སྨོན་པའི་སེམས་

སྨོན་པའི་སེམས་ཞེས་པ་ནི་བྱང་ཆུབ་སེམས་དཔའི་སྤྱོད་པ་ལ་འཇུག་པའི་རྣམ་གཞག་ཏུ་སྨོན་འཇུག་སེམས་བསྐྱེད་གཉིས་ཀྱི་ཡ་གྱལ་གཅིག་ཡིན། དེ་ནི་གཞན་གྱི་དོན་དུ་ཡང་དག་པར་རྫོགས་པའི་བྱང་ཆུབ་ཐོབ་པར་སྨོན་པའི་སེམས་བསྐྱེད་ཅིག་ཡིན་ལ། དེའི་ཁྱད་པར་ནི་བྱང་ཆུབ་སེམས་དཔའི་སྤྱོད་པ་ཉམས་སུ་ལེན་པའི་བྱ་བ་དང་བྲལ་བར་ཡོད་པ་དེ་ཡིན་ནོ། །

སྒྲ་བཤད།

སྨོན་པ་ཞེས་པ་ནི་འདོད་པ་དང་རེ་བ་སྨོན་ལམ་འདེབས་པའི་དོན་ཡིན་ལ། སེམས་ཞེས་པ་ནི་སེམས་བསྐྱེད་པའི་དོན་ཏེ། གཞན་དོན་དུ་བྱང་ཆུབ་ཐོབ་པར་བྱའོ་སྙམ་པའི་འདུན་པ་དང་མཚུངས་ལྡན་གྱི་སེམས་ཡིན་པས་དེ་ལྟར་བརྗོད་དོ། །

མཚན་ཉིད།

"གཞན་གྱི་དོན་དུ་ཡང་དག་པར་རྫོགས་པའི་བྱང་ཆུབ་དོན་གཉེར་གྱི་འདུན་པ་དང་མཚུངས་ལྡན་གྱི་སེམས་སོ། །"ཞེས་གསུངས་པ་ལྟར། དེ་ནི་སེམས་ཅན་ཐམས་ཅད་ཀྱི་དོན་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་འདོད་པའི་སེམས་བསྐྱེད་ལ་གོ ། ཡང་ན་"སྦྱིན་སོགས་རྒྱལ་སྲས་ཀྱི་སྤྱོད་པ་ཉམས་སུ་ལེན་པའི་བྱ་བས་ཟིན་པ་ལ་ལྟོས་མི་དགོས་པའམ་དེས་དངོས་སུ་མ་ཟིན་པ་དེ་སྨོན་པ་སེམས་བསྐྱེད་ཀྱི་འཇོག་བྱེད་དང་།" ཞེས་གསུངས་པ་ལྟར། སྦྱིན་པ་ཚུལ་ཁྲིམས་སོགས་ཕ་རོལ་ཏུ་ཕྱིན་པའི་སྤྱོད་པ་ཉམས་སུ་ལེན་པའི་བྱ་བ་དང་ངེས་པར་ལྟོས་མི་དགོས་པའི་སེམས་བསྐྱེད་ཅིག་ཡིན་ནོ། །འདི་ནི་སྨོན་པའི་སེམས་འབྲས་བུ་སངས་རྒྱས་ཐོབ་པར་སྨོན་པ་ཙམ་དུ་ཟད་ཀྱང་སྦྱིན་པ་ཚུལ་ཁྲིམས་སོགས་ཀྱི་སྤྱོད་པ་ལ་ངེས་པར་འཇུག་མི་དགོས་པའི་སེམས་བསྐྱེད་ཅིག་ཡིན་པའི་དོན་ནོ། །

