ས་པཎ་གྱིས་གསུང་པའི་ཕྱག་འཚལ་སྐབས་འདོན་རྒྱུའི་སྨོན་ཚིག་
བདག་གི་མཆོག་གསུམ་དམ་པར་ཕྱག་འཚལ་བས། ། བདག་དང་འགྲོ་ཀུན་སྡིག་སྒྲིབ་དག་པར་ཤོག ། ལག་གཉིས་མཉམ་པར་ཐལ་མོ་སྦྱར་བ་ཡིས།། ཐབས་དང་ཤེས་རབ་ཟུང་འཇུག་ཐོབ་པར་ཤོག ། ཐལ་མོ་སྤྱི་བོའི་གཙུག་ཏུ་སྦྱར་བ་ཡིས།། འོག་མིན་དགའ་ལྡན་གནས་སུ་བགྲོད་པར་ཤོག ། ཐལ་མོ་སྨིན་མཚམས་དཔྲལ་བར་སྦྱར་བ་ཡིས།། ལུས་ཀྱི་སྡིག་སྒྲིབ་ཐམས་ཅད་དག་པར་ཤོག ། ཐལ་མོ་མགྲིན་པའི་ཐད་དུ་སྦྱར་བ་ཡིས།། ངག་གི་སྡིག་སྒྲིབ་ཐམས་ཅད་དག་པར་ཤོག ། ཐལ་མོ་སྙིང་གའི་ཐད་དུ་སྦྱར་བ་ཡིས།། ཡིད་ཀྱི་སྡིག་སྒྲིབ་ཐམས་ཅད་དག་པར་ཤོག ། ཐལ་མོ་སྦྱར་བ་སོ་སོར་ཕྱེ་བ་ཡིས།། གཟུགས་སྐུ་གཉིས་ཀྱི་འགྲོ་དོན་བྱེད་པར་ཤོག ། རྐང་གཉིས་པུས་མོ་ས་ལ་བཙུགས་པ་ཡིས།། བཅུ་གཅིག་ཀུན་ཏུ་འོད་ཀྱི་ས་ཐོབ་ཤོག ། ཡན་ལག་བཞི་པོ་བརྐྱངས་བསྐུམས་བྱེད་པ་ཡིས།། འཕྲིན་ལས་རྣམ་བཞི་ལྷུན་གྱི་གྲུབ་པར་ཤོག ། རྩ་རྒྱུད་ཐམས་ཅད་བརྐྱངས་བསྐུམས་བྱས་པ་ཡིས།། རྩ་མདུད་ཐམས་ཅད་མ་ལུས་གྲོལ་བར་ཤོག ། སྒལ་ཚིགས་དབུ་མར་དགྱེ་དགུགས་བྱེད་པ་ཡིས།། རླུང་རྣམས་མ་ལུས་དབུ་མར་ཚུད་པར་ཤོག།། ས་ལ་ཐུག་ནས་ཡར་ལ་ལངས་བ་ཡིས།། འཁོར་བར་མི་གནས་ཐར་ལམ་ཐོབ་པར་ཤོག ། དེ་ནས་ལན་མང་དུ་མར་ཕྱག་འཚལ་བས།། ཞི་བར་མི་གནས་སེམས་ཅན་འདྲེན་པར་ཤོག ། བདག་སོགས་བརྐྱངས་ཕྱག་ཕུལ་བའི་དགེ་བའི་ མཐུས།། གནས་སྐབས་ཚེ་རིང་ནད་མེད་ཕུན་ཚོགས་ཤོག ། འཆི་ཚེ་བདེ་བ་ཅན་དུ་སྐྱེས་ནས་ཀྱང་།། རྫོགས་པའི་སངས་རྒྱས་གོ་འཕང་མྱུར་ཐོབ་ཤོག ། ཕ་མ་སེམས་ཅན་ཐམས་ཅད་བདེ་དང་ལྡན་གྱུར་ཅིང་།། ངན་འགྲོ་ཐམས་ཅད་རྟག་ཏུ་སྟོང་བ་དང་།། བྱང་ཆུབ་སེམས་དཔའ་གང་ན་སུ་བཞུགས་པ།། དེ་དག་ཀུན་གྱི་སྨོན་ལམ་འགྲུབ་གྱུར་ཅིག ། སརྦ་མངྒ་ལཾ།།།།