སྡོམ་གསུམ་རབ་དབྱེ་

རྡོ་རྗེ་ཐེག་པའི་ལམ་ཞུགས་ཏེ།།མྱུར་དུ་སངས་རྒྱས་ཐོབ་འདོད་ན།།སྨིན་གྲོལ་གཉིས་ལ་འབད་པར་བྱ།།སྨིན་པར་བྱེད་པའི་དབང་བསྐུར་ཡང་།།བླ་མ་བརྒྱུད་པ་མ་ཉམས་ཤིང་།།ཆོ་ག་འཁྲུགས་པར་མ་གྱུར་པ།།ཕྱི་ནང་རྟེན་འབྲེལ་བསྒྲིག་མཁྱེན་ཅིང་།།སྐུ་བཞིའི་ས་བོན་ཐེབས་ནུས་པ།།སངས་རྒྱས་གསུང་བཞིན་མཛད་པ་ཡི།།བླ་མ་བཙལ་ལ་དབང་བཞི་བླང་།།དེ་ཡིས་སྡོམ་པ་སུམ་ལྡན་འགྱུར།།དེང་སང་རྡོ་རྗེ་ཕག་མོ་ཡི།།བྱིན་རླབས་དབང་བསྐུར་ཡིན་ཞེས་ཟེར།།འདི་ཡིས་ཆོས་ཀྱི་སྒོ་ཕྱེ་ནས།།གཏུམ་མོ་ལ་སོགས་བསྒོམ་པ་མཐོང་།།འདི་འདྲ་རྒྱུད་སྡེ་ལས་མ་གསུངས།།བསྟན་བཅོས་རྣམས་ལས་བཤད་པ་མེད།།རྡོ་རྗེ་ཕག་མོ་ཉིད་ལས་ཀྱང་།།དབང་བསྐུར་ཐོབ་ཅིང་དམ་ཚིག་ལྡན།།དེ་ལ་བྱིན་རླབས་བྱ་ཞེས་གསུངས།།དབང་བསྐུར་མེད་ལ་བྱིན་རླབས་བཀག།དཔེར་ན་མུ་ཟིའི་བཅུད་ལེན་འཇུ།།དེ་ནས་དངུལ་ཆུ་བཟའ་བར་གསུངས།།མུ་ཟི་ཐོག་མར་མ་བསྟེན་པར།།དངུལ་ཆུ་ཟོས་ན་འཆི་བ་ལྟར།།དེ་བཞིན་ཐོག་མར་དབང་བསྐུར་བླང་།།དེ་ནས་རྡོ་རྗེ་ཕག་མོ་སྦྱིན།།དབང་བསྐུར་མེད་པར་བྱིན་བརླབས་ན།།དམ་ཚིག་ཉམས་པར་ཐུབ་པས་གསུངས།།རྡོ་རྗེ་ཕག་མོའི་བྱིན་རླབས་ལ།།སྡོམ་པ་གསུམ་ལྡན་བྱར་མི་རུང་།།ཕྱི་ནང་རྟེན་འབྲེལ་འགྲིག་མི་འགྱུར།།སྐུ་བཞིའི་ས་བོན་ཐེབས་མི་ནུས།།དེ་ཕྱིར་འདི་ནི་བྱིན་རླབས་ཙམ།།ཡིན་གྱི་སྨིན་པར་བྱེད་པ་མིན།།དེས་ན་ཐུབ་པས་རྒྱུད་སྡེ་ལས།།དཀྱིལ་འཁོར་ཆེན་པོ་མ་མཐོང་བའི།།མདུན་དུ་འདི་ནི་མ་སྨྲ་ཞིག།སྨྲས་ན་དམ་ཚིག་ཉམས་ཞེས་གསུངས།།འགའ་ཞིག་འདི་ལའང་ཕག་མགོ་ལ།།སོགས་པའི་དབང་བསྐུར་ཡོད་ཅེས་ཟེར།།དེ་འདྲ་དབང་བསྐུར་ཉིད་མ་ཡིན།།རྒྱུད་སྡེ་ཀུན་ལས་འདི་མ་གསུངས།།གལ་ཏེ་བརྒྱ་ལ་གསུངས་སྲིད་ཀྱང་།།རྗེས་གནང་ཡིན་གྱི་དབང་བསྐུར་མིན།།ལ་ལ་རྡོ་རྗེ་ཕག་མོ་ལ།།སྡོམ་པ་འབོགས་པའི་ཆོ་ག་དང་།།དཀྱིལ་འཁོར་དང་ནི་དབང་བསྐུར་སོགས།།རང་བཟོའི་ཆོ་ག་བྱེད་པ་ཐོས།།རང་བཟོས་ཆོ་གར་འགྱུར་མི་སྲིད།།ཆོ་ག་སངས་རྒྱས་སྤྱོད་ཡུལ་ཡིན།།ཁྱིམ་པས་གསོལ་བཞིའི་ལས་བྱས་ཀྱང་།།དགེ་སློང་སྡོམ་པ་མི་འཆགས་ལྟར།།རྡོ་རྗེ་ཕག་མོའི་བྱིན་རླབས་ལ།།སྡོམ་པ་ཕོག་ཀྱང་འཆགས་མི་འགྱུར།།ཆོ་ག་ཅུང་ཟད་ཉམས་པ་ལའང་།།ཆོ་ག་འཆགས་པར་མ་གསུངས་ན།།ཆོ་ག་ཕལ་ཆེར་ཉམས་པ་ལ།།ཆོ་ག་འཆགས་པར་འགྱུར་རེ་སྐན།།དེས་ན་འཆད་པའི་གནས་སྐབས་སུ།།ཅུང་ཟད་ནོར་བར་གྱུར་ཀྱང་བླའི།།ཆོ་ག་ནོར་བར་གྱུར་པ་ལ།།གྲུབ་པ་ནམ་ཡང་མེད་པར་གསུངས།།གཞན་ཡང་ཕག་མོའི་བྱིན་རླབས་ལ།།གསང་སྔགས་ཆོས་སྒོར་བྱེད་པ་ནི།།རྒྱུད་སྡེ་གང་ནའང་བཤད་པ་མེད།།དེ་བས་དགེ་སློང་བྱེད་པ་ལ།།རང་བྱུང་གི་ནི་བསྙེན་རྫོགས་དང་།།ཡེ་ཤེས་ཁོང་དུ་ཆུད་པ་དང་།།ཕྲིན་གྱིས་བསྙེན་པར་རྫོགས་པ་དང་།།དེ་བཞིན་སྟོན་པར་ཁས་བླངས་དང་།།ཚུར་ཤོག་ལ་སོགས་བསྙེན་རྫོགས་བླང་།།འཁྲུལ་པ་ཡིན་པ་མཉམ་པོ་ལ།།འདི་རྣམས་སྔོན་གྱི་ཆོ་གར་བཤད།།དེས་ན་ཉན་ཐོས་ཐེག་པ་ནི།།ནུབ་ཀྱང་གཟུགས་བརྙན་ཙམ་ཞིག་སྣང་།།རྡོ་རྗེ་ཐེག་པའི་བསྟན་པ་ལ།།གཟུགས་བརྙན་ཙམ་ཡང་མི་སྣང་ངོ་།།བླུན་པོ་སྙིང་ཕོད་ཅན་གྱིས་ཀྱང་།།འདུལ་བའི་ཆོ་ག་བརྒལ་མི་ནུས།།གསང་སྔགས་ཆོ་ག་ཐམས་ཅད་ལ།།བླུན་པོ་རྣམས་ཀྱིས་རང་བཟོར་སྤྱོད།།དཔེར་ན་རབ་བྱུང་གང་ཟག་ནི།།གསུམ་ལས་མང་བ་འཇུག་མི་ནུས།།སྔགས་ཀྱི་དབང་བསྐུར་བྱེད་པ་ན།།གྲངས་ངེས་མེད་པར་དབང་སྐུར་བྱེད།།འདི་ནི་རྡོ་རྗེ་འཆང་གིས་བཀག།སྤྱོད་པའི་རྒྱུད་ཀྱི་དབང་བསྐུར་ལ།།སློབ་མ་གྲངས་ངེས་མེད་པར་གསུངས།།ལྷག་མ་དམིགས་བསལ་མཛད་པ་ཡི།།སློབ་མ་ལ་ནི་གྲངས་ངེས་ཡོད།།འདི་ནི་གསང་བ་སྤྱི་རྒྱུད་ལས།།མཁས་པས་སློབ་མ་གཅིག་གམ་གསུམ།།ལྔ་འམ་ཡང་ན་བདུན་དག་གམ།།ཉི་ཤུ་རྩ་ནི་ལྔ་ཡི་བར།།ཟུང་དུ་མ་གྱུར་སློབ་མ་གཟུང་།།དེ་བས་ལྷག་པའི་སློབ་མ་ནི།།ཡོངས་སུ་གཟུང་བར་མི་ཤེས་སོ།།ཞེས་གསུངས་འདི་ནི་ཀུན་ལ་འཇུག།དེ་བས་ལྷག་པའི་སློབ་མ་ལ།།ཆོ་ག་ཡོངས་སུ་རྫོགས་པ་ནི།།མཚན་མོ་གཅིག་ལ་ཚར་མི་ནུས།།དེ་ཡི་མཚན་མོར་མ་ཚར་ན།།ཆོ་ག་ཉམས་པར་འགྱུར་བར་གསུངས།།དེ་ཡང་གསང་བ་སྤྱི་རྒྱུད་ལས།།ལྷ་ཡང་ཉི་མ་ནུབ་པ་ན།།ངེས་པར་བྱིན་གྱིས་རླབས་ཀྱིས་འདུ།།ཉི་མ་ཤར་བར་མ་གྱུར་བར།།མཆོད་ནས་གཤེགས་སུ་གསོལ་བ་ཤིས།།འདི་ནི་བྱ་བའི་རྒྱུད་ཡིན་པས།།གཞན་གྱི་ཆོ་ག་མིན་སྙམ་ན།།གཞན་རྣམས་ཀུན་ལའང་འདི་འཇུག་པར།།སྤྱི་རྒྱུད་ཉིད་ལས་འདི་སྐད་གསུངས།།གང་དུ་ལས་ནི་ཡོད་གྱུར་ལ།།ལས་ཀྱི་ཆོ་ག་རྣམས་མེད་པ།།དེར་ནི་སྤྱི་ཡི་རྒྱུད་དག་ལས།།གསུངས་པའི་ཆོ་ག་མཁས་པས་བསྟེན།།དེ་སྐད་གསུངས་ཕྱིར་ཆོ་ག་འདི།།རྒྱུད་རྣམས་ཀུན་ལ་འཇུག་པ་ཡིན།།དེང་སང་བྱིན་རླབས་མི་བྱེད་ཅིང་།།དབང་སྐུར་བྱེད་པ་ཁ་ཅིག་ཀྱང་།།རྫོགས་སངས་རྒྱས་ཀྱིས་གསུངས་པ་ཡི།།དཀྱིལ་འཁོར་ཆོ་ག་མི་བྱེད་པར།།གཡུང་དྲུང་རིས་ཀྱི་དཀྱིལ་འཁོར་དང་།།ནས་འདྲ་ལ་སོགས་བྱེད་པ་ཐོས།།འདི་འདྲ་དག་ཏུ་དབང་བསྐུར་ཡང་།།སྡོམ་པ་ཐོབ་པར་མི་འགྱུར་རོ།།དེ་ཡི་རྒྱུ་མཚན་བཤད་ཀྱིས་ཉོན།།ཕྱི་དང་ནང་གི་རྟེན་འབྲེལ་གྱི།།སྟོབས་ཀྱིས་དཀྱིལ་འཁོར་འབྱུང་བ་ཡིན།།འདི་ལ་རྟེན་འབྲེལ་བསྒྲིག་མི་ནུས།།དེས་ན་སངས་རྒྱས་རྣམས་ཀྱིས་བཀག།དབང་བསྐུར་བྱེད་པ་ཕལ་ཆེར་ཡང་།།སློབ་མ་བརྒྱ་སྟོང་གྲངས་མེད་ལ།།སྦྱོར་དངོས་རྗེས་ཀྱི་ཆོ་ག་རྣམས།།སངས་རྒྱས་གསུངས་བཞིན་མི་ཤེས་པར།།མ་འབྲེལ་འགལ་ཞིང་ཉམས་པ་ཡི།།ཆོ་གའི་གཟུགས་བརྙན་བྱེད་པ་ལ།།དབང་བསྐུར་ཡིན་ཞེས་བླུན་པོ་སྨྲ།།དེ་ཡི་ལུས་ངག་ཡིད་གསུམ་གྱི།།རྣམ་པ་གདོན་གྱིས་བསྒྱུར་བ་ལ།།བྱིན་རླབས་ཡིན་པར་འཁྲུལ་པ་མང་།།དཔལ་ལྡན་དམ་པ་དང་པོ་ལས།།ཆོ་ག་ཉམས་པའི་བྱིན་རླབས་ཀུན།།བགེགས་ཀྱིས་ཡིན་པར་རྒྱལ་བས་གསུངས།།ཆོ་ག་དག་པར་གྱུར་པ་ལས།།བྱུང་བ་སངས་རྒྱས་བྱིན་རླབས་ཡིན།།དབང་བསྐུར་མེད་ཀྱང་ལམ་ཟབ་མོ།།བསྒོམས་ན་སངས་རྒྱས་འགྲུབ་སྙམ་ན།།དབང་བསྐུར་མེད་པར་ལམ་ཟབ་མོ།།བསྒོམ་པ་ངན་འགྲོའི་རྒྱུ་རུ་གསུངས།།ཕྱག་རྒྱ་ཆེན་པོ་ཐིག་ལེ་ལས།།དབང་མེད་ན་ནི་དངོས་གྲུབ་མེད།།བྱེ་མ་བཙིར་ཡང་མར་མེད་བཞིན།།གང་ཞིག་རྒྱུད་ལུང་ང་རྒྱལ་གྱིས།།དབང་བསྐུར་མེད་པར་འཆད་བྱེད་པ།།སློབ་དཔོན་སློབ་མ་ཤི་མ་ཐག།དངོས་གྲུབ་ཐོབ་ཀྱང་དམྱལ་བར་སྐྱེ།།དེ་བས་འབད་པ་ཐམས་ཅད་ཀྱིས།།བླ་མ་ལས་ནི་དབང་ནོད་ཞུ།།ཞེས་གསུངས་རྒྱུད་སྡེ་གཞན་ལས་ཀྱང་།།དེ་ལྟར་གསུངས་ཕྱིར་འབད་པར་བྱ།།ཁ་ཅིག་གང་ཟག་དབང་པོ་རབ།།སྨིན་བྱེད་ཕག་མོའི་བྱིན་རླབས་ཡིན།།འབྲིང་དང་ཐ་མ་དག་ལ་ནི།།དབང་བསྐུར་ཆོ་ག་དགོས་ཞེས་ཟེར།།གང་ཟག་རབ་འབྲིང་གསུམ་ཀ་ལ།།ཕག་མོའི་བྱིན་རླབས་སྨིན་བྱེད་དུ།།རྒྱུད་སྡེ་ཀུན་ལས་གསུངས་པ་མེད།།འཕགས་པ་རྣམས་ཀྱིས་གང་ཟག་རབ།།སྤྲུལ་པ་ཡི་ནི་དཀྱིལ་འཁོར་དུ།།དབང་བསྐུར་མཛད་ཅེས་གསུངས་པ་ནི།།སྔོན་གྱི་ཆོ་ག་འཕགས་པའི་ཡིན།།དེང་སང་གང་ཟག་རབ་འབྲིང་ཀུན།།རྡུལ་ཚོན་གྱི་ནི་དཀྱིལ་འཁོར་དུ།།དབང་བསྐུར་བྱ་བར་གསུངས་མོད་ཀྱི།།གཞན་གྱི་སྨིན་བྱེད་རྒྱུད་ལས་བཀག།ལ་ལ་སེམས་བསྐྱེད་བྱས་པ་ལ།།གསང་སྔགས་བསྒོམ་དུ་འདོད་ཅེས་ཟེར།།འདི་ནི་སྔགས་ཀྱི་འཁྲུལ་ཡིན་ལོ།།འདི་ཡང་ཕྱེ་སྟེ་བཤད་ཀྱིས་ཉོན།།བྱ་བའི་རྒྱུད་ལ་རྣམ་གསུམ་ཡོད།།དོན་ཡོད་ཞགས་སོགས་འགའ་ཞིག་ལ།།དབང་བསྐུར་སེམས་བསྐྱེད་མ་ཐོབ་ཀྱང་།།སྨྱུང་གནས་ལ་སོགས་བྱེད་ནུས་ན།།གང་ཟག་ཀུན་གྱིས་བསྒྲུབ་པར་གསུངས།།དམ་ཚིག་གསུམ་བཀོད་ལ་སོགས་པ།།འཇུག་པ་སེམས་བསྐྱེད་ཐོབ་ནས་ནི།།འཕྲིན་ལས་འགའ་ཞིག་བསྒྲུབ་པའི་ཕྱིར།།ཆོ་ག་ཤེས་ན་བསྒྲུབ་པར་གནང་།།ལེགས་པར་གྲུབ་པ་ཡན་ཆད་དུ།།རང་གི་དབང་བསྐུར་མ་ཐོབ་ན།།སེམས་བསྐྱེད་ཐོབ་ཀྱང་གསང་སྔགས་བཀག།དེ་ཡང་ལེགས་པར་གྲུབ་པ་ལས།།དབང་བསྐུར་མ་བྱས་པ་དག་ལ།།ཆོ་ག་ཤེས་པས་སྔགས་མི་སྦྱིན།།ཞེས་སོགས་རྒྱས་པར་གསུངས་ལ་ལྟོས།།ལྷག་མ་རྒྱུད་སྡེ་གསུམ་པོ་ལ།།དབང་བསྐུར་ཐོབ་པ་མ་གཏོགས་པ།།སེམས་བསྐྱེད་ཙམ་ལ་བརྟེན་པ་ཡི།།ཡི་དམ་བསྒོམ་པ་གསུངས་པ་མེད།།དབང་བསྐུར་ནང་གི་རྟེན་འབྲེལ་ཡིན།།སེམས་བསྐྱེད་ལ་ནི་རྟེན་འབྲེལ་མེད།།དེས་ན་སེམས་བསྐྱེད་བྱས་ན་ཡང་།།གསང་སྔགས་ཟབ་མོ་བསྒོམ་པ་ལ།།ལྟུང་བ་ཡོད་པར་རྒྱལ་བས་གསུངས།།དེ་ཕྱིར་རྣམ་དབྱེ་ཤེས་དགོས་སོ།།གཏོར་མའི་དབང་བསྐུར་ཞེས་བྱ་དང་།།ཏིང་ངེ་འཛིན་གྱི་དབང་བསྐུར་ཡང་།།སློབ་མ་སྨིན་བྱེད་ཆོ་ག་རུ།།རྒྱུད་སྡེ་ཀུན་ལས་གསུངས་པ་མེད།།འགའ་ཞིག་གསང་སྔགས་ད་ལྟ་སྤྱོད།།དབང་བསྐུར་ཕྱི་ནས་ཁས་ལེན་བྱེད།།འདི་ཡང་སངས་རྒྱས་བསྟན་པ་མིན།།དབང་མ་ཐོབ་ལ་ཆོས་བཤད་ན།།སློབ་དཔོན་ལྟུང་བ་ཅན་འགྱུར་ཞིང་།།སློབ་མའང་སྔོན་དུ་ཉམས་པར་འགྱུར།།ཉམས་པར་གྱུར་པ་དམ་ཆོས་ཀྱི།།སྣོད་མིན་ཞེས་ནི་རྒྱལ་བས་གསུངས།།མདོར་ན་ཆོས་ཀྱིས་ཅི་བྱེད་སོམས།།སངས་རྒྱས་བྱེད་ན་ཆོས་བཞིན་གྱིས།།ལ་ལ་སེམས་ཉིད་མ་རྟོགས་ན།།དབང་བསྐུར་ཐོབ་ཀྱང་མི་ཕན་ཟེར།།གལ་ཏེ་སེམས་ཉིད་རྟོགས་གྱུར་ན།།དབང་བསྐུར་བྱ་ཡང་མི་དགོས་ལོ།།འོ་ན་སེམས་ཉིད་མ་རྟོགས་ན།།སྡོམ་པ་བསྲུངས་ཀྱང་ཅི་ཞིག་ཕན།།གལ་ཏེ་སེམས་ཉིད་རྟོགས་གྱུར་ན།།སྡོམ་པ་བསྲུང་ཡང་ཅི་ཞིག་དགོས།།རྡོ་རྗེ་ཕག་མོའི་བྱིན་རླབས་ཀྱང་།།སེམས་ཉིད་རྟོགས་ན་བྱ་ཅི་དགོས།།གལ་ཏེ་སེམས་ཉིད་མ་རྟོགས་ན།།བྱིན་རླབས་བྱས་ཀྱང་ཅི་ཞིག་ཕན།།དེ་བཞིན་སེམས་བསྐྱེད་ལ་སོགས་པ།།ཆོ་ག་ཀུན་ལ་ཚུལ་འདི་མཚུངས།།དེས་ན་རབ་བྱུང་སྡོམ་པ་དང་།།རྡོ་རྗེ་ཕག་མོའི་བྱིན་རླབས་དང་།།སེམས་བསྐྱེད་འབད་ནས་བྱེད་བཞིན་དུ།།དབང་བསྐུར་མི་དགོས་ཞེས་སྨྲ་བ།།གསང་སྔགས་སྤོང་བའི་གསང་ཚིག་ཡིན།།ཁ་ཅིག་ཆོ་ག་མེད་བཞིན་དུ།།བླ་མའི་ལུས་ཀྱི་དཀྱིལ་འཁོར་ལས།།དབང་བཞི་རྫོགས་པར་ལེན་ཞེས་ཟེར།།འོ་ན་དགེ་ཚུལ་དགེ་སློང་ཡང་།།བླ་མའི་སྐུ་ལས་ཅིས་མི་ལེན།།སེམས་བསྐྱེད་ཀྱང་ནི་བླ་མ་ཡི།།སྐུ་ཉིད་ལས་ནི་ཐོབ་པའི་ཕྱིར།།སེམས་བསྐྱེད་ཆོ་ག་ཅི་ཞིག་དགོས།།རྡོ་རྗེ་ཕག་མོའི་བྱིན་རླབས་ཀྱང་།།བླ་མའི་སྐུ་ལས་ཐོབ་པའི་ཕྱིར།།ཆོས་སྒོ་བ་ལས་བླང་ཅི་དགོས།།དེ་བཞིན་ཆོ་ག་ཐམས་ཅད་ཀྱང་།།བླ་མའི་སྐུ་ལས་བླངས་པས་ཆོག།རྫོགས་སངས་རྒྱས་ཀྱིས་གསུངས་པ་ཡི།།ཆོ་ག་ཟབ་མོ་ཐམས་ཅད་སྤོངས།།གལ་ཏེ་ཆོ་ག་ཉམས་གྱུར་ན།།སོ་སོར་ཐར་དང་སེམས་བསྐྱེད་ཀྱི།།སྡོམ་པ་འཆགས་པར་མི་འགྱུར་ཞིང་།།རྡོ་རྗེ་ཕག་མོ་ལ་སོགས་པའི།།བྱིན་རླབས་འཇུག་པར་མི་འགྱུར་ན།།རིག་འཛིན་སྔགས་ཀྱི་སྡོམ་པ་ཡང་།།དབང་བསྐུར་མེད་ན་ཐོབ་མི་ནུས།།དེས་ན་ཆོ་ག་གཞན་དག་ལ།།འབད་པ་ཆེན་པོ་བྱེད་བཞིན་དུ།།དབང་བསྐུར་ཆོ་ག་འདོར་བྱེད་པ།།ཐབས་ལ་སླུ་བའི་བདུད་ཡོད་ཅེས།།གསུངས་པ་འདིར་ཡང་དྲན་པར་བྱ།།དེ་ཕྱིར་དམ་པའི་དོན་དུ་ན།།ཆོས་རྣམས་ཐམས་ཅད་སྤྲོས་བྲལ་ཡིན།།དེ་ལ་ཆོ་ག་གང་ཡང་མེད།།སངས་རྒྱས་ཉིད་ཀྱང་ཡོད་མིན་ན།།ཆོ་ག་གཞན་ལྟ་སྨོས་ཅི་དགོས།།རྒྱུ་དང་ལམ་དང་འབྲས་བུ་ཡི།།དབྱེ་བ་ཐམས་ཅད་ཀུན་རྫོབ་ཡིན།།སོ་སོར་ཐར་དང་བྱང་ཆུབ་སེམས།།དབང་བསྐུར་ལ་སོགས་ཆོ་ག་དང་།།བསྒོམ་པའི་དམིགས་པ་ཇི་སྙེད་དང་།།རྟེན་འབྲེལ་ཟབ་མོ་ཐམས་ཅད་དང་།།ས་དང་ལམ་གྱི་དབྱེ་བ་དང་།།རྫོགས་པའི་སངས་རྒྱས་ཐོབ་པ་ཡང་།།ཀུན་རྫོབ་ཡིན་གྱི་དོན་དམ་མིན།།དེ་འདྲའི་དབྱེ་བ་ཤེས་ནས་ནི།།ཆོ་ག་བྱེད་ན་ཐམས་ཅད་ཀྱིས།།མིན་ན་ཐམས་ཅད་དོར་བར་བྱོས།།ཆོ་ག་ལ་ལ་དགོས་བཞིན་དུ།།ལ་ལའི་ཆོ་ག་མི་དགོས་ཞེས།།སྨྲ་བ་མཁས་པའི་བཞད་གད་གནས།།སངས་རྒྱས་བསྟན་པའང་དཀྲུགས་པ་ཡིན།།བདུད་ཀྱི་བྱིན་རླབས་ཞེས་བྱ་བའང་།།འདི་འདྲའི་རིགས་ཅན་ཡིན་པར་གསུངས།།ཁ་ཅིག་བྱ་བའི་རྒྱུད་སོགས་ལའང་།།དབང་བཞིའི་ཆོ་ག་བྱེད་པ་དང་།།དོན་ཡོད་ཞགས་པ་ལ་སོགས་ལའང་།།རིམ་གཉིས་སྒོམ་པར་བྱེད་པ་ཐོས།།འདི་ཡང་སངས་རྒྱས་དགོངས་པ་མིན།།དེ་ཡི་རྒྱུ་མཚན་འདི་ལྟར་ཡིན།།བྱ་སྤྱོད་རྣལ་འབྱོར་རྒྱུད་གསུམ་ཀར།།དབང་བཞི་དང་ནི་རིམ་གཉིས་མེད།།གལ་ཏེ་ཡོད་ན་དེ་དག་ཀྱང་།།རྣལ་འབྱོར་ཆེན་པོ་ཉིད་དུ་འགྱུར།།དབང་བཞི་དང་ནི་རིམ་པ་གཉིས།།རྣལ་འབྱོར་ཆེན་པོའི་ཁྱད་ཆོས་ཡིན།།གྲུབ་མཐའི་རྣམ་དབྱེ་མི་ཕྱེད་ཅིང་།།རྒྱུད་སྡེའི་རིམ་པ་མི་ཤེས་པར།།རྣམ་གཞག་ལེགས་ལེགས་འདྲ་ན་ཡང་།།ལྷམ་དཔེ་ཞྭ་ལ་བཀབ་པ་ཡིན།།དེས་ན་རྒྱུད་སྡེ་བཞི་པོ་ཡི།།དབང་དང་ལམ་གྱི་དབྱེ་བ་ལ།།མི་འདྲའི་དབྱེ་བ་རྣམ་བཞི་ཡོད།།རང་རང་ཆོ་ག་བཞིན་བྱས་ན།།དེ་ནས་གསུངས་པའི་དངོས་གྲུབ་འབྱུང་།།ལ་ལ་དབང་བསྐུར་མ་བྱས་ཀྱང་།།གལ་ཏེ་སྔགས་ལ་མོས་ཐོབ་ན།།དེ་ཉིད་ཆོས་ཀྱི་སྒོ་ཡིན་པས།།གསང་སྔགས་བསྒོམ་དུ་རུང་ཞེས་ཟེར།།འོ་ན་སྡོམ་པ་མ་ཐོབ་ཀྱང་།།རབ་ཏུ་འབྱུང་ལ་མོས་པ་ཉིད།།སྡོམ་པ་ལེན་པའི་སྒོ་ཡིན་པས།།སྡོམ་པ་བསྲུངས་པས་ཆོག་གམ་ཅི།།སེམས་བསྐྱེད་སྡོམ་པ་མ་ཐོབ་ཀྱང་།།སེམས་བསྐྱེད་པ་ལ་མོས་པ་ཉིད།།བྱང་ཆུབ་སྤྱོད་པའི་སྒོ་ཡིན་པས།།སེམས་བསྐྱེད་བླང་ཡང་ཅི་ཞིག་དགོས།།དེ་བཞིན་སོ་ནམ་མ་བྱས་ཀྱང་།།ལོ་ཐོག་ལ་ནི་མོས་པ་ཉིད།།བཟའ་རྒྱུ་ཟ་བའི་སྒོ་ཡིན་པས།།སོ་ནམ་ལ་ཡང་འབད་ཅི་དགོས།།འདི་འདྲའི་རིགས་ཀྱི་ཆོས་ལུགས་ཀུན།།དེ་འདྲའི་རིགས་ཀྱིས་སུན་དབྱུང་ངོ་།།དེས་ན་ཆོས་སྒོ་ཞེས་བྱ་བ།།འདི་ཡི་མིང་གིས་འཁྲུལ་གཞི་བྱས།།དབང་བསྐུར་ཆོས་སྒོ་ཙམ་ཡིན་གྱི།།འཚང་རྒྱ་བ་ཡི་ཆོས་གཞན་ཞིག།བསྒོམ་རྒྱུ་ལོགས་ན་ཡོད་དོ་ཞེས།།བླུན་པོ་རྣམས་ཀྱིས་མུན་བསྒོམ་བྱས།།འོ་ན་དགེ་སློང་སྡོམ་པ་ཡང་།།དགེ་སློང་བྱེད་པའི་སྒོ་ཡིན་གྱི།།དགེ་སློང་སྡོམ་པའི་ངོ་བོ་ཞིག།གཞན་ནས་བཙལ་དུ་ཡོད་དམ་ཅི།།དེ་བཞིན་སོ་ནམ་བྱེད་པ་ཡང་།།སྟོན་ཐོག་འབྱུང་བའི་སྒོ་ཡིན་གྱི།།ཁ་ཟས་འབྱུང་བའི་ཐབས་གཞན་ཞིག།ལོགས་ནས་བཙལ་དུ་ཡོད་དམ་ཅི།།དེས་ན་སྙིང་གཏམ་འདི་ལྟར་ཡིན།།དབང་བསྐུར་ཆོས་སྒོ་ཙམ་མ་ཡིན།།གསང་སྔགས་རྟེན་འབྲེལ་ལམ་བྱེད་པས།།རྟེན་འབྲེལ་བསྒྲིག་པའི་གདམས་ངག་ཡིན།།ཕུང་པོ་ཁམས་དང་སྐྱེ་མཆེད་ལ།།སངས་རྒྱས་ས་བོན་བཏབ་ནས་ནི།།ཚེ་འདིར་སངས་རྒྱས་བྱེད་པ་ཡི།།ཐབས་ལ་དབང་བསྐུར་ཞེས་སུ་བཏགས།།དེས་ན་གང་ཟག་དབང་པོ་རབ།།དབང་བསྐུར་ཉིད་ཀྱིས་གྲོལ་བར་གསུངས།།དབང་གིས་གྲོལ་བར་མ་ནུས་པའི།།གང་ཟག་གཞན་ལ་བསྒོམ་དགོས་སོ།།དེས་ན་དབང་བསྐུར་ཐོབ་པ་དེ།།བསྲུང་ཞིང་འཕེལ་བར་བྱེད་པ་ལ།།བསྒོམ་པ་ཞེས་སུ་བཏགས་པ་ཡིན།།དེ་ཕྱིར་ཕ་རོལ་ཕྱིན་པ་ལ།།སེམས་བསྐྱེད་མིན་པའི་ཆོས་གཞན་མེད།།རྡོ་རྗེ་ཐེག་པའི་སྒོར་ཞུགས་ནས།།དབང་བསྐུར་ལས་གཞན་ཆོས་མེད་དོ།།དེས་ན་ཐུབ་པས་རྒྱུད་སྡེ་ལས།།དབང་བསྐུར་ཁོ་ནར་བསྔགས་པ་དང་།།མཁས་རྣམས་ཅི་ནས་དབང་བསྐུར་ལ།།གུས་པའི་རྒྱུ་མཚན་དེ་ལྟར་ཡིན།།ལ་ལ་དབང་བསྐུར་མུ་བཞི་འདོད།།དབང་བསྐུར་བྱས་ཀྱང་མ་ཐོབ་དང་།།མ་བྱས་ཀྱང་ནི་ཐོབ་པ་དང་།།བྱས་ན་ཐོབ་ལ་མ་བྱས་ན།།མི་ཐོབ་པ་དང་རྣམ་བཞིར་འདོད།།འདི་འདྲ་གང་ནའང་བཤད་པ་མེད།།བསྟན་པ་དཀྲུགས་པའི་སྙད་ཀར་ཟད།།འོན་ཀྱང་འདི་ཡང་བརྟག་པར་བྱ།།སོ་སོར་ཐར་པའི་སྡོམ་པ་དང་།།བྱང་ཆུབ་སེམས་དཔའི་སེམས་བསྐྱེད་ལའང་།།མུ་བཞི་ཅི་ཡི་ཕྱིར་མི་བརྩི།།དེ་བཞིན་བསྒོམ་ལའང་ཅིས་མི་མཚུངས།།བསྒོམས་ཀྱང་མི་སྐྱེ་མ་བསྒོམས་ཀྱང་།།སྐྱེ་བ་ལ་སོགས་མུ་བཞི་ཡོད།།མུ་བཞི་ཀུན་ལ་ཡོད་བཞིན་དུ།།གཞན་ལ་མུ་བཞི་མི་བརྩི་བར།།དབང་བསྐུར་ཉིད་ལ་བརྩི་བ་ནི།།བདུད་ཀྱི་གསང་ཚིག་ཡིན་པར་དོགས།།གལ་ཏེ་མུ་བཞི་ཡོད་ན་ཡང་།།སོ་སོའི་མཚན་ཉིད་ཤེས་མི་ནུས།།ཅི་སྟེ་ཤེས་པར་ནུས་ན་ནི།།དེ་ཡི་མཚན་ཉིད་སྨྲ་དགོས་སོ།།སྨྲས་ཀྱང་རང་བཟོ་མ་ཡིན་པ།།ལུང་དང་མཐུན་པ་ཁྱེད་ལ་མེད།།གལ་ཏེ་མུ་བཞི་བདེན་སྲིད་ན།།གཞན་ལ་དབང་བསྐུར་མི་བྱེད་ཀྱང་།།བྱས་ན་ཐོབ་པའི་གང་ཟག་ལ།།དབང་བསྐུར་ཅི་ཡི་ཕྱིར་མི་དགོས།།གཞན་ལ་དབང་བསྐུར་མི་དགོས་པས།།དེ་ལའང་དབང་བསྐུར་མི་དགོས་ན།།ནད་མེད་པ་ལ་སྨན་སྤོང་བས།།ནད་པ་ལ་ཡང་སྤོང་ངམ་ཅི།།འདི་འདྲའི་ཆོས་ལོག་ཐམས་ཅད་ནི།།བདུད་ཀྱི་བྱིན་རླབས་ཡིན་ཞེས་བྱ།།ཁ་ཅིག་གསང་སྔགས་གསང་བ་ལ།།ཡེ་གསང་ཐབས་ཀྱིས་ཆོད་པའི་ཕྱིར།།གསང་སྒྲོགས་ལྟུང་བ་མེད་ཅེས་ཟེར།།འདི་ཡང་ཅུང་ཟད་བརྟག་པར་བྱ།།ཡེ་གསང་ཞེས་བྱའི་དོན་ཅི་ཞིག།གལ་ཏེ་གོ་བ་མེད་པ་ལ།།ཟེར་ན་གོ་བའི་གང་ཟག་ལ།།ཡེ་གསང་མིན་ཕྱིར་ལྟུང་བར་འགྱུར།།གལ་ཏེ་དམ་པའི་ཆོས་ཡིན་པས།།དམ་ཆོས་བདེན་པའི་བྱིན་རླབས་འདི།།སུ་ཡིས་ཐོས་ཀྱང་ཕན་ཡོན་ཆེ།།དེས་ན་གསང་སྒྲོགས་མི་འབྱུང་ན།།གལ་ཏེ་དམ་ཆོས་བདེན་པ་རུ།།གོ་ན་ཆོས་ནས་འབྱུང་བཞིན་གྱིས།།ཆོས་ལ་གསང་དང་མི་གསང་བའི།།ལུགས་གཉིས་རྒྱལ་བ་རྣམས་ཀྱིས་གསུངས།།དེས་ན་ཡེ་གསང་ཞེས་བྱ་བ།།འདི་ཡང་བསྟན་ལ་གནོད་ཚིག་ཡིན།།ཁ་ཅིག་འཁྲུལ་དང་མ་འཁྲུལ་མེད།།ཐབས་ལམ་གཅིག་ཏུ་ངེས་པ་མེད།།ལྟ་བ་རྟོགས་པས་ཀླུ་སྒྲུབ་གྲོལ།།པདྨ་འབྱུང་གནས་བསྐྱེད་རིམ་གྱིས།།དཀའ་ཐུབ་སྤྱད་པས་ལཱུ་ཧི་པ།།སྤྱོད་པའི་གྲོགས་ཀྱིས་ནག་པོ་པ།།རླུང་གི་སྟོབས་ཀྱིས་གོ་རཀྵ།།གཏུམ་མོའི་སྟོབས་ཀྱིས་ཤ་ཝ་རི།།ཕྱག་རྒྱ་ཆེན་པོས་ས་ར་ཧ།།བྱིན་རླབས་སྟོབས་ཀྱིས་ཏོག་ཙེ་བ།།ཟ་ཉལ་འཆག་གིས་ཞི་བ་ལྷ།།ཨིནྡྲ་བྷཱུ་ཏི་འདོད་ཡོན་གྱིས།།རྟེན་འབྲེལ་ཐམས་ཅད་ཚོགས་པ་ལས།།བིརྺ་པ་ལ་གྲུབ་ཐོབ་བྱུང་།།འདི་འདྲའི་ཐབས་ལམ་སྣ་ཚོགས་ལ།།སྐུར་པ་གདབ་ཏུ་མི་རུང་ཟེར།།འདི་ཡང་ལེགས་པར་བཤད་ཀྱིས་ཉོན།།ཐབས་དང་ཤེས་རབ་གཉིས་མིན་པའི།།སངས་རྒྱས་སྒྲུབ་པའི་ཐབས་གཞན་མེད།།དེས་ན་གྲུབ་ཐོབ་ཐམས་ཅད་ཀྱང་།།ཕྱོགས་རེའི་ཐབས་ཀྱིས་གྲོལ་བ་མིན།།དབང་དང་རིམ་གཉིས་ལས་བྱུང་བའི།།ཡེ་ཤེས་སྐྱེས་པས་གྲོལ་བ་ཡིན།།ལྟ་བ་དང་ནི་བསྐྱེད་རིམ་དང་།།གཏུམ་མོ་དང་ནི་བྱིན་རླབས་སོགས།།དེ་དག་རྐྱང་པས་གྲོལ་བ་མིན།།དབང་བསྐུར་བ་ཡི་བྱིན་རླབས་དང་།།རིམ་གཉིས་བསྒོམས་པའི་རྟེན་འབྲེལ་གྱིས།།ཡེ་ཤེས་རྟོགས་ནས་གྲོལ་བ་ཡིན།།བསྐྱེད་རིམ་རླུང་དང་གཏུམ་མོ་སོགས།།རིམ་པ་གཉིས་ལས་ཐ་དད་མིན།།བྱིན་རླབས་དེ་ལས་བྱུང་བ་ཡིན།།ལྟ་བ་དེ་ཡི་ཡན་ལག་ཡིན།།ཕྱག་རྒྱ་ཆེན་པོ་དེའི་ཡེ་ཤེས།།དེ་ཡི་སྤྲོས་བཅས་སྤྱོད་པ་ནི།།ཨིནྡྲ་བྷཱུ་ཏིས་མཛད་པ་ཡིན།།དེ་ཡི་སྤྲོས་མེད་སྤྱོད་པ་ལ།།བྷུ་སུ་ཀུ་ཞེས་སངས་རྒྱས་གསུངས།།དེ་ཡི་ཤིན་ཏུ་སྤྲོས་མེད་ནི།།རིམ་གཉིས་བརྟན་པར་བྱ་བའི་ཕྱིར།།གྲུབ་ཐོབ་རྣམས་ཀྱིས་མཛད་པ་ནི།།ཀུན་ཏུ་བཟང་པོའི་སྤྱོད་པར་བཤད།།དེས་ན་རྒྱུ་རྐྱེན་མ་ཚོགས་པར།།སངས་རྒྱས་འབྲས་བུ་མི་འབྱུང་མོད།།སྔ་མའི་ལས་འཕྲོའི་བྱེ་བྲག་དང་།།ནང་གི་རྟེན་འབྲེལ་ཁྱད་པར་གྱིས།།ཡེ་ཤེས་སྐྱེ་བའི་སྣ་འདྲེན་ནི།།ཐབས་ཀྱི་དབྱེ་བས་བྱེད་པར་གསུངས།།དཔེར་ན་ནད་པའི་ལུས་བརྟས་པ།།བཟའ་དང་བཏུང་བས་བྱེད་མོད་ཀྱི།།དེ་ཡི་ཡི་ག་འབྱེད་པ་ནི།།ཟས་ཀྱི་ཁྱད་པར་ཡིན་པ་བཞིན།།དེ་ཕྱིར་ཐབས་ཀྱི་ཁྱད་པར་ལ།།སྐུར་པ་འདེབས་ན་བླུན་པོ་ཡིན།།འོན་ཀྱང་རེ་རེས་འཚང་རྒྱ་བར།།འདོད་ན་ཤིན་ཏུ་འཁྲུལ་པར་བཤད།།དེས་ན་སྨིན་བྱེད་དབང་དང་ནི།།རིམ་པ་གཉིས་ལ་འབད་པར་གྱིས།།སོ་ནམ་ཚུལ་བཞིན་བྱས་པ་ཡི།།ལོ་ཏོག་རིམ་གྱིས་སྨིན་པ་ལྟར།།ཕ་རོལ་ཕྱིན་པའི་ལམ་ཞུགས་ན།།གྲངས་མེད་གསུམ་གྱིས་རྫོགས་འཚང་རྒྱ།།སྔགས་ཀྱིས་བཏབ་པའི་ས་བོན་ནི།།ཉི་མ་གཅིག་ལ་ལོ་ཏོག་སྨིན།།རྡོ་རྗེ་ཐེག་པའི་ཐབས་ཤེས་ན།།ཚེ་འདི་ཉིད་ལ་སངས་རྒྱས་འགྲུབ།།སྟོང་ཉིད་སྙིང་རྗེ་སོགས་བསྒོམ་པ།།ཕ་རོལ་ཕྱིན་པའི་གཞུང་ལུགས་ཡིན།།དེ་ཡིས་ཇི་ལྟར་མྱུར་ན་ཡང་།།གྲངས་མེད་གསུམ་གྱི་དཀའ་སྤྱད་དགོས།།རྫོགས་པའི་སངས་རྒྱས་ལམ་པོ་ཆེ།།རྩོད་པ་ཀུན་ལས་གྲོལ་བའི་ཆོས།།མཁས་པ་ཀུན་གྱིས་གུས་པས་བསྟེན།།གལ་ཏེ་འདི་བཞིན་བསྒྲུབ་འདོད་ན།།རྡོ་རྗེ་ཕག་མོའི་བྱིན་རླབས་མེད།།ལྷན་སྐྱེས་ལ་སོགས་འདིར་མི་བསྒོམ།།གཏུམ་མོ་ལ་སོགས་ཐབས་ལམ་བྲལ།།ཕྱག་རྒྱ་ཆེན་པོའི་ཐ་སྙད་མེད།།ཚེ་འདི་དང་ནི་བར་དོ་དང་།།ཕྱི་མར་འཚང་རྒྱ་ཁོང་མི་བཞེད།།འོན་ཀྱང་ཐེག་པ་ཆེན་པོ་ཡི།།སྡེ་སྣོད་རྣམས་ལས་འབྱུང་བ་བཞིན།།བྱང་ཆུབ་མཆོག་ཏུ་སེམས་བསྐྱེད་ལ།།གྲངས་མེད་གསུམ་དུ་ཚོགས་གཉིས་སོགས།།སེམས་ཅན་ཡོངས་སུ་སྨིན་པ་དང་།།སངས་རྒྱས་ཞིང་རྣམས་ལེགས་པར་སྦྱོངས།།ས་བཅུའི་ཐ་མར་བདུད་བཏུལ་ནས།།རྫོགས་པའི་སངས་རྒྱས་ཐོབ་པར་གསུངས།།ཕ་རོལ་ཕྱིན་གཞུང་མི་ནུས་པར།།གལ་ཏེ་གསང་སྔགས་བསྒོམ་འདོད་ན།།ནོར་པ་མེད་པའི་དབང་བཞི་ལོངས།།འཁྲུལ་བ་མེད་པའི་རིམ་གཉིས་སྒོམས།།དེ་ལས་བྱུང་བའི་ཡེ་ཤེས་ནི།།ཕྱག་རྒྱ་ཆེན་པོ་གོམས་པར་བྱ།།དེ་ནས་འཁོར་འདས་བསྲེ་བའི་ཕྱིར།།རྣམ་པར་དག་པའི་སྤྱོད་པ་སྤྱད།།ནང་གི་ས་ལམ་ཀུན་བགྲོད་ནས།།རྡོ་རྗེ་འཛིན་པའི་ས་དགེ་བ།།བཅུ་གསུམ་པ་ནི་ཐོབ་པར་འགྱུར།།འདི་ནི་དུས་གསུམ་སངས་རྒྱས་ཀྱི།།དམ་པའི་ཆོས་ཀྱི་སྙིང་པོ་ཡིན།།རྒྱུད་སྡེ་རྣམས་ཀྱི་གསང་ཚིག་མཆོག།འདི་ཉིད་ཡིན་པར་ཤེས་པར་བྱ།།གང་ཞིག་སངས་རྒྱས་བྱེད་འདོད་ན།།དེ་ཡིས་འདི་བཞིན་སྤྱད་པར་བྱ།།ཡང་ན་ཕ་རོལ་ཕྱིན་པ་ཡི།།མདོ་ལས་ཇི་ལྟར་འབྱུང་བཞིན་གྱིས།།ཡང་ན་རྡོ་རྗེ་ཐེག་པ་ཡི།།རྒྱུད་སྡེ་བཞིན་དུ་ཉམས་སུ་ལོངས།།འདི་གཉིས་མིན་པའི་ཐེག་ཆེན་ནི།།སངས་རྒྱས་རྣམས་ཀྱིས་གསུངས་པ་མེད།།ད་ལྟའི་ཆོས་པ་ཕལ་ཆེ་བ།།བསླབ་པ་གསུམ་པོ་མི་སྦྱོང་བས།།ཕ་རོལ་ཕྱིན་པའི་ཆོས་ལུགས་མིན།།དབང་དང་རིམ་གཉིས་མི་ལྡན་པས།།རྡོ་རྗེ་ཐེག་པའི་བསྟན་པ་མིན།།འདུལ་བའི་སྡེ་སྣོད་མི་ཤེས་པས།།ཉན་ཐོས་ཀྱི་ཡང་ཆོས་ལུགས་མིན།།འོན་ཀྱང་ཆོས་པར་ཁས་འཆེ་བ།།ཀྱེ་མ་གང་གི་བསྟན་པ་འགྱུར།།ཕ་མེད་པ་ཡི་བུ་མང་ཡང་།།རིགས་ཀྱི་ནང་དུ་ཆུད་མི་ནུས།།དེ་བཞིན་ཁུངས་ནས་མ་བྱུང་བའི།།ཆོས་པ་བསྟན་པའི་ནང་དུ་མིན།།དག་དུག་བསྡུས་པའི་གོས་ལ་ནི།།ཆེན་པོ་རྣམས་ཀྱི་ཆས་མི་རུང་།།དེ་བཞིན་ཐུན་ཚགས་བསྡུས་པ་ཡི།།ཆོས་ཀྱིས་དད་ཅན་འཚང་མི་རྒྱ།།མུ་སྟེགས་བྱེད་པ་ཁ་ཅིག་ཀྱང་།།སངས་རྒྱས་པ་ལ་འདི་སྐད་ཟེར།།སྡིག་པ་སྤོང་ཞིང་དགེ་བྱེད་ན།།མུ་སྟེགས་ཡིན་ཡང་ཅི་ཞིག་སྐྱོན།།དགེ་བ་མེད་ཅིང་སྡིག་བྱེད་ན།།ཆོས་པ་ཡིན་ཡང་ཅི་ཕན་ལོ།།དེ་བཞིན་འདི་ནའང་བླུན་པོ་འགའ།།དད་དང་ལྡན་ཞིང་སྙིང་རྗེ་ཆེ།།སྦྱིན་དང་ཚུལ་ཁྲིམས་བཟོད་པ་བསྒོམ།།བསམ་གཏན་བསྒོམ་ཞིང་སྟོང་པ་ཉིད།།རྟོགས་ན་སངས་རྒྱས་ཀྱིས་གསུངས་པའི།།མདོ་རྒྱུད་རྣམས་དང་མི་མཐུན་ཡང་།།དེ་ལ་སྐྱོན་མེད་དེ་མེད་ན།།མདོ་རྒྱུད་མཐུན་ཡང་ཅི་ཕན་ལོ།།དེ་ཡང་བརྟག་པར་བྱ་བས་ཉོན།།མུ་སྟེགས་བྱེད་ལ་སྡོམ་པ་མེད།།དེ་ཕྱིར་དགེ་བ་བྱས་ན་ཡང་།།བར་མ་ཡིན་གྱི་སྡོམ་པ་ལས།།བྱུང་བའི་དགེ་བ་སྲིད་མ་ཡིན།།དེ་བཞིན་དབང་བསྐུར་མ་ཐོབ་པ།།དེ་ལ་རིག་འཛིན་སྡོམ་པ་མེད།།སྡོམ་མེད་དེ་ཡིས་དགེ་སྤྱད་ཀྱང་།།བར་མ་ཡིན་གྱི་གསང་སྔགས་ཀྱི།།སྡོམ་པ་ལས་བྱུང་དགེ་བ་མིན།།སྡོམ་པའི་དགེ་བ་མ་ཡིན་ན།།གསང་སྔགས་ཐབས་ལམ་རབ་ཟབ་ཀྱང་།།འཚང་མི་རྒྱ་བར་ཐུབ་པས་གསུངས།།སྡོམ་པ་གསུམ་དང་ལྡན་པ་ཡི།།རིམ་གཉིས་ཟབ་མོའི་གནད་ཤེས་ན།།དེ་ནི་ཚེ་འདིའམ་བར་དོ་འམ།།སྐྱེ་བ་བཅུ་དྲུག་ཚུན་ཆད་ན།།འགྲུབ་པར་རྫོགས་པའི་སངས་རྒྱས་གསུངས།།དེ་ཕྱིར་འདི་ལ་མཁས་རྣམས་གུས།།གང་དག་རབ་ཏུ་འབྱུང་འདོད་ན།།སྡོམ་པ་བསྲུང་ཕྱིར་གུས་པས་ལོངས།།ལྟོ་གོས་ཙམ་ལ་དམིགས་པ་ཡི།།རབ་ཏུ་འབྱུང་བ་ཐུབ་པས་བཀག།སེམས་སྐྱེད་བྱེད་པ་དེ་དག་ཀྱང་།།བསྟན་པའི་ལུགས་བཞིན་མི་བྱེད་ཀྱི།།ཐོས་ཆུང་རྣམས་ཀྱི་མགོ་བསྐོར་ནས།།བླུན་པོ་དགའ་བར་བྱ་ཕྱིར་ཡིན།།གསང་སྔགས་བསྒོམ་པ་མང་མོད་ཀྱི།།རྒྱུད་སྡེ་བཞིན་དུ་བསྒྲུབ་པ་ཉུང་།།སྤྱོད་པ་བདེ་བའི་འདུ་ཤེས་ཀྱིས།།རང་བཟོར་གསང་སྔགས་སྤྱོད་པར་ཟད།།གལ་ཏེ་དབང་སྐུར་བྱེད་ན་ཡང་།།བཟང་པོའི་གཞུང་ལུགས་ཀུན་དོར་ནས།།གང་དག་བརྫུན་གྱིས་བསླད་པ་ལ།།ངོ་མཚར་བཞིན་དུ་གུས་པས་ལེན།།བརྒྱ་ལ་བསྐྱེད་རིམ་བསྒོམ་ན་ཡང་།།སྦྱང་གཞི་སྦྱོང་བྱེད་ལེགས་འཕྲོད་པའི།།ཆོ་གའི་ཡན་ལག་ཀུན་བོར་ནས།།རང་བཟོའི་དཀྲོངས་བསྐྱེད་བསྒོམ་པར་ཟད།།གཏུམ་མོ་བསྒོམ་པ་ཕལ་ཆེར་ཡང་།།ནང་གི་རྟེན་འབྲེལ་མི་ཤེས་པར།།མུ་སྟེགས་བྱེད་ཀྱི་གཏུམ་མོ་ལྟར།།དྲོད་ཙམ་ལ་ནི་དམིགས་པར་གོ།ཡེ་ཤེས་ཅུང་ཟད་སྐྱེས་ན་ཡང་།།དེ་དག་ཉོན་མོངས་རྣམ་རྟོག་དང་།།འབྱེད་པའི་ཐབས་ལ་མི་མཁས་པས།།རྫོགས་པའི་སངས་རྒྱས་ལམ་མི་འགྱུར།།བླ་མ་ལ་ནི་མོས་ན་ཡང་།།དེ་འདྲའི་བླ་མ་བླ་མ་མིན།།དཔོན་སློབ་གཉི་ག་གསང་སྔགས་ཀྱི།།སྡོམ་པ་མེད་པ་ཡིན་ཕྱིར་རོ།།དཔེར་ན་རབ་བྱུང་མ་བྱས་ན།།མཁན་པོའི་ཐ་སྙད་མེད་པ་བཞིན།།དེ་བཞིན་དབང་བསྐུར་མ་ཐོབ་ན།།བླ་མའི་ཐ་སྙད་མི་འབྱུང་ངོ་།།གསང་སྔགས་མིན་པའི་བླ་མ་ལ།།མོས་པ་བྱས་ཀྱང་ཚེ་འདི་ཡི།།བདེ་སྐྱིད་ཕུན་ཚོགས་ཙམ་ཞིག་གམ།།རིམ་གྱིས་འགྲུབ་པའི་རྒྱུ་སྲིད་ཀྱི།།དེ་ནི་ཚེ་འདིའམ་བར་དོ་ལ།།སངས་རྒྱས་ཉིད་སྦྱིན་མི་ནུས་སོ།།ཕ་རོལ་ཕྱིན་པའི་གཞུང་ལུགས་ལས།།བླ་མ་སངས་རྒྱས་ལྟ་བུ་རུ།།བལྟ་བར་བྱ་ཞེས་གསུངས་མོད་ཀྱི།།སངས་རྒྱས་དངོས་སུ་གསུངས་པ་མེད།།བླ་མ་སངས་རྒྱས་ཉིད་ཡིན་ཞེས།།བྱ་བ་དབང་བསྐུར་ཐོབ་ནས་ཡིན།།དབང་བསྐུར་སྡོམ་པས་མ་འབྲེལ་ན།།བཟང་ཡང་ཕ་རོལ་ཕྱིན་པ་ཡིན།།རབ་བྱུང་མིན་ལ་མཁན་པོ་མེད།།དབང་མ་བསྐུར་ལ་བླ་མ་མེད།།སྡོམ་པ་མེད་ལ་དགེ་རྒྱུན་མེད།།སྐྱབས་འགྲོ་མེད་ན་ཆོས་པ་མིན།།དགེ་སྦྱོང་སྡོམ་པ་མེད་པ་དང་།།རྒྱལ་སྲས་སེམས་བསྐྱེད་མ་ཐོབ་པ།།སྔགས་པ་དབང་བསྐུར་མེད་པ་གསུམ།།སངས་རྒྱས་བསྟན་པའི་ཆོམ་རྐུན་ཡིན།།ཕྱག་རྒྱ་ཆེན་པོ་བསྒོམ་ན་ཡང་།།རྟོག་པ་ཁ་འཚོམ་ཉིད་བསྒོམ་གྱི།།རིམ་གཉིས་ལས་བྱུང་ཡེ་ཤེས་ལ།།ཕྱག་རྒྱ་ཆེན་པོར་མི་ཤེས་སོ།།བླུན་པོ་ཕྱག་རྒྱ་ཆེ་བསྒོམ་པ།།ཕལ་ཆེར་དུད་འགྲོའི་རྒྱུ་རུ་གསུངས།།མིན་ན་གཟུགས་མེད་ཁམས་སུ་སྐྱེ།།ཡང་ན་ཉན་ཐོས་འགོག་པར་ལྟུང་།།གལ་ཏེ་དེ་ནི་བསྒོམ་ལེགས་ཀྱང་།།དབུ་མའི་བསྒོམ་ལས་ལྷག་པ་མེད།།དབུ་མའི་བསྒོམ་དེ་བཟང་མོད་ཀྱི།།འོན་ཀྱང་འགྲུབ་པ་ཤིན་ཏུ་དཀའ།།ཇི་སྲིད་ཚོགས་གཉིས་མ་རྫོགས་པ།།དེ་སྲིད་བསྒོམ་དེ་མཐར་མི་ཕྱིན།།འདི་ཡི་ཚོགས་གཉིས་རྫོགས་པ་ལ།།བསྐལ་པ་གྲངས་མེད་དགོས་པར་གསུངས།།ངེད་ཀྱི་ཕྱག་རྒྱ་ཆེན་པོ་ནི།།དབང་ལས་བྱུང་བའི་ཡེ་ཤེས་དང་།།རིམ་པ་གཉིས་ཀྱི་ཏིང་འཛིན་ལས།།བྱུང་བའི་རང་བྱུང་ཡེ་ཤེས་ཡིན།།འདི་ཡི་རྟོགས་པ་གསང་སྔགས་ཀྱི།།ཐབས་ལ་མཁས་ན་ཚེ་འདིར་འགྲུབ།།དེ་ལས་གཞན་དུ་ཕྱག་རྒྱ་ཆེ།།རྟོགས་པ་སངས་རྒྱས་ཀྱིས་མ་གསུངས།།དེས་ ན་ཕྱག་རྒྱ་ཆེན་པོ་ལ།།མོས་ན་གསང་སྔགས་གཞུང་བཞིན་སྒྲུབས།།ད་ལྟའི་ཕྱག་རྒྱ་ཆེན་པོ་དང་།།རྒྱ་ནག་ལུགས་ཀྱི་རྫོགས་ཆེན་ལ།།ཡས་འབབ་དང་ནི་མས་འཛེགས་གཉིས།།རིམ་གྱིས་པ་དང་ཅིག་ཆར་བར།།མིང་འདོགས་བསྒྱུར་བ་མ་གཏོགས་པ།།དོན་ལ་ཁྱད་པར་དབྱེ་བ་མེད།།ཆོས་ལུགས་འདི་འདྲ་འབྱུང་བ་ཡང་།།བྱང་ཆུབ་སེམས་དཔའ་ཞི་བ་འཚོས།།རྒྱལ་པོ་ཁྲི་སྲོང་ལྡེའུ་བཙན་ལ།།ལུང་བསྟན་ཇི་བཞིན་ཐོག་ཏུ་བབ།།ལུང་བསྟན་དེ་ཡང་བཤད་ཀྱིས་ཉོན།།རྒྱལ་པོ་ཁྱོད་ཀྱི་བོད་ཡུལ་འདིར།།སློབ་དཔོན་པདྨ་འབྱུང་གནས་ཀྱིས།།བརྟན་མ་བཅུ་གཉིས་ལ་གཏད་པས།།མུ་སྟེགས་འབྱུང་བར་མི་འགྱུར་མོད།།འོན་ཀྱང་རྟེན་འབྲེལ་འགའ་ཡི་རྒྱུས།།ཆོས་ལུགས་གཉིས་སུ་འགྲོ་བར་འགྱུར།།དེ་ཡང་ཐོག་མར་ང་འདས་ནས།།རྒྱ་ནག་དགེ་སློང་བྱུང་ནས་ནི།།དཀར་པོ་ཆིག་ཐུབ་ཅེས་བྱ་བ།།ཅིག་ཆར་པ་ཡི་ལམ་སྟོན་འགྱུར།།དེ་ཚེ་ང་ཡི་སློབ་མ་ནི།།མཁས་པ་ཆེན་པོ་ཀཱ་མ་ལ།།ཤཱི་ལ་ཞེས་བྱ་རྒྱ་གར་ནས།།སྤྱན་དྲོངས་དེ་ཡིས་དེ་སུན་འབྱིན།།དེ་ནས་དེ་ཡི་ཆོས་ལུགས་བཞིན།།དད་ལྡན་རྣམས་ཀྱིས་སྤྱོད་ཅིག་གསུངས།།དེ་ཡིས་ཇི་སྐད་གསུངས་པ་བཞིན།།ཕྱི་ནས་ཐམས་ཅད་བདེན་པར་གྱུར།།རྒྱ་ནག་ལུགས་དེ་ནུབ་མཛད་ནས།།རིམ་གྱིས་པ་ཡི་ཆོས་ལུགས་སྤེལ།།ཕྱི་ནས་རྒྱལ་ཁྲིམས་ནུབ་པ་དང་།།རྒྱ་ནག་མཁན་པོའི་གཞུང་ལུགས་ཀྱི།།ཡི་གེ་ཙམ་ལ་བརྟེན་ནས་ཀྱང་།།དེ་ཡི་མིང་འདོགས་གསང་ནས་ནི།།ཕྱག་རྒྱ་ཆེན་པོར་མིང་བསྒྱུར་ནས།།ད་ལྟའི་ཕྱག་རྒྱ་ཆེན་པོ་ནི།།ཕལ་ཆེར་རྒྱ་ནག་ཆོས་ལུགས་ཡིན།།ནཱ་རོ་དང་ནི་མཻ་ཏྲཱི་བའི།།ཕྱག་རྒྱ་ཆེན་པོ་གང་ཡིན་པ།།དེ་ནི་ལས་དང་ཆོས་དང་ནི།དམ་ཚིག་དང་ནི་ཕྱག་རྒྱ་ཆེ།།གསང་སྔགས་རྒྱུད་ནས་ཇི་སྐད་དུ།།གསུངས་པ་དེ་ཉིད་ཁོང་བཞེད་དོ།།འཕགས་པ་ཀླུ་སྒྲུབ་ཉིད་ཀྱིས་ཀྱང་།།ཕྱག་རྒྱ་བཞི་པར་འདི་སྐད་གསུངས།།ལས་ཀྱི་ཕྱག་རྒྱ་མི་ཤེས་པས།།ཆོས་ཀྱི་ཕྱག་རྒྱའང་མི་ཤེས་ན།།ཕྱག་རྒྱ་ཆེན་པོའི་མིང་ཙམ་ཡང་།།རྟོགས་པ་ཉིད་ནི་མི་སྲིད་གསུངས།།རྒྱུད་ཀྱི་རྒྱལ་པོ་གཞན་དང་ནི།།བསྟན་བཅོས་ཆེན་པོ་གཞན་ལས་ཀྱང་།།དབང་བསྐུར་དག་དང་མ་འབྲེལ་བ།།དེ་ལ་ཕྱག་རྒྱ་ཆེན་པོ་བཀག།དབང་བསྐུར་བ་ལས་བྱུང་བ་ཡི།།ཡེ་ཤེས་ཕྱག་རྒྱ་ཆེ་རྟོགས་ན།།ད་གཟོད་མཚན་མ་དང་བཅས་པའི།།འབད་རྩོལ་ཀུན་ལ་མི་ལྟོས་སོ།།དེང་སང་འགའ་ཞིག་བླ་མ་ཡི།།མོས་གུས་ཙམ་གྱིས་སེམས་བསྒྱུར་ནས།།རྟོག་པ་ཅུང་ཟད་འགགས་པ་ལ།།ཕྱག་རྒྱ་ཆེན་པོའི་ངོ་སྤྲོད་བྱེད།།དེ་འདྲ་བདུད་ཀྱི་ཡིན་པའང་སྲིད།།ཡང་ན་ཁམས་འདུས་འགའ་ལའང་འབྱུང་།།ཀ་རུ་འཛིན་ཞེས་བྱ་བ་ཡི།།བརྫུན་རླབས་ཅན་གྱི་གྲུབ་ཐོབ་བྱུང་།།དེ་ཡི་དགོན་པ་མཐོང་ཙམ་གྱིས།།འགའ་ལ་ཏིང་འཛིན་སྐྱེས་ཞེས་ཟེར།།ཕྱི་ནས་དེ་ཡི་གྲུབ་ཐོབ་ཞིག།དེ་ནས་ཏིང་འཛིན་དེ་རྒྱུན་ཆད།།དེ་འདྲའི་ཏིང་འཛིན་བདུད་རིགས་ཀྱི།།འབྱུང་པོ་རྣམས་ཀྱིས་བྱེད་པར་གསུངས།།སངས་རྒྱས་གསུང་བཞིན་བསྒྲུབ་པ་ཡི།།བྱིན་རླབས་སངས་རྒྱས་རྣམས་ཀྱི་ཡིན།།ཁ་ཅིག་སྐྱེ་བ་སྔ་མ་ལ།།སེམས་བསྐྱེད་དབང་བསྐུར་མ་བྱས་ན།།ཆོས་ལ་དད་པ་མི་སྲིད་པས།།གང་དག་ཐེག་ཆེན་དད་ཐོབ་པ།།དེ་དག་སྔར་སྦྱངས་ཡིན་པས་ན།།ད་ལྟ་དབང་བསྐུར་མི་དགོས་ཟེར།།འོ་ན་སོ་སོར་ཐར་པ་ཡི།།སྡོམ་པ་དག་ལ་མོས་པ་ཡང་།།སྔ་མའི་སྡོམ་པ་ཡོད་པའི་ཕྱིར།།ད་ལྟ་རབ་ཏུ་དབྱུང་ཅི་དགོས།།བྱང་ཆུབ་སེམས་དཔའི་སེམས་བསྐྱེད་ཀྱང་།།སྔ་མའི་སེམས་བསྐྱེད་ཡོད་པའི་ཕྱིར།།ད་ལྟ་སེམས་བསྐྱེད་བྱ་ཅི་དགོས།།དེ་དག་དགོས་ན་གསང་སྔགས་ཀྱི།།དབང་བསྐུར་ཡང་ནི་ཅིས་མི་དགོས།།སངས་རྒྱས་ཆོས་ལ་མི་དགའ་བའི།།མུ་སྟེགས་བྱེད་ཀྱིས་ཆོས་སྤངས་པ།།དེ་ལ་མཚར་དུ་མི་བརྩི་ཡི།།སངས་རྒྱས་ཆོས་ལ་བརྟེན་བཞིན་དུ།།མདོ་རྒྱུད་ཉན་བཤད་འགོག་བྱེད་པ།།དེ་ལ་ཁོ་བོ་ངོ་མཚར་སྐྱེས།།ལ་ལ་ཞི་གནས་ཅུང་ཟད་དང་།།སྣང་སྟོང་རྟོགས་པ་ཕྲ་མོ་ལ།།མཐོང་ལམ་ཡིན་ཞེས་ངོ་སྤྲོད་བྱེད།།ཁྱུང་གི་སྒོང་རྒྱ་ཇི་བཞིན་དུ།།ལུས་ཀྱི་རྒྱ་ཡིས་བཅིངས་པས་ན།།ད་ལྟ་ཡོན་ཏན་མི་འབྱུང་བས།།ལུས་རྒྱ་ཞིག་པའི་ཤི་མ་ཐག།ཡོན་ཏན་ཕྱི་ནས་འབྱུང་ཞེས་ཟེར།།ཐེག་པ་ཆེན་པོའི་མདོ་རྒྱུད་ལས།།འདི་འདྲའི་ཆོས་ལུགས་བཤད་པ་མེད།།ཉི་མ་དེ་རིང་ཤར་བ་ཡི།།འོད་ཟེར་ནངས་པར་འབྱུང་བ་མཚར།།ཁ་ཅིག་ཕ་རོལ་ཕྱིན་པ་དང་།།གསང་སྔགས་གཉིས་ཀྱི་མཐོང་ལམ་ལ།།རྒྱན་ཅན་རྒྱན་མེད་ཡིན་ཞེས་ཟེར།།དེ་ལྟ་ཡིན་ན་སངས་རྒྱས་ཀྱང་།།རྒྱན་ཅན་རྒྱན་མེད་གཉིས་སུ་འགྱུར།།ཉན་ཐོས་རྣམས་ཀྱི་དགྲ་བཅོམ་ལ།།རྒྱན་ཅན་རྒྱན་མེད་གཉིས་འཐད་ཀྱི།།ཐེག་པ་ཆེན་པོའི་འཕགས་པ་ལ།།རྒྱན་ཅན་རྒྱན་མེད་གཉིས་མི་སྲིད།།ཉན་ཐོས་ལྕགས་ཀྱི་ཚ་ཚའི་དཔེས།།ཚེ་འདིར་མྱ་ངན་མ་འདས་པ།།བར་དོར་མྱ་ངན་འདའ་བར་གསུངས།།དེ་བཞིན་གསང་སྔགས་བསྒོམ་པ་ལས།།ཚེ་འདིར་མཐོང་ལམ་མ་ཐོབ་པ།།བར་དོར་མཐོང་ལམ་ཐོབ་མོད་ཀྱི།།ཚེ་འདིར་མཐོང་ལམ་སྐྱེས་པ་ལ།།ཡོན་ཏན་ཤི་ནས་འབྱུང་བ་ནི།།བླུན་པོ་རྣམས་ཀྱི་བརྫུན་རིབ་ཡིན།།མདོ་རྒྱུད་ཀུན་དང་མི་མཐུན་པས།།འདི་འདྲའི་ཆོས་ལུགས་མཁས་པས་སྤོངས།།ཇོ་བོ་ནཱ་རོ་ཏ་པ་ནི།།དབང་བསྐུར་དུས་སུ་མཐོང་ལམ་སྐྱེ།།དེ་ནི་སྐད་ཅིག་དེ་ལ་འགག།ཆོས་མཆོག་རྗེས་ཀྱི་མཐོང་ལམ་ནི།།འགག་པ་མེད་ཅེས་གསུངས་པར་གྲག།འདི་ནི་དཔེ་ཡི་ཡེ་ཤེས་ལ།མཐོང་བའི་ལམ་དུ་བཏགས་པར་ཟད།།འཕགས་པ་ལྷ་ཡིས་སྤྱོད་བསྡུས་སུ།།བདེན་པ་མཐོང་ཡང་ལས་མཐའ་ལ།།ཆགས་པར་གསུངས་པ་རྫོགས་རིམ་གྱི།།རང་བྱུང་ཡེ་ཤེས་རྟོགས་པ་ནི།།དཔེ་ཡི་ཡེ་ཤེས་ཉིད་ལ་དགོངས།།དེ་དང་ལམ་འབྲས་ལ་སོགས་པ།།གྲུབ་ཐོབ་རྣམས་ཀྱི་དགོངས་པ་མཐུན།།དེས་ན་ངེད་ཀྱི་མཐོང་ལམ་ནི།།འཕགས་པ་མིན་ལ་འབྱུང་མི་སྲིད།།ཐེག་པ་གསུམ་གྱི་ལག་ལེན་ཡང་།།རང་རང་གཞུང་ལུགས་བཞིན་བྱེད་ན།།སངས་རྒྱས་བསྟན་ཡིན་མི་བྱེད་ན།།བསྟན་པའི་གཟུགས་བརྙན་ཡིན་ཞེས་བྱ།།ཉན་ཐོས་རྣམས་ཀྱི་བླ་མ་དེ།།བཟང་ཡང་གང་ཟག་ཁོ་ནར་བས།།ཕ་རོལ་ཕྱིན་པའི་བླ་མ་ནི།།བཟང་ན་དགེ་འདུན་དཀོན་མཆོག་ཡིན།།གསང་སྔགས་པ་ཡི་བླ་མ་མཆོག།དཀོན་མཆོག་གསུམ་དང་དབྱེར་མེད་ཡིན།།དེས་ན་དེ་ལ་གསོལ་བཏབ་པས།།དཀོན་མཆོག་གསུམ་པོ་ཚེ་འདིར་འགྲུབ།།དེ་ལྟའི་ཐེག་པ་གསུམ་པོ་ཡི།།སོ་སོའི་གཞུང་ནས་འབྱུང་བ་བཞིན།།བླ་མའི་མཚན་ཉིད་མི་ལྡན་ན།།བླ་མ་ཡིན་གྱི་དམ་པ་མིན།།དེ་ལ་གསོལ་བ་བཏབ་ན་ཡང་།།བྱིན་རླབས་ཅུང་ཟད་འབྱུང་མོད་ཀྱི།།ཚེ་འདིའམ་བར་དོ་ལ་སོགས་སུ།།སངས་རྒྱས་ཉིད་སྦྱིན་མི་ནུས་སོ།།དེས་ན་དབང་བསྐུར་ཐོབ་པའི་མིས།།དཀོན་མཆོག་གསུམ་པོ་བླ་མ་རུ།།འདུས་པར་མཐོང་ནས་བླ་མ་ལ།།གསོལ་བ་བཏབ་ན་བྱིན་རླབས་འཇུག།གལ་ཏེ་དབང་བསྐུར་མ་ཐོབ་ན།།བླ་མ་དཀོན་མཆོག་གསུམ་ཉིད་དུ།།ཕར་ལ་བསྡུས་ལ་གསོལ་བ་ཐོབ།།རིམ་གྱིས་བྱིན་རླབས་ཅི་རིགས་འཇུག།བླ་མ་རྐྱང་པ་བཟང་སྲིད་ཀྱང་།།གསོལ་བ་བཏབ་པ་བྱིན་རླབས་ཆུང་།།དེ་བས་དཀོན་མཆོག་གསུམ་ཉིད་ལ།།གསོལ་བ་བཏབ་པ་ཤིན་ཏུ་བཟང་།།དབང་བསྐུར་དང་པོ་མ་ཐོབ་པར།།བསྐྱེད་པའི་རིམ་པ་བསྒོམ་པ་དང་།།དབང་བསྐུར་གཉིས་པ་མ་ཐོབ་པར།།གཏུམ་མོ་ལ་སོགས་བསྒོམ་པ་དང་།།དབང་བསྐུར་གསུམ་པ་མ་ཐོབ་པར།།བདེ་སྟོང་ལ་སོགས་བསྒོམ་པ་དང་།།དབང་བསྐུར་བཞི་པ་མ་ཐོབ་པར།།ཕྱག་རྒྱ་ཆེན་པོ་སོགས་བསྒོམ་དང་།།དགེ་སློང་སྡོམ་པ་མ་ཐོབ་པར།།མཁན་སློབ་ལ་སོགས་བྱེད་པ་ནི།།གསང་སྔགས་མེད་པར་སྦྲུལ་གདུག་གི།མགོ་ལས་རིན་ཆེན་ལེན་པ་ལྟར།།རང་གཞན་བརླག་པའི་རྒྱུ་རུ་བས།།མཁས་པ་རྣམས་ཀྱིས་རྒྱང་རིང་སྤང་།།གཞན་ཡང་གངས་རིའི་ཁྲོད་འདི་ན།།འཁྲུལ་བའི་ལག་ལེན་དུ་མ་ཡོད།།ཁ་འབར་མ་ཡི་གཏོར་མ་ལ།།དེ་བཞིན་གཤེགས་པ་བཞི་ཡི་མཚན།།སྔོན་ལ་བརྗོད་པའི་ལག་ལེན་མཐོང་།།འདི་ཡང་མདོ་དང་མཐུན་མ་ཡིན།།མདོ་ལས་སྔོན་ལ་སྔགས་བརྗོད་ནས།།སངས་རྒྱས་བཞི་པོ་ཕྱི་ནས་གསུངས།།འགའ་ཞིག་ཆུ་སྦྱིན་ནང་དུ་ཟན།།འཇུག་པའི་ལག་ལེན་བྱེད་པ་ཐོས།།འཇུར་གེགས་ཅན་གྱི་ཡི་དྭགས་ཀྱིས།།ཆུ་སྦྱིན་ནང་དུ་ཟན་མཐོང་ན།།འཇིགས་པ་ཆེན་པོ་ འབྱུང་བར་གསུངས།།དེས་ན་ཆུ་སྦྱིན་ནང་དུ་ཟན།།འདེབས་པ་ཆོ་ག་ཉམས་པ་ཡིན།།ཟན་གྱི་ཕུད་ལ་ལྷ་བཤོས་དང་།།ཆངས་བུ་བྱ་བར་སངས་རྒྱས་གསུངས།།རྡོ་རྗེ་རྩེ་མོའི་རྒྱུད་ལས་ནི།།ཟས་ཀྱི་ཕུད་ལ་ཆངས་བུ་སྦྱིན།།ཞེས་གསུངས་འཕྲོག་མའི་མདོ་ལས་ཀྱང་།།སངས་རྒྱས་སྟོན་པར་ཁས་འཆེ་ན།།འཕྲོག་མ་ལ་ནི་ཆངས་བུ་སྦྱིན།།ཞེས་གསུངས་དེ་ཡི་ཆོ་ག་ནི།།ལྟ་བ་ངན་སེལ་ལ་སོགས་ལྟོས།།འགའ་ཞིག་སངས་རྒྱས་གསུངས་པ་ཡི།།ལྷ་བཤོས་ཆངས་བུ་མི་བྱེད་པར།།མ་གསུངས་པ་ཡི་འབྲང་རྒྱས་དང་།།གྲུ་གསུམ་ལ་སོགས་བྱེད་པ་མཐོང་།།གསང་སྔགས་རྙིང་མ་འགའ་ཞིག་ལས།།གྲུ་གསུམ་དབང་ཕྱུག་ཆེན་པོའི་སྙིང་།།དེ་ཡི་ཤ་དང་ཁྲག་གིས་བརྒྱན།།མཐེབ་ཀྱུ་མགོ་བོའི་ཐོད་པས་བསྐོར།།ཆང་སོགས་བདུད་རྩིས་དེ་བཀང་ནས།།ཧེ་རུ་ཀ་ལ་མཆོད་ཅེས་ཟེར།།གསང་སྔགས་གསར་མར་གྲུ་གསུམ་གྱི།།གཏོར་མ་གཞུང་ནས་བཤད་པ་མེད།།ཟས་ཀྱི་ཕུད་ལ་ཁྱད་པར་དུ།།གྲུ་གསུམ་འབུལ་བ་གསུངས་པ་མེད།།ལག་ལེན་ཐམས་ཅད་སངས་རྒྱས་ཀྱི།།གསུང་དང་མཐུན་ན་བསྟན་པ་ཡིན།།དེས་ན་མདོ་སྡེ་མ་དཀྲུག་པར།།སངས་རྒྱས་གསུང་བཞིན་ཉམས་སུ་ལོངས།།སངས་རྒྱས་རབ་ཏུ་བྱུང་བ་ཡི།།ཕྱག་ཏུ་མཚོན་ཆ་བསྐུར་བ་མཐོང་།།ཁྱིམ་པའི་ཆ་ལུགས་ཅན་དག་ལ།།རྒྱན་དང་མཚོན་ཆ་སོགས་སྲིད་ཀྱི།།རབ་བྱུང་རྣམས་ལ་འདི་མི་སྲིད།།བྱང་ཆུབ་མཆོག་གི་ཕྱག་རྒྱ་སོགས།།མཛད་པའི་རིགས་ལྔ་སེར་འབྱམ་མཐོང་།།མདོ་ལུགས་ཡིན་ཞེས་ལ་ལ་སྨྲ།།མདོ་ནས་འདི་འདྲ་གསུངས་པ་མེད།།བྱ་སྤྱོད་གཉིས་ཀྱི་རྒྱུད་ལས་ཀྱང་།།སངས་རྒྱས་རིགས་ལྔར་བསྡུས་པ་མེད།།རྣལ་འབྱོར་རྒྱུད་ལས་གསུངས་པ་ཡི།།རིགས་ལྔ་ཁ་དོག་ཐ་དད་ཅིང་།།ཕྱག་རྒྱ་ཡང་ནི་ཐ་དད་གསུངས།།འདི་ཡི་སྐུ་མདོག་ཕྱག་རྒྱ་ནི།།རྟེན་ཅིང་འབྲེལ་འབྱུང་སྐུ་ཡིན་པས།།ཡེ་ཤེས་ལྔ་ལ་འཐད་པ་ཡིན།།དུས་ཀྱི་འཁོར་ལོ་ལ་སོགས་ལས།།རིགས་ལྔའི་ཁ་དོག་གཞན་གསུངས་པ།།འབྱུང་བ་རྣམ་པ་ལྔ་སྦྱོང་བའི།།རྟེན་ཅིང་འབྲེལ་འབྱུང་སྐུ་ཡིན་ནོ།།སངས་རྒྱས་གསེར་མདོག་ཅེས་གསུངས་པ།།དྲི་མ་མེད་ཅིང་དྭངས་པ་ཡང་།།སྤྲུལ་སྐུ་ཕལ་ལ་དགོངས་ཏེ་གསུངས།།གཞན་དུ་སྨན་བླ་ནམ་མཁའི་མདོག།སྔོན་པོ་ཉིད་དུ་མདོ་ལས་གསུངས།།ཡི་དམ་ལྷ་ཡི་སྒྲུབ་ཐབས་དང་།།སྔགས་ཀྱི་བཟླས་པའི་ཆོ་ག་དང་།།མཆོག་དང་ཐུན་མོང་དངོས་གྲུབ་དང་།།སྒྲུབ་པའི་ཆོ་ག་ཇི་སྙེད་པ།།མདོ་སྡེ་ཀུན་ལས་གསུངས་པ་མེད།།དེང་སང་སྔགས་ལ་མི་མོས་པར།།ལྷ་བསྒོམ་ལ་སོགས་བྱེད་པ་ཡང་།།སངས་རྒྱས་བསྟན་དང་མཐུན་པ་མིན།།གཞན་ཡང་སྦྱིན་སྲེག་རོ་སྲེག་དང་།།བདུན་ཚིགས་སཱཙྪའི་ཆོ་ག་སོགས།།དེང་སང་གསང་སྔགས་ལུགས་བོར་ནས།།མདོ་མཆོད་ཙམ་ལ་བརྟེན་པ་ཡི།།ཆོ་གའི་རྣམ་གཞག་བྱེད་པ་ཡོད།།ཕ་རོལ་ཕྱིན་པའི་མདོ་སྡེ་དང་།།བསྟན་བཅོས་ཀུན་ལས་གསུངས་པ་མེད།།འདི་དག་ངན་སོང་སྦྱོང་རྒྱུད་ལ།།སོགས་པའི་རྒྱུད་སྡེ་འགའ་ཞིག་ལས།།གསུངས་པའི་རྗེས་སུ་འབྲང་བ་ཡི།།གསང་སྔགས་པ་ལ་གྲགས་པ་ཡིན།།དེ་བཞིན་རབ་གནས་མདོ་ལུགས་དང་།།ཕྱག་ན་རྡོ་རྗེ་མདོ་ལུགས་དང་།།ལྟུང་བཤགས་དང་ནི་ཤེར་སྙིང་སོགས།།སྔགས་ལུགས་ཡིན་ཞེས་འཆད་པ་ཐོས།།འདི་ཡང་བརྟག་པར་བྱ་བས་ཉོན།།མདོ་ནས་རབ་གནས་བཤད་པ་མེད།།འོན་ཀྱང་མཆོད་བསྟོད་བཀྲ་ཤིས་སོགས།།རྒྱལ་པོའི་མངའ་དབུལ་ལྟ་བུ་ལ།།རབ་གནས་ཡིན་ཞེས་སྨྲ་ན་སྨྲོས།།ལྷ་བསྒོམ་པ་དང་སྔགས་བཟླས་དང་།།བུམ་པ་ལྷ་ཡི་སྟ་གོན་དང་།།དངོས་གཞིའི་དམ་ཚིག་སེམས་དཔའ་དང་།།ཡེ་ཤེས་འཁོར་ལོ་དགུག་གཞུག་དང་།།སྤྱན་དབྱེ་བརྟན་པར་བཞུགས་པ་དང་།།སྔགས་ཀྱི་བྱིན་གྱིས་བརླབས་པ་ཡི།།མེ་ཏོག་དོར་ནས་ལེགས་མཆོད་དེ།།བཀྲ་ཤིས་རྒྱས་པར་བྱེད་པ་ཡི།།ཆོ་ག་གསང་སྔགས་རྒྱུད་སྡེ་ལས།།གསུངས་ཀྱི་ཕ་རོལ་ཕྱིན་ལས་མིན།།ལ་ལ་གདམས་ངག་ཡིན་ཞེས་སྨྲ།།འོ་ན་མདོ་སྡེ་གང་དག་ལ།།བརྟེན་པ་ཡིན་པ་སྨྲ་དགོས་སོ།།དེང་སང་གསང་བ་འདུས་པའི་ལྷ།།བསྒོམས་ནས་མདོ་ལུགས་ཡིན་ཞེས་སྨྲ།།གསང་འདུས་ལ་སོགས་ཆོ་ག་ལ།།མདོ་ལུགས་ཆོ་ག་འབྱུང་བ་མཚར།།སེང་གེའི་ཕྲུ་གུ་གླང་ཆེན་ལས།།བྱུང་ན་སྔོན་མེད་སྲོག་ཆགས་ཡིན།།མཁས་པ་རྣམས་ཀྱིས་འདི་འདྲ་ཡི།།ཆོ་ག་སླན་ཆད་མ་བྱེད་ཅིག།ལྷ་ལ་རབ་ཏུ་གནས་པ་དང་།།མི་ལ་དབང་བསྐུར་བྱ་བ་སོགས།།རྡོ་རྗེ་སློབ་མའི་དབང་བསྐུར་བ།།ཐོབ་ཀྱང་བྱ་བར་མ་གསུངས་ན།།དབང་བསྐུར་གཏན་ནས་མ་ཐོབ་པའི།།གང་ཟག་རྣམས་ཀྱིས་སྨོས་ཅི་དགོས།།རྡོ་རྗེ་སློབ་མའི་དབང་བསྐུར་ཙམ།།ཐོབ་ནས་ལྷ་བསྒོམ་ཙམ་དང་ནི།།བཟླས་བརྗོད་དང་ནི་སྦྱིན་སྲེག་དང་།།ལས་ཚོགས་ལ་སོགས་བསྒྲུབ་པ་ཡི།།དངོས་གྲུབ་དང་ནི་ཕྱག་རྒྱ་ཡི།།ཡེ་ཤེས་སྒྲུབ་པའི་ཆོ་ག་དང་།།གསང་སྔགས་འགའ་ཞིག་ཉན་པ་ལ།།དབང་བ་ཡིན་གྱི་རྒྱུད་འཆད་དང་།།དབང་བསྐུར་དང་ནི་རབ་གནས་སོགས།།སློབ་དཔོན་ཕྲིན་ལས་བྱར་མི་རུང་།།རྡོ་རྗེ་སློབ་དཔོན་དབང་ཐོབ་ནས།།འཁོར་ལོ་ལྷ་ཡི་དེ་ཉིད་སོགས།།རྣམ་དག་དཀྱིལ་འཁོར་བསྒོམ་པ་དང་།།དབང་བསྐུར་དང་ནི་རབ་གནས་སོགས།།སློབ་དཔོན་གྱི་ནི་ཕྲིན་ལས་དང་།།སངས་རྒྱས་ཀུན་གྱི་དམ་ཚིག་དང་།།བླ་ན་མེད་པའི་སྡོམ་པ་སོགས།།རྡོ་རྗེ་སློབ་དཔོན་ཁོ་ནའི་ལས།།ཉིད་ཡིན་གཞན་གྱིས་བྱར་མི་རུང་།།དེང་སང་རབ་གནས་མདོ་ལུགས་ཞེས།།འཆད་པ་སངས་རྒྱས་བསྟན་པ་མིན།།ཁྱིམ་པས་མཁན་སློབ་བྱེད་པ་དང་།།རྡོ་རྗེ་སློབ་དཔོན་མ་ཡིན་པས།།དབང་བསྐུར་རབ་གནས་བྱེད་པ་ནི།།གཉིས་ཀ་བསྟན་པ་མིན་པར་མཚུངས།།ཕྱག་ན་རྡོ་རྗེའི་བསྒོམ་བཟླས་ཀྱང་།།མདོ་སྡེ་རྣམས་ནས་བཤད་པ་མེད།།གཟུངས་ནས་བཤད་པ་དེ་དག་ནི།།བྱ་བའི་རྒྱུད་ཀྱི་ཆོ་ག་ཡིན།།ལྟུང་བཤགས་སངས་རྒྱས་ཕྱག་མཚན་ལ།།ཕུབ་དང་རལ་གྲི་སོགས་འཛིན་པའི།།སྒྲུབ་ཐབས་སངས་རྒྱས་ཀྱིས་མ་གསུངས།།མདོ་དང་རྒྱུད་ཀྱི་ཁྱད་པར་ནི།།ཆོ་གའི་བྱ་བ་ཡོད་མེད་ཡིན།།དེ་ལྟར་ཤེས་ནས་མདོ་སྡེ་དང་།།སྔགས་ཀྱི་ལུགས་རྣམས་དཔྱོད་དེ་སྨྲོས།།ལ་ལ་ཐེག་པ་རིམ་དགུ་ལ།།ལྟ་བ་ཐ་དད་ཡོད་ཅེས་ཟེར།།ཉན་ཐོས་དང་ནི་ཐེག་ཆེན་ལ།།ལྟ་བའི་རིམ་པ་ཡོད་མོད་ཀྱི།།ཕ་རོལ་ཕྱིན་དང་གསང་སྔགས་ལ།།ལྟ་བའི་དབྱེ་བ་བཤད་པ་མེད།།ཕ་རོལ་ཕྱིན་པའི་སྤྲོས་བྲལ་ལས།།ལྷག་པའི་ལྟ་བ་ཡོད་ན་ནི།།ལྟ་དེ་སྤྲོས་པ་ཅན་དུ་འགྱུར།།སྤྲོས་བྲལ་ཡིན་ན་ཁྱད་པར་མེད།།དེས་ན་བཤད་པས་གོ་བ་ཡི།།ཐོས་པའི་ལྟ་བ་གཅིག་ཉིད་ཡིན།།འོན་ཀྱང་སྤྲོས་བྲལ་རྟོགས་པ་ཡི།།ཐབས་ལ་གསང་སྔགས་ཁྱད་པར་འཕགས།།ཁ་ཅིག་དབུ་མའི་ལྟ་བ་ནི།།ཀུན་རྫོབ་ཇི་ལྟར་སྣང་བཞིན་ཡིན།།དོན་དམ་མཐའ་བཞིའི་སྤྲོས་དང་བྲལ།།བྱ་བའི་རྒྱུད་ཀྱི་ཀུན་རྫོབ་ནི།།རིགས་གསུམ་རྒྱལ་བའི་དཀྱིལ་འཁོར་ཡིན།།དོན་དམ་དབུ་མ་དང་མཚུངས་ཟེར།།སྤྱོད་པའི་རྒྱུད་ཀྱི་ཀུན་རྫོབ་དང་།།རྣལ་འབྱོར་རྒྱུད་ཀྱི་ཀུན་རྫོབ་ནི།།རིགས་ལྔའི་རྒྱལ་བར་སྣང་བ་ཡིན།།རྣལ་འབྱོར་ཆེན་པོའི་ཀུན་རྫོབ་ནི།།དམ་པ་རིགས་བརྒྱ་ཡིན་ཞེས་ཟེར།།ལྟ་བསྒོམ་རྣམ་དབྱེ་མ་ཕྱེད་ཅིང་།།ཐབས་དང་ཤེས་རབ་མ་ཤེས་པས།།འདི་འདྲའི་དབྱེ་བ་འཁྲུལ་པ་ཡིན།།འདི་ཡི་འཐད་པ་བཤད་ཀྱིས་ཉོན།།རིགས་གསུམ་ལ་སོགས་སངས་རྒྱས་སུ།།བསྒོམ་པ་ཡིན་གྱི་ལྟ་བ་མིན།།བྱ་སྤྱོད་རྣལ་འབྱོར་རྒྱུད་གསུམ་ལས།།སྣང་བ་ལྷ་རུ་གསུངས་པ་མེད།།འོན་ཀྱང་བྱ་བའི་རྒྱུད་དུ་ནི།།བྲིས་སྐུ་ལྷ་རུ་བསྒོམས་ནས་ཀྱང་།།དེ་ལས་དངོས་གྲུབ་ལེན་པ་ཡིན།།དེས་ན་དཀའ་ཐུབ་གཙང་སྦྲ་ཡིས།།སངས་རྒྱས་མཉེས་ནས་དངོས་གྲུབ་གནང་།།སྤྱོད་པའི་རྒྱུད་དུ་བྲིས་སྐུ་དང་།།རང་ཉིད་གཉིས་ཀ་ལྷར་བསྒོམས་ནས།།གྲོགས་པོ་ལྟ་བུའི་དངོས་གྲུབ་ལེན།།རྣལ་འབྱོར་རྒྱུད་དུ་ཕྱི་རོལ་ལ།།དམིགས་པའི་རྐྱེན་ཙམ་བྱས་ནས་ཀྱང་།།རང་ཉིད་དམ་ཚིག་སེམས་དཔའ་ལ།།ཡེ་ཤེས་འཁོར་ལོ་སྤྱན་དྲངས་ནས།།ཇི་སྲིད་ཕྱག་རྒྱ་མ་བཀྲོལ་བ།།དེ་ཡི་བར་དུ་སངས་རྒྱས་བཞུགས།།ཕྱག་རྒྱ་བཀྲོལ་ནས་སངས་རྒྱས་གཤེགས།།དེ་ནས་རང་ཉིད་ཐ་མལ་འགྱུར།།འདི་དག་གི་ནི་ལུང་སྦྱོར་རྣམས།།ཡི་གེ་མངས་ཀྱིས་དོགས་པས་བཞག།རྣལ་འབྱོར་ཆེན་པོའི་རྒྱུད་དུ་ནི།།དག་པ་གསུམ་གྱི་རང་བཞིན་བཤད།།འདི་ཡི་ལུང་རིགས་མན་ངག་རྣམས།།བླ་མའི་ཞལ་ལས་ལེགས་པར་དྲིས།།གལ་ཏེ་བྱ་བའི་རྒྱུད་ཀྱི་ཡང་།།ཀུན་རྫོབ་ལྷ་རུ་གནས་ན་ནི།།དཀའ་ཐུབ་གཙང་སྦྲ་ག་ལ་འཐད།།ལྷ་ལ་གཙང་དང་མི་གཙང་མེད།།ལྷ་རྣམས་དཀའ་ཐུབ་ཀྱིས་མི་གདུང་།།ཁ་ཅིག་སྤྱོད་པའི་རྒྱུད་ཀྱི་ཡང་།།ལྟ་བ་རྣལ་འབྱོར་རྒྱུད་དང་མཐུན།།སྤྱོད་པ་བྱ་བའི་རྒྱུད་བཞིན་བྱེད།།འདི་ཡང་དེ་ལྟར་ངེས་པ་མེད།།འདི་ནི་གཉིས་ཀའི་རྒྱུད་ཡིན་པས།།རེས་འགའ་གཙང་སྦྲ་སྤྱོད་མོད་ཀྱི།།ཕལ་ཆེར་ཅི་བདེར་སྤྱོད་པར་གསུངས།།སྤྱོད་པའི་རྒྱུད་ལ་རིགས་ལྔ་ཡི།།དོན་གྲུབ་ན་ཡང་ཐ་སྙད་མེད།།ཕྱག་རྒྱ་སྐུ་མདོག་རྣམ་དག་ཀྱང་།།རྣལ་འབྱོར་རྒྱུད་བཞིན་དེར་མ་གསུངས།།དེས་ན་རྣལ་འབྱོར་རྒྱུད་མན་ཆད།།ཀུན་རྫོབ་ལྷ་རུ་གསུངས་པ་མེད།།འོན་ཀྱང་ཀུན་རྫོབ་ཐམས་ཅད་ནི།།ཇི་ལྟར་སྣང་བ་བཞིན་དུ་བས།།བྲིས་སྐུ་ལ་སོགས་ལྷར་བསྒོམ་པ།།དེ་ནི་ཐབས་ཀྱི་ཁྱད་པར་ཡིན།།རྣལ་འབྱོར་ཆེན་པོའི་རྒྱུད་སྡེ་ལས།།ཀུན་རྫོབ་ཇི་ལྟར་སྣང་བ་འདི།།ཐབས་ལ་མཁས་པའི་ཁྱད་པར་གྱིས།།སྦྱང་གཞི་སྦྱོང་བྱེད་ངོ་སྤྲོད་པ།།དེ་ཚེ་དམ་པ་རིགས་བརྒྱ་ལ།།སོགས་པའི་དབྱེ་བ་རྒྱལ་བས་གསུངས།།དེས་ན་ཀུན་རྫོབ་ལྡོག་པ་དང་།།ལྷ་ཡི་ལྡོག་པ་མ་ཕྱེད་པས།།གསང་སྔགས་རྙིང་མའི་ཀུན་རྫོབ་ཀུན།།ལྟ་བ་དང་འཁྲུལ་དེ་ལྟར་ཡིན།།གསང་སྔགས་སྔ་འགྱུར་བ་རྣམས་ནི།།རྣལ་འབྱོར་རྣལ་འབྱོར་ཆེན་པོ་དང་།།རྗེས་སུ་རྣལ་འབྱོར་ཤིན་ཏུ་ནི།།རྣལ་འབྱོར་ཞེས་བྱ་རྣམ་པ་བཞི།།ཐེག་པའི་རིམ་པ་ཡིན་ཞེས་ཟེར།།ཤིན་ཏུ་རྣལ་འབྱོར་བཟང་བར་འདོད།།གསང་སྔགས་ཕྱི་འགྱུར་བ་རྣམས་ནི།།རྣལ་འབྱོར་རྗེས་སུ་རྣལ་འབྱོར་དང་།།ཤིན་ཏུ་རྣལ་འབྱོར་རྣལ་འབྱོར་ཆེ།།འདི་དག་ཏིང་འཛིན་རིམ་ཡིན་གྱི།།རྒྱུད་སྡེའི་རིམ་པར་མི་བཞེད་དོ།།དེས་ན་རྒྱུད་སྡེ་བཞི་པོ་ཡི།།རྣལ་འབྱོར་རྣལ་འབྱོར་ཆེན་པོ་དང་།།རྣལ་འབྱོར་བཞི་ཡི་རྣལ་འབྱོར་དང་།།རྣལ་འབྱོར་ཆེན་པོ་མི་གཅིག་གོ།དཔེར་ན་ཀླུ་ཆེན་པདྨ་དང་།།པདྨ་ཆེན་པོ་ཞེས་བྱ་དང་།།མེ་ཏོག་པདྨ་པད་ཆེན་གཉིས།།མིང་མཐུན་ན་ཡང་དོན་མི་གཅིག།དེས་ན་གསང་སྔགས་གསར་མ་ལ།།རྣལ་འབྱོར་ཆེན་པོའི་ལྟག་ན་ནི།།དེ་བས་ལྷག་པའི་རྒྱུད་སྡེ་མེད།།བསྒོམ་པའི་དམིགས་པ་ཉིད་ཀྱང་ནི།།རྣལ་འབྱོར་ཆེན་པོའི་གོང་ན་མེད།།དེ་ལས་སྐྱེས་པའི་ཡེ་ཤེས་ནི།།སྤྲོས་པ་མེད་ཅིང་བརྗོད་བྲལ་བས།།ཐེག་པའི་རིམ་པར་མི་བཞེད་དོ།།ལུགས་འདི་ལེགས་པར་ཤེས་གྱུར་ན།།ཨ་ཏི་ཡོ་གའི་ལྟ་བ་ཡང་།།ཡེ་ཤེས་ཡིན་གྱི་ཐེག་པ་མིན།།བརྗོད་བྲལ་བརྗོད་བྱར་བྱས་པ་ནི།།མཁས་པའི་དགོངས་པ་མིན་ཞེས་བྱ།།དེས་ན་ཐོས་པའི་ལྟ་བ་ནི།།དབུ་མ་ཡན་ཆད་ཐམས་ཅད་མཐུན།།དེ་ཕྱིར་ལྟ་བའི་ལུང་སྦྱོར་ཀུན།།ཕ་རོལ་ཕྱིན་བཞིན་ཐམས་ཅད་མཛད།།དེ་རྟོགས་པ་ཡི་ཐབས་ལ་ནི།།ཐེག་པའི་རིམ་པ་ཡོད་པ་ཡིན།།རྒྱུད་སྡེ་བཞི་ཡི་བསྒྲུབ་པ་ཡང་།།འཁྲུལ་པར་བྱས་ན་དངོས་གྲུབ་རིང་།།བྱ་བའི་རྒྱུད་ལ་བདག་བསྐྱེད་མེད།།བྲིས་སྐུ་མཆོད་ནས་གསོལ་བ་འདེབས།།བདག་བསྐྱེད་སྒྲུབ་ཐབས་ཡོད་པ་ནི།།རྣལ་འབྱོར་རྒྱུད་ཀྱི་རྗེས་འབྲངས་ནས།།དེ་ཡི་ལུགས་བཞིན་མཛད་པ་ཡིན།།དེ་ལྟར་བྱེད་ན་སྨྱུང་གནས་མེད།།བདག་ཉིད་ལྷ་རུ་བསྐྱེད་པ་ལ།།མཆོད་ན་བསོད་ནམས་བརྙས་ན་སྡིག།གལ་ཏེ་སྨྱུང་གནས་བྱེད་འདོད་ན།།རང་ཉིད་ཐ་མལ་ང་རྒྱལ་གྱིས།།བྲིས་སྐུ་ཆོ་ག་བཞིན་བྲིས་ལ།།རྗེ་དཔོན་བཞིན་དུ་དངོས་གྲུབ་བླང་།།དེ་ལ་ཤ་ཆང་གཏོར་མ་མེད།།གླ་རྩི་ལ་སོགས་སྲོག་ཆགས་དང་།།འབྲེལ་པའི་མཆོད་པ་ཐམས་ཅད་སྤོངས།།གུ་ལང་མཆོད་པའི་ལྷག་མ་དང་།།གཏོར་མའི་ཁ་ཟས་འདིར་མི་ཟ།།ལྷ་ལ་ཕུལ་བའི་དམན་མ་སོགས།།ཟ་དང་འགོམ་པ་གཉིས་ཀ་བཀག།དཀར་གསུམ་ལ་སོགས་ཁ་ཟས་དང་།།གཙང་སྦྲ་ལ་སོགས་བརྟུལ་ཞུགས་ཀྱིས།།བྱ་བའི་རྒྱུད་ཀྱི་གསང་སྔགས་འགྲུབ།།སྤྱོད་དང་རྣལ་འབྱོར་རྒྱུད་གཉིས་སུ།།ལས་ཚོགས་བསྒྲུབ་པ་འགའ་ཞིག་ལ།།གཙང་སྦྲ་དཀའ་ཐུབ་བཤད་པ་ཡོད།།གཞན་དུ་དཀའ་ཐུབ་སྨྱུང་གནས་སོགས།།བརྟུལ་ཞུགས་ཁྱད་པར་གཙོར་མི་མཛད།།རང་ཉིད་ལྷ་ཡི་རྣལ་འབྱོར་བསྒོམ།།གླ་རྩིའི་རེང་བུ་ལ་སོགས་པ།།སྲོག་ཆགས་ཡན་ལག་ལས་བྱུང་བའི།།མཆོད་པ་རྣམས་ཀྱང་འདིར་མི་འགོག།སངས་རྒྱས་མཆོད་པའི་ལྷག་མ་རྣམས།།སྡིག་པ་སྤང་ཕྱིར་བཟའ་འོ་ཞེས།།རབ་ཏུ་གནས་པའི་རྒྱུད་ལས་གནང་།།འབྱུང་པོའི་གཏོར་མ་འདིར་མི་ཟ།།རྣལ་འབྱོར་ཆེན་པོའི་རྒྱུད་རྣམས་ལས།།ཨ་བ་དྷཱུ་ཏཱིའི་སྤྱོད་སོགས་ལ།།འབྱུང་པོའི་གཏོར་མ་ཟ་བའང་གནང་།།དཀའ་ཐུབ་ལ་སོགས་བརྟུལ་ཞུགས་འགོག།འཇུག་པ་བདེ་བའི་རྣལ་འབྱོར་གྱིས།།གསང་སྔགས་རྒྱལ་པོ་ཚེ་འདིར་འགྲུབ།།འདི་དག་རྒྱས་པར་བླ་མ་མཆོག།མཁས་པའི་གསུང་ལས་ཤེས་པར་གྱིས།།གྲུབ་མཐའི་རྣམ་དབྱེ་མི་ཤེས་ཤིང་།།རྒྱུད་སྡེའི་ཁྱད་པར་མ་ཕྱེད་པར།།ཆོ་ག་ཐམས་ཅད་དཀྲུགས་ནས་ནི།།རང་བཟོའི་རྣམ་ཐར་སྤྱོད་པ་མཚར།།དབང་བཞི་ཡོངས་སུ་རྫོགས་པ་དང་།།དང་པོར་རང་གི་ཁྱིམ་དུ་བསྒོམ།།བརྟན་པ་ཐོབ་ནས་དུད་ཁྲོད་སོགས།།བརྟན་པ་ཆེན་པོ་ཐོབ་ནས་ནི།།ལུས་དང་ངག་གི་བརྡ་རྣམས་ལ།།ལེགས་པར་སྦྱངས་ཤིང་དེ་ཉིད་རྟོགས།།ས་རྣམས་བགྲོད་པར་བྱ་བ་དང་།།ཡུལ་རྣམས་དབང་དུ་བསྡུ་བའི་ཕྱིར།།གནས་དང་ཉེ་བའི་གནས་ལ་སོགས།།ཡུལ་ཆེན་སུམ་ཅུ་སོ་བདུན་དུ།།རིག་པའི་བརྟུལ་ཞུགས་སྤྱོད་ཕྱིར་རྒྱུ།།ལུགས་འདི་རྣལ་འབྱོར་ཆེན་པོ་ཡི།།རྒྱུད་དང་བསྟན་བཅོས་རྣམས་ལས་གསུངས།།འདི་འདྲའི་སྤྱོད་པ་ཤེས་ནས་ནི།།ཚེ་འདི་ཉིད་ལ་རྫོགས་སངས་རྒྱ།།དེང་སང་གསང་སྔགས་མི་ཤེས་པར།།སྔགས་ཀྱི་ལུགས་སུ་འཆོས་པ་མཐོང་།།རིམ་པ་གཉིས་པོ་མི་བསྒོམ་ན།།ཡུལ་ཆེན་སུམ་ཅུ་སོ་བདུན་དུ།།འགྲོ་བ་སངས་རྒྱས་ཀྱིས་མ་གསུངས།།རིམ་པ་གཉིས་པོ་མི་བསྒོམ་པའི།།སྒོམ་ཆེན་བཟང་ཡང་ཕ་རོལ་ཏུ།།ཕྱིན་པའི་སྒོམ་ཆེན་ལས་མ་འདས།།མདོ་ལས་ཡུལ་ཆེན་དེ་དག་ཏུ།།འགྲོ་བའི་ཆོ་ག་བཤད་པ་མེད།།གལ་ཏེ་གསང་སྔགས་མི་བསྒོམ་ཞིང་།།རྟོགས་པ་ཡོད་པར་རློམ་པ་ཡིས།།ཡུལ་དེར་ཕྱིན་ན་བར་ཆད་འབྱུང་།།ཅི་ཡང་མེད་པའི་སྒོམ་ཆེན་གྱིས།།ཕྱིན་ཡང་ཕན་གནོད་གང་ཡང་མེད།།ཨུ་རྒྱན་ཛཱ་ལནྡྷ་ར་དང་།།གངས་ཅན་དེ་བཱི་ཀོ་ཊ་སོགས།།ཀླ་ཀློ་བླུན་པོ་མུ་སྟེགས་བྱེད།།འབྲོག་པ་རྣམས་ཀྱིས་གང་མོད་ཀྱང་།།དེ་དག་གྲུབ་པ་ཐོབ་བམ་ཅི།།གསང་སྔགས་བསྒོམ་པའི་རྟོགས་པ་ཅན།།བརྡ་དོན་འཕྲོད་པའི་སྐལ་བར་ལྡན།།དེ་ལ་ཡུལ་དེར་གནས་པ་ཡི།།མཁའ་འགྲོ་རྣམས་ཀྱི་བྱིན་གྱིས་རློབ།།འདི་དོན་རྣལ་འབྱོར་ཆེན་པོ་ཡི།།རྒྱུད་སྡེ་རྣམས་སུ་ལེགས་པར་ལྟོས།།དེས་ན་གསང་སྔགས་མི་བསྒོམ་པར།།ཡུལ་ཆེན་བགྲོད་པ་དོན་མེད་ཡིན།།དཔལ་ལྡན་དུས་ཀྱི་འཁོར་ལོ་དང་།།མངོན་པའི་གཞུང་ལས་གསུངས་པ་ཡི།།གངས་རི་གསེར་གྱི་བྱ་སྐྱིབས་དང་།།འཛམ་བུའི་ཤིང་དང་ས་སྲུང་བུ།།གླང་ཆེན་ལྔ་བརྒྱས་བསྐོར་བ་དང་།།དགྲ་བཅོམ་ལྔ་བརྒྱ་བཞུགས་པའི་གནས།།གངས་ཅན་དེ་ནི་ཏི་སེ་མིན།།མ་དྲོས་རྒྱ་མཚོ་མ་ཕམ་མིན།།གླང་པོ་རྣམས་ཀྱང་དེ་ན་མེད།།དེ་བཞིན་འཛམ་བུའི་ལྗོན་པ་དང་།།གསེར་གྱི་བྱ་སྐྱིབས་ག་ལ་ཡོད།།དེ་ཡི་གཏན་ཚིགས་འདི་ལྟར་ཡིན།།དཔལ་ལྡན་དུས་ཀྱི་འཁོར་ལོ་ལས།།ཆུ་བོ་སི་ཏཱའི་བྱང་ཕྱོགས་ན།།རི་བོ་གངས་ཅན་ཡོད་པར་གསུངས།།དེ་ཡི་འགྲམ་ན་ཤམྦྷ་ལ།།གྲོང་ཁྱེར་བྱེ་བ་དགུ་བཅུ་དྲུག།དེ་ན་རྒྱལ་པོའི་ཕོ་བྲང་མཆོག།ཀཱ་ལ་པ་ཞེས་བྱ་བ་ཡོད།།དེ་ན་སྤྲུལ་པའི་རྒྱལ་པོ་རྣམས།།ལོ་གྲངས་བརྒྱ་བརྒྱར་ཆོས་གསུང་ངོ་།།དེ་ན་ནགས་ཚལ་སྣ་ཚོགས་དང་།།བཟའ་ཤིང་ར་བ་དུ་མ་ཡོད།།སྙིགས་མའི་དུས་སུ་འཕགས་པའི་ཡུལ།།ཀླ་ཀློའི་ཆོས་ཀྱིས་གང་བར་འགྱུར།།དེ་ནས་ཀླ་ཀློའི་རྫུ་འཕྲུལ་གྱིས།།ཤམྦྷ་ལ་རུ་དམག་འདྲེན་འགྱུར།།དེ་ཚེ་ཕྱག་ན་རྡོ་རྗེ་ཡི།།སྤྲུལ་པ་དྲག་པོ་ཞེས་བྱ་བའི།།རྒྱལ་པོས་ཀླ་ཀློ་ཀུན་བཅོམ་ནས།།འཕགས་པའི་ཡུལ་གྱི་བར་དུ་ཡང་།།སངས་རྒྱས་བསྟན་པ་སྤེལ་བར་གསུངས།།དེས་ན་རི་བོ་གངས་ཅན་དུ།།རྫུ་འཕྲུལ་མེད་པས་འགྲོ་མི་ནུས།།མངོན་པ་ལས་ཀྱང་འདི་སྐད་དུ།།འདི་ནས་བྱང་དུ་རི་ནག་པོ།།དགུ་འདས་གངས་རིའོ་དེ་ནས་ནི།།སྤོས་ངད་ལྡན་པའི་ཚུ་རོལ་ན།།ཆུ་ཞེང་ལྔ་བཅུ་ཡོད་པའི་མཚོ།།ཞེས་སོགས་མཚན་ཉིད་རྒྱས་པར་གསུངས།།དེར་ནི་རྫུ་འཕྲུལ་མི་ལྡན་པས།།བགྲོད་པར་བྱ་བ་མིན་ཞེས་བཤད།།ད་ལྟའི་ཏི་སེ་འདི་ལ་ནི།།མཚན་ཉིད་འདི་དག་གང་ཡང་མེད།།མུ་སྟེགས་བྱེད་པའི་གཞུང་ལས་ཀྱང་།།ཤར་ནུབ་གཉིས་ཀྱི་རྒྱ་མཚོའི་བར།།གངས་ཅན་གྱིས་ནི་ཁྱབ་པར་བཤད།།ཧ་ནུ་མནྠས་འཕངས་པ་ཡི།།གངས་རིའི་དུམ་བུ་འཚར་བ་ཞིག།ཏི་སེ་ཡིན་ཞེས་གྲོག་མཁར་སྨྲ།།དེས་ན་དབང་ཕྱུག་ཆེན་པོའི་གནས།།ས་སྲུང་བུ་ཡིས་བརྟེན་པའི་ས།།དགྲ་བཅོམ་ལྔ་བརྒྱ་བཞུགས་པའི་ཡུལ།།ད་ལྟའི་ཏི་སེ་འདི་མ་ཡིན།།རྨ་བྱ་ཆེན་མོའི་མདོ་ལས་ཀྱང་།།གངས་ཅན་ཏི་སེ་ཐ་དད་གསུངས།།ཕལ་པོ་ཆེ་ཡི་མདོ་ལས་ཀྱང་།།མ་དྲོས་པ་ཡི་ཆུ་ཞེང་དུ།།དཔག་ཚད་ལྔ་བཅུ་ལྔ་བཅུར་གསུངས།།ས་གཞིར་རིན་ཆེན་གསེག་མ་བདལ།།ངོས་ནི་རིན་ཆེན་ཕ་གུར་བརྩིགས།།དེ་ལས་འབབ་པའི་ཆུ་བོ་བཞི།།གངྒཱ་གླང་ཆེན་ཁ་ནས་ནི།།དངུལ་གྱི་བྱེ་མ་འདྲེན་ཅིང་འབབ།།སི་ཏཱ་སེང་གེའི་ཁ་ནས་ནི།།རྡོ་རྗེའི་བྱེ་མ་འདྲེན་ཅིང་འབབ།།སིནྡྷུ་གླང་གི་ཁ་ནས་ནི།།གསེར་གྱི་བྱེ་མ་འདྲེན་ཅིང་འབབ།།པཀྵུ་རྟ་ཡི་ཁ་ནས་ནི།།བཻཌཱུརྻ་སྔོན་འདྲེན་ཅིང་འབབ།།ཐམས་ཅད་ཀྱི་ནི་ཁ་ཞེང་ལ།།དཔག་ཚད་རེ་རེ་ཡོད་པར་གསུངས།།ཆུ་བོ་དེ་བཞིས་མ་དྲོས་ལ།།ལན་གྲངས་བདུན་བདུན་གཡས་བསྐོར་ནས།།ཕྱོགས་བཞི་དག་ཏུ་འབབ་པར་བཤད།།དེ་ཡི་བར་མཚམས་ཐམས་ཅད་ནི།།ཨུཏྤལ་པདྨ་ལ་སོགས་ཀྱི།།མེ་ཏོག་རྣམ་པ་སྣ་ཚོགས་དང་།།རིན་ཆེན་ལྗོན་ཤིང་སྣ་ཚོགས་ཀྱིས།།རབ་ཏུ་གང་བར་གནས་པ་ཡིན།།དེ་སོགས་མཚན་ཉིད་རྒྱས་པར་ནི།།ཕལ་པོ་ཆེ་ཡི་མདོ་སྡེར་ལྟོས།།ད་ལྟའི་མ་ཕམ་འདི་ལ་ནི།།མཚན་ཉིད་དེ་དག་གང་ཡང་མེད།།དེ་ལ་ཁ་ཅིག་འདི་སྐད་དུ།།བྱ་རྒོད་ཕུང་པོའི་རི་ལ་ཡང་།།དཀོན་བརྩེགས་བཞིན་དུ་ད་ལྟ་མེད།།དུས་ཀྱི་སྟོབས་ཀྱིས་ཡུལ་ཀུན་ཡང་།།རྣམ་པ་འགྱུར་བར་སྣང་ཞེས་ཟེར།།འདི་ཡང་ཕྱེ་སྟེ་བཤད་ཀྱིས་ཉོན།།དངོས་པོའི་གནས་ལུགས་འཆད་པ་དང་།།སྐྱོན་ཡོན་བསྔགས་པ་རྣམ་གཉིས་ཡོད།།སྐྱོན་དང་ཡོན་ཏན་སྒྲོགས་པ་ན།།སྙན་ངག་མཁན་གྱི་ལུགས་བཞིན་དུ།།བྱ་རྒོད་ཕུང་པོའི་རི་ལ་ཡང་།།མཐོ་བ་ཟླུམ་པ་ལ་སོགས་བཤད།།བོད་ཀྱི་ཐང་ཆེན་ཇི་བཞིན་དུ།།འཕགས་པའི་ཡུལ་གྱི་རི་ཆེན་ཡིན།།དེ་ལྟར་འཆད་ལ་སྙན་ངག་མཁན།།སྐྱོན་དུ་བརྩི་བ་གང་ཡང་མེད།།དངོས་པོའི་གནས་ལུགས་འཆད་པ་ན།།ལྷག་ཆད་འཁྲུལ་པ་བྱུང་བ་ལ།།དེ་ལ་མཁས་རྣམས་སྐྱོན་དུ་