རྟའུ་བློ་བཟང་དཔལ་ལྡན་

མཁས་དབང་རྟའུ་བློ་བཟང་དཔལ་ལྡན་མཆོག་ནི་ཆུང་དུས་ནས་ཕ་ལགས་ཀྱིས་ཁྲིད་དེ་སྤྱི་ལོ་༡༩༥༩ལོར་རྒྱ་གར་དུ་ཕེབས་ནས་ཡུལ་ཀ་བློན་ཕུག་ཏུ་ཡོད་པའི་དབྱིན་ཇིའི་སྐད་ཡིག་སློབ་གྲྭ་སང་ཏྲི་ཨའ་ཀོ་སུ་ཁྲིན（St.Augustin school）ནང་ཚུད། ཕྱི་ལོ་༡༩༦༣ལོར་ཁོང་དགུང་ལོ་བཅུ་གཉིས་ལ་ཕེབས་སྐབས་བོད་ཀྱི་ཕྲུ་གུ་ཁག་ཅིག་དང་མཉམ་དུ་འཇར་མན་རྒྱལ་ཁབ་ཀྱིས་བསྡུ་ལེན་བྱས་ནས་ཕྱི་ལུགས་ཀྱི་སྐད་ཡིག་སོགས་ལ་སྦྱང་རྒྱུའི་གོ་སྐབས་བཟང་བོ་ཞིག་ཐོབ་སྟེ་རིམ་བཞིན་དུ་སློབ་ཆེན་མཐར་ཕྱིན། ཕྱི་ལོ་༡༩༧༢ལོར་འཇར་མན་རྒྱལ་ཁབ་ཀྱི་ཆེས་སྐད་གྲགས་ཆེ་བའི་སློབ་གྲྭ་ཆེན་མོ་ཧལ་རེ་རྦག་（Heildelberg University）ནང་རྒྱུགས་འཕྲོད་ནས་ནུབ་ལུགས་གསོ་བ་རིག་པའི་སྐོར་སློབ་སྦྱོང་གནང་བར་མ་ཟད་ཆུང་དུས་ནས་ཕ་ལགས་ཀྱི་བསླབ་བྱ་ཐུགས་ལ་བཅངས་ཏེ་བོད་ཀྱི་ཐུན་མོང་མ་ཡིན་པའི་རིག་གཞུང་ལ་དགའ་ཞེན་དང་དོ་སྣང་ཆེན་པོ་གནང་ནས་འཇར་མན་རྒྱལ་ཁབ་དུ་བོད་རིགས་ཉུང་ཞིང་བོད་ཡིག་སྦྱངས་ས་མེད་ན་ཡང་ཁོང་གིས་ཕ་ལགས་ཀྱིས་བསླབ་བྱ་ཡིད་ལ་བཅངས་ནས་ཕྱི་ལུགས་ཀྱི་རིག་གཞུང་སློབ་ཞོར་བོད་རང་གི་རིག་གཞུང་ལ་རང་སྦྱོང་བྱས།ལྷག་པར་དུ་བོད་རང་གི་ཐུན་མོང་མ་ཡིན་པའི་རོལ་དབྱངས་ལ་དགའ་ཞེན་དང་དོ་སྣང་བྱས་པས་ཕྱི་ལོ་༡༩༨༡ལོར་བོད་གཞས་ཕ་གིའི་གངས་རི་དཀར་བོས་གཙོས་གླུ་དབྱངས་གང་མང་ཞིག་གི་ཚིག་དང་དབྱངས་གཉིས་གསར་རྩོམ་གནང་བས་བོད་གཞིས་བྱེས་མི་དམངས་ཀྱི་དགའ་བསུ་ཆེན་པོ་ཐོབ་པར་མ་ཟད་བོད་ཀྱི་གླུ་དབྱངས་གསར་རྩོམ་པའི་མཚན་སྙན་ཡང་ཐོབ།ཁོང་ལ་གཞན་དང་མི་འདྲ་བའི་རིག་པ་ཁྱད་པར་བ་ཞིག་ལྡན་པས་ཕྱི་གླིང་གི་དགེ་རྒན་རྣམས་ཀྱིས་བསྟོད་བསྔགས་དང་བྱ་དགའ་གང་མང་ཞིག་གནང་མྱོང་། ཕྱི་ལོ་༡༩༧༩ལོར་གསོ་རིག་རབ་འབྱམས་པའི་ཐོབ་ཐང་བླངས་ཏེ་སློབ་མཐར་ཕྱིན་རྗེས་འཇར་མན་རྒྱལ་ཁབ་ཀྱི་སྨན་ཁང་ཆེན་མོ་མང་བོའི་ནང་ནས་ཕྱག་ལས་གནང་སྟེ་ཉམས་མྱོང་མང་བོ་བསྡུ་ལེན་བྱས། ཕྱི་ལོ་༡༩༨༩ལོ་ནས་བཟུང་འཇར་མན་རྒྱལ་ཁབ་ཀྱི་གྲོང་ཁྱེར་བྷོན་（Bonn