སྒྲིབ་པ་

སྒྲིབ་པ་ནི་སངས་རྒྱས་ཀྱི་གོ་འཕང་ཐོབ་པ་ལ་གེགས་བྱེད་པའམ་བར་དུ་གཅོད་པའི་དྲི་མའི་རིགས་ཤིག་སྟེ། "ཐོག་མ་མེད་པ་ནས་སྒྲིབ་པ་གསུམ་སྟེ་བྱ་འོས་མ་བྱས་པ་དང་མི་བྱ་བ་བྱས་པ་དང་བྱ་བ་བྱས་པ་ཆུད་ཟོས་པའོ། །"ཞེས་གསུངས་པ་ལྟར། སྒྲིབ་པ་ནི་ཐོག་མ་མེད་པ་ནས་བསགས་པའི་དྲི་མ་ཞིག་ཡིན་ནོ། །

མཚན་ཉིད།

"སྒྲིབ་པ་དང་ཁེབས་པའི་རྩ་བ་ཐམས་ཅད་རྣམ་པར་འཐོར་བས་རླུང་གི་དཀྱིལ་འཁོར་ལྟ་བུའོ། །"ཞེས་གསུངས་པ་ལྟར། ཡུལ་གང་ཞིག་ལ་སྒྲིབ་པའམ་ཁེབས་པར་བྱེད་པའི་དྲི་མའི་མཚན་ཉིད་ཅན་ནོ། །

སྒྲ་བཤད།

"ལས་སྒྲིབ་རྣམ་པར་དག་པའི་མདོ་ལས་སྒྲིབ་པའི་སྒྲ་ནི་གནོད་པར་གསུངས་ཏེ། འཇམ་དཔལ་སྒྲིབ་པ་ཞེས་བྱ་བ་ནི་འདོད་ཆགས་སྒྲིབ་པ་ཞེ་སྡང་སྒྲིབ་པ་གཏི་མུག་སྒྲིབ་པ་སྦྱིན་པ་སྒྲིབ་པ་ཚུལ་ཁྲིམས་སྒྲིབ་པ་ཞེས་སོགས་དང༌།" ཞེས་གསུངས་པ་ལྟར། གནོད་པར་བྱེད་པའི་དོན་ཏོ། །"ཤེས་བྱ་ལ་མངོན་པར་ཞེན་པ་དང་། འདོད་ཆགས་ལ་སོགས་པའོ། །ཡང་དག་པའི་དོན་རྟོགས་པ་དང་འགལ་བའི་ཕྱིར་སྒྲིབ་པའོ། །དེ་དག་ཉིད་ལུས་དང་ངག་དང་ཡིད་ཉོན་མོངས་པར་བྱེད་པས་ན་ཉོན་མོངས་པའོ། །དེ་ཡང་གཉེན་པོ་གོམས་པར་བྱས་པས་བསལ་བར་ནུས་པའི་ཕྱིར་དྲི་མའོ། །"ཞེས་གསུངས་པ་ལྟར། ཡང་དག་པའི་དོན་རྟོགས་པ་ལ་བར་ཆད་བྱེད་པའི་ཕྱིར་སྒྲིབ་པ་ཞེས་བྱ་ཞིང་། དེ་དག་གིས་སེམས་ཉོན་མོངས་པར་བྱེད་པས་ན་ཉོན་མོངས་པ་ཞེས་ཀྱང་བྱ། གཉེན་པོ་གོམས་པས་བསལ་ནུས་པས་དྲི་མ་ཞེས་ཀྱང་བྱའོ། །

ངེས་ཚིག

དམ་པའི་ཆོས་ཉན་པའི་སྐབས་སུ་ "འགལ་རྐྱེན་དང་གཡེང་བ་སྤངས་ཏེ། དེ་བཞིན་དུ་གཉིད་དང་རྨུགས་པ་དང་། རྒོད་པ་དང་འགྱོད་པ་དང་གནོད་སེམས་ཏེ། བདུན་བསལ་ཞིང་དེ་ལས་ཀྱང་། སྒྲིབ་པ་བསལ་ནས་ཉོན་མོངས་པ་འདོད་ཆགས་དང་། ཁོང་ཁྲོ་དང་ང་རྒྱལ་དང་མ་རིག་པ་དང་ལྟ་བ་དང་ཐེ་ཚོམ་སྟེ་དྲུག་པོ་དེ་དག་གི་དྲི་མ་ལས་འདས་ནས།" དམ་པའི་ཆོས་ཚུལ་བཞིན་དུ་ཉན་པར་བྱ་དགོས་ཞེས་གསུངས། "གང་ཉན་ན་ཤེས་བྱའི་སྒྲིབ་པ་དང་། ཉོན་མོངས་པའི་སྒྲིབ་པ་གཉིས་བསལ་བ་སྟེ་སྤངས་པའི་སྒོ་ནས་དྲི་མའི་སྐྱོན་ཐམས་ཅད་ལས་འདས།" ཞེས་པ་ལྟར་སྒྲིབ་པ་ཉིད་རང་གཞན་དུ་དབྱེ་ནུས།

