ས་བོན་
ས་བོན་ཞེས་པ་ནི་བོད་ཀྱི་ནང་པའི་གཞུང་ལུགས་ཁག་ཏུ་རྒྱ་ཆེར་བེད་སྤྱོད་བྱེད་པའི་ཐ་སྙད་གལ་ཆེན་ཞིག་ཡིན། འདི་ནི་དངོས་པོ་གང་ཞིག་སྐྱེ་བའི་རྒྱུ་དང་། རྩ་བ། གཞི་རྩ། ནུས་པ་བཅས་ཀྱི་དོན་ལ་འཇུག་པ་མ་ཟད། ཆོས་ཀྱི་སྐད་དུ་ལས་ཀྱི་བག་ཆགས་དང་། ཉོན་མོངས་ཀྱི་ནུས་པ། ཤེས་སྒྲིབ་ཀྱི་བག་ཆགས། སངས་རྒྱས་ཀྱི་རིགས་བཅས་ལའང་འཇུག་པར་མཛད་དོ། །
མཚན་ཉིད།
[རྩོམ་སྒྲིག]རང་གི་འབྲས་བུ་སྐྱེད་པའི་ནུས་པ་དང་ལྡན་པའི་རྒྱུའོ། །
སྒྲ་བཤད།
[རྩོམ་སྒྲིག]ས་ལ་གདབ་པའི་བོན་ཏེ། རང་གི་འབྲས་བུའི་རྩ་བའི་རྒྱུ་ཡིན་པའི་ཕྱིར་དེ་ལྟར་བརྗོད་དོ། །
དབྱེ་བ།
[རྩོམ་སྒྲིག]འཇིག་རྟེན་པའི་དབྱེ་བ། "དཔེར་ན་ནས་ཀྱི་ས་བོན་ནི། །གྲང་དྲོ་ཀུན་ཏུ་སྐྱེ་བ་ལྟར། །དེ་བཞིན་དབུ་མ་པ་ཡི་ཡང་། །སེམས་སྐྱེད་མཆོག་དམན་ཀུན་ལ་སྐྱེ། །དཔེར་ན་འབྲས་ཀྱི་ས་བོན་ནི། །དྲོ་བའི་ཡུལ་དུ་སྐྱེ་བ་ལྟར།"[༡] ཞེས་གསུངས་པ་ལྟར། ནས་དང་འབྲས་སོགས་ལོ་ཏོག་གི་ས་བོན་སྣ་ཚོགས་དང་། ཤིང་ཏོག་གི་ས་བོན། མེ་ཏོག་གི་ས་བོན་སོགས་སོ། །ཆོས་ཀྱི་དབྱེ་བ། དགེ་བའི་ས་བོན། "ཐེག་ཆེན་ལ་མོས་པ་སེམས་བསྐྱེད་ཀྱི་རྒྱུར་ཡང་གསུངས་ཏེ། མདོ་སྡེའི་རྒྱུན་ལས། རིགས་དང་ཆོས་ལ་མོས་པ་དང༌། །དེ་བཞིན་སེམས་ནི་བསྐྱེད་པ་དང༌། །ཞེས་དང༌། ཆོས་ལ་མོས་པ་ས་བོན་དང༌།"[༢] ཞེས་གསུངས་པ་ལྟར་རོ། །སྡིག་པའི་ས་བོན། "བདག་ལྟའི་ས་བོན་དྲུང་ནས་ཕྱུང་བའི་ཕྱིར་བུད་ཤིང་བསྲེག་པས་སླར་མི་སྐྱེ་བ་བཞིན་དུ་འཁོར་བར་མི་ལྡོག་པ་སྟེ།"[༣] ཞེས་གསུངས་པ་ལྟར་རོ། །ཉོན་མོངས་ཀྱི་ས་བོན། "ཉོན་ མོངས་པ་རྩ་བ་ཕྱིན་ཅི་ལོག་ལས་བྱུང་བས་སྟོང་ཉིད་རྟོགས་པའི་ཤེས་རབ་ཀྱི་མིག་གིས་ཉོན་མོངས་པའི་ས་བོན་སྤང་བ་ལ་འབད་དེ་སྤངས་ནས་བདག་གི་ཡིད་ལས་བསད་ནས་གང་དུ་འགྲོ་བར་འགྱུར་རྟེན་གང་དུ་གནས་ནས་ནུས་པ་རྙེད་པ་དང་བདག་ལ་གནོད་པ་བྱ་བའི་ཕྱིར་འོང་སྟེ། མི་སྲིད་པའི་ཕྱིར་རོ། །"[༤]ཞེས་གསུངས་པ་ལྟར་རོ། །ཤེས་སྒྲིབ་ཀྱི་ས་བོན། "སྟོང་ཉིད་རྟོགས་པའི་ཤེས་རབ་ཀྱིས་ཆོས་སྐུའི་ཉེར་ལེན་བྱེད་ཅིང་སྦྱིན་སོགས་ཐབས་རྣམས་ཀྱིས་དེའི་ལྷན་ཅིག་བྱེད་རྐྱེན་བྱེད་པས་ཤེས་རབ་ཀྱིས་འབྲས་བུ་དེ་ཐོབ་པ་ལ་སྦྱིན་སོགས་རྣམས་ཀྱིས་ཕན་དགོས་པས་དེ་དག་ཤེས་རབ་ཀྱི་དོན་དུ་གསུངས་སོ་ཞེ་ན། དེ་ལྟ་ན་ཤེས་རབ་དེ་དག་གི་དོན་དུ་གསུངས་ཞེས་གོ་ལྡོག་ན་ཡང་མཚུངས་སོ། །དེས་ན་སྟོང་ཉིད་རྟོགས་པའི་ཤེས་རབ་མེད་ན་སྒྲིབ་གཉིས་གང་གི་ཡང་ས་བོན་ཟད་པར་བྱེད་མི་ནུས་"[༥]ཞེས་གསུངས་པ་ལྟར་རོ། །སངས་རྒྱས་ཀྱི་རིགས། "ཡང་བྱང་ཆུབ་ཀྱི་སེམས་ཀྱི་ས་བོན་དང་། ཤེས་རབ་ཀྱི་མ་དང་། སྙིང་རྗེའི་མ་མས་ཟིན་པས་སངས་རྒྱས་ཀྱི་སྲས་སུ་སྐྱེས་པ་ཡང་ཁས་ལེན་གྱི་དོན་གཅིག་ཤོས་ཏེ། སངས་རྒྱས་སྲས་ཀྱི་མཆོག་ཏུ་ལེགས་པར་གང་སྐྱེས་པ། །སེམས་དང་ཤེས་རབ་དག་ནི་ཚོགས་ལྡན་སྙིང་རྗེ་འདིའི། །ས་བོན་མ་དང་མངལ་གནས་མ་མ་མཚུངས་པ་མེད།"[༦] ཞེས་གསུངས་པ་ལྟར་རོ། །རྒྱུ་འབྲས་ཀྱི་དབྱེ་བ། "འདི་ལྟར་བྱི་བའི་དུག་སྐད་ཅིག་མ་གཅིག་ལ་ལུས་ལ་འཕོས་ནས་ཡང་དུས་གཞན་དུ་འབྲུག་གི་སྒྲའི་རྐྱེན་དང་ཕྲད་པ་ལས་རང་རིག་པས་གཞག་པའི་དྲན་པའི་བག་ཆགས་ཀྱི་ས་བོན་མེད་པར་ཡང་རྐྱེན་དང་ཕྲད་པ་ཉིད་ཀྱི་ཕྱིར་སྐད་ཅིག་མ་གཞན་དུ་རྣམ་པར་འགྱུར་བ་ཐོབ་སྟེ།"[༧] ཞེས་གསུངས་པ་ལྟར། བག་ཆགས་ཀྱི་ས་བོན་དང་། རྣམ་སྨིན་གྱི་ས་བོན་སོགས་སོ། །
