སྒྲ་བསྒྱུར་མར་པ

                                དགྱེས་མཛད་སྡོམ་པ་དཔལ་ལྡན་འདུས་པ་སྟེ།། 
                                ཁྱབ་བདག་དུས་འཁོར་བཅོམ་ལྡན་རྡོ་རྗེ་སེམས།།
                                རྡོ་རྗེ་སློབ་དཔོན་གཟུགས་ཀྱིས་མངོན་སྤྲུལ་པ།།
                                ལོ་ཙཱ་ཆེན་པོའི་ཞབས་ལ་གསོལ་བ་འདེབས།།

མར་པ་ཆོས་ཀྱི་བློ་གྲོས་ནི་བོད་ཀྱི་ལོ་རྒྱུས་ཐོག་མཚན་སྙན་ཧ་ཅང་ཆེ་བའི་ལོ་ཙཱ་བ་ཞིག་ཡིན་པ་དང་། རྗེ་བཙུན་མི་ལ་རས་པའི་བླ་མ་ཡིན། རབ་བྱུང་གོང་གི་ལོ་སྐོར་དྲུག་ཅུའི་ཐ་མ་ཆུ་བྱི་ལོར་ལྷོ་བྲག་ཆུ་ཁྱེར་གྱི་གྲོ་བོ་ལུང་དུ་སྐུ་འཁྲུངས། མཚན་ཆོས་ཀྱི་བློ་གྲོས་སུ་གསོལ། དགུང་ལོ་བཅོ་ལྔ་ནས་འབྲོག་མི་ལོ་ཙཱ་བ་ཤཱཀྱ་ཡེ་ཤེས་ཀྱི་དྲུང་དུ་སཾ་སྐྲྀ་ཏའི་སྐད་དང་སྒྲ་རིག་པ་སྦྱངས། རྒྱ་གར་འཕགས་པའི་ཡུལ་དུ་ལན་དུ་མ་ཕེབས། རྗེ་ནཱ་རོ་བ་དང་། པཎྜི་ཏ་ཡེ་ཤེས་སྙིང་པོ། ཀུ་ཀུ་རི་བ། མཻ་ཏྲི་བ་ཞི་བ་བཟང་པོ་ལ་སོགས་པའི་མཁས་གྲུབ་མང་པོ་ལས་གསང་སྔགས་ཀྱི་ཆོས་མཐའ་ཡས་པ་གསན། གྲོང་འཇུག་གི་གདམས་པ་དང་། བདེ་མཆོག་མཁའ་འགྲོའི་སྙན་རྒྱུད་ཀྱི་ཆོས་སྐོར་རྣམས་ཐོབ། དེ་ནས་བོད་ཡུལ་དུ་ཚུར་ཕེབས་ནས་གསང་སྔགས་ཀྱི་ཆོས་དཔེ་མང་པོ་བོད་སྐད་དུ་བསྒྱུར། རྒྱ་གར་དུ་བྱོན་ཚུལ་གྱི་ཉམས་མགུར་མང་དུ་གསུངས། སྐལ་ལྡན་གྱི་སློབ་མ་མང་པོ་བསྐྱངས།