སྒ་ལོ་དགོན

མཚན་རྒྱས་པར་བསམ་གཏན་སྒ་ལོ་མཁའ་སྤྱོད་ཐར་པ་གླིང་ཞེས་ཞུ། སྒ་ལོ་ཞེས་པ་ནི། སྒ་ལོ་ཙ་བ་མཐུ་སྟོབས་དབང་ཕྱུག་གིས་ཕྱག་བཏབ་གནང་བས་དགོན་མིང་ལ་དེ་ལྟར་ཐོགས། ཡངས་པ་ཅན་ནས་འདམ་གཞུང་ཕྱོགས་སུ་སྤྱི་ལེ་སུམ་ཅུ་ཙམ་སྣུམ་ནག་འཁོར་ལམ་བརྒྱུད་དེ་ནས་ལམ་ཀྱོག་སྟེ་བྱང་ངོས་སུ་སྤྱི་ལེ་བཞི་ལྔ་ཙམ་སོང་ན་ལུག་རྫི་ཆུ་དཀར་བེམ་མོ་ཞེས་པའི་རི་འདེབས་སུ་དགོན་དེ་མཇལ་རྒྱུ་ཡོད། ཐོག་མར་ཕོ་དགོན་ཞིག་ད་ལྟའི་དགོན་དེའི་རྒྱབ་རིའི་ལྡེབས་སུ་ཡོད་པ་ལ། དེ་རྗེས་ཀརྨ་པ་དུས་གསུམ་མཁྱེན་པ་ད་ལྟའི་དགོན་དེ་ཆགས་ཡུལ་དུ་ཕེབས་པས་ཕོ་རོག་གཅིག་གིས་གྲོག་སྐད་དང་བཅས་གཡུ་ཞིག་བསྐྱུགས་པས་ཀརྨ་པས་ད་ངའི་དགོན་པ་གནས་འདིར་འདེབས་དགོས་ཀྱི་འདུག་ཐུགས་ལ་དགོངས་ནས་ཕོ་དགོན་ཞིག་ཕྱག་འདེབས་གནང་མཛད་ཀྱང་རིམ་བཞིན་ཉམས་ཆག་བྱུང་སྟེ་དགོན་པ་ཐོར། དེ་རྗེས་སྟོད་ནས་ཕེབས་པའི་མཁའ་འགྲོ་མ་ཞིག་གནས་དེར་བཞུགས་པ་ནས་བཟུང་བཙུན་མ་གྲངས་བརྒྱད་ཅུ་སྐོར་འདུས་ནས་ཀརྨ་བཀའ་བརྒྱུད་ཕྱག་ལེན་གནང་བའི་མཚུར་ཕུའི་དགོན་ལག་བཙུན་དགོན་ཞིག་ཏུ་འགྱུར། ད་ལྟ་གསར་བཞེངས་འདུ་ཁང་ནང་སྔོན་གྱི་ཀརྨ་པ་རོལ་པའི་རྡོ་རྗེའི་སྐུ་བརྙན་བྲིས་མ་དང་གསར་བཞེངས་སྟོན་པའི་སྐུ་བརྙན་དང་། གུ་རུ། མར་མེ་དྭགས་གསུམ་བཅས་ཀྱི་འཇིམ་སྐུ་མཇལ་རྒྱུ་ཡོད།