རྩ་ཐང་བུ་མོ།
རྩ་ཐང་གི་ལྷ་མོ།
[རྩོམ་སྒྲིག]རྩོམ་པ་པོ། དཔལ་དོན་གྲུབ་རྒྱལ། རང་གྲོལ།
གཅིག
སྔོ་བསངས་མཁའ་ལ་ཁྲི་གདུགས་ཉི་མ་ཤར། །
བར་སྣང་དབྱིངས་སུ་བྱ་རྒྱལ་རྒོད་པོ་ལྡིང་། །
ནེའུ་གསིང་ཚལ་ན་མེ་ཏོག་ལྡིང་ཁང་བཀྲ། །
བུང་བ་གཞོན་ནུའི་དར་དིར་དབྱངས་ལམ་ནས། །
ཕྱེ་ལེབ་སྒེག་མོས་གར་སྟབས་ལིང་ལིང་བསྒྱུར། །
ངང་ངུར་མགྲིན་རྔ་སིང་སིང་བརྡུངས་པའི་མོད། །
མཚེའུའི་གཉེར་མ་ཤིག་ཤིག་འགུལ་བར་བྱེད། །
ན་བུན་ལང་ལོང་འཐིབས་པའི་རྫ་རི་ལས། །
དྭངས་ཤིང་བསིལ་བའི་རྗ་ཆུ་ལྷུང་ལྷུང་འབབ། །
ཐག་རིང་རྒྱང་གི་སྤང་གཤོང་མཛེས་པའི་གཞིར། །
ཤ་རྐྱང་མ་བུ་དགའ་བའི་རྐང་བྲོ་བརྡུངས། །
སྟོད་ཀྱི་སུ་རུ་རོག་པའི་གསེབ་གསེབ་ཏུ། །
རི་དྭགས་དགོ་བའི་ཁྱུ་རྣམས་བག་ཕེབས་རྒྱུ། །
ཨེ་མ་འདི་ལྟའི་དགེ་མཚན་བྱེ་བའི་གནས། །
གངས་ཅན་མདོ་སྨད་ས་ཡི་ཐིག་ལེ་སྟེ། །
བྲག་དཀར་གནམ་རྫོང་སྙན་གྲགས་དབྱར་སྐྱེས་རྔ། །
བརྡུངས་པ་མེད་པར་གོ་ལའི་ཁྱོན་ལ་འགེངས། །
གཟུགས་བྱད་མཛེས་ལ་ལང་ཚོའི་དཔལ་གྱིས་སྙེམས། །
བཅུ་དྲུག་ལང་ཚོའི་ཆ་ཤས་དཔལ་གྱིས་སྙེམས། །
སྐལ་བཟང་མཚན་འཛིན་གཞོན་ནུ་སོ་སྒོ་ཅན། །
གནམ་རྫོང་ཐང་ན་ལུག་ཁྱུ་འཚོ་ལ་རིངས། །
ཨེ་མ་ལ་ཧོ་བྲག་དཀར་གནམ་གྱི་རྫོང་། །
ས་སྟེང་དགེ་མཚན་མ་ལུས་ཁྱོད་ལ་ལྡན། །
ལྷ་ཡི་བདེ་སྐྱིད་མ་ལུས་ཁྱོད་ལ་ལྡན། །
ཀླུ་ཡི་ལོངས་སྤྱོད་རྣམས་ཀྱང་ཁྱོད་ལ་རྒྱས། །
དེ་ལྟ་ན་ཡང་གཞོན་ནུ་སྐལ་བཟང་ནི། །
རང་སེམས་མཐུན་པའི་གྲོགས་དང་མ་འཕྲད་པས། །
རྩ་ཐང་དགེ་མཚན་མ་ལུས་ཁྱོད་ལ་རྒྱས། །
སྐྱོ་བའི་གླུ་ཆུང་ལེན་ཞིང་ལེན་ཞིང་སྨྲེང་།
ཀ་ཡེ་གསོན་དང་གཞོན་ནུ་སོ་སྒོ་ཅན། །