དབྱེ་བ།

དབྱེ་བའི་གྲངས། མདོ་སྡེ་རྒྱན་ལས། "སེམས་སྐྱེད་དེ་ནི་ས་རྣམས་ལ། །མོས་དང་ལྷག་བསམ་དག་པ་དང་། །རྣམ་པར་སྨིན་པ་གཞན་དུ་འདོད། །དེ་བཞིན་སྒྲིབ་པ་སྤངས་པའོ། །"ཞེས་གསུངས་པ་ལྟར། སྒྲིབ་པ་སྤངས་པའི་སེམས་བསྐྱེད་དང་བཅས་པ་བཞིར་དབྱེའོ། །སྒྲིབ་པའི་དབྱེ་བ་གཙོ་བོ། "ཉོན་མོངས་པའི་སྒྲིབ་པ་ཟད་པར་སྤངས་པས་ལེགས་པའམ་མཛེས་པར་གཤེགས་པ་དང༌།" ཞེས་དང་། "ཉོན་མོངས་པ་ཅན་མ་ཡིན་པའི་མ་རིག་པ་ཟད་པར་སྤངས་པས་མ་ལུས་པར་གཤེགས་པས་བདེ་བར་གཤེགས་པའོ། །"ཞེས་གསུངས་པ་ལྟར། སྒྲིབ་པ་ལ་ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པ་གཉིས་སུ་དབྱེའོ། །"ལས་དང་ཉོན་མོངས་པ་ལ་སོགས་པའི་སྒྲིབ་པ་མཐའ་དག་ལས་བསྒྲལ་བར་བྱའོ་ཞེས་དམ་བཅས་པའི་དུས་གང་གི་ཚེ་བདག་རང་ཉིད་ཀྱང་།" ཞེས་གསུངས་པ་ལྟར། ལས་ཀྱི་སྒྲིབ་པའང་ཡོད་དོ། །བསམ་གཏན་གྱི་སྒྲིབ་པ། "དེ་ཡང་བསམ་གཏན་གྱི་སྒྲིབ་པ་ནི་ལྔ་སྟེ། རྒོད་འགྱོད་དང་གཉིད་རྨུགས་དང་གནོད་སེམས་དང་འདོད་འདུན་དང་ཐེ་ཚོམ་མོ། །"ཞེས་གསུངས་པ་ལྟར། བསམ་གཏན་གྱི་སྒྲིབ་པ་ལྔ་ཡོད་དེ། བཤེས་སྤྲིང་ལས། "རྒོད་དང་འགྱོད་དང་གནོད་སེམས་རྨུགས་པ་དང་། །གཉིད་དང་འདོད་ལ་འདུན་དང་ཐེ་ཚོམ་སྟེ། །སྒྲིབ་པ་ལྔ་པོ་འདི་དག་དགེ་བའི་ནོར། །འཕྲོག་པའི་ཆོམ་རྐུན་ལེགས་པར་མཁྱེན་པར་མཛོད། །"ཅེས་གསུངས་སོ། །

