སྣང་ཞིག་ཅོག་ལོ་དགོན་པ་

རྔ་སྨད་ཅོག་ལོ་དགོན་རྣམ་རྒྱལ་བསམ་གཏན་ནོར་བུའི་གླིང་ནི། སི་ཁྲོན་ཞིང་ཆེན་རྔ་བ་ཁུལ་རྔ་བ་རྫོང་སྟོད་སྨད་བར་གསུམ་དུ་ཕྱེས་པའི་རྔ་བ་སྨད་པའི་ཨ་འཁྱམས་ཡུལ་ཚོའི་ཁོངས་སུ་གཏོགས་ཤིང་། རྫོང་ཐོག་ནས་མར་སྤྱི་ལེ་སུམ་ཅུ་ཙམ་སོང་ཚེ་རྔ་ཀླུང་རིང་མོ་དལ་གྱིས་རྒྱུ་བའི་ཉེ་འགྲམ་དུ་གྲོང་ལས་དགོན་པའི་ཚུལ་དུ་གནས་གཞི་ཆགས་ནས་ཡོད། སྡེ་འདིའི་ཆོས་ལུགས་གྲུབ་མཐའ་ནི། རྣམ་འདྲེན་བརྒྱད་པ་རྒྱལ་བ་གཤེན་རབ་མི་བོས་སྲོལ་བཏོན་པའི་གྲུབ་མཐའི་རྒྱལ་བོ་སངས་རྒྱས་གཡུང་དྲུང་བོན་གྱི་རིང་ལུགས་དྲི་མ་མེད་པ་དེ་ཡིན་ལ། དགོན་སྡེ་འདི་ཕྱག་འདེབས་གནང་མཁན་ནི། སྣང་ཞིག་ཁག་གསུམ་ཞེས་ཡོངས་སུ་གྲགས་པའི་སྣང་ཞིག་དོ་འཕགས་ཆེན་པོ་ལ་སྲས་གསུམ་འཁྲུངས་པ་སྟེ་ཆེ་བ་བྱ་ཆེན། འབྲིང་བ་ལྕགས་མདུད། ཆུང་བ་དངུལ་སྐུ་གསུམ་གྱི་ནང་ཚན་འབྲིང་བ་ལྕགས་མདུད་འདུལ་བ་རྒྱལ་མཚན་ཡིན་ལ། སྤྱི་ལོ1108ལོར་ཕྱག་བཏབ་པ་ཡིན།

ཅོག་ལོ་དགོན་ནམ་ཅོག་ལོ་དགོན་རྣམ་རྒྱལ་བསམ་གཏན་ནོར་བུའི་གླིང་ནི། སྤྱི་ལོ1108ལོར་འདུལ་བ་རྒྱལ་མཚན་གྱིས་ཕྱག་བཏབ་ནས་ད་ལྟའི་བར་དུ་ལོ་ངོས་དགུ་བརྒྱ་ལྷག་འདས་ཡོད། སྔ་མོ་ལྡིང་ཆུ་དང་རྔ་ཆུའི་འདྲེས་མདོར་གསར་བཏབ་གནང་བ་ཡིན་ཡང་། རྗེས་སོར་རྔ་བ་རྫོང་གིས་ཆུ་གློག་འཛུགས་སྐྲུན་བྱས་པའི་རྐྱེན་གྱིས་དགོན་རྙིང་གི་ས་དེར་ཆུ་མཛོད་སྐྲུན་ཡུལ་དུ་ཁེལ་བས་དགོན་པ་ད་ལྟའི་དགོན་སར་གནས་སྤོར་བ་དང་། དེང་སང་དགོན་པའི་སྤྱིའི་རྒྱ་ཁྱོན་སྨི་གྲུ་བཞི་མ་ཁྲི་གཉིས་དང་སྟོང་བཞི་ལྷག་ཡོད། དེའི་ནང་འདུ་ཁང་དང་ལྷ་ཁང་སོགས་ཆོས་རའི་རྒྱ་ཁྱོན་སྨི་གྲུ་བཞི་མ་སྟོང་གསུམ་དང་བཞི་བརྒྱ་ལྷག་ཡོད་ལ། གྲྭ་ཤག་གིས་བཟུང་བའི་ས་སྨི་གྲུ་བཞི་མ་སྟོང་གཉིས་ལྷག་ཡོད། དགོན་འདིའི་ནང་གི་རྟེན་གསུམ་རྩ་ཆེན་གཙོ་བོ་ན་རོ་བའི་རུས་བརྒྱན་ཆ་ཚང་བཞུགས་པ་དང་། གཞན་ཡང་སྐུ་གསུང་ཐུགས་རྟེན་གྲངས་འདས་བཞུགས་ཡོད། དགོན་པ་འདི་ནི་སི་ཁྲོན་ཞིང་ཆེན་རྔ་བ་ཁུལ་རྔ་བ་རྫོང་སྟོད་སྨད་བར་གསུམ་དུ་ཕྱེས་པའི་རྔ་བ་སྨད་པའི་ཨ་འཁྱམས་ཡུལ་ཚོའི་ཁོངས་སུ་གཏོགས་ཤིང་། རྫོང་ཐོག་ནས་མར་སྤྱི་ལེ་སུམ་ཅུ་ཙམ་སོང་ཚེ་རྔ་ཀླུང་རིང་མོ་དལ་གྱིས་རྒྱུ་བའི་ཉེ་འགྲམ་དུ་གྲོང་ལས་དགོན་པའི་ཚུལ་དུ་གནས་གཞི་ཆགས་ནས་ཡོད། སྡེ་འདིའི་ཆོས་ལུགས་གྲུབ་མཐའ་ནི། རྣམ་འདྲེན་བརྒྱད་པ་རྒྱལ་བ་གཤེན་རབ་མི་བོས་སྲོལ་བཏོན་པའི་གྲུབ་མཐའི་རྒྱལ་བོ་སངས་རྒྱས་གཡུང་དྲུང་བོན་གྱི་རིང་ལུགས་དྲི་མ་མེད་པ་དེ་ཡིན་ལ། དགོན་སྡེ་འདི་ཕྱག་འདེབས་གནང་མཁན་ནི། སྣང་ཞིག་ཁག་གསུམ་ཞེས་ཡོངས་སུ་གྲགས་པ་བསྟན་སྤེལ་འགྲོ་ཕན་གྱི་མཛད་བཟང་ཀུན་ལས་འཕགས་པའི་འཁྲུལ་སྣང་དབྱིངས་སུ་ཞིག་པའི་གདུང་རྒྱུད་འཛིན་པ་སྣང་ཞིག་དོ་འཕགས་ཆེན་པོ་ལ་སྲས་གསུམ་འཁྲུངས་པ་སྟེ་ཆེ་བ་བྱ་ཆེན། འབྲིང་བ་ལྕགས་མདུད། ཆུང་བ་དངུལ་སྐུ་གསུམ་གྱི་ནང་ཚན་འབྲིང་བ་ལྕགས་མདུད་འདུལ་བ་རྒྱལ་མཚན་གསོལ་བ་ཁོང་ཉིད་ཡིན། ཁོང་གིས་ཡབ་དོ་འཕགས་ཆེན༼སྤྱི་རྩིས1088ལོར་འཁྲུངས༽པོའི་མདུན་སར་བསྙེན་སྒྲུབ་ལས་གསུམ་གྱི་གྲུབ་པའི་གདེངས་ཚད་མཐོན་པོར་བརྙེས་ཏེ་འབྱུང་བཞི་ལ་རང་དབང་ཐོབ་ཅིང་། རྡོ་ཟན་ལྟར་བཅངས་བ་དང་། ལྕགས་ལ་མདུད་པ་བརྒྱབ་པ་སོགས་ཀྱི་གྲུབ་པའི་རྟགས་མཚན་ཁྱད་པར་ཅན་བརྙེས་པས་སྣང་ཞིག་ལྕགས་མདུད་ཚང་ཞེས་གྲགས་པ་གནམ་འོག་ཏུ་ཁྱབ། རྔ་སྨད་དུ་ཕེབས་ཏེ་ཅོག་ལོའི་རི་ཁྲོད་ཅེས་པར་ཅོག་ལོ་སྒོམ་ཆེན་སྒོམ་ཆུང་གཉིས་ཞེས་གྲགས་པའི་བླ་མ་རྣམ་གཉིས་བཞུགས་པ་ཚུལ་བཞིན་དུ་བླ་