ལྷ་ས་ནང་སྒང་
འདི་ནི་མེ་སྤྲེལ་（༡༩༥༦）ལོར་བོད་རང་སྐྱོང་ལྗོངས་གྲ་སྒྲིག་ཨུ་ཡོན་ལྷན་ཁང་དབུ་བརྙེས་ནས་ལས་ཁུངས་སོ་སོའི་རུམ་པ་ཁག་གི་ལས་བྱེད་མི་སྣ་གཞུང་བླ་ཁམས་གསུམ་དང་། བོད་ལས་དོན་ཨུ་ཡོན་ལྷན་ཁང་བཅས་ཕྱོགས་བཞི་ནས་མི་གྲངས་ཆ་གསེས་ཀྱིས་བསྐོ་གཏོང་གནང་བ་བཞིན་བླ་བྲང་ཁོངས་ནས་བོད་རང་སྐྱོང་ལྗོངས་གྲ་སྒྲིག་ཨུ་ཡོན་ལྷན་ཁང་གི་ལས་དོན་ནང་བཞུགས་མི་ཛ་སག་ལྷ་སྨོན་ཡེ་ཤེས་ཚུལ་ཁྲིམས་ཀྱིས་གཙོས་པའི་ཞབའ་འབྲིང་སེར་སྐྱ་ལྔ་བཅུ་སྐོར་ལྷ་སར་རྒྱུན་བཞུགས་གནང་དགོས་པརབརྟེན་བྱེས་བཞུགས་ནང་སྒང་ཡིག་ཚང་དང་བཅས་པ་གསར་དུ་བཙུགས་ཤིང། ལྷ་ས་ནང་སྒང་གི་གཙོ་འགན་ཛ་སག་ལྷ་སྨོན་གྱིས་གནང་ཐོག གལ་ཆེའི་ཚོགས་གྲོས་གནང་རྒྱུ་སོགས་མཉམ་སྡེབ་འགོ་ཁྲིད་གྲས་ཀའི་ཁོངས་སུ་ཏཱ་བླ་མ་གཅིག་དང། ཐའི་ཇི་གཅིག་རིམ་བཞི་གསུམ། བླ་སྤྲུལ་གཅིག་བཅས་ཡོད། ལྷ་ས་ནང་སྒང་གི་གཙོ་བོའི་ལས་འགན་ནི། བོད་རང་སྐྱོང་ལྗོངས་གྲ་སྒྲིག་ཨུ་ཡོན་ལྷན་ཁང་གི་ལས་དོན་ནང་ཞུགས་མཁན་བླ་ཁོངས་མི་སྣ་རྣམས་ལ་ཏང་གི་འགོ་ཁྲིད་འོག་འགན་བབ་ལས་དོན་ཁག་ལེགས་འགྲུབ་ཡོང་བ་དང། རྒྱ་བོད་གཞུང་བླ་ཁམས་གསུམ་དང་བཅས་པའི་མཐུན་སྒྲིལ་ཡག་པོ་ཡོང་བ་བྱས་ཏེ་བླ་བྲང་གི་མཚན་ལ་ཤས་གཞི་མི་འབྱུང་བའི་བསྐུལ་འདེད་སློབ་གཅུན་བྱ་རྒྱུ་དང། བོད་ལས་དོན་ཨུ་ཡོན་ལྷན་ཁང་ལ་འབྲེལ་གཏུགས་ཞུས་ཏེ་གཞིས་བྱེས་ཀྱི་ལས་དོན་གནས་ཚུལ་གང་ཅིའི་སྐོར་དགོངས་བསྐོར་དང་། རེ་འདུན་བསམ་འཆར་བརྗེ་རེས་སོགས་ཞུ་རྒྱུ། བཀའ་ཤག་ལ་གཞུང་བླའི་དབར་གྱི་གནད་དོན་གང་ཅིའི་གྲོས་མོལ་དང་མཐུན་ལམ་འབྲེལ་བ་ཞུ་རྒྱུ། རྩེ་སྤྱི་འདོམས་ལས་ཁུངས་ལ་ཡིག་ཐོག་ནས་ལས་དོན་སྙན་སེང་ཞུ་རྒྱུ། གཞིས་ཡོད་ནང་ཨུ་ཡོན་ལྷན་ཁང་དང་རྒྱུན་དུ་གནས་ཚུལ་དང་བསམ་འཆར་སྤེལ་རེས་བྱ་རྒྱུ་སོགས་རེད། ལྷ་ས་ནང་སྒང་ཡིག་ཚང་ལ་གཙོ་འགན་འཁུར་མི་རིམ་པ་ལྔ་པའི་མགྲོན་གཉེར་གཅིག་དང།དྲུང་ཡིག་གཅིག ཡིག་འབྲི་ལས་བྱ་ཞབས་སྡོད་པ་གསུམ། གཉེར་པ་གཅིག མ་ཆེན་དང། ཡིག་སྐྱེལ་སོགས་མི་བདུན་བཅས་ཡོད་པ་དང། དེས་ནང་སྒང་འགོ་ཁྲིད་ཀྱི་བཀའ་བཀོད་འོག་ལྷ་ས་ནང་སྒང་གི་བཀའ་ཡིག་དང། གཤམ་གྱི་སྙན་ཞུ་ལན་འབུལ་དང། བཀའ་བསྒྱུར་རྒྱུ་བཅས་ཀྱི་ལས་འགན་འཁུར་སྒྲུབ་ཞུ་དགོས་པ་རེད།
༼དུང་དཀར་ཚིག་མཛོད་ཆེན་མོ་༽ལས་བཏུས།