བརྩི།།དཔེར་ན་བ་ལང་བསྔགས་པའི་ཚེ།།གངས་རིའི་ཕུང་པོ་འགྲོ་ཤེས་པའམ།།སྤྲིན་ཆད་པ་ཡི་དུམ་བུ་དང་།།རྭ་རྩེ་རྡོ་རྗེ་འདྲ་བ་དང་།།རྨིག་པ་ཨིནྡྲ་ནཱི་ལ་དང་།།རྔ་མ་དཔག་བསམ་ལྗོན་པ་སོགས།།གཞན་ཡང་སྐྱེས་བུ་བསྔགས་པ་ན།།བཞིན་ལ་ཉི་མ་ཟླ་བ་དང་།།སོ་ལ་གངས་རིའི་ཕྲེང་བ་སོགས།།རྒྱ་ཆེ་བ་ལ་ནམ་མཁའི་དཔེ།།ཆུང་ལ་རྡུལ་ཕྲན་དཔེ་སྦྱོར་དང་།།རགས་པའི་དཔེ་ལ་རི་རབ་དང་།།བྱི་བ་ལ་ནི་གླང་ཆེན་དཔེ།།ཕྱུག་པོ་ལ་ནི་རྣམ་ཐོས་བུ།།རྒྱལ་ཕྲན་ལ་ཡང་བརྒྱ་བྱིན་དཔེ།།དགེ་བའི་བཤེས་གཉེན་ཕལ་པ་ལའང་།།སངས་རྒྱས་ལྟ་བུར་བསྔགས་པ་ནི།།སྙན་ངག་མཁན་ལ་བཀག་པ་མེད།།དངོས་པོའི་གནས་ལུགས་འཆད་པའམ།།མཚན་ཉིད་གཏན་ལ་འབེབས་པ་ན།།གནས་ལུགས་ཇི་བཞིན་མ་ཡིན་པ།།བཤད་ན་མཁས་རྣམས་ག་ལ་དགའ།།དེས་ན་བྱ་རྒོད་ཕུང་པོ་སོགས།།བསྔགས་པ་སྙན་ངག་ལུགས་བཞིན་ཡིན།།གངས་ཅན་མ་དྲོས་ལ་སོགས་པ།།དངོས་པོའི་གནས་ལུགས་འཆད་པ་ན།།དེ་ལ་འཁྲུལ་ན་ཀུན་མཁྱེན་མིན།།སྙིགས་མའི་དུས་ཀྱི་ཤུགས་བརྟས་པས།།ཅུང་ཟད་ངན་པར་འགྲོ་སྲིད་ཀྱི།།ཐམས་ཅད་འཁྲུལ་པར་ག་ལ་སྲིད།།ཙ་རི་ཏྲ་ཞེས་བྱ་བའི་ཡུལ།།ལྷོ་ཕྱོགས་རྒྱ་མཚོའི་འགྲམ་ན་ཡོད།།ཙ་རི་ཙ་གོང་དེ་མ་ཡིན།།དེ་བཱི་ཀོ་ཊའི་གནས་གཞན་ཞིག།ཙ་རི་ཡིན་ཞེས་ལ་ལ་སྨྲ།།རྡོ་རྗེ་མཁའ་འགྲོའི་རྒྱུད་ལས་ནི།།དེ་བཱི་ཀོ་ཊར་བྷ་ཏྲ་གནས།།ཞེས་གསུངས་གཞན་ཡང་དེ་ཉིད་ལས།།བོད་ཡུལ་ལྷན་ཅིག་སྐྱེས་མ་ནི།།རྡོ་བའི་ཕུག་ལ་བརྟེན་ཏེ་གནས།།ཡུལ་དེར་གནས་པའི་ལྷ་མོ་ནི།།བྷ་ཏྲའི་ཤིང་ལ་བརྟེན་ཞེས་གསུངས།།དེ་ཡི་ཕྱོགས་ན་བྷ་ཏྲའི་ཤིང་།།ཡོད་ན་ཡུལ་དེ་འགལ་བ་མེད།།ཏི་སེ་དང་ནི་ཙ་རི་སོགས།།གལ་ཏེ་གནས་ཆེན་ཡིན་ན་ཡང་།།ཡུལ་དེར་འགྲོ་བའི་གང་ཟག་ནི།།དབང་བསྐུར་ཐོབ་ཅིང་དམ་ཚིག་ལྡན།།བརྡ་དང་བརྡ་ཡི་ལན་ཤེས་ཤིང་།།རིམ་གཉིས་རྟོགས་པ་བརྟན་པ་ཡིས།།སྤྱོད་པའི་དོན་དུ་རྒྱུ་བར་གསུངས།།དེ་ལྟ་མིན་པའི་གང་ཟག་གིས།།ཡུལ་དེར་འགྲོ་བ་རྒྱུད་ལས་བཀག།ཁ་ཅིག་དཀར་པོ་ཆིག་ཐུབ་ལས།།འབྲས་བུ་སྐུ་གསུམ་འབྱུང་ཞེས་ཟེར།།གཅིག་ལས་འབྲས་བུ་འབྱུང་མི་ནུས།།གལ་ཏེ་གཅིག་ལས་འབྲས་བུ་ཞིག།བྱུང་ཡང་ཉན་ཐོས་འགོག་པ་བཞིན།།འབྲས་བུ་དེ་ཡང་གཅིག་ཏུ་འགྱུར།།འགའ་ཞིག་ཆིག་ཐུབ་བསྒོམས་པ་ཡི།།རྗེས་ལ་བསྔོ་བ་བྱ་དགོས་ཟེར།།འོ་ན་ཆིག་ཐུབ་གཉིས་སུ་འགྱུར།།དེ་ལའང་སྐྱབས་འགྲོ་སེམས་བསྐྱེད་དང་།།ཡི་དམ་ལྷ་བསྒོམ་ལ་སོགས་པ།།དགོས་ན་ཆིག་ཐུབ་དུ་མར་འགྱུར།།དེས་ན་ཆིག་ཐུབ་འདི་འདྲའི་ལུགས།།རྫོགས་སངས་རྒྱས་ཀྱིས་གསུངས་པ་མེད།།ཐུབ་པས་སྟོང་ཉིད་བསྔགས་པ་ནི།།དངོས་པོར་འཛིན་པ་བཟློག་ཕྱིར་ཡིན།།སངས་རྒྱས་ཕྱག་འཚལ་བརྗོད་ཙམ་གྱིས།།འཁོར་བ་ལས་ནི་ཐར་ཅེས་གསུངས།།དེ་བཞིན་མཆོད་རྟེན་བསྐོར་བ་དང་།།རྟེན་འབྲེལ་ཙམ་ཞིག་ཐོས་སོགས་དང་།།སྔགས་འབྲུ་འགའ་ཞིག་དྲན་ཙམ་གྱིས།།སྡིག་པ་ཀུན་ལས་གྲོལ་འགྱུར་ཞེས།།གསུངས་པའི་དགོངས་པ་མི་ཤེས་པར།།ཚིག་འབྲུ་ཙམ་ལ་བརྟེན་མི་བྱ།།མདའ་རྐྱང་ལ་ནི་བྱེད་པ་མེད།།གཞུ་བཟང་འཕེན་པ་མཁས་གྱུར་ན།།དེ་ཡིས་འདོད་པའི་བྱ་བ་འགྲུབ།།དེ་བཞིན་སྟོང་ཉིད་རྐྱང་པ་ལ།།བྱེད་པ་ཅི་ཡང་ཡོད་མ་ཡིན།།ཐབས་དང་ཤེས་རབ་ལེགས་འབྲེལ་ན།།འདོད་པའི་འབྲས་བུ་རིམ་བཞིན་ཐོབ།།རྡོ་རྗེ་གུར་ལས་འདི་སྐད་གསུངས།།གལ་ཏེ་སྟོང་པ་ཐབས་ཡིན་ན།།དེ་ཚེ་སངས་རྒྱས་ཉིད་མི་འབྱུང་།།འབྲས་བུ་རྒྱུ་ལས་གཞན་མིན་ཕྱིར།།ཐབས་ནི་སྟོང་པ་ཉིད་མ་ཡིན།།ལྟ་བ་རྣམས་ལས་བཟློག་པ་དང་།།བདག་ཏུ་ལྟ་བ་ཚོལ་རྣམས་ཀྱི།།བདག་ཞེན་བསམ་པ་བཟློག་པའི་ཕྱིར།།སྟོང་པ་རྒྱལ་བ་རྣམས་ཀྱིས་གསུངས།།དེ་ཕྱིར་དཀྱིལ་འཁོར་འཁོར་ལོ་ཞེས།།ཐབས་ནི་བདེ་བའི་སྡོམ་པ་སྟེ།།སངས་རྒྱས་ང་རྒྱལ་རྣལ་འབྱོར་གྱིས།།སངས་རྒྱས་ཉིད་དུ་ངེས་པར་འགྲུབ།།དེ་སོགས་ཤིན་ཏུ་གསལ་བར་གསུངས།།རྣམ་སྣང་མངོན་བྱང་ལས་ཀྱང་ནི།།ཐབས་དང་མི་ལྡན་ཡེ་ཤེས་དང་།།བསླབ་པ་དག་ཀྱང་གསུངས་པ་ནི།།དཔའ་བོ་ཆེན་པོས་ཉན་ཐོས་རྣམས།།དེ་ལ་གཞུག་པའི་ཕྱིར་གསུངས་སོ།།གང་དག་དུས་གསུམ་མགོན་པོ་རྣམས།།ཐབས་དང་ཤེས་རབ་ལྡན་པ་ལ།།བསླབས་ནས་བླ་མེད་ཐེག་པ་ནི།།འདུས་མ་བྱས་པ་དེས་ཐོབ་བོ།།ཞེས་གསུངས་པ་ཡང་ཤེས་པར་གྱིས།།ཆོས་ཀྱི་གྲགས་པས་རྣམ་འགྲེལ་ལས།།རྣམ་པ་དུ་མར་ཐབས་མང་པོ།།ཡུན་རིང་དུས་སུ་གོམས་པ་ལས།།དེ་ལ་སྐྱོན་དང་ཡོན་ཏན་དག།རབ་ཏུ་གསལ་བ་ཉིད་དུ་འགྱུར།།དེས་ན་ཐུགས་ཀྱང་གསལ་བའི་ཕྱིར།།རྒྱུ་ཡི་བག་ཆགས་སྤངས་པ་ཡིན།།ཐུབ་ཆེན་གཞན་དོན་འཇུག་ཅན་གྱི།།བསེ་རུ་སོགས་ལས་ཁྱད་འདི་ཡིན།།དེ་དོན་ཕྱིར་ན་ཐབས་གོམས་པ།།དེ་ཉིད་སྟོན་པ་ཡིན་པར་བཞེད།།ཅེས་གསུངས་པ་ཡང་དེ་ཉིད་ཡིན།།དེས་ན་ཐབས་ལ་མ་སྦྱངས་ན།།ཤེས་བྱ་ཐམས་ཅད་མཁྱེན་པ་དང་།།གཞན་དོན་མཛད་པ་མི་སྲིད་དོ།།ཐགས་ཀྱི་རྒྱུ་རྣམས་ཕལ་ཆེར་མཐུན།།སྤུན་གྱི་དབྱེ་བས་བཟང་ངན་འབྱུང་།།དེ་བཞིན་སྟོང་ཉིད་ཕལ་ཆེར་མཐུན།།འབྲས་བུའི་བཟང་ངན་ཐབས་ཀྱིས་བྱེད།།སྟོང་ཉིད་ལྟ་བས་མྱ་ངན་འདའ།།ཐབས་ལ་མཁས་ན་རྫོགས་འཚང་རྒྱ།།དེས་ན་སངས་རྒྱས་ཐོབ་འདོད་ན།།ཐབས་མཁས་པ་ལ་ནན་ཏན་གྱིས།།དགྲ་བཅོམ་པ་དང་རང་སངས་རྒྱས།།རྫོགས་པའི་སངས་རྒྱས་རྣམ་པ་གསུམ།།རྣམ་པར་གྲོལ་བར་མཚུངས་ན་ཡང་།།བཟང་ངན་ཐབས་ཀྱིས་ཕྱེ་བ་ཡིན།།དེ་ཡང་མདོ་སྡེ་རྒྱན་ལས་ནི།།ཇི་ལྟར་མདུད་པའི་བྱེ་བྲག་གིས།།གོས་ལ་ཚོན་བཀྲ་མི་བཀྲ་བ།།དེ་བཞིན་འཕེན་པའི་དབང་གིས་ནི།།གྲོལ་བའི་ཡེ་ཤེས་བཀྲ་མི་བཀྲ།དེ་སྐད་གསུངས་པའང་དོན་འདི་ཡིན།།སློབ་དཔོན་མ་ཏི་ཙི་ཏྲས་ཀྱང་།།བསེ་རུའི་རྭ་དང་འདྲ་གང་དང་།།གང་ཡང་ཁྱོད་ཀྱི་རྗེས་འགྲོ་སློབ།།ཞི་བ་ཙམ་གྱིས་ཁྱོད་དང་མཚུངས།།བསམ་ཡས་ཡོན་ཏན་ཚོགས་ཀྱིས་མིན།།ཞེས་གསུངས་པ་ཡང་དོན་འདི་ཡིན།།དེས་ན་སངས་རྒྱས་ཐོབ་འདོད་ན།།སྟོང་པ་ཉིད་ལ་འདྲིས་པར་གྱིས།།ཐབས་མཁས་པ་ལ་འབད་པས་སྒོམས།།སྟོང་ཉིད་ལ་ནི་འདྲིས་བྱ་ཡི།།སྟོང་ཉིད་མངོན་དུ་མ་བྱེད་ཅེས།།ཤེས་རབ་ཕ་རོལ་ཕྱིན་ལས་གསུངས།།སྟོང་ཉིད་རྐྱང་པ་བསྒོམས་ན་ནི།།སྟོང་ཉིད་ཉིད་ཀྱང་རྟོགས་མི་ནུས།།གལ་ཏེ་སྟོང་ཉིད་རྟོགས་ན་ཡང་།།ཉན་ཐོས་ཀྱི་ནི་འགོག་པར་ལྟུང་།།འཕགས་པ་དཀོན་མཆོག་བརྩེགས་པ་ལས།།སེང་གེ་གང་ལའང་མི་འཇིགས་མོད།།མེ་ཆེན་མཐོང་ན་འཇིགས་པ་སྐྱེ།།དེ་བཞིན་བྱང་ཆུབ་སེམས་དཔའ་ཡང་།།ཆོས་གཞན་གང་ལའང་མི་འཇིགས་ཀྱང་།།སྟོང་པ་ཉིད་ལ་སྐྲག་ཅེས་གསུངས།།དེ་ཡི་དགོངས་པ་འདི་ལྟར་ཡིན།།ཐབས་དང་བྲལ་བའི་སྟོང་ཉིད་ཀྱིས།།མྱ་ངན་འདས་པར་འགྱུར་ཕྱིར་རོ།།ལ་ལ་སྟོང་ཉིད་བསྒོམས་པ་ལས།།འབྲས་བུ་སྐུ་གསུམ་འདོད་པ་དང་།།ལ་ལ་ཟུང་འཇུག་བསྒོམས་པ་ལས།།འབྲས་བུ་འོད་གསལ་འདོད་པ་ཡོད།།རྒྱུ་འབྲས་ཕྱིན་ཅི་ལོག་པའི་ཕྱིར།།གཉི་ག་ཡང་ནི་སྐྱོན་ཅན་ཡིན།།ཁ་ཅིག་ས་ལམ་མི་བགྲོད་པར།།རྫོགས་འཚང་རྒྱ་བར་འདོད་པ་དང་།།ཏི་སེ་ལ་སོགས་བསྐོར་བ་དང་།།རྩ་མདུད་མེད་སོགས་འདོད་པ་ཡང་།།རྒྱུད་སྡེའི་དགོངས་པ་མ་ཤེས་པས།།དེ་དག་ཤིན་ཏུ་འགལ་བ་ཡིན།།ཕྱི་རུ་ཡུལ་རྣམས་བགྲོད་པ་དང་།།ནང་དུ་རྩ་མདུད་གྲོལ་བ་ནི།།ས་བཅུ་ལ་སོགས་བགྲོད་པ་ཡི།།རྟེན་འབྲེལ་ཉིད་ཀྱིས་འབྱུང་བ་ཡིན།།འདི་དོན་རྣལ་འབྱོར་ཆེན་པོ་ཡི།།རྒྱུད་ཀྱི་ས་ལམ་སྐབས་སུ་ལྟོས།།དེས་ན་ས་ལམ་མི་བགྲོད་པའི།།ཡུལ་སོགས་བགྲོད་པ་བཞད་གད་གནས།།ལ་ལ་དབང་བཞི་མི་འདོད་ཅིང་།།བསྐྱེད་རིམ་ལ་སོགས་ལམ་བཞི་པོའི།།རྣམ་པར་གཞག་པ་མི་འདོད་པར།།རྡོ་རྗེ་ཐེག་པའི་འབྲས་བུ་ནི།།སྤྲུལ་སྐུ་ལ་སོགས་སྐུ་བཞི་ཞེས།།འདོད་པ་དེ་ཡང་ལོག་ཤེས་ཡིན།།ཁ་ཅིག་འབྲས་བུའི་མཐར་ཐུག་ནི།།འོད་གསལ་ཡིན་ཞེས་སྨྲ་བ་ཐོས།།འདི་ནི་འཕགས་པའི་དགོངས་པ་མིན།།རིམ་ལྔ་དང་ནི་སྤྱོད་བསྡུས་སུ།།འོད་གསལ་བ་ལས་ཟུང་འཇུག་སྐུར།།ལྡང་བ་མཐར་ཐུག་ཡིན་པར་གསུངས།།ལ་ལ་གྲུབ་ཐོབ་ངན་ཞེས་ཟེར།།རྟོགས་ལྡན་བཟང་བ་ཡིན་ནོ་ལོ།།གྲུབ་ཐོབ་བརྒྱད་ཅུའི་ནང་ན་ཡང་།།རྟོགས་ལྡན་མེད་ཅེས་ཟེར་བ་ཐོས།།འདི་འདྲ་འཕགས་པའི་གང་ཟག་དང་།།བླ་མ་རྣམས་ལ་སྐུར་འདེབས་ཡིན།།འདི་འདྲ་འཛིན་པ་ལྟ་ཅི་སྨོས།།ཐོས་པར་གྱུར་ཀྱང་རྣ་བ་དགབ།།དེ་ཡི་འཐད་པ་བཤད་ཀྱིས་ཉོན།།གྲུབ་ཐོབ་ཆུང་ངུ་མཐོང་ལམ་ཡིན།།གྲུབ་ཐོབ་འབྲིང་པོ་ས་བརྒྱད་པ།།གྲུབ་པ་ཆེན་པོ་སངས་རྒྱས་ས།།འཕགས་པ་མིན་ལ་གྲུབ་ཐོབ་མེད།།མདོ་སྡེ་རྒྱན་ལས་འདི་སྐད་གསུངས།།གྲུབ་པ་དག་དང་མ་གྲུབ་དང་།།གྲུབ་པ་དག་ཏུ་ཤེས་པར་བྱ།།མ་གྲུབ་པ་ཡང་གྲུབ་པ་དང་།།གྲུབ་པ་དག་ཏུ་ཡང་དག་འདོད།།ཅེས་གསུངས་དགོངས་པ་དེ་ཉིད་ཡིན།།རྣལ་འབྱོར་དབང་ཕྱུག་ཆེན་པོ་ཡིས།།ལམ་འབྲས་ལས་ཀྱང་དེ་སྐད་གསུངས།།ངེད་ཀྱི་གྲུབ་ཐོབ་དེ་འདྲ་ཡིན།།རྟོགས་ལྡན་མཚན་ཉིད་འདི་ཡིན་ཞེས།།མདོ་རྒྱུད་ཀུན་ལས་གསུངས་པ་མེད།།དེས་ན་རྟོགས་ལྡན་བླུན་པོ་ལ།།གྲགས་ཀྱི་མཁས་པ་རྣམས་ལ་མིན།།ལ་ལ་ཉམས་དང་གོ་བ་དང་།།རྟོགས་པ་ཞེས་བྱ་རྣམ་པ་གསུམ།།ཉམས་ནི་ངན་ལ་གོ་བ་འབྲིང་།།རྟོགས་པ་བཟང་བ་ཡིན་ཞེས་ཟེར།།འདི་ཡང་རེ་ཞིག་བརྟག་པར་བྱ།།ཉམས་ཞེས་བྱ་བ་ཉམས་མྱོང་ལ།།ཟེར་ན་སེམས་ཡོད་ཐམས་ཅད་ལ།།མྱོང་བ་དེ་ཡང་ཡོད་པ་ཡིན།།གལ་ཏེ་བསྒོམས་པའི་ཉམས་མྱོང་ལ།།ཟེར་ན་ཚོགས་ལམ་ཆུང་ངུ་ནས།།མཐར་ཕྱིན་ལམ་གྱི་བར་དུ་ཡོད།།འོན་ཏེ་སོ་སོ་རང་རིག་པའི།།ཡེ་ཤེས་ཡིན་ན་འཕགས་པ་ཡི།།གང་ཟག་རྣམས་ལ་ཉམས་དེ་ཡོད།།གོ་བ་དང་ནི་རྟོགས་པ་གཉིས།།རྣམ་གྲངས་སྒྲ་ཡིན་ངོ་བོ་གཅིག།རྒྱ་སྐད་གཅིག་ལ་ལོ་ཙཱ་བའི།།འགྱུར་གྱི་དབྱེ་བ་ཁོ་ནར་ཟད།།རྟོགས་པ་གསལ་དང་མི་གསལ་ལ།།གོ་དང་རྟོགས་པར་འདོགས་ན་ཐོགས།།གཞུང་ལུགས་འགའ་ལས་བསྒོམས་པ་ཡི།།ཏིང་འཛིན་ཉམས་ཀྱི་སྣང་བ་སྟེ།།རྫོགས་སངས་རྒྱས་ཀྱི་ཡེ་ཤེས་ལ།།དག་པའི་སྣང་བར་བཤད་པ་ཡོད།།བསྒོམས་ཉམས་སྐྱོན་མེད་ཅེས་བྱ་བ།།སངས་རྒྱས་ས་ལ་བཤད་པའང་མཐོང་།།དེ་འདྲའི་ཉམས་དང་རྟོགས་པ་ལ།།བཟང་ངན་རྣམ་པར་དབྱེ་བ་མེད།།རྩེ་གཅིག་དང་ནི་སྤྲོས་བྲལ་དང་།།རོ་གཅིག་དང་ནི་བསྒོམ་མེད་བཞི།།རྩེ་གཅིག་མཐོང་ལམ་སྤྲོས་བྲལ་ནི།།ས་བདུན་བར་ཡིན་རོ་གཅིག་ནི།།དག་པའི་ས་གསུམ་བསྒོམ་མེད་ནི།།སངས་རྒྱས་ས་ཞེས་ལ་ལ་ཟེར།།འདི་ཡང་ཕྱེ་སྟེ་བཤད་ཀྱིས་ཉོན།།སོ་སོའི་སྐྱེ་བོ་ཉིད་ཡིན་ཡང་།།གལ་ཏེ་ཆོས་མཐུན་ཙམ་བརྩི་འམ།།འོན་ཏེ་འཕགས་པ་ཉིད་ཡིན་པའི།།བདེན་པའི་ས་ལམ་དངོས་སུ་བྱེད།།སོ་སོའི་སྐྱེ་བོའི་གང་ཟག་ལ།།ཆོས་མཐུན་ཙམ་ཞིག་སྒྲིག་ན་ནི།།ཆོས་ནས་གསུངས་ན་འགལ་བ་མེད།།དཔེར་ན་རྨི་ལམ་ངེས་བསྟན་ལས།།ཐུབ་པའི་མཆོད་རྟེན་འཇིམ་པ་ལས།།བྱས་པ་མཐོང་ན་ས་དང་པོ།།རྡོ་ལས་བྱས་མཐོང་ས་གཉིས་པ།།རྡོ་ཐལ་གྱིས་བླུགས་བྱུགས་ས་གསུམ་པ།།སྟེགས་བུ་གདུགས་བྱས་ས་བཞི་པ།།རྡོ་སྐས་བྱི་དོར་བྱས་ས་ལྔ།།གསེར་གྱིས་སྦྲེལ་མཐོང་ས་དྲུག་པ།།རིན་ཆེན་དྲྭ་བས་གཡོགས་པ་བདུན།།གཡེར་ཁའི་དྲྭ་བས་གཡོགས་པ་བརྒྱད།།ས་དགུ་དང་ནི་བཅུ་པ་ལ།།རྨི་ལམ་ལོགས་པ་མཐོང་མེད་གསུངས།།དེ་སོགས་རྨི་ལམ་བྱེ་བྲག་ལ།།ས་བཅུའི་དབྱེ་བ་མཛད་པ་མཐོང་།།འདི་ནི་མོས་པས་སྤྱོད་པ་ཡི།།ས་བཅུ་ཡིན་གྱི་འཕགས་པའི་མིན།།དེ་བཞིན་རྩེ་གཅིག་ལ་སོགས་ལའང་།།གལ་ཏེ་མདོ་དང་རྒྱུད་སྡེ་ལས།།མོས་པ་སྤྱོད་པའི་ས་ལམ་དུ།།གསུངས་པ་མཐོང་ན་མི་འགལ་མོད།།འོན་ཀྱང་འདི་འདྲ་བཤད་པ་མེད།།ཅི་སྟེ་འཕགས་པའི་སར་བྱེད་ན།།མདོ་རྒྱུད་ཀུན་དང་འགལ་བར་འགྱུར།།ཁ་ཅིག་ཐེག་པ་རང་ས་ན།།བདེན་པ་ཡིན་ཞེས་ཀུན་ལ་སྒྲོགས།།འདི་ཡང་བརྟག་པར་བྱ་བས་ཉོན།།གལ་ཏེ་སྨྲས་ཚད་བདེན་ན་ནི།།བརྫུན་ཚིག་ཤེས་བྱ་ལ་མི་སྲིད།།འོན་ཏེ་གྲུབ་མཐའ་ཀུན་བདེན་ན།།འཚེ་བ་ཆོས་སུ་སྨྲ་བ་དང་།།འཇིག་རྟེན་ཕ་རོལ་མེད་པ་སོགས།།ལྟ་ལོག་ཐམས་ཅད་བདེན་པར་འགྱུར།།གལ་ཏེ་མུ་སྟེགས་མཆོག་རྣམས་ལ།།རྟག་པའི་དངོས་པོ་ལ་སོགས་པ།།བརྫུན་པའང་དུ་མ་ཡོད་མོད་ཀྱང་།།སྦྱིན་དང་ཚུལ་ཁྲིམས་བཟོད་པ་སོགས།།བདེན་པའང་དུ་མ་ཡོད་པའི་ཕྱིར།།བདེན་པའི་ཆ་ནས་གྲུབ་མཐའ་ཀུན།།རང་ས་ན་ནི་བདེན་སྙམ་ན།།སྦྱིན་སོགས་ཕལ་ཆེར་བདེན་མོད་ཀྱང་།།སྐྱབས་གནས་དང་ནི་ལྟ་བ་དང་།།ཐབས་ཀྱི་གནད་རྣམས་འཁྲུལ་པས་ན།།ཆོས་གཞན་བཟང་ཡང་སྐྱོབ་མི་ནུས།།ཅི་སྟེ་སངས་རྒྱས་ཐེག་པ་ཀུན།།རང་ས་ན་ནི་བདེན་སྙམ་ན།།འདི་ཡང་ཅུང་ཟད་བརྟག་པར་བྱ།།སངས་རྒྱས་གསུང་ལ་དྲང་དོན་དང་།།ངེས་དོན་རྣམ་པ་གཉིས་སུ་ཡོད།།སྒྲ་ཡང་ཇི་བཞིན་པ་དང་ནི།།ཇི་བཞིན་མིན་པ་གཉིས་སུ་གསུངས།།ཐེག་པ་ཡང་ནི་འཇིག་རྟེན་དང་།།འཇིག་རྟེན་འདས་པ་གཉིས་སུ་གནས།།བཤད་པ་ཡང་ནི་དགོངས་པ་དང་།།ལྡེམ་པོར་དགོངས་དང་དྲང་པོ་རུ།།དགོངས་པ་ཞེས་བྱ་རྣམ་གསུམ་ཡོད།།དེ་ལ་འཇིག་རྟེན་མཐུན་འཇུག་ལ།།དགོངས་ནས་ཕྱི་རོལ་དོན་དུ་གསུངས།།ཐ་སྙད་དཔྱོད་པའི་རིགས་པ་ལ།།དགོངས་ནས་ཆོས་རྣམས་སེམས་སུ་གསུངས།།དམ་པའི་དོན་ལ་དགོངས་ནས་ནི།།ཆོས་ཀུན་སྤྲོས་པ་བྲལ་ཞེས་གསུངས།།དེས་ན་དྲང་བའི་དོན་དང་ནི།།ཇི་བཞིན་མིན་པའི་སྒྲ་དག་དང་།།དགོངས་པ་དང་ནི་ལྡེམ་དགོངས་དང་།།འཇིག་རྟེན་པ་ཡི་ཐེག་པ་ལ།།དགོངས་ཏེ་གསུངས་པའི་མདོ་རྒྱུད་ཀུན།།དེ་ལྟར་བདེན་པར་མི་བཟུང་ངོ་།།ངེས་པའི་དོན་དང་ཇི་བཞིན་སྒྲ།།འཇིག་རྟེན་འདས་པའི་ཐེག་པ་དང་།།དྲང་པོར་དགོངས་པ་རྣམས་ལ་ནི།།ཇི་སྐད་གསུངས་བཞིན་བདེན་པར་གཟུང་།།གལ་ཏེ་མུ་སྟེགས་བྱེད་ལ་ཡང་།།བྱམས་དང་སྙིང་རྗེ་སྦྱིན་ལ་སོགས།།བདེན་པའི་ཆོས་ཀྱང་མང་པོ་སྣང་།།སངས་རྒྱས་གསུང་ལའང་དྲང་དོན་དང་།།དགོངས་པ་དང་ནི་ལྡེམ་དགོངས་སོགས།།བདེན་པ་མིན་པའང་གསུངས་པས་ན།།བདེན་བརྫུན་གཉིས་ཀ་མཚུངས་པ་ལ།།སངས་རྒྱས་གསུང་ལེན་མུ་སྟེགས་བྱེད།།སྤོང་བའི་རྒྱུ་མཚན་ཅི་ཞེ་ན།།སངས་རྒྱས་དྲང་དོན་གྱིས་ཁྲིད་ནས།།བདེན་པ་ཉིད་ལ་སྦྱོར་བར་མཛད།།མུ་སྟེགས་བདེན་པས་ཁྲིད་ནས་ནི།།བརྫུན་པ་ཉིད་ལ་སྦྱོར་བར་བྱེད།།དེས་ན་བདག་ཅག་སངས་རྒྱས་ལ།།གུས་པའི་རྒྱུ་མཚན་དེ་ལྟར་ཡིན།།དེ་བཞིན་གངས་ཅན་འདི་ན་ཡང་།།རྣམ་ཐར་བཟང་པོ་བསྟན་ནས་ནི།།ལོག་པའི་ཆོས་ལ་སྦྱོར་མཐོང་ནས།།མུ་སྟེགས་ཆོས་བཞིན་ངེད་ཀྱིས་སྤངས།།ཐེག་པ་སྣ་ཚོགས་ཚུལ་བསྟན་ནས།།གནད་རྣམས་སངས་རྒྱས་གསུང་བཞིན་དུ།།ཡང་དག་སྟོན་མཛད་བླ་མ་དེ།།སངས་རྒྱས་ཉིད་དུ་བདག་གིས་བཟུང་།།ཆོས་གཞན་ལེགས་པར་སྟོན་ན་ཡང་།།ཆོས་ཀྱི་གནད་རྣམས་བཅོས་པ་ནི།།ཤིན་ཏུ་འཇིགས་པ་ཆེན་པོར་བལྟ།།དེ་འདྲ་བ་ལས་སྐྱོན་བྱུང་མང་།།འདས་པའི་དུས་ན་སྔོན་བྱུང་བ།།ལངྐ་མགྲིན་བཅུ་ཞེས་བྱ་བས།།འབད་པས་དབང་ཕྱུག་ཆེན་པོ་བསྒྲུབས།།ལོ་གྲངས་ས་ཡ་བཅུ་གཉིས་དང་།།ཕྱེད་ཀྱིས་ལྷག་པའི་དངོས་གྲུབ་བྱིན།།ཁྱབ་འཇུག་ཕྲག་དོག་གིས་གཟིར་ནས།།མགྲིན་བཅུ་ལ་ནི་འདི་སྐད་སྨྲས།།ཁྱོད་ཀྱི་འབད་པ་ཆེ་མོད་ཀྱི།།དབང་ཕྱུག་གི་ནི་དངོས་གྲུབ་ཆུང་།།ད་དུང་སྔར་གྱི་མ་ཡིན་པ།།ས་ཡ་ཕྲག་ཕྱེད་ཐུབ་པ་སློངས།།མགྲིན་བཅུས་བདེན་པར་བསམས་ནས་ནི།།དབང་ཕྱུག་ལ་ནི་དོན་དེ་ཞུས།།དབང་ཕྱུག་ཆེན་པོས་དེ་བྱིན་པས།།གནད་བཅོས་པ་ཡི་ཚིག་དེ་ཡིས།།སྔར་གྱི་དངོས་གྲུབ་ཐམས་ཅད་ཡལ།།གསེར་ཅན་གྱི་ནི་དངོས་གྲུབ་ཀྱང་།།དེ་འདྲའི་ཚུལ་གྱིས་ཉམས་ཞེས་ཐོས།།ཨོཾ་མེད་པ་ཡི་གསང་སྔགས་ལ།།གཡོན་ཅན་གྱིས་ནི་ཨོཾ་བཅུག་པས།།སྔགས་ཀྱི་ནུས་པ་ཉམས་པ་མཐོང་།།དེ་བཞིན་སྭཱཧཱ་ཧཱུྃ་ཕཊ྄་སོགས།།ཡོད་པ་རྣམས་ལ་འཕྲི་བ་དང་།།མེད་པ་རྣམས་ལ་བསྣན་པ་དང་།།གཞན་ཡང་སྔགས་ཀྱི་གནད་རྣམས་ལ།།གཡོན་ཅན་རྣམས་ཀྱིས་བཅོས་པ་ཡིས།།གསང་སྔགས་དག་གི་ནུས་པ་རྣམས།།ཉམས་ཤིང་འགྱངས་པ་མང་པོ་མཐོང་།།དེ་བཞིན་ཆོས་ཀྱི་གནད་རྣམས་ཀྱང་།།ཅུང་ཟད་ཅུང་ཟད་བཅོས་པ་ལས།།དངོས་གྲུབ་ཉམས་པར་འགྱུར་བར་གསུངས།།དེ་ཕྱིར་ཆོས་གཞན་ལེགས་ན་ཡང་།།གནད་རྣམས་བཅོས་ན་ཐམས་ཅད་འཇིག།དེས་ན་ཉན་ཐོས་ཐེག་པ་ལ།།སྡོམ་པ་དང་ནི་བདེན་བཞིའི་གནད།།བཅོས་ན་ཉན་ཐོས་ཆོས་ཀུན་འཇིག།ཐེག་པ་ཆེ་ལ་སེམས་བསྐྱེད་དང་།།དེ་ཡི་བསླབ་བྱའི་གནད་བཅོས་ན།།ཐེག་པ་ཆེན་པོའི་ཆོས་ཀུན་འཇིག།གསང་སྔགས་ལ་ནི་དབང་བསྐུར་དང་།།རིམ་པ་གཉིས་ཀྱི་གནད་བཅོས་ན།།གསང་སྔགས་ཀྱི་ནི་ཆོས་ཀུན་འཇིག།དེས་ན་ད་ལྟའི་ཆོས་འགའ་ལ།།གནད་ཀྱི་གནས་རྣམས་བཅོས་པ་རུ།།དོགས་པའི་ཆོས་ལུགས་འགའ་ཞིག་ཡོད།།དེ་ཡང་མདོ་ཙམ་བཤད་ཀྱིས་ཉོན།།སོ་སོར་ཐར་པའི་སྡོམ་པ་ནི།།བྱང་ཆུབ་བར་དུ་བླངས་གྱུར་ན།།སོ་སོར་ཐར་པ་ཅི་ནས་འཇིག།འདི་ཡང་གནད་རྣམས་བཅོས་པར་དོགས།།བྱང་ཆུབ་སེམས་དཔའི་སྡོམ་པ་ལ།།དབུ་མའི་ལུགས་བཞིན་མི་བྱེད་པར།།སེམས་ཙམ་པ་ཡི་ཆོ་ག་ནི།།སྐྱེ་བོ་ཀུན་ལ་བྱེད་པ་མཐོང་།།འདི་ཡི་ཆོ་ག་ངེས་པར་འཇིག།འདི་ཡང་གནད་རྣམས་བཅོས་པར་མཐོང་།།སེམས་བསྐྱེད་ཀྱི་ནི་བསླབ་བྱའི་མཆོག།བདག་གཞན་བརྗེ་བའི་བྱང་ཆུབ་སེམས།།བསྒོམ་དུ་མི་རུང་ཞེས་སྨྲ་བ།།འདི་ཡང་གནད་རྣམས་བཅོས་པར་མཐོང་།།གསང་སྔགས་ཀྱི་ནི་དབང་བསྐུར་བ།།མེད་ཀྱང་གསང་སྔགས་བསྒོམ་རུང་ཟེར།།རྡོ་རྗེ་འཆང་གིས་བཀག་པས་ན།།འདི་ཡང་གནད་རྣམས་བཅོས་པར་དོགས།།གསང་སྔགས་ལམ་གྱི་མཆོག་གྱུར་པ།རིམ་གཉིས་ཚུལ་བཞིན་མི་བསྒོམ་པར།།རང་བཟོའི་གདམས་ངག་དུ་མ་ཡིས།།བླུན་པོ་ངེས་ཤེས་སྐྱེད་པ་ཐོས།།མདོ་རྒྱུད་ཀུན་ལས་འདི་བཀག་པས།།འདི་ཡང་གནད་རྣམས་བཅོས་པར་དོགས།།བསྐྱེད་པའི་རིམ་པའི་མཐར་ཐུག་པ།།དབུ་རྒྱན་ལ་ནི་རིགས་བདག་འབྱུང་།།རིགས་བདག་དེ་ནི་བླ་མ་ཡིན།།འདི་ནི་གལ་ཏེ་འཆོལ་གྱུར་ན།།དངོས་གྲུབ་མེད་པར་རྒྱུད་ལས་གསུངས།།འོན་ཀྱང་བླ་མ་སྤྱི་བོ་རུ།།བསྒོམ་བྱ་མིན་ཞེས་ལ་ལ་ཟེར།།འདི་ཡང་གནད་རྣམས་བཅོས་པར་དོགས།།ཡོད་པའི་དགེ་བ་ཞེས་བྱ་བ།།ཆོས་ཀྱི་དབྱིངས་ལ་བསམས་ནས་ནི།།དེ་ནི་བསྔོ་བའི་རྒྱུར་བྱེད་པ།།དམིགས་པ་མེད་པའི་ཆོས་ཀྱི་དབྱིངས།།དམིགས་པའི་དགེ་བར་བསྒྱུར་བ་འདི།།བསྔོ་བ་དུག་དང་བཅས་པར་གསུངས།།འདི་ཡང་གནད་རྣམས་བཅོས་པར་དོགས།།དེ་བཞིན་གཏུམ་མོ་བསྒོམ་པ་དང་།།ཕྱག་རྒྱ་ཆེན་པོ་ལ་སོགས་དང་།།དམ་ཚིག་དང་ནི་སྡོམ་པ་ཡི།།གནད་རྣམས་བཅོས་པ་མང་མོད་ཀྱི།།གསང་སྔགས་ཡིན་ཕྱིར་འདིར་མི་བཤད།།ཆོས་རྣམས་ཀུན་གྱི་རྩ་བ་ནི།།སྟོང་ཉིད་སྙིང་རྗེའི་སྙིང་པོ་ཅན།།ཐབས་དང་ཤེས་རབ་ཟུང་འཇུག་ཏུ།།མདོ་རྒྱུད་ཀུན་ལས་རྒྱལ་བས་གསུངས།།ལ་ལ་སྤྲོས་བྲལ་རྐྱང་པ་ནི།།དཀར་པོ་ཆིག་ཐུབ་ཡིན་ཞེས་ཟེར།།འདི་ཡང་གནད་རྣམས་བཅོས་པར་དོགས།།གནད་རྣམས་མིན་པའི་ཆོས་གཞན་འགའ།།མ་ཚང་བ་དང་ལྷག་པ་དང་།།ཅུང་ཟད་འཁྲུལ་པར་གྱུར་ན་ཡང་།།ཉེས་པ་ཆེན་པོ་བསྐྱེད་མི་ནུས།།ཆོས་ཀྱི་གནད་རྣམས་བཅོས་གྱུར་ན།།ཆོས་གཞན་བཟང་ཡང་འཚང་མི་རྒྱ།།དཔེར་ན་འགྲོ་བའི་སྲོག་རྩ་དང་།།ལྗོན་ཤིང་རྣམས་ཀྱི་རྩ་བ་དང་།།ས་བོན་གྱི་ནི་སྐྱེ་ས་དང་།།ཐགས་རྣམས་ཀྱི་ནི་སྲོག་ཤིང་དང་།།བཅུད་ཀྱིས་ལེན་གྱི་རྩ་བ་དང་།།དབང་པོ་རྣམས་ཀྱི་གནད་རྣམས་ནི།།འཆུགས་ན་བསྒྲུབ་ཏུ་མི་རུང་བཞིན།།དེ་བཞིན་ཆོས་ཀྱི་གནད་འཆུགས་ན།།ལེགས་ལེགས་འདྲ་ཡང་འབྲས་བུ་མེད།།དེས་ན་ལ་ལ་འཁྲུལ་ཡང་བླ།།གནད་རྣམས་འཁྲུལ་མེད་དཔྱད་དགོས་སོ།།དེ་ལ་གནད་རྣམས་འཆོས་པའི་བདུད།།ལ་ལ་སངས་རྒྱས་དངོས་སུ་སྟོན།།ཁ་ཅིག་མཁན་པོ་སློབ་དཔོན་དང་།།བླ་མའི་ཆ་ལུགས་འཛིན་པ་དང་།།ཕ་མའམ་ཉེ་དུའི་ཆ་ལུགས་ཀྱིས།།སེམས་ཅན་རྣམས་ལ་སླུ་བར་བྱེད།།འགའ་ཞིག་རྩུབ་མོར་སྨྲ་བྱེད་ཅིང་།།བསྡིགས་པའི་ཚུལ་གྱིས་སྒྱུར་བར་བྱེད།།ལ་ལ་འཇམ་པོར་སྨྲ་བྱེད་ཅིང་།།བྱམས་པའི་ཚུལ་གྱིས་སླུ་བར་བྱེད།།ལ་ལ་སངས་རྒྱས་གསུངས་པའི་ལུང་།།ཕྱིན་ཅི་ལོག་ཏུ་བཤད་ནས་བསྒྱུར།།ལ་ལ་རིགས་པ་བཟང་པོ་ལ།།ངན་པ་ཡིན་ཞེས་བཤད་ནས་བསྒྱུར།།ལ་ལ་རིགས་པ་ངན་པ་ལ།།བཟང་པོ་ལྟ་བུར་བཅོས་ནས་བསྒྱུར།།ལ་ལ་ཟས་ནོར་ཅི་འདོད་པའི།།རྔན་པ་བྱིན་ནས་ཆོས་ལོག་སྟོན།།ལ་ལ་ལུས་དང་སེམས་ལ་ནི།།ཏིང་འཛིན་ཅུང་ཟད་བསྐྱེད་ནས་ཀྱང་།།དེ་ལ་ཡིད་ཆེས་སྐྱེས་པ་དང་།།ལོག་པའི་ཆོས་རྣམས་བསྟན་ནས་སླུ།།ལ་ལ་མངོན་པར་ཤེས་པ་དང་།།རྫུ་འཕྲུལ་ཅུང་ཟད་བསྟན་ནས་ཀྱང་།།བླུན་པོ་ཡིད་ཆེས་བསྐྱེད་ནས་ནི།།ཕྱི་ནས་ཆོས་ལོག་སྟོན་པར་བྱེད།།ལ་ལ་ང་ཡིས་འདི་ལྟར་བསྒོམས།།དེ་ལ་རྟོགས་པ་འདི་སྐྱེས་པས།།ཁྱེད་ཀྱང་འདི་ལྟར་གྱིས་ཤིག་ཅེས།།རང་གི་ཉམས་མྱོང་ཡིན་པ་ཡི།།ཚུལ་དུ་བྱས་ནས་ལོག་པར་འཆོས།།མདོར་ན་སངས་རྒྱས་གསུང་རབ་དང་།།ཕལ་ཆེར་མཐུན་པར་སྟོན་བྱེད་ཅིང་།།གནད་རྣམས་ལོག་པར་སྟོན་པའི་ཆོས།།ལེགས་ལེགས་འདྲ་བར་སྟོན་ན་ཡང་།།བདུད་ཀྱི་བྱིན་རླབས་ཡིན་ནོ་ཞེས།།མདོ་རྒྱུད་ཀུན་ལས་གསལ་བར་གསུངས།།འདི་དག་ཇི་ལྟར་བྱུང་བའི་ཚུལ།།མདོ་ཙམ་ང་ཡིས་བཤད་ཀྱིས་ཉོན།།རིན་ཆེན་བཟང་པོ་བཞུགས་པའི་ཚེ།།སངས་རྒྱས་སྐར་རྒྱལ་ཞེས་བྱ་བ།།དཔྲལ་བ་ནས་ནི་འོད་འབྱིན་ཅིང་།།བར་སྣང་ལ་ནི་སྐྱིལ་དཀྲུང་འཆའ།།རེས་འགའ་འཇག་མའི་ཁྲི་ལ་སྡོད།།སྟོང་པ་ཉིད་ཀྱི་ཆོས་རྣམས་སྟོན།།བྱམས་དང་སྙིང་རྗེ་ཆེ་བར་སྣང་།།དེ་ཡི་ཆོས་ཀྱིས་གཞན་དག་ལ།།ཏིང་ངེ་འཛིན་ཡང་སྐྱེ་བར་བྱེད།།དེ་ལ་འཇིག་རྟེན་ཐམས་ཅད་མོས།།ཤཱཀྱའི་རྒྱལ་པོའི་བསྟན་པ་དང་།།འདྲ་མིན་ཅུང་ཟད་བཅོས་པར་འཆད།།དེ་ཡི་བསྟན་པ་ཤིན་ཏུ་འཕེལ།།དེ་ཚེ་རིན་ཆེན་བཟང་པོ་ཡིས།།སྒྲུབ་པ་ཟླ་བ་དྲུག་མཛད་ནས།།ཏིང་འཛིན་བརྟན་པས་དེ་དྲུང་བྱོན།།སངས་རྒྱས་སྐར་རྒྱལ་བར་སྣང་ལ།།སྐྱིལ་ཀྲུང་བཅས་ནས་ཆོས་འཆད་ཚེ།།རིན་ཆེན་བཟང་པོས་གཟིགས་ཙམ་གྱིས།།ས་ལ་ལྷུང་ནས་བརྒྱལ་ཞེས་གྲག།གལ་ཏེ་རིན་བཟང་ཞེས་བྱ་བའི།།སྐྱེས་མཆོག་དེ་ཚེ་མི་བཞུགས་ན།།སངས་རྒྱས་སྐར་རྒྱལ་ཞེས་བྱ་བའི།།ཆོས་ལོག་བསྟན་པ་འབྱུང་ཞེས་གསུངས།།ནག་པོའི་ཕྱོགས་ལ་དགའ་བ་ཡི།།སྐར་རྒྱལ་ཞེས་བྱའི་ཀླུ་ཆེན་ཞིག།སྐྱེས་ངན་ཞིག་ལ་ཞུགས་ནས་ནི།།སངས་རྒྱས་གཟུགས་སུ་བརྫུས་ཞེས་གསུངས།།འདི་འདྲའི་རིགས་ཀྱི་བདུད་རིགས་འགའ།།མི་འམ་འཕགས་པའི་གཟུགས་བཟུང་ནས།།ལོག་པའི་བསྟན་པ་སྤེལ་བའི་ཕྱིར།།ཆོས་དང་བསྲེས་ནས་གནད་རྣམས་སུ།།ལོག་ཆོས་བསྲེས་ནས་འཆད་པ་སྲིད།།དཔེར་ན་ཁ་ཟས་བཟང་པོ་ལ།།སྦྱར་བའི་དུག་གིས་ཕལ་ཆེར་གསོད།།དུག་རྐྱང་ཡིན་པར་ཤེས་ན་ནི།།འགའ་ཡང་གསད་པར་ནུས་མ་ཡིན།།དེ་བཞིན་ཆོས་བཟང་འགའ་ཞིག་ལ།།ཆོས་ལོག་བསླད་པས་ཕ་རོལ་སླུ།།ཆོས་ལོག་རྐྱང་པར་གོ་ན་ནི།།འགའ་ཡང་བདུད་ཀྱིས་སླུ་མི་ནུས།།རི་དྭགས་རྔ་མ་མ་བསྟན་ན།།བོང་ཤ་བཙོང་བར་མི་ནུས་ལྟར།།དེ་བཞིན་བཟང་སྤྱོད་མ་བསྟན་ན།།ལོག་པའི་ཆོས་ཀྱིས་སླུ་མི་ནུས།།བདུད་ཀྱི་བྱིན་རླབས་ཐམས་ཅད་ཀྱང་།།ངན་པ་ཁོ་ནར་ངེས་པ་མིན།།འོན་ཀྱང་བཟང་པོའི་ནང་ནས་ནི།།གནད་རྣམས་ཅུང་ཟད་བཅོས་པ་ཡིས།།ཕན་པ་ལྟ་བུས་ཕ་རོལ་སླུ།།འདི་འདྲ་ཤེས་པར་བྱས་ནས་ནི།།ཆོས་ཀྱི་གནད་རྣམས་མདོ་རྒྱུད་བཞིན།།མ་བསླད་པར་ནི་ལེགས་པར་ཟུངས།།ཤིང་རྟའི་སྲོག་ཤིང་ཆག་གྱུར་ན།།འཁོར་ལོ་བཟང་ཡང་འགྲོ་མི་ནུས།།སྲོག་གི་དབང་པོ་འགགས་གྱུར་ན།།དབང་པོ་གཞན་དག་བྱ་བྱེད་མེད།།དེ་བཞིན་ཆོས་ཀྱི་གནད་འཆུགས་ན།།ཆོས་གཞན་བཟང་ཡང་ནུས་མེད་འགྱུར།།རྫོགས་སངས་རྒྱས་ལས་མཁས་པ་ཡི།།གང་ཟག་འཇིག་རྟེན་གསུམ་ན་མེད།།དེས་ན་དེ་ཡིས་གསུངས་པ་ཡི།།མདོ་རྒྱུད་རྣམ་པར་དཀྲུག་མི་བྱ།།མདོ་རྒྱུད་དཀྲུགས་ན་ཆོས་སྤོང་ཞིང་།།འཕགས་པ་རྣམས་ཀྱང་སྨད་འགྱུར་ཞེས།།མགོན་པོ་བྱམས་པས་རྒྱུད་བླར་གསུངས།།འཁྲུལ་པའི་གྲུབ་མཐའ་སུན་འབྱིན་པའི།།རྣམ་གཞག་ཅུང་ཟད་བཤད་ཀྱིས་ཉོན།།མུ་སྟེགས་སྟོན་པ་དབང་ཕྱུག་སོགས།།མནན་པའི་སངས་རྒྱས་མཐོང་ནས་ནི།།དེ་བཟློག་པ་ཡི་བྲིས་སྐུ་ཞིག།མུ་སྟེགས་དབྱངས་ཅན་དགའ་བས་བྱས།།མཁས་པ་ཆེན་པོ་ཛྙཱ་ན་ཤྲཱིས།།དེ་དང་རྩོད་པའི་རྩོད་གྲྭ་རུ།།རང་གཞན་གཉིས་ཀའི་སྡེ་པ་དང་།།རྒྱལ་པོ་སོགས་ཀྱི་དཔང་པོའི་གྲྭར།།སངས་རྒྱས་མནན་པ་རང་བཟོ་ཡིན།།དེས་ན་འཁྲུལ་པ་ཡིན་པར་བསྒྲགས།།དེས་ཀྱང་དབང་ཕྱུག་མནན་པ་ཡི།།སངས་རྒྱས་རང་བཟོ་ཡིན་ཞེས་བསྒྲེས།།དེ་ལ་མཁས་པས་འདི་སྐད་བརྩད།།སངས་རྒྱས་མནན་པ་ཁྱེད་ཀྱི་གཞུང་།།ཁུངས་མ་རྣམས་ནས་བཤད་པ་མེད།།མུ་སྟེགས་མནན་པ་ངེད་ཀྱི་རྒྱུད།།གདོད་མ་ཉིད་ནས་ཡོད་པ་ཡིན།།དེས་ན་ངེད་ཀྱི་རང་བཟོ་མིན།།དེ་ནས་སྤོབས་པ་མེད་གྱུར་ཚེ།།རྒྱལ་པོ་ཁྱོད་ཀྱི་ཡུལ་འདི་རུ།།འདི་འདྲའི་རང་བཟོ་འཕེལ་ན་ནི།།ད་དུང་རང་བཟོ་གཞན་འབྱུང་བས།།བསྟན་པ་སྤྱི་ལ་གནོད་པ་འདི།།ཁོ་རང་ལ་ཡང་ཅིས་མི་གནོད།།འདི་འདྲའི་རང་བཟོའི་ཆོས་ལུགས་ནི།།སངས་རྒྱས་པ་ལ་བྱུང་ན་ཡང་།།རྒྱལ་པོ་ཁྱོད་ཀྱིས་དགག་དགོས་སོ།།དེ་སྐད་བསྒོ་ནས་གྱེང་རིས་བསུབས།།ཕྱི་ནས་གྲུབ་མཐའ་བརྩད་པ་ལའང་།།མུ་སྟེགས་གྲུབ་མཐའ་ཕམ་མཛད་ནས།།སངས་རྒྱས་བསྟན་པ་འཕེལ་ཞེས་ཐོས།།གལ་ཏེ་མུ་སྟེགས་བྱེད་པའི་གཞུང་།།གདོད་ནས་གྲུབ་པའི་རིག་བྱེད་ལས།།ཆོས་ལོག་དེ་འདྲ་བཤད་ན་ཡང་།།རང་བཟོ་ཡིན་ཞེས་བྱར་མི་རུང་།།གྲུབ་མཐའི་རྣམ་གཞག་བཟུང་ནས་ནི།།རིགས་པ་གཞན་གྱིས་སུན་དབྱུང་དགོས།།བདག་དང་གཞན་གྱི་གྲུབ་མཐའ་ལའང་།།གལ་ཏེ་འགལ་བ་སྣང་ན་ནི།།རིགས་པ་དག་དང་འགལ་གྱུར་ན།།དེ་ནི་རིགས་པས་སུན་ཕྱུངས་ཤིག།གལ་ཏེ་ལུང་དང་འགལ་གྱུར་ན།།དེ་ནི་ལེགས་པར་སུན་འབྱིན་པའི།།གདམས་ངག་ཅུང་ཟད་བཤད་ཀྱིས་ཉོན།།ཕ་རོལ་ལུང་དེ་ཁས་ལེན་ཅིང་།།དེ་དང་འགལ་བའི་ཆོས་སྤྱོད་ན།།ལུང་དང་འགལ་བས་སུན་དབྱུང་བྱ།།གལ་ཏེ་ལུང་དེ་ཁས་མི་ལེན།།རང་གི་ལུང་གཞན་ཁས་ལེན་ན།།དེ་ཚེ་ངེད་ཀྱི་ལུང་གིས་ནི།།དེ་ཡི་ཆོས་ལོག་དགག་མི་ནུས།།འོན་ཀྱང་དེ་ཡི་ལུང་ཉིད་ཀྱིས།།དེ་ཡི་ཆོས་ལོག་དགག་དགོས་སོ།།དཔེར་ན་ཕ་རོལ་ཕྱིན་པ་བ།།གལ་ཏེ་ཆོས་ལོག་སྤྱོད་ན་ནི།།གསང་སྔགས་གཞུང་དང་འགལ་ལོ་ཞེས།།དེ་ནི་སུན་དབྱུང་ནུས་མ་ཡིན།།དེ་བཞིན་གསང་སྔགས་པ་འགའ་ཞིག།ལག་ལེན་ལོག་པར་སྤྱོད་གྱུར་ཀྱང་།།ཕ་རོལ་ཕྱིན་གཞུང་དང་འགལ་ཞེས།།སུན་དབྱུང་བར་ནི་ནུས་མ་ཡིན།།དེ་ལྟར་ཐེག་པ་ཆེ་ཆུང་ལའང་།།ཕན་ཚུན་གྱི་ནི་ལུང་འགལ་གྱིས།།སོ་སོའི་གཞུང་ལུགས་དགག་མི་ནུས།།ཉན་ཐོས་གཞུང་ལུགས་ཁས་ལེན་ཅིང་།།དེ་ཡི་ལུང་དང་འགལ་གྱུར་ན།།དེ་ཡི་ལུང་གིས་དགག་པར་ནུས།།དེ་བཞིན་བཀའ་གདམས་ལ་སོགས་ཀྱང་།།ཇོ་བོའི་གཞུང་ལུགས་ཁས་ལེན་ཅིང་།།དེ་ཡི་ལུང་དང་འགལ་གྱུར་ན།།བཀའ་གདམས་པ་ལ་གནོད་པ་ཡིན།།དེ་བཞིན་ཕྱག་རྒྱ་པ་ཡང་ནི།།ནཱ་རོ་པ་ལ་མོས་བྱེད་ཅིང་།།ནཱ་རོའི་གཞུང་དང་འགལ་གྱུར་ན།།ཕྱག་རྒྱ་པ་ལ་གནོད་པ་ཡིན།།དེ་བཞིན་གསང་སྔགས་སྤྱོད་བཞིན་དུ།།གསང་སྔགས་རྒྱུད་སྡེ་དང་འགལ་ན།།གསང་སྔགས་པ་ལ་གནོད་པར་འགྱུར།།ཕ་རོལ་ཕྱིན་པའི་ལུགས་བྱེད་ཅིང་།།མདོ་སྡེ་རྣམས་དང་འགལ་གྱུར་ན།།ཕར་ཕྱིན་པ་ལ་ཅིས་མི་གནོད།།དེ་ཡི་དཔེ་བརྗོད་མདོ་ཙམ་ཞིག།ལེགས་པར་བཤད་ཀྱིས་མཉན་པར་གྱིས།།ཇོ་བོ་གསང་སྔགས་སྤྱོད་བཞིན་དུ།།གསང་སྔགས་སྤྱོད་པའི་དུས་མིན་ཞེས།།སྨྲ་བ་ཇོ་བོའི་ལུགས་ཉིད་དང་།།འགལ་བ་ཡིན་པར་ཤེས་པར་བྱ།།སེམས་བསྐྱེད་ཇོ་བོའི་ལུགས་བྱེད་ཅིང་།།ཇོ་བོ་གཏན་ནས་མི་བཞེད་པའི།།སེམས་བསྐྱེད་ཀུན་ལ་བྱེད་པ་དང་།།དོན་དམ་སེམས་སྐྱེད་བྱེད་པ་ནི།།གཞན་དང་འགལ་བ་སྨོས་ཅི་དགོས།།རང་ལུགས་དང་ཡང་འགལ་བ་ཡིན།།ནཱ་རོ་ཏ་པ་དབང་བསྐུར་དང་།།རིམ་གཉིས་ཆོས་ཀྱི་གཙོ་བོར་མཛད།།ནཱ་རོའི་བརྒྱུད་པ་འཛིན་བཞིན་དུ།།དབང་དང་རིམ་གཉིས་མི་བསྒོམ་པ།།རྒྱུད་དང་འགལ་བ་ལྟ་ཅི་སྨོས།།རང་ལུགས་དང་ཡང་འགལ་བ་ཡིན།།རྡོ་རྗེ་ཕག་མོའི་བྱིན་རླབས་ནི།།མར་པ་ལྷོ་བྲག་པ་ལ་མེད།།མར་པའི་བརྒྱུད་པ་འཛིན་བཞིན་དུ།།ཕག་མོས་ཆོས་སྒོ་འབྱེད་པ་ནི།།རྒྱུད་དང་འགལ་བ་ལྟ་མི་སྨོས།།རང་ལུགས་དང་ཡང་འགལ་བ་ཡིན།།ནཱ་རོ་ཆོས་དྲུག་ཅེས་བྱའི་ཁྲིད།།མི་ལ་ཡན་ཆད་དེ་ལས་མེད།།ཆོས་དྲུག་བོར་ནས་ལམ་འབྲས་དང་།།ཕྱག་རྒྱ་ཆེན་པོ་ལ་སོགས་པ།།གཞན་གྱི་གདམས་ངག་སྒོམ་བཞིན་དུ།།ནཱ་རོའི་བརྒྱུད་པ་འདེད་བྱེད་པ།།གཞན་དང་འགལ་བ་ལྟ་ཅི་སྨོས།།རང་ལུགས་དང་ཡང་འགལ་བ་ཡིན།།གཏེར་ནས་བྱུང་བའི་གླེགས་བམ་དང་།།གཞན་ནས་བརྐུས་པའི་ཆོས་ལུགས་དང་།།བརྩམས་ཆོས་དང་ནི་རྨི་ལམ་ཆོས།།བློ་བཟུང་མ་ཡི་ཆོས་ལུགས་ལ།།རྡོ་རྗེ་འཆང་ལ་བརྒྱུད་པ་སྙེག།དེ་ལའང་གཞན་དག་ལུང་ལེན་པ།།ཆོས་དང་འགལ་བ་སྨོས་ཅི་དགོས།།རང་ཚིག་དང་ཡང་འགལ་བ་ཡིན།།གལ་ཏེ་འདི་འདྲའི་རིགས་ཅན་གྱི།།འགལ་བ་ཁས་ལེན་སྣང་གྱུར་ན།།དེ་ཡི་རིགས་སུ་ཤེས་པར་བྱ།།མདོར་ན་ཆོས་དང་འགལ་བ་ཡི།།ཆོས་ཞིག་གང་ན་འདུག་ན་ཡང་།།ལུང་དང་རིགས་པས་སུན་ཕྱུངས་ཤིག།གལ་ཏེ་མུ་སྟེགས་ལ་སོགས་པ།།ལུང་དེ་ཁས་མི་ལེན་པ་དང་།།ལུང་དང་འགལ་ཡང་ངེད་ཅག་གི།བླ་མའི་བཀའ་སྲོལ་ཡིན་ཟེར་བ།།དེ་དག་ལུང་དེ་མི་ལེན་ཡང་།།རྩ་བའི་བརྒྱུད་པ་གང་ཡིན་དྲི།།གདོད་ནས་ཆོས་དེ་ཡོད་ན་ནི།།འཁྲུལ་ཡང་མཁས་པས་བགྲང་རྒྱུ་མེད།།སེམས་ཅན་ལས་ངན་སྤྱོད་པ་ལ།།སངས་རྒྱས་ཀྱིས་ཀྱང་ཅི་བྱར་ཡོད།།གལ་ཏེ་གདོད་ནས་མེད་པའི་ཆོས།།གློ་བུར་བྱས་པ་ཡིན་ན་ནི།།ཀུན་གྱིས་རང་བཟོར་གོ་བའི་ཕྱིར།།སངས་རྒྱས་པ་འམ་མུ་སྟེགས་བྱེད།།སུ་ལ་འདུག་ཀྱང་དོར་བྱ་ཡིན།།ངེད་ལའང་དེ་འདྲ་འདུག་ན་ནི།།མཁས་པ་རྣམས་ཀྱིས་བཞད་གད་གྱིས།།གལ་ཏེ་རྒྱལ་པོའི་ཁྲིམས་ཡོད་ན།།ཆད་པས་བཅད་པའི་འོས་ཡིན་ནོ།།ནོར་ལ་ཟོག་ཚོང་བྱས་པ་ལ།།རྒྱལ་པོའི་ཁྲིམས་ལ་ཐུག་གྱུར་ན།།ཆོས་ལོག་བརྫུན་མས་སྦྱར་བ་ལའང་།།རྒྱལ་པོའི་ཁྲིམས་ལ་ཅིས་མི་ཐུག།བླུན་པོ་མཁས་པར་འཆོས་པ་འགའ།།ལུང་གི་གནས་སྐབས་མི་ཤེས་པར།།མདོ་རྒྱུད་ལུང་སྦྱོར་བྱེད་མོད་ཀྱི།།དེ་ནི་བླུན་པོའི་ཁ་ཤགས་ལྟར།།གང་དུ་འགྲོ་བ་མི་ཤེས་སོ།།དཔེར་ན་ཕྱག་དང་མཆོད་པ་དང་།།སྦྱིན་དང་ཚུལ་ཁྲིམས་སོགས་མི་དགོས།།སེམས་བསྐྱེད་དབང་བསྐུར་བྱ་མི་དགོས།།བསམ་གཏན་ཀློག་པ་འདིར་མི་དགོས།།དགེ་དང་སྡིག་པ་གཉིས་ཀ་མེད།།སངས་རྒྱས་སེམས་ཅན་ཡོད་མིན་སོགས།།འདི་འདྲ་གསུངས་པའི་ལུང་རྣམས་ཀུན།།ལྟ་བ་ཡིན་གྱི་བསྒོམ་པ་དང་།།སྤྱོད་པ་གཉིས་ཀྱི་ལུང་མ་ཡིན།།དབང་མེད་པ་ལ་དངོས་གྲུབ་མེད།།ཆོ་ག་འཁྲུགས་ན་ལས་མི་འཆགས།།ལོག་པར་སྤྱད་ན་ལྟུང་བ་འབྱུང་།།ལྷ་བསྒོམ་འཁྲུལ་ན་བྱིན་མི་རློབ།།ཐེ་ཚོམ་ཟ་ན་ཉེས་པ་སྐྱེ།།དེས་ན་ཆོ་ག་ཅི་བྱེད་ཀྱང་།།ཤིན་ཏུ་དག་པར་བྱ་དགོས་ཞེས།།དེ་འདྲའི་ལུང་ཀུན་སྤྱོད་པ་དང་།།བསྒོམ་པ་ཡིན་གྱི་ལྟ་བ་མིན།།གཞན་ཡང་ལུང་སྦྱོར་བྱེད་པ་ལ།།འཇིག་རྟེན་པ་དང་འཇིག་རྟེན་ལས།།འདས་པའི་གནས་སྐབས་རྣམ་གཉིས་ཡོད།།དབང་དང་དམ་ཚིག་སྡོམ་པ་སོགས།།འབད་ནས་བསྒྲུབ་པར་གསུངས་པ་ནི།།འཁོར་བའི་རྒྱ་མཚོ་མ་བརྒལ་བའི།།འཇིག་རྟེན་པ་ལ་གསུངས་པ་ཡིན།།དབང་དང་དམ་ཚིག་སོགས་མི་དགོས།།ཕྱག་དང་མཆོད་པ་ཀུན་ལས་གྲོལ།།བསམ་གཏན་བསྒོམ་པ་ཀུན་སྤངས་ཏེ།།ལམ་ཀུན་གཟིངས་བཞིན་དོར་བྱ་ཞེས།།གསུངས་པ་འཁོར་བའི་རྒྱ་མཚོ་ལས།།བརྒལ་བའི་གང་ཟག་རྣམས་ལ་གསུངས།།དེ་འདྲའི་གནས་སྐབས་ཤེས་ནས་ནི།།དེ་དང་འཚམ་པའི་ལུང་སྦྱོར་བྱ།།དེ་འདྲའི་རྣམ་གཞག་མི་ཤེས་པའི།།ལུང་སྦྱོར་མཁས་པའི་བཞད་གད་གནས།།མིག་ལྡན་ཇི་ལྟར་ལམ་ནོར་ཡང་།།གཡང་སར་གོམ་པ་འཇོག་མི་སྲིད།།དེ་བཞིན་མཁས་པ་འཁྲུལ་ན་ཡང་།།སངས་རྒྱས་བསྟན་ལས་འདའ་མི་ནུས།།མིག་མེད་གལ་ཏེ་ལམ་ནོར་ན།།གཡང་སར་མཆོངས་ནས་ལྟུང་བར་འགྱུར།།དེ་བཞིན་བླུན་པོ་འཁྲུལ་གྱུར་ན།།སངས་རྒྱས་བསྟན་ལས་འདས་ཏེ་ལྟུང་།།ཆག་ཚད་ཤེས་པའི་བཟོ་ལ་ནི།།རིང་ཐུང་བྱུང་ཡང་སོར་གང་ཡིན།།ཆག་ཚད་མེད་པའི་བཟོ་འགའ་ཞིག།ཉེས་ན་བཞད་གད་གནས་སུ་འགྱུར།།དེ་བཞིན་གཞུང་ལུགས་ཤེས་པའི་མི།།འཁྲུལ་ཡང་ཚིག་དོན་ཅུང་ཟད་ཡིན།།གཞུང་ལུགས་གང་ཡང་མི་ཤེས་པ།།འཁྲུལ་ན་བསྟན་པ་འཇིག་ལ་ཐུག།དེས་ན་སངས་རྒྱས་བསྟན་པ་བཞིན།།བསྒྲུབ་པར་འདོད་ན་གཞུང་བཞིན་བྱ།།མིག་མངས་རྒྱ་དང་མ་འབྲེལ་ན།།རྡེའུ་མང་ཡང་ཤི་རོ་ཡིན།།དེ་བཞིན་ཁུངས་དང་མ་འབྲེལ་བའི།།ཆོས་ལུགས་མང་ཡང་རོ་དང་འདྲ།།སྙན་བརྒྱུད་དང་ནི་ཆིག་བརྒྱུད་དུ།།གྲགས་པའི་ཆོས་ལུགས་མང་པོ་ཡོད།།རྒྱུད་དང་མཐུན་ན་བླང་དུ་རུང་།།མིན་ན་བརྫུན་གྱི་སྡེབ་ཕྱོགས་ཡིན།།རྨི་ལམ་གྱི་ནི་ཆོས་ལུགས་དང་།།ཞལ་མཐོང་གི་ནི་ལྷ་ལ་སོགས།།འདི་དག་མདོ་རྒྱུད་དང་མཐུན་ན།།བླངས་ཀྱང་སྐྱོན་དུ་འགྱུར་བ་མེད།།མདོ་རྒྱུད་ཀུན་དང་མི་མཐུན་ན།།བདུད་ཀྱི་བྱིན་རླབས་ཡིན་ཞེས་བྱ།།བླ་མའང་མདོ་རྒྱུད་དང་མཐུན་ན།།དེ་ནི་བླ་མ་ཡིན་པར་གཟུང་།།སངས་རྒྱས་བསྟན་བཞིན་མི་གསུངས་ན།།བླ་མ་ཡིན་ཡང་བཏང་སྙོམས་བཞག།དེས་ན་རྨི་ལམ་ཆོས་ལུགས་དང་།།ཞལ་གཟིགས་པ་ཡི་ཡི་དམ་དང་།།ལུང་བསྟན་མཛད་པའི་སངས་རྒྱས་དང་།།བླ་མའི་གསུང་སྒྲོས་ལ་སོགས་པ།།མ་དཔྱད་པར་ནི་གཏམ་འཆོལ་དུ།།ཚད་མ་ཡིན་ཞེས་གཟུང་མི་བྱ།།འདི་འདྲ་བདུད་ཀྱི་བྱིན་རླབས་ལས།།འབྱུང་བ་སྲིད་པར་རྒྱལ་བས་གསུངས།།དེས་ན་སངས་རྒྱས་བསྟན་པ་མཆོག།ངེས་དོན་ཚད་མ་ཡིན་པར་གཟུང་།།ཡང་ན་དངོས་པོ་སྟོབས་ཞུགས་ཀྱི།།རིགས་པས་གྲུབ་པ་ཚད་མར་གཟུང་།།སྐྱེས་བུ་བརྫུན་མས་སྦྱར་བ་ཡི།།མདོ་རྒྱུད་ཚད་མར་གཟུང་མི་བྱ།།ཀོའུ་ཤི་ཀ་ཡི་མདོ་དང་ནི།།དེ་བཞིན་འཕགས་པ་ཤིག་ཅན་དང་།།བློ་གྲོས་བཟང་མོ་ཆུང་ངུ་སོགས།།བོད་ཀྱིས་སྦྱར་བའི་མདོ་སྡེ་ཡིན།།གཞན་ཡང་གསང་སྔགས་གསར་རྙིང་ལའང་།།བོད་ཀྱིས་སྦྱར་བའི་རྒྱུད་སྡེ་མང་།།དེ་འདྲའི་རང་བཟོའི་མདོ་རྒྱུད་ལ།།མཁས་པས་ཡིད་བརྟན་མི་བྱ་འོ།།གཙུག་ཏོར་ནག་མོ་ལ་སོགས་པ།།བོད་ཀྱི་ལྷ་འདྲེས་སྦྱར་བ་ཡོད།།འཕྲལ་གྱི་བྱིན་རླབས་ཅུང་ཟད་འབྱུང་།།འོན་ཀྱང་ཚད་མར་བྱར་མི་རུང་།།ལྷ་མོ་གནས་མཁར་ལ་སོགས་པ།།མུ་སྟེགས་བྱེད་ཀྱི་རྒྱུད་ཀྱང་ཡོད།།ཅུང་ཟད་བདེན་པ་ཡོད་མོད་ཀྱི།།དེ་ལའང་ལུང་དུ་བྱར་མི་རུང་།།དེ་ཡི་འཐད་པ་རྒྱུད་བླ་མར།།མགོན་པོ་བྱམས་པས་འདི་སྐད་གསུངས།།མ་རིག་ལྡོངས་པའི་མུ་སྟེགས་ལའང་།།སྲིན་བུའི་ཡི་གེ་འདྲ་བ་ཡི།།ཅུང་ཟད་བདེན་པ་ཡོད་མོད་ཀྱི།།འོན་ཀྱང་ཡིད་བརྟན་མི་བྱ་གསུངས།།རིང་བསྲེལ་དང་ནི་ཐུགས་དང་ལྗགས།།སྐུ་གཟུགས་ལ་སོགས་རུས་པ་ལས།།འབྱུང་བའི་རྒྱུ་མཚན་ཅུང་ཟད་དཔྱད།།འཕགས་པ་གསུམ་གྱི་རིང་བསྲེལ་ནི།།ཡོན་ཏན་སྟོབས་ཀྱིས་འབྱུང་བ་སྟེ།།ལུས་ཅན་རྣམས་ཀྱི་བསོད་ནམས་རྟེན།།འབྱུང་ཁུངས་ལས་བྱུང་རིན་ཆེན་འདྲ།།རིང་བསྲེལ་ལ་ལ་གདོན་གྱིས་བྱེད།།ལ་ལ་འབྱུང་བཞིའི་སྟོབས་ལས་འབྱུང་།།ཁ་ཅིག་བསྟན་ལ་དགའ་བའི་ལྷས།།དད་པར་བྱ་ཕྱིར་སྤྲུལ་པའང་སྲིད།།དེང་སང་རིང་བསྲེལ་ཕལ་ཆེ་བ།།བརྫུན་མས་བྱས་པའི་རིང་བསྲེལ་ཡིན།།དེས་ན་རྣམ་དབྱེ་མཁས་པས་དཔྱད།།ཐུགས་ལྗགས་སྐུ་གཟུགས་ལ་སོགས་པ།།འབྱུང་བ་ཆོས་ནས་གསུངས་པ་མེད།།འོན་ཀྱང་དེ་འདྲ་འབྱུང་བ་ཀུན།།ཕལ་ཆེར་བརྫུན་མས་བྱས་པ་ཡིན།།གལ་ཏེ་བདེན་པ་ཡིན་ན་ཡང་།།ལུང་རིགས་གཉིས་ཀ་མེད་པའི་ཕྱིར།།བཟང་ངན་གཉིས་ཀར་ལུང་བསྟན་དཀའ།།ཉི་མ་དུ་མ་ཤར་བ་དང་།།མཁའ་ལ་བུ་ག་དོད་པ་དང་།།མཚན་མོ་གཞའ་ཚོན་འབྱུང་བ་དང་།།ལུས་ལ་འོད་ཟེར་འཕྲོ་བ་དང་།།གློ་བུར་ལྷ་འདྲེ་མཐོང་བ་དང་།།གསོན་པོའི་ལུས་ལ་བརྫུན་མེད་པར།།རིང་བསྲེལ་འཛག་པ་ལ་སོགས་པ།།བླུན་པོ་རྟགས་སུ་བྱེད་མོད་ཀྱི།།མཁས་པས་འདི་འདྲ་མཐོང་གྱུར་ན།།བར་ཆད་རྟགས་སུ་ཤེས་པར་གྱིས།།སྐུ་གཟུགས་མཆི་མ་འཛག་པ་དང་།།དེ་བཞིན་གོམ་པས་འགྲོ་བ་དང་།།གར་བྱེད་པ་དང་སྐད་འབྱིན་དང་།།ཁྲག་གི་ཆར་པ་འབབ་པ་དང་།།ས་འོག་བོང་བུའི་སྒྲ་སྒྲོགས་དང་།།དུད་འགྲོ་མི་སྐད་སྨྲ་བ་སོགས།།བླུན་པོ་ངོ་མཚར་སྐྱེད་མོད་ཀྱི།།མཁས་པས་འདི་འདྲ་མཐོང་གྱུར་ན།།ཡུལ་དེར་དགྲ་བོ་གཞན་དག་འཇུག།ཡང་ན་ལྟས་ངན་གཞན་དག་འབྱུང་།།འདི་འདྲའི་རིགས་ཅན་གཞན་མཐོང་ཡང་།།མཁས་པ་རྣམས་ལ་ལེགས་པར་དྲིས།།དེ་དག་དོན་ལ་འཁྲུལ་པ་ཡི།།རྣམ་པར་དབྱེ་བ་མདོ་ཙམ་ཡིན།།དེ་ནས་ཚིག་ལ་འཁྲུལ་པ་ཡི།།རྣམ་དབྱེ་ཅུང་ཟད་བཤད་ཀྱིས་ཉོན།།བཅོམ་ལྡན་འདས་ཀྱི་བཤད་པ་ལ།།བཞི་བཅོམ་དྲུག་ལྡན་བཤད་པ་དང་།།གླེགས་བམ་གྱི་ནི་བཤད་པ་ལ།།གླེགས་ཤིང་གླེགས་ཐག་འཆད་པ་དང་།།ཕྱག་རྒྱ་ཆེན་པོའི་བཤད་པ་ལ།།ལག་པའི་སྒྲ་དོན་འཆད་པ་དང་།།ཡེ་ཤེས་ཀྱི་ནི་བཤད་པ་ལ།།གདོད་མའི་ཤེས་པར་འཆད་པ་དང་།།རྣལ་འབྱོར་འཆད་ལ་སེམས་རྣལ་མ།།རིག་པ་འབྱོར་ཅེས་འཆད་པ་དང་།།རྒྱལ་མཚན་རྩེ་མོའི་དཔུང་རྒྱན་ལ།།དམག་གི་དཔུང་དུ་འཆད་པ་དང་།།གཏུམ་མོའི་སྒྲ་བཤད་རྣམ་རྟོག་ནི།།ཆོས་ཉིད་གཏུམ་པར་འཆད་པ་དང་།།གླུ་ཡི་སྒྲ་བཤད་བྱེད་པ་ལ།།སེམས་ཅན་སླུ་བར་འཆད་པ་དང་།།ཕུར་མ་རི་རབ་མཉམ་པ་ལ།།དྲི་རབ་མནམ་པར་འཆད་པ་དང་།།ཤཱཀྱའི་བུ་མོ་གོ་པཱའི་སྒྲ།།གོ་ནི་ས་ཡིན་པཱ་ཡི་སྒྲ།།འཚོ་བའམ་སྐྱོང་བ་སོགས་ལ་འཇུག།དེས་ན་བོད་སྐད་ས་འཚོ་ཡིན།།དེ་ལ་གོ་པཱའི་སྒྲ་བཤད་ནི།།རྟོགས་པའི་དོན་དུ་བཤད་པ་དང་།།རྒྱ་སྐད་རཏྣ་ཀེ་ཏུ་ལ།།ཀེ་ཏུའི་སྒྲ་ནི་དབལ་དང་ཏོག།དུ་བ་མཇུག་རིངས་སོགས་ལ་འཇུག།སྐད་རྙིང་རྣམས་ལ་དབལ་དུ་ཡོད།།གསར་བཅད་མན་ཆད་ཏོག་ཏུ་བསྒྱུར།།དེས་ན་འབུམ་ལས་རིན་ཆེན་དབལ།།གསར་བཅད་ཀྱིས་ནི་ཞུས་པ་ཡི།།བརྒྱད་སྟོང་པ་ལས་རིན་ཆེན་ཏོག།ཅེས་བྱར་བསྒྱུར་བ་མི་ཤེས་པར།།རིན་ཆེན་དཔལ་དུ་བཤད་པ་དང་།།པོ་ཏ་ལ་ཞེས་བྱ་བའི་སྒྲ།།བོད་སྐད་དུ་ནི་གྲུ་འཛིན་ཡིན།།རི་བོ་གྲུ་འཛིན་ཞེས་བྱ་བར།།བསྒྱུར་ན་བོད་ལ་འཐད་མོད་ཀྱི།།ལ་ལས་རྒྱ་སྐད་སོར་བཞག་ནས།།པོ་ཏ་ལ་ཡི་རི་ཞེས་བསྒྱུར།།དེ་ལ་སྒྲ་བསྒྱུར་ལ་ལ་ཡིས།།རི་སྒྲ་གོང་དུ་ཕྱུང་ནས་ནི།།རི་པོ་ཏ་ལ་ཞེས་བྱར་བསྒྱུར།།དེ་དོན་མ་རྟོགས་པ་རྣམས་ཀྱིས།།རི་བོ་ཏ་ལར་བཤད་པ་འཁྲུལ།།འཁོར་གསུམ་ཡོངས་དག་ཅེས་བྱ་བ།།རྒྱ་སྐད་དུ་ནི་ཏྲི་མཎྜལ།།པ་རི་ཤུདྡྷ་ཞེས་བྱར་ཡོད།།ཏྲི་ནི་གསུམ་ཡིན་མཎྜལ་ལ།།ཞེས་བྱ་བོད་སྐད་དཀྱིལ་འཁོར་ཡིན།།པ་རི་ཤུདྡྷ་ཡོངས་དག་པ།།དྲང་པོར་བསྒྱུར་ན་དཀྱིལ་འཁོར་གསུམ།།ཡོངས་སུ་དག་པ་ཞེས་བྱར་འགྱུར།།མཁས་པ་རྣམས་ཀྱིས་སྒྲ་བསྡུས་ནས།།འཁོར་གསུམ་ཡོངས་དག་ཅེས་བྱར་བསྒྱུར།།དེ་ཡི་སྒྲ་དོན་མི་ཤེས་པར།།འཁོར་གསུམ་གཡོག་ཏུ་འཆད་པ་འཁྲུལ།།རྒྱ་སྐད་ལངྐ་པཱུ་རི་ལ།།པཱུ་རིའི་སྒྲ་ནི་གྲོང་ཁྱེར་ཡིན།།བོད་སྐད་ལངྐའི་གྲོང་ཁྱེར་ཏེ།།ལྷོ་ཕྱོགས་རྒྱ་མཚོའི་གླིང་ན་ཡོད།།འོན་ཀྱང་རྒྱ་སྐད་མ་ཤེས་པར།།པུ་རངས་སུ་ནི་འཆད་པ་དང་།།རྒྱ་སྐད་བི་མ་ལ་མི་ཏྲ།།བོད་སྐད་དྲི་མེད་བཤེས་གཉེན་ཡིན།།དེ་ཡི་སྒྲ་དོན་མི་ཤེས་པར།།བྱེ་མ་ལ་དང་མུ་ཏྲའི་སྒྲ།།ཕྱག་རྒྱ་ཡིན་པར་བཤད་པ་དང་།།རྒྱ་སྐད་ནཱ་རོ་ཏ་ཡི་སྒྲ།།བྲམ་ཟེའི་རིགས་ཀྱི་བྱེ་བྲག་ཡིན།།དེ་ཡི་རྒྱུ་མཚན་མི་ཤེས་པར།།དཀའ་བ་སྤྱད་པས་ཨ་ན་ན།།རོ་རུ་སོང་ཞེས་འཆད་པ་དང་།།ཏི་ལོ་ཞེས་བྱ་ཏིལ་བརྡུང་ཡིན།།དེ་ལ་ཏེ་ལོར་འཆད་པ་དང་།།རྒྱ་སྐད་ལཱུ་ཧི་ཞེས་བྱ་བ།།བོད་སྐད་ཉ་ཡི་རྒྱུ་ལྟོ་ཡིན།།དེ་ཡི་སྒྲ་དོན་མི་ཤེས་པར།།གླུ་ཡི་པ་རུ་འཆད་པ་དང་།།རྒྱ་སྐད་ཨིནྡྲ་བྷཱུ་ཏི་ནི།།བོད་སྐད་འབྱུང་པོའི་དབང་པོ་ཡིན།།དེ་ཡི་སྒྲ་འགྱུར་མི་ཤེས་པར།།བརྒྱ་བྱིན་བྱང་ཆུབ་ཏུ་འཆད་དང་།།རྒྱ་སྐད་ཨ་བ་དྷཱུ་ཏཱིའི་སྒྲ།།གཉིས་སྤངས་སམ་ནི་ཀུན་འདར་ཡིན།།དེ་ལ་འདོད་སྟེར་འཆད་པ་དང་།།རྒྱ་སྐད་དོ་ཧ་ཞེས་བྱ་བ།།བོད་སྐད་ལྷུག་པའམ་མ་བཅོས་པ།།ཞེས་བྱའི་དོན་ལ་འཇུག་མོད་ཀྱི།།དེ་ཡི་རྒྱུ་མཚན་མི་ཤེས་པར།།དོ་ནི་གཉིས་ཡིན་ཧ་དགོད་པ།།གཉིས་ལ་དགོད་པར་འཆད་པ་དང་།རྒྱ་སྐད་ཛ་བ་ཞེས་བྱ་བ།།མེ་ཏོག་དམར་པོ་ཞིག་ལ་འཇུག།དེ་ཡི་བརྡ་དོན་མི་འཕྲོད་པར།།བྱམས་པའི་མཛའ་བར་འཆད་པ་སོགས།།བླུན་པོ་རྣམས་ལ་ལེགས་ལེགས་འདྲ།།མཁས་པས་མཐོང་ན་བཞད་གད་གནས།།རྒྱུ་མཚན་ཅི་ཡི་ཕྱིར་ཞེ་ན།།སཾ་སྐྲྀ་ཏ་ཡི་སྒྲ་དོན་ལ།།བཤད་དུ་མི་རུང་ཉིད་ཕྱིར་དང་།།རྒྱ་སྐད་ཡིན་པར་མི་ཤེས་པར།།བོད་སྐད་ཡིན་པར་བཤད་ཕྱིར་རོ།།དེས་ན་དེ་འདྲའི་བཤད་པ་ཀུན།།བོད་ཀྱི་བླུན་པོས་སྦྱར་བས་ན།།མཁས་པ་རྣམས་ཀྱིས་དོར་བར་བྱ།།དེ་བཞིན་གཤེགས་པའི་བཤད་པ་ནི།།དེ་ཉིད་རྟོགས་པར་འཆད་པ་དང་།།དགྲ་བཅོམ་སྒྲ་དོན་མཆོད་འོས་དང་།།རྒྱལ་པོའི་བཤད་པ་གསལ་བ་དང་།།བཟོད་པའི་བཤད་པ་མི་འབྱེད་དང་།།ཕུང་པོ་ཕྲག་པར་འཆད་པ་དང་།།ཁམས་ལ་དབྱིངས་སུ་འཆད་པ་དང་།།བཅོམ་པ་སྐལ་བར་འཆད་པ་དང་།།སྦྱང་དཀའ་ཐུབ་དཀར་འཆད་པ་དང་།།བག་ཆགས་གནས་སུ་འཆད་པ་དང་།།ཤཱཀྱ་ཕོད་པར་བཤད་པ་སོགས།།བོད་ལ་ཅུང་ཟད་མི་བདེ་ཡང་།།ལེགས་པར་སྦྱར་བའི་སྒྲ་དག་ལ།།ཤིན་ཏུ་འཐད་ཕྱིར་མཁས་པས་བླང་།།སངས་རྒྱས་གསུང་རབ་དྲི་མ་མེད།།བསྡུ་བ་དང་པོ་བྱས་པའི་རྗེས།།བསྟན་པ་དག་པར་གནས་པ་ན།།ཡངས་པ་ཅན་གྱི་དགེ་སློང་གིས།།སངས་རྒྱས་བསྟན་དང་འགལ་བ་ཡི།།མི་རུང་བ་ཡི་གཞི་བཅུ་བྱས།།དེ་ལ་འཕགས་པ་བདུན་བརྒྱ་ཡིས།།ཆོས་ལོག་ལེགས་པར་སུན་དབྱུང་ཕྱིར།།བསྡུ་བ་གཉིས་པ་མཛད་ཅེས་གྲག།དེ་ལྟར་དག་པར་བྱས་པའི་རྗེས།།ལྷ་ཆེན་ཞེས་བྱའི་དགེ་སློང་ཞིག།བསྟན་པ་འདི་ཡི་ཆོམ་རྐུན་བྱུང་།།དེ་ཡིས་རང་གི་ཕ་མ་བསད།།སློབ་དཔོན་ཡིན་པའི་དགྲ་བཅོམ་བཀྲོངས།།མཁན་སློབ་མེད་པའི་དགེ་སློང་བྱས།།ཕྱི་ནས་དགོན་པར་བསྡད་ནས་ནི།།སྦྱིན་བདག་རྣམས་ཀྱི་དད་རྫས་ཟོས།།བླུན་པོ་རྣམས་ཀྱི་མཁན་སློབ་བྱས།།བླུན་པོ་ལོངས་སྤྱོད་ཅན་རྣམས་ཀྱིས།།ཕུལ་བའི་ཟས་ནོར་ཆར་བཞིན་བབ།།སྐལ་མེད་དད་ཅན་འདུས་པ་ཡི།།དགེ་འདུན་འབུམ་ཕྲག་དུ་མས་བསྐོར།།དེ་ནས་བརྫུན་རླབས་ཆེན་པོ་དེ།།དགྲ་བཅོམ་ཡིན་པར་ཁས་བླངས་སོ།།འཁོར་གྱིས་རྫུ་འཕྲུལ་ཞུས་པ་ན།།རྫུ་འཕྲུལ་ཐོ་རངས་ཉམས་ཞེས་ཟེར།།རང་གི་སྡིག་པ་དྲན་པ་ཡིས།།སྨྲེ་སྔགས་ཆེན་པོ་བཏོན་པ་ལ།།སྡུག་བསྔལ་བདེན་པ་བོས་ཞེས་བསྒྲགས།།དེ་ལ་སོགས་པའི་བརྫུན་ཚིག་གིས།།ཚོགས་པ་རྣམས་ཀྱི་མགོ་བོ་བསྐོར།།འཕགས་པ་རྣམས་ལ་འབུལ་རྒྱུ་ཡི།།དད་རྫས་རྣམས་ཀྱང་དེ་ལ་འགྱུར།།རབ་བྱུང་བླུན་པོ་ཕལ་ཆེར་གྱིས།།དགྲ་བཅོམ་བོར་ནས་དེ་ལ་འདུས།།སངས་རྒྱས་མྱ་ངན་འདས་འོག་ཏུ།།སོ་སོ་སྐྱེ་བོས་འཁོར་བསྡུས་པ།།དེ་ལས་མང་བ་མེད་ཅེས་གྲགས།།དེ་ཡི་ཆོས་ལོག་བཤད་པ་ཡི།།རྗེས་སུ་སློབ་མ་རྣམས་འབྲངས་ནས།།འཁྲུལ་པའི་གྲུབ་མཐའ་དུ་མ་བྱུང་།།ལྷ་ཆེན་བླུན་པོ་དེ་ཤི་ནས།། སེམས་ཅན་དམྱལ་བར་གྱུར་ཅེས་གྲག།དེ་ཡི་ལོག་པའི་ཆོས་དེ་དག།དགྲ་བཅོམ་རྣམས་ཀྱིས་སུན་ཕྱུང་ནས།།བསྡུ་བ་གསུམ་པ་བྱས་ཞེས་ཐོས།།འོན་ཀྱང་དེ་ཡི་ལེ་ལན་གྱིས།།སྡེ་པ་བཅོ་བརྒྱད་རྣམས་ལ་ཡང་།།ཅུང་ཟད་བསླད་པ་ཡོད་ཅེས་ཟེར།།མཁས་པའི་གཙུག་རྒྱན་དབྱིག་གཉེན་གྱིས།།ཡང་དག་བསྡུས་པའི་གཞི་ཉམས་ཕྱིར།།མཐའ་དག་མིན་པར་རྟོགས་པ་ཡིན།།ཞེས་གསུངས་པ་ཡང་དེ་ལ་དགོངས།།དེ་ནི་ཉན་ཐོས་རྣམས་ཀྱི་ཡིན།།ཐེག་པ་ཆེན་པོའི་བསྟན་པ་ནི།།ཤིན་ཏུ་དར་བར་གྱུར་པའི་ཚེ།།ཉི་མ་བསྒྲུབས་པའི་མུ་སྟེགས་བྱེད།།སྤྲང་པོ་ཉི་མའི་དངོས་གྲུབ་ཀྱིས།།གཙུག་ལག་ཁང་རྣམས་བསྲེགས་པའི་ཚེ།།དམ་ཆོས་མངོན་པ་ལ་སོགས་པ།།སྡེ་སྣོད་ཕལ་ཆེར་བསྲེགས་ཞེས་གྲག།དེ་ནས་འཕགས་པ་ཐོགས་མེད་ཀྱིས།།མི་ཕམ་མགོན་ལ་གསན་ནས་ནི།།དེ་ཡི་གཞུང་ལུགས་དར་བར་མཛད།།དེ་ཡི་རྗེས་ལ་མཁས་པ་དང་།།བླུན་པོ་རྣམས་ཀྱི་བྱེ་བྲག་གིས།།བསྟན་པའི་འཕེལ་འགྲིབ་དུ་མ་བྱུང་།།ཕྱི་ནས་གངས་རིའི་ཁྲོད་འདི་རུ།།སངས་རྒྱས་བསྟན་པ་ལེགས་པར་བསྒྱུར།།དེ་ནས་བསྟན་པ་དར་བའི་ཚེ།།རྒྱལ་པོ་དར་མས་བསྟན་པ་བསྣུབས།།དེ་རྗེས་ཆོས་ལོག་དུ་མ་འཕེལ།།དེ་ཚེ་བླ་མ་ཡེ་ཤེས་འོད།།ཆོས་རྒྱལ་དེ་ཡིས་སྐྱེས་བུ་མཆོག།རིན་ཆེན་བཟང་པོ་ཁ་ཆེར་བརྫངས།།འཇམ་པའི་དབྱངས་ཀྱིས་བྱིན་བརླབས་པའི།།མཁས་པ་དེ་ཡིས་སྔོན་མེད་པའི།།ཆོས་རྣམས་ཕལ་ཆེར་བསྒྱུར་ཅིང་ཞུས།།ཆོས་དང་ཆོས་མིན་རྣམ་འབྱེད་པ།།ཞེས་བྱའི་བསྟན་བཅོས་མཛད་ནས་ནི།།ཆོས་ལོག་ཐམས་ཅད་ནུབ་པར་མཛད།།དེ་ཡི་སློབ་མ་ཞི་བ་འོད།།དེས་ཀྱང་སྔགས་ལོག་སུན་འབྱིན་པ།།ཞེས་བྱའི་བསྟན་བཅོས་མཛད་ཅེས་ཟེར།།དེ་དག་འདས་པའི་འོག་ཏུ་ཡང་།།ཆོས་ལོག་འགའ་ཞིག་འཕེལ་བའི་རྒྱུས།།ལྷས་བཙས་ཞེས་བྱའི་ལོ་ཙཱ་བ།།དེས་ཀྱང་ཆོས་ལོག་སུན་འབྱིན་པ།།ཞེས་བྱའི་བསྟན་བཅོས་མཛད་ནས་ནི།།ཆོས་དང་ཆོས་མིན་རྣམ་པར་ཕྱེ།།དེ་ནས་ཆོས་རྗེ་ས་སྐྱ་པ།།ཆེན་པོ་བཞུགས་པ་ཡན་ཆད་དུ།།ཆོས་ལོག་སྤྱོད་པ་ཉུང་ཞེས་ཐོས།།ཕྱི་ནས་ཕག་མོའི་བྱིན་རླབས་དང་།།སེམས་བསྐྱེད་རྨི་ལམ་མ་ལ་སོགས།།ཡི་དམ་བསྒོམ་པ་དཀྲོངས་བསྐྱེད་དང་།།དཀར་པོ་ཆིག་ཐུབ་ལ་སོགས་པ།།སངས་རྒྱས་བསྟན་དང་འགལ་བ་ཡི།།ཆོས་ལོག་དུ་མ་དེང་སང་འཕེལ།།མཁས་རྣམས་འདི་ལ་མི་དགྱེས་ཀྱང་།།དུས་ཀྱི་ཤུགས་ཀྱིས་བཟློག་མ་ནུས།།བླུན་པོ་སྦྱངས་པ་ཆུང་བ་རྣམས།།འདི་འདྲ་སྤྱོད་པ་བདེན་མོད་ཀྱི།།མཁས་པ་སྦྱངས་པར་རློམ་པ་ཡང་།།རི་བོང་ཆལ་བཞིན་འདི་ལ་སྤྱོད།།འདི་འདྲའི་རིགས་ཅན་འཕེལ་གྱུར་ན།།སངས་རྒྱས་བསྟན་ལ་གནོད་མི་གནོད།།མཁས་པ་རྣམས་ཀྱིས་དཔྱོད་ལ་སྨྲོས།།གལ་ཏེ་འདི་འདྲའི་ཆོས་ལོག་གིས།།སངས་རྒྱས་བསྟན་ལ་མི་གནོད་ན།།མུ་སྟེགས་སོགས་ཀྱི་ཆོས་ལོག་ཀྱང་།།སངས་རྒྱས་བསྟན་ལ་ཅི་སྟེ་གནོད།།ཆོས་ལོག་གཞན་གྱིས་གནོད་ན་ནི།།འདི་དག་གིས་ཀྱང་མི་གནོད་དམ།།གནོད་ཀྱང་སུན་འབྱིན་མི་འཐད་ན།།མུ་སྟེགས་བྱེད་དང་ཉན་ཐོས་སོགས།།འདི་ལའང་སུན་དབྱུང་ཅི་སྟེ་བྱ།།འདི་དག་བསྟན་ལ་གནོད་པའི་ཕྱིར།།མཁས་རྣམས་སུན་འབྱིན་མཛད་ན་ནི།།བསྟན་ལ་གནོད་པའི་ཆོས་ལོག་ཀྱང་།།མཁས་པ་རྣམས་ཀྱིས་སུན་ཕྱུངས་ཤིག།ཅི་ཕྱིར་ཞེ་ན་རྒྱལ་བ་ཡིས།།རིན་ཆེན་ཆོས་ཀྱང་དཀོན་ལ་ནི།།རྟག་ཏུ་འཚེ་བ་མང་ཞེས་གསུངས།།འདི་ལ་བསམས་ལ་མཁས་རྣམས་ཀྱིས།།རྟག་ཏུ་བསྟན་པའི་བྱི་དོར་བྱ།།ཉི་མ་གཅིག་གི་བཟའ་བཏུང་ལའང་།།བཟང་ངན་རྟོག་དཔྱོད་སྣ་ཚོགས་གཏོང་།།གོས་དང་མཁར་ལྷན་ལ་སོགས་པའི།།བྱ་བ་གང་ལའང་ལེགས་ཉེས་དང་།།བཟང་ངན་མཁས་དང་མི་མཁས་ཞེས།།བླང་དོར་རྟོག་དཔྱོད་སྣ་ཚོགས་བྱེད།།རྟ་དང་ནོར་བུ་ལ་སོགས་པ།།ཅུང་ཟད་ཙམ་གྱི་ཉོ་ཚོང་ལའང་།།ཀུན་ལ་འདྲི་ཞིང་བརྟགས་ནས་དཔྱོད།།ཚེ་འདིའི་བྱ་བ་ཅུང་ཟད་ལའང་།།དེ་འདྲའི་འབད་པ་བྱེད་པ་མཐོང་།།སྐྱེ་བ་གཏན་གྱི་ལེགས་ཉེས་ནི།།དམ་པའི་ཆོས་ལ་རག་ལས་ཀྱང་།།ཆོས་འདི་ཁྱི་ཡི་ཟས་བཞིན་དུ།།བཟང་ངན་གང་དུའང་མི་དཔྱོད་པར།།གང་ཕྲད་དེ་ལ་གུས་པར་འཛིན།།ཉིན་གཅིག་གི་ནི་སྐྱེལ་མ་འམ།།ཚེ་གཅིག་གི་ནི་གཉེན་འབྲེལ་ལའང་།།འབད་དེ་བརྟགས་ནས་ལེན་པ་མཐོང་།།དེང་ནས་བརྩམས་ཏེ་རྫོགས་པ་ཡི།།སངས་རྒྱས་མ་ཐོབ་བར་གྱི་དོན།།བླ་མ་མཆོག་ལ་རག་ལས་མོད།།འོན་ཀྱང་རྟོག་དཔྱོད་མི་བྱེད་པར།།ཚོང་དུས་ངན་པའི་ཟོང་བཞིན་དུ།།སུ་ཕྲད་རྣམས་ལས་ལེན་པ་མཐོང་།།ཀྱེ་མ་སྙིགས་མའི་དུས་འདི་མཚར།།འབད་མི་དགོས་ལ་འབད་པ་བྱེད།།འབད་དགོས་ཆོས་དང་བླ་མ་ནི།།ཅི་ཡང་རུང་བས་ཚིམ་པར་སྣང་།།བདག་ནི་སེམས་ཅན་ཀུན་ལ་བྱམས།།གང་ཟག་ཀུན་ལ་བདག་མི་སྨོད།།བརྒྱ་ལ་མཉམ་པར་མ་བཞག་པས།།སྨད་པ་སྲིད་ནའང་སྡིག་དེ་བཤགས།།དམ་ཆོས་འཁྲུལ་དང་མ་འཁྲུལ་བ།།སྐྱེ་བ་གཏན་གྱི་གྲོས་ཡིན་པས།།འདི་ཡི་ལེགས་ཉེས་དཔྱོད་པ་ལ།།སྡང་ཞེས་སྨྲ་ན་རང་སྐྱོན་ཡིན།།ཀླུ་སྒྲུབ་དང་ནི་དབྱིག་གཉེན་དང་།།ཕྱོགས་ཀྱི་གླང་པོ་ཆོས་གྲགས་སོགས།།མཁས་པ་ཀུན་གྱིས་རང་གཞན་གྱི།།ཆོས་ལོག་ཐམས་ཅད་སུན་ཕྱུང་བ།།དེ་ལའང་སྡང་ཞེས་ཟེར་རམ་ཅི།།རྫོགས་པའི་སངས་རྒྱས་ཀུན་གྱིས་ཀྱང་།།བདུད་དང་མུ་སྟེགས་སུན་ཕྱུང་བ།།དེ་ཡང་ཕྲག་དོག་ཉིད་འགྱུར་རམ།།མཁས་རྣམས་བླུན་པོའི་ལོང་ཁྲིད་ཡིན།།ནོར་པའི་ཆོས་དང་མ་ནོར་བའི།།ལོང་ཁྲིད་ལེགས་པར་བྱས་པ་ལ།།སྡང་ཞེས་སྨྲ་ན་ད་སླན་ཆད།།སངས་རྒྱས་བསྟན་པ་ཇི་ལྟར་བསྲུང་།།ལོང་ཁྲིད་ཀྱིས་ནི་ལོང་བ་ལ།།གཡང་ས་བཀག་ཅིང་ལམ་བཟང་པོར།།ཁྲིད་པའང་ཕྲག་དོག་ཡིན་ནམ་ཅི།།འོ་ན་ལོང་བ་ཇི་ལྟར་བཀྲི།།ནད་པ་ལ་ནི་གནོད་པ་ཡི།།ཁ་ཟས་སྤོངས་ཤིག་ཕན་པ་བསྟེན།།དེ་སྐད་སྨན་པས་སྨྲ་ན་ཡང་།།སྡང་དང་ཕྲག་དོག་འགྱུར་ན་ནི།།འོ་ན་ནད་པ་ཇི་ལྟར་གསོ།།ཆོས་ལོག་པ་དང་མ་ལོག་པའི།།རྣམ་པར་དབྱེ་བ་བྱས་པ་ལ།།སྡང་དང་ཕྲག་དོག་ཡིན་ཟེར་ན།།འོ་ན་འཁོར་བའི་རྒྱ་མཚོ་ལས།།སེམས་ཅན་རྣམས་ནི་ཇི་ལྟར་བསྒྲལ།།སངས་རྒྱས་འཇིག་རྟེན་བྱོན་པ་དང་།།མཁས་རྣམས་བཤད་པ་བྱེད་པ་ལ།།འབྲས་བུ་རྣམ་གསུམ་འབྱུང་བ་འདི།།སངས་རྒྱས་བསྟན་པའི་སྤྱི་ལུགས་ཡིན།།མ་ཁོལ་གྱིས་ཀྱང་འདི་སྐད་གསུངས།།དཔའ་བོ་ཁྱོད་ཀྱི་བསྟན་པ་ནི།།མུ་སྟེགས་ཐམས་ཅད་སྐྲག་མཛད་ཅིང་།།བདུད་ནི་སེམས་ཁོང་ཆུད་མཛད་ལ།།ལྷ་དང་མི་རྣམས་དབུགས་ཀྱང་འབྱིན།།ཞེས་གསུངས་དེང་སང་འདི་ན་ཡང་།།མཁས་པ་རྣམས་ཀྱིས་ཆོས་བཤད་ན།།ཆོས་ལོག་སྤྱོད་པ་ཕམ་བྱེད་ཅིང་།།བདུད་རིགས་ཐམས་ཅད་ཡི་མུག་འགྱུར།།མཁས་པ་ཐམས་ཅད་དགའ་བར་བྱེད།།འདི་འདྲས་བསྟན་པ་འཛིན་པར་ནུས།།འདི་ལས་བཟློག་པ་བྱུང་གྱུར་ན།།བསྟན་ལ་གནོད་པར་ཤེས་པར་གྱིས།།བདག་ཀྱང་རྡོ་རྗེ་ཕག་མོ་ཡི།།བྱིན་རླབས་ཙམ་རེ་བྱས་པ་ལ།།དཀར་པོ་ཆིག་ཐུབ་བསྟན་ནས་ཀྱང་།།མྱོང་བ་ཅུང་ཟད་སྐྱེས་པ་ལ།།མཐོང་ལམ་དུ་ནི་ངོ་སྤྲད་ནས།།རྩོལ་བསྒྲུབ་མེད་པའི་དོན་བསྟན་ན།།ཚོགས་པའང་འདི་བས་མང་བ་འདུ།།ལོངས་སྤྱོད་འབུལ་བའང་མང་བར་འགྱུར།།བླུན་པོ་རྣམས་ཀྱི་བསམ་པ་ལའང་།།སངས་རྒྱས་ལྟ་བུར་མོས་པ་སྐྱེ།།ཆོས་ཀྱི་གནད་རྣམས་མི་ཤེས་པའི།།སྡེ་སྣོད་འཛིན་པར་རློམ་པ་ཡང་།།དེ་ལ་ལྷག་པར་དད་འགྱུར་བར།།བདག་གིས་ལེགས་པར་གོ་མོད་ཀྱི།།འཁོར་དང་ཟང་ཟིང་བསྒྲུབ་པའི་ཕྱིར།།བདག་གིས་སེམས་ཅན་བསྡུས་པ་མིན།།འོན་ཀྱང་སངས་རྒྱས་བསྟན་པ་ལ།།ཕན་པར་བསམས་ནས་བཤད་པ་ཡིན།།སངས་རྒྱས་བསྟན་པ་བཞིན་བསྒྲུབས་ན།།སངས་རྒྱས་བསྟན་ལ་ཕན་པར་བསམས།།མུ་སྟེགས་བྱེད་དང་ཉན་ཐོས་དང་།།ཐེག་པ་ཆེན་པོ་འགའ་ཞིག་ལའང་།།འཁྲུལ་པ་ཡོད་མོད་མཁས་རྣམས་ཀྱིས།།སུན་ཕྱུང་ཕྱིར་ན་འདིར་མ་བཤད།།དེང་སང་གངས་རིའི་ཁྲོད་འདི་ན།།རིགས་པས་བསྒྲུབས་པར་མི་ནུས་ཤིང་།།སངས་རྒྱས་བསྟན་དང་འགལ་བ་ཡི།།འཁྲུལ་པ་གསར་པ་དུ་མ་བྱུང་།།རྡོ་རྗེ་ཐེག་པའི་གནད་འཆུགས་པས།།རྒྱུད་སྡེ་རྣམས་དང་གྲུབ་ཐོབ་ཀྱི།།དགོངས་པ་རྣམས་དང་འགལ་བའི་གནད།།དཔག་མེད་ཡོད་མོད་གསང་སྔགས་ཉིད།།ཡིན་ཕྱིར་ཁོ་བོས་གཞན་དུ་བཤད།།འདི་ནི་ཀུན་ལ་བཤད་རུང་བའི།།འཁྲུལ་པ་རགས་རིམ་ཅི་རིགས་པ།།འཕེལ་ན་བསྟན་ལ་གནོད་མཐོང་ནས།།ཆེ་ལོང་ཙམ་ཞིག་བཤད་པ་ཡིན།།ད་དུང་འཁྲུལ་པའི་རྣམ་གཞག་ནི།།སྐྱོན་ཅན་དཔག་མེད་སྣང་ན་ཡང་།།གཞུང་མངས་དོགས་པས་རེ་ཞིག་བཞག།གལ་ཏེ་ལུང་དང་རིགས་པའི་གནད།།ཤེས་པའི་བློ་ཅན་རྣམས་ཀྱིས་དེ།།ལེགས་པར་དཔྱོད་ལ་དགག་བསྒྲུབ་གྱིས།།སངས་རྒྱས་བསྟན་དང་ཕྲད་དཀའ་ཞིང་།།དལ་བ་འབྱོར་པའང་རྙེད་དཀའ་བས།།མཁས་པ་རྣམས་ཀྱིས་ལེགས་རྟོགས་ལ།།གཟུ་བོར་གནས་པའི་བློ་ཡིས་དཔྱོད།།བདག་གིས་སྒྲ་དང་ཚད་མ་བསླབས།།ཚིག་གི་སྡེབ་སྦྱོར་རྣམས་ཀྱང་ཤེས།།རྒྱན་དང་མངོན་བརྗོད་ཕལ་ཆེར་གོ།འདུལ་བ་དང་ནི་མངོན་པ་དང་།།ཕ་རོལ་ཕྱིན་པའང་ཕལ་ཆེར་ཐོས།།གསང་སྔགས་རྒྱུད་སྡེ་བཞི་པོ་ཡང་།།ཉན་བཤད་ཡོད་པ་ཕལ་ཆེར་ཐོས།།ཐོས་པ་དེ་དག་ཐམས་ཅད་ཀྱང་།།མིང་རྐྱང་ཙམ་དུ་མ་བཞག་གོ།བྱེ་བྲག་སྨྲ་དང་མདོ་སྡེ་པ།།སེམས་ཙམ་དང་ནི་དབུ་མ་ཡི།།གདམས་ངག་ཇི་སྙེད་ཕལ་ཆེར་ཐོས།།དེང་སང་བོད་ལ་གྲགས་པ་ཡི།།ཞི་བྱེད་རྫོགས་ཆེན་གཅོད་ལ་སོགས།།སྐབས་བརྒྱད་ཅིག་ཆར་བསྒོམ་པ་དང་།།ཕ་རོལ་ཕྱིན་པའི་བློ་སྦྱོང་དང་།།བཀའ་གདམས་གདམས་ངག་ལུགས་གཉིས་དང་།།ས་ར་ཧ་དང་ཏི་ལོ་པ།།ནག་པོ་སྤྱོད་པའི་དོ་ཧ་དང་།།རྣལ་འབྱོར་དབང་ཕྱུག་བིར་ཝ་པའི།།དོ་ཧ་སེང་གེ་ཞེས་བྱ་སོགས།།དོ་ཧའི་བྱེ་བྲག་དུ་མ་ཐོས།།རིམ་ལྔ་སྟན་ཐོག་གཅིག་པ་དང་།།ནཱ་རོ་ཆོས་དྲུག་ལུགས་གསུམ་དང་།།གསང་བ་འདུས་པ་ཡེ་ཤེས་ཞབས།།དེ་བཞིན་འཕགས་སྐོར་གདམས་ངག་དང་།།དགྱེས་པ་རྡོ་རྗེ་སྙིང་པོའི་སྐོར།།གཤིན་རྗེ་གཤེད་དང་འཇིགས་བྱེད་སོགས།།དེ་ཡི་གདམས་ངག་གསར་རྙིང་དང་།།འཁོར་ལོ་སྡོམ་པའི་གདམས་ངག་དང་།།དུས་ཀྱི་འཁོར་ལོའི་སྦྱོར་དྲུག་སོགས།།མཚན་བརྗོད་བཤད་པ་ལུགས་དྲུག་དང་།།འཆི་མེད་གྲུབ་པའི་གདམས་ངག་དང་།།ལམ་འབྲས་ལ་སོགས་ལམ་སྐོར་དགུ།།དེ་ལས་འཕྲོས་པ་དུ་མ་དང་།།གཞན་ཡང་བོད་དང་རྒྱ་གར་ལ།།དེང་སང་གྲགས་པ་ཕལ་མོ་ཆེ།།བདག་གིས་འབད་དེ་ལེགས་པར་མཉན།།བསླབས་པ་དེ་དག་མིང་རྐྱང་མིན།།དེ་ཕྱིར་ཆོས་རྣམས་ཕལ་ཆེར་ཐོས།།དེས་ན་བདག་ལ་ཕྱོགས་ལྷུང་མེད།།དེ་ཕྱིར་གཟུ་བོས་དཔྱད་པ་འདི།།བློ་ལྡན་རྣམས་ཀྱིས་འདི་ལྟར་ཟུངས།།ཐུབ་པའི་བསྟན་པ་རིན་ཆེན་གཞལ་མེད་ཁང་།།ལོག་ལྟའི་མུན་ནག་ཚང་ཚིང་རྣམ་པར་བསལ།།བློ་གསལ་བློ་ཡི་པདྨ་ཁ་འབྱེད་པ།།བསྟན་བཅོས་ཉི་མའི་སྣང་བ་དེང་འདིར་ཤར།།རྒྱལ་བ་ཀུན་གྱི་དགོངས་པ་འདི་ཡིན་ཞེས།།འགྲོ་ལ་ཕན་པའི་བསམ་པས་བདག་གིས་བཤད།།མཁས་པ་ཀུན་གྱི་དགོངས་པ་འདི་ཡིན་མོད།།ད་དུང་བླུན་པོ་རྣམས་ཀྱིས་རྟོགས་པར་དཀའ།།ཀུན་དགའི་ཉི་མས་སངས་རྒྱས་བསྟན་པ་ཡི།།པདྨོ་རྣམ་པར་ཕྱེ་བ་ལས་བྱུང་བའི།།དམ་པའི་སྦྲང་རྩིས་འགྲོ་བའི་བུང་བ་ཀུན།།རྒྱུན་དུ་བདེ་བའི་དགའ་སྟོན་འགྱེད་པར་ཤོག།གང་གི་ཐུགས་བརྩེས་ཉེར་བཟུང་ནས།།ལོག་པའི་ཆོས་རྣམས་སྤངས་ནས་ཀྱང་།།སངས་རྒྱས་བསྟན་དང་ལེགས་སྤྲོད་པའི།།འཇམ་མགོན་བླ་མ་དེ་ལ་འདུད།།སྡོམ་པ་གསུམ་གྱི་རབ་ཏུ་དབྱེ་བ་ཞེས་བྱ་བ།ཆོས་དང་ཆོས་མ་ཡིན་པ་རྣམ་པར་འབྱེད་པའི་བསྟན་བཅོས།མང་དུ་ཐོས་པའི་ནོར་དང་ལྡན་པ།རིགས་པ་དང་མི་རིགས་པ་དཔྱོད་པར་ནུས་པའི་བློ་གྲོས་ཅན།སྡེ་སྣོད་འཛིན་པ་ཀུན་དགའ་རྒྱལ་མཚན་དཔལ་བཟང་པོས་སྦྱར་བ་རྫོགས་སོ།།བྱེ་བྲག་ཏུ་གསང་སྔགས་ཀྱི་གནད་གཏན་ལ་དབབ་པ་གསང་ཆེན་ཡིན་པས་ཁོ་བོས་ལོགས་སུ་བཤད་པར་བལྟའོ།།།།