ཤེས་རབ་སྙིང་པོ།
བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ་འདི་ཉིད་ནི་ཐེག་པ་ཆེན་པོའི་མདོ་གཞུང་ནང་ནས་ཤིན་ཏུ་ཡོངས་སུ་གྲགས་ཤིང་། གནད་དོན་ཟབ་ལ་བརྗོད་བྱ་བསྡུས་པ། ནང་པ་སངས་རྒྱས་པའི་ཆོས་ལུགས་ཀྱི་ལྟ་གྲུབ་སྟོང་པ་ཉིད་གསལ་བར་སྟོན་པའི་གཞུང་གལ་ཆེན་ཞིག་ཡིན། མདོ་འདི་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་རྒྱས་པ་འབུམ་པ་དང་། འབྲིང་བ་ཉི་ཁྲི། བསྡུས་པ་བརྒྱད་སྟོང་པ་སོགས་ཀྱི་དགོངས་དོན་ཡོངས་ཀྱི་སྙིང་པོ་བསྡུས་ནས་བསྟན་པས་ན་མཚན་ལ་ཡང་སྙིང་པོ་ཞེས་གྲགས།
བརྗོད་བྱའི་སྙིང་པོ།
[རྩོམ་སྒྲིག]འདིའི་བརྗོད་བྱའི་གཙོ་བོ་ནི་སྟོང་པ་ཉིད་ཀྱི་ལྟ་བ་དེ་ཉིད་ཡིན། གཞུང་འདི་ཐོག་མར་བཅོམ་ལྡན་འདས་ཀྱིས་རྗེ་བཙུན་བྱམས་པ་མགོན་པོ་དང་འཕགས་པ་སྤྱན་རས་གཟིགས་དབང་ཕྱུག་སོགས་བྱང་ཆུབ་སེམས་དཔའི་འཁོར་ཚོགས་དང་བཅས་ཏེ་བྱ་རྒོད་ཕུང་པོའི་རི་ལ་བཞུགས་པའི་སྐབས། བཅོམ་ལྡན་འདས་ཏིང་ངེ་འཛིན་ལ་སྙོམས་པར་ཞུགས་པའི་ཚེ། སངས་རྒྱས་ཀྱི་མཐུས་ཚེ་དང་ལྡན་པ་ཤཱ་རིའི་བུས་འཕགས་པ་སྤྱན་རས་གཟིགས་དབང་ཕྱུག་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོའི་སྤྱོད་པ་ལ་ཇི་ལྟར་བསླབ་པར་བྱ་ཞེས་དྲི་བ་ཞུས་པའི་ལན་དུ།
འཕགས་པ་སྤྱན་རས་གཟིགས་དབང་ཕྱུག་གིས་ཕུང་པོ་ལྔ་ (གཟུགས། ཚོར་བ། འདུ་ཤེས། འདུ་བྱེད། རྣམ་པར་ཤེས་པ།) རང་བཞིན་གྱིས་སྟོང་པར་གཟིགས་ནས། གཟུགས་སྟོང་པའོ། སྟོང་པ་ཉིད་གཟུགས་སོ།། ཞེས་པ་ནས། དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་རྣམས་ཀྱང་སྟོང་པར་གསུངས། དེར་མ་ཟད་ཁམས་བཅོ་བརྒྱད་དང་། སྐྱེ་མཆེད་བཅུ་གཉིས། རྟེན་འབྲེལ་ཡན་ལག་བཅུ་གཉིས། འཕགས་པའི་བདེན་པ་བཞི་སོགས་ཆོས་ཐམས་ཅད་ཀྱི་རང་བཞིན་ནི་སྟོང་པ་ཉིད་ཡིན་པ་དང་། དེའི་ངང་ལ་སྐྱེ་འགག་དང་དྲི་མ་དང་བྲལ་བ། བྲི་གང་མེད་པའི་རང་བཞིན་དུ་གསལ་བར་བསྟན།