རྩོད་སྤོང་།
[རྩོམ་སྒྲིག]"དངོས་པོ་ལ་དེ་ལྟར་གནས་ཀྱང་འཇིག་རྟེན་རྨོངས་པས་ས་བོན་ལ་རས་མ་མཐོང་བས་མི་གོན་ནོ་ཞེ་ན། མ་ཡིན་ཏེ། དེ་ཉིད་ཤེས་པར་འདོད་པའི་སེར་སྐྱ་སོགས་ཀྱིས་ཀྱང་རྣམ་གཞག་ས་བོན་མི་གོན་པར་རས་གོན་པ་དེ་ཉིད་ཡིན་པའི་ཕྱིར་དང་། ཁྱོད་ཉིད་ལུགས་ཀྱི་འབྲས་བུ་དེ་ཉིད་ཤེས་པ་དེ་རྒྱུ་འཇིག་རྟེན་པ་ལ་ཡང་ཡོད་པ་དེས་ས་བོན་ལ་རས་ཅི་སྟེ་མཐོང་བ་མ་ཡིན་ཏེ་མཐོང་བར་འགྱུར་རོ། །"[༨]ཞེས་གསུངས་པ་ལྟར། གྲངས་ཅན་གྱིས་རྒྱུ་ལ་འབྲས་བུ་ལྐོག་ཏུ་གནས་པར་འདོད་པ་དགག་པའོ། །
ལུང་ཁུངས།
[རྩོམ་སྒྲིག]- ↑ དཔའ་བོ་གཙུག་ལག་ཕྲེང་བ། སྤྱོད་འཇུག་གི་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། ཤིང་དཔར། ཤོག་ངོས་ ༥༢
- ↑ ཐུབ་བསྟན་ཆོས་གྲགས། སྤྱོད་འཇུག་གི་འགྲེལ་བཤད་རྒྱལ་སྲས་ཡོན་ཏན་བུམ་བཟང་། ཤིང་དཔར། ཤོག་ངོས་ ༤༢
- ↑ མཁན་པོ་ཀུན་དཔལ། སྤྱོད་འཇུག་གི་ཚིག་འགྲེལ་འཇམ་དབྱངས་བླ་མའི་ཞལ་ལུང་། ཤིང་དཔར། ཤོག་ངོས་ ༣༠
- ↑ རྒྱལ་ཚབ་དར་མ་རིན་ཆེན། སྤྱོད་འཇུག་གི་རྣམ་བཤད་རྒྱལ་སྲས་འཇུག་ངོགས། ཤིང་དཔར། ཤོག་ངོས་ ༧༧-༧༨
- ↑ རྒྱལ་ཚབ་དར་མ་རིན་ཆེན། སྤྱོད་འཇུག་གི་རྣམ་བཤད་རྒྱལ་སྲས་འཇུག་ངོགས། ཤིང་དཔར། ཤོག་ངོས་ ༢༤༣
- ↑ དཔའ་བོ་གཙུག་ལག་ཕྲེང་བ། སྤྱོད་འཇུག་གི་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། ཤིང་དཔར། ཤོག་ངོས་ ༡༤༣
- ↑ ཤེས་རབ་འབྱུང་གནས་བློ་གྲོས། སྤྱོད་འཇུག་གི་དཀའ་འགྲེལ། ཤིང་དཔར། ཤོག་ངོས་ ༣༣༣
- ↑ རྒྱལ་སྲས་ཐོགས་མེད་བཟང་པོ། སྤྱོད་འཇུག་གི་འགྲེལ་པ་ལེགས་བཤད་རྒྱ་མཚོ། ཤིང་དཔར། ཤོག་ངོས་ ༢༢༡