རྫོང་རྩེ་དགོན

མཚན་རྒྱས་པར་འབྲི་གུང་རྫོང་གསར་བཀྲ་ཤིས་སྟག་རྫོང་ཞེས་ཞུ། རྩེ་ཞོལ་ནས་སྤྱི་ལེ་༢༣ཙམ་སོང་ན་རྫོང་ཞོལ་གྲོང་གི་རི་ལྡེབས་སུ་དགོན་དེ་མཇལ་རྒྱུ་ཡོད། དགོན་དེ་ནི་འབྲི་གུང་བླ་རྒྱུད་ཆོས་རྒྱལ་ཕུན་ཚོགས་ཞེས་པས་ཕྱག་འདེབས་གནང་མཛད། ཐོག་མར་འབྲི་གུང་རྫོང་ཆུ་ཕ་རིའི་རྣམ་རྒྱལ་ཆོས་རྫོང་ཞེས་པར་ཡོད་པ་ལ་ཇུན་གར་དམག་གིས་གཏོར་རྗེས་ད་ལྟའི་གནས་དེར་སྤོས་གནང་མཛད། སྔོན་འདུ་ཁང་ཀ་བ་བཅུ་གཉིས་ནང་རྟེན་གཙོ་སངས་རྒྱས་རབས་བདུན་གྱི་སྐུ་བརྙན་མི་ཚད་མ་དང་། སྨན་འདམ་གྱི་རྩ་གསུམ་སྐུ་བརྙན་མི་ཚད་མ། དགེ་འདུན་ལྔ་བཅུ་སྐོར་གྱིས་འབྲི་གུང་བཀའ་བརྒྱུད་ཕྱག་བཞེད་མཛད་པའི་ཐོག་ཐུན་མོང་མ་ཡིན་པ་བླ་གྲྭ་བཅོ་བརྒྱད་ཀྱིས་བོད་ཟླ་༡༢ཚེས་༨ནས་༢༩བར་ཞག་ཉེར་གཅིག་རིང་གཤིན་རྗེ་ཚེ་བདག་གི་སྒོ་ནས་སྒྲུབ་པ་གནང་དགོས། སྐབས་དེར་གཏོར་མའང་ལྕགས་ཐག་གྱིས་བཏགས་དགོས་པ་ནི་གཏོར་མ་གང་སར་འཕུར་མི་འགྲོ་བའི་ཆེད་དུ་ཡིན་ཞེས་གསུངས། གྲྭ་པ་སོ་སོས་ཀྱང་གཏོར་ཆུང་མང་པོ་བཟོས་ཏེ་རེས་བསྐོར་གྱིས་ཞལ་ཕུ་གནང་དགོས། གཏོར་ཆུང་དེ་ཚོས་མཚོན་འགོག་ཐུབ་ཅེས་དང་། སེ་ར་གཏོང་སྐབས་མེ་མདའི་ནང་བླུགས་ཏེ་ནམ་མཁར་བརྒྱབ་ན་སྤྲིན་ནག་འཐོར་བ། གསོལ་ཞག་གིས་རྨ་ལ་ཕན་པ། གདོན་འདྲེ་འགོག་པ། གཞན་ཡང་རག་ཏཱ་དང་བདུད་རྩིའི་ཁ་དོག་ཀྱང་འགྱུར་འགྲོ་བ་སོགས་འོང་ཞེས་གསུངས། ད་ལྟ་སྔོན་གྱི་འདུ་ཁང་གི་རྩིག་གདན་སྟེང་བཞེངས་གནང་བའི་འདུ་ཁང་ནང་སྔོན་གྱི་སྐུ་བརྙན་དེ་དག་གི་སྐུ་ཚབ་གསར་བཞེངས་གནང་བ་མཇལ་རྒྱུ་ཡོད།