སེམས་པ་མ་སྐྱོ་ཐུགས་བློ་བདེ་བར་མཛོད། །
སུམ་རྩེན་ལྷ་ཡི་བུ་མོ་མཛེས་མ་ཞིག །
རིང་མིན་ཁྱོད་ཀྱི་ཁྱིམ་ཐབ་བགྱིད་པར་འོང་། །
གཟུགས་མེད་སྒྲ་ཞིག་རྣ་བར་ལྷུང་མ་ཐག །
གཞོན་ནུ་ཡ་མཚན་ཅི་ཡིན་ཆ་མ་མཚལ། །
ཧ་རེ་ལས་ཏེ་རི་ཞིག་ཧད་དེ་ལུས། །
བསམ་བློ་བཞི་གསུམ་བཅུ་གཉིས་བཏང་བ་ན། །
དྲི་བཞོན་བུ་མོའི་ལུང་བསྟན་ཡིན་པ་ཤེས། །
གློ་བུར་མཁའ་ལས་སྦྲང་ཆར་ཟིམ་ཟིམ་བབས། །
བར་སྣང་དབྱིངས་སུ་དབང་པོའི་གཞུ་རིས་བཀྲ། །
མཚར་སྡུག་ལྟ་བས་མི་ངོམས་ལྷ་མོ་ཞིག །
དབང་གཞུའི་རྟ་ལ་བཅིབས་ཏེ་འཛུམ་མེར་བྱུང་། །
སྐལ་བཟང་མིག་ལ་དུང་པའི་མཆི་མ་འཁྲིགས། །
སྐལ་བཟང་ཡིད་ལ་དགའ་བདེའི་དཔལ་གྱིས་ཁྱབ། །
བསྐལ་བ་དེ་འདྲ་བྱུང་ན་དགའ་བ་ལ། །
ཞེས་མཛེས་མ་མཁའ་ལས་བབས་པའི་ལེའུ་སྟེ་དང་པོོའོ། །
གཉིས་པ།
དྲི་གཞོན་བུ་མོའི་ལུང་བསྟན་མངོན་གསུམ་སུམ་གྲུབ། །
སྐལ་བཟང་རེ་བའི་འབྲས་བུ་དེ་རིང་སྨིན། །
ལྷ་མོར་མཇལ་བའི་གོ་སྐབས་དངོས་སུ་ཐོབ།།
དེའི་ཕྱིར་གཞོན་ནུས་སྤོབས་པ་ཆེར་བསྐྱེད་དེ། །
ལྷ་ཡི་བུ་མོ་དྲི་བའི་གཏམ་འདི་གླེང་། །
ཀ་ཡེ་གསོན་དང་མཚར་སྡུག་ལང་ཚོ་ཅན། །
དབང་པོའི་གཞུ་ལ་བཅིབས་པའི་མཛེས་མ་ཁྱོད། །
བཞིན་ལེགས་སྐྱེས་འབྲས་སྲིད་ན་འགྲན་ཟླས་དབེན། །
བཙས་མིན་བཞེངས་པའི་ལྷ་ཡི་སྐུ་དང་མཚུངས། །
ལྷ་བཟོ་མཁས་པས་གསེར་ལས་བརྡུངས་པ་འདྲ། །
རིན་ཆེན་རྒྱན་ཆའི་ཕྲ་ཚོམ་བཏབ་པ་འདྲ། །
དཔྲལ་བའི་དབྱེས་ནི་ཆེ་ཞིང་ཟླུམ་པ་དང་། །
སྨིན་དཀྱུས་རིང་པོ་རྒོད་ཀྱི་གཤོག་པ་འདྲ། །
མིག་འབྲས་ཟུང་ནི་ཆུ་ཤེལ་མེ་ལོང་བཞིན། །
དུས་གསུམ་རྗེན་པར་གཟིགས་པའི་གཟི་འོད་འབར། །