མར་བསྟེན་ཏེ་ཟབ་མོའི་བོན་རྣམས་ཞུས་མཐར། སྔོན་གྱི་རི་ཁྲོད་དེར་བརྟེན་ནས་དགོན་གཞི་ཐོག་མར་བཟུང་བ་དང་། གནས་དེར་ལྷ་ཁང་གསེར་ཁང་སོགས་ཁང་ཚན་མང་པོ་གསར་དུ་བཞེངས་ཏེ་བསྟན་འགྲོའི་དོན་ཆེན་མཛད། རྔ་སྨད་དུ་གྲུབ་སྡེ་སེར་འཚོགས་ཀྱི་གཞི་བཙུགས་ཏེ་བླ་བྲང་བཞེངས་པ་ད་ལྟའི་ཨ་མཆོག་ཁང་དམར་ལྷ་ཁང་ཡིན་པར་གྲགས། ཕྱིས་སུ་ཁོང་ཉིད་ཤར་ཁོག་ཨ་གླིང་རྒྱལ་བཙུན་ཡ་ཀི་ཚོ་བཞི་སོགས་ཀྱིས་མཆོད་གནས་སུ་གདན་དྲངས་ཏེ་གདུལ་བྱའི་དོན་རྒྱ་ཆེར་བྱུང་ཞིང་ལྕགས་མདུད་བཀྲ་ཤིས་གཡུང་དྲུང་གླིང་གི་དགོན་སྡེ་ཕྱག་བཏབ་གནང་སྟེ་བསྟན་པའི་རྒྱལ་མཚན་ཕྱར། དེ་ལྟར་སྣང་ཞིག་ལྕགས་མདུད་འདུལ་བ་རྒྱལ་མཚན་ཚང་གིས་རྔ་སྨད་ཅོག་ལོ་དགོན་པ་དང་། ཤར་ཁོག་སྣང་ཞིག་དགོན་པ་སོགས་དགོན་སྡེ་བདེ་སྐྱིད་ཀྱི་གཞི་མ་རེ་རེ་གསར་ཏུ་བཏབ་སྟེ་འགྲོ་དོན་ཕྱོགས་མེད་དུ་མཛད། དགུང་ལོ་བདུན་ཅུའི་ཐོག་བསྟན་པའི་ལས་གཉེར་སྣང་ཞིག་བྱ་ཆེན་རྒྱུད་འཛིན་རིམ་བྱོན་གྱིས་མཛད་དགོས་པའི་ཞལ་ཆེམས་སོགས་བཞག་སྟེ་སྐུ་གཤེགས། དེ་ནས་བཟུང་ད་ལྟའི་བར་ཅོག་ལོ་དགོན་རྣམ་རྒྱལ་བསམ་གཏན་ནོར་བུའི་གླིང་གི་བོན་སྲིད་གཉིས་ཀྱི་ཐུགས་འགན་སྣང་ཞིག་བྱ་ཆེན་གདུང་རབས་རིམ་བྱོན་གྱིས་བཞེས་ཏེ། བསྟན་པའི་ལས་དོན་ཆེ་ཕྲ་ཀུན་ལ་གཟིགས་རྟོག་མཛད་ཅིང་། སྐལ་ལྡན་གདུལ་བྱའི་བློ་ཁ་བོན་ལ་བསྒྱུར་ཏེ་ཚེ་འདིར་བདེ་ཞིང་ཕྱི་མར་སྐྱིད་པའི་རྣམ་དཀར་གྱི་ས་བོན་བླ་ན་མེད་པ་རེ་བསྐྲུན་དང་སྐྲུན་བཞིན་མཆིས།

