སྔགས་འཆང་གྲགས་པ་བློ་གྲོས་རྒྱལ་མཚན་

སྔགས་འཆང་གྲགས་པ་བློ་གྲོས་རྒྱལ་མཚན།

དཔལ་ས་སྐྱ་དགོན་གྱི་ཁྲི་པ་ཉེར་བཞི་པ་འདི་ཉིད་ཀྱི་མཚན་གཞན་འཇམ་དབྱངས་བསོད་ནམས་རྒྱལ་མཚན་ཞུ་ཞིང་རབ་བྱུང་བརྒྱད་པའི་ཆུ་ཕག(༡༤༠༣) ལོར་ཡབ་ངག་དབང་ཀུན་དགའ་རིན་ཆེན་བཀྲ་ཤིས་གྲགས་པ་རྒྱལ་མཚན་དང་ཡུམ་གདོང་དགའ་མ་ལྷ་ཅིག་དཀར་མོ་གཡང་འཛོམས་གཉིས་ཀྱི་སྲས་སུ་གདོང་དགའ་རྫོང་གི་ཡང་རྩེར་སྐུ་འཁྲུངས། དགུང་ལོ་བརྒྱད་པ་ལ་ཕེབས་པ་རབ་བྱུང་དགུ་པའི་ལྕགས་རྟ(༡༤༡༠)ལོར་ཡབ་རྗེ་ཆོས་ཀྱི་རྒྱལ་པོའི་རྒྱལ་ཚབ་ཏུ་མངའ་གསོལ། གཞོན་ནུ་ནས་བཟོ་གནས་ལའང་ཤིན་ཏུ་མཁས་པས་ཕྱག་བྲིས་མཛད་པའི་ཞལ་ཐང་རྣམས་གཞན་ལས་ངོ་མཚར་བ་སྣང་། དགུང་ལོ་ཉེར་བདུན་པ་ནས་ང་ལྔའི་བར་ལ་གསན་སའི་ཁུར་མཐའ་དག་བཞེས་ནས་རྫོང་ཆུང་བླ་བྲང་། སྒྲོལ་མ་ལྷ་ཁང་། མགོན་ཁང་ནུབ། རྗེ་བཙུན་གྱི་སྐུ་འདྲ་མཛེ་ཐོད་མ་ཞུགས་པའི་ཟུར་ཁང་གཙུག་ལག་ཁང་། ཕུ་མའི་ལྷ་ཁང་། གཞི་ཐོག་བླ་བྲང་གི་རིག་འཛིན་ལྷ་ཁང་། དབུ་རྩེ་འཇམ་དབྱངས་གཟི་འོད་འབར་བའི་དབུ་ཐོག་གི་གསེར་ཐོག་ཆེན་མོ་སོགས་གསར་བཞེངས་མཛད། དགུང་ལོ་ང་ལྔ་པ་རབ་བྱུང་དགུ་པའི་མེ་སྦྲུལ་(༡༤༤༧)ལོར་དགོངས་པ་ཆོས་དབྱིངས་སུ་གཤེགས།

༼དུང་དཀར་ཚིག་མཛོད་ཆེན་མོ་༽ནས་བཏུས།