མཁས་པའི་དབང་པོ་དམུ་དགེ་བསམ་གཏན་མཆོག་གི་བརྡ་སྤྲོད་བློ་གསལ་འཇུག་ངོགས་སུ།རྒྱ་གར་ལ་དབྱངས་བཅུ་དྲུག་དང་། གསལ་བྱེད་སོ་བཞི་ཡོད་ལ། དེ་དག་བོད་ཀྱི་ཡི་གེའི་གཟུགས་སུ་འབྲི་བའི་ཐབས་ཚུལ་སྔོན་གྱི་ལོ་ཙཱ་བ་དག་གིས་མཛད་པ་འདི་ལྟར། ཞེས་གསུངས་པ་ལས། སྔོན་གྱི་ལོ་ཙཱ་བ་སུ་དང་གང་ཡིན་གྱི་མཚན་དངོས་སུ་མ་གསུངས་པ་དང་། བློ་གསལ་འཇུག་ངོགས་ཀྱི་དཔེ་ཁྲིད་ཟིན་བྲིས་དང་འགྲེལ་བ་དག་ནའང་གསལ་བོ་བསྟན་མེད་དོ། །
ཐོན་མིས་བོད་ཀྱི་ཡི་གེའི་བཟོ་རྩོམ་དུས། ལེགས་པར་སྦྱར་བའི་སྐད་ཀྱི་དབྱངས་ཡིག་བཅུ་དྲུག་གི་ནང་ནས། བོད་སྐད་ལ་མི་མཁོ་བའི་དབྱངས་ཡིག་བཅུ་གཅིག་དོར། དབྱངས་ཡིག་ཨ་གསལ་བྱེད་ཀྱི་ཁོངས་སུ་སྦྱར། ལྷག་མ་ཨི་ཨུ་ཨེ་ཨོ་སྟེ་དབྱངས་བཞི་རུ་ངེས་པ་མཛད་དོ། །ལེགས་པར་སྦྱར་བའི་སྐད་ཀྱི་གསལ་བྱེད་ཡི་གེ་སོ་བཞིའི་ནང་ནས། འཐུག་པོ་ལྔ་དང་། ལོག་པ་བཞི། དྲོ་བ་གཅིག མཐར་ཟད་ཀྱི་ཡི་གེ་གཅིག་བཅས་གསལ་བྱེད་ཡི་གེ་བཅུ་གཅིག་བོད་སྐད་ལ་མི་མཁོ་བས་དོར། ལྷག་མ་གསལ་བྱེད་ཡི་གེ་ཉེར་གསུམ་དང་དབྱངས་ནས་བླངས་པའི་ཨ་ཡིག་བཅས་སོར་བཞག་བྱས་ཐོག་ཅེས་གསུངས་པ་ལྟར། ལེགས་སྦྱར་ལས་དབྱངས་གསལ་ཉེར་བཞི་དང་དབྱངས་བཞི་བོད་ཡིག་ཏུ་མ་བླངས་གོང་ཡིག་གཟུགས་ལཉྫ་ཡིན་པ་དང་། བོད་ཡིག་ཏུ་ལེན་དུས་ཡི་གེའི་གཟུགས་རང་སོར་མ་བཞག་པར་བོད་ཡིག་གི་གཟུགས་སུ་ཕབ་ངེས་པས་ན། བོད་ཡིག་གི་བཟོ་གསར་དུ་བརྩམས་པ་དང་ལེགས་སྦྱར་བོད་ཡིག་ལ་ཕབ་ཚུལ་གྱི་ལས་གཉིས་ལྷན་དུ་གྲུབ་པ་ལྟ་བུ་ཞིག་བྱུང་བ་དང་། ཐོན་མི་མཆོག་གིས་བོད་ཡིག་གི་ཕུད་ལ་མ་ཎི་ཡིག་དྲུག་སྦལ་ནག་ན་ལ་བགྲད་འདྲ་རྒྱལ་པོར་ཕུལ་བ་ཡང་བོད་ཡིག་གི་གཟུགས་ཡིན་པ་ལས་ལཉྫ་མ་ཡིན་པ་སོགས་ལ་བསམ་ན། སྔོན་གྱི་ལོ་ཙཱ་བ་ཞེས་གསུངས་པ་དེ་བོད་ཀྱི་ལོ་ཙཱ་བའི་ཐོག་མ་ཐོན་མི་མཆོག་ལས་མ་འདས་སོ་སྙམ་མོ། །
