རྒྱུད་བཞི་

ཡོང་ཁུངས་Wikipedia
Jump to navigation Jump to search

བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ཅེས་བྱ་བ་བཞུགས་སོ། ལེའུ་དང་པོ། སྡོམ་ཚིག་བསྟན་པ། ༄༅། །དེ་ནས་སྟོན་པ་བཅོམ་ལྡན་འདས་འཚོ་མཛད་སྨན་གྱི་བླ་བཻཌཱུརྱ་འོད་ཀྱི་རྒྱལ་པོ་དེས་ཏིང་ངེ་འཛིན་དེ་ལས་བཞེངས་ཏེ། སྨྲ་བའི་སེང་གེ་ཞེས་བྱ་བའི་སྨན་གྱི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་དབུའི་གཙུག་ནས་འོད་ཟེར་ཁ་དོག་བརྒྱ་སྟོང་དུ་མ་ཕྱོགས་བཅུར་འཕྲོས་པས་ཕྱོགས་བཅུའི་འགྲོ་བ་སེམས་ཅན་ཐམས་ཅད་ཀྱི་ལུས་ཀྱི་ཉེས་པའི་སྐྱོན་བསལ། རླུང་མཁྲིས་བད་ཀན་གྱི་ནད་ཐམས་ཅད་ཞི་བར་བྱས་ནས་སླར་དབུའི་གཙུག་ཏུ་འདུས་པ་ལས། སྤྲུལ་པའི་སྟོན་པ་དྲང་སྲོང་རིག་པའི་ཡེ་ཤེས་ཞེས་བྱ་བ་ཞིག་སྐུ་ལས་སྤྲུལ་ཏེ་མདུན་གྱི་བར་སྣང་ལ་བཞུགས་པ་ལས། །གསུང་ལས་སྤྲུལ་པའི་དྲང་སྲོང་ཡིད་ལས་སྐྱེས་ཞེས་བྱ་བ་དེས་སྟོན་པ་ལ་ཕྱག་དང་སྐོར་བ་བྱས་ནས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །བསྡུས་དོན་རྩ་རྒྱུད་དེ་ལྟར་གསུངས་ལགས་ན། །བཤད་པའི་རྒྱུད་ལ་ཇི་ལྟར་བསླབ་པར་བགྱི། །འཚོ་མཛད་སྨན༌པའི་རྒྱལ་པོས་བཀའ་སྩོལ་ཅིག །དེ་སྐད་ཅེས་ཞུས་པ་དང༌། །སྐུ་ལས་སྤྲུལ་པའི་དྲང་སྲོང་རིག་པའི་ཡེ་ཤེས་དེས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཡིད་ལས་སྐྱེས། །གཉིས་པ་བཤད་པའི་རྒྱུད་ལ་བསླབ་པ་ནི། །འགྲོ་དྲུག་གཙོ་བོར་གྱུར་པ་མི་ལུས་ལ། །མི་ན་གནས་དང་ན་བ་གསོ་བ་དང༌། །ཚེ་རིང་ཆོས་ནོར་བདེ་བ་སྒྲུབ་པའི་ཕྱིར། །གསོ་བ་རིག་པའི་དོན་རྣམས་མདོར་བསྡུ་ན། །གསོ་བྱ་གསོ་བྱེད་ཇི་ལྟར་གསོ་བ་དང༌། །གསོ་བ་པོ་དང་རྣམ་པ་བཞི་རུ་བཤད། །དང་པོ་གསོ་བར་བྱ་བའི་ཡུལ་བསྟན་པ། །གང་གི་དོན་དུ་གསོ་བ་ལུས་དང་ནི། །གང་གསོ་དེ་ལས་བྱུང་བའི་ནད་དུ་བསྟན། །ནད་ལ་གསོ་བར་བྱེད་པའི་གཉེན་པོ་ནི། །སྤྱོད་ལམ་ཟས་དང་སྨན་དང་དཔྱད་རྣམས་སོ། །ནད་དེ་གཉེན་པོས་ཇི་ལྟར་གསོ་བ་ལ། །ནད་མེད་གནས་ཤིང་རིང་དུ་འཚོ་བ་དང༌། །རྣམ་གྱུར་ན་བ་གསོ་བར་བྱ་བའོ། །དེ་ལ་ངོས་བཟུང་བརྟག་པའི་ཐབས་དང་ནི། །རྟོགས་ནས་ཇི་ལྟར་གསོ་བའི་གསོ་ཚུལ་དང༌། །གང་གིས་གསོ་བའི་གསོ་ཐབས་གསུམ་དུ་བཤད། །དེ་ལྟར་གསོ་བར་བྱེད་པའི་གསོ་བ་པོ། །རྩ་བ་བཞི་ལ་ཡན་ལག་བཅུ་གཅིག་སྟེ། །འདི་དག་བཤད་པའི་རྒྱུད་ཀྱི་སྡོམས་ཚིག་ཡིན། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་བཤད་པའི་རྒྱུད་ཀྱི་སྡོམས་ཚིག་བསྟན་པའི་ལེའུ་སྟེ་དང་པོའོ།། །། ལེའུ་གཉིས་པ། ལུས་ཀྱི་ཆགས་ཚུལ་བསྟན་པ། དེ་ནས་དྲང་སྲོང་ཡིད་ལས་སྐྱེས་ཀྱིས་སྟོན་པ་དྲང་སྲོང་རིག་པའི་ཡེ་ཤེས་ལ་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །གྲུབ་པ་ལུས་ཀྱི་གནས་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག །དང་པོ་གང་གི་དོན་དུ་གསོ་བ་ལུས། །གྲུབ་པ་ལུས་གནས་བསྟན་པ་འདི་ལྟ་སྟེ། །ཆགས་ཚུལ་འདྲ་དཔེ་གནས་ལུགས་མཚན་ཉིད་དང༌། །དབྱེ་བ་ལས་དང་འཇིག་ལྟས་བདུན་དུ་བཤད། །དེ་ལ་དང་པོ་ཆགས་པའི་ཚུལ་བསྟན་པ། །ཆགས་རྒྱུ་འཕེལ་རྐྱེན་བཙའ་རྟགས་རྣམ་པ་གསུམ། །དང་པོ་ཕ་མའི་ཁུ་ཁྲག་སྐྱོན་མེད་པ། །རྣམ་ཤེས་ལས་དང་ཉོན་མོངས་ཀྱིས་བསྐུལ་ནས། །འབྱུང་ལྔ་ཚོགས་པ་མངལ་དུ་ཆགས་པའི་རྒྱུ། །དཔེར་ན་གཙུབས་ཤིང་དག་ལས་མེ་འབྱུང་མཚུངས། །ཁུ་ཁྲག་རླུང་གིས་རྩུབ་ནག་རོ་བསྐ་ལ། །མཁྲིས་པས་རོ་སྐྱུར་མདོག་སེར་དྲི་མ་མནམ། །བད་ཀན་སྐྱ་འབྱར་རོ་མངར་བསིལ་བ་སྟེ། །ཁྲག་གིས་རུལ་ཏེ་བད་རླུང་དུམ་བུར་ཆད། །ཁྲག་མཁྲིས་རྣག་འདྲ་བད་མཁྲིས་མདུད་པ་ཅན། །རླུང་མཁྲིས་སྐམ་ཞིང་འདུས་པ་བཤང་གཅི་འདྲ། །འདི་དག་སྐྱོན་རེས་ས་བོན་བྱེད་མི་ནུས། །ལས་མ་འཛོམ་ན་རྣམ་ཤེས་མི་འཇུག་སྟེ། །ས་མེད་མི་འགྲུབ་ཆུ་མེད་སྡུད་མི་ནུས། །མེ་མེད་མི་སྨིན་རླུང་མེད་འཕེལ་མི་འགྱུར། །ནམ་མཁའ་མེད་པར་འཕེལ་བའི་གོ་མི་ཕྱེད། །ཁུ་བ་དཀར་ལྕི་མངར་ལ་མང་བ་དང༌། །ཟླ་མཚན་ཚོས་ཁུ་རི་བོང་ཁྲག་འདྲ་བ། །བཀྲུས་ན་དག་འགྱུར་སྐྱོན་མེད་མངལ་ཆགས་བྱེད། །བུད་མེད་བཅུ་གཉིས་ལོན་ནས་ལྔ་བཅུའི་བར། །དྭངས་མ་ལས་བྱུང་ཟླ་རེར་བསགས་པའི་ཁྲག །རྩ་ཆེན་གཉིས་ནས་ནག་ཅིང་དྲི་བྲལ་བ། །རླུང་གིས་མངལ་གྱི་སྒོར་འབྱིན་ཞག་གསུམ་འཛག །དེ་རྟགས་ཉམ་ཆུང་བཞིན་རས་ངན་པ་དང༌། །ནུ་མ་རྐེད་པ་འགུལ་བ་མིག་དཀུ་གཡོ། །ཟླ་མཚན་ལྡན་པ་སྐྱེས་པ་འདོད་པའི་རྟགས། །མངལ་ཁ་བྱེ་ནས་ཞག་ནི་བཅུ་གཉིས་བར། །དང་པོའི་ཞག་གསུམ་བཅུ་གཅིག་བུ་མི་ལེན། །གཅིག་གསུམ་ལྔ་བདུན་དགུ་ལ་བུར་འགྱུར་ཏེ། །གཉིས་དང་བཞི་དྲུག་བརྒྱད་པ་བུ་མོར་འགྱུར། །ཉི་མ་ནུབ་པས་པད་མའི་ཁ་ཟུམ་བཞིན། །བཅུ་གཉིས་འདས་ནས་ཁུ་བ་མངལ་མི་སྡོད། །ཁུ་བ་མང་བ་བུ་རུ་སྐྱེ་འགྱུར་གྱི། །ཟླ་མཚན་མང་བ་བུ་མོར་སྐྱེ་བར་འགྱུར། །ཆ་མཉམ་མ་ནིང་བྱེ་ལས་མཚེ་མར་སྐྱེ། །སྐྱེ་གནས་མི་མཐུན་པ་དང་གཟུགས་མི་སྡུག །འདི་དག་གནོད་པའི་དྲི་མས་སྐྱེ་བར་འགྱུར། །མངལ་ཆགས་མཚན་མས་ས་བོན་འཛིན་པ་དང༌། །འདོད་པ་ངོམས་ཤིང་ལུས་སྙོམ་ལྕི་བ་ཡིན། །ཕ་ཡི་ཁུ་བས་རུས་པ་ཀླད་གཞུང་སྐྱེད། །མ་ཡི་ཟླ་མཚན་ཤ་ཁྲག་དོན་སྣོད་སྐྱེད། རང་གི་སེམས་ལས་དབང་པོའི་རྣམ་ཤེས་འབྱུང༌། །ས་ལས་ཤ་དང་རུས་པ་སྣ་དྲི་སྐྱེད། །ཆུ་ལས་ཁྲག་དང་ལྕེ་རོ་རླན་པ་སྐྱེད། །མེ་ལས་དྲོད་དང་མདོག་གསལ་མིག་གཟུགས་སྐྱེད། །རླུང་ལས་དབུགས་དང་པགས་པ་རེག་བྱ་སྐྱེད། །མཁའ་ལས་བུ་ག་རྣ་བ་སྒྲ་སྐྱེད་འགྱུར། །གོམས་པས་བྱ་བ་ལ་འཇུག་སྣང་བ་མཆེད། །རྒྱུ་རྐྱེན་རྟེན་འབྲེལ་འཛོམས་པས་ལུས་སུ་འགྲུབ། །དེ་ལྟར་ཆགས་ནས་འཕེལ་བའི་ཚུལ་བསྟན་པ། །མངལ་ཆགས་འཕེལ་བའི་རྒྱུ་ནི་ལྟེ་བ་སྟེ། །བུ་སྣོད་གཡས་གཡོན་རྩ་དང་ལྟེ་བ་འབྲེལ། །རྩ་གཉིས་བསམ་སེ་བཅུད་ཀྱི་རྟེན་དང་འབྲེལ། །དེ་ཕྱིར་མ་ཡི་ཁ་ཟས་དྭངས་མ་ཡིས། །རིམ་གྱིས་མངལ་དུ་རྣམ་པར་འཕེལ་འགྱུར་ཏེ། །དཔེར་ན་རྫིང་ཡུར་ཆུ་ཡིས་ཞིང་སྐྱེད་འདྲ། །དེ་ཡང་བདུན་ཕྲག་སུམ་ཅུ་རྩ་བརྒྱད་ཀྱི། །རླུང་གིས་བསྒྱུར་ནས་ཟླ་དགུར་འཕེལ་འགྱུར་ཏེ། །ཟླ་བ་དང་པོ་བདུན་ཕྲག་དང་པོའི་དུས། །འོ་མར་རུ་མ་བླུག་འདྲ་ཁུ་ཁྲག་འདྲེས། །བདུན་ཕྲག་གཉིས་པ་ནུར་ནུར་པོ་རུ་འགྱུར། །བདུན་ཕྲག་གསུམ་པ་ཞོ་ཆགས་ལྟ་བུར་སྣང༌། །སྐྱེས་བུ་འདོད་པས་དུས་འདིར་ཐབས་བསྟེན་ཏེ། །མཚན་མ་གསལ་བར་མ་གྱུར་གོང་དུ་བྱ། །འདི་སྟོབས་ལྡན་པས་ལས་ཀྱང་ཟིལ་གནོན་ནུས། །སྐར་མ་རྒྱལ་ལ་སྐྱེས་པ་བུ་ཡི་གཟུགས། །ལྕགས་སྣ་ཁ་ཡར་ལས་བརྡུངས་སོལ་མེ་ལ། །མདོག་འགྱུར་བསྲེགས་པ་བ་ཡི་འོ་མའི་ནང༌། །གོང་གི་གྲངས་གསུར་ཁུ་བ་སྙིམ་གང་བླུད། །ཉི་མ་ཟླ་བའི་དྭངས་མ་བཟའ་བ་དང༌། །བཅིངས་དང་གདགས་པའི་རྟེན་འབྲེལ་བསྟེན་པར་བྱ། །ཉལ་པོ་རྩོལ་དྲག་མཚན་མོ་གཉིད་མི་ལོག །ཉིན་གཉིད་ཤུགས་བཀག་ཚ་རྣོ་ལྕི་བ་དང༌། །བཤང་དགག་ཟས་དང་རློན་ཁྲུས་མས་བཏང་དང༌། །གཏར་ག་ལ་སོགས་ཟླ་བརྒྱད་བར་དུ་སྤང༌། །ཅི་ཕྱིར་མངལ་འཇིག་འཆི་འམ་དཀུ་སྐམས་འགྱུར། །བཞི་པ་གོར་གོར་མེར་མེར་ནར་ནར་པོ། །དེ་ལས་ཕོ་མོ་མ་ནིང་རིམ་པར་འགྱུར། །དེ་རྟགས་དཀུ་ལྕི་ལུས་རིད་ཡི་ག་འགག །གཡལ་རྨྱང་སྒྱིད་སྐྱུར་ནུ་མ་སྐྱེ་བ་དང༌། །སྐྱུར་ལ་དགའ་ཞིང་སྙིང་ལ་སྣ་ཚོགས་འདོད། །དེ་བཀག་མངལ་འཇིག་གཟུགས་མི་སྡུག་པར་འགྱུར། །དེ་བས་གནོད་པའང་ཕན་བསྲེས་ཅུང་ཟད་བྱིན། །ཟླ་བ་གཉིས་པ་བདུན་ཕྲག་ལྔ་པ་ལ། །མངལ་གནས་ལུས་ཀྱི་དང་པོ་ལྟེ་བ་ཆགས། །དྲུག་པ་ལྟེ་བ་ལ་བརྟེན་སྲོག་རྩ་ཆགས། །བདུན་པར་མིག་གི་དབང་པོ་གཟུགས་སུ་དོད། །བརྒྱད་པ་དེ་ལ་བརྟེན་ནས་མགོ་དབྱིབས་ཆགས། །དགུ་པར་ལུས་དབྱིབས་ཁོག་པ་སྟོད་སྨད་ཆགས། །ཟླ་བ་གསུམ་པ་བདུན་ཕྲག་བཅུ་པ་ལ། །དཔུང་པ་གཉིས་དང་དཔྱི་གཉིས་འབུར་དུ་དོད། །བཅུ་གཅིག་དབང་པོ་དགུ་ཡི་གཟུགས་དབྱིབས་དོད། །བཅུ་གཉིས་པ་ལ་དོན་ལྔའི་གཟུགས་དབྱིབས་དོད། །བཅུ་གསུམ་པ་ལ་སྣོད་དྲུག་གཟུགས་དབྱིབས་དོད། །ཟླ་བ་བཞི་པ་བདུན་ཕྲག་བཅུ་བཞི་ལ། །དཔུང་རྐང་བརླ་རྐང་བཞི་པོའི་གཟུགས་དབྱིབས་དོད། །བཅོ་ལྔ་པ་ལ་རྐང་ལག་རྗེ་ངར་དོད། །བཅུ་དྲུག་པ་ལ་སོར་མོ་ཉི་ཤུ་དོད། །བཅུ་བདུན་ཕྱི་ནང་འབྲེལ་བའི་རྩ་རྣམས་ཆགས། །ཟླ་ལྔ་བདུན་ཕྲག་བཅོ་བརྒྱད་ཤ་ཚིལ་ཆགས། །བཅུ་དགུ་པ་ལ་ཆུ་བ་རྒྱུས་པ་ཆགས། །ཉི་ཤུ་པ་ལ་རུས་དང་རྐང་མར་ཆགས། །རྩ་གཅིག་པ་ལ་ཕྱི་ཡི་པགས་པ་གཡོགས། །དེ་ནས་ཟླ་དྲུག་བདུན་ཕྲག་རྩ་གཉིས་ལ། །དབང་པོ་སྒོ་དགུའི་བུ་ག་རྣམ་པར་བྱེ། །རྩ་གསུམ་སྐྲ་དང་བ་སྤུ་སེན་མོ་སྐྱེ། །རྩ་བཞི་པ་ལ་དོན་སྣོད་གསལ་བར་སྨིན། །དེ་དུས་བདེ་དང་སྡུག་བསྔལ་ཤེས་པར་འགྱུར། །རྩ་ལྔ་པ་ལ་རླུང་གི་རྒྱུ་བ་འབྱུང༌། །རྩ་དྲུག་པ་ལ་སེམས་ཀྱི་དྲན་པ་གསལ། །དེ་ནས་ཟླ་བདུན་བདུན་ཕྲག་རྩ་བདུན་ནས། །སུམ་ཅུའི་བར་གྱིས་ཐམས་ཅད་གསལ་རྫོགས་འགྱུར། །ཟླ་བ་བརྒྱད་པ་བདུན་ཕྲག་སོ་གཅིག་ནས། །སོ་ལྔའི་བར་དུ་ཐམས་ཅད་ཆེར་འཕེལ་བྱེད། །མ་དང་བུ་གཉིས་ཐང་རེ་གཟི་མདངས་འཕོ། །ཟླ་བ་དགུ་པ་བདུན་ཕྲག་སོ་དྲུག་ནས། །མངོན་པར་མི་དགའ་སྐྱོ་བའི་འདུ་ཤེས་འབྱུང༌། །སོ་བདུན་པ་ལ་ལོག་པའི་འདུ་ཤེས་སྐྱེ། །སོ་བརྒྱད་མགོ་མཇུག་ལོག་སྟེ་མངལ་ནས་འབྱིན། །འོན་ཀྱང་ཁྲག་ཟགས་པ་ན་འཕེལ་མི་ནུས། །མངལ་རྒྱས་ཟླ་བ་ཚང་ཡང་བཙའ་བ་དཀའ། །རླུང་གིས་དཀུ་བཀག་ཟླ་བ་ཚང་ཡང་འགོར། །དེ་ལྟར་མངལ་དུ་འཕེལ་ཞིང་སྨིན་པའི་ཚེ། །ཟླ་དགུ་འདས་ནས་བཙའ་བའི་དུས་ཡིན་ཏེ། །དེ་ཡང་གཡས་ལོགས་ལ་བརྟེན་དཀུ་གཡས་མཐོ། །ལུས་ཡང་རྨི་ལམ་དག་ན་སྐྱེས་པ་མཐོང༌། །ནུ་ཞོ་གཡས་པ་སྔར་འབྱུང་ཁྱེ་འུ་སྐྱེ། །སྐྱེས་པ་ཕྲད་འདོད་གླུ་གར་རྒྱན་ལ་དགའ། །གོང་ལས་ལྡོག་པ་བུ་མོ་སྐྱེ་བའི་རྟགས། །དེ་དག་འདྲེས་ལས་མ་ནིང་འབྱུང་བ་སྟེ། །དབུས་དམའ་མཐའ་གཉིས་མཐོ་ན་མཚེ་མར་སྐྱེ། །དེ་ནས་མྱུར་དུ་བཙའ་རྟགས་ལུས་སྙོམ་ཞིང༌། །དཀུ་ལྷོད་སྨད་ལྕི་ཚང་ར་རྐེད་པ་ན། །ལྟོ་བ་ཆུ་སོ་ན་ཞིང་ལྡང་དུབ་བྱེད། །མཚན་བྱེ་གཅིན་མང་དབང་མེད་ན་ཟུག་ལྡང༌། །བུད་མེད་བཙའ་མྱོང་གིས་བསོར་བཙའ་བར་བྱ། །སྲོག་འབྲལ་འདྲ་བའི་ནད་སོས་ཚས་ཀྱིས་གསོ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལུས་ཀྱི་ཆགས་ཚུལ་བསྟན་པའི་ལེའུ་སྟེ་གཉིས་པའོ།། །། ལེའུ་གསུམ་པ། ལུས་ཀྱི་འདྲ་དཔེ་བསྟན་པ། དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག འདྲ་དཔེ་ཕུང་པོའི་གནས་ལུགས་བསྟན་པ་ནི། །དཔྱི་རུས་གཉིས་ནི་རྩིག་པའི་འགྲམ་གཞི་འདྲ། །སྒལ་ཚིགས་གསེར་གྱི་དོང་ཙེ་བརྩེགས་པ་འདྲ། །སྲོག་པ་རྩ་ནི་མཆོང་གི་ཀ་བ་འདྲ། །བྲང་རུས་གྲུ་བཞི་གདུང་མ་བཀལ་བ་འདྲ། །རྩིབ་མ་ཉེར་བཞི་ཕྱམ་འགྲེམས་ལེགས་པ་འདྲ། །ལྷ་རུ་རྩེ་ནི་ཕྱམ་གྱི་རྟེན་མ་འདྲ། །རྩ་དང་ཆུ་རྒྱུས་དྲལ་ཕྱམ་བཀོད་པ་འདྲ། །ཤ་དང་པགས་པ་འདག་ཞལ་བྱས་པ་འདྲ། །སྒྲོག་རུས་གཉིས་ནི་མཁར་བད་བཏགས་པ་འདྲ། །སོག་པ་གཉིས་ནི་གྲུ་ཕུབས་བྱས་པ་འདྲ། །མགོ་བོ་དབུ་རྩེ་བ་གམ་བྱས་པ་འདྲ། །དབང་པོ་སྒོ་ལྔ་སྐར་ཁུང་གཏོད་པ་འདྲ། །ཐོད་པའི་རུས་པ་རྒྱ་ཕུབས་བཀལ་བ་འདྲ། །ཚངས་པའི་བུ་ག་དུད་ཁུང་ཕྱེ་བ་འདྲ། །རྣ་བ་གཡས་གཡོན་ཁྱུང་མགོ་འགྱིང་བ་འདྲ། །སྣ་བུག་མཛེས་པའི་རྒྱན་ཏེ་ཏོག་དང་འདྲ། །སྐྲ་ལོ་ཕོ་གྱོ་མོ་གྱོའི་རྫ་དང་འདྲ། །ལག་པ་གཉིས་ནི་དར་དཔྱངས་བཏགས་པ་འདྲ། །བྱང་ཁོག་སྟོད་སྨད་ཁྱམས་སྟོད་ཁྱམས་སྨད་འདྲ། །མཆིན་དྲི་དར་གྱི་ཡོལ་བ་བཀྲམ་པ་འདྲ། །སྙིང་ནི་རྒྱལ་པོ་གདན་ལ་བཞུགས་པ་འདྲ། །གློ་བ་མ་ལྔ་ནང་གི་བློན་པོ་འདྲ། །གློ་བ་བུ་ལྔ་རྒྱལ་པོའི་སྲས་དང་འདྲ། །མཆིན་མཆེར་གཉིས་ནི་བཙུན་མོ་ཆེ་ཆུང་འདྲ། །མཁལ་མ་ཕྱི་བློན་གྱད་པ་གདུང་འདེགས་འདྲ། །བསམ་སེ་འུ་ནི་ནོར་གྱི་བང་མཛོད་འདྲ། །ཕོ་བ་གཡོས་བཅུ་བྱེད་པའི་ཁོག་མ་འདྲ། །རྒྱུ་མ་ལོང་ཁ་བཙུན་མོའི་གཡོག་དང་འདྲ། །མཁྲིས་པ་སྡོར་གྱི་རྐྱལ་པ་བཀལ་བ་འདྲ། །ལྒང་ཕུག་ཆུ་ཡིས་རྫ་མ་བཀང་བ་འདྲ། །འོག་སྒོ་གཉིས་ནི་ཆུ་ཁུང་བཞག་པ་འདྲ། །རྐང་པ་གཉིས་ནི་སྒོ་ཡི་རྟ་བབས་འདྲ། །གཉན་པའི་གནད་ནི་རྒྱལ་པོས་མངའ་བསྐུར་འདྲ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལུས་ཀྱི་འདྲ་དཔེ་བསྟན་པའི་ལེའུ་སྟེ་གསུམ་པའོ།། །། ལེའུ་བཞི་པ། ལུས་ཀྱི་གནས་ལུགས་བསྟན་པ། དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ལུས་ཀྱི་གནས་ལུགས་བསྟན་པ་རྣམ་བཞི་སྟེ། །ལྡང་ཚད་ལུས་ཟུངས་གནས་ལུགས་བསྟན་པ་དང༌། །འབྲེལ་པ་རྩ་ཡི་གནས་ལུགས་བསྟན་པ་དང༌། །གཉན་པ་གནད་ཀྱི་གནས་ལུགས་བསྟན་པ་དང༌། །རྒྱུ་ལམ་བུ་གའི་གནས་ལུགས་བསྟན་པའོ། །དང་པོ་རླུང་གི་ལྡང་ཚད་ལྒང་ཕུག་གང༌། །མཁྲིས་པའི་ལྡང་ཚད་རང་གི་གསང་སྒྲོ་གང༌། །བད་ཀན་ལྡང་ཚད་རང་གི་སྙིམ་པ་གསུམ། །ཁྲག་དང་ཕྱི་སའི་ལྡང་ཚད་སྙིམ་པ་བདུན། །གཅིན་དང་ཆུ་སེར་ལྡང་ཚད་སྙིམ་པ་བཞི། །ཞག་དང་ཚིལ་བུའི་ལྡང་ཚད་སྙིམ་པ་དོ། །མདངས་དང་ཁུ་བའི་ལྡང་ཚད་ཁྱོར་བ་རེ། །ཀླད་པའི་ལྡང་ཚད་རང་གི་སྙིམ་པ་གང༌། །ཤ་ཡི་ལྡང་ཚད་སྤར་ཚད་ལྔ་བརྒྱ་སྟེ། །བུད་མེད་བརླ་དང་ནུ་མ་ཉི་ཤུས་ལྷག །རུས་པའི་ལྡང་ཚད་རུས་རིགས་ཉི་ཤུ་གསུམ། །དེ་ལས་སྒལ་ཚིགས་འཕང་ལོ་ཉི་ཤུ་བརྒྱད། །རྩིབ་མའི་གྲངས་ནི་ཉི་ཤུ་རྩ་བཞི་སྟེ། །སོ་ཡི་གྲངས་ནི་སུམ་ཅུ་རྩ་གཉིས་མཆིས། །རུས་པའི་དུམ་བུ་སུམ་བརྒྱ་དྲུག་ཅུ་སྟེ། །ཡན་ལག་ཚིགས་ཆེན་རྣམ་པ་བཅུ་གཉིས་ཡོད། །ཚིགས་ཕྲན་ཉིས་བརྒྱ་དང་ནི་རྩ་བཅུའོ། །ཆུ་བ་བཅུ་དྲུག་རྒྱུས་པ་དགུ་བརྒྱ་མཆིས། །སྐྲ་ཡི་ཉག་མ་ཉི་ཁྲི་ཆིག་སྟོང་སྟེ། །བ་སྤུའི་བུ་ག་བྱེ་བ་ས་ཡ་མཆིས། །དོན་ལྔ་སྣོད་དྲུག་བུ་ག་སྒོ་དགུ་ཡོད། །འཛམ་གླིང་རང་ལུས་འདོམ་གང་གྲུ་བཞི་སྟེ། །གཟུགས་ངན་རྣམས་ལ་རང་ཁྲུ་ཕྱེད་དང་བཞི། །འབྲེལ་པ་རྩ་ཡི་གནས་ལུགས་བསྟན་པ་ནི། །ཆགས་སྲིད་འབྲེལ་པ་ཚེ་ཡི་རྩ་དང་བཞི། །ཆགས་པའི་རྩ་ནི་ལྟེ་བ་ལས་གསུམ་གྱེས། །རྩ་གཅིག་གྱེན་ལ་སོང་བས་ཀླད་པ་ཆགས། །གཏི་མུག་ཀླད་པར་བརྟེན་ནས་གནས་པ་སྟེ། །དེ་ལས་བད་ཀན་སྐྱེད་པས་སྟོད་ན་གནས། །རྩ་གཅིག་བར་དུ་ཟུག་པས་སྲོག་རྩ་ཆགས། །ཞེ་སྡང་སྲོག་རྩ་ཁྲག་ལ་བརྟེན་ནས་གནས། །དེ་ལས་མཁྲིས་པ་སྐྱེད་པས་བར་ན་གནས། །རྩ་གཅིག་ཐུར་དུ་ཟུག་པས་གསང་བ་ཆགས། །འདོད་ཆགས་ཕོ་མོའི་གསང་བར་གནས་པ་སྟེ། །དེ་ལས་རླུང་སྐྱེད་སྨད་ན་གནས་པ་ཡིན། །སྲིད་པའི་རྩ་བོ་ཆེ་ནི་རྣམ་བཞི་སྟེ། །དབང་པོ་ཡུལ་ལ་འཆར་བར་བྱེད་པའི་རྩ། །ཀླད་པ་ལ་སྲིད་རྩ་ཕྲན་ལྔ་བརྒྱས་བསྐོར། །དྲན་པའི་དབང་པོ་གསལ་བར་བྱེད་པའི་རྩ། །སྙིང་ལ་སྲིད་ཅིང་རྩ་ཕྲན་ལྔ་བརྒྱས་བསྐོར། །ལུས་ཀྱི་ཕུང་པོ་ཆགས་པར་བྱེད་པའི་རྩ། །ལྟེ་བ་ལ་སྲིད་རྩ་ཕྲན་ལྔ་བརྒྱས་བསྐོར། །བུ་ཚ་རིགས་རྒྱུད་འཕེལ་བར་བྱེད་པའི་རྩ། །མཚན་མ་ལ་སྲིད་རྩ་ཕྲན་ལྔ་བརྒྱས་བསྐོར། །སྟེང་འོག་ཐད་ཀར་ལུས་ཀུན་རྗེས་སུ་འཛིན། །འབྲེལ་པའི་རྩ་ལ་དཀར་ནག་གཉིས་ཡོད་དེ། །སྲོག་པ་རྩ་ནི་རྩ་ཡི་སྡོང་པོ་ལ། །ཡལ་གའི་ཚུལ་དུ་གྱེན་ལ་གྱེས་པ་ཡི། །ཤ་ཁྲག་འཕེལ་བྱེད་རྩ་ཆེན་ཉི་ཤུ་བཞི། །དོན་སྣོད་ནང་འབྲེལ་སྦས་པའི་རྩ་ཆེན་བརྒྱད། །ཡན་ལག་ཕྱིར་འབྲེལ་མངོན་པའི་རྩ་བཅུ་དྲུག །དེ་ལས་གྱེས་པའི་གཏར་རྩ་བདུན་ཅུ་བདུན། །༡ ༢ ༣ ༤ ༥ ༦ ༧ ༨ ༩ ༡༠ ༡༡ ༡༢ ༡༣ ༡༤ ༡༥ ༡༦ ༡༧ ༡༨ ༡༩ ༢༠ ༢༡ ༢༢ ༢༣ ༢༤ ༢༥ ༢༦ ༢༧ ༢༨ ༢༩ ༣༠ ༣༡ ༣༢ ༣༣ ༣༤ ༣༥ ༣༦ ༣༧ ༣༨ ༣༩ ༤༠ ༤༡ ༤༢ ༤༣ ༤༤ ༤༥ ༤༦ ༤༧ ༤༨ ༤༩ ༥༠ ༥༡ ༥༢ ༥༣ ༥༤ ༥༥ ༥༦ ༥༧ ༥༨ ༥༩ ༦༠ ༦༡ ༦༢ ༦༣ ༦༤ ༦༥ ༦༦ ༦༧ ༦༨ ༦༩ ༧༠ ༧༡ ༧༢ ༧༣ ༧༤ ༧༥ ༧༦ ༧༧ གཉན་པའི་རྩ་གནད་བརྒྱ་དང་བཅུ་གཉིས་ཏེ། ༡ ༢ ༣ ༤ ༥ ༦ ༧ ༨ ༩ ༡༠ ༡༡ ༡༢ ༡༣ ༡༤ ༡༥ ༡༦ ༡༧ ༡༨ ༡༩ ༢༠ ༢༡ ༢༢ ༢༣ ༢༤ ༢༥ ༢༦ ༢༧ ༢༨ ༢༩ ༣༠ ༣༡ ༣༢ ༣༣ ༣༤ ༣༥ ༣༦ ༣༧ ༣༨ ༣༩ ༤༠ ༤༡ ༤༢ ༤༣ ༤༤ ༤༥ ༤༦ ༤༧ ༤༨ ༤༩ ༥༠ ༥༡ ༥༢ ༥༣ ༥༤ ༥༥ ༥༦ ༥༧ ༥༨ ༥༩ ༦༠ ༦༡ ༦༢ ༦༣ ༦༤ ༦༥ ༦༦ ༦༧ ༦༨ ༦༩ ༧༠ ༧༡ ༧༢ ༧༣ ༧༤ ༧༥ ༧༦ ༧༧ ༧༨ ༧༩ ༨༠ ༨༡ ༨༢ ༨༣ ༨༤ ༨༥ ༨༦ ༨༧ ༨༨ ༨༩ ༩༠ ༩༡ ༩༢ ༩༣ ༩༤ ༩༥ ༩༦ ༩༧ ༩༨ ༩༩ ༡༠༠ ༡༠༡ ༡༠༢ ༡༠༣ ༡༠༤ ༡༠༥ ༡༠༦ ༡༠༧ ༡༠༨ ༡༠༩ ༡༡༠ ༡༡༡ ༡༡༢ །འདྲེས་པའི་རྩ་ཕྲན་བརྒྱ་དང་བརྒྱད་ཅུ་དགུ། །དེ་ལས་ཕྱི་ནང་བར་གསུམ་བརྒྱ་ཉི་ཤུ། །རྩ་ཕྲན་སུམ་བརྒྱ་དྲུག་ཅུར་གྱེས་པ་ཡིན། །དེ་ལས་རྩ་ཕྲན་བདུན་བརྒྱ་དག་ཏུ་གྱེས། །དེ་ལས་ཡང་ཕྲན་ལུས་ལ་དྲ་བར་འབྲེལ། །ཀླད་པ་རྩ་ཡི་རྒྱ་མཚོ་ཆེན་པོ་ལས། །རྩ་བ་ལྟ་བུར་ཐུར་དུ་ཟུག་པ་ཡི། །བྱ་བ་བྱེད་པའི་ཆུ་རྩ་བཅུ་དགུ་ཡོད། །དེ་ཡང་དོན་སྣོད་ནང་དུ་འབྲེལ་པ་ཡི། །དར་གྱི་དཔྱངས་ཐག་བཅུ་གསུམ་སྦས་པའི་རྩ། །ཡན་ལག་ཕྱིར་འབྲེལ་མངོན་པའི་རྩ་དྲུག་སྟེ། །དེ་ལས་ཆུ་རྩ་ཕྲན་བུ་བཅུ་དྲུག་གྱེས། །མི་ལ་ཚེ་ཡི་རྩ་ནི་གསུམ་ཡོད་དེ། །གཅིག་ནི་མགོ་ལུས་ཐམས་ཅད་ཁྱབ་པར་གནས། །གཅིག་ནི་དབུགས་དང་འགྲོགས་ནས་རྒྱུ་བ་སྟེ། །གཅིག་ནི་བླ་དང་འདྲ་སྟེ་འཁྱམ་པ་ཡིན། །རླུང་ཁྲག་རྒྱུ་བའི་བུ་ག་ཕྱི་ནང་ཀུན། །འབྲེལ་བྱས་ལུས་ནི་སྐྱེད་ཅིང་གནས་པ་དང༌། །སྲོག་གི་རྩ་བ་ཡིན་ཕྱིར་རྩ་ཞེས་བྱ། །གཉན་པའི་གནད་ལ་ཤ་ཚིལ་རུས་པ་དང༌། །ཆུ་རྒྱུས་དོན་སྣོད་རྩ་ཡི་གནད་དང་བདུན། །ཤ་གནད་སྐྲངས་ཤིང་རུས་གནད་ན་ཟུག་ཆེ། །ཆུ་རྒྱུས་གནད་རྣམས་འཇའ་བར་བྱེད་པ་སྟེ། །རྩ་ཚིལ་དོན་སྣོད་གནད་ཀྱིས་སྲོག་འདོར་བྱེད། །འཆི་སྦྱོང་གསོ་བ་དཀའ་ཕྱིར་གནད་ཅེས་བྱ། །ཤ་གནད་བཞི་བཅུ་རྩ་ལྔ་ ༡ ༢ ༣ ༤ ༥ ༦ ༧ ༨ ༩ ༡༠ ༡༡ ༡༢ ༡༣ ༡༤ ༡༥ ༡༦ ༡༧ ༡༨ ༡༩ ༢༠ ༢༡ ༢༢ ༢༣ ༢༤ ༢༥ ༢༦ ༢༧ ༢༨ ༢༩ ༣༠ ༣༡ ༣༢ ༣༣ ༣༤ ༣༥ ༣༦ ༣༧ ༣༨ ༣༩ ༤༠ ༤༡ ༤༢ ༤༣ ༤༤ ༤༥ ཚིལ་གནད་བརྒྱད། །རུས་པའི་གནད་ནི་སུམ་ཅུ་རྩ་གཉིས་ཏེ། ། ༡ ༢ ༣ ༤ ༥ ༦ ༧ ༨ ༩ ༡༠ ༡༡ ༡༢ ༡༣ ༡༤ ༡༥ ༡༦ ༡༧ ༡༨ ༡༩ ༢༠ ༢༡ ༢༢ ༢༣ ༢༤ ༢༥ ༢༦ ༢༧ ༢༨ ༢༩ ༣༠ ༣༡ ༣༢ རྒྱུས་གནད་བཅུ་བཞི་ ༡ ༢ ༣ ༤ ༥ ༦ ༧ ༨ ༩ ༡༠ ༡༡ ༡༢ ༡༣ ༡༤ དོན་གནད་བཅུ་གསུམ་ ༡ ༢ ༣ ༤ ༥ ༦ ༧ ༨ ༩ ༡༠ ༡༡ ༡༢ ༡༣ དང༌། །རྩ་གནད་བརྒྱ་དང་དགུ་བཅུ་ཐམ་པ་ཡོད། ། ༡ ༢ ༣ ༤ ༥ ༦ ༧ ༨ ༩ ༡༠ ༡༡ ༡༢ ༡༣ ༡༤ ༡༥ ༡༦ ༡༧ ༡༨ ༡༩ ༢༠ ༢༡ ༢༢ ༢༣ ༢༤ ༢༥ ༢༦ ༢༧ ༢༨ ༢༩ ༣༠ ༣༡ ༣༢ ༣༣ ༣༤ ༣༥ ༣༦ ༣༧ ༣༨ ༣༩ ༤༠ ༤༡ ༤༢ ༤༣ ༤༤ ༤༥ ༤༦ ༤༧ ༤༨ ༤༩ ༥༠ ༥༡ ༥༢ ༥༣ ༥༤ ༥༥ ༥༦ ༥༧ ༥༨ ༥༩ ༦༠ ༦༡ ༦༢ ༦༣ ༦༤ ༦༥ ༦༦ ༦༧ ༦༨ ༦༩ ༧༠ ༧༡ ༧༢ ༧༣ ༧༤ ༧༥ ༧༦ ༧༧ ༧༨ ༧༩ ༨༠ ༨༡ ༨༢ ༨༣ ༨༤ ༨༥ ༨༦ ༨༧ ༨༨ ༨༩ ༩༠ ༩༡ ༩༢ ༩༣ ༩༤ ༩༥ ༩༦ ༩༧ ༩༨ ༩༩ ༡༠༠ ༡༠༡ ༡༠༢ ༡༠༣ ༡༠༤ ༡༠༥ ༡༠༦ ༡༠༧ ༡༠༨ ༡༠༩ ༡༡༠ ༡༡༡ ༡༡༢ ༡༡༣ ༡༡༤ ༡༡༥ ༡༡༦ ༡༡༧ ༡༡༨ ༡༡༩ ༡༢༠ ༡༢༡ ༡༢༢ ༡༢༣ ༡༢༤ ༡༢༥ ༡༢༦ ༡༢༧ ༡༢༨ ༡༢༩ ༡༣༠ ༡༣༡ ༡༣༢ ༡༣༣ ༡༣༤ ༡༣༥ ༡༣༦ ༡༣༧ ༡༣༨ ༡༣༩ ༡༤༠ ༡༤༡ ༡༤༢ ༡༤༣ ༡༤༤ ༡༤༥ ༡༤༦ ༡༤༧ ༡༤༨ ༡༤༩ ༡༥༠ ༡༥༡ ༡༥༢ ༡༥༣ ༡༥༤ ༡༥༥ ༡༥༦ ༡༥༧ ༡༥༨ ༡༥༩ ༡༦༠ ༡༦༡ ༡༦༢ ༡༦༣ ༡༦༤ ༡༦༥ ༡༦༦ ༡༦༧ ༡༦༨ ༡༦༩ ༡༧༠ ༡༧༡ ༡༧༢ ༡༧༣ ༡༧༤ ༡༧༥ ༡༧༦ ༡༧༧ ༡༧༨ ༡༧༩ ༡༨༠ ༡༨༡ ༡༨༢ ༡༨༣ ༡༨༤ ༡༨༥ ༡༨༦ ༡༨༧ ༡༨༨ ༡༨༩ ༡༩༠ མགོ་ལ་རེ་གཉིས་སྐེ་ལ་སོ་གསུམ་དང༌། །དགུ་བཅུ་གོ་ལྔ་བྱང་ཁོག་སྟོད་སྨད་གནས། །བརྒྱ་དང་བཅུ་གཉིས་ཡན་ལག་བཞི་ལ་གནས། །གནད་ཀྱི་རྣམ་གྲངས་སུམ་བརྒྱ་རྩ་གཉིས་བཤད། །དེ་ལས་རབ་ཏུ་གཉན་པ་དགུ་བཅུ་དྲུག །༤༥ ༤༦ ༤༧ ༤༨ ༥༦ ༦༢ ༦༨ ༧༢ ༧༣ ༧༤ ༧༥ ༧༦ ༧༧ ༧༨ ༧༩ ༨༠ ༨༡ ༨༢ ༨༣ ༨༤ ༨༥ ༨༦ ༨༧ ༨༨ ༨༩ ༩༠ ༩༡ ༩༢ ༩༣ ༩༤ ༩༥ ༩༦ ཆོད་ཟིན་སྲོག་འདོར་མཁས་ཀྱང་བཅོས་སུ་མེད། །འབྲིང་དུ་གཉན་པ་བཞི་བཅུ་རྩ་དགུར་བཤད། ། ༡ ༢ ༣ ༤ ༥ ༦ ༧ ༨ ༩ ༡༠ ༡༡ ༡༢ ༡༣ ༡༤ ༡༥ ༡༦ ༡༧ ༡༨ ༡༩ ༢༠ ༢༡ ༢༢ ༢༣ ༢༤ ༢༥ ༢༦ ༢༧ ༢༨ ༢༩ ༣༠ ༣༡ ༣༢ ༣༣ ༣༤ ༣༥ ༣༦ ༣༧ ༣༨ ༣༩ ༤༠ ༤༡ ༤༢ ༤༣ ༤༤ ༤༥ ༤༦ ༤༧ ༤༨ ༤༩ མཁས་པ་རྣམས་ཀྱིས་བཅོས་སུ་བཏུབ་པ་ཡིན། །དེ་ལས་ལྷག་པ་གནད་དུ་བསྟན་ན་ཡང༌། །གཉན་པར་མ་བཤད་ཀུན་གྱིས་གསོ་བར་ནུས། །རྒྱུ་ལམ་བུ་གའི་གནས་ལུགས་ཕྱི་ནང་གཉིས། །ནང་གི་བུ་ག་སྲོག་ཟུངས་དྲི་མ་གསུམ། །ཆུ་དང་ཟས་རྒྱུ་བཅུ་གསུམ་གནས་པ་ཡིན། །ཕྱི་ཡི་བུ་ག་མགོར་བདུན་གསང་བར་གཉིས། །བུད་མེད་མངལ་སྒོ་ནུ་མ་གཉིས་ཀྱིས་ལྷག །དབྱིབས་ཟླུམ་སྦོམ་དང་ཕྲ་ལ་རིང་འབྲེལ་གྱེས། །ལོ་མའི་རྒྱབ་ཀྱི་རྩ་ལྟར་གནས་པའོ། དྭངས་མ་ཉེར་འཕེལ་སྒོ་ནི་བུ་ག་སྟེ། །ཟས་དང་སྤྱོད་ལམ་མི་མཐུན་བསྟེན་པ་ཡིས། །བུ་གའི་རྒྱུ་ལམ་གནོད་པས་ནད་སྐྱེད་ལ། །མང་འབྱུང་འགགས་དང་གཞན་འགྲོ་འཁྲུག་པར་བྱེད། །གནོད་མེད་བུ་ག་དག་པས་བདེ་བར་འགྱུར། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལུས་ཀྱི་གནས་ལུགས་བསྟན་པའི་ལེའུ་སྟེ་བཞི་པའོ།། །། ལེའུ་ལྔ་པ་ལུས་ཀྱི་མཚན་ཉིད་བསྟན་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ལུས་ཀྱི་མཚན་ཉིད་རྣམ་པ་གཉིས་ཡིན་ཏེ། །གནོད་བྱ་ཁམས་དང་གནོད་བྱེད་ཉེས་པའོ། །ནད་དང་ལུས་ཟུངས་དྲི་མ་རྣམ་གསུམ་པོ། །ཕན་ཚུན་གཅིག་ལ་གཅིག་རྟེན་རག་ལུས་པས། །ཆགས་གནས་འཇིག་པའི་རྩ་བ་ཡིན་ཕྱིར་ལུས། །དང་པོ་གནོད་བྱ་ཁམས་ལ་དབྱེ་བ་ལས། །མེ་དྲོད་འགྱུར་ཚུལ་འབྲས་བུ་རྫོགས་དུས་སོ། །གནོད་བྱའི་དབྱེ་བ་ཟུངས་དང་དྲི་མ་གཉིས། །ལུས་ཟུངས་དྭངས་མ་ཁྲག་དང་ཤ་དང་ཚིལ། །རུས་པ་རྐང་མར་ཁུ་བ་བདུན་དུ་བཤད། །དྲི་མ་བཤང་གཅི་རྔུལ་ལ་སོགས་པའང་ཡིན། །དེ་ལ་དྭངས་མས་གནོད་བྱ་འཕེལ་བར་བྱེད། །ཁྲག་གིས་བརླན་ཞིང་སྲོག་འཚོ་ཤ་ཡིས་གཡོགས། །ཚིལ་གྱིས་སྣུམ་དང་རུས་པས་བརྟེན་པ་དང༌། །རྐང་གིས་བཅུད་འགྱུར་ཁུ་བས་མངལ་འཛིན་བྱེད། །བཤང་གཅིས་རྟེན་འདྲུལ་འབྱིན་པར་བྱེད་པ་སྟེ། །རྔུལ་གྱིས་པགས་པ་མཉེན་ཞིང་བ་སྤུ་བརྟན། །མེ་དྲོད་ཅེས་བྱ་འཇུ་བའི་གཞི་ཡིན་ཏེ། །འཇུ་བར་བྱེད་པའི་མཁྲིས་པ་དེ་ལ་བཤད། །ནད་དང་ལུས་ཟུངས་དྲི་མ་ཀུན་གྱི་དྲོད། །དེ་ཡིས་ནད་མེད་བརྩོན་དང་གཟི་མདངས་དང༌། །ཚེ་དང་ལུས་ཟུངས་མེ་དྲོད་སྟོབས་འཕེལ་བྱེད། །ཞུ་གནས་སྒོར་འཇུག་ཟས་ལམ་སྒོ་གཏན་ཡིན། །དེ་སྟོབས་ལྡན་ན་ཞུ་ནས་ཐུར་འགྲོ་སྟེ། །སྟོབས་ཞན་ཁ་ཟས་མ་སྨིན་ཉིད་ཕྱིར་འབྱུང༌། །མེ་དྲོད་དེ་ནི་ཟས་གང་ལུས་ཟུངས་མདངས། །སྟོབས་རྒྱས་འཕེལ་བར་བྱེད་པའི་རྒྱུ་ཡིན་ཏེ། །མ་ཞུ་དྭངས་སོགས་རྒྱས་པར་མི་འགྱུར་ཕྱིར། །ཟས་སྐོམ་སྤྱོད་ལམ་ཡང་ལ་དྲོ་བ་ཡིས། །འབད་དེ་མེ་དྲོད་བསྲུང་བར་གནས་གྱུར་ན། །ལུས་ཀྱི་སྟོབས་དང་ཚེ་ནི་གནས་པར་གྱུར། །མེ་དྲོད་དེ་ཡིས་ཁ་ཟས་འཇུ་ཚུལ་ནི། །ཟས་སྐོམ་སྲོག་གི་རླུང་གིས་ལྟོ་བར་བཅུག །སྐོམ་གྱིས་བཤིག་ཅིང་སྣུམ་གྱིས་མཉེན་པར་བྱེད། །མེ་མཉམ་རླུང་གིས་མཁྲིས་པ་འཇུ་བྱེད་བུས། །ཕོ་བའི་གནས་སུ་སྨན་ལྟར་བསྐོལ་བར་བྱེད། །དང་པོར་རོ་དྲུག་ཟས་སྐོམ་གང་ཟོས་པ། །བད་ཀན་མྱག་བྱེད་དག་གིས་མྱག་པར་བྱེད། །རོ་མངར་ལྦུ་བ་ཅན་གྱུར་བད་ཀན་སྐྱེད། །བར་དུ་མཁྲིས་པ་འཇུ་བྱེད་ཀྱིས་བཞུས་པས། །རྣམ་པར་ཚ་བས་རོ་སྐྱུར་མཁྲིས་པ་སྐྱེད། །ཐ་མར་མེ་མཉམ་རླུང་གིས་དྭངས་སྙིགས་ཕྱེ། །ཁ་བར་འགྱུར་ཏེ་དེ་ཡིས་རླུང་སྐྱེད་འགྱུར། །འབྱུང་བ་ལྔ་ལྡན་ཟས་ཀྱི་ཡོན་ཏན་གྱིས། །ལུས་ཀྱི་འབྱུང་བ་ལྔ་པོ་རྒྱས་པར་བྱེད། །འགྱུར་ཚུལ་ཞུ་རྗེས་དྭངས་སྙིགས་བྱེ་བ་ལས། །སྙིགས་མ་རྒྱུ་མར་སྐ་སླ་གཉིས་སུ་བྱེ། །སྐ་བ་བཤང་འགྱུར་སླ་བ་གཅིན་དུ་འགྱུར། །དྭངས་མ་ལུས་ཟུངས་རང་རང་མེ་དྲོད་ཀྱིས། །སྨིན་པར་འགྱུར་ཏེ་དྭངས་མ་ཕོ་བ་ནས། །དྭངས་མ་ལེན་པའི་རྩ་དགུར་མཆིན་ལམ་བརྒྱུད། །མཆིན་པའི་གནས་སུ་ཁྲག་འགྱུར་ཁྲག་ལས་ཤ། །ཤ་ལས་ཚིལ་འགྱུར་ཚིལ་ལས་རུས་པར་འགྱུར། །རུས་ལས་རྐང་འགྱུར་རྐང་ལས་ཁུ་བར་འགྱུར། །དེ་རྣམས་སྙིགས་མ་ཕོ་བའི་བད་ཀན་དང༌། །སྣོད་མཁྲིས་བུ་གའི་དྲི་མ་ཞག་དང་ནི། །སོ་སེན་བ་སྤུ་བཤང་སྣུམ་མངལ་འཛིན་ཡིན། །ལུས་ཟུངས་ཁུ་བའི་མཐར་ཕྱིན་མདངས་མཆོག་སྟེ། །སྙིང་ལ་གནས་ཀྱང་ལུས་ཀུན་ཁྱབ་པ་དང༌། །ཚེ་གནས་གཟི་མདངས་བཀྲག་དང་ལྡན་པར་བྱེད། །དེ་དག་འབྲས་བུ་རྫོགས་དུས་ཟས་ཟོས་པའི། །དྭངས་མ་ཁུ་བར་འགྱུར་དུས་ཞག་དྲུག་སྟེ། །རོ་ཙ་ལ་སོགས་འཕྲལ་དུ་ཁུ་བ་སྐྱེད། །སྨན་རྣམས་ཕལ་ཆེར་ཞག་གཅིག་ལས་བྱེད་འགྱུར། །གནོད་བྱེད་ཉེས་པ་བརྒྱད་དེ་དབྱེ་བ་དང༌། །མངལ་དུ་གྲུབ་ཚུལ་རང་བཞིན་མེ་དྲོད་དང༌། །ལྟོ་བ་གནས་དང་ལས་དང་མཚན་ཉིད་དོ། །དབྱེ་བ་རླུང་དང་མཁྲིས་པ་བད་ཀན་གསུམ། །རྒྱུ་དང་ངོ་བོ་དཔེ་དང་འབྲས་བུ་དང༌། །གཉེན་པོའི་སྒོ་ནས་གྲངས་དང་གོ་རིམ་གྲུབ། །རྣམ་པར་མ་གྱུར་ལུས་གནས་གྱུར་པས་འཇོམས། །རླུང་ལ་དབྱེ་ན་སྲོག་འཛིན་གྱེན་རྒྱུ་དང༌། །ཁྱབ་བྱེད་མེ་མཉམ་ཐུར་སེལ་རྣམ་པ་ལྔ། །མཁྲིས་པའི་དབྱེ་བ་འཇུ་བྱེད་མདངས་སྒྱུར་དང༌། །སྒྲུབ་བྱེད་མཐོང་བྱེད་མདོག་གསལ་རྣམ་པ་ལྔ། །བད་ཀན་དབྱེ་བ་རྟེན་བྱེད་མྱག་བྱེད་དང༌། །མྱོང་བྱེད་ཚིམ་བྱེད་འབྱོར་བྱེད་རྣམ་པ་ལྔ། །དེ་ཉིད་མངལ་དུ་གྲུབ་པའི་ཚུལ་བསྟན་པ། །སྐྱེ་བའི་དང་པོ་ཁུ་བ་ཁྲག་ལ་གནས། །དཔེར་ན་དུག་ཅན་སྲིན་པོའི་དུག་སྐྱེད་མཚུངས། །ཁུ་ཁྲག་མངལ་གནས་ཟས་དང་སྤྱོད་ལམ་གྱིས། །ཉེས་པ་ལྷག་གྱུར་རང་བཞིན་བདུན་དུ་འགྱུར། །རླུང་ཆུང་མཁྲིས་པ་འབྲིང་ལ་བད་ཀན་ཆེ། །འདུས་པ་མཆོག་ཡིན་ལྡན་གསུམ་བར་མར་འགྱུར། །དེ་བཞིན་ཕོ་བའི་མེ་དྲོད་བཞིར་འགྱུར་ཏེ། །རླུང་གིས་མི་སྙོམས་མཁྲིས་པས་རྣོ་བ་དང༌། །བད་ཀན་ཆུང་ལ་འདུས་པ་མཉམ་པར་འགྱུར། །ལྟོ་བ་རླུང་གིས་སྲ་ལ་མཁྲིས་པས་སྙི། །བད་ཀན་གྱིས་ནི་ལྟོ་བ་བར་མར་འགྱུར། །གནས་ས་ལུས་ཁྱབ་གྱུར་ཀྱང་སྙིང་ག་དང༌། །ལྟེ་བའི་འོག་བར་སྟེང་ན་མས་རིམ་གནས། །ཉེས་པའི་ལས་ནི་རླུང་གིས་དབུགས་འབྱིན་རྔུབ། །བསྐྱོད་དང་ལས་སྤྱོད་ཤུགས་འབྱིན་གནོད་བྱ་རྒྱུ། །དབང་པོ་གསལ་དང་ལུས་རྗེས་འཛིན་པར་བྱེད། མཁྲིས་ལས་བཀྲེས་སྐོམ་ཟས་ལེན་འཇུ་བ་དང༌། །ལུས་དྲོད་མདངས་གསལ་སྙིང་དཔའ་བློ་ལྡན་བྱེད། །བད་ཀན་ལུས་དང་བློ་བརྟན་གཉིད་ལོག་དང༌། །ཚིགས་འབྲེལ་བཟོད་ཅིང་ལུས་འཇམ་སྣུམ་པར་བྱེད། །ཁྱད་པར་སྲོག་འཛིན་རླུང་དེ་སྤྱི་བོར་གནས། །གྲེ་བ་བྲང་གཞུང་རྒྱུ་ཞིང་ཟས་སྐོམ་མིད། །དབུགས་རྔུབ་མཆིལ་འདོར་སྦྲིད་པ་སྒྲེག་པ་འབྱིན། །བློ་དང་དབང་པོ་གསལ་ཞིང་སེམས་འཛིན་བྱེད། །གྱེན་དུ་རྒྱུ་བའི་རླུང་ནི་