ཤེས་རབ་ཀྱི་ཕ་རོལ་ཏུ་ཕྱིན་པ་

ཤེས་རབ་ཀྱི་ཕ་རོལ་ཏུ་ཕྱིན་པ་ནི་ནང་པ་སངས་རྒྱས་པའི་ཆོས་ཀྱི་སྙིང་པོ་ལྟ་བུ་ཞིག་ཡིན་ཏེ། "དུས་གསུམ་རྒྱལ་བ་ཐམས་ཅད་ཀྱི་གསུང་ཆོས་ཀྱི་མཛོད་མི་ཟད་པ་ཐམས་ཅད་ཀྱི་ནང་ན་སྙིང་པོ་ལྟ་བུ་དང་མཐར་ཐུག་པར་གྱུར་པ་ཡིན་པར་གསུངས།" ཞེས་པ་དང་། "ཡུམ་སྲས་བཅུ་བདུན་དུ་གྲགས་པ་སོགས་རྣམ་གྲངས་དུ་མར་བཞུགས་པ་ལས། ཡོན་ཏན་རིན་པོ་ཆེ་སྡུད་པ་འདིར་ནི་དེ་ཐམས་ཅད་ཀྱི་དོན་ཡོངས་སུ་རྫོགས་པར་འདུས་ཤིང་། ཚིགས་སུ་བཅད་པའི་སྡེབ་སྦྱོར་གསལ་བ་དང་། སངས་རྒྱས་ཉིད་ཀྱི་ཞལ་ནས་གསུངས་པའི་བཀའ་ཡིན་པ་སོགས་ཡོན་ཏན་གྱི་ཁྱད་པར་དུ་མས་འཕགས་པ་"ཞེས་གསུངས་པ་ལྟར་རོ། །

མཚན་ཉིད།

"ཤེས་རབ་བླ་ན་མེད་པའི་དོན་ཏེ། དེ་ནི་བདེན་པ་གཉིས་ཀྱི་རང་བཞིན་ལ་ཕྱིན་ཅི་མ་ལོག་པར་ཇི་ལྟ་བ་བཞིན་དུ་འཇུག་པའི་བློའོ། །"ཡང་ན་ "ཆོས་ཐམས་ཅད་ཀྱི་རྣམ་པར་བསྡུས་པ་ཡིན་པའི་ཕྱིར་རོ་ཞེས་བྱ་བའི་དོན་ཏོ། །"ཞེས་པའོ། །

སྒྲ་བཤད།

ཤེས་རབ་ནི་ཆོས་རྣམས་ཀྱི་རང་བཞིན་ཡང་དག་པར་ཤེས་པའི་བློ། ཀྱི་ནི་འབྲེལ་བའི་སྒྲ། ཕ་རོལ་ནི་ཚུ་རོལ་མ་ཡིན་པའི་གཞན་ཕྱོགས། ཏུ་ནི་ལ་དོན་གྱི་ཕྲད། ཕྱིན་པ་ནི་སོང་པ་འམ་སླེབས་པ། "ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་པ་ཚིག་སྡུད་དུ་མཛད་པ་ནི་ཤེར་ཕྱིན་ཞེས་པ་ཡིན་ལ།" དེ་བཞིན་དུ་ "དོན་དམ་ཅི་ཡང་མ་གྲུབ་པར་རྟོགས་པས་འཇིག་རྟེན་དག་ན་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བའི་གྲངས་སུ་འགྲོའོ། །" "ཤེས་རབ་ཕ་རོལ་ཕྱིན་གཉིས་མེད། །ཡེ་ཤེས་དེ་ནི་དེ་བཞིན་གཤེགས།" ཞེས་གསུངས་སོ། །

