སྨོན་ལམ་ཆེན་མོ།

ཡོང་ཁུངས་Wikipedia

༄༅།། ལྷ་སའི་ཆོ་འཕྲུལ་སྨོན་ལམ་དུས་ཆེན་ནི་རྗེ་ཙོང་ཁ་པ་བློ་བཟང་གྲགས་པས་སྤྱི་ལོ་ཆིག་སྟོང་བཞི་བརྒྱ་བཅུ་མེད་དགུའི་ལོ་ལ་གསར་འཛུགས་གནང་པ་ཞིག་རེད།

གསལ་བཤད།[རྩོམ་སྒྲིག]

ཆོ་འཕྲུལ་སྨོན་ལམ་ཆེན་མོ་ནི་རྗེ་ཙོང་ཁ་པ་ཆེན་པོས་སྔོན་སྟོན་པ་ ཤཱཀྱ་ཐུབ་པས་ཟླ་བ་དང་པོའི་ཚེས་བརྒྱད་ནས་ཚེས་བཅོ་ལྔ་བར་ མུ་སྟེགས་ཀྱི་སྟོན་པ་དྲུག་དང་ཆོ་འཕྲུལ་འགྲན་ནས་ཕམ་པར་ མཛད་པའི་དུས་དེ་དང་བསྟུན་ནས་སེ་འབྲས་དགའ་གསུམ་གྱི་ དགེ་འདུན་ཡོངས་རྫོགས་ལྷ་སར་གདན་དྲངས་ཏེ་གཙུག་ལག་ ཁང་དུ་ཚེས་གྲངས་ཆད་ལྷག་བབས་ཀྱིས་ཚེས་གསུམ་བཞི་གང་ རུང་ནས་དབུ་ཚུགས་ཏེ་ཚེས་ཉེར་ལྔ་བར་ཉིན་ཉི་ཤུ་རྩ་གཅིག་ རིང་རྟེན་མཆོག་སྤྱན་སྔར་མཆོད་སྤྲིན་གཟབ་རྒྱས་དང་འབྲེལ་ དགེ་འདུན་ཡོངས་ནས་ཉིན་རེ་ཚོགས་དུས་གསུམ་ལ་གསོལ་ཇ། བཞེས་ཐུག ཚབ་ར། སྐུ་འགྱེད་བཅས་བསྙེན་བཀུར་བླ་ན་མེད་པ་ གནང་སྟེ་བསྟན་པ་རྒྱས་པ་དང་། འགྲོ་བ་བདེ་བའི་ཞལ་འདོན་ ཐུགས་སྨོན་རྒྱ་ཆེ་མཛད་ཀྱི་རེད། དེའི་རིང་དགོང་དྲོ་ས་རུལ་ རྗེས་འཁྱམས་རའི་ནང་དགེ་བཤེས་ལྷ་རམས་གསར་པ་རྣམས་ ཀྱིས་མཚན་ཉིད་བགྲོ་གླེང་འགྲན་རྩོད་གནང་དགོས་པ་རེད།

ལོ་རྒྱུས།[རྩོམ་སྒྲིག]

མཚོན་རྟགས།[རྩོམ་སྒྲིག]

ཟིན་ཐོ་འམ་དཔྱད་གཞི།[རྩོམ་སྒྲིག]

དཔྱད་གཞིའི་དཀར་ཆག།[རྩོམ་སྒྲིག]

ད་དུང་གཟིགས།[རྩོམ་སྒྲིག]

ཕྱི་ཕྱོགས་དྲ་མཐུད།[རྩོམ་སྒྲིག]

སྨོན་ལམ་ཆེན་མོ།[རྩོམ་སྒྲིག]

