ལམ་ཞིབ་ལས་ཁུངས་

དེ་སྡ་བོད་ས་གནས་སྲིད་གཞུང་འོག་གི་ལས་ཁུངས་ཤིག་སྟེ། ཚོགས་ཡུལ་གཙུག་ལག་ཁང་གི་སྟེང་བྱང་ཤར་ཏུ་ཡིན། རབ་བྱུང་བཅུ་དྲུག་པའི་ལྕགས་ལུག（༡༩༣༡）ལོར་གསར་འཛུགས་བྱས། དོ་དམ་དྲུང་རྩིས་གཉིས། ལས་བྱ་སེར་སྐྱ་གཉིས་བསྐོ་སྲོལ། ལས་ཁུངས་འདིས་ལམ་ཡིག་ཁག་ལ་ཞིབ་འཇུག་གིས་དེ་སྔ་ལས་ཁུངས་ཁག་སོགས་ལ་གཏན་འཇགས་ལམ་ཡིག་སྤྲད་པ་ཕྱིར་བསྡུ་དང་འབྲེལ་ལྕགས་ལུགས་རྒྱས་བཅད་ཅེས་པ་གཏན་འབེབས་ཀྱིས་རྟ་ཁལ་སྐུལ་འདེད་བྱེད་མིས་རྡལ་དངུལ་འོས་འཚམ་སྤྲོད་དགོས་པ་བཟོས་ཤིང་། དཔོན་རིགས་ཞི་དྲག་མི་སྣ་ཕྱོགས་ཐོན་བྱ་མིར་རྫོང་གཞིས་ཁག་ནས་ལམ་ཡིག་ནང་གསལ་རྟ་ཁལ་གཏང་བའི་ཟླ་དྲུག་སོང་ཁྲ་ཞེས་པར་ཞིབ་འཇུག་གིས་རྟ་འུལ་ཁལ་མ་འཕར་སྐུལ་བྱས་རིགས་བྱུང་ཡོད་མེད་དང་གོང་གསལ་རྒྱས་བཅད་ལར་ལག་བསྟར་བྱས་ཡོད་མེད་ལ་ཞིབ་བཤེར་བྱེད་པ་ཡིན།
༼དུང་དཀར་ཚིག་མཛོད་ཆེན་མོ་༽ལས་བཏུས།