དབྱེ་བ།

རྗོད་བྱེད་དང་བརྗོད་བྱའི་དབྱེ་བ། "སྒྲས་བརྗོད་ཚུལ་གྱི་དབང་དུ་བྱས་ནས་ཡུམ་གྱི་མདོ་ལས་རྗོད་བྱེད་ཚིག་དང་བརྗོད་བྱ་དོན་གྱི་ཤེར་ཕྱིན་གཉིས་ཀ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་པའི་ཐ་སྙད་མཛད་ཅིང་། རྗོད་བྱེད་ཚིག་གི་ཤེར་ཕྱིན་ནི་ཡུམ་གྱི་མདོ་རྣམས་ཡིན་ལ།" ཤེས་རབ་གསུམ་གྱི་དབྱེ་བ། "ཤེས་རབ་ཀྱི་ཕ་རོལ་ཏུ་ཕྱིན་པ་ནི་འདིར་བསྒོམ་པའི་ལམ་གྱི་རང་བཞིན་གང་ལ་སྟེ། དེའི་བདག་ཉིད་ལ་སྦྱོར་ཞིང་གནས་པས་འགྲོ་བ་སྐྱོབ་པ་ནི་མགོན་པོ་སྟེ། འཇམ་དཔལ་ལ་སོགས་པའི་བྱང་ཆུབ་སེམས་དཔའོ། །འདི་ལ་གང་ ཞིག་རྟག་ཏུ་ནི་ཐམས་ཅད་དུའོ། །གཞུང་དང་དོན་འཛིན་པ་དང་། ཐོས་པ་དང་། བསམས་པ་དང་བསྒོམས་པའི་རང་བཞིན་གྱི་ཤེས་རབ་ནི་ཆུབ་པར་བྱེད་པའོ། །ཆོས་ཉིད་འཇིག་པར་བྱེད་པས་དངོས་པོར་མངོན་པར་ཞེན་པར་བྱེད་པ་ནི་དུག་གོ །" ཡུམ་དུ་གྱུར་པའི་རྒྱུ་མཚན། "གང་སངས་རྒྱས་དང་བྱང་ཆུབ་སེམས་དཔའ་རྣམས་ནི་དགེ་བའི་བཤེས་གཉེན་ཡིན་པར་ཡོངས་སུ་གྲགས་མོད་ཀྱི། ཤེས་རབ་ཀྱི་ཕ་རོལ་ཏུ་ཕྱིན་པ་དགེ་བའི་བཤེས་གཉེན་དུ་གྱུར་པའི་ཚུལ་ཇི་ལྟར་ཡིན་སྙམ་ན། རྒྱལ་བ་རྫོགས་པའི་སངས་རྒྱས་གང་ཞིག་སྔར་འདས་པའི་དུས་སུ་བྱོན་ཟིན་པ་དང་། ད་ལྟ་མ་བྱོན་པ་མ་འོངས་པའི་སངས་རྒྱས་དང་། ད་ལྟ་སངས་རྒྱས་ནས་ཕྱོགས་བཅུར་གང་བཞུགས་པ་སྟེ་དུས་གསུམ་གྱི་རྒྱལ་བ་དེ་དག་ཀུན་གྱི་ལམ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ཡིན་གྱི་འདི་ལས་གཞན་ནི་མ་ཡིན་ཏེ།" ཞེས་གསུངས་པ་དང་། "གང་དག་འདས་དང་ཞེས་པ་ནས། འདི་ལ་འབྱུང་ཞེས་པའི་བར་ལ། ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་ཇི་ལྟར་ཞེས་ན་སངས་རྒྱས་གང་དག་སྔར་འདས་པ་དང་ད་ལྟར་ཕྱོགས་བཅུན་བཞུགས་པའི་འཇིག་རྟེན་གྱི་མགོན་པོ་གང་དག་དང་། གང་དག་མ་འོངས་པའི་དུས་ན་འབྱུར་བར་འགྱུར་བའི་སངས་རྒྱས་དེ་དག་ཐམས་ཅད་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉམས་སུ་བླངས་པ་ལས་འབྱུང་བའི་ཕྱིར་རོ། །"ཞེས་གསུངས་སོ། །

ནང་དོན།

"ཟབ་མོ་སྟོང་པ་ཉིད་ལ་སོགས། །སྒྲོ་འདོགས་པ་དང་སྐུར་འདེབས་མཐའ། །བྲལ་བ་དེ་ནི་ཟབ་མོ་ཉིད་ཅེས་བསྟན་ཏེ། སྒྲོ་འདོགས་པ་ཡོད་པར་སྣོན་པ་དང་སྐུར་པ་འདེབས་པ་མེད་པར་བཟོ་བ་གཉིས་ཀྱི་མཐའ་དང་བྲལ་བ་ཡང་ཡོད་པ་དང་མེད་པ་གཉིས་ཀ་ལས་འདས་པ་ཡིན་ནོ། །"ཞེས་དང་། "གང་བློ་ཡོད་དང་མེད་པ་ལས། །རྣམ་པར་འདས་ཤིང་མི་གནས་པ། །དེ་དག་ཟབ་མོ་དམིགས་མེད་པའི། །རྐྱེན་གྱིས་དོན་ལ་རྣམ་པར་བསྒོམ་"ཞེས་གསུངས་སོ། །