University）གྱི་གཙུག་ལག་སློབ་གྲྭའི་ཁོངས་གཏོགས་ཀྱི་སྨན་ཁང་ཆེན་མོའི་ཁོང་ནད་སྡེ་ཚན་གྱི་མཆིན་ནད་ཆེད་མཁས་སྨན་པའི་（Senior Doctor）ལས་འགན་བཞེས།རྒྱལ་སྤྱིའི་ཚན་རིག་དང་གསོ་རིག་དཔྱད་བསྡུར་བགྲོ་གླེང་ཚོགས་འདུའི་གདན་ཞུའི་ཆེད་མཁས་སྨན་པ་ཆེན་མོ་དང་བློ་འདོན་པ།འཇར་མན་གཙོའི་ཡོ་རོབ་ཀྱི་རྒྱལ་ཁབ་འགའི་རླུང་འཕྲིན་དང་བརྙན་འཕྲིན་སོགས་ལས་གསུང་བཤད་གང་མང་གནང་བས་མཚན་སྙན་ཕྱོགས་སུ་རྒྱས།ཕྱི་ལོ༡༩༨༥ལོར་སྤྲིན་འཁོར་ཞེས་པའི་གླུ་དབྱངས་ཆེད་སྒྲིག་ཅིག་གསར་རྩོམ་གནང་བས་ཁོང་གིས་བརྩམས་པའི་གླུ་གཞས་ལ་ད་ལྟ་ཡོ་རོབ་དང་ཨ་རི་སོགས་ནའང་ཧ་ཅང་དགའ་བསུ་ཐོབ་བཞིན་ཡོད་ལ།ཕྱི་ལོ་༡༩༩༥ལོར་ཁོང་དང་ཁོང་གི་བཟའ་ཟླ་ཆོས་ཉིད་ལྷ་མོ་གཉིས་ཀྱིས་དཀའ་ཚེགས་ལ་མ་འཛེམ་པར་འབད་བརྩོན་དང་སྙིང་སྟོབས་ཆེན་པོའི་ངང་རྟ་བྲག་ཐེབས་རྩ་ཚོགས་པ་ཞེས་པ་གསར་དུ་བཙུགས། ཕྱི་ལོ༡༩༩༧ལོར་ཁམས་རྟའུ་རྫོང་དུ་རྟ་བྲག་དྭ་ཕྲུག་ཁྱིམ་སྡེ་ཞིག་བཙུགས།ཕྱི་ལོ་༢༠༠༦ལོར་ཨ་མདོ་མགོ་ལོག་ས་ཁུལ་དུ་རྟ་བྲག་དྭ་ཕྲུག་ཁྱིམ་སྡེ་གཉིས་པ་སྟེ་མགོ་ལོག་རྟ་བྲག་དྭ་ཕྲུག་སློབ་གྲྭ་བཙུགས་པ་དང་།དེ་ནི་མགོ་ལོག་ཁུལ་སྲིད་གཞུང་དང་གན་རྒྱ་སོགས་བཞག་པར་མ་ཟད་སློབ་གྲྭའི་ས་དང་ཆུ་།གློག གཞུང་སྒྲུབ་དགེ་རྒན་༡༠བཅས་ཀྱི་འགྲོ་སོང་ཡོད་ཚད་ཁུལ་སྲིད་གཞུང་གིས་གཏོང་རྒྱུ་དང་རྒྱབ་སྐྱོར་གང་ལེགས་གནང་རྒྱུ་བྱས་པས་འཇར་མན་ན་བཞུགས་པའི་རྟའུ་བློ་བཟང་དཔལ་ལྡན་ལགས་ཀྱིས་མགོ་ལོག་ས་གནས་ཀྱི་འགོ་ཁྲིད་དང་མང་ཚོགས་ཀྱི་རེ་བ་བཞིན་མགོ་ལོག་ཁུལ་གྱི་ཕ་མ་གཉིས་ཀ་མེད་པའི་དྭ་ཕྲུག་དག་ལ་ལོ་དགུའི་སློབ་གསོའི་འོས་འགན་སྒྲུབ་སའི་དྭ་ཕྲུག་གི་གཞིས་ཁྱིམ་དྲོད་མོ་སྟེ་རྟ་བྲག་དྭ་ཕྲུག་སློབ་གྲྭ་འདི་ཕྱི་ལོར་༢༠༠༥ལོར་འཛུགས་སྐྲུན་གྱི་འགོ་བརྩམས་པ་དང།དེའི་ཕྱི་ལོར་སློབ་མ་སུམ་ཅུ་བསྡུས་ནས་༢༠༠༦ལོའི་ཟླ་བརྒྱད་པར་དངོས་སུ་སློབ་འགོ་བཙུགས། ཁོང་གིས་གསུངས་རྒྱུར་དུས་ནམ་ཡིན་ཡང་རང་ནུས་ཡོད་དགུ་རང་རིགས་དང་གཞན་རིགས་ལ་འབུལ་རྒྱུ་ཡིན་ཞེས་གསུངས་པ་བཞིན་མིག་མཐོང་ལག་ཟིན་གྱིས་གཞན་དོན་ལ་བརྩོན་བཞིན་ཡོད།