དེ་སྔ་བོད་ཟླ་དང་པོའི་ཚེས་གསུམ་ནས་ལྷ་ས་གཙུག་ལག་ཁང་དུ་སྨིན་ལམ་གྱི་གྲལ་འཛིན་འགོ་ཚུགས་པ་ནས་ཆོས་སྡེ་ཆེན་པོ་འབྲས་སེ་དགའ་གསུམ་གཙོ་བོར་གྱུར་པའི་དགེ་འདུན་ཉིས་ཁྲི་ནས་སུམ་ཁྲི་བར་འཚོགས་ཏེ་འདུས་ཚོགས་སུ་བསྙེན་བཀུར་མཆོད་སྤྲིན་སྤེལ་བའི་སྨོན་ལམ་ཆེན་མོ་ཚོགས་སྲོལ་ཡོད་པ་དེ་ནི་སྔོན་སྟོན་པ་ཤཱཀྱ་མུ་ནེས་རྒྱ་གར་གྱི་གྲོང་ཁྱེར་ཆེན་པོ་གཉན་ཡོད་ཅེས་པའི་ཡུལ་དུ་སྤྱི་ལོའི་སྔོན་གྱི་༥༡༡ལོ་མེ་འབྲུག་ཟླ་༡ཚེས་༡ནས་ཚེས་༡༥བར་མུ་སྟེགས་པའི་སྟོན་པ་དྲུག་དང་རྫུ་འཕྲུལ་འགྲན་པ་དང་། ཚེས་༨ཉིན་རྫུ་འཕྲུལ་གྱིས་དངོས་གཞིའི་མཐོ་རླབས་འཕྱུར་ཏེ་མི་ཚོགས་རྒྱ་མཚོ་ལྟ་བུའི་དབུས་སུ་མཐར་མུ་སྟེགས་པའི་སྟོན་པ་དྲུག་འཁོར་ཚར་བཅད་དེ་རྣམ་པར་རྒྱལ་བ་དེར་དྲན་གསོ་ཞུ་ཆེད་རྒྱ་གར་དུ་ཆོ་འཕྲུལ་མཆོད་པའི་དུས་སྟོན་ཆེན་མོ་བྱ་སྲོལ་དང་དུས་མཚུངས་པར་རབ་བྱུང་བདུན་པའི་ས་གླང་(༡༤༠༩)ལོར་རྗེ་བླ་མ་ཙོང་ཁ་པ་ཆེན་པོས་སྣེ་གདོང་མི་དབང་གྲགས་པ་རྒྱལ་མཚན་དང་སྣེའུ་རྫོང་དཔོན་ནམ་མཁའ་བཟང་པོར་སློབ་སྟོན་མཛད་དེ་དད་སྦྱིན་ཁག་ནས་གཙུག་ལག་ཁང་ཞིག་གསོ་གསར་བཞེངས་ལྟ་བུ་མཛད་ཅིང་། ཁྱད་པར་སྟོན་པ་དགུང་གྲངས་བཅུ་གཉིས་ཀྱི་སྐུ་ཚད་རིན་པོ་ཆེ་སྣ་ལྔ་ལས་གྲུབ་པ་ཁྱད་པར་ཅན་ཇོ་བོ་རིན་པོ་ཆེར་འབོད་པ་མ་འོངས་ཀླུ་ཡུལ་དུ་གཤེགས་པའི་ལུང་བསྟན་ཡོད་པ་ལྟར་དེ་ལས་ཕྱིར་བསྲིངས་ཕྱིར་ངེས་པ་ལྔ་ལྡན་གྱི་ལོངས་སྐུར་ཞལ་བསྒྱུར་བའི་རིན་ཆེན་དང་པོའི་དབུ་རྒྱན་དང་མཆོད་པ་སྣ་ཚོགས་བཤམས་ཤིང་། ཚེས་པ་བརྒྱད་དང་བཅོ་ལྔ་ལ་གསེར་ཆབ་ཀྱིས་མཚོན་བསྙེན་བཀུར་ཚོགས་མཆོད་དཔག་ཏུ་མེད་པ་མཛད། ཕྱི་རོལ་དུ་ཕྱོགས་སྐྱོང་གི་དར་ཆེན་བཅོ་ལྔ་རང་རང་གི་ཕྱོགས་སུ་བཙུགས། དགེ་འདུན་ཁྲི་ཕྲག་འགར་བསྙེན་བཀུར་བའི་སྲོལ་བཟང་ཚུགས་ཏེ་རྒྱལ་བའི་བསྟན་པ་རིན་པོ་ཆེ་དྲི་མ་མེད་པ་སྤྱི་དང་། ཁྱད་པར་འཇམ་མགོན་རྒྱལ་བ་གཉིས་པའི་ལུང་རྟོགས་ཀྱི་བསྟན་པ་རིན་པོ་ཆེ་ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པ། དེ་འཛིན་བསྟན་པའི་སྲོག་ཟུང་ཆེན་པོ་གང་ན་སུ་བཞུགས་པ་རྣམས་གདུལ་བྱའི་དོན་དུ་བསྐལ་པ་རབ་འབྱམས་ཞིང་གི་དུས་སྙེད་དུ་འཚོ་ཞིང་བཞེས་པ། མཐའ་དབུས་ཀྱི་སྐྱེ་རྒུ་མཐའ་དག་གནས་སྐབས་རྫོགས་ལྡན་ཕན་བདེའི་དགའ་སྟོན་ལ་ལོངས་སྤྱོད་ཅིང་། རིང་པོར་མི་ཐོགས་པར་བྱང་ཆུབ་སྙིང་པོའི་གོ་འཕང་ལ་བདེ་བླག་ཏུ་རེག་པར་གྱུར་བ་བཅས་ཀྱི་སྨོན་ལམ་གཙོ་བོར་མཛད་ཅིང་། ཉིན་མཚན་ཀུན་ཏུ་ཆོས་སྒྲ་ཆག་མེད་དུ་སྒྲོག་པའི་སྲོལ་གཏོད་ལྷ་ལྡན་སྨོན་ལམ་ཆེན་མོར་གདན་ས་ཆེན་པོ་འབྲས་སེ་གཉིས་ནས་དགེ་འདུན་ཕེབས་མུས་ཡང་དེ་རྗེས་བོད་རབ་བྱུང་བརྒྱད་པའི་ས་རྟ་༡༤༩༨ལོར་སྐབས་དེའི་སྲིད་འཛིན་དཔོན་ཚབ་ཞྭ་དམར་བ་བཞི་པ་ཆོས་གྲགས་ཡེ་ཤེས་དང་རིན་སྤུངས་པ་ནོར་བུ་བཟང་པོའི་བུ་མཚོ་སྐྱེས་རྡོ་རྗེ་གཉིས་ནས་སྨོན་ལམ་ཆེན་མོར་འབྲས་སེ་གཉིས་ཀྱི་དགེ་འདུན་པ་བཞུགས་མི་ཆོག་པ་བཟོས་ནས་ལོ་ཉི་ཤུ་ཙམ་རིང་བཀའ་བརྒྱུད་པ་དང་ས་སྐྱ་བ་གཉིས་ཀྱང་རྩོད་པ་བྱུང་རྐྱེན་གྱིས་སྨོན་ལམ་ཆེན་མོའི་འདུས་ཚོགས་ཀྱི་གཙོ་བོ་སུས་བྱེད་སྐོར་ལ་འགྱུར་བ་ཕྲན་བུ་བྱུང་ཡོད་འདུག