དབྱེ་བ།

སྨོན་པའི་སེམས་ལ་མཚམས་དང་དཔེ་གྲོགས་ཀྱི་སྒོ་ནས་དབྱེ་ན་རྣམ་པ་མང་པོ་ཡོད་ཀྱང་། ངོ་བོའི་སྒོ་ནས་འཇུག་པའི་སེམས་དང་ཁ་བྲལ་དུ་དབྱེ་ན་སྨོན་པ་ཞེས་པ་གཅིག་པུ་ཡིན་ནོ། །ཁ་ཅིག་གིས་སྨོན་པའི་སེམས་ལ་ཡང་ཆོ་ག་ལ་མི་ལྟོས་པར་སྐྱེ་བ་དང་། ཆོ་གས་ལེན་པ་གཉིས་སུ་དབྱེ་ཞིང་། "སྨོན་པ་སེམས་བསྐྱེད་ཙམ་ཞིག་ནི་ཆོ་ག་ལ་མི་ལྟོས་པར་སྐྱེ་ལ་སེམས་དེ་ཉིད་སངས་རྒྱས་མ་ཐོབ་བར་དུ་ནམ་ཡང་མི་གཏོང་སྙམ་དུ་དམ་བཅའི་ལྕགས་ཀྱུ་གཉིས་པས་ཟིན་པ་ནི་ཆོ་གས་ལེན་པར་"ཞེས་ཇོ་བོ་ཨ་ཏི་ཤའི་གདམས་ངག་ལས་གསུངས་ཤིང་། དེ་ཡང་དང་པོ་ནི་ཁྱེད་ཀྱིས་བླ་མ་དང་མཆོད་རྟེན་ལ་མེ་ཏོག་ཙམ་ཞིག་ཕུལ་ཏེ་བྱང་ཆུབ་ཐོབ་པར་སྨོན་པ་ལྟ་བུ་སེམས་བསྐྱེད་ཀྱི་ཆོ་ག་མ་བྱས་པར་རང་རང་གིས་སེམས་བསྐྱེད་པ་ལ་གོ །གཉིས་པ་ནི་བླ་མ་ཞིག་གམ་རྟེན་ཞིག་ལ་ལྟོས་ཏེ་སེམས་བསྐྱེད་ཆོ་ག་ཡང་དག་པར་བྱས་ནས་སེམས་བསྐྱེད་པ་སངས་རྒྱས་མ་ཐོབ་བར་དུ་ནམ་ཡང་མི་གཏོང་སྙམ་དུ་ངེས་པར་དམ་བཅས་པ་དང་བཅས་ཏེ་ལེན་པ་ལ་གོ་བ་ཡིན་ནོ། །

ཕན་ཡོན།

སྨོན་པའི་སེམས་ཤིན་ཏུ་གལ་ཆེ་ཞིང་ཕན་ཡོན་ཆེན་པོ་ཡོད་པར་བྱམས་པའི་རྣམ་པར་ཐར་པ་ལས། "རིགས་ཀྱི་བུ་འདི་ལྟ་སྟེ་དཔེར་ན། རྡོ་རྗེ་རིན་པོ་ཆེ་ནི་ཆག་ཀྱང་གསེར་གྱི་རྒྱན་ཁྱད་པར་དུ་འཕགས་པ་ཐམས་ཅད་ཟིལ་གྱིས་གནོན་ཞིང་། རྡོ་རྗེ་རིན་པོ་ཆེའི་མིང་ཡང་མི་འདོར་ལ་དབུལ་བ་ཐམས་ཅད་ཀྱང་རྣམ་པར་བཟློག་གོ །རིགས་ཀྱི་བུ་དེ་བཞིན་དུ་ཐམས་ཅད་མཁྱེན་པར་སེམས་བསྐྱེད་པའི་རྡོ་རྗེ་རིན་པོ་ཆེ་ནན་ཏན་དང་བྲལ་ཡང་ཉན་ཐོས་དང་རང་སངས་རྒྱས་ཀྱི་ཡོན་ཏན་གྱི་རྒྱན་ཐམས་ཅད་ཟིལ་གྱིས་གནོན་ཞིང་། བྱང་ཆུབ་སེམས་དཔའི་མིང་ཡང་མི་འདོར་ལ་འཁོར་བའི་དབུལ་བ་ཐམས་ཅད་ཀྱང་རྣམ་པར་བཟློག་གོ །"ཞེས་གསུངས་སོ། །འདི་ལ་དཔེ་དོན་ཟུང་གིས་བཤད་ན། རྡོ་རྗེ་རིན་པོ་ཆེ་ཞིག་ཆ་ཤས་ཆག་ཀྱང་གསེར་གྱི་རྒྱན་གཞན་རིན་ཐང་ཆུང་བ་ཐམས་ཅད་ལས་ཁྱད་པར་དུ་འཕགས་ཤིང་མིང་ཡང་རྡོ་རྗེ་ཉིད་དུ་འབོད་པ་དང་འདྲ་བར། སྨོན་པའི་སེམས་ནི་སྤྱོད་པ་ཉམས་སུ་མ་ལེན་ཡང་ཉན་ཐོས་རང་རྒྱལ་གྱི་དགེ་བ་ཐམས་ཅད་ལས་གལ་ཆེ་ཞིང་རིན་ཐང་ཆེ་བ་ཞིག་ཡིན་པའི་དོན་ནོ། །

སྤྱོད་པ་དང་བྲལ་བའི་ཁྱད་པར།

སྨོན་པའི་སེམས་ཀྱི་ཁྱད་པར་གཅིག་ནི། "བྱང་ཆུབ་སེམས་དཔའི་སྡོམ་པ་མ་བླངས་པའི་སྨོན་ལམ་ནི་སྨོན་པ་ཡིན་ལ་བླངས་པའི་ནི་འཇུག་པ་ཡིན་ནོ། །"ཞེས་གསུངས་པ་ལྟར་སྡོམ་པ་མ་བླངས་པས་འབྲས་བུ་ཆེན་པོ་འབྱུང་ཡང་བསོད་ནམས་རྒྱུན་ཆགས་སུ་མི་འབྱུང་བ་ཞིག་ཡིན་ནོ། །འདི་ནི་སྨོན་པའི་སེམས་ལ་འཁོར་བ་ན་གནས་པའི་ཚེ་ལྷ་དང་མིའི་དབང་ཕྱུག་སོགས་འབྲས་བུ་ཆེན་པོ་ཐོབ་ཀྱང་། འཇུག་པའི་སེམས་ལྟར་སྡོམ་པ་བླངས་པའི་་སྤྱོད་པ་སྐད་ཅིག་རེ་ལ་བསྒྲུབས་པས་བྱུང་ཆུབ་ཏུ་འཇུག་པ་ཡིན་པས་བསོད་ནམས་བར་མ་ཆད་པར་འབྱུང་བའི་དོན་ནོ། །

འཇུག་པའི་སེམས་དང་ཁྱད་པར།

སྨོན་པ་དང་འཇུག་པའི་སེམས་བསྐྱེད་གཉིས་ཀྱི་ཁྱད་པར་ནི། "སྐྱེས་བུ་གང་དག་ཡུལ་འགའ་ཞིག་ཏུ་འགྲོ་བར་བྱའོ་སྙམ་པའི་སྒོ་ནས་ཡུལ་དེར་འགྲོ་བར་འདོད་པའི་བློ་དང༌། རྐང་པ་འདེགས་འཇོག་སོགས་ཀྱི་སྒོ་ནས་ལམ་དུ་ཆས་ཤིང་འགྲོ་བའི་བྱ་བ་དང་བཅས་པ་དེའི་དུས་སུ་ཡང་ཡུལ་དེར་འགྲོ་བར་བྱའོ་སྙམ་པའི་བློ་ཡོད་པ་སྟེ། དེ་གཉིས་ལ་དེར་འགྲོ་སྙམ་པའི་བློ་འདྲ་བར་ཡོད་ཀྱང་དངོས་སུ་འགྲོ་བའི་བྱ་བས་མ་ཟིན་པ་དང་ཟིན་པའི་ཁྱད་པར་རམ་བྱེ་བྲག་ཇི་ལྟར་ཡོད་པ་ཤེས་པ་ལྟར་གྱི་དཔེ་དེ་བཞིན་དུ་"ཞེས་གསུངས་པ་ལྟར། སྨོན་སེམས་ནི་གཞན་དོན་དུ་སངས་རྒྱས་ཐོབ་པར་བྱའོ་སྙམ་པའི་བསམ་པ་ཙམ་དང་། འཇུག་སེམས་ནི་སྨོན་སེམས་སྔོན་དུ་བཏང་ནས་སྡོམ་པ་ལེན་པ་སྔོན་དུ་འགྲོ་བའི་སྒོ་ནས་ཚོགས་རྣམས་ལ་འཇུག་པའམ་བྱང་སེམས་ཀྱི་སྤྱོད་པ་ལ་ཞུགས་པའི་སེམས་ལ་ཟེར་རོ། །དེ་དཔེའི་སྒོ་ནས་བཤད་ན། ཡུལ་དུ་འགྲོ་བར་འདོད་པ་ནི་ཁང་པར་འདུག་ནས་ཡུལ་དེར་འགྲོ་འདོད་ཀྱི་བསམ་པ་ཙམ་དང་། འགྲོ་བ་ནི་དངོས་སུ་ལམ་དུ་ཞུགས་ཏེ་སོང་བ་ལ་གོ་བ་ལྟར། སྨོན་སེམས་ནི་སངས་རྒྱས་ཐོབ་འདོད་ཀྱི་བསམ་པ་ཙམ་ལ་ཟེར་ལ། འཇུག་སེམས་ནི་དངོས་སུ་སྤྱོད་པ་ལ་ཞུགས་པ་ལ་ཟེར་བའི་དོན་ནོ། །