ལྷ་མོཁྱོད་ཀྱི་དབང་པོ་རྣམ་ལྔ་ནི། །
སྐྱེས་པ་མི་འདྲ་བྲིས་པའི་རི་མོ་འདྲ། །
རི་མོ་མཁན་གྱིས་པིར་གྱིས་བྲིས་པ་འདྲ། །
སྣ་ཡི་གཟེངས་ནི་ཅུང་ཟད་མཐོ་བ་དང་། །
མཆུ་ཡི་འདབ་མ་དཀར་ལ་དམར་མདངས་ཆགས། །
མགུལ་དུ་འཕྱང་བའི་མེ་ཏོག་དོ་ཤལ་དེ། །
སླས་པ་མི་འདྲ་རང་བྱུང་སྐྱེས་དང་མཚུངས། །
ཁྱོད་ནི་སྐྱེད་མོས་ཚལ་གྱི་པད་མོ་བཞིན། །
འཇིག་རྟེན་བུ་མོ་རྣམས་ཀྱི་གཙུག་རྒྱན་འདྲ། །
ཁྱོད་ནི་རྒྱུ་སྐར་ཁྲོད་ཀྱི་ཉ་ཟླ་བཞིན། །
འཛམ་གླིང་མཛེས་མའི་ཡོན་ཏན་མ་ལུས་ཚང་བ་ཁྱོོད། །
ལྷ་ཀླུ་དྲི་ཟ་མི་སོགས་སུའི་སྲས་མོ། །
མཛེས་མ་ཁྱོད་ཀྱི་རིགས་རུས་ཆོ་འབྲང་སོགས། །
མ་གསང་དྲང་པོའི་གཏམ་ཞིག་བདག་ཞ་སྨྲས། །
དེ་ཐོས་མཛེས་མ་དབང་གཞུའི་རྟ་ལས་བབས། །
སྨིན་དཀྱུས་རིང་པོ་ལྷེམ་ལྷེམ་འགུལ་བ་དང་། །
གདོང་ནི་གསར་འཁྲུངས་པད་མོ་འཛུམ་པ་བཞིན། །
དུང་པའི་སྐད་ཀྱིས་མཆིད་ཚིག་འདི་ལྟར་སྨྲས། །
ཀ་ཡེ་ཚུར་ལ་གསོན་དང་འཇིག་རྟེན་མི་ཡུལ་གཞོན་ནུ། །
ལང་ཚོའི་དཔལ་གྱིས་སྙེམས་པའི་གཟུགས་མཛེས་ཡོད་འོང་གི་ཕོ་གསར། །
ང་ནི་འདི་ནས་མ་ཡིན་སྟེང་ཕྱོགས་ལྷ་ཡུལ་ནས་ཡིན་ཏེ། །
སུམ་རྩེན་བདག་པོ་བཞུགས་པའི་རྣམ་རྒྱལ་ཕ་བྲང་གི་ཡིན་ནོ། །
བུ་མོའི་ཕ་ཡི་མིང་ལ་ཚངས་པ་སེར་པོ་ཞེས་བྱ་སྟེ། །
བུ་མོའི་མ་ཡི་མཚན་ལ་དབྱངས་ཅན་ལྷ་མོ་རང་བྱའོ། །
བུ་མོ་བདག་གི་མིང་ལ་ཀུན་དགའ་ལྷ་སྐྱིད་ཅེས་ཟེར་རོ། །
སྟེང་ཕྱོགས་ལྷ་ཡིན་ཡུལ་ན་བདེ་སྐྱིད་མེ་པ་ནི་མིན་ནོ། །
འཇིག་རྟེན་མི་ཡི་ཡུལ་གྱི་སྙན་པའི་གྲགས་པ་དེ་ཐོས་པས། །
དེ་རིང་བཀྲ་ཤིས་ཉིན་མོར་རྒྱལ་ཁམས་ལྟད་མོ་ལ་འོངས་སོ། །
འཇིག་རྟེན་མི་ཡི་ཡུལ་དུ་དགེ་མཚན་གསར་པ་ཡིས་ཁེངས་འདུག །