སྒྲིབ་པ་སྦྱོང་ཐབས།

"མི་བྱ་བ་བྱས་པ་ལ་གཉིས་ཏེ་རང་གིས་མི་དགེ་བ་བྱས་པ་དང༌། གཞན་གྱི་དགེ་བ་ལ་བར་ཆོད་བྱས་པའོ། །དང་པོའི་གཉེན་པོར་སྡིག་བཤགས་སོ། །གཉིས་པའི་གཉེན་པོར་རྗེས་སུ་ཡི་རང་བ་སོགས་གསུམ་མོ། །"ཞེས་གསུངས་པ་ལྟར། སྒྲིབ་པ་སྦྱོང་བའི་ཐབས་སུ་སྡིག་བཤགས་དང་རྗེས་སུ་ཡི་རང་སོགས་ཡོད་དོ། །"དེ་བས་ན་ཉོན་མོངས་པ་དང་ཤེས་བྱའི་སྒྲིབ་པ་མཐའ་དག་བསལ་བའི་ཕྱིར་ཏུ་ལྷག་མཐོང་བསྐྱེད་དགོས་ལ་དེ་ཡང་སྔོན་དུ་ཞི་གནས་བསྒྲུབ་དགོས་པས་ཞི་གནས་སྐྱེ་བའི་གེགས་ལོག་པའི་ལམ་འདོད་པའི་རྣམ་རྟོག་སོགས་མཐའ་དག་ལས་སེམས་བསླན་ཏེ།" ཞེས་གསུངས་པ་ལྟར། སྒྲིབ་པ་བསལ་བའི་ཐབས་མཐར་ཐུག་ནི་ཞི་གནས་དང་ལྷག་མཐོང་བསྒོམ་པ་ཡིན་ནོ། །"ཤེས་རབ་ནི་མཆོག་ཡིན་པས། དེ་བསྐྱེད་པའི་དོན་དུ་ཐོས་བསམ་རྣམ་དག་ལ་འབད་པར་རིགས་ཏེ།" ཞེས་དང་། རྒྱུད་བླ་མ་ལས། "གང་ཕྱིར་སྦྱིན་པས་ལོངས་སྤྱོད་དག་ནི་སྒྲུབ་བྱེད་ཅིང་། །ཁྲིམས་ཀྱིས་མཐོ་རིས་བསྒོམ་པས་ཉོན་མོངས་སྤོང་བྱེད་ལ། །ཤེས་རབ་ཉོན་མོངས་ཤེས་བྱ་ཀུན་སྤོང་དེ་ཡི་ཕྱིར། །འདི་མཆོག་ཉིད་དེ་དེ་ཡི་རྒྱུ་ཡང་འདི་ཐོས་ཡིན། །"ཞེས་གསུངས་པ་ལྟར། སྒྲིབ་པ་གཉིས་ཀྱི་གཉེན་པོ་མཐར་ཐུག་ནི་ཤེས་རབ་ཡིན་ནོ། །"ཆོས་ཚུལ་བཞིན་ཡིད་ལ་བྱེད་པའམ་འཛིན་པའི་གེགས་སུ་གྱུར་པ་འདོད་པའི་འདུན་པ་སོགས་སྒྲིབ་པ་ལྔ་ནི་ཉོན་མོངས་པ་ཞེས་བྱ་སྟེ་དེ་རྣམས་བསལ་ནས། ཆོས་སྒྲུབ་པའམ་ཉམས་སུ་ལེན་པའི་གེགས་སུ་གྱུར་པ་ཕར་ཕྱིན་དྲུག་གི་མི་མཐུན་ཕྱོགས་སེར་སྣ་ལ་སོགས་པའི་དྲི་མ་ལས་འདས་པ།" ཞེས་གསུངས། སྤྱིར་བཏང་དུ་སྒྲིབ་པ་ལ་གཙོ་བོ་གཉིས་ཡོད་དེ། ཤེས་བྱའི་སྒྲིབ་པ་གཉུག་མའི་ཡེ་ཤེས་དང་ཆོས་ཀྱི་དབྱིངས་ཡོངས་སུ་རྟོགས་པ་ལ་བར་ཆད་བྱེད་པའི་རྨོངས་པ་དང་མ་རིག་པའི་བག་ཆགས་ཅན་གྱི་སེམས་རྣམས་ལ་ཟེར། ཉོན་མོངས་པའི་སྒྲིབ་པ་འདོད་ཆགས་དང་ཞེ་སྡང་། གཏི་མུག་ལ་སོགས་པའི་ཉོན་མོངས་པ་རགས་པ་དང་ཕྲ་བ་གང་རུང་གིས་སེམས་ཀྱི་རྒྱུན་ཉོན་མོངས་པར་བྱེད་པ་རྣམས་ལ་ཟེར།

འབྲས་བུ།

"དེ་ལྟར་རྣམ་པར་རྟོག་པ་ཐམས་ཅད་ནུབ་པའི་ཕྱིར་སྒྲིབ་པ་མཐའ་དག་ལས་གྲོལ་བ་སྐྱེ་བོ་ཞེས་བསྟན་པའི་ཕྱིར།" ཞེས་གསུངས་པ་ལྟར། སྒྲིབ་པ་མཐའ་དག་ལས་གྲོལ་ན་སངས་རྒྱས་ཀྱི་གོ་འཕང་ཐོབ་པར་འགྱུར་རོ། །