རྡོ་ཆས་རྙིང་མའི་དུས་སྐབས་ཀྱི་སྤྱི་ཚོགས་

ཡོང་ཁུངས་Wikipedia

རྡོ་ཆས་རྙིང་མའི་དུས་སྐབས་ཞེས་པ་ནི་ལོ་ངོ་དུང་ཕྱུར་གསུམ་ལྷག་གི་གོང་དུ་ཨ་ཧྥེ་རི་ཁ་ཤར་མར་གནས་འཆའ་བའི་གནའ་སྔ་མོའི་ཡོ་བྱད་བཟོ་བའི་གདོད་མའི་མིའི་དུས་སྐབས་ནས་འགོ་བརྩམས་པ་དང་། ལོ་ངོ་ཁྲི་གཅིག་དང་སྟོང་གཅིག་ནས་ལོ་ངོ་ཁྲི་གཅིག་གི་གོང་དུ་མི་རྣམས་ཀྱིས་རྨོ་འདེབས་བྱེད་ཤེས་པ་ནས་མཇུག་སྒྲིལ། རང་ཅག་གི་རྡོ་ཆས་རྙིང་མའི་མེས་པོ་རྣམས་ཀྱིས་རྨོ་འདེབས་མི་རྟོག་པ་དང་གཏན་སྡོད་ཀྱི་དུད་ཁྱིམ་བྱུང་མེད་པས། རྔོན་པ་དང་ཟས་རིགས་འཚོལ་བསྡུའི་རྣམ་པས་འཚོ་གནས་བྱེད། ཁོ་ཚོས་ཟས་རིགས་རྫོགས་དུས་བྲག་ཕུག་དང་རྩྭ་སྤྱིལ་བསྐྱུར་ཏེ་གནས་ཡུལ་གཞན་ཞིག་འཚོལ་བར་བྱེད།

ལོ་ངོ་དུང་ཕྱུར་གསུམ་རིང་གི་རྔོན་ལས་དང་ཟས་རིགས་འཚོལ་བསྡུས་མིའི་རིགས་ཀྱི་སྤྱི་ཚོགས་འཕེལ་རྒྱས་གྲུབ་ཅིང་། འཚོ་གནས་ཀྱི་ཆེད་དུ་མི་སུམ་ཅུ་ལྷག་གི་རིགས་རྒྱུད་ཚོགས་པས་རུ་ཁག་ཅིག་གྲུབ་པ་དང་། སོ་སོས་འཆར་གཞི་དང་སྒྲིག་འཛུགས་བཟོ་བ། མཉམ་ལས་བྱེད་པ་བཅས་བྱས་ཏེ་ཕན་ཚུན་ལ་ཡིད་རྟོན་དང་དངོས་ཟོག་མཉམ་སྤྱོད་བྱེད་ལ། སྐྱེས་པ་རྣམས་ཀྱིས་རྔོན་བརྒྱབ་ཏེ་ཤ་འཚོལ་བ་དང་བུད་མེད་རྣམས་ཀྱིས་བྱིས་པར་བདག་སྐྱོང་དང་། མེ་གསོ་བ། སིལ་ཏོག་དང་འབྲུ་རིགས་བསྡུ། རྔོན་པ་རྣམས་ཀྱིས་ཕན་ཚུན་ལ་གྲོགས་བགྱིས་ཏེ་བརྔོན་བྱར་རྗེས་འདེད་དང་མདས་སྣུན་པར་མ་ཟད། ཕན་ཚུན་མཉམ་འབྲེལ་གྱི་འབྲས་བུ་ནམ་རྒྱུན་མི་སྒེར་གྱི་འཇབ་རྒོལ་ལས་ལེགས་འགྲུབ་ཀྱི་སྲིད་ཕྱོད་ཆེ་བ་ཡོད། ཁོང་ཚོས་འཚོལ་བསྡུ་བྱས་པའི་ཟས་རིགས་གནས་གཞིའི་ཚོགས་པར་མཉམ་བགོ་བྱེད་པས་རུ་ཁག་སྲ་བརྟན་ཡོང་བར་ཕན་མོད། རུ་མི་སུ་ཞིག་གིས་རྔོན་ལས་ཁྲོད་དུ་མཉམ་ལས་མི་བྱེད་པ་དང་། ཚང་མར་རྔོན་ཤ་མཉམ་བགོ་མི་བྱེད་མཁན་དག་འཚོ་ཐབས་བྲལ་བ་ཞིག་ཏུ་སྣང་།