སྔོན་ཆད་མཐོང་ཐོས་མེད་པའི་དཔལ་གྱི་ཡོན་ཏན་འདི་མཐོང་བས། །
བུ་མོའི་སེམས་ཀྱི་འདུན་པ་འཇིག་རྟེན་མི་ཡུལ་ལ་ཤོར་སོང་། །
བུ་མོའི་སྔོན་ལས་བཟང་པས་གཞོན་ནུ་ཁྱེད་རང་དང་མཇལ་བྱུང་། །
དེ་སྐད་གསུང་བཞིན་མཛེས་མའི་མིག་གི་མདའ། །
འཁྱོག་པ་མེད་པར་གཞོན་ནུ་དེར་འཕངས་པས། །
ཕ་གསར་བཞིན་རས་ཉ་ཟླའི་དཀྱིལ་འཁོར་གྱི །
རི་དྭགས་མིག་ཅན་སྐྱེངས་ཏེ་འབྲོ་རུ་དོགས། །
འོན་ཀྱང་མཛའ་བརྩེའི་མདུད་རྒྱ་དམ་པོ་ཡིས། །
ཡིད་ཀྱི་དབང་པོ་ལྷན་དུ་སྦྲེལ་བའི་ཕྱིར། །
ཕོ་གསར་སླར་ཡང་སྤོབས་པ་ཆེར་བསྐྱེད་དེ། །
མཛེས་མའི་གདོང་ལ་འཛུམ་གྱིས་ལྟ་དགོས་བྱུང་། །
ཨེ་མ་འཇིག་རྟེན་སྲིད་པའི་སྣང་བ་ཡི། །
དབང་དུ་གྱུར་པའི་འདོད་ལྡན་ཕོ་མོ་གཉིས། །
ཕན་ཚུན་དུང་པའི་རྗེས་སུ་མངོན་ཆགས་པས། །
ཕན་ཚུན་མགུལ་ནས་ཡང་དག་འཁྱུད་པར་རྩོམ། །
དེར་ཡང་མཛའ་བས་འཁྱུད་པའི་སྙིང་གྲོགས་ཟུང་། །
དགའ་བདེར་རོལ་བའི་འདོད་པས་མ་ཚིམས་ཀྱང་། །
པད་མོར་རྩེན་པའི་ཉི་མ་གཞོན་ནུ་ཡང། །
སྐྱེངས་པའི་ཚུལ་གྱིས་ནུབ་རིའི་ཕག་ཏུ་བྲོས། །
ཞེས་ལྷ་མོའི་དང་སྐལ་བཟང་གཉིས་སྣང་བ་མཐུན་པའི་ལེའུ་སྟེ་གཉིས་པའོ། །
གསུམ་པ།
ཉ་རྒྱས་འོད་ཀྱི་ཟུམ་པའི་པད་མོ་ཡི་མཛེས་མའི། །
གདུང་བ་སེལ་ཕྱིེར་རྟ་བདུན་དབང་པོ་ཡི་གཞོན་ནུ། །
མཚམས་སྤྲིན་གསར་པའི་གདེངས་ཀ་མཐོན་པོ་ཡི་ཁྲི་ལས། །
འཛུམ་པའི་འོད་ཀྱི་ཚེམས་ཕྲེང་མུལ་མུལ་བགད་བྱུང་། །
ལྷ་མོ་མཛེས་མའི་བརྩེ་དུང་ཇེ་ཟབ་ཏུ་གྱུར་སོང་། །
གསར་དུ་འགྲོགས་པའི་ཁྱི་ཤུག་ལྷ་མི་དེ་གཉིས་པོ། །
གཏན་དུ་མི་འབྲས་ཚེ་གང་སྙིང་གྲོགས་ཀྱི་བརྡ་ལ། །
མཛེས་མའི་མགུལ་དུ་འཕྱང་བའི་མེ་ཏོག་གི་དོ་ཤལ། །
