་བཅས་ན་གྲགས་པ་དང་འགལ་བ་ཡིན་གྱི། ཅིག་ཤོས་གཉིས་ལ་མ་ཡིན་ནོ་ཞེས་ཟེར་རོ། །གཉིས་པ་སྡེ་བདུན་མཛད་པའི་ལུགས་ནི། སྤྱིར་མིང་ལ་གཉིས་ཏེ། དོན་གང་གི་ཡང་མིང་དུ་བརྡ་སྦྱར་མ་ཟིན་པ་དང༌། བརྡ་སྦྱོར་མཁན་པོས་བརྡ་སྦྱར་ནས་གྲགས་ཟིན་པའོ། །དང་པོའི་དབང་དུ་བྱས་པ་དེའི་ཚེ་ནི་ཟླ་བ་ཞེས་པའི་མིང་དེ་རི་བོང་ཅན་ལ་སོགས་པའི་དོན་རེ་རེ་བ་ཁོ་ན་དང་འབྲེལ་པ་གྲུབ་པ་མ་ཡིན་ཏེ། དེ་ཡིན་ན་དོན་ཐམས་ཅད་ལ་འཇུག་ཏུ་མི་རུང་བ་ལས་དེ་རུང་བའི་ཕྱིར། དེ་རུང་བ་ཡིན་ཏེ། འདོད་པ་ཙམ་གྱིས་འཇུག་པའི་ཕྱིར། དེའི་ཚེ་མིང་དེ་དོན་ཐམས་ཅད་ལ་འཇུག་ཏུ་རུང་བ་ཡིན་ཀྱང་མིང་དོན་གྱི་འབྲེལ་པ་གྲུབ་པ་ནི་མ་ཡིན་ཏེ། དོན་དེ་དག་ལ་མིང་དེ་བཏགས་མ་ཟིན་པའི་ཕྱིར་རོ། །གཉིས་པའི་དབང་དུ་བྱས་པ་དེའི་ཚེ་ཟླ་བ་ཞེས་བྱ་བའི་མིང་དེ་བསིལ་ཟེར་ཅན་ལྟ་བུ་དོན་ཉི་ཚེ་བའི་མིང་དུ་བརྡ་སྦྱོར་བ་ཡིན་གྱི། གང་འཇུག་ཏུ་རུང་ཚད་ལ་སྦྱོར་བ་མ་ཡིན་ཏེ། ཡིན་ན་ཤེས་བྱ་ཐམས་ཅད་ལ་མིང་གཅིག་གི་བརྡ་སྦྱར་བས་ཆོག་པ་དེའི་ཚེ་འཆོལ་བར་འགྱུར་བའི་ཕྱིར་རོ། །བརྡ་སྦྱར་ཟིན་པའི་འོག་རོལ་ཏུ་ནི་ཟླ་བ་ཞེས་པའི་མིང་དེ་དོན་གང་ལ་བརྡ་སྦྱར་བ་དེ་ཁོ་ནའི་མིང་ཡིན་གྱི། གཞན་གྱི་ནི་མ་ཡིན་ཏེ། གཞན་ལ་བརྡ་མ་སྦྱར་བའི་ཕྱིར། སྦྱོར་ཚུལ་ལ་གཉིས་ཏེ། འདོད་རྒྱལ་ཐོག་མར་དང༌། རྗེས་གྲུབ་ཏུའོ། །དང་པོ་ནི། བསིལ་ཟེར་ཅན་ལ་ཟླ་བ་ཞེས་བརྡ་སྦྱར་བ་ལྟ་བུའོ། །གཉིས་པ་ལ་འདོད་རྒྱལ་དུ་སྦྱར་བ་དང༌། དོན་ལྡན་དུ་སྦྱར་བའོ། །དང་པོ་ནི། རྒྱུ་མཚན་ལ་མ་ལྟོས་པར་བྲམ་ཟེའི་ཁྱེའུ་ལ་ཟླ་བ་ཞེས་བཏགས་པ་ལྟ་བུའོ། །དོན་ལྡན་ལ་དངོས་མིང་དུ་སྦྱར་བ་དང༌། བཏགས་མིང་དུ་སྦྱར་བ་གཉིས། དང་པོ་ནི། ཟླ་བའི་ནང་ཚན་སོ་སོ་ལ་དེའི་མིང་སྦྱར་བའོ། །གཉིས་པ་ནི། ག་བུར་དང༌། དངུལ་ཆུ་སོགས་ལ་དེར་སྦྱར་བའོ། །དེ་ལྟར་བརྡ་སྦྱར་ཟིན་པའི་འོག་རོལ་ཏུ་ནི་གང་ལ་དངོས་མིང་དུ་འཇུག་པའི་དོན་དེ་ལ་མིང་དེའི་ཐ་སྙད་བྱེད་དུ་རུང་བ་ཡིན་གྱི། གཞན་ལ་རུང་བ་མ་ཡིན་ཏེ། དེ་རུང་ན་ཐ་སྙད་ཀྱི་འཇུག་པ་འཆོལ་བར་འགྱུར་བས་སོ། །དེ་ལྟ་ཡིན་པ་དེའི་ཕྱིར་ཟླ་བའི་ཐ་སྙད་ཀྱི་དུས་སུ་བསིལ་ཟེར་ཅན་གྱིས་ཁྱབ་པ་ཡིན་ཏེ། བསིལ་ཟེར་ཅན་དེ་ཟླ་བའི་ཐ་སྙད་ཀྱི་མཚན་ཉིད་ཡིན་པས་སོ། །དེའི་ཕྱིར་རི་བོང་ཅན་མཚན་གཞིར་བཞག་ནས། བསིལ་ཟེར་ཅན་མཚན་ཉིད་དུ་བཀོད་པའི་སྦྱོར་བ་དེ་སྐྱོན་མེད་པ་ཁོ་ནའོ། །དེ་ལྟར་བཤད་པ་ལས་བྱུང་བའི། །དགེ་བས་སྒྲ་དང་ཚད་མ་ཡི། །གཞུང་ལུགས་ལས་བྱུང་མིང་དོན་གྱི། །རྣམ་གཞག་འཆད་ལ་ཐོགས་མེད་ཤོག །ཅེས་སྨྲ་བའི་སྒོ་མཚོན་ཆ་ལྟ་བུའི་བསྟན་བཅོས་ཀྱི་རྣམ་པར་བཤད་པ་སྨྲ་བའི་རྒྱན་ཞེས་བྱ་བ་ལས། མིང་གི་ཚོགས་རྣམ་པར་བཤད་པ་སྟེ་ལེའུ་གཉིས་པའོ།། །།གསུམ་པ་ཚིག་གི་ཚོགས་ལ་གསུམ་སྟེ། ཚིག་གི་རྒྱུ་དང༌། ངོ་བོ་དང༌། རབ་ཏུ་དབྱེ་བའོ། དང་པོ་ནི། གལ་ཏེ་མིང་གཉིས་འདུས་པའམ། །འོན་ཏེ་མང་པོ་འདུས་ཀྱང་རུང༌། །གཉིས་པ་ནི། དེ་དག་ཁྱད་པར་རྗོད་བྱེད་ན། །ཚིག་ཅེས་རབ་ཏུ་བརྗོད་པ་སྟེ། །ཕྲད་རྣམས་དག་དང་བཅས་པ་ཡིན། །ཞེས་པའོ། །དེ་ཡང་ཀ་བ་རིང་པོ་ཞེས་པ་ལྟ་བུ་དོན་གྱི་ཁྱད་པར་སྟོན་པ་རྣམས་ཚིག་ཡིན་པ་ཁོ་ནར་མ་ཟད། སངས་རྒྱས་ལ། ཆོས་ལ། ཞེས་པ་ལྟ་བུ་ཕྲད་རྐྱང་པ་ཅན་ནམ། སངས་རྒྱས་འདི་ནི། ཆོས་འདི་ནི་ཞེས་པ་ལྟ་བུ་ཕྲད་འདུས་པ་དག་དང་བཅས་པ་ཡང་ཚིག་གོ། །གསུམ་པ་ལ་གཉིས་ཏེ། ཚིག་བསྡུད་པའི་སྦྱོར་བ་བཤད་པ་དང༌། ཚིག་གི་ཕྲད་བཤད་པའོ། །དང་པོ་ལ་གཉིས་ཏེ། མདོར་བསྟན་པ་དང༌། རྒྱས་པར་བཤད་པའོ། །དང་པོ་ནི། དེ་ལ་ཚིག་གི་སྦྱོར་བ་བཅུ། །འབྲུ་མང་པོ་དང་ཚིག་བསྡུད་དང༌། ཁྱད་པར་དག་དང་ཡན་ལག་དང༌། །གཞི་དང་གཞི་གཅིག་བསྡུ་བ་དང༌། །གཞི་མཐུན་པ་དང་དེའི་སྐྱེས་བུ། །ཟླས་དབྱེ་བ་དང་ཕྱོགས་ཙམ་མོ། །ཞེས་པའོ། །གཉིས་པ་ལ། དེ་ལྟར་བཅུ་ལས། དང་པོ་འབྲུ་མང་པོའི་བསྡུ་བ་བཤད་པ་ལ་བཞི་སྟེ། རྩ་བ་དྲུག་ཏུ་བསྟན་པ་དང༌། དེ་ལ་མུ་བཞིར་དབྱེ་བ་དང༌། བྱེད་པ་དྲུག་གིས་བསྒྱུར་བ་དང༌། དོན་བསྡུ་བའོ། །དང་པོ་ནི། ཚིག་གཉིས་མང་པོ་རབ་དབྱེ་བའི། །རང་མིང་ལྡན་དང་མི་ལྡན་དང༌། །ཕྱོགས་དང་རྣམ་གྲངས་ཕན་ཚུན་དང༌། །ཚིག་མང་པོ་སྟེ་རྣམ་པ་དྲུག །ཅེས་པའོ། །དེ་ལ་འབྲུ་མང་པོ་པ་ཞེས་པའི་དོན་ནི། ཚིག་གཅིག་ལ་མིང་གཉིས་སམ་མང་པོ་འདུས་ཀྱང་རུང༌། དོན་གཞན་དང་གཞན་སྟོན་པའོ། །དཔེར་ན་བ་ཁྲ་མོ་ཅན་ཞེས་བརྗོད་པའི་ཚེ་དེས་བརྗོད་བྱའི་དོན་དངོས་སུ་མ་བརྗོད་པར་བདག་པོ་སྟོན་པ་ལྟ་བུའོ། །དབྱེ་ན་ཚིག་གཉིས་ཀྱི་འབྲུ་མང་པོ་པ་དང༌། ཚིག་མང་པོའི་འབྲུ་མང་པོ་པའོ། །དང་པོའི་དཔེ་ནི། བ་ཁྲ་མོ་ཅན་ཞེས་པ་ལྟ་བུ་དང༌། གཉིས་པའི་དཔེ་ནི་བ་དམར་ཁྲ་ཅན་ཞེས་པ་ལྟ་བུའོ། །དང་པོ་ལ་དབྱེ་ན་ལྔ་ལས། དང་པོ་རང་མིང་དང་ལྡན་པ་ནི། སྐྱེས་བུ་སྟོབས་ཅན་ལྟ་བུ་གཞི་དང་ཆོས་ཐ་མི་དད་པར་སྟོན་པ་དང༌། རང་མིང་དང་མི་ལྡན་པ་ནི་བ་ཁྲ་མོ་ཅན་ལྟ་བུ་གཞི་དང་ཆོས་ཐ་དད་དུ་སྟོན་པ་དང༌། ཕྱོགས་ནི་ཤར་ལྷོ་ཞེས་པ་ལྟ་བུ་མཚམས་སྟོན་པའི་ཚིག་དང༌། རྣམ་གྲངས་ནི། བརྒྱ་པ་དང༌། བཅུ་པ་ཞེས་བརྗོད་པ་ལྟ་བུ་གྲངས་ཀྱི་ཚིག་གིས་གྲངས་ཅན་སྟོན་པ་དང༌། ཕན་ཚུན་ནི། དབྱུག་འཐབ་ཅན་ཞེས་པ་ལྟ་བུ་བྱ་བ་བྱེད་པ་མཚོན་པའོ། །དེ་ལྟར་ལྔ་དང༌། དབྱེ་གཞི་སྟེ། རྣམ་པ་དྲུག་གོ། །དེ་བཞིན་དུ་ཚིག་མང་པོ་ཅན་གྱི་འབྲུ་མང་པོ་པ་ལའང་དེ་ལྟར་ཕྱེ་བས་དྲུག་གོ། །གཉིས་པ་མུ་བཞིར་དབྱེ་བ་ནི། མཐུན་དང་ཐ་དད་དབྱེ་བ་ཡིས། །ཕྱོགས་ཀུན་དང་ནི་ཕྱོགས་གཅིག་ལ། །རབ་ཏུ་དབྱེ་བ་བཞིར་འདོད་དོ། །ཞེས་པ་ཕྱོགས་ཀུན་མཐུན་མི་མཐུན་གཉིས་དང༌། ཕྱོགས་གཅིག་མཐུན་མི་མཐུན་གཉིས་ཏེ་བཞིའོ། །དང་པོ་ནི། ལྷས་བྱིན་རྣ་བ་འཕྱང་བ་ཅན་ཞེས་པ་ལྟ་བུའོ། །གཉིས་པ་ནི། མདའ་གཞུ་ཅན་ཞེས་པ་ལྟ་བུའོ། །གསུམ་པ་ནི། རྐང་ལག་ཅན་ཞེས་པ་དང༌། བཞི་པ་ནི་བ་ཁྲ་མོ་ཅན་ཞེས་པ་ལྟ་བུའོ། །འདིར་མཐུན་མི་མཐུན་ཞེས་པ་ནི་གཞི་མཐུན་ཡིན་མིན་ལ་བྱ་བ་ཡིན་ལ། ཕྱོགས་གཅིག་མཐུན་མི་མཐུན་གྱི་དོན་ནི་གཞི་མཐུན་ལ་ཆོས་མི་མཐུན་པའམ། གཞི་མི་མཐུན་ལ་ཆོས་མཐུན་པ་ལྟ་བུ་ལ་བྱ་བ་ཡིན་པས་དཔེ་དོན་དེ་ལྟར་སྦྱར་བ་ཡིན་ནོ། །གསུམ་པ་བྱེད་པ་དྲུག་གིས་བསྒྱུར་བ་ནི། བྱེད་པ་དྲུག་གིས་བསྒྱུར་བ་ནི། །ཀུན་ལ་རབ་ཏུ་ལྡན་པ་སྟེ། །ཞེས་པ་རྐང་པ་གཉིས་སོ། །དོན་ནི། བཤད་མ་ཐག་པའི་འབྲུ་མང་པོ་པ་དྲུག་པོ་རེ་རེ་ལ་མཐུན་མི་མཐུན་གྱི་དབྱེ་བས་ཉི་ཤུ་རྩ་བཞི་པོ་ཀུན་ལ་བྱེད་པ་དྲུག་གིས་བསྒྱུར་དུ་རུང་བ་ཡིན་ནོ། །དྲུག་པོ་གང་ཞེ་ན། འདི་ལྟར། ཆོས་ལ་སྤྱོད་པ་ཅན་དང༌། ཆོས་ཀྱིས་འཕེལ་བ་ཅན་དང༌། ཆོས་ཀྱི་ཕྱིར་སྒྲུབ་པ་ཅན་དང༌། ཆོས་ཀྱི་གཏམ་ཅན་དང༌། ཆོས་ལས་བྱུང་བ་ཅན་དང༌། ཆོས་ལ་གནས་པ་ཅན་ཞེས་བྱ་བ་དང་དྲུག་གོ། ། དེ་ལྟར་དྲུག་པོ་དེ་ནི་གཉིས་པ་ལས་སུ་བྱ་བ་ནས་བགྲངས་པ་ཡིན་ལ། དེའི་སྟེང་དུ་དང་པོ་དོན་ཙམ་སྟོན་པ་བསྣན་ནས་རྣམ་དབྱེ་བདུན་པོ་དེས་བཤད་མ་ཐག་པའི་ཉི་ཤུ་རྩ་བཞི་པོ་བསྒྱུར་ན། གྲངས་དུ་ཞིག་ཏུ་འགྱུར་ཞེ་ན། བརྒྱ་དང་དྲུག་ཅུ་རྩ་བརྒྱད་དུ་འགྱུར་རོ་ཞེས་སྟོན་པ་ནི། བརྒྱ་དང་དྲུག་ཅུ་རྩ་བརྒྱད་ལས། །ཞེས་པའོ། །བཞི་པ་དོན་བསྡུ་བ་ནི། དུས་གཅིག་ན་ནི་གསུམ་ལྡན་བཟུང༌། །ཞེས་པ་རྩ་བ་གཉིས་ཀྱི་གང་རུང་གཅིག་དང༌། རྩ་བ་བཞི་ལས། མ་བཞིའི་གང་རུང་གཅིག་དང༌། བྱེད་པ་དྲུག་གི་གང་རུང་གཅིག་སྟེ། གསུམ་པོ་གཞི་གཅིག་གི་སྟེང་དུ་ཅིག་ཅར་དུ་ཚང་དུ་རུང་ཞེས་བྱ་བའི་དོན་ཏོ། །གཉིས་པ་ཚིག་གི་བསྡུ་བ་ལ་གཉིས་ཏེ། དོན་དངོས་དང༌། བྱེད་པའི་བསྡུ་བ་བྱེ་བྲག་ཏུ་བཤད་པའོ། །དང་པོ་ནི། ཚིག་བསྡུས་པ་ནི་རྣམ་པ་ལྔ། །གཉིས་དང་རྣམ་གྲངས་བྱེ་བྲག་དང༌། །གཞན་དང་བྱེད་པའི་ཚིག་ཡིན་ནོ། །ཞེས་པ་གཉིས་ཀྱི་བསྡུ་བ་ནི་ཟླས་དབྱེ་བའི་བསྡུ་བ་ཞེས་བྱ་ལ། དཔེར་ན་ཕ་དང་མ་ལ་ཕ་མ་ཞེས་བརྗོད་པ་ལྟ་བུའོ། །རྣམ་གྲངས་ཀྱི་བསྡུ་བ་ལ་ནི་བ་གཉིས་པ་ཞེས་བྱ་ལ། དཔེར་ན་ས་དང༌། ཆུ་དང༌། མེ་དང༌། རླུང་ལ་ས་ཆུ་མེ་རླུང་ཞེས་བརྗོད་པ་ལྟ་བུའོ། །བྱེ་བྲག་གི་བསྡུ་བ་ལ་ནི་ལས་འཛིན་པ་ཞེས་བྱ་ལ། དཔེར་ན། ཨུཏྤལ་ཡང་ཡིན། སྔོན་པོ་ཡང་ཡིན་པ་ལ་ཨུཏྤལ་སྔོན་པོ་ཞེས་བརྗོད་པ་ལྟ་བུ། གཞན་གྱི་ཚིག་བསྡུ་བ་ལ་ནི་འབྲུ་མང་པོ་པ་ཞེས་བྱ་ལ། དཔེར་ན། རྟ་ཁྲ་བོ་དང་ལྡན་པའི་མི་ལ་རྟ་ཁྲ་ཅན་ཞེས་བརྗོད་པ་ལྟ་བུའོ། །བྱེད་པའི་ཚིག་གི་བསྡུ་བ་ལ་ནི་དེའི་སྐྱེས་བུའི་བསྡུ་བ་ཞེས་བྱ་ལ། དཔེ་ནི་འཆད་པར་འགྱུར་བའི་བྱེད་པའི་ཚིག་དྲུག་ཏུ་ཕྱེ་བ་རྣམས་སོ། །དེ་ཡང་སྔ་མ་བཞི་ནི། དང་པོ་དོན་ཙམ་སྟོན་པ་ཞེས་བྱ་བ་དེ་ཡིན་ལ། ལྔ་པ་བྱེད་པའི་ཚིག་ལ་ནི་གཉིས་པ་ལས་སུ་བྱ་བ་ལ་སོགས་པ་དྲུག་ཏུ་འབྱེད་པ་ཡིན་ནོ། །གཉིས་པ་ནི། ལས་ལ་སོགས་པའི་སྦྱོར་བ་ཡིས། །གཉིས་པ་ལ། སོགས་བདུན་པའི་མཐའ། །བྱེད་པ་དྲུག་ཏུ་འདོད་པ་སྟེ། །ཚིག་བསྡུ་ཙམ་དུ་ཤེས་པར་བྱ། །ཞེས་པའོ། །དེ་ལ་གཉིས་པ་ལས་བྱ་བའི་བསྡུ་བ་ནི། ཆོས་ལ་སྤྱོད་པ་ལ་ནི་ཆོས་སྤྱོད་པ་ཞེས་བྱ་བ་ལྟ་བུའོ། །སོགས་པ་ཞེས་བྱ་བའི་སྒྲས་བསྡུས་པ་གསུམ་པ་བྱེད་པ་པོའི་ཚིག་བསྡུ་བ་ནི། ཆོས་ཀྱིས་འཕེལ་བ་ལ་ཆོས་འཕེལ་ཞེས་བྱ་བ་ལྟ་བུ་དང༌། བཞི་པ་དགོས་ཆེད་ཀྱི་ཚིག་གི་བསྡུ་བ་ནི། རྒྱན་གྱི་ཆེད་ཀྱི་གསེར་ལ་རྒྱན་གསེར་ཞེས་པ་ལྟ་བུ་དང༌། ལྔ་པ་འབྱུང་ཁུངས་ཀྱི་ཚིག་གི་བསྡུ་བ་ནི། ཡུལ་ནས་འཐོན་པ་ལ་ཡུལ་འཐོན་ཞེས་བརྗོད་པ་ལྟ་བུ་དང༌། དྲུག་པ་འབྲེལ་པའི་ཚིག་བསྡུད་ནི། ལྷས་བྱིན་གྱི་བུ་ལ་ལྷས་བྱིན་བུ་ཞེས་པ་ལྟ་བུ་དང༌། བདུན་པ་གནས་གཞིའི་བསྡུ་བ་ནི། ཤིང་ལ་གནས་པ་ལ་ཤིང་གནས། ཞེས་པ་ལྟ་བུའོ། །ལྔ་པ་ཁྱད་པར་གྱི་བསྡུ་བ་བཤད་པ་ནི། སྔ་མ་ཕྱི་མའི་བསྡུ་བ་ལས། ཁྱད་པར་བཤད་པ་རྣམ་པ་གཉིས། །ཞེས་པ་ནི་ཚིག་སྔ་མའི་དོན་ཕྱི་མས་ཁྱད་པར་དུ་སྟོན་པ། སྔོན་པོ་དེ་ནི་ཨུཏྤལ་ཞེས་བརྗོད་པ་ལྟ་བུ་དང༌། ཕྱི་མའི་དོན་སྔ་མས་ཁྱད་པར་དུ་སྟོན་པ་ཨུཏྤལ་སྔོན་པོ་ཞེས་བརྗོད་པ་ལྟ་བུའོ། །དེ་ལྟར་བརྗོད་ཚུལ་གཉིས་ཀ་ལ་ཡང་ཁྱད་གཞི་ནི་ཨུཏྤལ་ཁོ་ན་ཡིན་ལ། སྔོན་པོ་ནི་ཁྱད་པར་གྱི་ཆོས་སུ་བཞག་དགོས་པ་ཡིན་ཏེ། རྫས་དང་ཡོན་ཏན་གྱི་ཁྱད་པར་སོ་སོར་ངེས་པ་ལས་སོ། །བཞི་པ་ཡན་ལག་བསྡུ་བ་ནི། འབྲེལ་བ་དག་དང་གོ་རིམ་དང༌། །དོན་དང་གྲགས་པའི་ཡན་ལག་ནི། །བསྡུ་བ་བཞི་པོ་གྲགས་པ་ཡང༌། །འཇིག་རྟེན་བསྟན་བཅོས་དག་ལ་གཉིས། །ཞེས་པ་ལུས་ལ་སོགས་པའི་དབང་པོ་ཞེས་པ་ལྟ་བུ་བདག་གཅིག་འབྲེལ་པའི་ཡན་ལག་བསྡུ་བ་དང༌། མ་རིག་པ་ལ་སོགས་པའི་རྟེན་འབྲེལ་ཞེས་པ་ལྟ་བུ། དེ་བྱུང་འབྲེལ་གྱི་ཡན་ལག་བསྡུ་བ་དང༌། གཟུགས་ལ་སོགས་པའི་ཕུང་པོ་ཞེས་པ་ལྟ་བུ་གོ་རིམ་གྱི་ཡན་ལག་བསྡུ་བ་དང༌། འཁོར་ལོ་ལ་སོགས་པའི་རིན་པོ་ཆེ་ཞེས་པ་ལྟ་བུ་དོན་གྱི་ཡན་ལག་བསྡུ་བ་དང༌། གྲགས་པའི་ཡན་ལག་བསྡུ་བ་དང་བཞི་ཡོད་པ་ལས། དེ་ལའང་ཀ་བུམ་ལ་སོགས་པའི་ཐ་སྙད་ལྟ་བུ་འཇིག་རྟེན་ལ་གྲགས་པ་དང༌། འཕགས་པ་དང་སོ་སོ་སྐྱེ་བོ་ཞེས་པ་ལྟ་བུ་བསྟན་བཅོས་ལ་གྲགས་པ་དང་གཉིས་སོ། །ལྔ་པ་གཞི་བསྡུ་བ་ནི། རིགས་བསལ་བྱས་དང་མ་བྱས་པའི། །གཞི་བསྡུས་པ་ནི་གཉིས་ཡིན་ནོ། །ཞེས་པ་རིགས་བསལ་བྱས་པའི་དཔེ་ཆོས་ཐམས་ཅད་ཞེས་པ་ལྟ་བུ་དང༌། མ་བྱས་པའི་བསྡུ་བ་ཀུན་དང་མཐའ་དག་ཅེས་པ་ལྟ་བུའོ། །དྲུག་པ་གཞི་གཅིག་ཏུ་བསྡུ་བ་ནི། །ཕྱོགས་གཅིག་དག་ཏུ་བྱེད་པ་དང༌། །སོ་སོའི་ཕྱོགས་གཅིག་བྱེད་པ་ཡིས། །གཞི་གཅིག་བསྡུ་བ་གཉིས་སུའོ། །ཞེས་པ་འདུས་བྱས་ཐམས་ཅད་མི་རྟག་ཅེས་པ་ལྟ་བུ། ཕྱོགས་མཐུན་ཁོ་ན་ཕྱོགས་གཅིག་དག་ཏུ་བྱེད་པའི་བསྡུ་བ་དང༌། འདུས་བྱས་དང་འདུས་མ་བྱས་ཐམས་ཅད་བདག་མེད་ཅེས་པ་ལྟ་བུ་ཕྱོགས་མི་མཐུན་པ་སོ་སོ་བ་ཕྱོགས་གཅིག་དག་ཏུ་བྱེད་པའོ། །བདུན་པ་གཞི་མཐུན་པའི་བསྡུ་བ་ནི། ཁྱད་པར་ཁྱད་པར་ཅན་གཉིས་དང༌། །ཁྱད་པར་རྣམ་གཉིས་གཞི་གཅིག་ཏུ། །མཐུན་པ་གོ་བར་བྱས་པ་ལ། །གཞི་མཐུན་སྦྱོར་བ་རྣམ་པ་གཉིས། །ཞེས་པ་ཁྱད་པར་སྔོན་པོ་དང༌། ཁྱད་པར་ཅན་གཉིས་ཀ་ཡང་ཨུཏྤལའོ་ཞེས་པ་དང༌། ཁྱད་པར་སྔོ་བ་དང༌། རྩུབ་པ་གཉིས་ཀ་ལ་ཨུཏྤལ་ཞེས་གཞི་མཐུན་པར་སྦྱར་བའོ། །བརྒྱད་པ་དེའི་སྐྱེས་བུའི་བསྡུ་བ་ལ་གཉིས་ཏེ། བསྟན་པ་དང༌། བཤད་པའོ། །དང་པོ་ནི། ངོ་བོའམ་ནི་ཆོས་ཀྱང་རུང༌། །ཐ་དད་གོ་བར་བྱེད་པ་ཡི། །དེའི་སྐྱེས་བུ་གསུམ་ཡིན་ཏེ། །བྱེད་པའི་ཚིག་དང་ལས་འཛིན་དང༌། །བ་གཉིས་པ་ཞེས་བྱའོ། །ཞེས་པ་བུམ་རྣམས་ལྟ་བུ་ངོ་བོ་ཐ་དད་པའམ། བྱས་མི་རྟག་ཅེས་པ་ལྟ་བུ་ལྡོག་ཆོས་ཐ་དད་ཀྱང་རུང༌། ཐ་དད་པ་གོ་བར་བྱེད་པའི་བྱེད་པ་ལ་དེའི་སྐྱེས་བུའི་བསྡུ་བ་ཞེས་བྱའོ། །དེ་ནི་གསུམ་ཡིན་ཏེ། བྱེད་པའི་ཚིག་གི་དང༌། ལས་འཛིན་པའི་དང༌། བ་གཉིས་པ་དེའི་སྐྱེས་བུའི་བསྡུ་བ་ཞེས་བྱ་བ་རྣམས་སོ། །གཉིས་པ་ལ་གསུམ་སྟེ། བྱེད་པའི་ཚིག་བཤད་པ་དང༌། ལས་འཛིན་པ་བཤད་པ་དང༌། བ་གཉིས་པ་བཤད་པའོ། །དང་པོ་ལ་གཉིས་ཏེ། དོན་དངོས་དང༌། དགག་པའི་བསྡུ་བ་བྱེ་བྲག་ཏུ་བཤད་པའོ། །དང་པོ་ནི། དེ་ལ་བྱེད་པ་བརྒྱད་ཡིན་ཏེ། །དང་པོ་ནས་ནི་བདུན་པའི་མཐའ། །རྣམ་དབྱེ་བསྒྱུར་བ་བདུན་པོ་དང༌། །ཕྲད་པ་སྦྱོར་བ་བྲལ་བའི་ཕྱིར། །གཞན་དང་སྦྱར་མེད་བོད་པ་སྤང༌། །དགག་པ་དང་ནི་བརྒྱད་དུ་འདོད། །ཅེས་པ་དེའི་སྐྱེས་བུ་གསུམ་ཡོད་པ་དེ་ལ་བྱེད་པའི་ཚིག་གི་བསྡུ་བ་བརྒྱད་ཡིན་ཏེ། ཤིང་ཡན་ལག་རྒྱས་པ་ལ་ཤིང་རྒྱས་པ་ཞེས་བརྗོད་པ་ལྟ་བུ་དང་པོ་དོན་ཙམ་སྟོན་པའི་བསྡུ་བ་ནས། ཤིང་ལ་གནས་པ་ཤིང་གནས་ཞེས་བརྗོད་པ་ལྟ་བུ་བདུན་པ་གནས་གཞིའི་བསྡུ་བའི་བར། རྣམ་དབྱེ་བསྒྱུར་བ་བདུན་པོ་དང༌། དགག་པའི་བསྡུ་བ་དང་ནི་བརྒྱད་དོ་དང༌། བརྒྱད་པ་བོད་པ་ལ་བསྡུ་བ་སྤང་བར་བྱ་སྟེ། བོད་པ་ལ་སྒྲ་གཞན་དང༌། སྦྱོར་བ་མེད་པའི་ཕྱིར་དང༌། ཕྲད་དང་སྦྱོར་བ་བྲལ་བའི་ཕྱིར་རོ། །གཉིས་པ་དགག་པའི་བསྡུ་བ་བྱེ་བྲག་ཏུ་བཤད་པ་ལ་གསུམ་སྟེ། མདོར་བསྟན་པ་དང༌། རྒྱས་པར་བཤད་པ་དང༌། ངེས་ཚིག་གི་སྒོ་ནས་དོན་བསྡུ་བའོ། །དང་པོ་ནི། མཚན་ཉིད་དབང་གིས་ཕྱེ་བ་ཡི། །མ་ཡིན་དགག་པ་བཅུ་བཞི་དང༌། །མཚན་ཉིད་དབྱེ་བ་མེད་མོད་ཀྱི། །ཡུལ་དང་དུས་ཀྱིས་ཕྱེ་བ་ཡི། །མེད་པར་དགག་པ་བཅུ་གཅིག་དང༌། །གང་ལྡན་དགག་པར་འདོད་པའོ། །གཉིས་པ་ལ་གཉིས་ལས། དང་པོ་མ་ཡིན་པར་དགག་པ་བཤད་པ་ནི། གཞན་དང་མི་མཐུན་གཉེན་པོ་དང༌། །ཆུང་དང་ཕྲ་དང་ཉུང་བ་དང༌། །ཡུན་ཐུང་ལྷག་མ་མེད་པ་དང༌། །མཐའ་དག་མིན་དང་བྲལ་བ་དང༌། །དམན་དང་ཞན་དང་ཞུམ་པ་དང༌། །འདྲ་བ་དག་ལས་དགག་པ་ནི། །མ་ཡིན་དགག་པར་འདོད་པ་ནི། །རྒྱུན་འདྲ་བ་དང་རང་བཞིན་དང༌། །སྐབས་དང་རྟེན་གྱི་དབྱེ་བ་ཡིས། །ཞེས་པ་གཞན་མ་ཡིན་དགག་ནི་རྒྱལ་པོ་ལ་བྲམ་ཟེ་མ་ཡིན་ཞེས་བརྗོད་པ་དང༌། རིག་པའི་མི་མཐུན་ཕྱོགས་ལ་མ་རིག་པ་ཞེས་བརྗོད་པ་ལྟ་བུ་དང༌། ཆགས་པའི་གཉེན་པོ་ལ་མ་ཆགས་པ་དང༌། གཟུགས་ཆུང་བ་ལ་གཟུགས་མེད་པ་དང༌། འདུ་ཤེས་ཕྲ་བ་ལ་འདུ་ཤེས་མེད་པ་དང༌། རྫས་ཉུང་བ་ལ་རྫས་མེད་པ་དང༌། ཡུན་ཐུང་བ་ལ་ཡུན་མེད་པ་དང༌། གྲངས་གཞན་ལྷག་མ་མེད་པ་ལ་གྲངས་མེད་པ་དང༌། རྒྱུ་མཐའ་དག་ནི་འབྲས་བུ་མཐའ་དག་ལ་ངེས་པ་མ་ཡིན་པ་དང༌། དྲི་མ་དང་བྲལ་བ་ལ་མྱ་ངན་ལས་འདས་པ་དང༌། བུ་དམན་པ་ལ་བུ་མེད་པ་དང༌། འགྲོས་ཞན་པ་ལ་འགྲོས་མེད་པ་དང༌། སྟོབས་ཞུམ་པ་ལ་སྟོབས་མེད་པ་དང༌། རིག་བྱེད་ཀྱི་གཟུགས་དང་འདྲ་བ་མ་ཡིན་པ་ལ་རིག་བྱེད་མ་ཡིན་པའི་གཟུགས་ཞེས་བརྗོད་པ་རྣམས་སོ། །འདི་དག་གིས་ནི་དགག་བྱ་བཀག་ཤུལ་དུ་ཆོས་གཞན་འཕངས་པའི་ཕྱིར་མ་ཡིན་པར་དགག་པ་ཞེས་བྱའོ། །ཆོས་གཞན་འཕེན་མི་འཕེན་ཡང་བརྗོད་འདོད་ཀྱི་དབང་གིས་བཞག་པ་ཡིན་གྱི། སྒྲ་རང་གི་ངོས་ནས་གཞག་པ་ནི་མ་ཡིན་ནོ། །གཉིས་པ་མེད་དགག་བཤད་པ་ནི། རྒྱུན་འདྲ་བ་དང་རང་བཞིན་དང༌། །སྐབས་དང་རྟེན་གྱི་དབྱེ་བ་ཡིས། །སྔར་དང་ཞིག་ནས་མེད་པ་ལ། །དབྱེ་བ་རྣམ་པ་བརྒྱད་ཡིན་ཏེ། །ཕན་ཚུན་དག་ལ་རང་བཞིན་དང༌། །རྒྱུ་དང་རང་བཞིན་གཉིས་དབྱེ་བའི། །ཤིན་ཏུ་མེད་དང་བཅུ་གཅིག་ནི། །མེད་པར་དགག་པར་འདོད་པའོ། །ཞེས་པ་སྔ་ནས་མེད་པ་དང་ཞིག་ནས་མེད་པ་ལ། དབྱེ་བ་རྣམ་པ་བརྒྱད་ཡིན་ཏེ། ཞེས་པ་བཤད་པའི་གཞིའོ། །དེ་གང་ཞེ་ན། སེམས་ཅན་མ་སྐྱེས་པ་ལྟ་བུ་རྒྱུན་འདྲ་བ་སྔ་ན་མེད་པ་དང༌། ས་བོན་ལ་མྱུ་གུ་ལྟ་བུ་རང་བཞིན་སྔ་ན་མེད་པ་དང༌། གསེར་ལ་རྣ་རྒྱན་ལྟ་བུ་གནས་སྐབས་སྔ་ན་མེད་པ་དང༌། ས་ཕྱོགས་ན་བུམ་པ་ལྟ་བུ་རྟེན་སྔ་ན་མེད་པའི་དབྱེ་བ་ཡིས་སྔ་ན་མེད་པ་བཞི་དང༌། དེ་བཞིན་དུ་སེམས་ཅན་ཤི་བ་ལྟ་བུ་རྒྱུན་འདྲ་བ་ཞིག་ནས་མེད་པ་དང༌། མྱུ་གུ་ལ་ས་བོན་ལྟ་བུ་རང་བཞིན་ཞིག་ནས་མེད་པ་དང༌། རྣ་རྒྱན་ལ་གསེར་གྱི་ཕྱེ་མ་ལྟ་བུ་གནས་སྐབས་ཞིག་ནས་མེད་པ་དང༌། བུམ་པ་ཡུལ་གཞན་དུ་འཕོས་པ་ལྟ་བུ། རྟེན་ལ་ཞིག་ནས་མེད་པ་སྟེ། ཞིག་ནས་མེད་པ་བཞིའོ། །བརྒྱད་པོ་དེའི་སྟེང་དུ་ཕན་ཚུན་གཅིག་དག་ལ་གཅིག་གི་རང་བཞིན་མེད་པ་དང་དགུའོ། །ནམ་མཁའ་ལ་མེ་ཏོག་གི་རྒྱུ་དང་རང་བཞིན་ཤིན་ཏུ་མེད་པ་གཉིས་ཀྱི་དབྱེ་བས་ཤིན་ཏུ་མེད་པ་གཉིས་དང་བཅུ་གཅིག་གོ། །གསུམ་པ་དགག་པའི་ངེས་ཚིག་བཤད་པ་ནི། ཀུན་ཏུ་ལྡོག་ཕྱིར་དགག་པ་ཡིན། །ཞེས་པ་དགག་བྱ་ཚིག་གིས་ཟིན་པར་འགོག་པའི་ཕྱིར། ཞེས་པའོ། །རྣམ་འགྲེལ་མཛད་པའི་གཞུང་ལས་ནི། ཤེས་བྱ་དང་གཞལ་བྱ་ལ་སོགས་པ་རྣམས་དགག་བྱ་ཚིག་གིས་ཟིན་པར་འགོག་པ་མ་ཡིན་ཡང༌། དགག་པར་འཆད་དགོས་པ་ཡིན་ཏེ། གཞན་སེལ་དུ་ཁས་ལེན་པའི་ཕྱིར། གཉིས་པ་ལས་འཛིན་པའི་བསྡུ་བ་བཤད་པ་ནི། དེ་ཉིད་གཞན་དུ་མི་བརྗོད་དང༌། །འདྲ་བ་གཞན་དང་བྱེ་བྲག་གི། །ཚིག་སྦྱོར་བྱེད་པ་ལས་འཛིན་ནོ། །ཞེས་པ་བུམ་སྣམ་ལྟར་རྫས་ལྡོག་གཉིས་ཀ་དེ་ཉིད་དུ་མི་བརྗོད་པ་དང༌། བསལ་བ་དང་བསལ་བ་ཉིད་ལྟ་བུ་རྫས་ལྡོག་གཉིས་ཀ་གཞན་དུ་མི་བརྗོད་པ་དང༌། ཨུཏྤ་ལ་དང༌། བཻཌཱརྱའི་སྔོན་པོ་ལྟ་བུ་རྫས་དེ་ཉིད་དང༌། ལྡོག་པ་གཞན་དུ་མི་བརྗོད་པ་དང༌། བྱས་མི་རྟག་ལྟ་བུ་ལྡོག་པ་དེ་ཉིད་དང༌། རྫས་གཞན་དུ་མི་བརྗོད་པའི་ཚིག་སྦྱོར་བྱེད་པ་དང༌། ལ་དང༌། ཚང་མང་གི་མེ་དང་རྫས་འདྲ་བ་གཞན་དང༌། སྐྱེས་བུ་སེང་གེ་ལྟ་བུ་ལྡོག་པ་འདྲ་བ་གཞན་གྱི་ཚིག་སྦྱོར་བྱེད་པ་དང༌། མེ་ཚ་ཞིང་རྩུབ་པ་ལྟ་བུ་བྱེ་བྲག་གི་ཚིག་སྦྱོར་བྱེད་པ་དང་གསུམ་མོ། །སྒྲ་དོན་ནི། ལས་ཉིད་གཞི་ཡིན་ལ། དེ་འཛིན་པས་ན་ལས་འཛིན་ཞེས་སམ། ཡང་ན་ལས་གཉིས་གཞི་གཅིག་ཏུ་འཛིན་པས་ན་ལས་འཛིན་པའི་དེའི་སྐྱེས་བུའི་བསྡུ་བ་ཞེས་བྱའོ། །གསུམ་པ་བ་གཉིས་པའི་བསྡུ་བ་བཤད་པ་ནི། གྲངས་དང་བསྡུས་དོན་སྦྱོར་བ་ཡིས། །གཅིག་དང་ཐ་དད་སྦྱོར་བྱེད་པ། །བ་གཉིས་པར་ནི་དད་པའོ། །ཞེས་པ་དཔེར་ན། ལྔ་ཞེས་པ་ལྟ་བུའི་གྲངས་དང༌། ཕུང་པོ་ཞེས་པ་ལྟ་བུའི་བསྡུས་དོན་སྦྱར་བའི་སྒོ་ནས་ཕུང་པོ་ལྔ་ཞེས་པ་ལྟ་བུ་ནི་བ་གཉིས་པ་དེའི་སྐྱེས་བུའི་བསྡུ་བར་འདོད་དོ། །ཡང་དྲུག་འགྲོ་ཞེས་པ་ལྟ་བུ་གཅིག་ཏུ་སྦྱོར་བར་བྱེད་པ་དང༌། གྲོང་དྲུག་ཅེས་པ་ལྟ་བུ་ཐ་དད་དུ་སྦྱོར་བར་བྱེད་པ་དང་གཉིས་སོ། །དགུ་པ་ཟླས་དབྱེ་བའི་བསྡུ་བ་བཤད་པ་ནི། བསྡུ་བའི་ཕྱིར་དང་དབྱེ་ཕྱིར་དང༌། །ཉེ་བར་ཐ་དད་སྦྱོར་བྱའི་ཕྱིར། །འདས་མ་ཐག་དང་གཞན་དག་དང༌། །ལན་གྲངས་གཞན་ལ་སྦྱོར་བྱེད་པ། །ཟླས་དབྱེ་བ་ཞེས་འདོད་པ་ཡིན། །ཞེས་པ་ས་དང༌། ཆུ་དང༌། མེ་དང༌། རླུང་ནི་འབྱུང་བའོ། །ཞེས་པ་ལྟ་བུ་བསྡུ་བའི་སྦྱོར་བ་དང༌། འབྱུང་བ་ནི་ས་དང༌། ཆུ་དང༌། མེ་དང་རླུང་ཞེས་པ་ལྟ་བུ་དབྱེ་བའི་སྦྱོར་བ་དང་གཉིས་སོ། །དེ་གཉིས་ཀ་ཡང་ཉེ་བར་ཏེ། ཤིན་ཏུ་ཐ་དད་གོ་བྱེད་དུ་སྦྱོར་བའི་ཕྱིར་ཟླ་བོ་དང་དབྱེ་བ་ཡིན་པས་ཟླས་ཕྱེ་བའི་བསྡུ་བ་ཞེས་འདོད་དོ། །བསྡུ་བ་ལ་ཡང༌། དེ་ལྟར་འདི་དང་ཡང་འདི་དང༌། །ཞེས་པ་ལྟ་བུ་འདས་མ་ཐག་པ་བསྡུད་པ་དང༌། གཉིས་མ་གྲུབ་ན་འགལ་བ་དང༌། །ཞེས་པ་ལྟ་བུ་མིང་མ་སྨོས་པ་གཞན་དག་བསྡུ་བ་དང༌། ལྷ་དང༌། མི་དང༌། ལྷ་མ་ཡིན་དང༌། དྲི་ཟར་བཅས་པའི་འཇིག་རྟེན་ཞེས་པ་ལྟ་བུ་ལན་གྲངས་གཞན་ལ་སྦྱོར་བར་བྱེད་པའི་བསྡུ་བ་དང་གསུམ་མོ། །གཉིས་མ་གྲུབ་ན་ཞེས་པའི་གཉིས་ནི་རྗེས་སུ་འགྲོ་ལྡོག་གཉིས་ལ་བྱའོ། །བཅུ་པ་ཕྱོགས་ཙམ་སྟོན་པའི་བསྡུ་བ་ནི། རང་གི་རིགས་ཙམ་བསྡུད་བྱེད་ཅིང༌། །ཕྱོགས་རྣམས་ཀུན་ཏུ་སྤོང་བ་དང༌། །རིགས་ཀྱི་ཚད་ཀྱང་མི་འཛིན་པས། །ཕྱོགས་ཙམ་སྟོན་པའི་སྦྱོར་བའོ། །ཞེས་པའི་དོན་ནི། མདོ་ལས། ཀྱེ་རྒྱལ་བའི་སྲས་དག་ཁམས་གསུམ་པོ་འདི་ནི་སེམས་ཙམ་མོ། །ཞེས་གསུངས་པ་ལྟ་བུ་སྟེ། སེམས་རང་གི་རིགས་དང༌། སེམས་མ་ཡིན་པའི་ཕྱོགས་རྣམས་ཞེས་སྦྱར་རོ། ། གཉིས་པ་ཚིག་ཕྲད་བཤད་པ་ལ་གཉིས་ཏེ། མཚན་ཉིད་དང༌། དབྱེ་བའོ། །དང་པོ་ནི། གང་ཞིག་རང་གི་དོན་མེད་ཅིང༌། །དོན་གྱི་མིང་ལ་གསལ་བྱེད་པ། །ཚིག་གི་ཕྲད་ཅེས་བྱ་བ་སྟེ། །དེ་ལྡན་ཕྲད་དང་བཅས་པ་ཡིན། །ཞེས་པ་དཔེར་ན། ལྕགས་གཉིས་སྦྱོར་བའི་ཚ་ལ་བཞིན་དུ། རང་གིས་དོན་མི་སྟོན་ཀྱང་ཚིག་གཞན་གྱིས་དོན་སྟོན་པ་ལ་ཕན་འདོགས་པར་བྱེད་པ་སྟེ། དེ་ཡང་སངས་རྒྱས་ལ་ཕྱག་འཚལ་ཞིང༌། ཆོས་ཀྱི་གཏམ་བྱ་བའི་སླད་དུ་དགེ་འདུན་ནི་བསྡུ་བར་བྱའོ། །ཞེས་བརྗོད་པའི་ཚེ་ན། ལ་དང༌། ཀྱེ་དང༌། ནི་ལྟ་བུའོ། །གཉིས་པ་ལ་གཉིས་ཏེ། ཕྲད་རྐྱང་པ་དང༌། འདུས་པའོ། །དང་པོ་ལ། དེ་མ་ཐག་ཏུ་འཆད་པར་འགྱུར་བའི་ཕྲད་རྐྱང་སུམ་ཅུ་སོ་གཉིས་ཞེས་གྲགས་པ་དེ་སྡོམ་དུ་བསྡུས་ན། གང་ཅི་དེ་འདི་ད་ན་སྟེ། །དང་ནི་ཀྱང་ཡང་ཁོ་ན་ཉིད། །ཙམ་འབའ་ཡང་དག་སོགས་ཚུལ་བཞིན། །ཅིང་ལ་ཀྱི་ཀྱིས་ལས་ནས་དུ། །འོ་སོགས་འོ་ན་འམ་དག་སོགས། །པ་བ་ཕྲད་རྐྱང་སུམ་ཅུ་གཉིས། །ཞེས་པའོ། །དེ་ཉིད་རྒྱས་པར་བཤད་པ་ལ། སུམ་ཅུ་རྩ་གཉིས་ལས། དང་པོ་ནི། དེ་ལ་ཕྲད་ཀྱི་འཇུག་པ་ནི། །གང་ནི་འདྲི་བའི་ཚིག་གི་དོན། །སྤྱི་ལ་ཁྱབ་པར་སྦྱོར་བ་སྟེ། །སླར་བསྡུ་བ་ལ་ཀུན་ཏུ་སྤང༌། །ཞེས་པའི་དོན། གང་ཞེས་པ་སྤྱི་སྒྲ་ཡིན་ལ། འདི་ལྟར་ཡིན་ནོ་ཞེས་བྱ་བ་ལྟ་བུ་འོག་ནས་འབྱུང་བའི་སླར་བསྡུ་བའི་ཚིག་བཅུ་པོ་ལ་སྤང་བར་བྱའོ། །གཉིས་པ་ནི། ཅི་ལ་སོགས་པ་དེ་བཞིན་ཏེ། །སྐབས་ཀྱིས་ཁྱབ་པ་བརྩི་བར་བྱ། །ཞེས་པ་ཅི་དང༌། ཇི་དང་སུ་ལ་སོགས་པའང་གང་ཞེས་བརྗོད་པ་དེ་བཞིན་ཏེ། དེ་དང་འདྲ་བར། འདྲི་ཚིག་དང༌། སྤྱི་ལ་ཁྱབ་པ་ཉིད་དུ་འགྱུར་བ་ཡིན་ལ། དེ་ཡང་ཅི་ཞིག་དང༌། ཇི་ཞིག་དང༌། སུ་ཞིག་དང༌། ཅི་སྙེད། སུ་དག་ཅེས་སོགས་སྐབས་ཀྱི་ཁྱབ་པ་སྟེ། སྐབས་དང་བསྟུན་ནས་བརྩི་བར་བྱའོ། །གསུམ་པ་ནི། དེ་ཞེས་བྱ་བའི་ཚིག་གི་དོན། །ཐ་སྙད་དབང་དུ་འཇུག་པ་གསུམ། །འདས་དང་རྣམ་གྲངས་གཞན་པ་དང༌། །ལྷག་མ་དག་དང་བཅས་པའོ། །ཞེས་པ་དེ་ཞེས་བྱ་བའི་ཚིག་གི་དོན་ནི། ཐ་སྙད་ལ་འཇུག་པ་དང༌། དངོས་པོ་ལ་འཇུག་པ་དང༌། དུས་ལ་འཇུག་པ་གསུམ་མོ། །དང་པོ་ནི། སྔར་གྱི་དེ་ཞེས་པ་ལྟ་བུ་འདས་པ་ལ་འཇུག་པ་དང༌། ཅིག་ཤོས་དེ་ཞེས་པ་ལྟ་བུ་རྣམ་གྲངས་གཞན་ལ་འཇུག་པ་དང༌། ལྷ་མཆོད་དེ་ཞེས་པ་ལྟ་བུ་ལྷག་མ་དག་དང་བཅས་པའོ། །གཉིས་པ་དངོས་པོ་ལ་འཇུག་པ་ནི། བདེན་པ་དག་དང་གསང་བ་དང༌། །བདག་གི་བ་དང་ཕ་རོལ་པོའི། །དངོས་པོ་དག་ལ་འཇུག་པ་བཞི། །ཞེས་པ་དེ་ཡིན་ཞེས་དང༌། དེ་མ་བྱེད་ཅིག་ཅེས་པ་ལྟ་བུའི་ཚིག་དང༌། བདག་གི་དེ་ཞེས་བྱ་བ་དང༌། དེ་ལ་རྒྱོབ་ཅིག་ཅེས་བྱ་བ་ལྟ་བུའི་ཚིག་བཞི་དང་སྦྱར་རོ། །གསུམ་པ་དུས་ལ་འཇུག་པ་ནི། །འདས་པ་དང་ནི་མ་འོངས་པའི། །དུས་ཉིད་ལ་ནི་འཇུག་པ་གཉིས། །ཞེས་པ། དེའི་ཚེ་དེའི་དུས་ནི། ཞེས་པ་ལྟ་བུ་འདས་པ་ལ་འཇུག་པ་དང༌། དེ་ལྟ་བུ་ཞིག་འབྱུང་བར་འགྱུར་རོ། །ཞེས་པ་མ་འོངས་པ་ལ་འཇུག་པ་གཉིས་སོ། །མ་འོངས་པ་ལ་འཇུག་པའི་དཔེ་ནི། ཇི་སྐད་དུ། མང་དུ་ཐོས་པ་ཐོས་པ་འདོད། །གཙང་སྦྲ་ཅན་ནི་གཙང་ལ་དགའ། །དཀའ་སྤྱད་རྣམས་ནི་དེས་མི་འཇིགས། །སྐྱེ་རྒུ་གོམས་པའི་ལམ་དུ་འགྲོ། །ཞེས་པ་ལྟ་བུའོ། །འོ་ན་དེ་ཞེས་པའི་ཚིག་མི་འཇུག་པའི་སྐབས་ཡོད་དམ་ཞེ་ན། བདག་ཉིད་ད་ལྟ་ཉིད་ལ་སྤངས། །ཞེས་པ་དངོས་པོའི་སྐབས་སུ་བདག་ཉིད་ཀྱི་དངོས་པོ་དང༌། དུས་ཀྱི་སྐབས་སུ་ད་ལྟར་བ་ཉིད་ལ་ནི་དེ་ཞེས་བྱ་བའི་སྒྲ་འཇུག་པ་སྤང་བར་བྱ་སྟེ། རིང་བའི་ཚིག་ཡིན་པའི་ཕྱིར་རོ། །འོ་ན་དེ་ལྟར་ངེས་སམ་ཞེ་ན། དངོས་པོས་དུས་ནི་མི་འདོར་ཏེ། །ཀུན་ལ་རབ་ཏུ་སྦྱར་བར་བྱའོ། །ཞེས་པ་དངོས་པོ་ལ་འཇུག་པ་བཞི་པོ་དེས་ནི་དུས་གསུམ་ཆར་མི་འགལ་ཏེ། དཔེར་ན། སྔོན་གྱི་དེ་དང་ད་ལྟའི་དེ། །དེ་བཞིན་དེ་ཡི་གནས་སུ་ཆེ། །ཞེས་པ་ལྟ་བུའོ། །དོན་འདི་དག་སུམ་ཅུ་པ་ལས་ཀྱང༌། གང་མིང་གི་ནི་ཡ་མཐའ་ན། །གསུམ་པ་ལ་ནི་ཨེ་སྦྱར་བ། །ཐ་སྙད་དབང་དུ་གསུམ་ཡིན་ཏེ། །དངོས་པོའི་དབང་དུ་བཞི་རུ་སྦྱར། །དུས་ཀྱི་དབང་བྱས་གཉིས་ཡིན་ནོ། །ཞེས་བཤད་དོ། །བཞི་པ་ནི། འདི་ཚིག་འདས་དང་མ་འོངས་དང༌། །སྐབས་ཀྱི་དངོས་པོ་གཞན་ལ་འཇུག །ཅེས་པ་འཇུག་ཡུལ་གསུམ་མོ། །གསུམ་པ་དེ་ལའང་གཉིས་ཡོད་དོ་ཞེས་སྟོན་པ་ནི། གང་ཞིག་ལས་ནི་ལྟོས་བྱས་པའི། །ཉེ་བ་དག་དང་མངོན་སུམ་པའི། །དངོས་པོ་དག་ཀྱང་གཉིས་ཡིན་ནོ། །ཞེས་པ་ཉེ་བའི་དངོས་པོ་དང༌། མངོན་སུམ་པའི་དངོས་པོ་ལ་འདི་ཞེས་བྱ་བའི་སྒྲ་འཇུག་པ་ཡིན་ནོ། །འདི་ཞེས་བྱ་བའི་སྒྲ་མི་འཇུག་པའི་ཡུལ་ཇི་ལྟ་བུ་ཞེ་ན། སྤང་བར་བྱ་བ་འདི་ལྟ་སྟེ། །ལྐོག་ཏུ་གྱུར་དང་རིང་བ་དང༌། །གལ་ཏེ་བསྟན་བྱ་དུས་ཉིད་ན། །འདས་དང་མ་འོངས་སྤང་བར་བྱ། །ཞེས་པ་བསྟན་བྱ་དུས་ད་ལྟར་བ་ཉིད་ཡིན་པའི་ཚེ་ན་འདས་མ་འོངས་གཉིས་ལ་འདི་ཞེས་བྱ་བའི་ཚིག་སྤང་བར་བྱའོ། །དེ་ལྟར་ན་གང་ཞེས་དང༌། དེ་ཞེས་དང༌། འདི་ཞེས་བྱ་བའི་ཚིག་གསུམ་ཀ་ལ་རྣམ་དབྱེ་བདུན་ནམ། དྲུག་དང་སྦྱར་དུ་ཡོད་དོ་ཞེས་སྟོན་པ་ནི། དེ་རྣམས་ཀུན་ལ་བསྒྱུར་བ་ལྡན། །ཞེས་པ་སྟེ། དེ་ཡང་འདི་ལྟར། གང་ལ་གང་གིས་གང་གི་ཕྱིར། །གང་ལས་གང་གི་གང་ལ་གནས། །དེ་ལ་དེ་ཡིས་དེ་ཡི་ཕྱིར། །དེ་ལས་དེ་ཡི་དེ་ལ་གནས། །འདི་ལ་འདི་ཡིས་འདི་ཡི་ཕྱིར། །འདི་ལས་འདི་ཡི་འདི་ལ་གནས། །ཞེས་པ་དྲུག་དང༌། དེའི་སྔོན་དུ་གང་དེ་འདི་ཞེས་པ་ལྟ་བུ་དང་པོ་དོན་ཙམ་སྟོན་པ་དང་བདུན་ནོ། །ཕྲད་ལྔ་པ་འཆད་པ་ནི། ད་ནི་སྐབས་སུ་བབ་པའི་ཚིག །ད་ལྟར་བྱུང་ལ་སྦྱོར་བ་སྟེ། །འདས་པའི་སྐབས་ལ་རྣམ་པར་སྤངས། །ཞེས་པའོ། །ཚིག་ཕྲད་དྲུག་པ་འཆད་པ་ནི། ན་ཞེས་བྱ་བའི་ཚིག་ནི་དོན་བཅུ་བཞི་ལ་འཇུག་གོ། ། ཞེས་སྟོན་པ་ནི། ན་ཞེས་བྱ་བའི་ཚིག་གི་དོན། །དམིགས་ཀྱིས་དབྱེ་དང་རྒྱུ་མཚན་དང༌། །རྒྱུ་མཚན་དོན་གྱིས་བསྟན་པ་དང༌། །ལས་དང་ཆེད་དང་རྟེན་གནས་དང༌། །ཕྱི་ཚིག་དེ་གཞན་སོགས་སྟོན་དང༌། །འོས་པར་དཀའ་བའི་ཚོད་འཛིན་ལས། །ཕྱི་ཚིག་ངེས་པར་བྱེད་པ་དང༌། །དེ་ལས་བཟློག་པ་ཉིད་དང་ནི། །འགལ་བའང་མི་འགལ་སྟོན་པ་དང༌། །སྨོན་དང་འདྲི་དང་ཐེ་ཚོམ་གཞི། །ཚེ་སྐབས་རྣམས་ལ་འདི་མཐོང་ངོ༌། །ཞེས་བྱ་བ་འདི་ལ། ཐོག་མར་དམིགས་ཀྱིས་དབྱེ་བ་ནི་གཉིས་ཏེ། གཞུང་གཟུགས་པ་དང༌། གལ་བཟུང་བའོ། །དང་པོ་ནི། མདོར་ན་འདི་ཡིན་ཏེ། ཞེས་པ་ལྟ་བུའོ། །གཉིས་པ་ནི། དེ་ལྟར་ཡིན་གྲང་ན་ཞེས་པ་ལྟ་བུའོ། །གཉིས་པ་རྒྱུ་མཚན་ལ་གཉིས་ཏེ། སྒྲུབ་བྱེད་ཀྱི་རྒྱུ་མཚན་དང༌། རྒྱུའི་རྒྱུ་མཚན་ནོ། །དང་པོ་ནི། དུ་བ་ཡོད་ན་མེ་ཡོད། ཅེས་པ་ལྟ་བུ་དང༌། གཉིས་པ་ནི། འདི་ཡོད་ན་འདི་འབྱུང་ཞེས་པ་ལྟ་བུའོ། །གསུམ་པ་རྒྱུ་མཚན་དོན་གྱིས་བསྟན་པ་ལ། ཤིང་མེད་ན་ཤ་པ་ག་ལ་ཡོད་ཅེས་པ་ལྟ་བུ་དང༌། དེ་སྐད་དུ་འདྲི་ན་འདི་སྐད་ཅེས། ཞེས་པ་ལྟ་བུ་གཉིས་ཡོད་དོ། །བཞི་པ་ལས་དང༌། ལྔ་པ་ཆེད་དང༌། དྲུག་པ་རྟེན་གནས་གསུམ་ནི་གོ་རིམ་བཞིན་དུ། ཤིང་གི་རྩེ་ན་གཅོད་ཅེས་པ་ལྟ་བུ་དང༌། ཤིང་གི་ཕྱིར་དུ་ན་ཆུ་འདྲེན་ཞེས་པ་ལྟ་བུ་དང༌། ཤིང་གི་རྩེ་མོ་ན་གནས་ཞེས་པ་ལྟ་བུའོ། །བདུན་པ་ཕྱི་མའི་ཚིག་སྔ་མ་དེ་ལས་གཞན་དུ་སྟོན་པ་ནི། དུ་བ་ཡོད་ན་མེ་ཡོད་པ་ཡིན་ན་འདི་ན་ནི་དུ་བ་མེད་དེ། མེ་མེད་པའི་ཕྱིར་ཞེས་པ་ལྟ་བུའོ། །སོགས་པ་ཞེས་བྱ་བའི་སྒྲས་བསྡུས་པ་ཕྱི་མའི་ཚིག་སྔ་མ་དང་འགལ་བར་སྟོན་པ་དང༌། མེད་པར་སྟོན་པ་གཉིས་ལས། དང་པོ་ནི། གང་ཚ་རེག་ཡོད་པ་ན་གྲང་རེག་ཡོད་དགོས་ན། འདི་ན་ཚ་བའི་རེག་པ་ཡོད་དོ། །ཞེས་པ་ལྟ་བུ་དང༌། གཉིས་པ་ནི། གང་དུ་བ་ཡོད་པ་ན་མེ་ཡོད་དགོས་ན། འདི་ན་ནི་མེ་མེད་དོ་ཞེས་པ་ལྟ་བུའོ། །བརྒྱད་པ་འོས་པར་དཀའ་བ་ཆག་ཚད་འཛིན་པའི་ཚིག་ལས་ཕྱི་ཚིག་ངེས་པར་བྱེད་པ་ནི། ལྷ་ཡང་ཕྱག་འཚལ་ན། མི་ལྟ་ཅི་སྨོས། ཞེས་པ་ལྟ་བུའམ་རྒྱུ་ཡང་མ་སྐྱེས་ན། འབྲས་བུ་ག་ལ་སྐྱེས། ཞེས་པ་ལྟ་བུའོ། །དགུ་པ་དེ་ལས་ལྡོག་པ། སྔ་མའི་ཚིག་གིས་ཕྱི་མ་ལ་ཐེ་ཚོམ་འདྲེན་པར་བྱེད་པ་ནི། མི་ཕྱག་འཚལ་ན་ལྷ་ཕྱག་འཚལ་ཞེས་པ་ལྟ་བུའོ། །བཅུ་པ་འགལ་བའང་མི་འགལ་བར་སྟོན་པ་ནི། དོན་དམ་པར་ནི་དབྱེ་བ་མེད་ན། ཀུན་རྫོབ་ཙམ་དུ་དབྱེ་བ་ཡོད་དོ་ཞེས་པ་ལྟ་བུའོ། །བཅུ་གཅིག་པ་སྨོན་པའི་གཞི་ནི། བྱང་ཆུབ་ཐོབ་ན་ཅི་མ་རུང༌། །ཞེས་པ་ལྟ་བུའོ། །བཅུ་གཉིས་པ་འདྲི་བའི་གཞི་ནི། གང་གིས་ན་གཟུགས་སུ་རུང་བ་ཡིན། ཞེས་པ་ལྟ་བུའོ། །བཅུ་གསུམ་པ་ཚེ་སྐབས་ནི། དེའི་ཚེ་ན་ཞེས་པ་དང༌། དུས་གཅིག་ན་ཞེས་པ་ལྟ་བུའོ། །ཚིག་ཕྲད་བདུན་པ་ནི། སྟེ་ནི་ལྷག་མ་ཡོད་པ་སྟེ། །མཚམས་སྦྱོར་བ་དང་དམ་བཅའ་དང༌། །གཞན་འདྲེན་པ་དང་གསུམ་དུ་འདོད། །བྱེད་དང་བྱ་བའམ་ཡང་ན་ནི། །བྱ་བ་ཉིད་དུ་སྦྱོར་བ་གང༌། །ཚིག་གཉིས་རིམ་པ་དུས་གཅིག་ཏུ། །སྦྱོར་བར་བྱེད་པ་མཚམས་སྦྱོར་ཡིན། །གང་ཞིག་གི་ནི་སྔ་མ་ལ། །གསལ་བར་བྱེད་པ་དམ་བཅའ་བ། །ལྷག་མ་ཡོད་པར་སྟོན་གྱུར་ཅིང༌། །དེ་ལས་གཞན་གྱུར་གཞན་འདྲེན་པའོ། །ཞེས་བྱ་བའི་དོན་ནི། ཚིག་སྔ་མ་བྱེད་ཚིག་དང༌། ཕྱི་མ་བྱ་ཚིག་གཉིས་རིམ་གྱིས་སྦྱོར་བ་དང༌། ཡང་ན་ཚིག་གཉིས་ཀ་བྱ་ཚིག་ཉིད་དུ་སྦྱོར་བ་གཞིར་བྱས་པ་ལ། རིམ་གྱིས་སྦྱོར་བ་དང༌། དུས་གཅིག་ཏུ་སྦྱོར་བ་གཉིས་ཏེ་གསུམ་མོ། །དང་པོ་ནི། མདའ་འཕངས་ཏེ་ཕོག །ཅེས་པ་དང༌། རྟ་ཞོན་ཏེ་འགྲོ། ཞེས་པ་ལྟ་བུ་བྱ་བྱེད་ཀྱི་ཚིག་ཏུ་སྦྱར་བ་གཞིར་བྱས་པ་ལའང༌། རིམ་གྱིས་སྦྱར་བ་དང༌། དུས་གཅིག་ཏུ་སྦྱར་བ་གཉིས་སོ། །གཉིས་པ་ནི། ལྷ་གསོལ་ཏེ་ལས་བྱ་ཞེས་པ་ལྟ་བུ་དང༌། གསུམ་པ་ནི། འཛུམ་དམུལ་ཏེ་མདངས་ཕྱུང་ཞེས་པ་ལྟ་བུའོ། །དེ་དག་ནི་མཚམས་སྦྱོར་བའི་ཏེ་ཡིན་ལ། དེ་དང་འདྲ་བར། ལ་དང༌། ནས་དང༌། ཅིང་ཤིང༌། ཞིང་རྣམས་ལའང་སྦྱོར་ཚུལ་དེ་ལྟར་བྱས་ནས་མཚམས་སྦྱོར་དུ་འགྱུར་རོ། །ཚིག་ཕྱི་མ་གང་ཞིག་གིས་ནི་ཚིག་སྔ་མ་ལ་ཕན་འདོགས་ཤིང༌། གསལ་བར་བྱེད་པ་ནི་དམ་བཅའ་བའི་ཏེ་ཡིན་ལ། དེ་ཡང་དཔེར་ན། སྒྲ་མི་རྟག་སྟེ། བྱས་པའི་ཕྱིར། ཞེས་པ་ལྟ་བུའོ། །གསུམ་པ་གཞན་འདྲེན་པའི་སྟེ་ནི། ལྷག་མ་དང་བཅས་པ་གཞིར་བྱས་པ་ལ་སྔ་མ་གཉིས་ལས་གཞན་དུ་གྱུར་པའོ། །དེ་ཡང་དཔེར་ན། ཤར་གྱི་ཕྱོགས་ན་དབང་པོ་སྟེ། །ལྷོ་ཡི་ཕྱོགས་ན་འཆི་བདག་གོ། །ཞེས་པ་ལྟ་བུའོ། །འདིར་སྟེ་ནི་ས་ལ་ཏ་སྦྱར་བ་ཞིག་ཡིན་ཏེ། ལ་དོན་སུ་ལ་ཨུ་ཕྱིས་ནས། །དེ་ལ་གསུམ་པའི་དང་པོ་སྦྱར། །དེ་ལ་ཨཱ་ལི་གསུམ་པ་སྦྱར། །དེ་ནི་ལྷག་དང་བཅས་པའོ། །ཞེས་སུམ་ཅུ་པ་ལས་འབྱུང་བས་སོ། །དེ་ལྟ་མོད་ཀྱི་བྱས་ཏེ་ཞེས་པ་ལྟ་བུ་སའི་མཐའ་ཅན་རྣམས་ལ་ནི་ཏ་རྐྱང་དུ་བཞག་པས་ཆོག་ལ། ཡོད་དེ་ཞེས་པ་ལྟ་བུ་ལ་ནི་སྔ་མའི་ཤུགས་ཀྱིས་ད་ལ་སྦྱོར་བར་ཡང་བཤད་དོ། །ཚིག་ཕྲད་བརྒྱད་པ་ནི། དང་ནི་འབྱེད་དང་བསྡུད་པ་དང༌། །རྒྱུ་མཚན་ཚེ་སྐབས་གདམས་ངག་ལྔ། ། དེ་ཉིད་དང་ནི་གཞན་དག་དང༌། །ལན་གྲངས་གཞན་ལ་སྦྱར་བ་ཡི། །བསྡུད་པའི་དང་ཡང་གསུམ་དུ་འདོད། །ཅེས་བྱ་བ་ལ། ཆོས་ནི་འཁོར་བ་དང༌། མྱ་ངན་ལས་འདས་པ། ཞེས་པ་ལྟ་བུ་འབྱེད་པ་དང༌། འཁོར་བ་དང་མྱ་ངན་ལས་འདས་པ་ནི་ཆོས་སོ་ཞེས་པ་ལྟ་བུ་བསྡུད་པ་དང༌། མཉམ་པར་གཞོག་དང་ལྷག་མཐོང་འཕེལ། །ཞེས་བྱ་བ་ལྟ་བུ་རྒྱུ་མཚན་གྱི་དང་དང༌། གཞོན་ནུ་དེ་ཕྱིར་བྱུང་བ་དང་མཛའ་བོ་དག་ལྷགས་སོ། །ཞེས་པ་ལྟ་བུ་ཚེ་སྐབས་ཀྱི་དང་དང༌། ཡིད་ལ་ཟུངས་ཤིག་དང༌། ངས་བཤད་དོ། །ཞེས་པ་ལྟ་བུ་གདམས་ངག་གི་དང་དང་ལྔའོ། །དེ་ལྟར་ལྔའི་ནང་ནས་བསྡུད་པ་ཉིད་ལ་ཡང་གསུམ་སྟེ། དེ་ཉིད་བསྡུད་པ་དང༌། དངོས་པོ་གཞན་བསྡུད་པ་དང༌། ལན་གྲངས་གཞན་ལ་སྦྱོར་བ་བསྡུད་པའོ། །དང་པོ་ནི། ཆོས་དང་མཐུན་པ་ཁོ་ན་བྱ། །ཞེས་པ་ལྟ་བུའོ། །གཉིས་པ་ནི། རྟ་དང་གླང་པོ་ཞེས་པ་ལྟ་བུའོ། །གསུམ་པ་ནི། འདི་དང་ཕྱི་མར་དོན་ཡོད་བྱ། །ཞེས་པ་ལྟ་བུའོ། །ཕྲད་དགུ་པ་སྟོན་པ་ནི། ནི་ནི་དགར་དང་བརྣན་པའི་ཚིག །དམིགས་སམ་ངེས་པར་འཛིན་པ་སྟེ། །ཕྱི་མའི་ཚིག་དང་སྦྱར་བར་བྱ། །ཞེས་བྱ་བ་ལ། ཇི་སྐད་དུ། རྗེས་དཔག་རྣམ་གཉིས་རང་དོན་ནི། །ཚུལ་གསུམ་རྟགས་ལས་དོན་མཐོང་ཡིན། །ཞེས་པ་ལྟ་བུ་ཟླ་བོ་ལས་དགར་བ་དང༌། མེ་ཡོད་པ་ནི་དུ་བ་ཡོད་པས་སོ། །ཞེས་པ་ལྟ་བུ་བཀོད་པ་ལས་དགར་བ་གཉིས་ནི། དམིགས་འཛིན་པའོ། །བརྣན་པའི་ཚིག་ལ་ནི་ངེས་པར་འཛིན་པ་ཞེས་བྱ་ལ། དེ་ལའང་ངོ་བོ་ཉིད་བརྣན་པ་དང༌། རྣམ་གྲངས་གཞན་བརྣན་པ་ཞེས་བྱ་བ་གཉིས་ལས། དང་པོ་ནི། ཇི་སྐད་དུ། རྗེས་དཔག་བྱ་དང་དེ་མཚུངས་ལ། །ཡོད་དང་མེད་ལ་མེད་པར་ནི། །ངེས་པ། ཞེས་པའམ། སངས་རྒྱས་ནི་ཐམས་ཅད་མཁྱེན་པ་ཞེས་པ་ལྟ་བུའོ། །གཉིས་པ་ནི། འདོད་པ་རྣམས་ནི་དགྲའོ། །ཞེས་པ་ལྟ་བུའོ། །དགར་བ་དང་བརྣན་པ་གང་ཡིན་ཀྱང་ཕྱི་མའི་ཚིག་དང་སྦྱར་དགོས་ཏེ། ཚིག་འོག་མ་དང་མ་སྦྱར་ན་དགར་བརྣན་གྱི་དོན་མི་རྟོགས་པའི་ཕྱིར། ཚིག་ཕྲད་བཅུ་པ་ནི། ཀྱང་དང་ཡང་ནི་བསྡུས་པའི་ཚིག །མི་མཐུན་མཐུན་པར་སྟོན་པའང་ཡིན། །འདས་པའམ་མ་འོངས་གཞན་དག་ལས། །ཅི་རིགས་དག་ཏུ་བསྡུ་བར་བྱ། །ཞེས་པ་ཇི་སྐད་དུ། དེ་དག་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ཞིང་ཞེས་པ་བསྡུ་བའི་ཚིག་དང༌། སྒྲ་མེད་ཀྱང་དེ་དེ་ལྟར་སྣང༌། །ཞེས་པ་མི་མཐུན་པ་མཐུན་པར་སྟོན་པའོ། །སྡུད་པའི་ཚིག་ལས་ཕྱེ་ན། ཇི་སྐད་དུ། དུས་གསུམ་དུ་རྣམ་པར་བཞུགས་པའི་སངས་རྒྱས་ཐམས་ཅད་ཀྱང་ཞེས་པ་ལྟ་བུ་འདས་མ་འོངས་ཀྱི་དངོས་པོ་སྡུད་པ་དང༌། རིགས་ལྡན་དེ་མི་དམིགས་པ་ཡང་ཞེས་པ་ལྟ་བུ་དངོས་པོ་གཞན་སྡུད་པ་གཉིས་སོ། །ཡང་གི་སྒྲ་རྣམ་གྲངས་གཉིས་པའི་སྒོ་ནས་བཤད་པ་ནི། ཡང་ཞེས་བྱ་བ་རྣམ་པའང་ཡིན། །ཇི་སྐད་དུ། ལུང་ཡང་དོར་ནས་ངས་བཤད། ཅེས་པ་ལྟ་བུ། ངོ་བོ་ཉིད་བརྣན་པའམ། ཡང་ན་འདི་ལྟར་ཡིན་ཏེ། ཞེས་པ་ལྟ་བུ་རྣམ་གྲངས་གཞན་བརྣན་པ་གཉིས་སོ། །རིགས་པ་དེས་ཉེ་བར་མཚོན་ན་ཀྱང་གི་སྒྲ་ཡང་བརྣན་པ་ལ་འཇུག་པ་ཅིག་སྲིད་པར་གསལ་བ་ཡིན་ཏེ། ཀྱང་ཡང་གཉིས་ནི་གྲོགས་ཀྱི་དབང་གིས་གདམ་ང་ཅན་ཡིན་པའི་ཕྱིར། ཚིག་ཕྲད་བཅུ་གཉིས་པ་ནི། ངེས་པར་བཟུང་བའི་ཚིག་གི་དོན། །གཞན་མི་ལྡན་དང་གཞན་ལ་མིན། །ལྡན་པ་ཙམ་དུ་འཛིན་པ་དང༌། །མ་ངེས་པ་ནི་རྣམ་པ་གཉིས། །བདེན་ཉིད་མི་བསླུ་བ་ཉིད་དང༌། །ཁོ་ན་དག་ནི་རྣམ་པ་དྲུག ། ཅེས་པ་ཁོ་ནའོ་ཞེས་པའི་སྒྲ་འཇུག་པའི་ཡུལ་སྐབས་རྣམ་པ་དྲུག་སྟེ། གཞན་མི་ལྡན་ཞེས་པ་མི་ལྡན་རྣམ་གཅོད་དང༌། གཞན་ལ་མིན་ཞེས་པ་གཞན་ལྡན་རྣམ་གཅོད་དང༌། ལྡན་པ་ཙམ་ཞེས་པ་མི་སྲིད་པ་རྣམ་པར་གཅོད་པ་དང༌། མ་ངེས་པ་རྣམ་པ་གཉིས་ནི། སྲིད་སྒྲུབ་འཕོང་ཁོ་ན་སྐྱེན་ཞེས་པ་ཡོན་ཏན་དེ་གཞན་ལ་མི་ལྡན་པར་ངེས་པ་དང༌། སྲིད་སྒྲུབ་ཁོ་ན་འཕོང་སྐྱེན་ཞེས་པས་ཡོན་ཏན་གཞན་མི་ལྡན་པར་མ་ངེས་པ་དང༌། ཀུན་རྫོབ་དང་དོན་དམ་པའི་དེ་ཁོ་ན་ཉིད་ཅེས་པ་ལྟ་བུ་བདེན་ཞིང་མི་བསླུ་བ་ཉིད་ལ་འཇུག་པ་རྣམས་སོ། །འདིར་དྲུག་ཏུ་བཤད་ཀྱང༌། རྣམ་འགྲེལ་མཛད་པས་གསུམ་དུ་བསྡུས་པ་དེའི་ནང་དུ་མ་འདུས་པ་མེད་པར་ལྟའོ། །ཚིག་ཕྲད་བཅུ་གསུམ་པ་འཆད་པ་ནི། ཉིད་ནི་དེ་བཞིན་ཅུང་ཟད་དུ། །ཕྱི་ཚིག་ཐ་དད་མིན་པ་དང༌། །དངོས་པོའི་རྐྱེན་དུ་འགྱུར་བའོ། །ཞེས་པ། ཉིད་ཅེས་པ་དང༌། ཁོ་ན་ཞེས་པ་ཕལ་ཆེར་འདྲ་བས་དེ་བཞིན་ཡིན་པ་ལ་ཅུང་ཟད་མི་འདྲ་བའི་ཁྱད་པར་ནི། ཨུཏྤལ་ཉིད་སྔོན་པོ་ཞེས་པ་ཚིག་ཕྱི་མ་རང་ལས་ཐ་དད་མ་ཡིན་པ་དང༌། སྲ་བའི་དངོས་པོ་སྟོན་པ་ན་སྲ་བ་ཉིད་ཅེས་པ་ལྟ་བུ་དངོས་པོའི་རྐྱེན་དུ་འགྱུར་བའོ། །ཚིག་ཕྲད་བཅུ་བཞི་པ་འཆད་པ་ནི། ཚད་འཛིན་ལྷག་མ་འགོག་པ་ཡི། །ཙམ་ཞེས་བྱ་བ་རྣམ་པ་གཉིས། །ཞེས་པ་རྡུལ་ཕྲན་ཙམ་དང༌། རི་རབ་ཙམ་ཞེས་པ་ཚད་འཛིན་པ་དང༌། ཁམས་གསུམ་པོ་འདི་དག་ནི་སེམས་ཙམ་མོ་ཞེས་པ་ལྟ་བུ་ལྷག་མ་འགོག་པ་དང་གཉིས་སོ། །ཚིག་ཕྲད་བཅོ་ལྔ་པ་ནི། འབའ་ཞིག་ལ་སོགས་དེ་བཞིན་སྦྱར། །ཁྱབ་པའི་སྐབས་ཀྱིས་རྩི་བར་བྱ། །ཞེས་པ་ལྷག་མ་འགོག་པ་དེ་བཞིན་དུ་སྦྱར། ཞེས་པའོ། །བཅུ་དྲུག་པ་ནི། ཡང་དག་ཡོངས་སུ་ཀུན་ཏུ་སོགས། །སྒྲ་བཞིན་དང་ནི་ཕྲད་དུ་འོས། །ཞེས་པ། ཇི་སྐད་དུ། ཡང་དག་པར་ན། གཅིག་དང་དུ་མ་ལ་སོགས་པར་བཏགས་པའི་དངོས་པོ་དང་བྲལ་བ་ཡིན་ནོ་ཞེས་དང༌། ཡོངས་སུ་བསྔོ་བ་ཁྱད་པར་ཅན། །ཞེས་པ་ལྟ་བུ་དང༌། རྣམ་ཀུན་བརྗོད་བྱའི་དངོས་མིན་ཕྱིར། །ཞེས་པ་ལྟ་བུ་དང༌། སོགས་པ་ཞེས་བྱ་བའི་སྒྲས་བསྡུས་པ། དེ་བཞིན་དུ། ཞེས་དང༌། རབ་ཏུ་དང༌། རྣམ་པར་དང༌། ཉེ་བར་དང༌། ཤིན་ཏུ་ཞེས་བྱ་བ་ལྟ་བུ་སྒྲ་ཇི་བཞིན་པའི་དོན་སྟོན་པ་དང༌། དོན་ལྷག་པར་སྟོན་པ་མེད་ཀྱང་ཚིག་གི་ཕྲད་ཙམ་དུ་འགྱུར་བ་ཡོད་དོ། །དེ་ཡང་ཇི་སྐད་དུ། རབ་མཆོག་ལྷག་པར་ཡང་དག་ཕུལ། །རྗེས་སུ་བྲལ་བ་ངན་པ་དང༌། །རྣམ་པར་ལེགས་པར་ངེས་པར་དང༌། །སླར་དང་ཤིན་ཏུ་དག་པ་དང༌། །བདེ་བར་མངོན་པར་མཐོ་བ་དང༌། །སོ་སོར་ཡོངས་སུ་ཉེ་བར་སྣང༌། །ཉེ་བར་སྒྱུར་བ་ཉི་ཤུ་ཞེས། །ཙནྡྲ་གོ་མིའི་གཞུང་ལས་གསུངས། །ཞེས་པ་ལྟར། ཉེར་སྒྱུར་ཉི་ཤུ་པ་ཞེས་བྱ་བའི་བསྟན་བཅོས་ལས། རབ་ཅེས་པ་དོན་བཅོ་ལྔ་ལ་འཇུག་པ་ནས། ཉེ་བར་ཞེས་པ་དོན་བཞི་ལ་འཇུག་པའི་བར་རྒྱས་པར་གསུངས་སོ། །བཅུ་བདུན་པ་ནི། ཚུལ་ནི་འདྲ་དང་སྨད་པ་དང༌། །སྒོ་དང་སྡོམ་པའི་མཚན་ཉིད་དང༌། །ཐབས་དང་རིགས་པ་དོན་དང་འདོད། །ལེགས་པར་དག་ལ་འཇུག་པ་ལས། །འདྲ་བར་སྦྱར་བ་ཕྲད་དུ་འདོད། །ཅེས་པ། ཁྱོད་ཀྱི་གདོང་པ་ཟླ་བའི་ཚུལ། །ཞེས་པ་འདྲ་བ་དང༌། དཔྱོད་ཚུལ་འདི་འདྲའམ། ཞེས་པ་ལྟ་བུ་སྨད་པ་དང༌། ཆོས་ཀྱི་ཚུལ་ཞེས་པ་ལྟ་བུ་ཆོས་ཀྱི་སྒོ་ལ་འཇུག་པ་དང༌། ཚུལ་དུ་འཇུག་ཅེས་པ་ལྟ་བུ་སྡོམ་པ་ལ་འཇུག་པ་དང༌། ངང་ཚུལ་བཟང་པོ་ཞེས་པ་ལྟ་བུ་མཚན་ཉིད་ལ་འཇུག་པ་དང༌། ལྷ་སྒྲུབ་པའི་ཚུལ་ཞེས་པ་ལྟ་བུ་ཐབས་ལ་དང༌། རིགས་པའི་ཚུལ་ཞེས་པ་ལྟ་བུ་རིགས་པ་དང༌། དོན་བཟང་པོ་ལ་ཚུལ་བཟང་པོ་ཞེས་པ་ལྟ་བུ་དོན་ལ་འཇུག་པ་དང༌། གཞན་གྱིས་བཏགས་པའི་ཚུལ་ཞེས་པ་ལྟ་བུ་འདོད་པ་ལ་འཇུག་པ་དང༌། ཚུལ་བཞིན་ཡིད་ལ་བྱེད་པ་ཞེས་པ་ལྟ་བུ་ལེགས་པ་ལ་འཇུག་པ་སྟེ། བཅུ་ཡོད་པ་དེའི་ནང་ནས་འདྲ་བར་སྦྱར་བ་ནི། ཚིག་གི་ཕྲད་དུ་འདོད་ཅེས་པའོ། །བློ་གྲོས་མི་ཟད་པས་བསྟན་པའི་མདོའི་འགྲེལ་པ་ལས། ཚུལ་དོན་སུམ་ཅུ་གཉིས་ལ་འཇུག་པར་བཤད་དོ། །ཞེས་དབུས་པ་བློ་གསལ་གསུངས་སོ། །བཅོ་བརྒྱད་པ་ནི། བཞིན་ལ་སོགས་པའི་ཚིག་གི་དོན། །མ་ནོར་བ་དང་ཡིན་པ་དང༌། །འདྲ་བ་དག་ཏུ་སྦྱོར་བའོ། །ཞེས་པ་དེ་བཞིན་དང༌། དེ་ལྟ་བུ་དང༌། དེ་འདྲ་བ་དང༌། དེ་དང་མཚུངས་པ་སོགས་སོ། །བཅུ་དགུ་པ་ནི། ཅིང་ལ་སོགས་པ་བསྡུ་བ་དང༌། །མཚམས་སྦྱོར་དག་ཏུ་བྱེད་པ་ཡིན། །ཞེས་པ་ཅིང་དང༌། ཞིང་དང༌། ཤིང་ཞེས་པ་རྣམས་གཞན་སྡུད་པ་དང༌། མཚམས་སྦྱོར་དུ་བྱེད་པ་གཉིས་ལས། དང་པོ་ནི། འཆད་ཅིང་རྩོད་པ་དང༌། རྩོམ་ཞིང་སྤེལ་བ་དང༌། བརྟགས་ཤིང་དཔྱོད་པ་ཞེས་པ་ལྟ་བུ་ཡིན་ལ། གཉིས་པ་མཚམས་སྦྱོར་བ་ནི། འདོད་ཅིང་ཆགས་པ་ནི། འཁོར་ཞིང་འཁོར་བ་སྟེ། སྐྱེས་ཤིང་འཆི་བའོ། །ཞེས་པའོ། །ཉི་ཤུ་པ་ནི། ལ་ནི་གཉིས་པ་བཞི་པ་དང༌། །བདུན་པ་སྡུད་དང་སྦྱོར་བ་དང༌། །སྨོན་དང་ཚད་འཛིན་གཞི་དང་ནི། །ཚེ་སྐབས་དག་ཏུ་འདོད་པ་ཡིན། །ཞེས་པ། ཆོས་ལ་སྤྱོད་ཅེས་པ་ལྟ་བུ་གཉིས་པ་དང༌། སངས་རྒྱས་ལ་ཕྱག་འཚལ་ཞེས་པའམ། ཤིང་ལ་ཆུ་འདྲེན་ཞེས་པ་ལྟ་བུ་བཞི་པ་དང༌། རྒྱལ་པོ་ལ་བརྟེན་ཞེས་པ་ལྟ་བུ་བདུན་པ་དང༌། ལག་པ་བསྙལ་ལ་བཟའ་ཞེས་པ་ལྟ་བུ་སྡུད་པ་དང༌། འདི་ན་དེ་ཡོད་ལ་ཞེས་པ་ལྟ་བུ་མཚམས་སྦྱར་བ་དང༌། བདག་སངས་རྒྱས་སུ་གྱུར་ལ། གྱུར་ནས་ཀྱང་ཞེས་པ་ལྟ་བུ་སྨོན་པའི་གཞི་དང༌། དེ་ཙམ་ལ་དེས་ཆོག་གོ། །ཞེས་པ་ལྟ་བུ་ཚད་འཛིན་པའི་གཞི་དང༌། དེའི་རྗེས་ལ་ཞེས་པ་ལྟ་བུ་ཚེ་སྐབས་དག་ཏུ་འདོད་པ་ཡིན་ནོ། །འདིར་ཁ་ཅིག་ཞིང་ལོགས་སུ་འཆད་པ་ནི་མི་འཐད་དེ། བདུན་པ་དང་ཟློས་པའི་ཕྱིར་དང༌། འགྲེལ་པ་ལས་ཀྱང་མ་བཤད་པའི་ཕྱིར། ཞེས་དབུས་པ་བློ་གསལ་འཆད་དོ། །ཉེར་གཅིག་པ་ནི། ཀྱི་ནི་འབྲེལ་བའི་དོན་ཡིན་ཏེ། །ཞེས་པ་ཀྱི་དང༌། གྱི་དང༌། གི་དང༌། འི་རྣམས་ནི་དྲུག་པ་འབྲེལ་བའི་དོན་ནོ། །ཉེར་གཉིས་པ་ནི། ཀྱིས་ནི་བྱེད་པོར་འདོད་པ་ཡིན། །ཞེས་པ་ཀྱིས་དང༌། གྱིས་དང༌། གིས་རྣམས་ནི་བྱེད་པ་པོར་འདོད་པ་ཡིན་ཏེ། དཔེར་ན། སངས་རྒྱས་ཀྱིས་གསུངས། འཁོར་གྱིས་བསྐོར། ཞེས་པ་ལྟ་བུའོ། །དེ་ལྟ་ན་ཡང༌། ཁྲུས་གྱིས་ལ་བག་ཡོད་པར་གྱིས་ཞེས་པ་ལྟ་བུ་ལས་སུ་བྱ་བ་འགའ་ཞིག་ལ་འཇུག་པ་ཡང་སྲིད་དོ། །འདིར་ཞར་བྱུང་ནི། མི་མཐུན་རྒྱན་ནི་གསུམ་ཅར་ལའོ། །ཞེས་པ་བཤད་མ་ཐག་པའི་ལ་དང༌། ཀྱི་དང༌། ཀྱིས་གསུམ་ཀ་ཡང་མི་མཐུན་པའི་རྒྱན་དུ་འགྱུར་བ་སྲིད་ཅེས་པ་ཡིན་ལ། དེ་ཡང་ལ་མི་མཐུན་པའི་རྒྱན་དུ་འགྱུར་བ་ནི། རྒྱུ་མེད་པ་ལ་འབྲས་བུ་འདོད་པ་ནི་ངོ་མཚར་ཞེས་པ་ལྟ་བུ་དང༌། ཀྱི་མི་མཐུན་པའི་རྒྱན་དུ་འགྱུར་བ་ནི་བདེན་མོད་ཀྱི། འོན་ཀྱང་ཞེས་པ་ལྟ་བུ་དང༌། ཀྱིས་མི་མཐུན་པའི་རྒྱན་དུ་གྱུར་པ་ནི། དེ་ལྟར་བྱས་མོད་ཀྱིས་ཀྱང་ཞེས་པ་ལྟ་བུའོ། །ཉེར་གསུམ་པ་ནི། ལས་ནི་རྒྱུ་དང་འབྱུང་ཁུངས་དང༌། །དགར་བ་ཡིན་ཏེ། ཞེས་པ་ས་བོན་ལས་མྱུ་གུ་ཞེས་དང༌། རི་ལས་གསེར་ཞེས་པ་ལྟ་བུ་དང༌། ཁྱིམ་པ་ལས་དགེ་བསྙེན་ཞེས་བྱ་བ་ལྟ་བུ་རྣམས་སོ། །ཉེར་བཞི་པ་ནི། ནས་དེ་བཞིན། སྡུད་པ་དག་དང་མཚམས་སྦྱོར་ནི། །ནས་ལ་ཅུང་ཟད་ལྷག་པ་ཡིན། །ཞེས་པ། ནས་ཞེས་པའི་ཕྲད་ནི་ཕལ་ཆེར་ལས་དང་མཐུན་ལ། ཅུང་ཟད་མི་མཐུན་པ་ནི། གཟུགས་ནས་རྣམ་མཁྱེན་གྱི་བར་ཞེས་པ་ལྟ་བུ་སྡུད་པ་དང༌། དེ་ནས་ཐམས་ཅད་ཤེས་པ་ཉིད། །ཅེས་པ་ལྟ་བུ་མཚམས་སྦྱོར་བ་ཡང་ཡོད་པས་ལྷག་དང་བཅས་པའོ། །ཞར་ལ་བྱེད་ཚིག་དྲུག་གི་ནང་ནས་གཏན་ཚིགས་སུ་འགྱུར་བ་དུ་ཞིག་ཡོད་སྟོན་པ་ནི། གཏན་ཚིགས་དག་ཏུ་འགྱུར་བ་ནི། །དྲུག་པ་འབའ་ཞིག་མ་གཏོགས་སོ། །ཞེས་བྱ་བ་ལ་གཉིས་པ་གཏན་ཚིགས་སུ་འགྱུར་བ་ནི། ཇི་སྐད་དུ། འགོག་པ་མེད་པའི་རང་བཞིན་ལ། །ཞེས་པའམ། བྱས་པ་ལ་མི་རྟག་པས་ཁྱབ་ཅེས་པ་ལྟ་བུའོ། །གསུམ་པ་དེར་འགྱུར་བ་ནི། བྱས་པས་མི་རྟག་ཅེས་པ་ལྟ་བུ་དང༌། བཞི་པ་དེར་འགྱུར་བ་ནི། དེའི་ཆེད་དུ་དེ་བྱ་ཞེས་པ་ལྟ་བུ་སྟེ། ཇི་སྐད་དུ། བློ་དང་ལྡན་པས་མཐོང་འགྱུར་ཕྱིར་ཞེས་པ་ལྟ་བུའོ། །ལྔ་པ་དེར་འགྱུར་བ་ནི། བྱས་པ་ལས་མི་རྟག་པར་གྲུབ། ཅེས་པ་ལྟ་བུའོ། །བདུན་པ་དེར་འགྱུར་བ་ནི། སངས་རྒྱས་ལ་ཡོན་ཏན་མངའ་བ་ལས་འོས་མེད་དོ། །ཞེས་པ་ལྟ་བུའོ། །ཕྲད་ཉེར་ལྔ་པ་ནི། དུ་ལ་སོགས་པ་ལ་དང་མཐུན། །དེ་བཞིན་ལྷག་བཅས་ལ་ལའོ། །ཞེས་པ་དེ་དག་ལ་དང་མཐུན་པའི་ཚུལ་དང༌། མི་མཐུན་པའི་ཁྱད་པར་གཉིས་ཀྱིས་སྟོན་པ་ལས། དང་པོ་ནི། དུ་དང༌། སུ་དང༌། རུ་དང༌། ར་ཡོད་པའི་ཚིག་ཕྲད་རྣམས་ནི་ལ་ཞེས་པའི་ཚིག་ཕྲད་དང་མཐུན་པ་ཡིན་ཏེ། དུ་ནི་གཉིས་པ་བཞི་པ་དང༌། །ཞེས་སོགས་སྦྱར་བས་ཆོག་པའི་ཕྱིར་རོ། །དེ་ཡང་གང་དུ་དང༌། དབུས་སུ་དང༌། འདི་རུ་དང༌། འདིར་ཞེས་པ་རྣམས་སོ། །གཉིས་པ་ལ། དུ་སོགས་ལ་དང་མི་མཐུན་པའི་བར་ཁྱད་དང༌། ལ་ཡང་དེ་དག་དང་མི་མཐུན་པའི་བར་ཁྱད་དོ། །དང་པོ་ནི། དེ་ཉིད་ཅེས་སོགས་ཏེ། དཔེར་ན། ཐོག་དགུ་འཕང་དུ་ཕུབ། ཤིང་མིག་མངས་རིས་སུ་བཏང༌། དབྱིབས་གྲུ་བཞི་རུ་བརྩིགས། ཞེས་པ་ལྟ་བུ་ནི་ལའི་དོན་ལས་ལྷག་པ་ཡིན་ནོ། །གཉིས་པ་ནི། དེ་བཞིན་ཞེས་པ་ལག་པ་བཀྲུས་ལ་ཟན་ཟ་ཞེས་པ་ལྟ་བུ་ལའི་སྒྲ་དུ་སོགས་ལས་ལྷག་དང་བཅས་པའོ། །དུ་སོགས་གང་དུ་ཐོབ་པའི་གནས་སྐབས་ནི་ཇི་སྐད་དུ། ག་བ་ད་དྲག་ཅན་རྣམས་ཏུ། །ང་ད་ན་མ་ར་ལ་དུ། །ས་སུ་མཐའ་བརྟེན་པ་རུ་དང༌། །ཞེས་འབྱུང་བ་ལྟར་རོ། །ཚིག་ཕྲད་ཉེར་དྲུག་པ་ནི། འོ་ལ་སོགས་པ་སླར་བསྡུས་པའོ། །ཞེས་པ་རྗེས་འཇུག་ཡི་གེ་བཅུ་པོ་ལ་ཨོའི་སྒྲ་སྦྱར་བ་སྟེ། རྫོགས་སོ་ཞེས་བྱ་བ་ལྟ་བུའོ། །སུམ་ཅུ་པ་ལས་ཀྱང༌། རྗེས་འཇུག་ཡི་གེ་བཅུ་པོ་ནི། །མིང་གི་མཐར་ནི་གང་སྦྱར་བ། །དེ་ལ་ཨ་ལི་བཞི་པ་སྦྱར། །སླར་བསྡུ་བར་ནི་ཤེས་པར་བྱ། །ཞེས་འབྱུང་བ་ལྟར་ཡིན་ལ། ཏ་ད་འ་གསུམ་པོ་གང་ལ་ཨོ་ཡིག་སྐབས་གང་དུ་སྦྱོར་བའི་ཚུལ་ཡང༌། ཇི་སྐད་དུ། རྫོགས་ཚིག་ད་དྲག་ཅན་ལ་ཏོ། །རྐྱང་པ་མཐའ་རྟེན་མེད་ལའོ། །ཞེས་བཤད་པ་ལྟར་རོ། །ཕྲད་ཉེར་བདུན་པ་ནི། འོ་ན་ཁོང་དུ་ཆུད་པའི་ཚིག །ཅེས་པ་སྟེ། ཇི་སྐད་དུ། བྱ་བ་ལྡན་ཡོད་འོན་ཏེ་ན། །ཞེས་པ་ལྟ་བུའང་མཚོན་ནོ། །ཉེར་བརྒྱད་པ་ནི། འམ་ཞེས་བྱ་བ་འབྱེད་སྡུད་ཡིན། །ཞེས་པ་སྟེ། དཔེར་ན། གཟུགས་སམ། ཚོར་བའམ། ཞེས་པ་ལྟ་བུ་སྡུད་པ་དང༌། མུ་སྟེགས་ཅན་མ་ཡིན་ནམ་ཞེས་སོགས་ལྟ་བུ་འབྱེད་པའོ། །ཉེར་དགུ་པ་ནི། དག་དང་རྣམས་ནི་མང་པོའི་ཚིག །ཅེས་པ་སྟེ། དེ་ཡང་གཉིས་ཡན་ཆོད་ལ་དག་ཅེས་བྱ་བ་དང༌། གསུམ་ཡན་ཆོད་ལ་རྣམས་ཞེས་བྱ་བའི་སྒྲ་འཇུག་གོ། །སུམ་ཅུ་པ་ནི། སོགས་ནི་མཐའ་དག་སྡུད་པ་ཡིན། །ཞེས་པ་ནི། དཔེར་ན་གཟུགས་ལ་སོགས་པའི་ཕུང་པོ་ཞེས་ཕུང་པོ་ལྷག་མ་རྣམས་སྡུད་པ་ལྟ་བུའོ། །སོགས་ཞེས་པ་དང༌། སྩོགས་ཞེས་པ་ནི་འགྱུར་སྔ་ཕྱིའི་ཁྱད་པར་ཡིན་ལ། དེ་གཉིས་ཀྱི་སྐད་དོད་ཨཱ་དི་ཞེས་པ་དང་པོ་ལ་འཇུག་པ་ལྟར་ན། གཟུགས་དང་པོར་བྱས་པའི་ཕུང་པོ་རྣམས་ཞེས་བྱ་བ་ལྟ་བུ་ཡིན་པས། དོན་ལ་འཁྲུལ་པ་ཆེར་མེད་དོ། །སོ་གཅིག་པ་ནི། པའམ་ཅན་ནི་བདག་པོའི་ཚིག །ལྡན་པའི་དོན་དུ་སྦྱར་བར་བྱ། །ཞེས་པ། དཔེར་ན། གསེར་པ་དང༌། གསེར་ཅན་ཞེས་པ་ལྟ་བུའོ། །སུམ་ཅུ་པ་ལས་ཀྱང༌། མིང་གང་གི་ནི་ཡ་མཐའ་ན། །པུ་ལིངྒ་ཡི་སྒྲ་མེད་པ། །དེ་ལ་པུ་ལིངྒ་སྦྱར་ན། །བདག་པོའི་སར་ནི་ཤེས་པར་བྱ། །ཞེས་བཤད་པ་ལྟར་ཡིན་ལ། དེ་ཡང་དཔེར་ན། དཔའ་བོ་ཞེས་པ་ལྟ་བུ་ཕོ་རྟགས་ཀྱི་སྒྲ་ཐོག་མར་མ་སྦྱར་བ་རྣམས་ལ་མིང་གི་མཐར། ཤིང་ས་ལཱའི་དབང་པོ་ཞེས་པ་ལྟ་བུ་ཕོ་རྟགས་མཇུག་ཏུ་སྦྱར་ན་བདག་པོའམ་ལྡན་པའི་དོན་དུ་འགྱུར། ཞེས་པའི་དོན་ནོ། །ཕྲད་སོ་གཉིས་པ་ནི། བ་ནི་སྤྱི་རུ་བཞག་པ་སྟེ། །ཡུལ་དུས་ངེས་པར་མ་བཟུང་བའོ། །ཟ་བ་བཟའ་དང་ཟའོ་བཞིན། །མ་ནིང་དག་ཏུ་བཞག་པར་བྱ། །ཞེས་བྱ་བ་ལ། བ་ཞེས་བྱ་བ་ནི། ཡུལ་ངེས་པར་མ་བཟུང་བ་བྱེད་པ་པོ་དང་བྱ་བ་དང༌། བདག་དང་གཞན་གྱི་ཚིག་ཏུ་རིས་མ་ཆད་པ་དང༌། དུས་ངེས་པར་མ་བཟུང་བ། འདས་པ་དང༌། ད་ལྟར་བ་སོགས་ཀྱི་རིས་སུ་ཆད་པར་མི་སྟོན་པ་ཡིན་ཏེ། དཔེར་ན་ཟ་བ་ཞེས་བྱ་བའི་སྒྲ་དེ་བཟའ་བར་བྱ་བ་དང༌། ཟ་བ་པོ་དང༌། ཟ་བཞིན་པ་རྣམས་ཀྱི་སྤྱི་ལ་འཇུག་པ་བཞིན་ནོ། །དེས་ན་ཟ་བ་དང༌། མཐོང་བ་དང༌། གསལ་བ་ལ་སོགས་པ་ནི་མ་ནིང་དག་ཏུ་བཞག་པར་བྱ་སྟེ། དོན་རིས་སུ་ཆད་པ་ཞིག་སྟོན་པར་མི་བྱེད་པའི་ཕྱིར་རོ། །གཉིས་པ་ཕྲད་འདུས་པ་བཤད་པ་ལ་གསུམ་སྟེ། མདོར་བསྟན་པ་དང༌། རྒྱས་པར་བཤད་པ་དང༌། ཉེ་བར་བསྡུ་བའོ། །དང་པོ་ནི། གལ་ཏེ་ཕྲད་གཉིས་འདུས་པའམ། །ཡང་ན་མང་པོ་འདུས་པ་ན། །སྔ་ཕྱི་ཕན་ཚུན་ཟིལ་གནོན་དང༌། །རང་གི་ཆ་ལྡན་དག་ཏུ་སྦྱར། །ཞེས་པ་ཚིག་གི་སྐབས་གཅིག་ཏུ་ཕྲད་མང་པོ་འདུས་པ་ན་སྔ་མས་ཕྱི་མ་དང༌། །ཕྱི་མས་སྔ་མ་ཟིལ་གྱིས་གནོན་པ་དང༌། རང་གི་ཆ་ལྡན་པ་གསུམ་མོ། །དང་པོ་ནི། ཇི་སྐད་དུ། གང་གང་དོན་ནི་གང་གང་ལ། །ཞེས་དང༌། འདི་དེ་སངས་རྒྱས་ཐམས་ཅད་ཀྱི། །ཞེས་སོགས་ལྟ་བུ་ཡིན་ཏེ། གང་ཞེས་པ་སྔ་ཕྱི་གཉིས་ལ་དོན་ཐ་དད་པ་མེད་པས་སྔ་མས་ཕྱི་མ་ཟིལ་གྱིས་མནན་པས་སོ། །གཉིས་པ་ནི། གང་ལ་འཕགས་པ་ཉིད་བྱོན་རྗེས་བཟུང་དེ་ནི་དཔལ་ལྡན་དྲི་མེད་བློ་མངའ་སྟེ། །ཞེས་པ་ལྟ་བུ་ལ་བྱ་བ་ཡིན་ཏེ། གང་དང་དེ་གཉིས་ལ་དོན་ཐ་དད་པ་མེད་ཀྱང་གང་ཞེས་པ་སྤྱི་སྒྲ་དང༌། དེ་ཞེས་པ་བྱེ་བྲག་གི་སྒྲ་ཡིན་པས་ཕྱི་མས་སྔ་མ་ཟིལ་གྱིས་མནན་པའི་ཕྱིར་རོ། །གསུམ་པ་ནི། གལ་ཏེ་ལོ་བརྒྱ་འཚོ་བའམ། འོན་ཏེ་དེ་བས་ལྷག་པ་འཚོ་ཡང་རུང༌། ཞེས་པ་ལྟ་བུ་ཡིན་ཏེ། གཉིས་ཀས་དོན་ཐ་དད་པ་རེ་རེ་སྟོན་པའི་ཕྱིར་རོ། །གཉིས་པ་རྒྱས་པར་བཤད་པ་ནི། གང་ལ་དམིགས་འཛིན་མི་བྱེད་དང༌། །དམིགས་འཛིན་ཏེ་ན་ཕྲད་གྱུར་ན། །གཉིས་པར་འགྱུར་བའི་མཐུ་ཡིན་ནོ། །ཕྱོགས་གཅིག་ཁོང་དུ་ཆུད་པ་ལས། །ཕྱོགས་གཅིག་འདྲི་བར་བྱེད་པ་ཡིས། །འོ་ན་ཞེས་པའི་ནུས་པའོ། །དེ་ལ་དམིགས་འཛིན་སྔ་མ་བཞིན། །གཞན་འདྲེན་བྱེད་པ་ཏེ་ཡིན་ཏེ། །ན་ཡིས་ཕྱོགས་གཅིག་དག་ཏུ་བྱེད། །དེ་གཉིས་ལྡན་པའི་ཕྲད་རྣམས་ནི། །དམིགས་འཛིན་ལྡན་མི་ལྡན་གཉིས་ཏེ། །སྔ་མ་དོན་གྱིས་བསྡུ་བར་བྱ། །ཡོད་ན་སྔ་མ་དངོས་སུ་བསྡུད། །ཅེས་བྱ་བ་ལ་གཉིས་ཀའི་ཆ་དང་ལྡན་པ་དེ་གང་ཞེ་ན། གང་ལ་ཞེས་བྱ་བའི་སྒྲ་ནི་དམིགས་འཛིན་མི་བྱེད་པ་ཡིན་ལ། ཏེ་ན་ཞེས་བྱ་བའི་སྒྲ་ནི་དམིགས་འཛིན་པར་བྱེད་པ་ཡིན་ཞིང༌། དེ་གཉིས་ཕྲད་པ་ནི་གལ་ཏེ་ན་ཞེས་བྱ་བ་ཡིན་ལ། དེའི་ཚེ་ན་ཚིག་སྔ་ཕྱི་གཉིས་ལ་དོན་གཞན་རེ་རེ་ཡོད་པས་རང་གི་ཆ་ལྡན་ཞེས་བྱའོ། །འདི་ནི་གང་ལ་ཅི་ཞིག་ན་ཞེས་བྱ་བ་དེ་བསྡུས་པས། གལ་ཏེ་ན་ཞེས་བྱ་བར་སོང་བ་དེའོ། །དེ་བཞིན་དུ་འོ་ན་ཅི་ཞིག་ན་ཞེས་པ་བསྡུས་པ་ལས་འོ་ན་ཞེས་བྱ་བ་འབྱུང་ལ། །དེའི་ནུས་པ་ནི་ཕྱོགས་གཅིག་ཁོང་དུ་ཆུད་ནས་ཕྱོགས་གཅིག་འདྲི་བར་བྱེད་པའོ། །འོ་ན་ཞེས་པའམ། འོན་ཏེ་ན་ཞེས་པའི་ཚིག་འདི་ལ་ཡང༌། དམིགས་འཛིན་པ་དང༌། མི་འཛིན་པ་ཕྲད་པའི་ཚུལ་ནི་སྔ་མ་བཞིན་དུ་བལྟ་བར་བྱ་སྟེ། ཁོང་དུ་ཆུད་པ་དང་མ་ཆུད་པའི་དོན་གཉིས་ཐ་དད་དུ་བཟུང་རྒྱུ་ཡོད་པས་གཉིས་ཀའི་ཆ་དང་ལྡན་པར་འགྱུར་བས་སོ། །གལ་ཏེ་དང་འོན་ཏེ་ཞེས་པའི་དོན་ཕྱི་མ་རེ་རེ་དམིགས་ཀྱིས་འཛིན་པའི་རྒྱུ་མཚན་ཅི་ཡིན་ཞེ་ན། ཏེ་ཞེས་པ་ནི་ལྷག་མ་ཅན་ཡིན་པས། གཞན་ཙམ་ཞིག་འདྲེན་པར་བྱེད་ལ། ན་ཞེས་པས་ཕྱོགས་གཅིག་ཏུ་དམིགས་ཀྱིས་འཛིན་པར་བྱེད་དོ། །དེ་ལྟ་ཡིན་པ་དེའི་ཕྱིར་སྤྱི་ལ་འཇུག་པ་དང༌། ཕྱོགས་གཅིག་ཏུ་བྱེད་པ་དེ་གཉིས་ཀ་དང་ལྡན་པའི་ཕྲད་རྣམས་ནི་དམིགས་འཛིན་པ་དང༌། མི་འཛིན་པ་གཉིས་གཉིས་དང་ལྡན་ནོ། །སྔ་མ་སྤྱི་ལ་འཇུག་པ་དང༌། ཕྱི་མ་ཕྱོགས་གཅིག་ཏུ་བྱེད་པ་གཉིས་ལས། ཕྱི་མ་གཉིས་དངོས་སུ་ཡོད་ཅིང༌། སྔ་མ་དངོས་སུ་མེད་ན། ཕྱི་མས་སྔ་མ་དོན་གྱིས་བསྡུ་བར་བྱ་ཞིང༌། གཉིས་ཀ་ཡོད་ན་སྔ་མ་དངོས་སུ་བསྡུ་བར་བྱ་བ་ཡིན་ཏེ། ཕྱི་མས་སྔ་མ་ཟིལ་གྱིས་གནོན་པའི་ཚུལ་གྱིས་སོ། །གསུམ་པ་ཉེར་བར་བསྡུ་བ་ནི། གལ་ཏེ་ཇི་སྟེ་འོན་ཏེ་དང༌། །དེ་སྟེ་ན་ཞེས་སྦྱར་བར་བྱ། །འོན་ཀྱང་འོ་ན་ཡང་ཞེས་པ། །བསྡུ་བ་གཉིས་ལྡན་གཉིས་བསྡུ་བྱ། །མཐུན་དང་ཐ་དད་སྐབས་ཀྱི་མཐུ། །ཞེས་བྱ་བ་ལ། གང་ལ་ཅི་ཞིག་ན་ཞེས་པ་བསྡུས་ནས། གལ་ཏེ་ན་ཞེས་དང༌། ཇི་ལ་ཅི་ཞིག་ན་ཞེས་པ་བསྡུས་ནས། ཇི་སྟེ་ན་ཞེས་དང༌། འོ་ན་ཅི་ཞིག་ན་ཞེས་པ་བསྡུས་ནས། འོན་ཏེ་ན་ཞེས་དང༌། དེ་ལ་ཅི་ཞིག་ན་ཞེས་པ་བསྡུས་ནས། དེས་དེ་ན་ཞེས་བྱ་བར་སྦྱར་བ་ནི་གཉིས་ཀའི་ཆ་དང་ལྡན་པ་ཡིན་ཏེ། ཚིག་སྔ་མས་སྤྱིར་བཏང་ནས། ཕྱི་མས་དམིགས་ཀྱིས་བསལ་བ་སྟོན་པའི་ཕྱིར། འོན་ཀྱང་ཞེས་པ་དང༌། འོ་ན་ཡང་ཞེས་པ་བསྡུ་བ་གཉིས་དང་ལྡན་པ་ནི། སྔ་མའི་འདོད་པ་དང་ཕྱི་མའི་དོན་གཉིས་ཀ་བསྡུ་བར་བྱ་བ་ཡིན་ཏེ། ཇི་སྐད་དུ། སྤྱོད་ཡུལ་མ་ཡིན་འོན་ཀྱང་ནི། །རང་དང་གཞན་གྱི་དོན་གྱི་ངོར། །ཞེས་པ་ལྟ་བུ་དང༌། འོ་ན་མེ་ལྕེ་ལས་ཀྱང་མུན་པ་འཐུག་པོ་འབྱུང་འགྱུར་ཞིང༌། །ཞེས་པ་ལྟ་བུའོ། །འདི་ཡང་གོང་དུ། འོ་ན་ཁོང་དུ་ཆུད་པའི་ཚིག་ཅེས་པ་དང་དོན་ཁྱད་པར་མེད་དེ། དེར་ཡང༌། ཕྱི་མའི་སྐབས་དང་སྦྱར་བར་བྱ། །ཞེས་འཆད་དགོས་པའི་ཕྱིར། འོ་ན་བསྡུ་བ་སྔ་ཕྱི་གཉིས་ཀ་མཐུན་པ་ཞིག་དགོས་སམ་ཞེ་ན། དེ་ནི་སྐབས་ཀྱི་མཐུ་ལས་འབྱུང་བ་ཡིན་ཏེ། ཇི་སྐད་དུ། མངོན་སུམ་ཡང་ནི་དོན་མེད་ན། །མི་འབྱུང་བ་ལས་ཚད་མ་ཉིད། །ཅེས་པ་ལྟ་བུ་མཐུན་པ་དང༌། །འཁྲུལ་པ་ཡིན་ཡང་ཚད་མ་ཉིད། །ཅེས་པ་ལྟ་བུ་མི་མཐུན་པ་བསྡུད་པ་གཉིས་ཡོད་པས་སོ། །དེ་ལྟར་ཕྲད་གཉིས་འདུས་པའམ། མང་པོ་འདུས་པ་ལས་དོན་སྟོན་ཚུལ་གྱི་ཁྱད་པར་སྔ་ཕྱི་ཟིལ་གནོན་དང༌། རང་གི་ཆ་དང་ལྡན་པ་གསུམ་ཡོད་པ་དེ་ལྟ་ན་ཕྲད་མང་པོ་དེ་དག་ངེས་པར་སྦྱོར་དགོས་སམ་ཞེ་ན། སྡེབ་སྦྱོར་གྱི་ཁྱད་པར་མེད་ན་ཕྲད་མང་པོ་སྦྱར་མི་དགོས་ཏེ། ཚིག་གི་སྦྱོར་བ་བཅུའི་ནང་དུ་མ་འདུས་པའི་དོན་ལྷག་པོ་སྟོན་རྒྱུ་མེད་པའི་ཕྱིར། ཞེས་སྟོན་པ་ནི། གང་ལྟར་ཇི་ལྟར་དེ་ལྟར་དང༌། །དེ་བཞིན་དེ་སྐད་ལ་སོགས་པ། །ཇི་སྐད་བསྟན་པའི་ཆ་གཉིས་ལྡན། །དེ་ལ་སོགས་པའི་ཕྲད་རྣམས་ཀུན། །ཟིལ་གནོན་གྱུར་དང་ཆ་ལྡན་ཡང༌། །དགོས་པ་རེ་རེར་དྲིལ་བྱས་ལ། །ཚིག་དོན་སྦྱོར་བ་བཅུ་པོ་དང༌། །ཕྲད་ཀྱི་སྦྱོར་བ་ཇི་ལྟ་བར། །དེ་ལྟར་ཕྲད་གཉིས་འདུས་པའམ། །མང་པོ་འདུས་པར་གྱུར་ཀྱང་རུང༌། །དེ་དོན་ལྷག་མ་མི་སྟོན་ཕྱིར། །སྐབས་དང་ཚིགས་ཤུགས་བརྟགས་ནས་ནི། །བློ་ལྡན་རྣམས་ཀྱིས་གང་རིགས་སྦྱར། །ཞེས་པའོ། །འདི་ཡང་ཇི་སྐད་དུ། རྒྱལ་བའི་ཡུམ་དེ་དང་དེ་ལས་རྣམ་པ་རེ་རེའི་དབང་དུ་མཛད་དེ་ཞེས་དང༌། དེ་ནི་ཉིད་ཀྱི་ཆོས་བརྟེན་ནས། །ཞེས་འབྱུང་བ་ལྟ་བུ་ནི་ཚིག་ཕྲད་ཙམ་མ་ཡིན་གྱི། ཚིག་གི་སྦྱོར་བ་ཡིན་པ་དང༌། བྱང་ཆུབ་ཇི་ལྟ་དེ་བཞིན་དུ། །ཞེས་པ་ལྟ་བུ་ཚིག་ཕྲད་ཁོ་ན་ཡིན་པའི་ཁྱད་པར་ཤེས་དགོས་སོ། །གསུམ་པ་བཤད་པ་མཐར་ཕྱིན་པའི་བྱ་བ་ལ་གསུམ་སྟེ། །བསྟན་བཅོས་ཀྱི་ལྡང་ཚད་བཤད་ནས་ཚོགས་གསུམ་བསྟན་པའི་དགོས་པ་དང༌། བསྟན་བཅོས་འདིའི་མཚན་བཤད་པ་དང༌། བརྩམས་པའི་དགེ་བ་མཆོག་ཏུ་བསྔོ་བའོ། །དང་པོ་ལ་གསུམ་སྟེ། དཔེ་བཤད་པ་དང༌། དེས་མཚོན་པའི་དོན་བསྟན་པ་དང༌། དེས་ན་སྒྲའི་བསྟན་བཅོས་ལ་བསླབ་དགོས་པར་བསྟན་པའོ། །དང་པོ་ནི། དཔེར་ན་སྐྱེས་བུ་གང་ཞིག་གིས། །གཟུགས་ཀྱི་བྱེ་བྲག་ཤེས་འདོད་ན། །ཕྲ་རྡུལ་སོགས་ལ་མཚན་ཉིད་དུ། །དེ་ཤེས་ཚེ་རྡུལ་གོང་བུ་དང༌། །གོང་ཆེན་དག་གི་མཚན་ཉིད་དང༌། །ལས་རྣམས་འབད་པ་མེད་པར་ཤེས། །དེ་ཤེས་སྐབས་ཀྱི་བྱ་བ་གང༌། །སྦྱོར་བ་དག་ལ་མི་འཇིགས་བཞིན། །ཞེས་བྱ་བ་ནི་གཟུགས་ཀྱི་ཕུང་ཁམས་སྐྱེ་མཆེད་ཀྱི་རྣམ་པའི་རབ་དབྱེ་སྦྱོར་བ་ལ་མི་འཇིགས་པའི་སྤོབས་པ་འབྱུང་བ་ལ་ཐོག་མར་རྡུལ་ཕྲ་རབ་ཀྱི་གནས་ལུགས་དང༌། དེས་རགས་པ་རྩོམ་པའི་ཚུལ་ཤེས་དགོས་པ་བཞིན་ནོ། །གཉིས་པ་ནི། སྐྱེས་བུ་སྨྲ་བར་འདོད་པ་ཡིས། །གཞི་མཐའ་ཡི་གེའི་བྱེ་བྲག་དག །ལེགས་པར་ཁོང་དུ་ཆུད་པ་ན། །དེ་འདུས་མིང་དང་དེ་བཞིན་ཚིག །ཤྭ་ལོ་ཀ་དང་རབ་བྱེད་སོགས། །མིང་ཚིག་ཡི་གེ་མཚུངས་པའི་ཕྱིར། །ཚིག་སྦྱོར་འབད་པ་མེད་པར་འགྱུར། །ཞེས་པའོ། །འོ་ན་འདིར་ཚོགས་གསུམ་བཤད་པ་དང༌། གཞུང་གཞན་ལས་ངག་དང་ཚིག་སོ་སོར་བཤད་པའི་ཁྱད་པར་ཅི་ཞེ་ན། བཅོམ་ལྡན་རལ་གྲི་ན་རེ། ཡི་གེ་དུ་མ་འདུས་པ་ལས་མིང་དང༌། དེ་དུ་མ་འདུས་པ་ལས་ཚིག་དང༌། དེ་དུ་མ་འདུས་པ་ལས་ངག་དང༌། དེ་དུ་མ་འདུས་པ་ལས་བསྟན་བཅོས་ཀྱི་ལུས་འགྲུབ་བོ་ཞེས་བཙུན་པ་སྤྱན་རས་གཟིགས་བརྟུལ་ཞུགས་འཆད་དོ་ཞེས་ཟེར་བ་ནི་མི་རིགས་ཏེ། སྤྱིར་ཚད་ལྡན་གྱི་ལུང་དང་འགལ་བ་དང༌། སློབ་དཔོན་དེ་ཉིད་ཀྱི་ལུང་དང་མི་མཐུན་པའོ། །དང་པོ་ནི། མངོན་པའི་མཛོད་ལས། མིང་གི་ཚོགས་ལ་སོགས་པ་ནི། །མིང་དང་ངག་དང་ཡི་གེའི་ཚོགས། །ཞེས་དང༌། དེའི་འགྲེལ་པར། ངག་ཚིག་མ་བཤད་པ་དང༌། བརྒྱད་སྟོང་འགྲེལ་ཆེན་དུ། མིང་ཞེས་བྱ་བ་ནི་ཚིག་བསྡུས་པའི་ངག་གོ། །ཚིག་ཅེས་བྱ་བ་ནི་སུའི་མཐའ་ཅན་དང༌། ཏིའི་མཐའ་ཅན་གྱི་ཡི་གེ་བསྡུས་པའོ། །ཞེས་མིང་ལ་ངག་ཏུ་བཤད་པ་ཡང་ཡོད་ཅིང༌། མདོ་སྡེའི་རྒྱན་དུ། ངག་དང་ཚིག་རྣམས་དྲི་མེད་པས། །ཞེས་གསུངས་པའང་དོན་དེ་ཉིད་ལ་དགོངས་པས་ཚོགས་གསུམ་དུ་མ་འདུས་པའི་ངག་མེད་དོ། །གཉིས་པ་ནི། སྤྱན་རས་གཟིགས་བརྟུལ་ཞུགས་ཀྱིས། འགྲོ་འོང་བརྟག་པའི་འགྲེལ་བཤད་དུ། ཡི་གེ་ཞེས་བྱ་བ་ནི་ཨ་ལ་སོགས་པའོ། །ངག་ཅེས་བྱ་བ་ནི་ཡི་གེ་དག་བསྡུས་པ་སྟེ། ལྷས་བྱིན་ཞེས་བརྗོད་པ་ལ་སོགས་པའོ། །ཚིག་ཅེས་བྱ་བ་ནི་ངག་བསྡུས་པ་སྟེ། ལྷས་སྦྱིན་བུམ་པ་བྱེད་དོ། །ཞེས་བྱ་བ་ལ་སོགས་པའོ། །ཞེས་མིང་དང་ངག་དོན་གཅིག་ཏུ་བཤད་ནས། ངག་དུ་མ་འདུས་པ་ལ་ཚིག་ཏུ་འཆད་ཀྱི། ཚིག་ཏུ་མ་འདུས་པ་ལ་ངག་ཏུ་འཆད་པ་མེད་དོ། །ཡང་གཞུང་འདིར། ཡི་གེ་དུ་མ་འདུས་པ་ལས་མིང་དུ་བཤད་པ་ཡང་གཙོ་ཆེ་བ་ལ་དགོངས་པ་ཡིན་གྱི། འགལ་བ་ནི་མ་ཡིན་ཏེ། རྣམ་པར་གཏན་ལ་དབབ་པ་བསྡུ་བ་ལས། བསྡུས་པའི་མིང་ནི་ཡི་གེ་གཅིག་གང་ཡིན་པའོ། །རྒྱས་པའི་མིང་ནི་ཡི་གེ་མང་པོ་གང་ཡིན་པའོ། །ཞེས་མིང་ལ་རྒྱས་བསྡུས་གཉིས་སུ་ཕྱེ་ནས་བཤད་པའི་ཕྱིར། དེ་ལྟ་མོད་ཀྱི་ཡི་གེ་དང་ཚིག་ནི་འགལ་བ་ཡིན་ཏེ། དེ་ཉིད་ལས། ཡི་གེ་གཅིག་གང་ཡིན་པ་དེ་ནི་ཚིག་མ་ཡིན་ནོ། །མིང་གིས་མ་བསྡུས་པའི་ཡི་གེ་གང་ཡིན་པ་དེ་ནི་ཡི་གེ་ཁོ་ན་ཡིན་གྱི། མིང་མ་ཡིན་ནོ་ཞེས་བཤད་པས་སོ། །ཚིག་དང་མིང་གཉིས་ཀྱང་འགལ་བ་མ་ཡིན་ཏེ། དེ་གཉིས་ལས། ཚིག་གང་ཡིན་པ་དེ་ནི་མིང་ཡང་ཡིན་ལ། ཡི་གེ་ཡང་ཡིན་ནོ་ཞེས་གསུངས་སོ། །ཁ་ཅིག་ཚོགས་གསུམ་པོ་སྒྲའི་སྐྱེ་མཆེད་དུ་འཆད་པ་ནི། ཆོས་མངོན་པ་དང༌། ཐེག་པ་ཆེན་པོ་དག་གི་ལུགས་མ་ཡིན་ཏེ། མངོན་པ་ལས་ལྡན་མིན་འདུ་བྱེད་དུ་བཤད་པ་དང༌། ཐེག་པ་ཆེན་པོ་པས། དེ་དང་དེར་སྣང་བའི་རྣམ་རིག་ལ་འཆད་པས་སོ། །ས་སྐྱ་པཎྜི་ཏའི་གསུང་གིས། ཚོགས་གསུམ་པོ་གང་རུང་ལ་སྒྲ་སྤྱི་གསལ་བར་སྣང་བ་ཞེས་བྱ་བས་ཁྱབ་པ་རང་ལུགས་སུ་བཤད་ནས། །གཞན་ལུགས་འགོག་པ་ན། ཁ་ཅིག་ཀ་ལ་སོགས་པ་གཟུགས་སུ་གྲུབ་པར་འདོད་ལ། ལ་ལ་ཀ་ལ་སོགས་པའི་སྒྲ་རང་མཚན་ནོ་ཞེས་ཟེར་བ་དེ་ནི་མ་ཡིན་ཏེ། གཅིག་ནི་གཟུགས་ཡིན་ལ། གཅིག་ནི་སྒྲ་ཡིན་པས་ཡི་གེ་མི་རུང་ངོ༌། །རྩོད་པ་སྤང་བ་ནི། ཁ་ཅིག་ན་རེ། དེ་ལྟ་ན་སྒྲ་སྤྱིའམ། དོན་སྤྱི་གང་རུང་དུ་འགྱུར་རོ་ཞེ་ན་མི་འགྱུར་ཏེ། སྒྲ་སྣང་ཞེས་པས་དོན་སྤྱི་མ་ཡིན་པར་སྟོན་ལ། གསལ་བར་སྣང་ཞེས་པས་མི་གསལ་བའི་སྒྲ་སྤྱི་ཙམ་སེལ་ལོ་ཞེས་འཆད་དོ། །གསུམ་པ་ནི། དེ་ཕྱིར་འདི་ནི་བསླབ་གནས་ཞེས། །སྨྲ་མཆོག་རྗེས་སྨྲ་རྣམས་ཀྱིས་བཤད། །ཅེས་པ་སྒྲའི་བསྟན་བཅོས་འདི་ནི་ཐོག་མར་ཚངས་པ་དང༌། ལྷའི་བླ་མ་དང༌། བརྒྱ་བྱིན་རྣམས་ཀྱིས་བཤད་ཅིང༌། ཕྱིས་མིའི་ཡུལ་དུ་བྲམ་ཟེ་པཱ་ཎི་དང༌། སརྦ་ཝརྨ་དང༌། ཙནྡྲ་གོ་མི་དང༌། ཟླ་བ་གྲགས་པ་སོགས་ཀྱིས་བཤད་དོ། །བོད་དུ་ནི། བོད་ལེགས་ཞབས་ཀྱིས། སུམ་ཅུ་པ་དང༌། རྟགས་ཀྱི་འཇུག་པ་ལ་སོགས་པའི་བསྟན་བཅོས་བརྒྱད་མཛད་དོ། །སུམ་ཅུ་པ་ལས་ནི། སྒྲ་རིག་པའི་གཙུག་ལག་ནི་འཇམ་པའི་དབྱངས་དང༌། ཁྱབ་འཇུག་གིས་གསུངས་པར་བཞེད་པ་ཡིན་ཏེ། དེ་ཉིད་ལས། གང་གིས་སྒྲ་དབྱངས་སྔོན་གསུངས་པ། །འཇམ་པའི་དབྱངས་ལ་ཕྱག་འཚལ་ལོ། །གང་གིས་མིང་གཞི་སྔོན་གསུངས་པ། །རྟག་ཞི་བ་ལ་ཕྱག་འཚལ་ལོ། །ཞེས་གསུངས་པས་སོ། །ཁ་ཅིག་ན་རེ། རྟག་ཞི་བ་ཞེས་པ་ཚངས་པ་ལ་ཟེར་བ་ཡིན་ཏེ། སྡིག་པ་ཞི་བས་སོ། །ཞེས་གསུངས་པ་ནི་རིགས་པ་མ་ཡིན་ཏེ། སོ་སོར་འབྲང་མ་ལས། དམང་རིགས་ཕྱིར་ན་རྟག་ཞི་བ། །ཁྱབ་འཇུག་ལེགས་པར་བྲི་བར་བྱ། །ཞེས་གསུངས་སོ། །གཉིས་པ་མཚན་བཤད་པ་ནི། །དོན་ལ་འཇུག་བྱེད་སྨྲ་བ་རྣམས་ཀྱི་སྒོ། །བློ་འབྱེད་གཏི་མུག་གཅོད་པས་མཚོན་ཆ་འདྲ། །མི་འཇིགས་སྙེམས་པ་སྦྱིན་བྱེད་དཔུང་དང་གོ། །དོན་ནོར་སྨྲ་བས་མི་ཉམས་བརྟན་པའི་མཁར། །ཞེས་པའོ། །གསུམ་པ་བསྔོ་བ་ནི། སྨྲ་མཆོག་རྗེས་སྨྲ་རྣམས་ཀྱི་རྗེས་སྨྲས་པས། །སྒྲ་ཉིད་དང་ནི་དོན་ལ་འཁྲིད་པ་ཡི། །འགྲོ་ཀུན་མཐུ་གཉིས་རབ་ཏུ་རྒྱས་པར་ཤོག །ཞེས་པ་ནི། སོ་སོ་ཡང་དག་པར་རིག་པ་བཞི་ཐོབ་པར་བསྔོ་བ་ཡིན་ནོ། །རྩོམ་པ་པོ་དང་བསྟན་བཅོས་ཀྱི་མཚན་བསྟན་པ་ནི། སྨྲ་བའི་སྒོའམ་ཁ་མཚོན་ཆ་ལྟ་བུ་དང༌། དཔུང་དང་གོ་ཆ་ལྟ་བུ་དང༌། རྫོང་ལྟ་བུ་ཞེས་བྱ་བའི་བསྟན་བཅོས་འདི་ནི། འཇམ་པའི་དབྱངས་ཀྱིས་བྱིན་གྱིས་བརླབས་པའི་པཎྜི་ཏ། སྨྲྀ་ཏི་ཛྙཱ་ན་ཀཱིརྟི་ཞེས་བྱ་བས། ལེགས་སྦྱར་གྱི་སྐད་དུ་བརྩམས་ནས་བོད་སྐད་རང་འགྱུར་དུ་མཛད་པའོ། །འཇམ་པའི་དབྱངས་ཀྱིས་ཁྱོད་ལ་བྱིན་རླབས་པས། །ཚིག་དོན་མི་བརྗེད་དྲན་པའི་མཐུ་གྲུབ་ཅིང༌། །སྐྱེ་མེད་ཆོས་ལ་བཟོད་པའི་ཡེ་ཤེས་དང༌། །རིག་འཛིན་དངོས་གྲུབ་བརྙེས་པའི་གྲགས་ཐོབ་པ། །མཚུངས་མེད་པཎ་ཆེན་དེ་ཡིས་བོད་ཡུལ་དུ། །སྔོན་མེད་གཏམ་གྱི་སྦྱོར་བ་གང་འདི་མཛད། །འདི་ལ་མ་རིག་མིང་ཚིག་ཡི་གེ་ཡི། །རྣམ་གཞག་འཆད་པོ་གངས་ཅན་འདིར་མ་བྱོན། །དེ་ཕྱིར་འདི་ནི་ཚད་ལྡན་ཆེན་པོའི་གཞུང༌། །བློ་ཆེན་མཁས་འདོད་ཀུན་གྱི་འཇུག་ངོགས་ཡིན། །གཞུང་མང་རྩོམ་འདོད་མང་པོར་འཆད་བཞེད་དང༌། །མཁས་པར་བྱེད་དང་གྲགས་དཀར་ཐོབ་འདོད་ན། །ཡང་དག་སྨྲ་བའི་སྒོ་ཆེན་འདི་ཕྱེ་ལ། །བརྡ་སྤྲོད་བྱེད་པའི་མཚོན་ཆ་འདི་ཟུངས་ཤིག །ལུང་སྟོན་སྨྲ་བའི་སྒོ་ཆེན་རྣམ་གསུམ་པོ། །བརྡ་སྤྲོད་མཁས་པའི་གསུང་བཞིན་མ་ཕྱེ་ན། །མདོ་དང་གཞུང་བརྒྱའི་ཁྱམས་ཆེན་སུ་ཡིས་བལྟ། །ཚིག་དོན་སྒོ་བརྒྱའི་ལྡེ་མིག་འདི་ལོངས་ཤིག །ཚིག་ལ་ཐོགས་མེད་སྨྲ་བའི་ཞལ། །མཚར་བྱེད་སྨྲ་བའི་རྒྱན་འདི་ཡང༌། །ཆེན་པོ་རྣམས་ཀྱི་གཞུང་ཇི་བཞིན། །ཡིན་ཕྱིར་འཁྲུལ་མེད་གཞུང་བཞིན་བཟུང༌། །དེ་ཡི་དགེ་བས་འགྲོ་བ་ཀུན། །རྒྱལ་བས་གསུངས་པའི་ཆོས་ཀྱི་སྒོ། །སྟོང་ཕྲག་བརྒྱད་ཅུ་རྩ་བཞི་པོ། །སྨྲ་མཁས་ངག་གི་དབང་པོར་ཤོག ། ཅེས་སྨྲ་བའི་སྒོ་མཚོན་ཆ་ལྟ་བུའི་རྣམ་པར་བཤད་པ་སྨྲ་བའི་རྒྱན་ཞེས་བྱ་བ་འདི་ནི། པཎ་ཆེན་བློ་གྲོས་བརྟན་པ་བཞི་པའི་བཀའ་དྲིན་ཉེ་བར་ཐོབ་པ། དཔལ་ཤཱཀྱ་མཆོག་ལྡན་དྲི་མེད་ལེགས་པའི་བློས། གཙང་གཡས་རུའི་སའི་ཐིག་ལེ་གསེར་མདོག་ཅན་ཞེས་བྱ་བའི་དབེན་གནས་དམ་པར་ཉེ་བར་སྦྱར་བའི་ཡི་གེ་པ་ནི་ཆོས་ཀྱི་རྒྱལ་མཚན་ནོ། །