རྡོ་དཀར་ཉིན་སྲིབ་

ཡོང་ཁུངས་Wikipedia

རྡོ་དཀར་ལུང་པ་ནི་བསང་ཆུ་རྫོང་གི་ཤར་ལྷོར་གནས་ཤིང་། དེང་སང་གི་སྣ་བུག་ཞང་ཁག་གི་ཁོངས་སུ་གཏོགས། རྡོ་དཀར་ལུང་པ་ནི་ཤར་རྔོག་ཚོ་བ་ལྔ་དང་། ལྷོ་འབོ་ར། ནུབ་བྱང་གཙོས་བཅས་ཡུལ་ཚོ་རྣམས་དང་འབྲེལ། རུ་ཆུང་ནང་ཟེར་བའི་ལུང་ཕུག་ཏུ་བྲག་རྡོ་བལ་ལས་དཀར་པ་ཞིག་མཆིས་པས་ན་ཀུན་གྱིས་བྲག་བལ་དཀར་རམ་རྡོ་བལ་དཀར་ཞེས་མིང་བཏགས། རིམ་གྱིས་ལུང་པ་དེའི་མིང་ས་མིང་དང་ཚོ་མིང་དུ་ཐོགས། རྡོ་དཀར་ཚོ་བའི་མི་རྒྱུད་ཀྱི་གོང་མ་ནི་སྔ་ཕྱི་རིམ་པ་གཉིས་བྱས་ཏེ་ཡུལ་འདིར་འོང་སྟེ། གཅིག་ནི། རྔོག་མགོ་ཚ་དང་ཝ་ཚ་སྤུན་མཆེད་གཉིས་ཀྱིས་ཁྱིམ་གཞི་གྱེས་སྐབས་སྨད་ཕྱོགས་ཡུལ་འདིར་སྤོས་ཏེ་གཤིས་མྱིག་མདོ་རུ་ས་བཟུང་ནས་བསྡད། གཅིག་ནི་ཀླུ་ཤོད་ཚོ་བའི་ཆོས་བན་དེ་ཕྱུག་གི་རྒྱུད་པ་ལས་གྱེས་ཤིང་རྗེས་ཞེས་བྱ་བའི་ཡུལ་དུ་འབྲོག་ས་བྱས་ཏེ་བསྡད། རིམ་བཞིན་རྡོ་དཀར་རྔོག་གི་ཚོ་པ་དང་ཆོས་བན་དེ་ཕྱུག་གི་ཚོ་བ་གཉིས་སུ་གྱུར། དེ་གཉིས་ལས་རྡོ་དཀར་སྡེ་བ་བཅུ་བཞི་བྱུང་། དེ་ཡང་ཉིན་སྲིབ་གཉིས་སུ་དབྱེ། མིང་རྒྱལ་རབས་དང་ཆིང་རྒྱལ་རབས་སྐབས་སུ་རྡོ་དཀར་ཚོ་བ་ནི་གཙོས་སྒོ་རྫོང་དཔོན་པོའི་མངའ་འོག་ཏུ་བསྡུས་པས་གཙོས་ཚོ་བ་ཉེར་གཅིག་གི་ནང་ཚན་དུ་གྱུར། དུས་ནམ་ཞིག་ལ་དབུས་ཀྱི་འབྲས་སྤུངས་དགོན་པའི་བོད་པ་ཆོས་རྗེས་ས་གནས་དེར་དགོན་པ་བཏབ། དགོན་པའི་ཉེ་ལོགས་ཀྱི་རིའི་དབྱིབས་མཆོད་རྟེན་བང་རིམ་དང་འདྲ་བར་གཟིགས་ཏེ་དགོན་པར་མཆོད་རྟེན་ཤར་དགོན་ཞེས་གསོལ། སླར་དགོན་པ་འདི་རྡོ་དཀར་ཚོ་བའི་ཡུལ་ཁོངས་སུ་གནས་ཕྱིར་རྡོ་དཀར་དགོན་ཞེས་མིང་བསྒྱུར། གོང་མ་ཆན་ལུང་སྐབས་སུ་སྒོ་རྫོང་དཔོན་པོའི་རྒྱུད་པ་རབ་འབྱམས་བསྟན་སྐྱོང་གིས་རྡོ་དཀར་སྲིབ་སྡེ་བདུན་ནི་དགོན་པའི་མཆོད་ཐེབས་སུ་དབུས་ཀྱི་འབྲས་སྤུངས་སྒོ་མང་གྲྭ་ཚང་ལ་ཕུལ། སྒོ་མང་གྲྭ་ཚང་གི་དགེ་འདུན་པ་བསྐོ་མངགས་ཀྱིས་རྡོ་དཀར་ཚོ་བར་དོ་དམ་བྱས། ཀུན་མཁྱེན་གཉིས་པ་འཇིགས་མེད་དབང་པོ་མཆོག་འབྲས་སྤུངས་སྒོ་མང་གྲྭ་ཚང་དུ་ཐུགས་སྦྱོང་མཛད་དུས་སྒོ་མང་གྲྭ་ཚང་གིས་རྡོ་དཀར་དགོན་དང་ས་ཞིང་ལྷ་སྡེ་བཅས་པ་ཀུན་མཁྱེན་ལ་ཕུལ་པས་ཀུན་མཁྱེན་གྱིས་སླར་སྒོ་མང་གྲྭ་ཚང་ལ་དངུལ་གྱི་སྦྱིན་ཚབ་བསྩལ། རྡོ་དཀར་དགོན་ནི་བླ་བྲང་བཀྲ་ཤིས་འཁྱིལ་གྱིས་སླར་སྒོ་མང་གྲྭ་ཚང་ལ་དངུལ་གྱི་སྦྱིན་ཚབ་བསྩལ། རྡོ་དཀར་དགོན་ནི་བླ་བྲང་བཀྲ་ཤིས་འཁྱིལ་གྱི་དགོན་ལག་ཏུ་གྱུར། རྡོ་དཀར་ཚོ་བ་ནི་བླ་བྲང་གི་ལྷ་སྡེ་ཚོ་ཆེན་བརྒྱད་ཀྱི་ནང་ཚན་དུ་གྱུར་ཏོ། །

རྡོ་དཀར་ཉིན་སྡེ[རྩོམ་སྒྲིག]

དེར་སྒོ་མང་ས་སེར། ཨ་ཏེ། བྲག་ཐོ་ལུང་། རྔོག་སྡེ། འོག་སྲུང་། གསེར་ཕོར་བཅས་ཉིན་སྡེ་བདུན་ཡོད།

རྡོ་དཀར་སྲིབ་སྡེ།[རྩོམ་སྒྲིག]

དེར་རྗེ་རོ་དང་། རེབ་ཙ་མདོ། སྒུ་རི་སྟེང་། རྡོ་དཀར་རུ་ཆུང་། ནང་ཙ། དམེ་སྡེ། གསེར་ཕོར་རུ་ཆུང་བཅས་སྲིབ་སྡེ་བདུན་ཡོད།