རྔོན་ལས་དང་ཟས་རིགས་འཚོལ་བསྡུས་ད་དུང་མིའི་ལུས་ཕུང་དང་རྣམ་དཔྱོད་འཕེལ་བར་སྐུལ་འདེད་བྱེད་པ་དང་། ཟས་རིགས་འཚོལ་བསྡུ་བྱེད་མཁན་གྱིས་སྐྱེ་དངོས་གནས་ཡུལ་དང་གང་ཞིག་ལུས་པོར་གནོད་སྐྱོན་མེད་པའང་རྟོག་དགོས། རྔོན་ལས་ལ་ལུས་སྟོབས་ཆེ་དགོས་པར་མ་ཟད་མིག་ཤེས་དང་རྣ་ཤེས། མྱུར་བུལ། དེ་མིན་རིག་ཤེས་ནུས་པ་བཟང་པོ་ཞིག་མཁོ་ལ། རྔོན་པས་བརྔོན་བྱ་གང་ཞིག་གི་གོམས་སྲོལ་ལ་ཞིབ་འཇུག་དང་དབྱེ་ཞིབ་བྱེད་དགོས་པ་དང་། གནམ་གཤིས་ཆ་རྐྱེན་ལ་ཐག་གཅོད་ཤེས་པ། བརྔོན་བྱའི་ཚང་དང་ཆུ་བཏུང་ཡུལ་གྱི་གནས་ཡུལ་དྲན་དགོས་པར་མ་ཟད། གོ་མཚོན་གང་ལེགས་བཟོ་དགོས། ལུས་སྟོབས་ཞན་པ་དང་རིག་ཤེས་མི་ཡག་པ་ཞིག་གིས་སྲོག་ཆགས་རྗེས་འདེད་བྱེད་མི་ཐུབ་ལ། གནད་དོན་གསར་བ་ཐག་གཅོད་བྱེད་མི་ཐུབ་པས་ལམ་སེང་འཇིག་རྟེན་དང་ཁ་འབྲལ་ངེས་པ་སྨྲས་ཅི་འཚལ། ཡང་མི་སྒེར་རིག་ཤེས་ཡག་པ་དང་ལུས་སྟོབས་བཟང་བ་དག་ཡུན་རིང་འཚོ་གནས་བྱེད་ཐུབ་པར་མ་ཟད། འཁྲིག་སྤྱོད་གོ་སྐབས་གཞན་དག་ལས་མང་ལ་ཁོ་ཚོའི་ཁྱད་ནུས་མི་རབས་ནས་མི་རབས་སུ་བརྒྱུད་དེ་རིམ་གྱིས་མིའི་རིགས་རྒྱུད་ལ་ཡར་སྐུལ་བྱེད།

རྡོ་ཆས་རྙིང་མའི་དུས་རབས་མངིདཇདཧདཧདཧདཧཙཙཧ་པོར་མིའི་རིགས་ཀྱི་འཕེལ་རིམ་ཤིན་ཏུ་དལ་ཡང་། འཕེལ་རྒྱས་དེ་དག་གིས་འབྱུང་འགྱུར་ལ་ཤུགས་རྐྱེན་ཆེན་པོ་ཐེབས་ཡོད་དེ། རྡོ་ཆས་རྙིང་མའི་དུས་སྐབས་ཀྱི་མི་རྣམས་ཀྱིས་སྐད་ཆ་བཤད་པར་འཕེལ་རྒྱས་བསྐྲུན་པར་མ་ཟད། ཡོ་བྱད་བཟོ་བ་དང་བེད་སྤྱོད་བྱེད་སྟངས་ཀྱང་སྦྱངས་པས། གྲུབ་འབྲས་ཆེན་པོ་འདི་གཉིས་ནི་མིའི་རིགས་ཀྱི་གཤིས་སྤྱོད་སྲོག་ཆགས་གཞན་དག་དང་མ་འདྲ་བའི་བདེན་དབང་ཞིག་ཏུ་གྱུར། ད་དུང་སྤྲ་དང་སྤྲ་མི་ལྟ་བུའི་སྲོག་ལྡན་དག་གིས་སྐད་ཕྱི་རུ་ཕྱུང་ནས་རྣམ་འགྱུར་དང་སེམས་ཁམས་སྟོན་མོད། ཁོ་ཚོས་བྱ་དངོས་གང་ཞིག་ལ་མིང་གདགས་མི་ཐུབ་པར་མ་ཟད་བྱ་དངོས་དེ་དག་རྒྱས་བཤད་ཀྱང་བྱེད་མི་ཐུབ་ལ། ཡང་སྤྲ་རིགས་ཀྱིས་ཁོ་ཚོའི་ཡན་ལག་ཡོ་བྱད་ཀྱི་ཚུལ་དུ་སྤྱད་དེ་འབུ་སྲིན་དག་ཁ་ཟས་སུ་བྱེད་ཀྱང་། ཁོ་ཚོས་ཟས་རིགས་དེ་དག་གསོག་ཉར་བྱེད་མི་ཤེས་པ་དང་ཡོ་བྱད་བཟོ་སྟངས་ཀྱི་བརྒྱུད་རིམ་མི་རབས་ཕྱི་མར་བརྒྱུད་སྤྲོད་ཀྱང་བྱེད་མི་ཐུབ།

ཕྱོགས་གཞན་ནས་རྡོ་ཆས་རྙིང་མའི་དུས་སྐབས་ཀྱི་མི་རྣམས་ཀྱི་ཀླད་པའི་ནང་རུས་པ་དང་། ཤིང་རིགས། རྡོ་ཆས་ཀྱིས་ཡོ་བྱད་བཟོ་སྟངས་རྟོགས་པ་སོགས་གསར་གཏོད་དེ་དག་གསོག་ཉར་དང་། མི་གཞན་དག་ལ་ཡོ་བྱད་སྤྱོད་སྟངས་ཁྲིད་པས། མི་རབས་རྗེས་མ་དག་གིས་ཁོང་ཚོའི་མེས་པོ་ནས་བརྒྱུད་པར་འཕེལ་རྒྱས་བཏང་། རྡོ་ཆས་རྙིང་མའི་དུས་སྐབས་ཀྱི་མི་རྣམས་ཀྱིས་སྤྱིར་བཏང་ཡིན་ཡང་སྤྱོད་སྒོ་ཆེ་བའི་ཡོ་བྱད་འདི་དག་སྤྱད་དེ་ཤིང་སྡོང་གི་རྩ་བ་བསློག་པ་དང་། ཤིང་ཤུན་དགོག་པ། སྲོག་ཆགས་བསད་དེ་པགས་པ་བཤུས་ནས་གྱོན་ཆས་དང་ཉ་རྒྱ་བཟོ་བར་མ་ཟད། མེ་ལ་སྟངས་འཛིན་བྱེད་ཤེས་པ་དང་མེ་སྤྱད་དེ་ཟས་སྐོལ་གཡོ་སྐོལ་བྱེད་པ་ལས་གཞན་དྲོད་ཚད་སྲུང་འཛིན་དང་སྲུང་སྐྱོབ་ལ་ཕན་ནུས་བསྐྲུན།

ཡོ་བྱད་བཟོ་བ་དང་སྐད་ཆ་ནི་མིའི་རིགས་ཀྱི་གྲུབ་འབྲས་རླབས་ཆེ་བ་ཞིག་སྟེ། སྐད་ཆས་ཕན་ཚུན་ལ་མི་སྒེར་གྱི་ཡོན་ཏན་དང་ཉམས་མྱོང་། ཚོར་བ་བརྗེ་རེས་བྱེད་ཐུབ་པ་བྱས་པས། སྐད་ཆ་ནི་མི་རབས་ནས་མི་རབས་བར་གྱི་རིག་གནས་འཕེལ་རྒྱས་དང་དེའི་བརྒྱུད་སྤྲོད་ཀྱི་ཁྱད་ནུས་མངོན་གསལ་དོད་པ་ཞིག་ཏུ་གྱུར་བ་དང་། སྐད་ཆས་ཕ་མ་དག་གིས་རང་གི་བྱིས་པར་སྤྱོད་ལམ་དང་། ཆོས་ལུགས་དད་མོས། ད་དུང་ཡོ་བྱད་བཟོ་སྟངས་དང་མེ་གསོ་བ་བཅས་ཁྲིད་སྟོན་བྱེད་པར་རོགས་འདེགས་བྱས།

དེ་ལས་གཞན། རང་རེའི་རྡོ་ཆས་རྙིང་མའི་དུས་སྐབས་ཀྱི་མེས་པོ་དག་གིས་ལྐོག་གྱུར་ཆེ་བའི་ཆོས་ལུགས་དད་མོས་སྤྱད་དེ་རང་བྱུང་ཁམས་ཀྱི་ངོ་མཚར་དང་། སྐྱེ་རྒ་ན་འཆིར་འགྲེལ་བཤད་བྱེད་པ་ཡར་རྒྱས་སུ་བཏང་བ་དང་། གཞིས་སྡོད་མི་ལ་མཚོན་ན་ཉི་མ་དང་རླུང་ཆར་ཐོག་གློག་བཅས་འབྱུང་བཞི་ཐམས་ཅད་གསོན་པོའི་ངོ་བོའི་གནས་པ། རང་བྱུང་ཁམས་ཀྱི་འབྱུང་བཞིར་ཚོར་བ་དང་དམིགས་པ་གཏད་པའི་འགུལ་སྤྱོད་བཅས་ཤེས་པ་ཡོད་པར་འདོད་པས། རྔོན་པ་དང་ཟས་རིགས་འཚོལ་བསྡུ་བྱེད་མཁན་གྱིས་དེ་དག་གི་འདོད་དོན་བསྐོང་ཆེད་རང་བྱུང་ཁམས་ཀྱི་ཚུར་རྒོལ་གསོལ་མཆོད་བྱས་པ་དང་བསྟུན་ནས། རིམ་བཞིན་ལྷ་བ་དང་འཚོ་བྱེད་བྱུང་བ་དང་དེ་དག་གིས་ཆོ་ག་དང་བྱིན་འབེབ་པ། ཆོས་འདོན་པ་བཅས་བརྒྱུད་དེ་འབྱུང་ཁམས་དེ་དག་དང་འབྲེལ་འདྲིས་བྱེད་ཐུབ་པར་སྣང་བ་ལྟ་བུ་བྱུང་། དེར་མ་ཟད། རྡོ་ཆས་རྙིང་མའི་དུས་སྐབས་ཀྱི་མི་རྣམས་ཀྱིས་ཤི་བོ་དུར་སྦས་བྱེད་སྟངས་བསླབས་པ་དང་། སྐབས་རེར་གསོལ་མཆོད་བྱེད་པ་དེས་སྐྱེ་བ་ཕྱི་མ་འདོད་པའི་དད་མོས་བསྟན། དད་མོས་རིགས་གཞན་ཞིག་ནི་གནའ་དཔྱད་པས་ཡོ་རོབ་དང་ཨེ་ཤ་ནས་གསར་རྙེད་བྱུང་ཞིང་། ལོ་ངོ་ཁྲི་བཞི་ནས་ཉིས་ཁྲི་ལྔ་སྟོང་གི་གོང་དུ་བཞེངས་པའི་བུད་མེད་ཀྱི་འདྲ་གཟུགས་ཆུང་ངུ་མང་པོ་ཡོད་པ་དེ་ཡིན་ལ། འདྲ་གཟུགས་དེ་དག་ལྕགས་རིགས་དང་ཤིང་རིགས། འདམ་གྱིས་གྲུབ་ཅིང་ནམ་རྒྱུན་ཕོ་བ་སྟས་ཤིང་ནུ་མ་ཕྱི་རུ་དོད་ཡོད་པ་དང་། གསོན་ཉམས་དོད་པའི་འདྲ་གཟུགས་དེ་དག་གིས་ཚེ་སྲོག་དང་ཟ་མ་སྦྱིན་པའམ། མགོན་སྐྱབས་གནང་བའི་སྐྱེད་ཡུམ་ལྷ་མོ་མཚོན།

རྡོ་ཆས་རྙིང་མའི་དུས་སྐབས་ཀྱི་མི་རྣམས་ཀྱིས་ལོ་ངོ་ཁྲི་གསུམ་ནས་ཆིག་ཁྲི་ཉིས་སྟོང་གི་གོང་དུ་མུན་ནག་ཁུ་སུམ་གྱི་བྲག་ཕུག་ནང་རོལ་རྙེད་པ་དང་། ཁོ་ཚོས་དཔལ་འབར་ཁོ་ནའི་འོད་ལ་བརྟེན་ནས་བྲག་ཕུག་གི་ངོས་སུ་བྱང་ཆ་ལྡན་ཞིང་གསོན་ཉམས་དོད་པའི་སྲོག་ཆགས་ཀྱི་གཟུགས་རིས་བྲིས། ངག་བརྒྱུད་ལོ་རྒྱུས་དུས་སྐབས་ཀྱི་སྒྱུ་རྩལ་བ་འདི་དག་གིས་སྲོག་ཆགས་མདས་བསྣུན་པ་འབྲི་སྐབས། བྱེད་སྟངས་དེས་གཅིག་བྱས་ན་རྔོན་ལས་ལེགས་འགྲུབ་ཡོང་བར་བྱེད་སྲིད་པར་ཡིད་ཆེས་བྱེད་པ་དང་། ཕྱུགས་སྐྱོང་རྫི་བོ་ཞིག་འབྲི་སྐབས་བྱེད་སྟངས་དེས་ཕལ་ཆེར་ཕྱུགས་ཟོག་འཕེལ་ཁ་དར་བར་བྱེད་སྲིད་པར་རེ་བ་བྱེད།

གསལ་འདེབས། རྩོམ་འདིའི་པར་དབང་ངེད་བཙན་པོ་ཚང་ལ་དབང་བས་ཆོག་མཆན་མ་ཐོབ་པར་གང་འདོད་དུ་བརྒྱུད་འགོད་མི་བྱེད་པའི་རེ་བ་ཆེ། གལ་ཏེ་བརྒྱུད་འགོད་བྱེད་དགོས་བྱུང་ཚེ་རྩོམ་ཁུངས་དང་སྦྲེལ་ཐག་གསལ་པོར་འགོད་དགོས། རྩོམ་ཁུངས། བཙན་པོ་ཚང་། རྩོམ་འདིའི་སྦྲེལ་ཐག https://web.archive.org/web/20171213175742/http://www.tsanpo.com/debate/23666.html