སྐལ་བཟང་དགའ་བའི་རྟགས་ལ་ལེགས་སྐྱེས་སུ་ཕུལ་ཅིང་། །
ཕོ་གསར་མཁྲིག་མར་མཛེས་པའི་བ་སོ་ཡི་གདུ་གུ །
མཛེས་མའི་བློ་གཏད་བཅོལ་སའི་དཔང་པོ་རུ་ཕུལ་སོང་། །
རྩྭ་ཐང་དགེ་མཚན་གསར་པའི་དཔལ་ཡོན་དེ་མཐོང་ནས། །
ལྷ་མོའི་སེམས་ལ་ངོ་མཚར་འཆར་སྣང་གིས་ཁེངས་ཏེ། །
ཚེ་གང་གཏན་གྱི་གྲོགས་ལ་མཆིད་ཚིག་འདི་དྲིས་པ། །
ཀ་ཡེ་གསོན་དང་ཚེ་གང་གཏན་གྱི་གྲོགས། །
ཤར་གྱི་ཕྱོགས་ན་བརྗིད་ཆགས་དངོས་པོ་ཞིག །
གནམ་གྱི་ཀ་བ་ལྟ་བུར་འགྱིང་པ་ལ། །
རིན་ཆེན་དངུལ་གྱིས་རྩེ་མོ་བརྒྱན་པ་འདྲ། །
དངོས་པོ་དེ་ཡི་མིང་ཇི་སྐད་ཟེར། །
ཧེ་ཧེ་བདག་གི་སྙིང་གྲོགས་ཚུར་གསོན་དང་། །
གོང་མ་ལྷ་ཡི་ཡུལ་དུ་བཞུགས་བཞུགས་ནས། །
གངས་རི་དཀར་པོ་མ་མཐོང་ངོ་མཚར་ཆེ། །
ཤར་གྱི་ཕྱོགས་ན་ཀྲོང་ངེར་འགྱིང་པ་དེ། །
གནམ་གྱི་ཀ་བ་མ་ཡིན་ལྷུན་པོ་རེད། །
གངས་དཀར་ཕྱོགས་ལས་རྣམ་རྒྱལ་བྱ་བ་རེད། །
དེ་ཡི་རྩེ་མོར་འོད་མདངས་འཚེར་བ་ནི། །
དངུལ་དཀར་མ་ཡིན་ཁ་བ་བསགས་པ་ལགས། །
ཧ་ཧ་གསོན་དང་ཚེ་གང་གཏན་གྱི་གྲོགས། །
ལྟད་མོ་འདི་འདྲ་མཐོང་བ་ངོ་མཚར་ཆེ། །
ལྷ་ཡི་ཡུལ་ན་གངས་རི་ཟེར་བ་མེད། །
ཕྱོགས་ལས་རྣམ་རྒྱལ་ཟེར་བ་དེ་བས་མེད། །
ད་དུང་གསོན་དང་འདྲི་རྒྱུ་འདི་འདྲ་རེད། །
རྟ་འགྲིན་དམར་པོ་ཁྲོས་འདྲའི་ང་རོ་སྒྲོག །
ཁྱབ་འཇུག་བཞོན་པ་ལྟ་བུའི་བང་རྩལ་ལྡན། །
ཡུད་ཙམ་ཞིག་ལ་དཔག་ཚད་བརྒྱ་བགྲོད་པའི། །
དངོས་པོ་འདི་ཡི་མིང་ལ་ཇི་སྐད་ཟེར། །
ཀྱེ་ཀྱེ་བདག་གི་གྲོགས་ཚུར་གསོན་དང་། །
རྟ་འགྲིན་ཁྲོས་འདྲའི་ངར་སྐད་སྒྲོག་པ་དང་། །
ཁྱབ་འཇུག་བཞོན་པའི་བང་རྩལ་ལྡན་པ་དེ། །
ཚན་རིག་འཕྲུལ་ལས་བྱུང་བའི་ལྕགས་གླང་སྟེ། །