དེ་རྗེས་སྡེ་སྲིད་ཕག་མོ་གྲུ་པའི་སྡེ་པ་ངག་དབང་བཀྲ་ཤིས་གྲགས་པས་དངོས་སུ་སྲིད་དབང་བཟུང་སྟེ་བོད་རབ་བྱུང་དགུ་པའི་ས་སྟག་༡༥༡༨ལོ་ནས་སླར་ཡང་སེ་འབྲས་གཉིས་ལྷ་སར་སྨོན་ལམ་ཚོགས་པར་ཡོང་རྒྱུ་བསྐྱར་གསོ་བྱས། དུས་དེ་ཙམ་ནས་རྒྱལ་དབང་སྐུ་ཕྲེང་གཉིས་པ་དགེ་འདུན་རྒྱ་མཚོས་ལོ་ལྟར་སྨོན་ལམ་གྱི་ཚོགས་དབུ་གནང་ཐོག་ཚོགས་ཆེན་གྱི་འདོན་དབྱངས་དང་སྒྲིག་ལམ་གསར་པ་འགའ་ཞིག་གཏན་ལ་ཕབ། དེ་རྗེས་ཏཱ་ལའི་བླ་མ་སྐུ་ཕྲེང་ན་རིམ་དང་། ལྷག་པར་དུ་ཏཱ་ལའི་བླ་མ་སྐུ་ཕྲེང་ལྔ་པའི་སྐབས་འབྲས་ཚོགས་ཆེན་དགེ་བསྐོས་གཉིས་ལ་སྨོན་ལམ་རིང་གི་ཆོས་སྲིད་གནོན་བསྡེམས་ཀྱི་དབང་ཆའི་བཅའ་ཡིག་ཆེན་མོ་བསྩལ་བ་ལྟར་སྨོན་ལམ་ཞག་ཉེར་གཅིག་རིང་ལྷ་སའི་ཁྲིམས་བདག་ཀྱང་འབྲས་སྤུངས་ཚོགས་ཆེན་ཞལ་ངོ་གཉིས་ནས་བྱས་ཏེ་གྲོང་ཁྱེར་ནང་ཁུལ་ས་མཚམས་ཀྱི་རྒྱས་བཅད་པ་ཚུན་ལ་ཁྲིམས་གནོན་དང་། སྲིད་གཞུང་ནས་ཀྱང་དགེ་འདུན་ལ་བསྙེན་བཀུར་ཚ་འགྱེད་ཇ་ཐུག་སོགས་ཀྱི་མཚོན་གཏོང་སྒོ་འགན་སྲུང་ཆེད་སྨོན་ལམ་སྤྱི་ཁྱབ་པ་ཞེས་ཤོད་སྐོར་ཛ་སག་ནས་རིམ་བཞི་གང་རུང་གཅིག རྩེ་མགྲོན་གཅིག ལྷ་གཉེར་གཅིག རྣམ་གྲྭ་བཀྲས་ཁང་གཉེར་པ། ལྷ་ས་གཉེར་ཚང་དྲུང་ཡིག་བཅས་ཟུར་བཙུགས་ལས་ཁུངས་ཤིག་ཡོད་པའི་ལས་འགན་ཁག་བགོས་ཐོག་བླ་ཕྱག་སེར་སྐྱ་ངོ་མ་བཞིས་བཤེར་ཁག་འགྱེད་གཏོང་སར་རྟོགས་ཞིབ་དང་། དངུལ་རྩིས་པ་རྩེའི་སྐུ་ཚབ་རྩེ་མགྲོན་གཅིག བླ་ཕྱག་ཕྱག་དྲུང་། ཡིག་ཚང་ལས་བྱ་རྩེ་དྲུང་གཅིག་བཅས་ནས་ཚོགས་ཐེངས་སོ་སོའི་འགྱེད་དངུལ་བླ་ཕྱག་ནས་ཁུག་བདོག་བྱེད་པ། འགྱེད་གཏོང་རྩེ་དྲུང་བདུན་དང་། དངུལ་ཁུག་པ་བླ་ཕྱག་ཇོ་ལགས་བདུན་སོ་སོས་དགེ་འདུན་གྱི་ཕྱག་ཏུ་ཆད་ལྷག་མེད་པར་འབུལ་བ་དང་། གྲངས་རྒྱག་པ་ཞེས་དོག་བདེའི་མི་སེར་ཁོངས་ནས་མི་བཅུ་བཞི་ཡོད་པ་དེས་བཤེར་ཁག་སོ་སོར་དགེ་འདུན་ཞལ་གྲངས་གང་ཡོད་གྲངས་རྒྱག་གིས་བརྒྱ་ཐེའུ་ཕབ་པ་དང་སྦྲགས་འགྱེད་དངུལ་ལྷག་བསྡད་བར་འཁུམ་བོར་བརླག་མེད་པ་རྩིས་འབུལ་བྱུང་གཞུང་འགོད་རྒྱུ། རྩེ་གཟིམ་འགག་གཅིག་ཡོད་པ་དེས་བླ་ཕྱག་ལས་ཁུངས་ནས་ཇ་མར། བཞེས་ཐུག་རྒྱུ་འབྲས་དང་། ནས་བཅགས། བཞེས་སྡོར། ཕྱུར་བ་སོགས་སྨིན་གཏོང་ཆེད་ཚོགས་ཁྲོའི་ཁར་བལྟ་རྟོགས་བྱེད་པ། མཐའ་དབུས་ཀྱི་སྐྱེ་རྒུ་དྲག་གཞན་རང་རང་སོ་སོའི་འཁོར་འབྱོར་ལ་གཞིགས་པའི་གསོལ་ཇ། བཞེས་ཐུག སྐུ་འགྱེད་འབུལ་མཁན། གཞན་ཡང་བསྔོ་རྟེན། སྐྱབས་ཡོན། འདོན་བསྐུལ། མང་དོད་དང་ཞལ་འདེབས་སོགས་འབུལ་མཁན་གྲངས་ལས་འདས་པ་ཡོད། མང་ཇའི་འགྱེད་ལག་འདོན་དང་མཆོད་རྩའི་ཐེབས་རིགས་གཉིས་སུ་དབྱེ་ཞིང་། ཐེབས་རྩའི་མ་རྐང་དེ་རྗེས་སུ་ཐེབས་སྦྱར་ལས་ཁུངས་ནས་སྐྱེད་འབབ་གཏོང་སྒོ་དོ་དམ་བྱེད་སྲོལ་ཆགས། ཚེས་གསུམ་གྲལ་འཛིན་བཞུགས་སྟངས་ཐད། དེ་སྔོན་སྐུ་ཕྲེང་ལྔ་པའི་སྐབས་ཁྱམས་ར་དང་། ཤིང་ར་གཉིས་སུ་འབྲས་སྤུངས་པ་དང་། ཁྱམས་ར་ནང་སེ་ར་དགོན་པར་མདའ་རྐྱང་རིང་མོའམ་ཟླ་གཅིག་མ་ཞེས་གྲལ་གཅིག་བཅས་ཡིན་ཞིང་། རྗེས་སུ་རྒྱལ་བ་སྐུ་ཕྲེང་བདུན་པའི་སྐབས་དགའ་ལྡན་པ་སྨོན་ལམ་ཆེན་མོར་ཕེབས་དགོས་པའི་བཀའ་གནང་བ་བཞིན། སྒྲོལ་མ་ལྷ་ཁང་གི་མདུན་ནས་གཞུང་སྒོ་ནང་མ་བརྒྱུད་དུ་དགའ་ལྡན་པའི་གྲལ་བཞི་ཡོད། བར་བསྐོར་ནང་མ་ཤར་བརྒྱུད་སེ་ར་ལྟག་སྒོ་དང་བར་བསྐོར་བྱང་བརྒྱུད་བཅས་ལ་སེ་ར་དགོན་པ། བར་བསྐོར་ལྷོ་རྒྱུད་དང་ལྷོ་སྒོ་ནང་དགའ་ལྡན་དགོན་པ། སྟེང་མདའ་གཡབ་འོག་ཏུ་འབྲས་སེ་དགའ་གསུམ། གསུང་ཆོས་