སྣང་ཞིག་ཅོག་ལོ་རྣམ་རྒྱལ་བསམ་གཏན་ནོར་བུའི་གླིང་འདི་ཉིད་ཐོག་མར་ཕྱག་འདེབས་མཛད་པ་པོ་དང་དེའི་བརྒྱུད་ཁུངས་ཡང་དག་གི་མཛད་རྣམ། གཞན་ཡང་གདུང་རྒྱུད་མིན་པའི་བླ་སྤྲུལ་འགའ་ཞིག་གིས་བསྟན་པ་འདི་ལ་གཅིག་ཏུ་སྨན་པའི་མཛད་བཟང་བསྐྱངས་ཚུལ་སོགས་ཀྱི་སྐོར། སྣང་དགོན་དཀར་ཆག་ཚད་ལྡན་རྣམས་དང་། སྣང་ཞིག་ཅོག་ལོ་དགོན་པའི་བྱུང་བ་མདོ་ཙམ་བརྗོད་པ་རྒྱལ་བསྟན་གསལ་བའི་ཉིན་བྱེད་དད་ལྡན་དྭངས་འདྲེན། སོགས་སུ་གསལ་བས་ཞིབ་པར་མཁྱེན་འདོད་རྣམས་ཀྱིས་དེར་གཟིགས་པར་འཚལ། དེ་ལྟ་བུའི་སྣང་ཞིང་ཅོག་ལོ་དགོན་རྣམ་རྒྱལ་བསམ་གཏན་ནོར་བུའི་གླིང་གི་སྡེ་ཆེན་པོ་འདི་ཉིད་ཀྱང་། ང་ཚོའི་དགོན་སྡེ་སྤྱི་དང་མཐུན་པར་ཕྱིའི་བཀོད་པ་དང་ནང་གི་འཛུགས་སྐྲུན་སོགས་ཀྱི་སྐོར་ཏེ་ལྷ་ཁང་དང་འདུ་ཁང་སོགས་ཀྱིས་མཚོན་སྐུ་གསུང་ཐུགས་རྟེན་མང་པོ་བཞེངས་པ་རྒྱ་ཆེར་བྱས་ཟིན་པ་དག་སྤྱི་རྩིས1958ལོར་དགོན་པའི་རྟེན་དང་བརྟེན་པ་བཅས་ལ་གནོད་པ་ཚབས་ཆེན་ཐེབས་ཏེ་ཡ་ང་བའི་གནས་སུ་གྱུར་ཏེ་དགེ་འདུན་པ་རྣམས་རང་གནས་ནས་སྤྱུགས་ནས། རེ་ཞིག་བོན་སྤྱོད་ཀྱི་སྒྲ་ཙམ་ཡང་ཐོས་སུ་མེད་པའི་ཚད་དུ་བསླེབས་ནའང་། སྤྱི་ལོ1982ལོར་རྒྱལ་བསྟན་གསར་བའི་ཉི་གཞོན་དད་ལྡན་སྐྱེ་འགྲོ་ཡོངས་ཀྱི་མགོན་དུ་ཤར་ཏེ། སྔོན་གྱི་འདུ་ཁང་བླ་བྲང་སོགས་ཉམས་པ་སླར་གསོའི་ཕྱོགས་ལ་འབད་པ་ཆེར་བསྐྱེད་བྱས་པས། ད་ལྟ་དགོན་པའི་ཕྱི་ནང་གི་བཀོད་པ་རྣམས་གང་ལ་གང་འཚམས་རེ་འཛུགས་སྐྲུན་བྱས་དང་བྱེད་མུས་སུ་བླ་གྲྭ་དགེ་འདུན་པ་བརྒྱ་ཕྲག་ལྷག་གིས་སྔོན་སྲོལ་བཟང་པོའི་རྒྱུན་སྐྱོང་བཞིན་པའི་དུས་ལགས་སོ།།

བླ་རབས་རིམ་བྱོན

ཡབ་རྗེ་དོ་འཕགས་ཆེན་པོ་ནས་བརྩིས་ཏེ་དགོན་འདིའི་བླ་རབས་རིམ་བྱོན་གྱི་མཚན་ཙམ་བགྲངས་ན། ༡.སྣང་ཞིག་ཡོན་ཏན་རྒྱལ་མཚན་ནམ་དོ་འཕགས་ཆེན་པོ། ༢.སྣང་ཞིག་ཁག་གསུམ་གྱི་ནང་ཚན་སྲས་འབྲིང་བོ་ལྕགས་མདུད་འདུལ་བ་རྒྱལ་མཚན། ༣.བྱ་ཆེན་གདུང་རབས་ལྷུན་གྲུབ་རྒྱལ་མཚན། ༤.ཀུན་དགའ་རྒྱལ་མཚན། ༥.ནམ་མཁའ་རྒྱལ་མཚན། ༦.