ལོ་ཙཱ་བ་རྨ་བན་ཆོས་འབར་

འདི་ཉིད་རབ་བྱུང་དང་པོའི་ཤིང་སྤྲེལ་(༡༠༤༤)ལོར་ལ་སྟོད་ལྷོར་སྐུ་འཁྲུངས། འདི་ཉིད་ཀྱིས་ལྷོ་བལ་དུ་མཁས་པ་མང་པོ་ལ་གཏུགས། འདི་རྒྱ་གར་ཕྱག་ནའི་ཡང་སློབ་ཡིན། རྒྱ་གར་དུ་ཁ་ཆེ་དགོན་པ་བ་དང་། ཨ་བྷཱ་ཡཱ་ཀཱ་ར་གུབྷ་ལ་སོགས་པར་གསན་པ་མང་དུ་མཛད་ཅིང་བཞུགས་པ་ན་བླ་མ་དེ་རྣམས་ཀྱིས་ཁྱོད་བོད་དུ་སོང་ལ། འཕགས་པ་སྒྲོལ་མའི་སྤྱུལ་པ་འདི་ལྟ་བུ་ཞིག་ཡོད་པ་ཕྱག་རྒྱར་བསྟེན་ནས་གསང་བ་དང་ཤེས་རབ་ཡེ་ཤེས་ཀྱི་དབང་གི་ཉམས་ལེན་གྱིས་ཤིག་གསུངས། དེ་ལྟར་བོད་དུ་བྱོན་ནས་མ་གཅིག་ཕྱག་རྒྱར་མཛད་པ་ཡིན་ནོ།། དེ་ནས་རྨ་ལོ་ཙཱ་བ་ཁྱུང་པོའི་ཐད་དུ་རབ་ཏུ་བྱུང་། དགུང་ལོ་ཞེ་དྲུག་ལ་ཕེབས་སྐབས་འཁོན་ཕུ་བ་ཉེ་གནས་སུ་ཁྲིད་དེ་ཤབ་ཏུ་བྱོན་པའི་ཚེ་གཞན་གྱིས་དུག་དྲངས་ནས་གྲོངས་སོ།། འདི་ཉིད་ཀྱི་བགྱུར་ལ། བསྟན་འགྱུར་ལས། 《དགྱེས་པ་རྡོ་རྗེའི་སྒྲུབ་ཐབས》《དཔལ་ཧེ་རུ་ཀའི་སྒྲུབ་ཐབས》《དཔལ་འཁོར་ལོ་སྡོམ་པའི་མན་ངག་ཅེས་བྱ་བ》《དཔལ་རྡོ་རྗེ་རྣལ་འབྱོར་མའི་སྒྲུབ་ཐབས་ཞལ་གཉིས་མ་ཆུང་བ》《དབུ་བཅད་མའི་སྒྲུབ་ཐབས་ཆེ་བ་ཞེས་བྱ་བ》《སྒྲོལ་མ་ལྷ་ལྔའི་སྒྲུབ་ཐབས་རིན་པོ་ཆེ་གསལ་བ》ཞེས་བྱ་བ་སོགས་མང་ངོ་། །
༼དུང་དཀར་ཚིག་མཛོད་ཆེན་མོ་༽ལས་བཏུས།