ར་བར་མདོ་དགེ་འདུན་ཞེས་གཞིས་དགོན་ཁུངས་ནས་གོང་དཀར་ཆོས་སྡེ་སོགས་དང་། གསུང་ཆོས་ར་བའི་རྡོ་གཅལ་མཐིལ་དུ་དབོན་སེར་གཟུགས་བཅས་དགེ་འདུན་ཉིས་སྟོང་སྐོར་ཁྱོན་བསྡོམས་དགེ་འདུན་ཉིས་ཁྲི་ལྔ་སྟོང་སྐོར་སོ་སོའི་བཞུགས་གནས་སུ་གྲལ་འཁོད། ཁྱམས་རའི་ནང་ཚོགས་ཆེན་དགེ་བསྐོས་རྒན་པས་བཅའ་ཡིག་ཆེན་མོ་སྒྲོགས་སྦྱངས་དང་འབྲེལ་སྨོན་ལམ་རིང་དགེ་འདུན་རྣམས་ནས་ཆོས་ཁྲིམས་སྲུང་སྡོམ་བྱེད་སྒོའི་ཚོགས་གཏམ་བཏང་། གྲལ་འཛིན་གྲུབ་ནས་དགོང་ཇའི་བཤེར་ཁག་ཐོག་དགེ་འདུན་རེར་བཀྲ་ཤིས་ཁ་བཏགས་ཞེས་ཟུབ་ཕྱི་དང་ཛ་ཏི་རེ་ཕུལ། སྨོན་ལམ་སྐབས་སྔ་དགུང་དགོང་གསུམ་ལ་ཉིན་རེར་རློན་ཚོགས་ཐེངས་གསུམ་ལ་ཚོགས་ཐེངས་རེར་གསོལ་ཇ་གཉིས་རེ་དང་། སྔ་དགུང་གཉིས་ལ་བཞེས་ཐུག་རེ། ཚེས་༡༣ཞོགས་ཚོགས་ཐོག་རྩམ་བཞེས་ལས་ཁུངས་ནས་དགེ་འདུན་རེར་རྩམ་པ་བཅུ་འབོ་རེ། སྨོན་ལམ་ཚོགས་ཤིང་ཐད་ཚོགས་སྨོན་ཤིང་གཉེར་ཞེས་རྩེ་དྲུང་གཉིས་ཟུར་བསྐོས་ཡོད་པ་ནས་གཏོང་དགོས། ཞོལ་གཉེར་ཚྭ་བུལ། དེ་བྱིངས་ཇ་མར་གྱིས་མཚོན་དགོས་མཁོ་བླ་ཕྱག་ལས་ཁུངས་ནས་གཏོང་དགོས། ཆོས་ལུགས་གནང་སྒོའི་ཐད་ཚོགས་དབུས་སུ་རློན་ཚོགས་སྔ་དགོང་གཉིས་ཐོག་ཚོགས་ཆེན་དབུ་མཛད་ནས་ཞལ་འདོན་འཆར་ཅན་གསུང་སྐུལ་གྲོལ་རྗེས་ཀྱི་བར་གསེང་དུ་སྐམ་ཚོགས་སྨོན་ལམ་གྱི་དབུ་བཞུགས་སུ་དགའ་ལྡན་ཁྲི་རིན་པོ་ཆེ་ཕེབས་ཏེ་གདན་སའི་མཁན་པོ་རྣམ་པ་དང་། བླ་སྤྲུལ་ཆེ་ཆུང་། དགེ་བཤེས་ལྷ་རམས་པ། འབྲས་སྤུངས་གྲྭ་ཚང་བཞིའི་དབུ་མཛད་རྣམ་པ། དགེ་འདུན་མང་ཚོགས་བཅས་ནས་བསྟོད་པ་ལེགས་བྲིས་མ་དང་། སྐབས་གསུམ་པ། འཕགས་པ་བྱམས་པའི་སྨོན་ལམ་དང་། ཐོག་མཐའ་མ་གཉིས་རེས་མོས། སྤྱན་འདྲེན་ཁྲུས་གསོལ། ལྟུང་གཤགས། གཞི་བདག་གཏོར་མའི་དབུ་བསྐུལ། གསང་བའི་རྣམ་ཐར། ཡོན་ཏན་གཞིར་འགྱུར་མ་བཅས་གདངས་སྙན་པོའི་སྒོ་ནས་ལེགས་པར་གསུངས་རྗེས་ཐུབ་པའི་བསྟན་པ་རིན་པོ་ཆེ་སྲིད་མཐར་དར་ཞིང་འགྲོ་ཀུན་བདེ་སྐྱིད་དཔལ་ལ་སྤྱོད་ཕྱིར་དགེ་ཚོགས་བྱང་ཆེན་གྱི་རྒྱུར་མཚམས་སྦྱོར་དང་། ངན་སོང་གསུམ་གྱི་སྣོད་བཅུད་སྟོང་པར་གྱུར་པའི་ལྗགས་བསྔོ། བསྟན་འབར་མ་དང་། བདེ་བ་ཅན་གྱི་སྨོན་ལམ་མཐུན་གྱུར་དང་བཅས་མཉམ་མེད་ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་བཞེད་སྲོལ་ཇི་ལྟ་བ་བཞིན་ཉམས་པ་མེད་པའི་བཀའ་དྲིན་ཉིན་ལྟར་བསྐྱངས། བོད་རབ་བྱུང་བཅུ་པའི་ཆུ་གླང་༡༦༡༣ལོ་ནས་པཎ་ཆེན་སྐུ་ཕྲེང་བཞི་པ་ཆོས་ཀྱི་རྒྱལ་མཚན་གྱིས་ལོ་དྲུག་རིང་ལྷ་ས་སྨོན་ལམ་ཆེན་མོའི་ཚོགས་དབུ་གནང་ཞིང་དེ་སྐབས་གདན་ས་ཆེན་པོ་གསུམ་གྱི་དགེ་བཤེས་མཁས་པ་རྣམས་ནས་འདེམ་བསྒྲུགས་ཐོག་སྨོན་ལམ་ཚོགས་དབུས་སུ་མཚན་ཉིད་དམ་བཅའ་བཞག་སྟེ་སྔ་དྲོ་ཚད་མ་རྣམ་འགྲེལ། ཉིན་དགུང་དབུ་མ་ཕར་ཕྱིན། དགོང་དྲོ་འདུལ་བ་དང་མཛོད་བཅས་མཚན་ཉིད་ཀྱི་གཞུང་ཆེན་པོ་ལྔ་ལ་བགྲོ་གླེང་བྱས་པ་བརྒྱུད་མཚན་ཉིད་བཟང་རིམ་ལ་ཨང་ཀི་དང་པོ་གཉིས་པ་དང་བྱ་དགའི་དངོས་པོ་སོགས་སྤྲོད་པའི་ལམ་ལུགས་གསར་བཏོད་གནང་། དགོང་ཚོགས་གྲོལ་རྗེས་ཁྱམས་རའི་ནང་གོང་ལྟར་རྒྱལ་མཚན་དཀར་པོའི་འོག་ཏུ་དགེ་བཤེས་ལྷ་རམས་པ་རྣམས་ཉིན་གཅིག་རིང་གི་རེས་མོས་ཀྱིས་དམ་བཅའ་འཇོག་དགོས། དེའི་སར་རྒྱུགས་ལེན་བླ་མ་གཞུང་ལས་པ་ཞེས་སབྲས་སྤུངས་དགོན་གྱ་མཁན་པོ་གཉིས། གནམ་ཡངས་ལྡིངས་གུར་འོག་ཏུ་ཏཱ་ལའི་བླ་མའི་མཚན་ཞབས་རྣམས་ཕེབས་དགོས། ཚོགས་སུ་བླ་སྤྲུལ་ཆེ་ཆུང་། གདན་སའི་མཁན་པོ་ལས་ཟུར། རྩོད་གྲྭའི་སློབ་གཉེར་བ་ཡོངས་རྫོགས་བཞུགས་དགོས། ཚེས་༡༢ ༡༣ ༡༤གསུམ་ལ་དགེ་བཤེས་ལྷ་རམས་པ་གསར་པ་ཕྱག་དཔེ་མཁས་པ་གྲགས་ཅན་དག་དམ་བཅར་བཞུགས་སྐབས་དགེ་འདུ་པ་ཁྱམས་རར་མ་གཤོངས་པ་ལྟབུའི་འཚང་ཀ་ཤིག་ཤིག་ཏུ་ཕེབས་ཡོང་། ཞོགས་ཚོགས་གྲོལ་རྗེས་ཉིན་ལྟར་གསུང་ཆོས་ར་བའི་བང་རིམ་གོང་མའི་སྟེང་གི་ཆོས་ཁྲིར་དགའ་ལྡན་ཁྲི་པ། བང་རིམ་སྟེང་འོག་མཐའ་ཟཁོར་དུ་སེ་འབྲས་དགེ་གསུམ་གྱི་མཁན་པོ། བླ་སྤྲུལ། དགེ་བཤེས་ལྷ་རམས་པ། དབུ་མཛད་རྣམ་པ། རྡོ་གཅལ་ནང་གྲྭ་དམངས་བཅས་ཀྱི་ཚོགས་དབུས་སུ་ཚད་མ་རྣམ་འགྲེལ་གྱི་བགྲོ་གླེང་ཆུ་ཚོད་གཉིས་ཙམ་གནང་། གསུང་ཆོས་སྐབས་ཁྲི་རིན་པོ་ཆེས་སྟོན་པའི་མཛད་པ་ལས་བརྩམས་པའི་སྐྱེས་རབས་སོ་བཞི་པ་དང་། སྔོན་བྱོན་དམ་པའི་གསུང་རབ་ཆོས་ཐུན་རེ་དགེ་འདུན་ཕེབས་ངོ་ཡོད་པ་དང་། སྐྱ་བོ་ཕོ་མོ་རྣམས་ཀྱང་ཆོས་ཞུར་རྡོ་གཅལ་ནང་སོང་ནའང་འགྲིག་གི་ཡོད། སྨོན་ལམ་འདི་དང་ཐོག་ཆོ་འཕྲུལ་ཟླ་༡ཚེས་༡ནས་ཚེས་༡༥བར་ཉིན་བཅོ་ལྔ་ལས་མེད་ཅིང་། དེ་རྗེས་སྨོན་ལམ་གྱི་དུས་སྟོན་རྒྱ་ཆེ་རུ་སོང་སྟེ་ཏཱ་ལའི་བླ་མ་སྐུ་ཕྲེང་ལྔ་པའི་འདས་མཆོད་འགོ་ཚུགས་པ་ནས་ཏཱ་ལའི་བླ་མ་རིམ་བྱུང་གལི་དགོངས་རྫོགས་མཆོད་སྤྲིན་ལ་ལྷ་ས་སྨོན་ལམ་ཉིན་ཞག་རིམ་འཕར་དབང་གིས་མཐར་ཧོར་ཟླ་༡ཚེས་༤ནས་འགོ་ཚུགས་ཏེ་ཚེས་༢༤་ལ་སྨོན་ལམ་གཏོར་རྒྱག་དང་། ཚེས་༢༥ལ་བྱམས་པ་གདན་འདྲེན་གྲུབ་རྗེས་སྨོན་ལམ་གྲོལ་བ་ལགས་སོ། །