ཟླ་བ་རྒྱལ་མཚན། ༧.ཡོན་ཏན་རྒྱལ་མཚན། ༨.ཀུན་དགའ་ལྷུན་གྲུབ། ༩.ཤེས་རབ་རྒྱལ་མཚན། ༡༠.ལྷུན་གྲུབ་རྒྱལ་མཚན། ༡༡.ཤེས་རབ་འོད་ཟེར། ༡༢.ཆགས་མེད་བྱ་བྲལ། ༡༣.བསྟན་པའི་རྒྱལ་མཚན། ༡༤.ཚུལ་ཁྲིམས་རྒྱལ་མཚན། ༡༥.ཡེ་ཤེས་རྒྱལ་མཚན། ༡༦.བསོད་ནམས་རྒྱལ་མཚན། ༡༧.ལྷུན་གྲུབ་དབང་ལྡན། ༡༨.བསྟན་པ་ཚུལ་ཁྲིམས། ༡༩.རིན་ཆེན་ལྷུན་གྲུབ། ༢༠.ཤེས་རབ་རྒྱལ་བ། ༢༡.ནམ་མཁའ་རྒྱལ་མཚན། ༢༢.ཤེས་རབ་དབང་རྒྱལ། ༢༣.ཚེ་དབང་རྒྱལ་མཚན། ༢༤.ཚུལ་ཁྲིམས་དབང་མཆོག ༢༥.བསྟན་པ་ཚུལ་ཁྲིམས། ༢༦.བསྟན་པ་ལྷུན་གྲུབ། ༢༧.ཤེས་རབ་བློ་གྲོས། ༢༨.ཚུལ་ཁྲིམས་རྒྱལ་མཚན། ༢༩.རིན་ཆེན་རྒྱལ་མཚན། ༣༠.གཡུང་དྲུང་བསྟན་པ། ༣༡.བསོད་ནམས་རྒྱལ་མཚན། ༣༢.བསྟན་འཛིན་དབང་རྒྱལ། ༣༣.ཕུན་ཚོགས་རྣམ་རྒྱལ། ༣༤.བློ་གྲོས་ཐོགས་མེད། ༣༥.གཡུང་དྲུང་བསྟན་པའི་ཉི་མ། ༣༦.གྲུབ་དབང་གཡུང་དྲུང་བསྟན་འཛིན། ༣༧.སྣང་སྟོན་ནམ་མཁའ་བློ་གྲོས། ༣༨.སྐྱབས་མཆོག་བསྟན་པ་རབ་རྒྱས། ༣༩.ཚུལ་ཁྲིམས་བསྐལ་བཟང་བློ་གྲོས་རྒྱ་མཚོ་བཅས་སོ།།

བླ་རབས་ཁག་ཅིག་གི་མཛད་རྗེས

གདུང་རབས་ཉེར་བཞི་བ་ཚུལ་ཁྲིམས་དབང་མཆོག་ཚང་གིས། སྟོད་ཀྱི་གྲྭ་ས་གོང་འོག་བར་གསུམ་འགྲིམས་ཏེ་མཁན་སློབ་གོང་མའི་མདུན་ནས་ཟབ་རྒྱས་བོན་གྱི་གདམས་པ་གང་མང་མནོས། རྔ་སྨད་ཅོག་ལོ་དགོན་པའི་རྟེན་དང་བརྟེན་པའི་བཀོད་པ་ཡིད་དུ་འོང་བ་ཞིག་མཛད་དེ་སྔོན་གྱི་རི་ཁྲོད་ཀྱི་མིང་དེ་ཅོག་ལོ་དགོན་རྣམ་རྒྱལ་བསམ་གཏན་ནོར་བུའི་གླིང་ཞེས་པར་བསྒྱུར་ནས་བསྟན་པའི་དོན་ཆེན་བསྒྲུབས། གདུང་རབས་ཉེར་བདུན་པ་ཤེས་རབ་བློ་གྲོས་ཚང་གིས། སྐྱབས་མགོན་ཟླ་བ་རྒྱལ་མཚན་སོགས་མཚན་ལྡན་གྱི་བླ་མ་ཁྱད་པར་ཅན་མང་པོ་རྩ་བའི་བླ་མར་བཀུར་ཏེ་གཞི་ལམ་འབྲས་གསུམ་གྱི་དོན་རྟོགས་ཤིང་