སྤྲོ་བདེ་ཁང་གསར།
སྤྲོ་བདེ་ཁང་གསར་ལ་ཁ་རྒྱུན་དུ་པུ་ཏེ་ཁང་གསར་ཡང་ཟེར། ཡང་མཚན་བསྡུས་པར་“སྤྲོ་ཁང་”ཞེས་ཞུ། དྭགས་པོ་གྲུམ་པའི་ཤར་ངོས་དང་། དཔལ་གླིང་གི་བར་དུ་བཙན་ཁང་དེ་མཇལ་རྒྱུ་ཡོད། བཙན་ཁང་དེ་ནི། རྒྱལ་དབང་ལྔ་པས་རྒྱལ་ཆེན་ཤུགས་ལྡན་གྱི་བཞུགས་གནས་སུ་ཕུལ་གནང་མཛད་པ་ཡིན། ཐོག་མར་གནས་དེར་རྒྱལ་བ་ལྔ་པའི་སྤྲོ་ཁང་ཞིག་ཡོད་སྟབས་སྤྲོ་བདེ་ཁང་གསར་ཞེས་པ་དེ་ལྟར་བྱུང་། སྔོན་བཙན་ཁང་དེར་རྒྱལ་ཆེན་ཤུགས་ལྡན་དང་། བསེ་ཁྲབ་པའི་སྐུ་བརྙན་ཡོད་ལ། སྐུ་གསོལ་ཀྱང་གནང་བ་ཡིན། སྡེ་སྲིད་སངས་རྒྱས་རྒྱ་མཚོ་ཐོག་མར་རི་བོ་ཆོས་གླིང་དུ་ཆོས་བཞུགས་གནང་སྟབས་སྡེ་སྲིད་ཀྱིས་བཙན་ཁང་དེའི་བདག་ཐོབ་རི་བོ་ཆོས་གླིང་ལ་གནང་བས་རི་བོ་ཆོས་གླིང་ནས་གྲྭ་པ་བཅུ་གཅིག་དང་སྐུ་རྟེན་བཅས་གཏོང་བ་གནང་ཏེ་བཙན་ཁང་དེར་བརྟན་བཞུགས་གནང་དགོས། ད་ལྟ་སྔོན་གྱི་བཙན་ཁང་དེར་ཉམས་གསོ་གནང་བའི་ནང་སྔོན་གྱི་སྐུ་བརྙན་དེ་དག་གི་སྐུ་ཚབ་གསར་བཞེངས་གནང་བ་དང་། སྦུག་ཏུ་ལྷ་མགོན་ཆོས་གསུམ་དང་། མདོ་རུ་ཤུགས་ལྡན་གྱི་འཁྲུངས་རབས། གནས་བཅུ་སོགས་ཀྱི་ལྡེབས་རིས་རྙིང་མ་བཅས་མཇལ་རྒྱུ་ཡོད།
ལྷ་ས་གྲོང་ཁུལ་རྙིང་པའི་ལྷོ་ངོས་སུ་﹙རྒྱལ་ཁ་ལམ་གྲོང་ལྷན་ཁོངས་﹚ཡོད་པའི་སྤྲོ་བདེ་ཁང་གསར་ནི་དུས་རབས་བཅུ་བདུན་པའི་ནང་ཏྰ་ལའི་བླ་མ་སྐུ་ཕྲེང་ལྔ་པས་གཟིམ་ཁང་སྤྲུལ་སྐུ་གྲགས་པ་རྒྱལ་མཚན་དྲེགས་པར་བཞེངས་པ་རྡོ་རྗེ་ཤུགས་ལྡན་གྱི་རྟེན་མཁར་དུ་གསར་སྐྲུན་གནང་བའི་བདག་འཛིན་དབང་ཆ་ལྷོ་ཁ་རི་བོ་ཆོས་གླིང་གི་བླ་མ་དོན་གྲུབ་རྒྱ་མཚོར་གནང་བ་ནས་བཟུང་རི་བོ་ཆོས་གླིང་དགོན་ནས་བདག་འཛིན་གྱི་རྒྱུན་དུ་བསྐང་གསོ་བ་མི་གཅིག་ཡོད་པ་དང། རྡོ་རྗེ་ཤུགས་ལྡན་སྐུ་གསོལ་བྱེད་ཅིང། དེའི་ཕྱི་སྒོའི་འགྲམ་གྱི་ཤར་ངོས་སུ་ཡོད་པའི་སྨོན་སྐྱིད་ཁང་གསར་ཞེས་པ་དེ་ཡང་རི་བོ་ཆོས་གླིང་ནས་བདག་པོ་བྱེད་པ་དེར་བཙན་རྒོད་ཁ་ཆེ་དམར་པོ་སོགས་ཁོག་ཞུགས་བྱེད་ཀྱི་ཡོད། སྤྲོ་བདེ་ཁང་གསར་གྱི་འདུ་ཁང་གི་རྒྱལ་སྒོའི་སྟེང་རྒྱ་ཡིག་གི་བན་ཞིག་ཡོད་པ་དེ་ཆིང་རྒྱལ་རབས་ཀྱི་གོང་མ་ཏྰ་སྐང་སྐབས་བོད་བཞུགས་ཨམ་བན་གྱིས་གོང་མར་སྙན་ཞུ་ཕུལ་ཏེ་བཀའ་འཁྲོལ་བྱུང་བ་བཞིན་ཏྰ་ལའི་བླ་མ་སྐུ་ཕྲེང་བཅུ་གཅིག་པ་དང་ཨམ་བན་གཉིས་གཙོ་བཞུགས་ཀྱིས་གནས་ཆུང་སྐུ་བརྟེན་དང་སྤྲོ་བདེ་ཁང་གསར་གྱི་ཆོས་རྗེ་སོ་སོར་ཨམ་བན་ནས་བན་རེ་གནང་ཚུལ་《ཏྰ་ལའི་བླ་མ་སྐུ་ཕྲེང་བཅུ་གཅིག་པའི་རྣམ་ཐར་》ནང་གསལ།
༼དུང་དཀར་ཚིག་མཛོད་ཆེན་མོ་༽ལས་བཏུས།
ÕâÊÇ´úÂë