ལྷ་ས་གཉེར་ཚང་ལས་་ཁུངས་
དེ་སྔ་བོད་ས་གནས་སྲིད་གཞུང་གི་གཤམ་འོག་ལས་ཁུངས་ཤིག་སྟེ། ལས་ཁུངས་འདི་ཚུགས་ཡུལ་ཤིང་རའི་ལྷོ་རྒྱུད་ཉིས་ཐོག་སྟེང་དུ་ཡོད་། ལས་ཁུངས་འདིའི་དོ་དམ་མི་སྣ་དང་ལས་བྱེད་རྩེ་དྲུང་གཅིག་དང་། ཤོད་དྲུང་གཉིས（འདི་ཐོག་མར་རིམ་པ་ལྔ་པའི་ལས་ཚན་པེ་བསྐོ་སྲོལ་ཡང་རྗེས་སུ་རིམ་པ་བཞི་པར་གནས་སྤོར་བྱས）དྲུང་ཡིག་དྲུག་ཏོག་ཡོད་པ་གཅིག གཉེར་ཚང་ནང་ཟན་ཉི་ཤུ་སྐོར་བཅས་ཡོད་པ་དེ་དག་གིས་གཙོ་བོ་ནི་གཙུག་ལག་ཁང་སྟེང་ཤོད་བར་གསུམ་ལ་མེ་སྐུན་སྲུང་འདོམས་བྱེད་དགོས་པ་དང། རྒྱུན་གཏན་ཁྱམས་ར་དང། སེ་ར་ལྟག་སྒོ་སོགས་ཀྱི་གད་ཁུངས་ཁག་ལ་འགོ་འདོམས་གཉེར་ཚང་ནང་ཟན་རེ་འཇོག་དགོས་པ་མ་ཟད། དགོངས་དྲོ་རྟག་པར་མཚན་མོའི་ཆུ་ཚོད་བཅུ་པ་ཙམ་ལ་ལྷ་གཉེར་ངོ་མ་གཅིག་དང་ནང་ཚན་ཁ་ཤས་བཅས་ནས་གཙུག་ལག་ཁང་གི་སྒོ་ར་བ་དང། ཁང་གཉེར། གད་པ། ལྷ་ཁང་ཁག་གི་དཀོན་གཉེར་བཅས་སོ་སོར་བསྡད་ཡོད་མེད་དང་མེ་རྐུན་གཉིས་ལ་གཟབ་གྲུང་དགོས་པའི་བསྐོར་གཡེང་ཡང་བྱེད་དགོས་པ། ལྷོ་བྲག་སེང་གེ་རྫོང་དང། དོ་རྫོང། ལྷ་ཁང་གཞིས། ཀོང་པོ་ཇོ་རྩེ་ཞོ་གསུམ（ཇོ་མོ་རྫོང། རྩེ་ལ་རྫོང། ཞོ་ཁ་གཞིས་སྡོད）བཅས་ནས་འབབ་དེབ་ནང་གསལ་གྱི་སྤང་ལེབ་སྤྱན་སྤང་དང། དཀྱུས་སྤང། མལ་གྲོ་རྫོང་ཁོངས་ནས་རྫ་ཆས་མེ་ཏོག་ཁོག་མ་གཡུ་རྩི་སེར་པོ་དང་ལྗང་ཁུ་ཆེ་ཆུང་སྣ་ཚོགས། འཇགས་མ་དང། བུལ་ཏོག སུག་པ་ཡན་ཙག་ཙིག་དགོས་མཁོའི་ཁྲལ་འབབ་བསྡུ་ལེན་གྱིས་ལས་ཁུངས་ཁག་གི་འགྲོ་གྲོན་མཁོ་འདོན་བྱེད་རྒྱུ། ལྷ་སའི་ས་བདག་གཉེར་ཚང་ལས་ཁུངས་ཡིན་གཤིས། གྲོང་ཁྱེར་ལྷ་སའི་ལམ་ཁག་ལ་ས་འོག་བཙོག་ཆུ་ཤར་གཏོང་ཐུབ་པའི་ཆུ་ཡུར་ཉམས་གསོ་དང། གསང་སྤྱོད་གསར་རྒྱག གཞན་ཡང་སྒེར་ཁང་རྒྱ་བསྐྱེད་ཀྱི་རྐྱེན་པས་ཁྲོམ་ལམ་དང་སྲང་ལམ་ཁག་ལ་གནོད་རྐྱེན་མི་ཡོང་བའི་བཀག་འགོག་ཚོད་འཛིན་བྱེད་དགོས་པ། ལྷ་གཉེར་རེས་འཁོར་གྱིས་ལོ་ལྟར་སྨོན་ལམ་སྤྱི་ཁྱབ་པའི་ལས་འགན་འཁུར་ཏེ་སྨོན་ལམ་གྱི་གཏོང་སྒོའི་དོ་དམ་བྱེད་པ་དང་། གཉེར་ཚང་དྲུང་ཡིག་གིས་སྨོན་ལམ་སྱི་ཁྱབ་ཀྱི་དྲུང་ཡིག་གི་ལས་འགན་འཁུར་བ། གཞན་ཡང་མཚམས་ཁུང་དགོན་གྱི་བཙུན་མ་དང་། ལྷ་སྡོད་ཧུའི་རིགས་ཀྱི་འགོ་འདོམས་བྱེད་དགོས་པ་བཅས་རེད།
༼དུང་དཀར་ཚིག་མཛོད་ཆེན་མོ་༽ལས་བཏུས།