མཐར་སྔགས་བླ་ན་མེད་པ་ <<ཏདྱ་ཐཱ། ཨོཾ་ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བོ་དྷི་སྭཱ་ཧཱ།>> ཞེས་པ་གསུངས་ནས་ཤེར་ཕྱིན་ཟབ་མོའི་དོན་རྟོགས་པའི་ཐབས་གནང་བ་དང་། བཅོམ་ལྡན་འདས་ཀྱང་ཏིང་ངེ་འཛིན་ལས་བཞེངས་ཏེ་འཕགས་པའི་གསུང་ལ་ལེགས་སོ་ཞེས་བཀའ་གནང་ནས་མདོ་འདི་མཇུག་བསྡུས་ཡོད།
གཞུང་གི་ངོ་སྤྲོད་མདོར་བསྡུས།
[རྩོམ་སྒྲིག]༡ ། གཞུང་གི་མཚན།
[རྩོམ་སྒྲིག]- རྒྱ་གར་སྐད་དུ། Bhagavatīprajñāpāramitāhṛdaya (བྷ་ག་ཝ་ཏི་པྲ་ཛྙ་པ་ར་མི་ཏཱ་ཧྲི་ད་ཡ།)
- བོད་སྐད་དུ། བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ།
༢ ། གཞུང་གི་ཚད།
[རྩོམ་སྒྲིག]- གཞུང་འདི་ནི་མདོ་ཤིན་ཏུ་བསྡུས་པ་ཞིག་ཡིན་པས་ལེའུ་དང་སྐབས་སོགས་ཀྱི་དབྱེ་བ་མེད་པར་བམ་པོ་གཅིག་གི་བདག་ཉིད་ཅན་ཡིན།
༣ ། མཛད་པ་པོ།
[རྩོམ་སྒྲིག]- ནང་པ་སངས་རྒྱས་པའི་གཞུང་ལུགས་ཀྱི་འདོད་ཚུལ་ལྟར་ན། གཞུང་འདི་ནི་སྟོན་པ་བཅོམ་ལྡན་འདས་ཀྱི་བཀའ་དངོས་ཡིན། གང་ལགས་ཤེ་ན། སངས་རྒྱས་ཀྱི་མཐུ་དང་བྱིན་རླབས་ལ་བརྟེན་ནས་འཕགས་པ་སྤྱན་རས་གཟིགས་ཀྱིས་གསུངས་པ་དང་། མཐར་སངས་རྒྱས་ཉིད་ཀྱིས་ཀྱང་གསུང་དེ་ལ་རྗེས་སུ་ཡི་རང་མཛད་པས་ན་སངས་རྒྱས་ཀྱི་གསུང་དུ་བརྩི་བ་ཡིན།
༤ སྒྱུར་བ་པོ།
[རྩོམ་སྒྲིག]- རྒྱ་གར་གྱི་པཎྜི་ཏ་བི་མ་ལ་མི་ཏྲ་དང་། བོད་ཀྱི་ལོ་ཙཱ་བ་ཆེན་པོ་རིན་ཆེན་སྡེ་རྣམ་གཉིས་ཀྱིས་བོད་སྐད་དུ་བསྒྱུར་བར་གྲགས།
༥ ། དུས་རབས་གང་ལ་བརྩམས་པ་དང་བོད་སྐད་དུ་བསྒྱུར་བ།
[རྩོམ་སྒྲིག]- རྒྱ་གར་དུ་མདོ་འདི་ཉིད་དུས་རབས་དང་པོ་ནས་ལྔ་པའི་བར་བྱུང་བར་མཁས་པ་རྣམས་བཞེད།
- བོད་སྐད་དུ་བསྒྱུར་བའི་དུས་ནི། བསྟན་པ་སྔ་དར་གྱི་སྐབས་སམ། སྤྱི་ལོའི་དུས་རབས་བརྒྱད་པའི་དུས་སྨད་ནས་དུས་རབས་དགུ་པའི་ནང་བསྒྱུར་བར་ངོས་འཛིན་བྱེད།
༦ ། སྡེ་སྣོད་གང་གི་ཁོངས་སུ་གཏོགས་པ།
[རྩོམ་སྒྲིག]- སྡེ་སྣོད་གསུམ་གྱི་ནང་ནས་མངོན་པའི་སྡེ་སྣོད་ཀྱི་ཁོངས་སུ་གཏོགས།
- བཀའ་འགྱུར་ནང་དུ་ཤེར་ཕྱིན་སྐོར་གྱི་ནང་ཚན་དུ་བཞུགས།