། གྲུབ་པའི་གདེངས་ཚད་མཐོན་པོར་བརྙེས། སྤ་བསྟན་རྒྱལ་བ་བཟང་པོའི་དབུ་ཡང་མདོ་སྨད་དུ་གདན་དྲངས་པ་དང་། སྐུ་གདུང་། སྐུ་གཟུགས་གསུང་རབ་སོགས་ཀྱི་བཞེངས་པ་རྒྱ་ཆེར་གནང་། རྣམ་རྒྱལ་བསམ་གཏན་གླིང་གི་དགེ་འདུན་པའི་འཚོ་རྟེན་ནམ་སྤྱི་རྫས་ཕུན་སུམ་ཚོགས་པར་བསགས་ཏེ་རྒྱུན་འཚོགས་ཀྱི་སྲོལ་བཙུགས། གདུང་རབས་ཉེར་དགུ་བ་རིན་ཆེན་རྒྱལ་མཚན་ཚང་གི་སྐུ་རིང་ལ། ཚོ་འདུ་ཚོ་བ་བཅོ་བརྒྱད། བྱ་རྒྱ་ཞར་ཁག་དང་བཅུ་དགུ་ཞེས་གྲགས་པའི་ཡུལ་སྡེ་ཚང་མ་སྐྱབས་འོག་དད་པ་ཅན་གྱི་འབངས་སུ་གྱུར་བ་དང་། དགོན་འདིར་བླ་གྲྭ་སྔགས་བོན་བཅས་སུམ་བརྒྱ་ལྷག་ཙམ་འཕེལ་བར་བཤད། གདུང་རབས་སོ་བཞི་བ་བློ་གྲོས་ཐོགས་མེད་ཚང་། སྐུ་བྱིས་པའི་དུས་ནས་གཞན་དང་མི་འདྲ་བར་དམ་པའི་རང་རྟགས་ལྷན་སྐྱེས་སུ་མངའ་ཞིང་། ཁུ་བོ་རིན་ཆེན་རྒྱལ་མཚན་སོགས་བླ་མ་སྐྱེས་ཆེན་མང་པོའི་ཞབས་ལ་གཏུགས་ཏེ་བོན་ཕྱི་ནང་གསང་གསུམ་གྱི་གདམས་ངག་ཡོངས་སུ་བླངས་ཏེ་མཁའ་དང་གྲུབ་པའི་གོ་འཕང་མངོན་དུ་བརྙེས་དང་དགོན་འདིར་བརྩེ་བས་གཟིགས་པ་མི་ཆུང་བའི་ངོས་ནས་བསྟན་སྤེལ་འགྲོ་འདྲེན་གྱི་འཕྲིན་ལས་བླ་ན་མེད་པའི་བཀའ་འཁོར་རྒྱུན་མི་ཆད་པར་བསྐོར། གདུང་རབས་སོ་ལྔ་བ་གཡུང་དྲུང་བསྟན་པའི་ཉི་མ་ཚང་གི་སྐུ་རིང་ལ། སྔོན་འགྲོ་དངོས་གཞི་སོགས་ཀྱི་ཐབས་ལམ་ལ་བརྟེན་ནས་ཁྱིམ་པ་བ་རྣམས་ལ་ས་ག་ཟླ་བ་འབུམ་འགྱུར་གྱི་དུས་ཚིགས་སུ་སྔོན་འགྲོ་འབུམ་དགུའི་སྒོ་ནས་སྒྲིབ་སྦྱོང་བྱེད་པའི་སྲོལ་བཙུགས། གདུང་རབས་སོ་བདུན་པ་སྣང་སྟོན་ནམ་མཁའ་བློ་གྲོས་ཚང་གི་སྐུ་རིང་ལ། གྲོང་བོན་སེར་ཚོགས་སམ་ཚོ་འདུ་ཟེར་བའི་སྐྱ་མིན་སེར་མིན་དང་། སྔགས་པའི་བསྟན་པ་གཉིས་མཇུག་བསྒྲིལ་པར་མ་ཟད། བར་སྐབས་ཤིག་ལ་བླ་རྟོགས་འགས། ཕྱག་ལེན་ནི། འཕྲིན་ལས་བྲུ་ལུགས། འབུད་རྡུང་གཤེན་ལུགས། བཅའ་བཟོ་སྐྱོང་ལུགས་སོགས་ཆ་མ་ཡ་སྡེབ་ཀྱི་ལུགས་སྲོལ་ངན་པ་དེ་དག་ཚར་བཅད་དེ། ཡང་དག་རྒྱལ་བ་སྨན་རི་བའི་རིང་ལུགས་སམ་དཔལ་ལྡན་བྲུ་ཡི་ཕྱག་སྲོལ་འཁྲུལ་མེད་དུ་བསྒྱུར། གྲྭ་ཚང་ཡང་ཉིས་བརྒྱ་ལྷག་ཙམ་བྱུང་ཞིང་དུས་བབས་བསྟན་པའི་བཀའ་སྲུང་བསྐོས་ཤིང་བསྟན་པ་གཉེར་དུ་གཏད། གདུང་རབས་སོ་བརྒྱད་པ་སྐྱབས་མཆོག་བསྟན་པ་རབ་རྒྱས་ཚང་མདོ་སྔགས་རིག་གནས་དང་བཅས་པར་མཁས་པའི་ཁྲི་འཕང་མཐོར་པོར་བཞེངས། སྤྱི་རྩིས1951ལོར་ཅོག་ལོ་ནས་དབལ་རི་ཐང་གི་གཡས་ཟུར་ཨ་ཟུང་རྩར་དགོན་པ་གནས་སྤོ་མཛད། ས་དེར་སྣང་ཞིག་བླ་བྲང་ངམ་གཟིམ་ཁང་བཞེངས། འདུ་ཁང་ཀ་རིང་བཞི་ཅན་རྟེན་དང་བརྟེན་པ་བཅས་ལེགས་པར་བསྐྲུན།

དུས་མཆོད

ལོ་རེའི་དཔྱིད་ཟླ་དང་བོའི་ཚེས་ལྔའི་ཉིན་ནས་ཚེས་བཅུ་དྲུག་གི་བར་དུ་སྨོན་ལམ་ཆེན་མོ་ཚོགས་པ་དང་། དེའི་བར་གྱི་ཚེས་ལྔ་ཉིན་མཉམ་མེད་གཤེན་རབ་རྒྱལ་མཚན་གྱི་གོས་སྐུ་ཆེན་མོ་བཤམས་པ། ཚེས་བཅུ་གསུམ་ཉིན་འཆམ་འཆང་བ། ཚེས་བཅུ་བཞི་ཉིན་དགེ་བསྐོས་བརྗེ་བ་བཅས་དང་། ཟླ་བ་བཞི་བའི་ཚེས་བཅུ་གཅིག་ཉིན་ནས་ཚེས་བཅུ་བདུན་གྱི་བར་དུ་རྣམ་རྒྱལ་སྟོང་མཆོད་མཛད་པ། ཟླ་བ་ལྔ་བའི་ནང་རི་བསང་བྱེད་པ། ཟླ་བ་དྲུག་པའི་ཚེས་བཅོ་ལྔ་ཉིན་ནས་ཟླ་བ་བདུན་པའི་ཚེས་ཉེར་དགུའི་བར་དུ་དབྱར་གནས་ཚོགས་པ། ཟླ་བརྒྱད་པའི་ནང་བཟང་སྤྱོད་དང་ཆོ་ག་བཅུ་གཉིས་འདོན་པ། ཟླ་བ་བཅུ་གཅིག་པའི་ནང་གཟའ་འཁོར་གཅིག་གི་རིང་དུ་དབལ་སེ་སྒྲུབ་པ། ཟླ་བ་བཅུ་གཉིས་པའི་ནང་གཏོར་རྒྱག་བྱེད་པའོ། །

ལྷ་སྡེ

ཅོག་ལོ་དགོན་པའི་ལྷ་སྡེ་གཙོ་བོ་ཨ་འཁྱམ་ཡུལ་ཚོའི་གྲོང་ངན་གྲོང་ཚོའི་（དེང་སང་གི་སྣ་སྐོར་གྲོང་ཚོ་ཡིན）དུད་ཁྱིམ་དོན་དྲུག་ལྷག་ཡོད།