སྙན་དགོན་པ

མཚན་རྒྱས་པར་སྙན་བསམ་འགྲུབ་སྒྲོལ་མ་ལྷ་ཁང་ཞེས་ཞུ། ལུམ་པ་ཟམ་པ་ནས་སྤྱི་ལེ་ལྔ་དྲུག་ཙམ་སོང་ན་སྙན་གྲོང་ཚོའི་ལྟག་ཏུ་བཙུན་མའི་དགོན་དེ་མཇལ་རྒྱུ་ཡོད། སྙན་ཞེས་པ་ནི། གུ་རུ་རིན་པོ་ཆེས་སྲིན་མོ་སྤུན་གསུམ་བརྟུལ་གནང་ནས་ཐུགས་མཉེས་པོ་བྱུང་བས་མཉེས་ཞེས་པའི་སྒྲ་དེ་སྙན་ཞེས་པར་འགྱུར། ཐོག་མར་དགོན་དེ་རི་དེའི་རྒྱབ་རིའི་ལྡེབས་སུ་ཡོད་པ་ལ་རྗེས་སུ་གནས་དེར་ཆུ་མེད་པར་གྱུར་སྟབས་ད་ལྟའི་གནས་དེར་སྤོས་གནང་མཛད་དེ་སྒྲོལ་མའི་སྐུ་བརྙན་དང་རྗེ་ཡབ་སྲས་གསུམ་སོགས་བཞུགས་པས་སྒྲོལ་མ་ལྷ་ཁང་ཞེས་པའི་མཚན་གསོལ། བཙུན་མ་གྲངས་སུམ་ཅུ་སྐོར་འདུས། འབྲས་སྒོ་མང་གྲྭ་ཚང་གི་ཁོངས་ཡིན། ད་ལྟ་སྔོན་གྱི་དགོན་དེའི་ལྟག་ཏུ་གསར་བཞེངས་གནང་བའི་འདུ་ཁང་ཀ་བ་དྲུག་ནང་འཇིམ་གྱི་ཐུབ་དབང་དང་། རྗེ་ཡབ་སྲས་གསུམ་མི་ཚད་མ་དང་། སྒྲོལ་མའི་སྐུ་བརྙན་གྱི་སྐུ་ཚབ་སོགས་གསར་བཞེངས་དང་བཀའ་འགྱུར་གསར་བླུས་གནང་བ་སོགས་མཇལ་རྒྱུ་ཡོད། ཡང་དེ་དང་ཉེ་བའི་ཟས་ཞིམ་ཞེས་པའི་གྲོང་གི་ཤར་ངོས་རི་སྟེང་དུ་ལྷ་ལུང་དཔལ་གྱི་རྡོ་རྗེས་ཕྱག་བཏབ་གནང་བའི་ཟས་ཞིམ་མགོན་ཁང་ཉམས་གསོ་ཞུས་པ་མཇལ་རྒྱུ་ཡོད།