ལྗིད་ཚད་རྒྱ་མ་ཁྲི་ཡི་ཁུར་པོ་ཐེག །
བརྒྱུགས་ན་ལེ་དབར་སྟོང་གི་ས་ཡང་ཆོད། །
ཨེ་མ་མ་ཧོ་འདི་འདྲའི་ང་མཚར་ཅན། །
ལྷ་ཡི་ཡུལ་དུ་ཚན་རིག་མི་དར་ལ། །
ལྕགས་ཀྱི་གླང་པོ་ཟེར་བ་དེ་བས་མེད། །
རྩྭ་ཐང་གསར་པའི་དགེ་མཚན་དེ་མཐོང་ནས། །
ལྷ་མོའི་མིག་གི་དབང་པོ་རྣམ་པར་འཁྲུལ། །
དེ་དང་ནགས་དང་སྤང་ལ་སོགས་པ་དྲིས། །
སྦྲ་དང་ཐབ་དང་གོམས་གཤིས་ལ་སོགས་དྲིས། །
ཤ་དང་མར་དང་ཐུད་སོགས་བཟའ་ཚུལ་དྲིས། །
ཞོ་དང་འོ་མ་སོགས་གཏུང་ཚུལ་དྲིས། །
རྟ་དང་ནོར་ལུགས་ལ་སོགས་འཚོ་ཚུལ་དྲིས། །
དྲིས་པའི་ལན་རྣམས་དྲང་པོར་སྨྲས་པ་ཡིས། །
ནམ་མཁའི་ལྷ་མོ་ཡིད་སེམས་རབ་ཏུ་འགུལ། །
ཀུང་ཧྲེའི་སློབ་གྲྭའི་ནང་དུ་སླེབས་པ་ནི། །
སློབ་མས་ཀློག་འདོན་བྱེད་པའི་སྐད་དེ་ཐོས། །
ལྷ་མོ་ངོ་མཚར་སྐྱེས་ཏེ་ཅི་ཡིན་དྲིས། །
སྐལ་བཟང་དགའ་བའི་མོད་ལ་ལན་བྱིན་པས། །
ལྷ་མོ་མོས་པའི་མིག་ལ་མཆི་མ་འཁོར། །
ལྷ་ཡི་ཡུལ་ན་སློབ་གྲྭ་གང་ན་ཡོད། །
རིག་གནས་སྦྱོང་བའི་བསྐལ་བ་དེ་བས་དབེན། །
མི་ཡུལ་བདེ་སྐྱིད་ལམ་ལ་འགོད་བསམ་ན། །
རིག་གནས་ཤེས་བྱ་མེད་ན་ག་ལ་རུང་། །
དེའི་ཕྱིེར་ཉི་མ་དེ་རིང་ནས་བཟུང་སྟེ། །
བདག་ཀྱང་མི་ཡུལ་སློབ་གྲྭ་འདིར་འགྲིམས་ནས། །
རྩྭ་ཐང་འཛུགས་སྐྲུན་བྱེད་པར་འབད་སྙིང་འདོད། །
དེ་ནས་བཟུང་སྟེ་ཁྱོ་ཤུག་གཞོན་ནུ་གཉིས། །
མཛའ་བརྩེའི་སྲད་བུས་ལྷན་དུ་སྦྲེལ་བ་ལྟར། །
སྐྱིད་ཀྱི་འཇིག་རྟེན་འཚོ་བ་རོལ་བཞིན་པར། །
འབྱོར་ཕྱུག་ཕ་ཡུལ་བསྐྲུན་ལ་བྲེལ་བར་གྱུར། །
ཅེས་ལྷ་མོ་དང་སྐལ་བཟང་གཉིས་ཀྱིས་དྲི་བ་དྲིས་ལན་བྱེད་པ་དང་མི་ཡུལ་གྱི་འཚོ་བར་རོལ་ བའི་ལེའུ་གསུམ་པའོ། །