བྲང་ལ་གནས། །སྣ་ལྕེ་ལྐོག་མར་རྒྱུ་ཞིང་ཚིག་འབྱིན་ལ། །སྟོབས་མདངས་ཁ་དོག་འབད་རྩོལ་དྲན་གསལ་བྱེད། །ཁྱབ་བྱེད་རླུང་ནི་སྙིང་ལ་གནས་པ་སྟེ། །ལུས་ཀུན་ཁྱབ་པར་རྒྱུ་ཞིང་འདེགས་འཇོག་འགྲོ། །བརྐྱང་བསྐུམ་འབྱེད་འཛུམ་བྱ་བ་ཕལ་རག་ལུས། །མེ་དང་མཉམ་པའི་རླུང་ནི་ཕོ་བར་གནས། །ནང་ཁྲོལ་ཀུན་ཏུ་རྒྱུ་ཞིང་ཁ་ཟས་འཇུ། །དྭངས་སྙིགས་འབྱེད་ཅིང་གནོད་བྱ་སྨིན་པར་བྱེད། །ཐུར་དུ་སེལ་བའི་རླུང་ནི་གཞང་ལ་གནས། །ལོང་དང་ལྒང་པ་གསང་བ་བརླ་ནང་རྒྱུ། །ཁུ་ཁྲག་བཤང་གཅི་མངལ་ནང་འབྱིན་སྡོམ་བྱེད། །འཇུ་བྱེད་ཞུ་དང་མ་ཞུའི་བར་ན་གནས། །ཟས་འཇུ་དྭངས་སྙིགས་འབྱེད་ཅིང་ལུས་དྲོད་དང༌། །ལྷག་མ་བཞི་ཡི་གྲོགས་དང་སྟོབས་སྐྱེད་བྱེད། །མཁྲིས་པ་མདངས་སྒྱུར་མཆིན་པར་གནས་པ་སྟེ། །དྭངས་མ་ལ་སོགས་ཁ་དོག་མ་ལུས་སྒྱུར། །མཁྲིས་པ་སྒྲུབ་བྱེད་སྙིང་ལ་གནས་པ་སྟེ། །ཡིད་གཞུངས་ང་རྒྱལ་བློ་དང་འདོད་པ་སྒྲུབ། །མཐོང་བྱེད་མིག་ལ་གནས་ནས་གཟུགས་མཐོང་བྱེད། །མདོག་གསལ་ལྤགས་གནས་ལྤགས་མདོག་གསལ་བར་བྱེད། །བད་ཀན་རྟེན་བྱེད་བྲང་ལ་གནས་པ་སྟེ། །ལྷག་མ་རྣམས་ཀྱི་རྟེན་དང་ཆུ་ལས་བྱེད། །བད་ཀན་མྱག་བྱེད་མ་ཞུ་བ་ལ་གནས། །ཟས་སྐོམ་མྱག་ཅིང་འདྲུལ་བར་བྱེད་པ་ཡིན། །བད་ཀན་མྱོང་བྱེད་ལྕེར་གནས་རོ་ཚོར་བྱེད། །ཚིམ་བྱེད་མགོར་གནས་དབང་པོ་ཚིམ་པར་བྱེད། །བད་ཀན་འབྱོར་བྱེད་ཚིགས་དམིགས་ཀུན་ལ་གནས། །ཚིགས་རྣམས་འབྱོར་ཞིང་བརྐྱང་བསྐུམ་བྱེད་པ་ཡིན། །ཉེས་པའི་མཚན་ཉིད་རླུང་མཁྲིས་བད་ཀན་གསུམ། །རླུང་གི་མཚན་ཉིད་རྩུབ་ཅིང་ཡང་བ་དང༌། །གྲང་ཞིང་ཕྲ་ལ་སྲ་ཞིང་གཡོ་བ་ཡིན། །མཁྲིས་པའི་མཚན་ཉིད་སྣུམ་བཅས་རྣོ་ཞིང་ཚ། །ཡང་ཞིང་དྲི་མནམ་འཁྲུ་ཞིང་གཤེར་བ་ཡིན། །བད་ཀན་མཚན་ཉིད་སྣུམ་ཞིང་བསིལ་བ་དང༌། །ལྕི་རྟུལ་འཇམ་བརྟན་འབྱར་བག་ཅན་དུ་གནས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལུས་ཀྱི་མཚན་ཉིད་བསྟན་པའི་ལེའུ་སྟེ་ལྔ་པའོ།། །།

ལེའུ་དྲུག་པ། ལུས་ཀྱི་ལས་དང་དབྱེ་བ་སྟན་པ།

 དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ལུས་ཀྱི་ལས་ནི་ལུས་ངག་ཡིད་དང་གསུམ། །དགེ་དང་མི་དགེ་ལུང་མ་བསྟན་ལ་སྤྱོད། །བྱེ་བྲག་དབང་པོ་ལྔ་ཡིས་རང་ཡུལ་འཛིན། །ལུས་ཀྱི་དབྱེ་བ་རྟེན་དང་ན་ཚོད་དང༌། རང་བཞིན་ནད་ཀྱི་སྒོ་ནས་དབྱེ་བ་བཞི། །རྟེན་གྱིས་དབྱེ་ན་ཕོ་མོ་མ་ནིང་གསུམ། །ན་ཚོད་དབྱེ་བ་བཅུ་དྲུག་བར་བྱིས་པ། །དེ་ལས་ལུས་ཟུངས་དབང་པོ་གཟི་མདངས་སྟོབས། །འཕེལ་འགྱུར་བདུན་ཅུའི་བར་དུ་དར་མ་སྟེ། །དེ་ལས་ཟད་པ་ཕན་ཆད་རྒན་པོ་ཡིན། །རང་བཞིན་རྐྱང་པ་ལྡན་དང་འདུས་པ་བདུན། །དེ་ལ་རླུང་གིས་བསྐྱེད་པའི་མི་རྣམས་ནི། །དབྱིབས་སྒུར་ཤ་སྐེམ་མདོག་སྔོ་སྨྲ་བ་མང༌། །གྲང་ལྷགས་མི་བཟོད་འགྲོ་ཚེ་སྒྲ་དང་བཅས། །ནོར་ཆུང་ཚེ་ཐུང་གཉིད་སྲབ་ལུས་བོངས་ཆུང༌། །གླུ་དང་དགོད་དང་འཐབ་མོ་མདའ་ལ་དགའ། །མངར་སྐྱུར་ཁ་ཚའི་རོ་ལ་སྲེད་པ་སྟེ། །བྱ་རྒོད་ཁྭ་ཝའི་མཚན་ཉིད་ལྡན་པ་ཡིན། །མཁྲིས་པའི་རང་བཞིན་སྐོམ་དད་བཀྲེས་ཤས་ཆེ། །སྐྲ་ལུས་མདོག་སེར་བློ་རྣོ་ང་རྒྱལ་ཆེ། །རྔུལ་ཆེ་དྲི་ང་ཚེ་ནོར་ལུས་བོངས་འབྲིང༌། །མངར་ཁ་བསྐ་བསིལ་ཟས་ལ་སྲེད་པ་སྟེ། །སྟག་སྤྲེ་གནོད་སྦྱིན་མཚན་ཉིད་ལྡན་པ་ཡིན། །བད་ཀན་རང་བཞིན་ཅན་ནི་ལུས་བསིལ་ཞིང༌། །རུས་ཚིགས་མི་མངོན་ཤ་རྒྱས་ཁ་དོག་དཀར། །དབྱིབས་དགྱེ་བཀྲེས་སྐོམ་ཉོན་མོངས་ཐན་པ་བཟོད། །ལུས་ཚོ་ཚེ་རིང་ནོར་མང་གཉིད་མཐུག་ཅིང༌། །ཞེ་སྡང་འདམ་རིང་རང་བཞིན་ངང་རྒྱུད་བཟང༌། །ཚ་སྐྱུར་བསྐ་རྩུབ་ཟས་ལ་སྲེད་པ་སྟེ། །སེང་གེ་ཁྱུ་མཆོག་མཚན་ཉིད་ལྡན་པ་ཡིན། །ལྡན་དང་འདུས་པ་འདྲེས་ལས་ཤེས་པར་བྱ། །ནད་ཀྱིས་དབྱེ་བ་རྣམ་པར་མ་གྱུར་གྱུར། །རྣམ་པར་མ་གྱུར་ལུས་གནས་ཐ་མལ་ལ། །ནད་མེད་གནས་དང་རིང་དུ་འཚོ་བར་བྱ། །རྣམ་གྱུར་ནད་ཀྱིས་བཅོམ་པའི་ལུས་དེ་གསོ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལུས་ཀྱི་ལས་དང་དབྱེ་བ་བསྟན་པའི་ལེའུ་སྟེ་དྲུག་པའོ།། །།

ལེའུ་བདུན་པ། ལུས་ཀྱི་འཇིག་ལྟས་བསྟན་པ།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག ལུས་ཀྱི་འཇིག་ལྟས་རྣམ་པ་བཞི་ཡིན་ཏེ། །རིང་དང་ཉེ་བ་མ་ངེས་ངེས་པའོ། །རིང་ལྟས་ཕོ་ཉ་རྨི་ལམ་རྣམ་འགྱུར་གསུམ། །ཕོ་ཉ་ཡ་མཚན་ཅན་དང་དགེ་སྦྱོང་དང༌། །རིགས་མཐུན་པ་ནི་ནད་པ་སོས་པའི་རྟགས། །དེ་ལས་ལྡོག་པ་འགྲུབ་པར་མི་འགྱུར་ཏེ། །འཇིགས་རིངས་དངངས་ཤིང་རྡོ་དང་བོང་བ་ཉེད། །རིང་ནས་འབོད་ཅིང་སྡིག་པའི་ལས་ལ་སྤྱོད། །བཀྲ་མི་ཤིས་པའི་རྒྱན་དང་སྨྲ་བརྗོད་བྱེད། །དེ་ལྟ་བུ་ཡི་ཕོ་ཉས་ལས་མི་འགྲུབ། །སྨན་པ་སེམས་རྩུབ་མི་ཤིས་སྨྲ་བ་དང༌། །གཅོད་བཤིག་མཚུན་གཏོར་སྦྱིན་སྲེག་བྱེད་པའི་དུས། །ཕོ་ཉ་འོངས་པ་ནད་པ་འཆི་བའི་ལྟས། །ཚེས་དྲུག་བཞི་དགུ་ཉི་ཟླ་གཟའ་ཟིན་དང༌། །གཟའ་སྐར་ངན་དང་མཚན་མོ་ལམ་འཇུག་ངན། །འགྲོ་ཚེ་ལམ་དུ་ཆད་ཚིག་ཆག་པ་དང༌། །ངུ་བསད་སྨྲ་བ་ཐོས་དང་མཐོང་བ་དང༌། །བྱི་ལ་སྤྲེ་འུ་སྲམ་སྦྲུལ་ལམ་བཅད་ཅིང༌། །བཀྲ་མི་ཤིས་པ་གང་མཐོང་ངན་པའི་ལྟས། །དགེ་བ་འབྲུ་དང་ཞོ་སོགས་སྣོད་གང་དང༌། །དྲིལ་བུ་མར་མེ་མེ་ཏོག་འབྲས་ཡོས་ཟན། །ལྷ་ཡི་སྐུ་དང་ལུས་ཀྱི་རྒྱན་དཀར་པོ། །ཆོས་སྤྱོད་པ་དང་རྒྱལ་མཚན་བསྒྲེང་བ་དང༌། །མེ་འབར་རྟ་ལུག་བ་སོགས་ཕྲུག་གུར་བཅས། །ཡིད་དུ་འོང་བའི་སྒྲ་འམ་བཟའ་བཏུང་རྒྱན། །དེ་དག་ལམ་དུ་མཐོང་ངམ་ཁྱིམ་དུ་འཇུག །དགེ་ལྟས་ནད་པ་སོས་པའི་མཚན་ཉིད་ཡིན། །ཞོ་ཕྲུམ་ལ་སོགས་ཁྱིམ་ནས་ཕྱིར་འབྱུང་དང༌། །རླུང་མེད་མེ་ཤི་སྣོད་ཆག་ངན་པའི་ལྟས། །རྨི་ལམ་བྱི་ལ་སྤྲེའུ་སྟག་དང་ཝ། །རོ་ལ་ཞོན་རྨིས་འཆི་བདག་ཟིན་པའི་རྟགས། །མ་ཧེ་རྟ་ཕག་བོང་བུ་རྔ་མོ་ལ། །གཅེར་བུར་ཞོན་ནས་ལྷོ་ཕྱོགས་འགྲོ་རྨིས་འཆི། །སྤྱི་བོར་ལྕུག་མ་སྐྱེས་ཏེ་བྱ་ཚང་བཅས། །ཏཱ་ལ་ཚེར་མ་ཅན་ཤིང་སྙིང་གར་སྐྱེས། །པདྨ་ཕྱུང་དང་གཡང་ལྷུང་དུར་ཁྲོད་ཉལ། །མགོ་ཆག་བྱ་རོག་ཡི་དྭགས་རྨེ་ཅན་བསྐོར། །རྐང་ལྤགས་ལྷུང་དང་མ་ཡི་མངལ་དུ་འཇུག །ཆུས་ཁྱེར་འདམ་བྱིང་ཉ་ཡིས་མིད་པ་དང༌། །ལྕགས་གསེར་རྙེད་དང་ཚོང་དང་འཐབ་མོ་ཕམ།།བྲོ་བའི་ཁྲལ་དེད་བག་མ་ལེན་པ་དང༌། །གཅེར་བུར་འདུག་དང་སྐྲ་དང་ཁ་སྤུ་བྲེགས། །གཤིན་དང་ལྷན་ཅིག་ཆང་འཐུང་དེས་འདྲུད་དང༌། །གོས་དང་ཕྲེང་བ་དམར་པོས་བརྒྱན་པ་ཡི། །གཤིན་པོ་དག་དང་ལྷན་ཅིག་གར་བྱེད་པ། །དེ་དག་འཆི་བདག་དབང་དུ་སོང་བའི་ལྟས། །དེ་ལ་སོགས་ཏེ་རྨི་ལམ་མི་བཟང་བ། །ཡིད་འཇུག་བུ་ག་ནད་ཀྱིས་བཀག་ཕྱིར་མཐོང༌། །རྒྱུན་དུ་རྨི་བའི་ནད་པ་འཆི་འགྱུར་ཏེ། །ནད་མེད་མ་ངེས་རིམ་གྲོས་ཐར་བར་འགྱུར། །མཐོང་ཐོས་མྱོང་དང་གསོལ་བ་བཏབ་པ་དང༌། །གྲུབ་པ་ནད་ལས་བྱུང་དང་རྣམ་པ་དྲུག །མཚན་སྟོད་རྨི་ལམ་བརྗེད་ངས་འབྲས་བུ་མེད། །ཐོ་རངས་མཐོང་དང་གསལ་ན་འབྲས་བུ་འབྱིན། །ལྷ་དང་ཁྱུ་མཆོག་སྐྱེས་བུ་གྲགས་པ་ལྡན། །མེ་འབར་མཚོ་དང་ལུས་ཁྲག་མི་གཙང་བྱུགས། །གོས་དཀར་གྱོན་དང་འཕན་གདུགས་ཤིང་འབྲས་རྙེད། །རི་བོ་ཁང་བཟང་འབྲས་བཅས་ཤིང་ལ་འཛེག །སེང་གེ་གླང་ཆེན་རྟ་དང་བ་ལང་ཞོན། །ཆུ་བོ་མཚོ་རྒལ་བྱང་ཤར་འགྲོ་བ་དང༌། །ཉམ་ང་ལས་ཐར་དགྲ་བོ་ཕམ་པ་དང༌། །ལྷ་དང་ཕ་མས་མཆོད་པ་བྱེད་པ་རྣམས། །གང་རྨིས་ཚེ་རིང་ནད་མེད་ནོར་རྙེད་འགྱུར། །ཐ་མལ་རྣམ་འགྱུར་འཆི་བའི་ལྟས་བསྟན་པ། །སྨན་པ་སྨན་དང་བླ་མ་མཛའ་བཤེས་སྡང༌། །རྒྱུ་མེད་ཡིད་གཞུངས་མཛེས་རྒྱས་དཔལ་ཐོབ་བམ། །དེ་ལས་གོ་ལྡོག་འཆི་བར་འགྱུར་བའི་ལྟས། །རྟག་ཏུ་མདངས་ངན་བློ་སེམས་མི་བདེ་ཞིང༌། །གཏོར་མ་བྱ་རོག་བྱིན་ན་མི་ཟ་དང༌། །ཁྲུས་བྱས་སྙིང་ག་མྱུར་སྐམ་ཆུ་མི་ཆགས། །གང་གི་སོར་མོ་དྲངས་པས་སྒྲ་མི་འབྱུང༌། །ཟས་ཟོས་སྟོབས་ཆུང་ལུས་ཀྱི་དྲི་མ་འགྱུར། །ཤིག་སྲོ་འདུ་འམ་ཡང་ན་སྤོང་འགྱུར་འཆི། །འདོད་རྨོངས་ཁྲོ་བ་སྔར་ལས་གོ་ལྡོག་ཅིང༌། །སྔར་སྤྱོད་སྐྱོན་ཡོན་རྣམ་པ་གཞན་འགྱུར་ན། །མི་དེ་འཆི་བདག་དབང་དུ་སོང་ཞེས་བྱ། །ཉི་མ་མེ་ལོང་ཆུ་དང་ནམ་མཁའ་ལ། །གཟུགས་བརྙན་མགོ་བཅད་ཡན་ལག་མེད་ན་འཆི། །དེ་ནས་ཉེ་བའི་ལྟས་ལ་རྣམ་གཉིས་ཏེ། །ཉེ་བ་དང་ནི་ཤིན་ཏུ་ཉེ་བའོ། །ཉེ་བའི་ལྟས་ལ་དུག་མཚོན་མ་ཕོག་པར། །བུ་ག་དགུ་ནས་ཁྲག་འཛག་སྨྲས་འཕྲལ་བརྗེད། །མཇེ་ནུབ་རླིག་པ་འཕྱང་ངམ་གོ་ལྡོག་དང༌། །ལུད་པ་སྦྲིད་པ་སྔོན་མེད་སྒྲ་འབྱུང་དང༌། །མར་མེ་ཤི་བའི་དྲི་མ་མི་ཚོར་དང༌། །སྐྲ་ཕྱིས་ཚོར་མེད་སྤྱི་བོར་སྣུམ་བཅས་སྣང༌། །སྐྲ་སྨིན་གསར་དུ་མཚམས་བྱེ་རྩུབ་འཁྱིལ་དང༌། །དཔྲལ་བ་ཆུ་སོར་ཟླ་ཚེས་རྩ་རིས་སྣང༌། །དབང་པོ་ཡུལ་ལྔ་ཐ་མལ་རྒྱུ་མེད་པར། །རྣམ་པར་འགྱུར་ཏེ་ཡོད་མེད་གོ་ལྡོག་སྣང༌། །ལག་ངར་སྨིན་དབྲག་གཏད་པ་མི་མཐོང་དང༌། །མིག་བཙིར་འོད་མེད་རི་བོང་འབོས་ནོན་འདྲ། །ཁུང་དུ་བྲོས་སམ་རྒྱལ་མོའི་མདངས་ཉམས་འཆི། །རྣ་བ་ཧྲིད་འབྱར་ཨུཏྟ་ཆད་པ་དང༌། །མགོ་བོའི་རླངས་པའི་གྲིབ་མ་མེད་ན་འཆི། །སྣ་བུག་གདངས་ཤིང་བ་སྐྱ་ཆགས་པ་དང༌། །ལྕེ་གཞུང་ནག་ལ་སྐམ་ཐུང་སྨྲ་མི་ཤེས། །མ་མཆུ་འཕྱངས་དང་ཡ་མཆུ་བརྫེས་པ་དང༌།།གདོང་ལ་རྡུལ་ཆགས་དབུགས་གྲང་སོ་དྲེག་ཆགས། །གྱེན་དུ་དབུགས་བརྩེག་དྲོད་ཡལ་འཆི་བ་ཡིན། །ལུས་པོ་གྲང་ལ་ཚ་བ་སྐྱེ་བ་དང༌། །གྲང་བས་གདུངས་ནས་ཚ་བ་སྤོང་བ་དང༌། །དེ་བཞིན་ཚ་བས་གདུངས་ནས་གྲང་བ་སྤོང༌། །ཆོ་ག་བཞིན་བྱས་ནད་ལ་སྐྱེད་མེད་ཅིང༌། །ཆོ་ག་ལོག་པས་བདེ་བར་གནས་སྙམ་བྱེད། །དེ་དག་འཆི་བའི་ལྟས་སུ་བཤད་པ་ཡིན། །ཤིན་ཏུ་ཉེ་བ་འབྱུང་བ་རྣམ་པ་ལྔ། །དབང་པོ་ལྔ་པོ་རིམ་པས་ཐིམ་པ་སྟེ། །ས་ནུས་ཆུ་ལ་ཐིམ་པས་གཟུགས་མི་མཐོང༌། །ཆུ་ནུས་མེ་ལ་ཐིམ་པས་བུ་ག་སྐམ། །མེ་ནུས་རླུང་ལ་ཐིམ་པས་དྲོད་རྣམས་སྡུད། །རླུང་ནུས་མཁའ་ལ་ཐིམ་པས་ཕྱི་དབུགས་ཆད། །མིག་གི་དབང་པོ་ཉམས་པར་གྱུར་པ་ཡིས། །གཟུགས་མི་གསལ་ཞིང་སྒྲ་ལ་ཐིམ་པར་འགྱུར། །རྣ་བའི་དབང་པོ་ཉམས་པར་གྱུར་པ་ཡིས། །སྒྲ་མི་གསལ་ཞིང་དྲི་ལ་ཐིམ་པར་འགྱུར། །སྣ་ཡི་དབང་པོ་ཉམས་པར་གྱུར་པ་ཡིས། །དྲི་མི་གསལ་ཞིང་རོ་ལ་ཐིམ་པར་འགྱུར། །ལྕེ་ཡི་དབང་པོ་ཉམས་པར་གྱུར་པ་ཡིས། །རོ་མི་གསལ་ཞིང་རེག་ལ་ཐིམ་པར་འགྱུར། །ལུས་ཀྱི་དབང་པོ་ཉམས་པས་རེག་མི་ཚོར། །མ་ངེས་འཆི་ལྟས་ནད་ཚུལ་མང་པོ་ལས། །འཆི་བའི་ལྟས་རྣམས་སྣང་བར་གྱུར་ན་ཡང༌། །ནད་ཞི་བས་ནི་འཆི་ལྟས་ཞི་འགྱུར་རོ། །ཞི་ཡང་ལྟས་བརྟན་གནས་ན་ངེས་པར་འཆི། །ཕྱི་ནང་སྲོག་ཟུངས་ཤ་ཟས་རྩ་དང་གསུམ། །ཤོར་བའི་ནད་པ་གང་ཡིན་འཆི་བར་ངེས། །ནད་ལ་ཆོ་ག་སྣ་ཚོགས་བསྒྲུབས་བྱས་ཀྱང༌། །བཅོས་སྐྱེད་མེད་པ་འཆི་བར་ངེས་པ་ཡིན། །དེ་ལྟར་ཕུང་པོ་འཇིག་པའི་འཆི་ལྟས་རྣམས། །ནད་དང་ལུས་ཟུངས་དྲི་མ་འཁྲུགས་གྱུར་ནས། །གཅིག་གཤེད་གཅིག་གིས་བྱས་ཏེ་སྲོག་འདོར་ཕྱིར། །འབྱུང་འགྱུར་དུས་ཀྱི་རི་རབ་འཇིག་དང་མཚུངས། །འཆི་ལྟས་མི་ཤེས་གསོ་བ་བླང་དོར་འགག །དེ་མ་ཤེས་པས་སྙན་གྲགས་ཐོབ་མ་ཡིན། །དེ་ཕྱིར་མཁས་འདོད་འཆི་ལྟས་རྟོགས་པར་བྱ། །རྨི་ལམ་རྣམ་འགྱུར་རིང་དང་མ་ངེས་ལྟས། །ཚོགས་གསོག་ཀློག་སྒྲུབ་ཡི་དམ་སུམ་འགྱུར་བཟློག །ཉེ་དང་ངེས་པའི་ལྟས་ལ་འཆི་བསླུ་བྱ། །ཤིན་ཏུ་ཉེ་བའི་ལྟས་ལ་ཟློག་ཐབས་མེད། །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལུས་ཀྱི་འཇིག་ལྟས་བསྟན་པའི་ལེའུ་སྟེ་བདུན་པའོ།། །། ལེའུ་བརྒྱད་པ། ནད་ཀྱི་རྒྱུ་བསྟན་པ། དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །འཕེལ་འགྲིབ་ནད་ཀྱི་གནས་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག །གང་གསོ་ཕུང་པོ་དེ་ལས་བྱུང་བ་ཡི། །འཕེལ་འགྲིབ་ནད་ཀྱི་གནས་ལ་བསླབ་བྱ་ན། །རྒྱུ་རྐྱེན་ཞུགས་ཚུལ་གནས་དང་མཚན་ཉིད་དང༌། །དབྱེ་བ་སོ་སོའི་དོན་དང་བདུན་དུ་བཤད། །དང་པོ་རྒྱུ་ལ་རིང་རྒྱུ་ཉེ་རྒྱུ་གཉིས། །རིང་བའི་རྒྱུ་ལ་སྤྱི་དང་ཁྱད་པར་གཉིས། །དང་པོ་ནད་འཁྲུགས་སྣ་ཚོགས་ཚུལ་ཅན་གྱིས། །གྲངས་མེད་གྱུར་པས་ལུས་ཉིད་གཟིར་གྱུར་པ། །དེ་རྒྱུ་རེ་རེར་བསྟན་པར་མི་ནུས་པས། །དེ་བས་ནད་ཀུན་སྤྱི་རྒྱུ་བརྗོད་པ་ནི། །ནད་རྣམས་ཀུན་གྱི་རྒྱུ་ནི་གཅིག་པུ་སྟེ། །བདག་མེད་དོན་མ་རྟོགས་པས་མ་རིག་ཅེས། །དཔེར་ན་བྱ་ནི་མཁའ་ལ་ལྡིང་གྱུར་ཀྱང༌། །རང་གི་གྲིབ་མ་དེ་དང་མི་འབྲལ་ཞིང༌། །འགྲོ་ཀུན་བདེ་བར་གནས་ཤིང་སྤྱོད་ན་ཡང༌། །མ་རིག་ལྡན་པས་ནད་དང་འབྲལ་མི་སྲིད། །ཁྱད་པར་རྒྱུ་ནི་མ་རིག་ལས་བྱུང་བའི། །འདོད་ཆགས་ཞེ་སྡང་གཏི་མུག་དུག་གསུམ་ལས། །འབྲས་བུ་རླུང་མཁྲིས་བད་ཀན་ཉེས་པ་སྐྱེད། །ཉེ་རྒྱུ་རླུང་དང་མཁྲིས་པ་བད་ཀན་གསུམ། །རྣམ་པར་མ་གྱུར་ནད་ཀྱི་རྒྱུར་འགྱུར་ལ། །རྣམ་འགྱུར་མ་སྙོམས་ནད་ཀྱི་ངོ་བོ་ཡིན། །ལུས་དང་སྲོག་ལ་གནོད་ཅིང་གདུང་བས་སོ། །མཁྲིས་པ་འཁྲུགས་པས་ལུས་ཟུངས་བསྲེག་པར་བྱེད། །འདི་ནི་མེ་ཡི་རང་བཞིན་ཚ་བས་ན། །སྨད་ན་གནས་ཀྱང་སྟོད་དུ་འབར་བར་བྱེད། །ཚ་བའི་ནད་ཀུན་འདི་ལས་མ་སྐྱེས་མེད། །བད་ཀན་འཁྲུགས་པས་ལུས་ཀྱི་མེ་དྲོད་འཇོམས། །འདི་ནི་ས་ཆུའི་རང་བཞིན་ལྕི་ལ་བསིལ། །སྟོད་ན་གནས་ཀྱང་སྨད་དུ་ལྷུང་བར་བྱེད། །གྲང་བའི་ནད་ཀུན་འདི་ལས་མ་སྐྱེས་མེད། །རླུང་ནི་ཚ་གྲང་གཉིས་ཀའི་ཁྱབ་བྱེད་དེ། །ཉི་མར་ལྡན་ན་བསྲེག་པའི་གྲོགས་བྱེད་ཅིང༌། །ཟླ་བར་ལྡན་ན་བསིལ་བའི་གྲོགས་བྱེད་ལ། །སྟོད་སྨད་ཕྱི་ནང་མ་ལུས་ཁྱབ་པར་རྒྱུ། །ཚ་གྲང་གཉིས་ཀ་འཁྲུག་ཅིང་སློང་བར་བྱེད། །དེ་བས་རླུང་ནི་ནད་ཀུན་མ་ལུས་རྒྱུ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ནད་ཀྱི་རྒྱུ་བསྟན་པའི་ལེའུ་སྟེ་བརྒྱད་པའོ།། །། ལེའུ་དགུ་པ། ནད་ཀྱི་རྐྱེན་བསྟན་པ། [སྤེལ་དུས། 11-10-04] [རྩོམ་ཡོངས་ཁུངས། ངེད་དྲ་བ།] [རྩོམ་སྒྲིག་པ། admin] [རྡེབ་ཚད། 24]

   དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །རྒྱུ་ལ་སྐྱེད་པར་བྱེད་པའི་རྐྱེན་གསུམ་སྟེ། །སྐྱེ་མཆེད་གསོག་ལྡང་སློང་རྐྱེན་རྣམ་པ་གསུམ། །སྐྱེ་ཞིང་མཆེད་པར་བྱེད་པ་སྐྱེ་མཆེད་དང༌། །གསོག་ཅིང་ལྡང་བར་བྱེད་པས་གསོག་ལྡང་ཞེས། །བསགས་པ་སློང་བར་བྱེད་པ་སློང་རྐྱེན་ཡིན། །སྐྱེ་མཆེད་དུས་དང་དབང་པོ་སྤྱོད་ལམ་རྣམས། །དམན་ལྷག་ལོག་པས་ནད་རྣམས་སྐྱེད་པར་བྱེད། །དུས་ནི་ཚ་དུས་གྲང་དུས་ཆར་དུས་གསུམ། །དམན་པ་ཚ་གྲང་ཆར་པ་ཆུང་བ་སྟེ། །ལྷག་པ་ཆེ་དྲགས་ལོག་པ་མེད་པའོ། །དབང་པོ་ལྔ་དང་དེ་ཡི་ཡུལ་ལྔ་པོ། །ཆུང་ངམ་དེ་ལ་མི་སྦྱོར་དམན་པ་སྟེ། །ཤས་ཆེར་གཏད་པ་ལྷག་པའི་སྦྱོར་བ་ཡིན། །ཤིན་ཏུ་ཉེ་དང་རིང་བ་ཆེའམ་ཆུང༌། །འཇིགས་དང་མི་སྡུག་ལོག་པའི་སྦྱོར་བར་བཤད། །སྤྱོད་ལམ་ལུས་ངག་ཡིད་དང་གསུམ་ཡིན་ཏེ། །ཆུང་ངམ་མི་སྦྱོར་འཇུག་པ་དམན་པས་དམན། །རྟུན་ངས་འཇུག་པ་ལྷག་པའི་སྦྱོར་བ་སྟེ། །ཤུགས་བཀག་བཙིར་གཅུས་མི་དགེ་ལོག་སྦྱོར་རོ། །གསོག་ལྡང་ཞི་གསུམ་རྒྱུ་དང་ངོ་བོ་དུས། །རྒྱུ་ནི་རྩུབ་སོགས་དྲོ་ལྡན་རླུང་གསོག་ལ། །གྲང་བས་ལྡང་ཞིང་སྣུམ་དྲོས་ཞི་བར་འགྱུར། །དེ་བཞིན་རྣོ་སོགས་བསིལ་ལྡན་མཁྲིས་པ་གསོག །ཚ་བས་ལྡང་ཞིང་རྟུལ་སོགས་བསིལ་ལྡན་ཞི། །ལྕི་སྣུམ་བསིལ་ལྡན་བད་ཀན་གསོག་འགྱུར་གྱི། །དྲོ་བས་ལྡང་ཞིང་རྩུབ་སོགས་ཀྱིས་ཞི་འགྱུར། །ངོ་བོ་རང་གནས་འཕེལ་བ་གསོག་པ་ཡིན། །རྒྱུ་ལས་འཁྲུག་བྱེད་མི་མཐུན་ཡོན་ཏན་འདོད། །ལྡང་བ་ལོག་པའི་ལམ་ཞུགས་རང་རྟགས་སྟོན། །རང་གནས་མཉམ་གནས་ནད་མེད་ཞི་བ་ཡིན། །དུས་ནི་སོ་ག་སོགས་གསུམ་རླུང་གི་སྟེ། །མཁྲིས་པ་དབྱར་དང་བད་ཀན་དགུན་སྨད་དོ། །སོ་གའི་དུས་སུ་ཡང་ལ་རྩུབ་པ་ཡི། །ཡུལ་དང་ལུས་དང་ཟས་སྤྱོད་ཀུན་མཚུངས་པས། །རླུང་གསོག་བྱེད་ཀྱི་དྲོ་བས་ལྡང་མི་འགྱུར། །དབྱར་དུས་ཆར་རླུང་གྲང་བ་སྐྱེས་པས་ལྡང༌། །སྟོན་དུས་སྣུམ་ལ་དྲོ་བས་ཞི་བར་འགྱུར། །དབྱར་དུས་སྣུམ་བསིལ་མཁྲིས་གསོག་ལྡང་མི་འགྱུར། །སྣུམ་དྲོས་སྟོན་ལྡང་དགུན་སྟོད་བསིལ་བས་ཞི། །དགུན་སྨད་བསིལ་སྣུམ་ལྕི་བས་བད་ཀན་གསོག །བསྒོངས་པས་ལྡང་མིན་དཔྱིད་དུས་ཉི་མའི་འོད། །དྲོ་བས་ལྡང་ཞིང་སོ་ག་ཡང་རྩུབ་ཞི། །འོན་ཀྱང་འབྱུང་བའི་དུས་ལ་མ་བབ་ཀྱང༌། །ཟས་སྤྱོད་དབང་གིས་འཕྲལ་ལ་བྱེད་པ་ཡོད། །ཁྱད་པར་སློང་རྐྱེན་ཐུན་མོང་ཁྱད་པར་གཉིས། །ནད་ཀུན་སློང་བར་བྱེད་པའི་ཐུན་མོང་རྐྱེན། །འབྱུང་བའི་དུས་དང་གདོན་དུག་མི་འཕྲོད་ཟས། །གསོ་བ་ལོག་དང་ལས་ངན་སད་ལས་འབྱུང༌། །ཁྱད་པར་ཁ་དང་ཡང་རྩུབ་བསྟེན་དྲགས་དང༌། །ཆགས་པས་དུབ་དང་ལྟོ་ཆག་གཉིད་ཆག་དང༌། །ལྟོ་སྟོང་ལུས་ངག་བྱ་བ་དྲག་ཤུལ་དང༌། །ཁྲག་མང་ཟགས་དང་འཁྲུ་སྐྱུག་དྲག་པོས་བཏབ། །བསེར་བུས་བུས་དང་ག་ཆད་ངུས་པ་དང༌། །མྱ་ངན་སེམས་ལས་ཁ་ལས་ཆེས་པ་དང༌། །བཅུད་མེད་ཁ་ཟས་ཡན་ལ་གཏད་པ་དང༌། །ཤུགས་བཀག་པ་དང་ནན་གྱིས་བཙིར་བ་ཡི། །རྐྱེན་དེ་རྣམས་ཀྱིས་རླུང་ནད་ལྡང་བར་བྱེད། །ཚ་བའི་རོ་དང་རྣོ་ཚ་སྣུམ་བསྟེན་དྲགས། །རྒྱུད་ལ་ཞེ་སྡང་དྲག་པོ་སྐྱེས་པ་དང༌། །ཚད་དགུང་གཉིད་ལོག་འདུག་རྗེས་དྲག་ཤུལ་བྱས། །མི་ཐེག་ཁུར་དང་ས་སྲན་བརྐོས་པ་དང༌། །གཞུ་སྲན་བཀང་དང་འཛིང་ག་བཀྱེ་བ་དང༌། །བང་དང་འགྲོ་ལས་དག་གིས་ཉེན་པ་དང༌། །རྟ་ཡིས་བརྡབས་དང་གཡང་ལ་ལྷུང་བ་དང༌། །འཐིབས་འོག་ཚུད་དང་རྡོ་དབྱུག་བརྡུངས་པ་དང༌། །ཤ་མར་བུ་རམ་ཆང་སོགས་བཟའ་བཏུང་དྲགས། །རྐྱེན་དེ་རྣམས་ཀྱིས་མཁྲིས་ཚད་སློང་བར་བྱེད། །ཁ་མངར་ལྕི་བསིལ་སྣུམ་བསྟེན་དྲགས་པ་དང༌། འགྲངས་རྗེས་དལ་བར་འདུག་དང་ཉིན་གཉིད་ལོག །རླན་སྟེང་ཉལ་དང་ཆུར་ཞུགས་གོས་སྲབ་འཁྱགས། །གྲོ་སྲན་གསར་ཐོག་སེར་ཅན་སུངས་པ་དང༌། །ར་སྐོམ་ཤ་རིད་ཚིལ་བུ་འབྲུ་མར་དང༌། །རྩི་མར་རུལ་པ་ལོ་བཤུར་ལ་ཕུག་རས། །རི་སྒོག་ལ་སོགས་རྗེན་ཟས་མཐའ་དག་དང༌། མ་འཚོས་འཚིག་དང་ཁེངས་པོའི་ཟས་རྣམས་དང༌། །ར་ཡི་འོ་རློན་ཞོ་དར་ཆུ་གྲང་ཇ། །བཟའ་བཏུང་ཆེས་ཏེ་ཚད་ལས་འདས་པ་འམ། །སྔ་མ་མ་ཞུ་ཕྱི་མ་ཟོས་པ་ཡི། །རྐྱེན་དེ་རྣམས་ཀྱིས་བད་ཀན་གྲང་ནད་སློང༌། །དེ་དག་འདྲེས་ལས་ལྡན་འདུས་ནད་དུ་འགྱུར། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ནད་ཀྱི་རྐྱེན་བསྟན་པའི་ལེའུ་སྟེ་དགུ་པའོ།། །།
  དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །དེ་ལྟར་རྒྱུ་ལ་རྐྱེན་གྱིས་བསྐྱེད་བྱས་ནས། །འཇུག་པའི་ཚུལ་ནི་འཕང་བྱའི་ཡུལ་དེ་ལ། །འཕེན་པར་བྱེད་པའི་རྐྱེན་ནི་རྣམ་བཞི་ཡིས། །འཕེན་བྱ་གཅིག་ལ་ཕོག་དང་འབྲེལ་བས་དཔག །དེ་ཡང་རླུང་ནི་རུས་པ་ལ་གནས་ཏེ། །མཁྲིས་པ་ཁྲག་དང་རྔུལ་ལ་གནས་པ་ཡིན། བད་ཀན་ལྷག་མ་རྣམས་ལ་གནས་པའོ། །དེ་ལྟར་ཕན་ཚུན་རྟེན་དང་བརྟེན་པའི་ཚུལ། །ཉེས་པ་འཁྲུགས་པས་ལུས་ཟུངས་ཉེན་བྱས་ཏེ། །གཉིས་ཀས་དྲི་མ་ལ་ནི་གནོད་པར་བྱེད། །དེ་ཡང་ནད་དང་རྒྱུ་མཐུན་ཟས་ཀྱི་བཅུད། །ཁྱབ་བྱེད་རླུང་གིས་བུ་ག་རྣམས་སུ་གཏོར། །དེ་ཚེ་དྭངས་མ་གང་དུ་ཆགས་གྱུར་པ། །བུ་གའི་སྐྱོན་དང་དེ་དུས་སྤྱོད་ལམ་གྱིས། །མཁའ་ལ་སྤྲིན་འདུས་ཆར་པ་འབབ་པ་བཞིན། །རང་རང་གནས་སུ་འཕེལ་ཞིང་གསོག་པར་བྱེད། །བསགས་པ་རྐྱེན་ཕྲད་ངེས་པ་ཁོ་ནར་ལྡང༌། །ལམ་དྲུག་ཞུགས་ནས་བདེ་མེད་ནད་འབྱུང་འགྱུར། །དེ་ལྟར་ཞུགས་ནས་གང་དུ་བརྟེན་པའི་གནས། །ཞུ་བའི་གནས་དང་དཔྱི་མིག་རུས་ཚིགས་དང༌། །རེག་བྱ་རྣ་བ་རླུང་གི་གནས་ཡིན་ཏེ། །ཁྱད་པར་ཞུ་གནས་ལོང་ན་གནས་པ་ཡིན། །མཁྲིས་གནས་ལྟེ་བ་ཕོ་བ་ཁྲག་དང་རྔུལ། །དྭངས་མ་ཆུ་སེར་མིག་དང་པགས་པ་སྟེ། །ཁྱད་པར་ཞུ་དང་མ་ཞུའི་བར་ན་གནས། །བད་ཀན་བྲང་དང་མགུལ་པ་གློ་བ་མགོ། །དྭངས་མ་ཤ་ཚིལ་རྐང་ཁུ་བཤང་གཅི་དང༌། །སྣ་ལྕེ་ཁྱད་པར་མ་ཞུའི་གནས་ལ་གནས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ནད་འཇུག་ཚུལ་གྱི་ལེའུ་སྟེ་བཅུ་པའོ།། །།
  དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ཉེས་པའི་མཚན་ཉིད་འཕེལ་ཟད་འཁྲུགས་པ་གསུམ། །འཕེལ་ཟད་ནད་ཟུངས་དྲི་མ་རྣམ་གསུམ་སྟེ། །དེ་ལ་རྒྱུ་དང་མཚན་མ་རྟགས་བསྟན་པའོ། །དང་པོ་ཉེས་པ་འཕེལ་དང་ཟད་པའི་རྒྱུ། །ཟས་སྤྱོད་མི་འདོད་སློང་དང་མི་འཕྲོད་འཕྲོད། །སྤངས་བྱིན་དེ་དང་དེས་འཕེལ་ཟད་པར་འགྱུར། །གཉིས་པ་ལུས་ཀྱི་མེ་དྲོད་རང་གནས་འདུག །ཆ་ཤས་ལུས་ཟུངས་ཀུན་ལ་གནས་པ་དེ། །བྲི་དང་འབར་བས་འཕེལ་དང་ཟད་པར་འགྱུར། །དང་པོས་ཕྱི་མ་རྒྱས་དང་འགྲིབ་བྱེད་ཡིན། །དྲི་མ་ཐོགས་དང་ཤིན་ཏུ་འབྱུང་ལས་ཤེས། །དེ་རྟགས་རླུང་འཕེལ་སྐེམ་ནག་དྲོད་ལ་དགའ། །ལུས་འདར་ལྟོ་བ་སྦོ་ཞིང་བཤང་བ་སྲི། །སྨྲ་མང་མགོ་འཁོར་སྟོབས་གཉིད་དབང་པོ་ཉམས། །མཁྲིས་པ་འཕེལ་བས་བཤང་གཅི་ལྤགས་མིག་སེར། །བཀྲེས་སྐོམ་ལུས་ཚ་གཉིད་ཆུང་འཁྲུ་བར་བྱེད། །བད་ཀན་འཕེལ་བས་དྲོད་ཉམས་ཟས་མི་འཇུ། །ལུས་ལྕི་མདོག་དཀར་ཁོང་སྙོམ་ཡན་ལག་ལྷོད། །མཆིལ་མང་ལུད་པ་གཉིད་ཆེ་དབུགས་མི་བདེ། །དྭངས་མ་འཕེལ་བས་བད་ཀན་དང་འདྲ་ལ། །ཁྲག་འཕེལ་མེ་དབལ་ཁོང་འབྲས་མཆེར་པའི་ནད། །མཛེ་སྐྲན་ཁྲག་མཁྲིས་ནད་དང་མིག་སེར་དང༌། །རྙིལ་ནད་བསྐྱོད་དཀའ་མིག་དང་གཅིན་ལྤགས་དམར། །ཤ་འཕེལ་ལྦ་བ་རྨེན་བུ་ཤ་རྒྱས་འགྱུར། །ཚིལ་འཕེལ་ངལ་དང་ནུ་མ་གསུས་ཚིལ་སྐྱེ། །རུས་པ་འཕེལ་བས་རུས་ལྷག་སོ་ལྷག་འབྱུང༌། །རྐང་འཕེལ་ལུས་ལྕི་མིག་གཡུང་ཚིགས་ཁ་སྦོམ། །ཁུ་འཕེལ་ཁུ་བའི་རྡེ་འགྱུར་བུད་མེད་དད། །བཤང་འཕེལ་ལུས་ལྕི་ལྟོ་སྦོ་རྒྱུ་མ་འཁྲུག གཅིན་འཕེལ་ཆུ་སོར་ཟུག་ཅིང་མ་གཅིས་སེམས། །རྔུལ་འཕེལ་རྔུལ་ཆེ་དྲི་ལྡོག་ལྤགས་ནད་འབྱུང༌། །ཕྲ་མོ་འཕེལ་བས་ལྕི་ཞིང་གཡའ་འདྲུལ་བྱེད། །རླུང་ཟད་རྩོལ་ཆུང་སྨྲ་ཉམས་ལུས་མི་བདེ། །དྲན་པ་མི་གསལ་བད་ཀན་འཕེལ་རྟགས་འབྱུང༌། །མཁྲིས་ཟད་དྲོད་མདོག་ཉམས་པས་གྲང་དང་ནག །བད་ཀན་ཟད་པས་རང་གི་གནས་སྟོངས་ཤིང༌། །མགོ་འཁོར་སྙིང་འདར་ཚིགས་མཚམས་ལྷོད་པར་འགྱུར། །དྭངས་མ་ཟད་པས་ཤ་སྐམ་ཟས་མིད་དཀའ། །ལྤགས་རྩུབ་སྒྲ་ཆེར་མི་བཟོད་ན་བར་འགྱུར། །ཁྲག་ཟད་རྩ་ལྷོད་ལྤགས་རྩུབ་བསིལ་སྐྱུར་དད། །ཤ་ཟད་ལྷུ་ཚིགས་ན་ཞིང་རུས་ལྤགས་འབྱར། །ཚིལ་ཟད་གཉིད་ཆུང་ཤ་སྐམ་སྔོ་སྐྱར་འགྱུར། །རུས་པ་ཟད་པས་སྐྲ་འབྱི་སོ་སེན་ཕྱུང༌། །རྐང་ཟད་སྦུབས་སྟོང་མགོ་འཁོར་མིག་འགྲིབ་འགྱུར། །ཁུ་བ་ཟད་པས་ཁྲག་འབྱུང་འཚིག་གམ་སེམས། །བཤང་ཟད་རྒྱུ་མའི་ནང་དུ་སྒྲ་བཅས་འཁྱིལ། །གྱེན་དུ་འགྲོ་ཞིང་རྩིབ་ལོགས་སྙིང་ག་ན། །གཅིན་ཟད་མདོག་འགྱུར་སྲི་དང་ཉུང་ངུར་འགྱུར། །རྔུལ་ཟད་ལྤགས་འགས་བ་སྤུ་འགྲེང་དང་འབྱི། །ཕྲན་བུ་རང་གནས་སྟོངས་དང་ཡང་ལས་ཤེས། །ལུས་ཟུངས་དྲི་མ་ལ་ནི་བརྟེན་པའི་ཕྱིར། །འཕེལ་བསྐྱེད་ཟད་པས་སྟོབས་ལ་གནོད་པ་ཡིན། །མདངས་ནི་སེམས་ལ་སྡུག་བསྔལ་གྱིས་ཟད་དེ། །དངངས་རིད་ཉམ་ཆུང་མི་དགའ་གཟི་མདངས་ཉམས། འཚོ་བྱེད་འོ་མ་ཤ་ཁུ་དེ་སྨན་ཡིན། །འཁྲུགས་རྟགས་རླུང་གི་རྩ་ནི་སྟོང་ལ་རྐྱལ། །ཆུ་ནི་ཆུ་འདྲ་དྭངས་ལ་ལོག་རྗེས་སླ། །འགྲོ་འདོད་ཤུས་འདེབས་ཤེས་པ་ཡང་ལ་འཕྱོ། །མགོ་བོ་ཟི་འཁོར་རྣ་བ་འུར་ལ་འཁྲོག །ལྕེ་སྐམ་དམར་རྩུབ་ཁ་རོ་བསྐ་བ་བྲོ། །གཟེར་འཕོ་གྲང་འདར་འགུལ་ཁྱབ་ཟུག་དང་སྙོམ། །རེངས་འཁུམས་བྱེ་ཆག་འབྱིན་དང་དཀྲིས་སྙམ་བྱེད། །འགུལ་ན་ཟུག་ཆེ་སྤུ་བརྩེ་ཕྲུམ་སེར་ཁྱེར། །གཉིད་མེད་གཡལ་འདར་རྐྱོང་འདོད་ཚིག་པ་ཟ། །དཔྱི་རྐེད་རུས་ཚིགས་མ་ལུས་བརྡུངས་སྙམ་བྱེད། །ལྟག་པ་བྲང་དང་མུར་འགྲམ་ཟུག་ཅིང་གཟེར། །རླུང་གསང་རྣམས་ནི་ཁ་བྱེ་མནན་ན་ན། །སྟོང་སྐྱུགས་བྱེད་ཅིང་ཐོ་རངས་ལྦུ་གསོབ་ལུ། །སྦོ་འཁྲོག་དགོང་དང་ཐོ་རངས་ཞུ་རྗེས་ན། །མཁྲིས་པ་འཁྲུགས་རྟགས་རྩ་རྒྱས་ཕྲ་གྲིམས་མགྱོགས། །ཆུ་མདོག་དམར་སེར་དྲི་དུགས་རླངས་པ་ཆེ། །མགོ་ན་ཤ་ཚ་ཁ་རོ་སྐྱུར་ལ་ཁ། །ལྕེ་སྟེང་བད་ཀན་ཆེ་ལ་སྣ་སྒོ་སྐམ། །མིག་སྤྲིན་དམར་སེར་གཟེར་བ་གཅིག་ཏུ་འདྲིལ། །ནུབ་གཉིད་ཆུང་ལ་ཉིན་པར་གཉིད་མི་ཐུབ། །ལུད་པ་དམར་སེར་ཚ་བྲོ་སྐོམ་དད་ཆེ། །ཁྲག་མཁྲིས་འཁྲུ་སྐྱུག་རྔུལ་ཆེ་དྲི་མ་མནམ། །ཁ་དོག་དམར་སེར་སྨིན་ཅིང་འདྲུལ་བར་བྱེད། །ཉིན་དགུང་མཚན་དགུང་ཞུ་བའི་དུས་ན་ན། །བད་ཀན་འཁྲུགས་རྟགས་རྩ་ནི་བྱིང་རྒུད་དལ། །ཆུ་ནི་མདོག་དཀར་དྲི་དང་རླངས་པ་ཆུང༌། །ཁ་མངལ་ལྕེ་རྙིལ་སྐྱ་ལ་མིག་དཀར་སྐྲང༌། །སྣབས་ལུད་མང་ཞིང་མགོ་འཐོམ་ལུས་སེམས་ལྕི། །དང་ག་མི་བདེ་དྲོད་མེད་འཇུ་སྟོབས་ཆུང༌། །མཁལ་རྐེད་ན་ཞིང་ལུས་སྦོ་ལྦ་བ་སྐྱེ། །ཁ་ཟས་བད་ཀན་སྐྱུག་ཅིང་འཁྲུ་བ་དང༌། །དྲན་པ་མི་གསལ་གཉིད་ཆེ་སྒྱིད་པ་སྐྱུར། །གཡའ་མཁྲང་ཚིགས་དམ་ཤ་རྒྱས་ལས་མཐའ་རིང༌། །ནམ་ཞོད་སྲོད་དང་སྔ་དྲོ་ཟོས་ཐོག་ལྡང༌། །དེ་ལྟར་མཚན་ཉིད་འཕེལ་ཟད་འཁྲུགས་གསུམ་གྱི། །ཇི་ལྟར་བཤད་པའི་རྟགས་ཀྱིས་ནད་ཀུན་ཁྱབ། །ལྡན་འདུས་འདྲེས་པའི་རྟགས་ལས་ཤེས་པར་བྱ། །འདིར་མ་འདུས་པའི་ནད་རྟགས་ཡོད་མི་སྲིད། །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ནད་ཀྱི་མཚན་ཉིད་བསྟན་པའི་ལེའུ་སྟེ་བཅུ་གཅིག་པའོ།། །།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ནད་ཀྱི་དབྱེ་བ་རྒྱུ་ཡི་དབྱེ་བ་དང༌། །རྟེན་དང་རྣམ་པའི་སྒོ་ནས་དབྱེ་བ་གསུམ། །དང་པོ་རྒྱུ་ཡི་སྒོ་ནས་དབྱེ་བ་ནི། །ཚེ་འདིའི་ཉེས་དང་སྔོན་གྱི་ལས་ལས་བྱུང༌། །དེ་གཉིས་འདྲེས་ལས་བྱུང་དང་རྣམ་པ་གསུམ། །དང་པོ་རྒྱུ་རྐྱེན་འཛོམ་ལས་འབྱུང་བ་སྟེ། །ལས་སྐྱེས་རྒྱུ་མེད་པ་ལ་དཀྱེལ་ཆེ་བ། །རྒྱུ་ཆུང་དཀྱེལ་ཆེ་ཉེས་ལས་འདྲེས་པ་ཡིན། །དང་པོ་ཚེ་འདིའི་ཉེས་པ་རྣམ་གཉིས་ཏེ། །རང་བཞིན་གནས་པ་ཁོང་གི་ཉེས་པ་དང༌། །ཕྱི་རྐྱེན་ལས་བྱུང་གློ་བུར་ཉེས་པ་གཉིས། །དང་པོ་རླུང་མཁྲིས་བད་ཀན་གསུམ་ཡིན་ཏེ། །གཉིས་པ་དུག་མཚོན་གདོན་དང་རྣམ་པ་གསུམ། །རྟེན་གྱི་སྒོ་ནས་དབྱེ་ན་སྐྱེས་པ་དང༌། །བུད་མེད་བྱིས་པ་རྒས་པའི་ནད་རིགས་བཞི། །ཀུན་ཁྱབ་ཐུན་མོང་བ་དང་རྣམ་པ་ལྔ། །སྐྱེས་པའི་ནད་ལ་ཁུ་བ་ཟད་རླུགས་གཉིས། །རླིག་རླུགས་ཕོ་མཚན་དྲུག་དགུ་བཅུ་བདུན་བཤད། །བུད་མེད་ནད་ལ་མངལ་ལྔ་མངལ་སྐྲན་དགུ། །མངལ་གྱི་སྲིན་བུ་ལངས་ཁྲོས་རྣམ་པ་གཉིས། །རྩ་ནད་བཅུ་དྲུག་སུམ་ཅུ་རྩ་གཉིས་སོ། །བྱིས་པའི་ནད་ལ་ཕྲ་རགས་ཞིབ་ཚེགས་བརྒྱད། །རྒས་ནད་འབྱུང་བའི་ལུས་སྟོབས་འགྲིབས་པ་ཡིན། ཀུན་ཁྱབ་ཐུན་མོང་ནད་ལ་ཉེས་པ་དང༌། །གཙོ་བོ་གནས་དང་རིགས་ཀྱིས་དབྱེ་བའོ། །ཉེས་པས་དབྱེ་བ་རླུང་མཁྲིས་བད་ཀན་གསུམ། །རླུང་གི་ནད་ལ་སྤྱི་དང་བྱེ་བྲག་གཉིས། །སྤྱི་ལ་རིགས་དང་གནས་ཀྱིས་དབྱེ་བ་གཉིས། །རིགས་ཀྱིས་དབྱེ་ན་རླུང་ནད་ཉི་ཤུ་སྟེ། །གནས་ཀྱིས་དབྱེ་ན་འཇུག་སྒོ་རྣམ་པ་དྲུག །དབང་པོ་ལྔ་ལ་མེ་ཏོག་ཤར་དང་བདུན། །བྱེ་བྲག་སྲོག་འཛིན་ལ་སོགས་རྣམ་གྱུར་ལྔ། །བད་ཀན་མཁྲིས་པར་འདྲེས་པས་བཅུ་རུ་འདོད། །དབྱེ་བ་བཞི་བཅུ་རྩ་གཉིས་རླུང་གི་ནད། །མཁྲིས་པའི་ནད་ལ་སྤྱི་དང་བྱེ་བྲག་གཉིས། །སྤྱི་ལ་རིགས་དང་གནས་ཀྱི་དབྱེ་བ་གཉིས། །རིགས་ཀྱི་དབྱེ་བ་ཐང་ལ་ལྷགས་པ་དང༌། །གནས་གྱུར་ཁ་ལུད་རྩ་རྒྱུག་རྣམ་པ་གསུམ། །གནས་ཀྱིས་དབྱེ་ན་སྒོ་དྲུག་དབང་པོ་བདུན། །བྱེ་བྲག་འཇུ་བྱེད་ལ་སོགས་རྣམ་གྱུར་ལྔ། །རླུང་དང་བད་ཀན་འདྲེས་པས་བཅུ་རུ་འདོད། །དབྱེ་བ་ཉི་ཤུ་རྩ་དྲུག་མཁྲིས་པའི་ནད། །བད་ཀན་ནད་ལ་རང་རྒྱུད་གཞན་རྒྱུད་གཉིས། །རང་རྒྱུད་ཅན་ལ་སྤྱི་དང་བྱེ་བྲག་གཉིས། །སྤྱི་ལ་རིགས་དང་གནས་ཀྱིས་དབྱེ་བ་གཉིས། །རིགས་ཀྱི་སྒོ་ནས་དབྱེ་ན་ལྷེན་སོགས་དྲུག །གནས་ཀྱིས་དབྱེ་ན་སྒོ་དྲུག་དབང་པོ་བདུན། །བྱེ་བྲག་རྟེན་བྱེད་ལ་སོགས་རྣམ་གྱུར་ལྔ། རླུང་དང་མཁྲིས་པར་འདྲེས་པས་བཅུ་རུ་འདོད། །གཞན་རྒྱུད་ཅན་ལ་སེར་པོ་སྨུག་པོ་གཉིས། སྨུག་པོ་བྱེར་རྒྱས་རྡོལ་དང་འགྱིངས་པ་བཞི། །དབྱེ་བ་སུམ་ཅུ་རྩ་གསུམ་བད་ཀན་ནད། །བརྒྱ་དང་རྩ་གཅིག་ཉེས་པའི་དབྱེ་བར་འདོད། །གཙོ་བོས་དབྱེ་ན་རང་རྒྱུད་གཞན་རྒྱུད་ཅན། །རང་རྒྱུད་ཅན་ནི་རྐྱང་པ་རང་རྟགས་སྟོན། །འཕེལ་དང་རབ་འཕེལ་མཆོག་འཕེལ་ཟད་པར་སྦྱར། །གཞན་རྒྱུད་ཅན་ལ་ལྡན་འདུས་བླ་གཉན་གསུམ། །ལྡན་པ་མཉམ་གསུམ་ཅིག་རབ་ལྷག་པ་དྲུག །འདུས་ལ་མཚུངས་ཅིག་རབ་འབྲིང་གསུམ་སྦྱར་དྲུག །གཉིས་གཅིག་ལྷག་པ་ལ་དྲུག་གོ་ལྡོག་ཟད། །འཕེལ་ཟད་འདྲེས་ལ་མཉམ་འཕེལ་ཟད་སྦྱར་དྲུག །གཅིག་ཟད་གཉིས་འཕེལ་གོ་ལྡོག་བཅས་པ་དྲུག །འཕེལ་ཟད་དབྱེ་བ་བདུན་ཅུ་རྩ་བཞིའོ། །བླ་གཉན་ནད་ཀྱི་སྟེང་དུ་ནད་གང་ཞིག །བྱུང་བ་དེ་ཡང་དབྱེ་བ་གསུམ་འགྱུར་ཏེ། །ཞུགས་དང་ལོག་དང་འདོམ་པ་ཞེས་སུ་བཤད། །གཅིག་གི་གནས་སུ་ནད་གཞན་ཞུགས་པ་དང༌། །རང་མ་ཞི་བར་གཞན་དུ་ལོག་པ་དང༌། །ནད་སྣ་གཉིས་སུ་འཐབ་པས་དགུ་ཚན་གསུམ། །བརྒྱ་དང་རྩ་གཅིག་གཙོ་བོའི་དབྱེ་བར་འདོད། །གནས་ཀྱི་སྒོ་ནས་དབྱེ་ན་ལུས་དང་སེམས། །སེམས་ལ་གནས་པ་སྨྱོ་བྱེད་བརྗེད་བྱེད་གཉིས། །ལུས་ལ་གནས་པ་སྟོད་སྨད་ཕྱི་ནང་བཞི། །ཕྱི་ནང་ཀུན་ཁྱབ་ནད་དང་རྣམ་པ་ལྔ། །ལུས་སྟོད་དབང་པོ་མགོ་ལ་གནས་པ་ནི། །མགོ་མིག་རྣ་བ་སྣ་དང་མཆུ་སོ་ལྕེ། །རྐན་དང་ལྦ་བ་གྲེ་བ་ནམ་ཚོང་ནད། །གྲེ་བར་གནས་པ་ནད་དང་གག་པ་དང༌། །མགུལ་འགགས་ནད་དང་སྐད་འགགས་རྣམ་པ་བཞི། །ནམ་ཚོང་སྤྱིར་གནས་སྐོམ་དད་སྐྱིགས་བུ་དང༌། །དབུགས་མི་བདེ་དང་ཡིད་འཆུས་ཆམ་པ་ལྔ། །སྤྱི་རུ་སྡོམས་པས་དབྱེ་བ་བཅོ་བརྒྱད་བཤད། །དོན་སྣོད་ནང་ལ་གནས་པའི་ནད་བསྟན་པ། །སྙིང་དང་གློ་བ་མཆིན་མཆེར་མཁལ་མ་དང༌། །ཕོ་བ་མཁྲིས་པ་རྒྱུ་ལོང་ལྒང་པ་དང༌། །བསམ་སེའི་ནད་དང་རྣམ་པ་བཅུ་གཅིག་གོ །དོན་སྣོད་སྤྱིར་གནས་མ་ཞུ་གླང་ཐབས་སྐྲན། །སུར་ཡ་ཚད་འཁྲུ་རྒྱུ་གཟེར་རྣམ་པ་དྲུག །སྣོད་སྤྱིར་གནས་པ་འཁྲུ་སྐྱུག་རྣམ་པ་གཉིས། །སྤྱི་རུ་སྡོམས་པས་ནད་རིགས་བཅུ་དགུའོ། །སྨད་ནད་གཞང་འབྲུམ་མཚན་བར་རྡོལ་བ་དང༌། །རྟུག་འགགས་གཅིན་འགགས་གཅིན་སྙི་རྣམ་པ་ལྔ། །ཕྱིར་གནས་པགས་པ་ཤ་དང་རྩ་རུས་ཏེ། །པགས་པའི་ནད་ལ་ཤ་བཀྲ་བས་ལྡགས་དང༌། །གཡན་པ་གླང་ཤུ་ཟ་རྐོང་ཤུ་བ་དང༌། །རེག་པའི་དུག་དང་མཛེར་པ་ངོ་ཁབ་དང༌། །ནད་གཞན་ལྤགས་ལ་གྲམ་དང་བཅུ་རུ་བཤད། །ཤ་ཡི་ནད་ལ་ལྦ་བ་རྨེན་བུ་གཉིས། །ནད་གཞན་ཤ་ལ་རྒྱས་དང་རྣམ་པ་གསུམ། །རྩ་ཡི་ནད་ལ་རྩ་དཀར་རྩ་ནག་གཉིས། །ནད་གཞན་རྩ་རུ་རྒྱུག་དང་རྣམ་པ་གསུམ། །རུས་པའི་ནད་ལ་དྲེག་དང་རྐང་བམ་གཉིས། །ནད་གཞན་རུས་ལ་ཞེན་དང་རྣམ་པ་གསུམ། །ཤ་རུས་ཀུན་ལ་གནས་པ་གྲུམ་བུའི་ནད། །སྤྱི་རུ་སྡོམས་པས་ཉི་ཤུ་ཐམ་པའོ། །ཕྱི་ནང་ཀུན་ཏུ་ཁྱབ་པའི་ནད་རིགས་ལ། །མཁྲིས་པ་སྨུག་པོ་དམུ་འོར་སྐྱ་རྦབ་གཅོང༌། །ཚ་བ་སྡེ་དྲུག་འགྲམས་འཁྲུགས་རིམས་ནད་དང༌། །འབྲུམ་བུ་ལྷོག་པ་སྦྱར་དུག་རྫི་ཟེར་དུག །རླངས་དུག་ཤ་དུག་མི་འཕྲོད་པ་ཡི་དུག །བཙན་དུག་ཁྱི་དུག་སྲིན་བུ་སྦྲུལ་གྱི་དུག །འབྱུང་པོ་གཟའ་དང་མཛེ་འབྲས་མེ་དབལ་སྲིན། །མགོ་དང་བྱང་ཁོག་ཡན་ལག་སྐེ་ཡི་རྨ། །སྤྱི་རུ་སྡོམས་པས་སུམ་ཅུ་རྩ་བདུན་ཏེ། །བརྒྱ་དང་རྩ་གཅིག་གནས་ཀྱི་དབྱེ་བར་འདོད། །རིགས་ཀྱི་སྒོ་ནས་དབྱེ་ན་ཁོང་ནད་དང༌། །རྨ་དང་ཚད་པ་ཐོར་བུའི་ནད་རིགས་བཞི། །དང་པོ་ཁོང་ནད་སྒོ་ནས་དབྱེ་བ་ལ། །མ་ཞུ་རྒྱུ་དང་འབྲས་བུ་གཅོང་ནད་གཉིས། །མ་ཞུ་ངོ་བོ་རིགས་གྲོགས་དུས་ཀྱིས་བཞི། །འབྲས་བུ་གཅོང་ནད་དབྱེ་བ་གསར་རྙིང་གཉིས། །གསར་པ་བད་ཀན་སྐྱ་བོ་སྨུག་པོ་དང༌། །མཁྲིས་པའི་ནད་དང་དུག་གཅོང་རྣམ་པ་བཞི། །སྐྱ་བོ་ལྷེན་དང་ལྕགས་དྲེག་མེ་ཉམས་དང༌། །མགུལ་འགགས་གྲུམ་བུ་དཀར་པོ་འཇུ་སྐེམས་དྲུག །སྨུག་པོ་བྱེར་རྒྱས་རྡོལ་རལ་འགྱིངས་དང་འདྲིལ། །གབ་འཐབ་འོར་ལྷུང་གྲང་བ་ལྷིང་ཆད་བཅུ། །མཁྲིས་པ་ཁ་ལུད་རྩ་རྒྱུག་གནས་གྱུར་གསུམ། །དུག་གི་གཅོང་ལ་ཚ་སྦྱོར་གྲང་སྦྱོར་གཉིས། །རྙིང་པ་སྐྲན་དང་དམུ་འོར་སྐྱ་རྦབ་བཞི། །གཅོང་ཆེན་ཟད་བྱེད་ནད་དང་རྣམ་པ་ལྔ། །སྐྲན་ལ་ཁྲག་མཁྲིས་ལྷེན་དང་རྡོ་ཡི་སྐྲན། །རླུང་སྲིན་རྩ་ཆུའི་སྐྲན་དང་བརྒྱད་དུ་བཤད། །དམུ་ཆུ་བྱེར་ཟགས་འཁྱིམས་ཆུ་རྡོལ་ཆུ་བཞི། །འོར་ལ་ཚ་འོར་གྲང་འོར་རྣམ་པ་གཉིས། །སྐྱ་རྦབ་གློ་སྙིང་མཆིན་མཆེར་ཆུ་སེར་ལྔ། །ཟད་བྱེད་རླུང་མཁྲིས་བད་ཀན་བླ་གཉན་བཞི། །ཁོང་ནད་སྤྱིར་སྡོམས་བཞི་བཅུ་རྩ་བརྒྱད་དོ། །རྨ་ལ་ལྷན་ཅིག་སྐྱེས་དང་གློ་བུར་བ། །ལྷན་སྐྱེས་འབྲས་དང་རྨེན་བུ་སུར་ཡ་དང༌། །མེ་དབལ་གཞང་འབྲུམ་རྐང་བམ་མཚན་བར་རྡོལ། །གློ་བུར་རྨ་ལ་གནས་དང་རིགས་ཀྱིས་དབྱེ། །གནས་ནི་མགོ་སྐེ་བྱང་ཁོག་ཡན་ལག་ལ། །རྨ་རིགས་བཤུས་བཅད་རྣམ་པར་བཅད་པ་དང༌། །འཕྱང་ལྷུང་ཕུག་གཤགས་གྲུམས་པ་རྣམ་པ་བརྒྱད།།སྤྱི་རུ་སྡོམས་པས་དབྱེ་བ་བཅོ་ལྔའོ། །ཚ་བ་མ་སྨིན་རྒྱས་སྟོངས་གབ་རྙིངས་རྙོགས། །འགྲམས་འཁྲུགས་རིམས་ནད་དུག་ཚད་རྣམ་པ་བཞི། །འགྲམས་ལ་ཕྱི་འགྲམས་ནང་འགྲམས་རྣམ་པ་གཉིས། །འཁྲུགས་ལ་རྒྱས་འཁྲུགས་སྟོང་འཁྲུགས་འཇམ་འཁྲུགས་གསུམ། །རིམས་ལ་བལ་ནད་རྒྱུ་གཟེར་འབྲུམ་པ་དང༌། །གག་ལྷོག་ཆམ་པའི་ནད་དང་རྣམ་པ་ལྔ། །དུག་ལ་སྦྱར་དུག་གྱུར་པ་དངོས་དང་གསུམ། །ཐོར་བུ་སྐད་འགགས་སྐྱིགས་བུ་ཡི་ག་འཆུས། །སྐོམ་དད་དབུགས་མི་བདེ་དང་གླང་ཐབས་སྲིན། །འཁྲུ་སྐྱུག་དྲི་མ་གཅིན་འགགས་གཅིན་སྙི་དང༌། །ཚད་འཁྲུ་དྲེག་གྲུམ་ཆུ་སེར་རྩ་དཀར་དང༌། །ལྤགས་ནད་ཕྲན་བུ་ཐོར་བུ་བཅུ་དགུའོ། །བརྒྱ་དང་རྩ་གཅིག་རིགས་ཀྱི་དབྱེ་བར་འདོད། །དེ་ལྟར་ཉེས་པ་གཙོ་བོ་རིགས་གནས་བཞིའི། །དབྱེ་བ་བཞི་བརྒྱ་རྩ་བཞིའི་ནད་ཡོད་དེ། །དེ་ལ་གཞན་དབང་བཅོས་ཀྱང་འཆི་བ་དང༌། །ཀུན་བརྟགས་གདོན་ནད་རིམ་གྲོས་གྲོལ་བ་དང༌། །ཡོངས་གྲུབ་མ་བཅོས་འཆི་ལ་བཅོས་ན་འཚོ། །ལྟར་སྣང་མ་བཅོས་རང་བཞིན་འཚོ་བ་བཞི། །གཅིག་ལའང་བཞི་སྦྱར་བཞི་བརྒྱ་རྩ་བཞི་སྟེ། །སྡོམས་པས་སྟོང་དང་དྲུག་བརྒྱ་བཅུ་དྲུག་འགྱུར། །རྣམ་པའི་སྒོ་ནས་དཔག་ཏུ་མེད་པར་དབྱེ། །ཉེས་པ་གནོད་བྱ་ཉི་ཤུ་རྩ་ལྔ་ལ། །རྐྱང་པ་ལྡན་འདུས་དུ་མའི་རིགས་འབྱུང་བས། །གྲངས་དང་མིང་གི་ངེས་བསྟན་ཡོད་མ་ཡིན། །འོན་ཀྱང་ཉེས་པ་གསུམ་ལས་ནད་མི་འདའ། །གནོད་བྱ་བཅུ་ལས་ནད་ཀྱི་གནས་མི་འདའ། །དཔེར་ན་འདབ་ཆགས་བྱ་ཡིས་གར་འཕུར་ཡང༌། །ནམ་མཁའི་མཐོངས་ལས་འཕུར་ས་མེད་པ་བཞིན། །བད་རླུང་གྲང་ལ་ཁྲག་མཁྲིས་ཚ་བས་ན། །དུ་མར་ཕྱེ་ཡང་ཚ་གྲང་གཉིས་སུ་འདུས། །སོ་སོའི་དོན་ལ་རྒྱུ་དང་སྔར་ཚུལ་དང༌། །ཚུལ་ཕྱེད་པ་དང་དཀྱེལ་དུ་གྱུར་པ་བཞི། །རྒྱུ་ནི་རང་རང་སྐྱེད་པའི་རྐྱེན་ཡིན་ཏེ། །སྔར་ཚུལ་ཞེས་བྱ་བྱེ་བྲག་གསལ་མིན་པ། །ནད་རྟགས་གསལ་བར་གྱུར་པ་ཚུལ་ཕྱེད་ཡིན། །རང་གནས་མཐར་ཕྱིན་ཤུགས་རྫོགས་དཀྱེལ་གྱུར་ཏོ། །དེ་ལ་རྣམ་གྲངས་བརྟག་པ་གཙོ་བོ་སྟོབས། །རྣམ་གྲངས་ནད་རིགས་ནང་ཚེགས་དབྱེ་བ་སྟེ། །བརྟག་པ་དེ་རྣམས་མ་འདྲེས་ཕྱེད་པ་ཡིན། །གཙོ་བོ་རང་རྒྱུད་ཅན་དང་གཞན་རྒྱུད་ཅན། །དེ་ལ་སྔར་སྐྱེས་བླ་གཉན་བཅས་པའོ། །ནད་སྟོབས་ཡུལ་དུས་རང་བཞིན་ན་ཚོད་དང༌། །ནད་ཁམས་ཟས་སྤྱོད་དབང་གིས་གཉིས་སུ་འགྱུར། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ནད་ཀྱི་དབྱེ་བ་བསྟན་པའི་ལེའུ་སྟེ་བཅུ་གཉིས་པའོ།། །། དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས། །བྱ་བ་སྤྱོད་ལམ་གནས་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག །ནད་ལ་གསོ་བར་བྱེད་པའི་གཉེན་པོ་ཡི། །བྱ་བ་སྤྱོད་ལམ་གནས་ལ་བསླབ་བྱ་ན། །རྒྱུན་སྤྱོད་དུས་སྤྱོད་གནས་སྐབས་སྤྱོད་ལམ་གསུམ། །དེ་ལ་ཉིན་རེ་རྒྱུན་དུ་སྤྱོད་པའི་ལས། །ཚེ་བརྐྱང་འཇིག་རྟེན་པ་དང་དམ་པའོ། །དང་པོ་ཚེ་བརྐྱང་པ་ཡི་སྤྱོད་ལམ་ནི། །རྟག་ཏུ་བདེ་གནས་འདོད་ཅིང་ཚེ་བསྲིང་ཕྱིར། །སྨན་མཆོག་རིན་ཆེན་གྲུབ་པའི་གསང་སྔགས་བཅང༌། །ནད་སློང་རྐྱེན་གཉིས་དྲན་པས་རྟག་ཏུ་སྤང༌། །ལུས་ངག་ཡིད་ལས་ཉེས་སྤང་ཡང་དག་བསྟེན། །ལྕེ་སོགས་དབང་པོ་མནར་དང་ཉམས་བདེར་མིན། །ཐེ་ཚོམ་གྲུ་འམ་མི་སྲུན་བཞོན་པ་དང༌། །གསོད་ས་ཆུ་ཆེན་མེ་ཡི་ཕུང་པོ་དང༌། །གད་སྟེང་ཤིང་རྩེར་དབྱར་དགུན་འཛེག་འགྲོ་སྤང༌། །སྡོད་ན་ས་བརྟག་འགྲོ་ན་ལམ་བརྟག་ཅིང༌། །མཚན་མོ་དོན་ཆེན་དབྱུག་ཐོགས་གྲོགས་ལྡན་བྱ། །མཚན་གཉིད་མ་ལོག་རྩུབ་པས་ཅི་བདེར་ལོག །མ་ལོག་ནང་པར་སྨྱུང་བྱ་ཕྱེད་གཉིད་ལོག །ར་རོ་སྟོབས་ཟད་མྱ་ངན་རྩོལ་བས་དུབ། །སྨྲ་མང་རྒས་དང་འཇིགས་པའི་མི་རྣམས་ལ། །སོ་ག་རྩུབ་ཅིང་མཚན་མོ་ཐུང་བས་ན། །ལུས་ཀྱི་སྟོབས་འཕྲོག་རླུང་འཕེལ་འགྱུར་བའི་ཕྱིར། །ཉིན་པར་གཉིད་ལོག་སྣུམ་ལྕིར་འགྱུར་བས་ཕན། །གཞན་དུ་ཉིན་གཉིད་བད་ཀན་སྐྱེད་ཅིང་སྐྲངས། །རྨོངས་བག་མགོ་ན་སྒྱིད་སྐྱུར་རིམས་འདེབས་འགྱུར། །གཉིད་འཕེལ་སྐྱུགས་དང་སྨྱུང་བྱ་བུད་མེད་བསྟེན། །གཉིད་ཡེར་འོ་མ་ཞོ་ཆང་ཤ་ཁུ་བཏུང༌། །མགོ་བོ་བསྐུ་ཞིང་རྣ་བ་སྣུམ་གྱིས་དགང༌། །ཉལ་པོ་སྐྱེ་གནས་མི་མཐུན་བདག་པོ་ཅན། །མི་སྡུག་སྦྲུམ་མ་ཤུགས་ཞན་ཉེན་པ་དང༌། །ཟླ་མཚན་ལྡན་དུས་བཀན་བྱེད་འཁྲིག་པ་སྤང༌། །དགུན་དུས་རོ་ཙས་དྲེགས་ཚེ་བཀག་པ་མེད། །སྟོན་དཔྱིད་ཞག་གཉིས་དབྱར་སོས་ཟླ་ཕྱེད་སྤྱད། །གཞན་དུ་བུད་མེད་ལ་ཞུགས་དབང་པོ་ཉམས། །མགོ་འཁོར་དུས་མིན་འཆི་བར་བྱེད་པ་ཡིན། །རྟག་ཏུ་བསྐུ་བྱུག་སྤྱོད་བྱེད་རྒས་ངལ་རླུང༌། །འཇོམས་བྱེད་མགོ་རྐང་རྣ་བ་ལ་བསྟེན་བྱ། །ལུས་ཡང་ཚིལ་འབྲི་སྐབས་ཕྱེད་མེ་དྲོད་སྐྱེད། །མཁྲེགས་དང་ལས་ནུས་ཡང་དག་རྩོལ་སྤྱད་འབྱུང༌། །ཐལ་དྲགས་ལོག་པས་དེ་ལས་མ་རུངས་འགྱུར། །རྒན་བྱིས་རླུང་མཁྲིས་ནད་ཅན་དེ་སྤང་བྱ། །སྟོབས་ལྡན་སྣུམ་ཟ་དགུན་དང་དཔྱིད་དུས་དང༌། །བད་ཀན་ཅན་གྱིས་རྩོལ་བཅག་བསྟེན་པར་བྱ། །དྲིལ་ཕྱིས་བད་ཀན་སེལ་ཞིང་ཚིལ་འཇུ་བྱེད། །ལྤགས་གསལ་ཡན་ལག་བརྟན་པར་བྱེད་པའི་མཆོག །ཁྲུས་ནི་རོ་ཙ་དྲོད་སྟོབས་ཚེ་མདངས་སྐྱེད། །གཡའ་རྔུལ་དྲི་ང་སྙོམ་སྐོམ་ལུས་ཚ་སེལ། །ཆུ་དྲོན་མགོ་བཀྲུས་སྐྲ་མིག་སྟོབས་འཕྲོག་ཡིན། །ཚད་འཁྲུ་ལྟོ་སྦོས་ཆམ་པ་མ་ཞུ་དང༌། །སྣ་མིག་ནད་ཅན་ཟོས་མ་ཐོག་ལ་སྤང༌། །མིག་ནི་མེ་ཡི་རང་བཞིན་བད་ཀན་འཇིག །མཆི་མ་འཛག་ཕྱིར་མིག་སྨན་སྐྱེར་ཁཎྜ། །རྟག་ཏུ་ཞག་བདུན་ལོན་ཚེ་ཉིན་རེ་བླུག །གློ་བུར་ནད་ལྔའི་དགྲ་ལ་སྐྱེལ་མ་བསྟེན། །རྟག་ཏུ་གཅིག་ལ་མ་ཡིན་ཀུན་སྙོམས་སྤྱད། །དེ་ལྟར་བདག་ནི་ཉིན་མཚན་གནས་འགྲོ་ཞེས། །རྟག་ཏུ་དྲན་པ་ཉེར་འཇོག་སྡུག་བསྔལ་བསྲིང༌། །འཇིག་རྟེན་མི་ཆོས་སྤྱོད་པ་ཡོན་ཏན་ཀུན་གྱི་གཞི། །འཆད་དོན་བཙན་པར་བྱ་ཞིང་ཚིག་རྗེས་དོན་གྱིས་བསབ། །ངན་ལས་ཆད་ཀྱང་བཟློག་ཅིང་བཟང་ལས་བཤོལ་ཡང་བརྩམ། །གཞིག་པ་སྔོན་ལ་བཏང་ཞིང་ཕྱིས་ཀྱི་ལེགས་འཕེན་བཅའ། །ཟེར་དགུ་བདེན་པར་མི་བཟུང་ལེགས་པར་དཔྱད་ནས་བཟུང༌། །སྨྲ་དགུ་བསམ་ལ་སྨྲ་ཞིང་རང་གི་མདོ་དོན་བསྡམ། །བུད་མེད་ངག་ལ་མི་ཉན་སྦད་ཁ་ལྕི་བར་བྱ། །བྱམས་ལྟོས་མི་ལ་ཚིག་དྲོན་མི་གཞུག་ལྷུག་པར་སྨྲ། །ཅམ་ལ་བརླིང་ཞིང་འཕྲལ་ལ་འགྲོགས་པ་བདེ་བར་བྱ། །དགྲ་བོ་ཡན་པར་མི་བཏང་འདམ་རིང་ཐབས་ཀྱིས་འདུལ། །ཉེ་འཁོར་ཤ་ཚས་བསྐྱང་ཞིང་སྔར་དྲིན་མིག་རིང་བལྟ། །སློབ་དཔོན་ཕ་ཁུ་ལ་སོགས་རྒན་རིགས་ཕུད་དུ་ཁུར། །ཡུལ་མི་མཛའ་བཤེས་འགྲོགས་དགོས་རྣམས་དང་བློ་སེམས་བསྟུན། །སོ་ནམ་ཞིབ་མོར་བྱ་ཞིང་དགོས་དུས་རྩིང་པོར་སྤྱད། །མི་བདེན་འཕམ་ངོས་བླང་ཞིང་རྒྱལ་ན་ཚོད་ཟིན་བྱ། །མཁས་ན་དྲེགས་པ་སྐྱུང་ཞིང་ཕྱུག་ན་ཆོག་ཤེས་བྱ། །མི་བྲན་ཁྱད་དུ་མི་བསད་མཐོ་ལ་ཕྲག་དོག་སྤང༌། །མི་ངན་བསྟེན་རྫི་མི་བྱ་བན་བོན་དགྲར་མི་བསླང༌། །གཞན་གྱི་ནོར་ལ་མི་འབགས་ལ་ཡོགས་མནའ་ལ་འཛེམ། །མི་འགྱོད་རྡོག་གཏད་བྱ་ཞིང་ངན་ལ་དབང་མི་བསྐུར། །སེམས་ཀྱི་སྟོབས་དྲང་ངང་རིང་ཡངས་ཤིང་གཞི་བསྐྱེད་ལ། །ལས་རྣམས་ཕལ་ཆེར་ཟླ་ཚོད་དུས་སུ་བླང་བ་གཅེས། །དེ་འདྲ་གཅིག་པུར་སྐྱེས་ཀྱང་གཞན་ལ་དབང་མི་འཆོར། །བྲན་གྱི་ལུས་ཀྱང་སྐྱེ་བོ་མང་པོའི་དཔོན་དུ་འགྱུར། །དེ་ནས་དམ་པ་ལྷ་ཆོས་སྤྱད་པ་ནི། །སེམས་ཅན་ཐམས་ཅད་བདེ་བ་འདོད་པའི་ཕྱིར། །རྩོམ་པ་ཀུན་ལ་འཇུག་ཀྱང་ཆོས་མེད་ན། །བདེ་ཉིད་སྡུག་བསྔལ་རྒྱུ་ཕྱིར་ཆོས་ལ་འབད། །མོས་པས་བཤེས་བསྟེན་ཅིག་ཤོས་རིང་དུ་སྤང༌། །སྲོག་གཅོད་རྐུ་དང་ལོག་པར་གཡེམ་པ་དང༌། །རྫུན་དང་ངག་འཁྱལ་ཚིག་རྩུབ་དབྱེན་སྦྱོར་དང༌། །བརྣབས་སེམས་གནོད་སེམས་ལྟ་བ་ཕྱིན་ཅི་ལོག །སྡིག་པའི་ལས་བཅུ་ལུས་ངག་ཡིད་ཀྱིས་སྤང༌། །མྱ་ངན་ནད་ཕོངས་སྡུག་ལ་ནུས་ཕན་གདགས། །འབུ་སྲིན་སོགས་ཀུན་རྟག་ཏུ་རང་འདྲར་བལྟ། །བསླུ་མེད་དེས་པས་འཛུམ་ཞིང་དྲང་པོར་སྨྲ། །གནོད་བརྩོན་དགྲ་ལའང་ཕན་གདགས་གཙོར་བྱས་ཏེ། །བྱམས་པས་བྱང་ཆུབ་མཆོག་གི་སེམས་གཉིས་བསྐྱེད། །ལུས་ངག་ཡིད་དུལ་ཕངས་མེད་གཏོང་སེམས་ལྡན། །གཞན་གྱི་དོན་ལའང་རང་གི་འདྲར་སེམས་པ། །དེ་དག་དམ་པའི་སྤྱོད་པ་མཐར་ཐུག་གོ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཉིན་རེ་བཞིན་རྒྱུན་དུ་སྤྱོད་པའི་ལེའུ་སྟེ་བཅུ་གསུམ་པའོ།། །།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །གཉིས་པ་དུས་སུ་སྤྱོད་པའི་སྤྱོད་ལམ་ནི། །དགུན་སྟོད་དགུན་སྨད་དཔྱིད་དང་སོ་ག་དང༌། །དབྱར་སྟོན་དགུན་ཟླ་ར་སོགས་གཉིས་རིམ་བཞིན། །སྐད་ཅིག་ལ་སོགས་ཐང་ཅིག་ཡུད་ཙམ་ལ། །ཉིན་ཞག་ཟླ་བ་དུས་དང་ལོར་འགྱུར་ཏེ། །ཉི་མ་བརྒྱད་གསུམ་དབྱར་དགུན་དབུས་སུའང་ལྡོག །གསུམ་ནི་ལྷོ་དང་བྱང་དུ་འགྲོ་ཞེས་བྱ། །ནམ་དང་ཉི་མ་ཕྱེད་ན་མཉམ་པ་ཡིན། །བརྒྱད་དང་བཅུ་ན་སྒྲ་སྒྲོགས་ཆད་པར་འགྱུར། །དེ་ལ་དགུན་ཟླ་ཐ་ཆུང་ལ་སོགས་པ། །ཉི་མ་བྱང་དུ་འགྲོ་བའི་དུས་ཀྱི་ཚེ། །ཤིན་ཏུ་རྣོ་ཚ་རྩུབ་པའི་ངོ་བོར་འགྱུར། །རླུང་དང་ཉི་མ་དག་གི་ནུས་སྟོབས་ཀྱིས། །ཟླ་བ་ས་ཡི་ཡོན་ཏན་ཟད་པར་བྱེད། །འདིར་ནི་ཚ་བསྐ་ཁ་བའི་རོ་སྟོབས་ཆེ། །མི་རྣམས་ཀྱི་ནི་མཐུ་སྟོབས་ཉིན་རེ་འཕྲོག །ཆར་དུས་ལྷོ་ཕྱོགས་འགྲོ་ཚེ་སླར་སྟོབས་སྐྱེད། །བསིལ་བ་ཟླ་བའི་སྟོབས་ལྡན་ཉི་མ་འབྲི། །ཆར་བབས་རླུང་གིས་ས་སྟེང་ཚ་བ་ཞི། །སྐྱུར་དང་ལན་ཚྭ་མངར་བའི་རོ་སྟོབས་སྐྱེད། །དགུན་ཆེ་སོས་དང་དབྱར་ཆུང་སྟོན་དཔྱིད་འབྲིང༌། །དེ་ལྟར་བགྲོད་དུས་རྣམ་པ་གཉིས་བསྟན་ནས། །ད་ནི་ནམ་ཟླ་དུས་དྲུག་སྤྱོད་ལམ་ནི། །དགུན་སྟོད་གྲང་བས་བ་སྤུའི་སྒོ་བཀག་སྟེ། །མེ་ཡི་སྟོབས་ལྡན་རླུང་གིས་སྦར་བ་ཡིས། །ཟས་ཉུང་གྱུར་ན་ལུས་ཟུངས་འབྲི་བར་འགྱུར། །དེ་ཕྱིར་དང་པོའི་རོ་གསུམ་བསྟེན་པར་བྱ། །དེ་ཚེ་མཚན་མོ་རིང་བས་བཀྲེས་གྱུར་ཏེ། །དེ་ཡིས་ལུས་ཟུངས་འབྲི་བར་འགྱུར་བའི་ཕྱིར། །ཏིལ་མར་གྱིས་བྱུག་ཤ་ཁུ་སྣུམ་པ་བཟའ། །ལྤགས་པའི་གོས་དང་ལྷམ་ནི་རྟག་ཏུ་བགོ། །དུགས་དང་མེ་ཉིའི་འོད་ལ་རན་པར་བསྲོ། །ས་ཡི་ཁང་པ་ཉིས་རིམ་ནང་དུ་བསྡད། །དགུན་སྨད་དུས་ན་ལྷག་པར་གྲང་བས་ན། །དེར་ཡང་སྤྱོད་ལམ་དེ་ཉིད་སྤྱད་པར་བསྔགས། །དགུན་དུས་བད་ཀན་ཁོག་ཏུ་གསོག་པ་སྟེ། །དཔྱིད་དུས་ཉི་འོད་དྲོས་པས་མེ་དྲོད་ཉམས། །བད་ཀན་ལྡང་ཞིང་ཐ་མའི་རོ་གསུམ་བསྟེན། །ནས་རྙིང་སྐམ་སའི་ཤ་དང་སྦྲང་རྩི་དང༌། །ཆུ་སོལ་སྒ་ཐང་བཏང་ཞིང་རྩུབ་པ་བསྟེན། །རྩོལ་བས་བཅག་དང་དྲིལ་ཕྱིས་བད་ཀན་བསལ། །དྲི་ཞིམ་སྐྱེད་མོས་ཚལ་གྱི་ཉི་གྲིབ་འདུག །སོ་ག་ཉི་མའི་འོད་ཟེར་རབ་ཚ་བས། །སྟོབས་འཕྲོག་ཕྱིར་ན་མངར་ཡང་སྣུམ་བསིལ་བཟའ། །ལན་ཚྭ་ཚ་སྐྱུར་རྩོལ་བ་ཉི་འོད་སྤང༌། །བསིལ་ཆུས་ལུས་བཀྲུ་ཆང་ཆུ་བསྲེས་པ་བཏུང༌། །རབ་ཕྲའི་གོས་བགོ་བསིལ་ཁང་དྲི་བཟང་བསྟེན། །ཤིང་གྲིབ་རྫི་ཆར་བསེར་བུ་ངད་ལྡན་བྱ། །དབྱར་དུས་མཁའ་ལ་སྤྲིན་འདུས་ཆུ་ཡིས་བརླན། །རླུང་དང་གྲང་བ་ས་རླང་ཆུ་རྙོག་ཅན། །མེ་དྲོད་གནོད་པས་མེ་དྲོད་སྐྱེད་པ་བསྟེན། །དང་པོའི་རོ་གསུམ་ཡང་དྲོ་སྣུམ་བཅས་བཟའ། །སྐམ་སའི་ཆང་བཏུང་ཁང་སྟེང་བསིལ་སྤངས་གནས། །དབྱར་བསིལ་འཕྲལ་དུ་ལུས་ལ་ཉི་ཟེར་གདུངས། །ཆར་དུས་བསགས་པའི་མཁྲིས་པ་སྟོན་ན་ལྡང༌། །དེ་བསལ་ཕྱིར་ན་མངར་ཁ་བསྐ་བ་བསྟེན། །ག་བུར་ཙན་དན་ཨུ་ཤིར་དྲི་ལྡན་པའི། །གོས་བགོ་ཁང་པ་ཆག་ཆག་བཏབ་བར་འདུག །མདོར་ན་ཟས་སྐོམ་དབྱར་དགུན་དྲོ་བ་བསྟེན། །དཔྱིད་རྩུབ་སོས་དང་སྟོན་ག་བསིལ་བར་བྱ། །དབྱར་དང་དགུན་ནི་དང་པོའི་རོ་གསུམ་བསྟེན། །དཔྱིད་ཀ་ཐ་མའི་རོ་གསུམ་སོ་ག་མངར། །སྟོན་ཀ་མངར་ཁ་བསྐ་བ་བསྟེན་པར་བྱ། །སྟོན་དཔྱིད་བཤལ་སྐྱུགས་དབྱར་ག་འཇམ་རྩི་བསྔགས། །དམན་ལྷག་ལོག་ན་དེ་དང་འཚམ་པར་དཔྱད། ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དུས་སུ་སྤྱོད་པའི་ལེའུ་སྟེ་བཅུ་བཞི་པའོ།། །།
དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །གསུམ་པ་གནས་སྐབས་སྤྱོད་ལམ་བསྟན་པ་ནི། །བཀྲེས་སྐོམ་སྐྱུག་པ་གཡལ་དང་སྦྲིད་པ་དང༌། །དབུགས་གཉིད་ལུད་པ་མཆི་མ་བཤང་བ་འཕྱེན། །གཅིན་དང་ཁུ་བའི་ཤུགས་ནི་བགག་མི་བྱ། །བཀྲེས་བཀག་ལུས་ཞིག་ཉམ་ཆུང་ཡི་ག་འཆུས། །མགོ་འཁོར་དེ་ཟས་ཡང་སྣུམ་དྲོ་ཆུང་སྦྱར། །སྐོམ་བཀག་ཁ་སྐམ་མགོ་འཁོར་སྙིང་ནད་འབྱུང༌། །མྱོས་འགྱུར་དེ་བསིལ་ཆོ་ག་ཐམས་ཅད་ཕན། །སྐྱུགས་བཀག་དང་ག་འགག་དང་དབུགས་མི་བདེ། །སྐྱ་རྦབ་མེ་དབལ་གཡན་པ་འབྲས་དང་མཛེ། །མིག་ནད་ལུད་པ་རིམས་ནད་འབྱུང་བར་འགྱུར། སྨྱུང་གནས་དུད་རྣོན་ཁ་བཀང་དབོ་བར་བྱ། །སྦྲིད་བཀག་དབང་པོ་མི་གསལ་མགོ་བོ་ན། །གཉའ་བ་རེངས་དང་ཁ་ཡོ་འགྲམ་ཆག་འགྱུར། །དུད་རྣོན་སྣ་སྨན་ཉི་མ་བལྟ་བས་བསལ། །གཡལ་བཀག་དེ་འདྲ་ཆོ་ག་རླུང་འཇོམས་ཕན། །ངལ་དུབ་དབུགས་བཀག་སྐྲན་དང་སྙིང་ནད་འབྱུང༌། །མྱོས་འགྱུར་དེར་ནི་ངལ་གསོ་རླུང་སེལ་ཕན། །གཉིད་བཀག་གཡལ་མང་ལུས་སྙོམ་མགོ་བོ་ལྕི། །མིག་འགྲིབ་ཁ་ཟས་མི་འཇུ་ཤ་ཁུ་དང༌། །ཆང་བཏུང་བསྐུ་མཉེ་བྱ་ཞིང་གཉིད་ལོག་ཕན། །ལུད་པ་བཀག་པས་ལུད་འཕེལ་དབུགས་མི་བདེ། །ཤ་སྐེམ་སྐྱིགས་བུ་སྙིང་ནད་ཡི་ག་འཆུ། །དེར་ནི་ལུད་པ་བསལ་བའི་ཆོ་ག་བྱ། །མཆི་མ་བཀག་པས་སྙིང་དང་མགོ་བོ་ན། །སྣ་ཆུ་འཛག་ཅིང་མགོ་འཁོར་ཡི་ག་འཆུས། །དེ་ལ་ཆང་བཏུང་གཉིད་ལོག་གཏམ་སྙན་ཕན། །འཕྱེན་བཀག་རྟུག་སྐམས་འཕྱེན་དང་བཤང་བ་འགག །སྐྲན་གཟེར་མིག་རྟུལ་དྲོད་ཆུང་སྙིང་ནད་འགྱུར། །བཤང་བ་བཀག་པས་ཁ་རུ་མི་གཙང་འབྱུང༌། །ཀླད་པ་ན་ཞིང་ཉྭ་འགྱུར་ཆམ་པས་འདེབས། །སྔར་བཤད་ནད་འགྱུར་གཅིན་བཀག་རྡེའུ་ནད་དང༌། །ཆུ་སོ་ཕོ་མཚན་དཀུ་ནད་སྔར་ནད་འབྱུང༌། །དེ་སྨན་རེང་བུ་མས་བཏང་ལུས་བཅིང་དང༌། །བསྐུ་བྱུག་དུགས་དང་སྨན་མར་བསྟེན་པར་བྱ། ཁུ་བ་བཀག་པས་དེ་འཛག་ཕོ་མཚན་ན། །ཆུ་འགག་རྡེ་འུ་འཕེལ་དང་མ་ནིང་འགྱུར། །མས་བཏང་ལུས་བཅིང་བུད་མེད་སྤྱད་པར་བྱ། །ཏིལ་མར་འོ་མ་ཁྱིམ་བྱ་ཤ་ཆང་བཏང༌། །དེ་ལྟར་ཤུགས་ནི་བཀག་དང་བཙིར་བ་ཡིས། །ནད་ཀུན་འབྱུང་འགྱུར་འཕྲལ་དུ་རླུང་འཁྲུག་པས། །དེ་ཕྱིར་དེ་ཡི་ཟས་དང་སྨན་སྐོམ་སྦྱར། །ནད་གང་སྨྱུང་དང་ཞི་བས་བཞུ་བྱས་ཀྱང༌། །རོ་མ་ལྡང་འགྱུར་ལེགས་སྦྱངས་སླར་མི་འབྱུང༌། །དེ་ཕྱིར་དགུན་བསགས་གྲང་ནད་དཔྱིད་དུས་སྦྱང༌། །སོས་བསགས་དབྱར་སྦྱང་དབྱར་བསགས་སྟོན་དུས་སྦྱང༌། །ལེགས་པར་སྦྱངས་པས་རོ་ཐོན་ནད་མེད་འགྱུར། །རྟག་ཏུ་ཕན་པའི་ཟས་དང་སྤྱོད་ལམ་རྣམས། །ཉམས་ལྡན་བསྟེན་པར་བྱེད་ན་ནད་མི་འབྱུང༌། །ནད་ཀུན་མི་སྐྱེ་སྐྱེས་པའང་ཞི་བྱའི་ཕྱིར། །གནས་སྐབས་སྤྱོད་པའི་ཆོ་ག་འདི་ཉིད་བསྔགས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གནས་སྐབས་ཀྱི་སྤྱོད་ལམ་བསྟན་པའི་ལེའུ་སྟེ་བཅོ་ལྔ་པའོ།། །།
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས། །འཚོ་བ་ཟས་ཀྱི་གནས་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག །ནད་ལ་གསོ་བར་བྱེད་པའི་གཉེན་པོ་ཡི། །འཚོ་བ་ཟས་ཀྱི་གནས་ལ་བསླབ་པ་ནི། །ཟས་སྐོམ་ལེགས་སྤྱད་ལུས་དང་སྲོག་འཚོ་ཞིང༌། །དམན་ལྷག་ལོག་གྱུར་ནད་བསྐྱེད་འཕྲལ་སྲོག་འཇོམས། །དེ་ཕྱིར་ཟས་སྐོམ་སྦྱོར་བ་མཁས་པ་གཅེས། །འདི་ལ་སྤྱི་སྡོམས་ཟས་ཚུལ་ཤེས་པ་དང༌། །ཟས་བསྡམ་ཟས་ཚོད་རན་པར་བཟའ་བ་གསུམ། །ཟས་ཀྱི་ཚུལ་ཤེས་པ་ལ་ཟས་སྐོམ་གཉིས། །ཟས་ལ་འབྲུ་ཤ་སྣུམ་ངད་གཡོས་སྦྱར་ལྔ། །འབྲུ་ལ་གཉིས་ཏེ་གྲ་མ་གང་བུ་ཅན། །དེ་ལ་གྲ་མ་ཅན་གྱི་འབྲུ་ཡི་སྡེ། །འབྲས་ཁྲེ་ཁྲ་མ་གྲོ་ནས་སོ་བ་དང༌། །སྲེ་ད་ལ་སོགས་རོ་དང་ཞུ་རྗེས་མངར། །རོ་ཙ་རླུང་འཇོམས་ལུས་སྟོབས་བད་ཀན་སྐྱེད། །དེ་ལ་འབྲས་ནི་སྣུམ་འཇམ་བསིལ་ལ་ཡང༌། །ཉེས་པ་གསུམ་སེལ་རོ་ཙ་འཁྲུ་སྐྱུག་གཅོད། །ཁྲེ་ནི་ལྕི་བསིལ་བརྟས་བྱེད་ཆག་གྲུགས་སྦྱོར། །ཁྲ་མ་བསིལ་ཡང་རྩུབ་ཅིང་ཡི་གར་འཕྲོད། །གྲོ་ནི་ལྕི་བསིལ་འཚོ་བྱེད་རླུང་མཁྲིས་སེལ། །ནས་ནི་ལྕི་བསིལ་བཤང་འཕེལ་སྟོབས་སྐྱེད་མཆོག །སོ་བ་སྲེ་ད་བསིལ་ཡང་བད་མཁྲིས་སེལ། །གང་བུ་ཅན་འབྲུ་སྲན་མ་མོན་སྲན་གཉིས། །བསྐ་མངར་བསིལ་ཡང་སྐྱ་ལ་རྩ་སྒོ་འགག །བད་ཀན་ཚ་བ་སེལ་ཞིང་འཁྲུ་བ་གཅོད། །སྣུམ་སེལ་ཁྲག་མཁྲིས་ཚིལ་ལ་བྱུགས་ན་ཕན། །རྒྱ་སྲན་བད་རླུང་ལུད་པ་དབུགས་མི་བདེ། །གཞང་འབྲུམ་ཁུ་བའི་རྡེ་འཇོམས་ཁྲག་མཁྲིས་སྐྱེད། །མ་ཤ་རླུང་འཇོམས་བད་མཁྲིས་ཁུ་སྟོབས་འཕེལ། །སྲན་ཆུང་བསྐ་མངར་ཉེས་པ་གསུམ་ག་སྐྱེད། །སྐྱོ་མས་མེ་དབལ་དྲེག་ནད་ཁྲག་ནད་སེལ། །ཏིལ་འབྲུ་ལྕི་དྲོ་རོ་ཙ་རླུང་ནད་འཇོམས། །ཟར་མ་མངར་ཁ་སྣུམ་འཇམ་རླུང་ལ་ཕན། །བྲ་བོ་བསིལ་ཡང་རྨ་འཇིག་ཉེས་གསུམ་སྐྱེད། །འབྲུ་ཀུན་གསར་ཐོག་རློན་པ་ལྕི་བ་སྟེ། །སྨིན་གྱུར་སྐམས་དང་རྙིང་པ་ཡང་བ་ཡིན། །རྗེན་པ་བཙོས་དང་གཡོས་སུ་བྱས་པ་ཀུན། །རིམ་བཞིན་ཡང་ཞིང་འཇུ་སླ་འཕྲོད་པར་འགྱུར། །ཤ་ནི་སྡེ་བརྒྱད་སྐམ་གཤེར་ཐུན་མོང་གནས། །རྨ་བྱ་གོང་སྲེག་སྐྱུང་ག་བྱ་ནག་དང༌། །རི་བྱ་རྣམས་ནི་ཁྲོན་གྱིས་རྐོ་བའི་སྡེ། །ནེ་ཙོ་ཁུ་བྱུག་ཐི་བ་སྐྱ་ག་དང༌། །འཇོལ་མོ་བྱེ་འུ་མཆུ་ཡིས་རྐོ་བའི་སྡེ། །ཤ་བ་གླ་དགོ་གཉན་དང་རི་བོང་དང༌། །གཙོད་ཀྱི་ཤ་རྣམས་རི་དྭགས་སྡེ་ཚན་ཡིན། །རྒྱ་དང་ཁ་ཤ་ར་རྒོད་ཕག་རྒོད་དང༌། །མ་ཧེ་བསེ་སྨུག་རྐྱང་དང་གཡག་རྒོད་དང༌། །མཛོ་རྒོད་ལ་སོགས་རི་དྭགས་ཆེ་བའི་སྡེ། །སྟག་གཟིག་དོམ་དྲེད་གསའ་དང་སྤྱང་ཀི་གཡི། །ཝ་དང་འཕར་བ་སྤྲེ་སོགས་གཅན་གཟན་སྡེ། །བྱ་རྒོད་ཁྭ་རླག་ནེ་ལེ་བྱ་རོག་དང༌། །འུག་པ་བྱེའུ་ཁྲ་རྩལ་མཐུས་ཟ་བའི་སྡེ། །མཛོ་གཡག་རྔ་མོ་རྟ་བོང་བ་ལང་དང༌། །སྐོམ་པོ་ར་ལུག་ཁྱི་དང་ཕག་པ་བྱ། །བྱི་ལ་ལ་སོགས་མི་ཡིས་བདག་བྱེད་སྡེ། །འཕྱི་བ་བྱི་ཐུར་སྦལ་སྦྲུལ་གྲུམ་པ་དང༌། །རྨིགས་པ་རྩངས་པ་སྡིག་པ་ཁུང་གནས་སྡེ། །ཁྲུང་ཁྲུང་ངང་ངུར་སོ་བྱ་སྐྱར་མོ་དང༌། །སྲམ་དང་ཉ་སོགས་རླན་ལ་གནས་པའི་སྡེ། །སྡེ་བརྒྱད་ཤ་རྣམས་རོ་དང་ཞུ་རྗེས་མངར། །ཐོག་མཐའ་བར་མ་སྐམ་གཤེར་ཐུན་མོང་གནས། །སྐམ་སའི་ཤ་རྣམས་བསིལ་ཞིང་ཡང་ལ་རྩུབ། །རླུང་དང་བད་ཀན་ལྡན་པའི་ཚ་བ་སེལ། །རླན་གནས་ཤ་རྣམས་སྣུམ་ཞིང་ལྕི་ལ་དྲོ། །ཕོ་བ་མཁལ་རྐེད་གྲང་རླུང་ནད་ལ་ཕན། །ཐུན་མོང་གནས་པ་ནུས་པ་གཉིས་དང་ལྡན། །བྱ་གཅན་རྩལ་མཐུས་ཤ་རློན་ཟ་བ་རྣམས། །རྩུབ་ཡང་རྣོ་བས་ཕོ་བའི་མེ་དྲོད་སྐྱེད། །སྐྲན་བཤིག་ཤ་འཕེལ་གྲང་བའི་ནད་ཀུན་སེལ། །ལུག་ཤ་སྣུམ་དྲོ་སྟོབས་འཕེལ་ལུས་ཟུངས་སྐྱེད། །རླུང་དང་བད་ཀན་སེལ་ཞིང་དང་ག་འབྱེད། །ར་ཤ་ལྕི་བསིལ་ཉེས་པ་གསུམ་སློང་ཞིང༌། །བསེ་དུག་འབྲུམ་ནག་མེས་འཚིག་རྨ་ལ་ཕན། །བ་ལང་བསིལ་སྣུམ་རླུང་ལྡན་ཚ་བ་སེལ། །རྟ་རྐྱང་བོང་བུ་ལ་སོགས་བཤུལ་ཤ་རྣམས། །རྣག་གཅོད་མཁལ་རྐེད་གྲང་བ་ཆུ་སེར་སེལ། །ཕག་ཤ་བསིལ་ཡང་རྨ་འཇིག་སྨུག་པོ་སེལ། །མ་ཧེའི་ཤ་ཡིས་གཉིད་དང་ཤ་འཕེལ་བྱེད། །གཡག་ཤ་སྣུམ་དྲོ་གྲང་སེལ་ཁྲག་མཁྲིས་སྐྱེད། །ཁྱིམ་བྱ་བྱེའུ་ཁུ་འཕེལ་རྨ་ལ་ཕན། །རྨ་བྱ་མིག་ནད་སྐད་འགགས་རྒས་སྲ་ཕན། །གཡག་རྒོད་ཕོ་མཆིན་གྲང་སེལ་མེ་དྲོད་སྐྱེད། །རི་དྭགས་བསིལ་ཡང་ལྡན་ཚད་སེལ་བར་བྱེད། །རི་བོང་ཤ་རྩུབ་དྲོད་སྐྱེད་འཁྲུ་བ་གཅོད། །འཕྱི་བ་སྣུམ་ལྕི་དྲོ་ཞིང་འབྲས་ལ་ཕན། །གྲང་རླུང་ཕོ་བ་མཁལ་རྐེད་མགོ་ནད་སེལ། །སྲམ་ཤ་རོ་ཙ་མཁལ་རྐེད་གྲང་བ་སེལ། །ཉ་ཤ་ཕོ་བའི་ནད་སེལ་དང་ག་འབྱེད། །མིག་གསལ་རྨ་འབྲས་བད་ཀན་བཤིག་པར་བྱེད། །ཤ་ཀུན་ཕོ་མོའི་སྟོད་སྨད་ཕྱེད་ལྕི་སྟེ། །སྦྲུམ་མ་ཀུན་ལྕི་རྐང་བཞི་མོ་ཡི་ཡང༌། །བྱ་རྣམས་ཀུན་ནི་ཕོ་ཡི་ཡང་བ་ཡིན། །མགོ་དང་རོ་སྟོད་བྲང་རྒྱབ་དཔྱི་རྐེད་ལྕི། །ལུས་ཟུངས་བདུན་པོ་ཕྱི་མ་ཕྱི་མ་ལྕི། །ཤ་གསར་བསིལ་ཞིང་ཤ་རྙིང་དྲོ་ལ་བཅུད། །ལོ་ཤ་ཁྱད་པར་རླུང་གནོན་མེ་དྲོད་སྐྱེད། །རློན་པ་འཁྱགས་པོ་བསྲེགས་པ་འཇུ་དཀའ་ལྕི། །སྐམ་དང་བཙོས་པ་ཡང་ཞིང་འཇུ་བ་སླ། །སྣུམ་ནི་མར་དང་ཏིལ་མར་རྐང་མར་ཚིལ། །རོ་མངར་ཕྱི་མ་ལྕི་བསིལ་ཁོང་འཁྲུ་སྣུམ། །རྟུལ་དང་ཕྲ་ལ་མཉེན་ཞིང་རླན་པ་ཡིན། །རྒས་བྱིས་སྟོབས་ཆུང་སྦེག་རྩུབ་ཁུ་ཁྲག་ཟད། །སྦྱང་བྱས་སེམས་ལས་རླུང་གིས་ཉེན་ལ་བསྔགས། །དེ་ལ་མར་གསར་བསིལ་ཞིང་རོ་ཙ་ལ། །མདོག་སྟོབས་སྐྱེད་ཅིང་མཁྲིས་ཚད་སེལ་བར་བྱེད། །མར་རྙིང་སྨྱོ་དང་བརྗེད་བྱེད་བརྒྱལ་རྨ་འཚོ། །ཞུན་མར་བློ་རྣོ་དྲན་གསལ་དྲོད་སྟོབས་སྐྱེད། །ཚེ་འཕེལ་སྣུམ་པའི་མཆོག་སྟེ་ལས་སྟོང་བྱེད། །ཕྲུམ་གསར་སྤྲི་དང་ཕྱུར་བ་ལ་སོགས་པ། །དང་ག་ལེན་ཞིང་རྟུག་སྐམས་བད་ཀན་སེལ། །ཟོ་མར་བད་རླུང་སེལ་ཞིང་མེ་དྲོད་སྐྱེད། །འབྲི་དང་ལུག་མར་དེ་བཞིན་གྲང་རླུང་སེལ། །མཛོ་སྙོམས་བ་ར་བསིལ་བས་རླུང་ཚད་སེལ། །ཏིལ་མར་ཚ་རྣོ་སྐེམ་པོ་ཤ་སྐྱེད་ཅིང༌། །སྦོམ་པོ་འབྲི་ལ་མཁྲེགས་ཏེ་བད་རླུང་སེལ། །ཡུངས་མར་རླུང་གནོན་བད་མཁྲིས་སྐྱེད་པ་ཡིན། །རྐང་མར་རླུང་འཇོམས་ཁུ་སྟོབས་བད་ཀན་སྐྱེད། །ཚིལ་གྱིས་རུས་ཚིགས་ན་དང་མེས་འཚིག་དང༌། །རླུང་དང་རྣ་ཀླད་མངལ་ནད་སེལ་བར་བྱེད། །སྐྱེས་བུ་སྣུམ་ལ་བརྟེན་པར་བྱེད་པ་རྣམས། །ནང་གི་དྲོད་འབར་ཁོང་པ་དག་པ་དང༌། །ལུས་ཟུངས་འཕྲལ་བརྟས་སྟོབས་དང་མདོག་བཟང་ལྡན། །དབང་བརྟན་རྒས་སྲ་ལོ་བརྒྱ་ཐུབ་པར་བཤད། །སྔོ་ངད་སྒོག་བཙོང་ལ་སོགས་ཚ་བ་དང༌། །ཁུར་མངས་རྒྱ་ཁུར་ལ་སོགས་ཁ་བ་དང༌། །སྐམ་དང་གཤེར་བའི་གནས་སུ་སྐྱེས་པ་དང༌། །སྐམ་དང་རློན་པ་གཡོས་བྱས་རྗེན་པ་རྣམས། །དྲོ་ཡང་བསིལ་ལྕི་གྲང་བ་ཚད་ནད་སེལ། །བཙོང་སྒོག་གཉིད་འཕེལ་ཟས་ལེན་བད་རླུང་སེལ། །སྒོག་སྐྱ་ལྕི་བསིལ་སྲིན་ནད་ཚད་རླུང་སེལ། །ལ་ཕུག་གཞོན་ནུ་ཡང་དྲོ་མེ་དྲོད་སྐྱེད། །ནར་སོན་ལྕི་བསིལ་བད་ཀན་སྐྱེད་པར་བྱེད། །ཉུང་མ་དེ་བཞིན་དུག་ནད་མ་ལུས་བསྲུང༌། །རི་སྒོག་ཐམས་ཅད་འཇུ་དཀའ་ཟས་ལེན་ལྕི། །ལྕུམ་དང་ཆུ་ལོས་བད་ཀན་དང་ག་འབྱེད། །སྔོ་ཀུན་རྩ་སྒོ་འགག་ཅིང་སྨན་ནུས་འཇོམས། །དེ་ལ་གཡོས་སུ་བྱས་པའི་ཟས་སྡེ་ལ། །འབྲས་ཐུག་སླ་དང་སྐ་དང་གར་བ་དང༌། འབྲས་ཆན་རྣམས་ནི་སྔ་མ་སྔ་མ་ཡང༌། །སླ་བ་སྐོམ་རྨྱ་ཉེས་པ་ལྷག་མ་འཇོམས། །འཇུ་ཞིང་ཟུངས་སྙོམས་དྲོད་སྐྱེད་རྩ་སྦུབས་མཉེན། །སྐ་བ་དྲོད་སྐྱེད་བཀྲེས་སྐོམ་ཉམ་ཆུང་རྨྱ། །ནད་འཇུ་བྱེད་ཅིང་དྲི་མ་འགགས་པ་སེལ། །ཐུག་གར་འཁྲུ་གཅོད་ཡིད་འོང་སྐོམ་པ་སེལ། །དེ་ཕྱིར་རིམ་པས་ཉམ་ཆུང་ཁྲུས་རྗེས་བསྔགས། །འབྲས་ཆན་ལེགས་བཙོས་ཚ་བའི་སྨན་དང་བསྐོལ། ཡང་ཞིང་འཇུ་སླ་ཤ་ཁུ་འོ་བསྐོལ་ལྕི། །འབྲས་ཡོས་འཁྲུ་བ་གཅོད་དང་རུས་ཆག་སྦྱོར། །སྲུས་ཐུག་ནས་ཐུག་རྒྱུན་འགག་མེ་དྲོད་འཇོམས། །ཡོས་དྲལ་ཡང་ཞིང་འཇམ་དྲོ་ཕོ་བར་འཕྲོད། །རྩམ་པ་གྲང་མོ་སྟོབས་སྐྱེད་ལྕི་བ་ཡིན། །བཙོས་ཟན་ཡང་ལ་འཇམ་པས་འཇུ་བ་སླ། །ཁེངས་པོ་ཐམས་ཅད་ཕོ་བའི་མེ་དྲོད་འཇོམས། །ཨ་སྦྱར་འཇུ་སླ་སྟོབས་འཕྲོག་ཉེས་ཀུན་སེལ། །ཟན་ཆང་རླུང་སེལ་ཁོང་པའི་དྲོད་ལ་ཕན། །སྐྱུར་པོ་ཟས་ལེན་ཉེས་སེལ་སྙིགས་ཞབས་དམད། །ཤ་ཁུ་ཉམས་བརྟས་ཚིམ་བྱེད་རླུང་ལ་ཕན། །ཟན་སྐམ་ཚོད་མ་རླུང་ལ་མཆོག་ཏུ་བསྔགས། །ཟྭ་ཚོད་རླུང་འཇོམས་དྲོད་སྐྱེད་བད་མཁྲིས་སློང༌། །ལྕམ་པ་བེ་ཁུར་དྲོད་སྐྱེད་འཁྲུ་བ་གཅོད། །དྭ་ཚོད་རླུང་འཇོམས་རྨ་སྐེམ་བད་མཁྲིས་སྐྱེད། །སྣེ་ཚོད་མིག་ལ་གནོད་ཅིང་རྟུག་སྐམ་སེལ། །མོན་སྣེ་དམར་པོས་ཉེས་པ་གསུམ་ག་སེལ། །སྐྱབས་དང་ཁུར་ཚོད་བསིལ་ཏེ་ཚ་བ་སེལ། །སྔོ་སྒའི་ཚ་བ་མཁྲིས་ཚད་མགོ་ནད་སེལ། །སྲན་ཚོད་ཁ་ཟས་ལེན་ཞིང་བད་རླུང་སྐྱེད། །ལུས་ཀྱི་སྣུམ་འདོན་འབྲུ་མར་མ་ཞུ་སེལ། །ལོ་གསར་སྙོམས་ཤིང་བཤུར་བས་བད་རླུང་སྐྱེད། །ཡུངས་ཀར་ལོ་མ་བད་མཁྲིས་འཁྲུག་པར་བྱེད། །ལྕ་བ་ར་མཉེའི་ཚོད་མས་བད་རླུང་སེལ། །ལ་ཕུག་ཚ་བ་དྲོད་སྐྱེད་འཁྲུ་བ་གཅོད། །སྒོག་སྐྱ་སྒོག་སྔོན་ཚ་བ་རླུང་ལ་ཕན། །ལན་ཚྭས་ཁ་ཟས་ཀུན་གྱི་བྲོ་བ་སྐྱེད། །དྲོད་སྐྱེད་འཇུ་བ་སླ་ཞིང་བཤང་བ་འབྱིན། །གཡེར་མས་རྩ་སྒོ་འབྱེད་ཅིང་བད་རླུང་སྐྱེད། །སྒ་ཡིས་དྲོད་སྐྱེད་ཤིང་ཀུན་རླུང་ནད་འཇོམས། །སྤོད་ཀུན་ཟས་ཀྱི་བྲོ་སྐྱེད་ཡི་གར་འོང༌། །བཏུང་བ་འོ་མ་ཆུ་དང་ཆང་ལ་སོགས། །རིམ་བཞིན་ནད་སེལ་ལྡོག་པས་དེ་རབ་སྐྱེད། །འོ་མ་ཕལ་ཆེར་རོ་དང་ཞུ་རྗེས་མངར། །སྣུམ་ལྕི་ཟུངས་འཕེལ་མདངས་སྐྱེད་རླུང་མཁྲིས་སེལ། །རོ་ཙ་བད་ཀན་སྐྱེད་བསིལ་ལྕི་བ་ཡིན། །བ་ཡི་འོ་མ་གློ་རྡོལ་གཅོང་ལ་ཕན། །རིམས་རྙིང་གཅིན་སྙི་ཡིད་གཞུངས་འཚོ་བྱེད་ཡིན། །ར་ཡི་འོ་མས་དབུགས་མི་བདེ་བ་སེལ། །ལུག་གི་འོ་མས་རླུང་འཇོམས་སྙིང་ལ་གནོད། །འབྲི་ཡི་འོ་མ་བད་མཁྲིས་ནད་ལ་གནོད། །རྟ་བོང་འོ་མ་གློ་གསོ་རྨོངས་པར་བྱེད། །འོ་རློན་ལྕི་བསིལ་སྲིན་དང་བད་ཀན་སྐྱེད། །བསྐོལ་ན་ཡང་དྲོ་བསྡུས་ན་འཇུ་དཀའ་ལྕི། །བཞོས་ཐོག་འོ་མ་དྲོན་མོ་བདུད་རྩིར་མཚུངས། །འོ་མ་སྙིང་པོ་བཏོན་པའི་ཞོ་སྐྱ་ཡིས། །མ་སྙོམས་རིམས་ཆམ་འགྲམས་འཁྲུགས་འཁྲུ་བ་སེལ། །ཞོ་ཀུན་རོ་དང་ཞུ་རྗེས་སྐྱུར་བསིལ་སྣུམ། །རྟུག་སྐེམ་རླུང་ཚད་སེལ་ཞིང་ཡི་ག་འབྱེད། །དར་གསར་བསྐ་སྐྱུར་ཡང་ཞིང་མེ་དྲོད་སྐྱེད། །སྐྲན་མཆེར་གཞང་འབྲུམ་མར་མ་ཞུ་བ་སེལ། །ཞོ་ཁ་ཆུ་འཁྲུ་བཤང་སླ་རྩ་སྦུབས་སྦྱོང༌། །ཕྱུར་ཁུས་རླུང་མཁྲིས་མི་སྐྱེད་བད་ཀན་སེལ། །ཞོ་བཙོས་རྟུག་སྐེམ་ཚད་པས་འཁྲུ་བ་སེལ། །དཀར་རྣམས་ལུག་དང་འབྲི་ཡི་དྲོ་ལ་བཅུད། །བ་ར་བསིལ་ཡང་མཛོ་ཡི་སྙོམས་པ་ཡིན། །ཆུ་ནི་ཆར་ཆུ་གངས་ཆུ་ཆུ་ཀླུང་ཆུ། །ཆུ་མིག་ཁྲོན་པ་བ་ཚ་ཤིང་གི་ཆུ། །རིམ་པས་དང་པོ་མཆོག་ཡིན་ཕྱི་མ་དམན། །མཁའ་ལས་འབབ་པ་རོ་མི་གསལ་ལ་ཞིམ། །འཚོ་ངོམས་བསིལ་ལ་ཡང་བས་བདུད་རྩིར་མཚུངས། །གངས་ཅན་ལས་བྱུང་ཤུགས་དྲག་བརྡབས་པའི་ཆུ། །ཤིན་ཏུ་བཟང་བསིལ་མེ་ཡིས་ཐུབ་པར་དཀའ། །བརྟན་གཡུང་སྲིན་བུ་རྐང་བམ་སྙིང་ནད་སྐྱེད། །ས་གཙང་ཉི་འོད་རླུང་གིས་ཕོག་པ་བཟང༌། །འདམ་རྫབ་ཉ་ལྕིབས་རྩ་ལོ་ཤིང་གྲིབ་ཕོག །བ་ཚ་སྲོག་ཆགས་ཁུ་བས་ཉེས་ཀུན་སྐྱེད། །ཆུ་བསིལ་བརྒྱལ་ངལ་ཆང་ནད་མགོ་འཁོར་སྐྱུག །སྐོམ་དད་ལུས་ཚ་ཁྲག་མཁྲིས་དུག་ནད་སེལ། །ཆུ་སོལ་དྲོད་སྐྱེད་ཟས་འཇུ་སྐྱིགས་བུ་སེལ། །བད་ཀན་ལྟོ་སྦོས་དབུགས་མི་བདེ་བ་དང༌། །ཆམ་པ་རིམས་གསར་འཕྲལ་དུ་ཟློག་པར་བྱེད། །བསྐོལ་གྲང་བད་ཀན་མི་སྐྱེད་མཁྲིས་པ་སེལ། །ཞག་གཅིག་ལོན་ནས་དུག་འདྲ་ཉེས་ཀུན་སྐྱེད། །ཆང་ནི་མངར་སྐྱུར་ཁ་ལ་ཞུ་རྗེས་སྐྱུར། །རྣོ་དྲོ་རྩུབ་ཕྲ་ཅུང་ཟད་ཐུར་དུ་འཁྲུ། དྲོད་འབར་སྤོབས་སྐྱེད་གཉིད་འཕེལ་བད་རླུང་སེལ། །ཐལ་དྲགས་སེམས་བསྒྱུར་བག་མེད་ངོ་ཚ་འཇིག །ར་རོ་དང་པོ་བག་མེད་གནས་ལ་གནས། །རྣམ་རྟོག་ངན་བཅོམ་བདེ་བ་ཡིན་སྙམ་སེམས། །ར་རོ་གཉིས་པ་གླང་ཆེན་སྨྱོན་པ་ལྟར། །ཁ་ན་མ་ཐོ་ཚུལ་ཁྲིམས་འཆལ་བའི་གནས། །ར་རོ་ཐ་མ་སེམས་མེད་རོ་ལྟར་ཉལ། །གང་ཡང་མི་ཤེས་མུན་པའི་གནས་སུ་འགྱུར། །གསར་པ་ལྕི་ཞིང་རྙིང་པ་ཡང་བ་ཡིན། །གསར་འཇམ་ཕོ་བའི་དྲོད་སྐྱེད་འཇུ་བ་སླ། །གྲོ་ཆང་འབྲས་ཆང་ནས་ཆང་གོང་མ་ལྕི། །སོ་བ་སྲེ་ད་ཡོས་ཆང་ཡང་བ་ཡིན། །ཚ་ནི་ཁྲག་མཁྲིས་བད་ཀན་སེལ་བར་བྱེད། །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཟས་ཀྱི་ཚུལ་ཤེས་པར་བྱ་བའི་ལེའུ་སྟེ་བཅུ་དྲུག་པའོ།། །།
  དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ཟས་སྐོམ་བསྡམ་བྱ་དུག་ལྡན་མི་འཕྲོད་ཟས། །འཕྲལ་དུ་སྲོག་འདོར་ཉེས་པ་འཁྲུག་ཕྱིར་བསྲུང༌། །རྒྱལ་པོའི་ཕོ་བྲང་སྲོག་འཚོའི་སློབ་དཔོན་བཞག །དེས་ནི་ཟས་སྐོམ་དུག་ལས་ཐར་བར་འགྱུར། །དུག་ལྡན་ཟས་དེ་ཁ་དོག་དྲི་རོ་ལྡོག །མེར་བསྲེག་དུ་བ་རྨ་བྱའི་མགྲིན་འདྲ་འབྱུང༌། །མེ་ལྕེ་གཅིག་ཏུ་འཁྱིལ་ཞིང་མེ་སྟག་རྒལ། །མཐོང་ན་བྱ་རོག་སྐད་འདོན་རྨ་བྱ་དགའ། །ཁྱི་ལ་བྱིན་ན་ལྟོ་བ་དྲོས་ནས་སྐྱུག །ཤ་ལ་དུག་ཡོད་དམར་ལ་ལྕགས་མི་ལེན། སྦོས་ཤིང་ཆང་སྦྱར་མིག་བདུགས་ཚ་ཞིང་འཁྲུག །དུག་སྟེར་ཆག་ཚང་མི་དེ་ཁ་སྐམ་ཞིང༌། །རྔུལ་ཞིང་འདར་ལ་སྐྲག་ཅིང་འདུག་མི་ཚུགས། །གནོང་བག་གིས་ནི་ཕྱོགས་སུ་བལྟ་བར་བྱེད། །ཤེས་ནས་ཀུན་ལ་གནོད་པར་འགྱུར་ཕྱིར་དོར། །ཁ་ཟས་མི་འཕྲོད་ཟོས་པས་སྦྱར་དུག་མཚུངས། ཞོ་མ་ལངས་དང་ཆང་གསར་མི་འཕྲོད་དེ། །ཉ་ཡི་ཤ་དང་འོ་མ་འཕྲོད་པ་མིན། །དེ་བཞིན་འོ་མ་ཤིང་ཐོག་གཉིས་མི་འཕྲོད། །བྱ་ཡི་སྒོ་ང་ཉ་ཡི་ཤ་མི་འཕྲོད། །སྲན་མའི་ཚོད་མ་བུ་རམ་ཞོ་མི་འཕྲོད། །ཤ་མོ་ཡུངས་ཀར་མར་ལ་བརྔོས་པ་དང༌། །ཁྱིམ་བྱའི་ཤ་དང་ཞོ་བསྲེས་ཟ་བ་དང༌། །སྦྲང་རྩི་མར་ནག་ཆ་མཉམ་འཕྲོད་མི་འགྱུར། །མར་གསར་འཁར་བའི་སྣོད་དུ་ཞག་བཅུ་ལས། །སྐྱེར་པའི་མེ་ལ་ཧ་རི་ཏྲ་ཤ་བསྲེགས། །ཅོང་ཞི་ཟོས་རྗེས་ཤ་མོ་ཁུར་བ་ཟ། །ཞུན་མར་ཟོས་རྗེས་ཆུ་གྲང་འཐུང་བ་དང༌། །ཤ་ལ་དཀར་སྐྱུར་རྩམ་དྲིས་ཕོག་པ་དང༌། །བཙོས་པའི་རླངས་བསུབས་ཞག་བདུན་ལོན་པ་དང༌། །སྐྱུར་དང་འོ་མ་ལྷན་ཅིག་ཟ་བ་དང༌། །སྔ་མ་མ་ཞུ་ཕྱི་མ་ཟོས་པ་ཡིས། །ཁ་ཟས་མི་འཕྲོད་ཟོས་པས་འཐབ་པ་དང༌། །མ་གོམས་དུས་མིན་ཟོས་པས་དུག་ཏུ་འགྱུར། །རྩོལ་བཅས་སྣུམ་བསྟེན་དྲོད་ཆེ་དར་ལ་བབ། །སྟོབས་ལྡན་གོམས་པར་ཟོས་ལ་གནོད་མི་འགྱུར། །མི་འཕྲོད་འཕྲོད་པ་བསྟེན་ནམ་སྤང་བྱེད་ན། །འདྲིས་གོམས་སྒོ་ནས་ཆ་ཡིས་བསླབ་པར་བྱ། །འཕྲལ་དུ་སྤང་བསྟེན་ཉེས་པ་མྱུར་དུ་འཁྲུག །གནོད་པ་གནོད་བྱའི་བདག་ཉིད་ཉེར་གྱུར་པས། །ཕན་མེད་གནོད་པར་བྱེད་པ་མཁས་པ་སྤང༌། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཁ་ཟས་བསྡམ་པའི་ལེའུ་སྟེ་བཅུ་བདུན་པའོ།། །།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །དུས་ཀུན་ཏུ་ནི་ཟས་ཚོད་རན་པར་བཟའ། །ཟས་རྣམས་ལྕི་ཡང་ཚད་ལས་དཔག་བྱ་སྟེ། །ཡང་ལ་འགྲངས་ཤིང་ལྕི་ལ་ཕྱེད་འགྲངས་ཙམ། །བདེ་བླག་འཇུ་སླ་ཚོད་ཟིན་ཞེས་སུ་བཤད། །དེ་ནི་ལུས་འཚོ་མེ་དྲོད་སྐྱེད་བྱེད་ཡིན། །གལ་ཏེ་ཟས་ཚོད་མ་ཟིན་ཆུང་གྱུར་ན། །སྟོབས་མདངས་མི་འཕེལ་རླུང་ནད་མ་ལུས་འབྱུང༌། །ཚད་ལས་ཐལ་ན་མ་ཞུ་བེ་སྣབས་སྐྱེད། །དེ་ཡིས་མེ་མཉམ་རླུང་རྒྱུའི་རྩ་སྦུབས་བཀག །ཕོ་བའི་དྲོད་ཉམས་ཉེས་པ་མ་ལུས་སྐྱེད། །དེ་ཕྱིར་ཟས་དང་ཕོ་བའི་མེ་དྲོད་སྦྱར། །ལྟོ་བའི་ཆ་གཉིས་ཟས་ལ་ཆ་གཅིག་སོམ། །ཆ་བཞི་པ་ནི་རླུང་གི་གནས་སུ་བཞག །ཟས་ཟོས་རྗེས་སུ་སྐོམ་འཐུངས་ངོམས་དང་ཁྱབ། །ཟས་འདྲུལ་འཇུ་ཞིང་ལུས་བརྟས་སྟོབས་འཕེལ་བྱེད། །སྐད་འགགས་གློ་རྡོལ་ལུད་པ་ཆམ་པ་སོགས། །ནམ་ཚོང་ཡན་ཆད་ནད་ལ་གནོད་པ་ཡིན། །མེ་དྲོད་ཆུང་ལ་ཤ་ཟོས་ཆང་འཐུང་བྱ། །མི་འཇུ་སྦོས་ན་ཟོས་རྗེས་ཆུ་སོལ་བཏུང༌། །སྐེམ་པོ་རྒྱས་པར་བྱེད་ན་ཆང་བཏུང་བྱ། །སྦོམ་པོ་དབྲི་ལ་སྦྲང་རྩིའི་ཆུ་བཏུང་ངོ༌། །ཞོ་ཆང་དུག་སྦགས་སྦྲང་རྩི་ཟོས་པ་ལ། །རྗེས་སུ་ཆུ་བསིལ་འཐུངས་ན་ཕན་པ་ཡིན། །ཟས་ཟོས་བར་མཐའ་ཐོག་མར་སྐོམ་འཐུངས་ན། །ཉམ་འཚག་རན་ཞིང་སྦོམ་དང་སྐེམ་པོར་འགྱུར། །ཉེས་པ་ལམ་མིན་མི་འགྲོ་མེ་དྲོད་འབར། །ལུས་ཡང་དང་ག་བདེ་ལ་དབང་པོ་གསལ། །སྟོབས་ཆེ་བཤང་གཅི་འོག་རླུང་བདེ་བར་རྒྱུ། །ཟས་ཚོད་ལེགས་པར་ཟིན་ལས་འབྱུང་བར་འགྱུར། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཁ་ཟས་བསྲུང་བ་དང་ཟས་ཚོད་རན་པར་བཟའ་བའི་ལེའུ་སྟེ་བཅོ་བརྒྱད་པའོ།། །། དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །སྦྱོར་བ་སྨན་གྱི་གནས་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག །ནད་ལ་གསོ་བར་བྱེད་པའི་གཉེན་པོ་ཡི། །སྦྱོར་བ་སྨན་གྱི་གནས་ལ་བསླབ་བྱ་ན། །རོ་དང་ཞུ་རྗེས་ནུས་པ་སྦྱར་ཐབས་བཞི། །དང་པོ་རོ་ལ་རྟེན་དང་དབྱེ་བ་དང༌། ངོ་བོ་སྡེ་ཚན་ལས་དང་རྣམ་པ་ལྔ། །རྟེན་ནི་འབྱུང་བ་ལྔ་ལས་སྐྱེ་འགྱུར་ཏེ། །ས་ཡིས་གཞི་རྟེན་ཆུས་རླན་མེ་ཡིས་དྲོད། །རླུང་གིས་བསྐྱོད་བྱེད་ནམ་མཁས་གོ་ཕྱེ་བས། །དེས་བསྐྱེད་གྱུར་ཀྱང་ཤས་ཆེར་རོ་གཅིག་མིན། །ས་ཆུ་མེ་ས་ཆུ་མེ་ཆུ་དང་རླུང༌། །མེ་རླུང་ས་རླུང་གཉིས་ཀྱིས་རོ་དྲུག་སྐྱེད། །ས་སྨན་ལྕི་བརྟན་རྟུལ་འཇམ་སྣུམ་ལ་སྐམ། །མཁྲང་ལ་བརྟས་དང་སྡུད་བྱེད་རླུང་ནད་སེལ། །ཆུ་སྨན་སླ་བསིལ་ལྕི་རྟུལ་སྣུམ་ལ་མཉེན། །བརླན་ཞིང་འཇམ་ལ་སྡུད་བྱེད་མཁྲིས་ནད་སེལ། །མེ་སྨན་ཚ་རྣོ་སྐམ་རྩུབ་ཡང་སྣུམ་གཡོ། །དྲོད་སྐྱེད་སྨིན་ཅིང་མདོག་བྱེད་བད་ཀན་སེལ། །རླུང་སྨན་ཡང་གཡོ་གྲང་རྩུབ་སྐྱ་ལ་སྐམ། །སྲ་ཞིང་བསྐྱོད་དང་ཁྱབ་བྱེད་བད་མཁྲིས་སེལ། །ནམ་མཁའ་འབྱུང་བཞིའི་སྨན་ལ་སྤྱིར་ཁྱབ་སྟེ། །ཁོང་སྟོང་ཡངས་པའི་གོ་འབྱེད་འདུས་ནད་སེལ། །དེ་བས་དངོས་དང་སྦྱར་བའི་དབང་གྱུར་ལས། །ས་སྟེང་སྨན་མིན་ཅི་ཡང་ཡོད་མ་ཡིན། །གྱེན་འདྲེན་སྨན་ནི་མེ་དང་རླུང་ཡིན་ཏེ། །ཐུར་འགྲོ་ས་དང་ཆུ་ལས་བྱུང་བའི་ཕྱིར། བཀྲུ་སྨན་ཕལ་ཆེར་དང་པོའི་རོ་ལས་འབྱུང༌། །རོ་ནི་མངར་སྐྱུར་ལན་ཚྭ་ཁ་ཚ་བསྐ། །གོ་རིམ་བཞིན་དུ་འཚོ་བྱེད་སྟོབས་ཆེན་ཡིན། །ངོ་བོ་ལྕེ་ལ་གསལ་བས་རོ་ཞེས་བྱ། །དེ་ཡང་མངར་བའི་རོ་དེ་མྱངས་པའི་ཚེ། །ཁ་ལ་ཆགས་ཤིང་ཞིམ་པས་སྲེད་པ་སྐྱེ། །སྐྱུར་བ་སོ་བརྩེ་བཞིན་སྡུད་ཁ་ཆུ་འཛག །ལན་ཚྭ་རེག་ན་ཚ་ཞིང་མཆིལ་མ་འདུ། །ཁ་བ་ཁ་ཡི་དྲི་སྦྱོང་ཡི་ག་ལྡོག །ཚ་བ་ཁ་ལྕེ་བསྲེག་ཅིང་མིག་ཆུ་འཛག །བསྐ་བ་ལྕེ་རྐན་ལ་ཆགས་རྩུབ་སྙམ་བྱེད། །རོ་དྲུག་སོ་སོ་སྨན་གྱི་སྡེ་བསྟན་པ། །ཤིང་མངར་རྒུན་འབྲུམ་གུར་ཀུམ་ཅུ་གང་དང༌། །དོང་ག་ར་མཉེ་ཉེ་ཤིང་ལྕ་བ་དང༌། །ཀ་ར་བུ་རམ་སྦྲང་དང་ཤ་མར་སོགས། །དེ་དང་དེ་འདྲ་མངར་བའི་སྨན་སྡེ་ཡིན། །སེ་འབྲུ་སྟར་བུ་བསེ་ཡབ་སྐྱུ་རུ་ར། །རྒྱ་ཤུག་ད་ཏྲིག་ཞོ་དར་ཆང་དང་རྩབས། །དེ་དང་དེ་འདྲ་ལ་སོགས་སྐྱུར་བའི་སྡེ། །རྒྱམ་ཚྭ་རྒྱ་ཚྭ་ལྕེ་མྱང་ཚྭ་དང་ནི། །རྭ་ཚྭ་ཁ་རུ་ཚྭ་དང་ཙབས་རུ་ཚྭ། །ཟེ་ཚྭ་ལྦ་ཚྭ་མཛེ་ཚྭ་ཐལ་ཚྭ་དང༌། །ཤིང་ཚ་ཡ་བཀྵ་ར་བུལ་ཏོག་རྣམས། །དེ་དང་དེ་འདྲ་ལ་སོགས་ལན་ཚྭའི་སྡེ། །ནིམ་པ་ཏིག་ཏ་བོང་ང་དཀར་པོ་དང༌། །ཧོང་ལེན་གསེར་གྱི་མེ་ཏོག་དུག་མོ་ཉུང༌། །གླ་རྩི་མཁྲིས་པ་སྐྱེར་པ་བ་ཤ་ཀ །བྲག་ཞུན་ཀྱི་ལྕེ་རེ་སོན་ལ་སོགས་པ། །དེ་དང་དེ་འདྲ་ཁ་བའི་སྨན་སྡེ་ཡིན། །ན་ལེ་ཤམ་དང་བཅའ་སྒ་པི་པི་ལིང༌། །སྒ་གཤེར་ཤིང་ཀུན་སྲུབ་ཀ་ལྕེ་ཚ་བ། །དྭ་བ་བཙོང་དང་སྒོག་སྐྱ་ལ་སོགས་པ། །དེ་དང་དེ་འདྲ་ཚ་བའི་སྨན་སྡེ་ཡིན། །ཙན་དན་ཨ་རུ་ར་དང་བ་རུ་ར། །ཨུཏྤལ་ག་དུར་སྨག་དང་མོན་ཆ་ར། །འོམ་བུ་ལ་སོགས་དེ་འདྲ་བསྐ་བའི་སྡེ། །ག་བུར་ཆུ་མ་ཙི་ལ་སོགས་པ་ཡི། །ལྡན་པའི་རོ་རྣམས་དེ་ལས་བསྒྲེས་ཏེ་དཔྱད། །ནད་གང་སེལ་བ་རོ་ཡི་ལས་བསྟན་པ། །མངར་སྐྱུར་ལན་ཚྭ་ཚ་བས་རླུང་འཇོམས་ཤིང༌། །ཁ་དང་མངར་དང་བསྐ་བས་མཁྲིས་པ་སེལ། །ཚ་སྐྱུར་ལན་ཚྭས་བད་ཀན་སེལ་བར་བྱེད། །ཁྱད་པར་མངར་བས་འཕྲོད་ཅིང་ཟུངས་སྟོབས་སྐྱེད། །རྒས་བྱིས་སྐེམ་པོ་གྲེ་བ་གློ་ལ་ཕན། །ལུས་བརྟས་རྨ་འབྱོར་མདངས་བཀྲ་དབང་པོ་གསལ། །ཚེ་རིང་འཚོ་བྱེད་དུག་དང་རླུང་མཁྲིས་སེལ། །བསྟེན་དྲགས་བད་ཀན་ཚིལ་སྐྱེད་མེ་དྲོད་འབྲི། །ལུས་སྦོམ་གཅིན་ནད་ལྦ་བ་རྨེན་བུ་སྐྱེད། །སྐྱུར་བས་དྲོད་སྐྱེད་ཡི་ག་འབྱེད་པ་དང༌། །ཚིམ་འདྲུལ་གཅོད་བྱེད་འཇུ་ཞིང་རེག་པ་སེལ། །རླུང་འགགས་རྒྱུ་ཞིང་བསྟེན་དྲགས་ཁྲག་མཁྲིས་སྐྱེད། །ལུས་ལྷོད་རབ་རིབ་མགོ་འཁོར་སྐྱ་རྦབ་འོར། །མེ་དབལ་གཡན་པ་ཐོར་བུ་སྐོམ་རིམས་སྐྱེད། །ལན་ཚྭས་སྲ་འཁྱིལ་འགགས་པ་འབྱིན་པ་དང༌། །དུགས་ཀྱིས་རྔུལ་དང་དྲོད་སྐྱེད་ཡི་ག་འབྱེད། །བསྟེན་དྲགས་སྐྲ་འབྱི་སྐྲ་དཀར་གཉེར་མ་མང༌། །སྟོབས་འབྲི་སྐོམ་མཛེ་མེ་དབལ་ཁྲག་མཁྲིས་སྐྱེད། །ཁ་བས་ཡི་ག་འཆུས་དང་སྲིན་སྐོམ་དུག །མཛེ་དང་བརྒྱལ་དང་རིམས་རློན་མཁྲིས་པ་འཇོམས། །འདྲུལ་དང་ཚིལ་ཞག་རྐང་མར་བཤང་གཅི་སྐེམ། །ཡིད་གཞུངས་ནུ་མའི་ནད་དང་སྐད་འགགས་སེལ། །བསྟེན་དྲགས་ཟུངས་འཛད་རླུང་དང་བད་ཀན་སྐྱེད། །ཚ་བས་ལྐོག་ནད་གག་པ་མཛེ་འོར་སེལ། །རྨ་འཇིག་དྲོད་སྐྱེད་འཇུ་བྱེད་ཡི་ག་འབྱེད། །ཚིལ་དང་འདྲུལ་བག་སྐེམ་སྦྱོང་རྩ་སྦུབས་འབྱེད། །བསྟེན་དྲགས་ཁུ་བ་སྟོབས་ཟད་ལུས་འཁུམས་འདར། །བརྒྱལ་ཞིང་རྐེད་པ་རྒྱབ་སོགས་ན་བར་བྱེད། །བསྐ་བས་ཁྲག་མཁྲིས་ཚིལ་དང་འདྲུལ་བག་སྐེམ། །རྨ་འཚོ་ཚིལ་དང་ལྤགས་མདོག་དྭངས་པར་བྱེད། །བསྟེན་དྲགས་བེ་སྣབས་འཁྱིལ་དང་བཤང་བ་སྲི། །ལྟོ་སྦོ་སྙིང་ནད་སྐེམ་དང་རྩ་སྒོ་འགག །མདོར་བསྡུས་མངར་བའི་རོ་ཡིས་རླུང་མཁྲིས་སེལ། །ནས་རྙིང་སྐམ་སའི་ཤ་རྣམས་མ་གཏོགས་པ། །ཕལ་ཆེར་བད་ཀན་སྐྱེད་པར་བྱེད་ན་ཡང༌། །གཡག་རྒོད་ཉ་ལུག་ཤ་དང་སྦྲང་རྩི་ཕན། །སྐྱུར་བས་བད་ཀན་སེལ་བྱེད་མཁྲིས་སྐྱེད་ཀྱང༌། །སྐྱུ་ར་ར་ཡིས་ཁྲག་མཁྲིས་ཚ་བ་སེལ། །ལན་ཚྭས་རླུང་དང་བད་ཀན་སེལ་བྱེད་ཅིང༌། །ལྕེ་མྱང་རྒྱམ་ཚ་མ་གཏོགས་མཁྲིས་པ་སྐྱེད། །ཧ་ཅང་ཐལ་དྲགས་ལྕི་བས་བད་ཀན་སྐྱེད། །ཁ་བས་མཁྲིས་སེལ་བད་རླུང་སྐྱེད་ན་ཡང༌། །ཀ་ད་དང་སླེ་ཏྲེས་བད་རླུང་སེལ། །ཚ་བས་རླུང་དང་བད་ཀན་སེལ་བྱེད་ལ། །སྒོག་སྐྱ་པི་པི་ལིང་མིན་མཁྲིས་པ་སྐྱེད། །ཧ་ཅང་ཐལ་དྲགས་ཡང་རྩུབ་རླུང་ཡང་སྐྱེད། །བསྐ་བས་མཁྲིས་སེལ་ཨ་རུ་བ་རུ་ར། །མ་གཏོགས་ཕལ་ཆེར་བད་རླུང་གཉིས་ལ་གནོད། །ཞུ་རྗེས་ཕོ་བའི་མེ་དང་ཕྲད་པའི་ཚེ། །བད་མཁྲིས་རླུང་གིས་རིམ་པར་ཞུ་བ་ལས། །མངར་དང་ལན་ཚྭའི་ཞུ་རྗེས་མངར་བར་ཞུ། །སྐྱུར་བ་རོ་མཚུངས་ཁ་ཚ་བསྐ་གསུམ་ཁ། །ཉེས་པ་གསུམ་པོ་གཉིས་གཉིས་རེ་རེས་སེལ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རོ་དང་ཞུ་རྗེས་བསྟན་པའི་ལེའུ་སྟེ་བཅུ་དགུ་པའོ།། །།

  དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །སྨན་གྱི་ནུས་པ་རོ་ནུས་ངོ་བོ་གཉིས། །སྤྱི་དང་བྱེ་བྲག་ཅེས་སུ་གསུངས་པ་ཡིན། །དང་པོ་ནུས་སྟོབས་ཡོན་ཏན་གསུམ་དུ་བཤད། །ནུས་པ་ལྕི་སྣུམ་བསིལ་དང་རྟུལ་བ་དང༌། །ཡང་རྩུབ་ཚ་དང་རྣོ་བ་རྣམ་པ་བརྒྱད། །དང་པོ་བཞི་པོས་རླུང་དང་མཁྲིས་པ་སེལ། །འོག་མ་བཞི་ཡིས་བད་ཀན་སེལ་བར་བྱེད། །ཡང་རྩུབ་བསིལ་བ་གསུམ་གྱིས་རླུང་སྐྱེད་ཅིང༌། །ཚ་རྣོ་སྣུམ་པ་གསུམ་གྱིས་མཁྲིས་པ་སྐྱེད། །ལྕི་སྣུམ་བསིལ་རྟུལ་བཞི་ཡིས་བད་ཀན་སྐྱེད། །ཡོན་ཏན་མ་ལུས་སྙིང་པོར་གྱུར་པ་དང༌། །ནུས་པའི་ཁྱད་པར་ལྡན་པས་མཐུ་ཞེས་བརྗོད། །གངས་ཅན་འབིགས་བྱེད་ཟླ་ཉིའི་སྟོབས་ཅན་ལས། །བསིལ་དྲོད་ཕུལ་དུ་བྱུང་བས་སྟོབས་ཞེས་བྱ། །དེ་ལ་ཚ་བས་གྲང་བའི་ནད་རྣམས་སེལ། །བསིལ་བས་ཚ་བའི་ནད་རྣམས་སེལ་བར་བྱེད། །ཡོན་ཏན་འཇམ་དང་ལྕི་དྲོ་སྣུམ་དང་བརྟན། །གྲང་དང་རྟུལ་བ་བསིལ་མཉེན་སླ་དང་སྐམ། །སྐྱ་དང་ཚ་བ་ཡང་དང་རྣོ་རྩུབ་གཡོ། །བཅུ་དང་བདུན་གྱིས་མཚན་ཉིད་ཉི་ཤུ་འཇོམས། །དེ་ཕྱིར་ཡོན་ཏན་ཞེས་སུ་བཤད་པ་ཡིན། །དེ་དག་ཕལ་ཆེར་རོ་ལས་རྗེས་འབྱུང་སྟེ། །རོ་ནི་ས་སོགས་རྣམས་ལ་བརྟེན་པའི་ཕྱིར། །ལྕི་སྣུམ་ལ་སོགས་དེ་ལས་འབྱུང་བ་ཡིན། །ལན་ཚྭ་བསྐ་མངར་རྣམ་གསུམ་རིམ་བཞིན་ལྕི། །དེ་བཞིན་ལན་ཚྭ་སྐྱུར་མངར་སྣུམ་པ་ཡིན། །བསྐ་ཁ་མངར་བསིལ་ཁ་བསྐ་མངར་བ་རྟུལ། །སྐྱུར་ཚ་ཁ་བ་རྣམ་གསུམ་ཡང་ལ་རྩུབ། །ཚ་སྐྱུར་ལན་ཚྭ་རྣམ་གསུམ་ཚ་ལ་རྣོ། །རོ་སོགས་མ་བཅོས་གང་ཡང་སྟོབས་ཅན་ཡིན། །རོ་མཉམ་ནུས་པ་སོ་སོ་རྟེན་སྟོབས་དང༌། །གྱུར་པ་སྦྱར་བའི་དབང་ལས་འབྱུང་འགྱུར་ཏེ། །མི་མཐུན་འོག་མས་གོང་མ་ཟིལ་གྱིས་གནོན། །ཐམས་ཅད་མཐུན་ན་རོ་ཡིས་ལས་བྱེད་ལ། །རོ་བཞིན་མི་གནོད་ཞུ་རྗེས་ལས་བྱེད་དེ། །རོ་ལས་གོ་ལྡོག་ནུས་པས་ལས་བྱེད་པས། །རོ་བསྡེབས་ནུས་བསྡེབས་ཞུ་རྗེས་སྡེབས་ཏེ་སྦྱར། །ངོ་བོ་རྫས་རེའི་ནུས་པ་བསྟན་པ་ནི། །རིན་པོ་ཆེ་ཡི་སྨན་དང་ས་རྡོའི་སྨན། །ཤིང་སྨན་རྩི་སྨན་ཐང་སྨན་སྔོ་སྨན་དང༌། །སྲོག་ཆགས་སྨན་དང་དབྱེ་བ་བརྒྱད་དུ་བཤད། །དང་པོ་རིན་པོ་ཆེ་ཡི་ནུས་པ་ནི། །གསེར་གྱིས་ཚེ་རིང་རྒས་སྲ་དབྱིག་དུག་སེལ། །དངུལ་གྱིས་ཆུ་སེར་ནད་དང་རྣག་ཁྲག་སྐེམ། །ཟངས་ཀྱིས་རྣག་སྐེམ་གློ་མཆིན་ཚ་བ་སེལ། །ལྕགས་ཀྱིས་མཆིན་དུག་མིག་ནད་སྐྱ་རྦབ་སེལ། །གཡུ་ཡིས་དུག་དང་མཆིན་པའི་ཚ་བ་སེལ། །མུ་ཏིག་ཀླད་པ་འཛག་གཅོད་དུག་ནད་སེལ། །ཉ་ཕྱིས་ནུས་པ་མུ་ཏིག་ཁྱད་པར་མེད། །དུང་གིས་རྣག་སྐེམ་འགྱིངས་འབིགས་རུས་ཚད་སེལ། །བྱུ་རུས་མཆིན་ཚད་རྩ་ཚད་དུག་ཚད་སེལ། །མུ་མེན་དུག་དང་ཆུ་སེར་མཛེ་ནད་སེལ། །རྡོ་ཡི་སྨན་གྱི་ནུས་པ་བསྟན་པ་ནི། །སྨུག་པོ་སྦལ་རྒྱབ་ཕོ་སྦལ་མོ་སྦལ་གཉིས། །ཆུ་སེར་འཕུལ་འདྲེན་སྐེམ་ཞིང་ལྷ་བ་འཛིན། །རུས་པ་ཆག་པ་སྦྱོར་ཞིང་ཀླད་པ་སྡོམ། །དཀར་པོ་སྦལ་རྒྱབ་དཀར་པོ་ཆིག་ཐུབ་དང༌། །སྨུག་པོ་ཆིག་ཐུབ་ལ་སོགས་དེ་དང་འདྲ། །གངས་ཐིགས་དེ་བཞིན་མཆིན་པའི་ཚ་བ་སེལ། །ཁབ་ལེན་མདེའུ་འབྱིན་ཀླད་རུས་རྩ་ནད་སེལ། །བེ་སྣབས་རུས་སྦྱོར་རྨེན་གཅོད་ཤའུ་སྐྱེད། ། མཉྫི་ར་ཡིས་རུས་པའི་ཚད་པ་སེལ། །ཕག་མགོས་རུས་པ་གསོ་ཞིང་ཆུ་སེར་འདྲེན། །བྱེ་མགོ་དེ་བཞིན་ཤ་འུ་སྐྱེད་པ་དང་། །གསེར་རྡོ་དངུལ་རྡོ་ཆུ་སེར་འདྲེན་པར་བྱེད། །སྟང་ཟིལ་གསེར་ཟིལ་དངུལ་ཟིལ་རུས་མདོག་འབྱིན། །གྲུ་བཞི་ཀླད་པ་གསོ་ཞིང་ཆུ་སེར་འདྲེན། །ཅོག་ལ་མ་ཡིས་རྩ་དང་ལྷ་བ་འཛིན། །རྡོ་ཀླད་ཀླད་པ་སྡོམ་ཞིང་ཤ་འུ་གསོ། །ལི་གྲིས་རུལ་གཅོད་རྡོ་ཆུས་རུས་པ་སྦྱོར། །རྡོ་མཁྲིས་རྩ་སྡོམ་གཤའ་དཀར་ཤ་འུ་སྐྱེད། །ལྡོང་རོས་བ་བླ་རྨེན་ངན་རུལ་བ་གཅོད། །རྡོ་སོལ་རྡོ་རྣམས་འཇུ་ཞིང་རྩ་ཁ་སྡོམ། །བ་ནུ་རྡོ་རྒྱུས་མཐིང་རྒྱུས་ཆུ་བ་གསོ། །ཏི་ཚ་སེར་པོ་རྨ་འདྲུབ་མིག་ལ་ཕན། །མཚལ་གྱིས་རྨ་འདྲུབ་གློ་མཆིན་རྩ་ཚད་སེལ། །ལིག་བུ་མིག་དང་བཙག་ཡུག་རྣམ་ལ་སོགས། །མིག་ནད་རུས་ཚད་སེལ་ཞིང་ཆུ་སེར་སྐེམ། །ཅོང་ཞིས་འཁྲུ་གཅོད་བད་ཀན་ཚ་བ་སེལ། །རྡོ་ཐལ་ཕོ་བའི་བད་ཀན་འདྲིལ་བ་གཅོད། །ཧ་ཤིག་རྩ་སྦྱོང་མོ་རྡེ་རྡེ་ནད་སེལ། །ས་ཡི་སྨན་གྱི་ནུས་པ་བསྟན་པ་ནི། །གསེར་གྱི་བྱེ་མས་མཁལ་ནད་ཆུ་འགགས་སེལ། །སིནྡྷུ་ར་ཡིས་རྩ་ཚད་དོན་རྨ་གསོ། །རྣག་ཁྲག་སྐེམ་ཞིང་མེས་འཚིག་རྨ་ལ་ཕན། །ཟེ་ཚྭས་རྡོ་འཇུ་རྡེ་འུ་རྡོ་སྐྲན་བཤིག །ཡ་བཀྵ་ར་དྲོད་སྐྱེད་སྐྲན་ནད་སྦྱོང་། །བུལ་ཏོག་རུལ་གཅོད་རྩམ་པ་མྱགས་པར་བྱེད། །མུ་ཟི་སེར་པོ་གདོན་འཇོམས་རྣག་ཁྲག་སྐེམ། །ནག་མཚུར་སེར་མཚུར་རུལ་གཅོད་སྐྲན་ལ་བརྐོ། །བིག་པན་འབྲས་གཅོད་སྐྲན་བཤིག་ལིང་ཐོག་ལེན། །རྡོ་དྲེག་དུག་དང་ཚད་པ་རྙིང་པ་སེལ། །བྲག་ཞུན་ཚད་པའི་ནད་རྣམས་ཀུན་ལ་ཕན། །ཁྱད་པར་ཕོ་མཆིན་མཁལ་ཚད་སེལ་བའི་མཆོག །ཤིང་སྨན་རྩ་བ་ལྡུམ་བུ་སྡོང་པོ་དང་། །ཡལ་ག་རྐང་དང་ཤུན་པ་ཐང་ཆུ་དང་། །ལོ་མ་མེ་ཏོག་འབྲས་བུ་བཅུ་རུ་འགྱུར། །རྩི་སྨན་རྩ་ཤིང་སྲོག་ཆགས་ལས་བྱུང་བ། །ཐང་སྨན་རྩ་བ་ངར་པ་ལོ་མ་དང་། །མེ་ཏོག་འབྲས་བུ་ལྔ་རུ་འགྱུར་བ་ཡིན། །དེ་དག་གང་ལ་གང་ཕན་ནུས་པ་ནི། །ག་བུར་ཚ་བ་རྒྱས་པ་ཐོག་བབས་གསོད། །རྙིངས་ཤིང་ཞེན་པའི་ཚ་བ་རྩད་ནས་འབྱིན། །ཙན་དན་དཀར་པོས་གློ་སྙིང་འཁྲུགས་ཚད་སེལ། །ཙན་དན་དམར་པོས་ཁྲག་གི་ཚད་པ་སེལ། །ཨ་ག་རུ་ཡིས་སྙིང་སྲོག་ཚ་བ་སེལ། །གི་ཝཾ་རིམས་དུག་མཆིན་ཚད་སྣོད་ཚད་སེལ། །ཅུ་གང་གློ་ནད་ཀུན་སེལ་རྨ་ཚད་གཅོག །གུར་ཀུམ་མཆིན་ནད་ཀུན་སེལ་རྩ་ཁ་སྡོམ། །སུག་སྨེལ་མཁལ་ནད་གྲང་བ་མ་ལུས་སེལ། །ཛཱ་ཏིས་རླུང་འཇོམས་སྙིང་གི་ནད་རྣམས་སེལ། །ལི་ཤིས་སྲོག་རྩའི་ནད་དང་གྲང་རླུང་སེལ། །ཀ་ཀོ་ལ་ཡིས་ཕོ་མཆེར་གྲང་བ་སེལ། །གླ་རྩིས་དུག་སྲིན་མཁལ་མཆིན་གཉན་ནད་སེལ། །དོམ་མཁྲིས་རྩ་སྡོམ་རུལ་གཅོད་ཤ་འུ་སྐྱེད། །ཨུཏྤལ་གློ་མཆིན་ཚད་པ་མ་ལུས་སེལ། །ནཱ་ག་པུཥྤ་ན་ག་གེ་སར་དང་། །པདྨ་གེ་སར་གློ་མཆིན་སྙིང་ཚད་སེལ། །ཟི་ར་དཀར་པོས་གློ་ཡི་ཚད་པ་སེལ། །ཟི་ར་ནག་པོས་མཆིན་པའི་གྲང་བ་སེལ། །ལ་ལ་ཕུད་ཀྱིས་ཕོ་ནད་གྲང་བ་སེལ། །སོ་མ་ར་ཛས་ལྤགས་ནད་ཆུ་སེར་སེལ། །ཐལ་ཀ་རྡོ་རྗེ་དག་ཀྱང་དེ་བཞིན་ནོ། །གསེར་གྱི་མེ་ཏོག་སྣོད་ཚད་མཁྲིས་ཚད་སེལ། །གསེར་གྱི་ཕུད་བུས་མཁྲིས་པ་གྱེན་དུ་འདྲེན། །དུག་མོ་ཉུང་གིས་མཁྲིས་སེལ་ཚ་འཁྲུ་གཅོད། །རྒུན་འབྲུམ་གློ་ནད་སེལ་ཞིང་ཚད་པ་སྦྱོང་། །འུ་སུས་ཕོ་བའི་བད་ཀན་ཚ་བ་སེལ། །སྟར་བུས་གློ་བརྐོ་ཁྲག་འཇུ་བད་ཀན་གཅོད། །བསེ་ཡབ་བད་ཀན་ཚ་བ་སེལ་བར་བྱེད། །སེ་འབྲུས་ཕོ་བའི་ནད་རྣམས་མ་ལུས་སེལ། །མེ་དྲོད་སྐྱེད་ཅིང་བད་ཀན་གྲང་ནད་འཇོམས། །ན་ལེ་ཤམ་གྱིས་བད་ཀན་གྲང་བ་སེལ། །པི་པི་ལིང་གིས་གྲང་ནད་མ་ལུས་སེལ། །སྨན་སྒས་དྲོད་སྐྱེད་ཟས་ལེན་བད་རླུང་འཇོམས། །སྒ་སྐྱས་བད་རླུང་སེལ་ཞིང་ཁྲག་འཁྱགས་འཇུ། །ཙི་ཏྲ་ཀ་སྟོབས་མེ་འདྲ་མེ་དྲོད་སྐྱེད། །འོར་ནད་གཞང་འབྲུམ་སྲིན་ནད་མཛེ་ནད་སེལ། །ཤིང་ཚས་ཕོ་མཆིན་གྲང་རླུང་སེལ་བར་བྱེད། །ཀ་རཉྫ་ཡིས་ཕོ་བའི་མེ་དྲོད་སྐྱེད། །ཤིང་ཀུན་སྲིན་འཇོམས་གྲང་ནད་སྙིང་རླུང་སེལ། །བྱི་ཏང་ག་ཡིས་སྲིན་སེལ་མེ་དྲོད་སྐྱེད། །མ་རུ་ཙེ་ཡིས་སྲིན་ནད་སེལ་བར་བྱེད། །གོ་བྱེས་སྲིན་གསོད་རུལ་གཅོད་ཕོ་རིམས་སེལ། །སྤོས་དཀར་ཆུ་སེར་སྦྱོང་ཞིང་སྐེམ་པར་བྱེད། །གུ་གུལ་ས་གདོན་ལྷོག་པ་གཉན་གཟེར་འཇོམས། །ཤེལ་ཏས་ལྷ་རུས་ཆུ་སེར་བཙོན་དུ་འཛིན། །རྒྱ་ཚྭས་དུག་དང་སྲིན་གསོད་རྩ་ནད་སྦྱོང་། །གག་པ་ཤ་རོ་གཅོད་ཅིང་ཆུ་འགགས་འབིགས། །རྒྱམ་ཚྭས་བད་རླུང་མ་ཞུ་གྲང་བ་སེལ། །ལྕེ་མྱང་ཚྭ་ཡང་དེ་བཞིན་མིག་ལ་ཕན། །ཁ་རུ་ཚྭ་དང་ཙབས་རུ་ཚྭ་གཉིས་ཀྱིས། །དྲོད་སྐྱེད་སྦོ་སྒྲེག་འགྱིངས་དང་བད་རླུང་འཇོམས། །རྭ་ཚ་ཐལ་ཚྭས་སྣོད་ཀྱི་གྲང་བ་སེལ། །མཛེ་ཚྭས་ཁྲག་འཇུ་རྨ་ཡི་ཆུ་སེར་འདྲེན། །ཚ་ལས་རྨ་འདྲུབ་ཁྲག་འཇུ་སྦྱོང་བར་བྱེད། །ལྦ་ཚྭས་ལྦ་བ་འཇོམས་པར་བྱེད་པའོ། །ཨ་རུ་ལན་ཚྭ་མ་གཏོགས་རོ་ལྔ་ལྡན། །འཚོ་བྱེད་དྲོད་སྐྱེད་ཟས་འཇུ་འཕྲོད་པར་བྱེད། །རླུང་མཁྲིས་བད་ཀན་ལས་གྱུར་ནད་ཀུན་འཇོམས། །དེ་ལ་རིགས་ལྔ་རྣམ་རྒྱལ་འཇིགས་མེད་དང་། །བདུད་རྩི་འཕེལ་བྱེད་སྐེམ་པོ་ལྔ་ཡིན་ཏེ། །རྣམ་པར་རྒྱལ་བ་ཀུ་བའི་མཇུག་མ་འདྲ། །རླུང་མཁྲིས་བད་ཀན་འདུ་བའི་ནད་རྣམས་སེལ། །ཁྱད་པར་བཀྲ་ཤིས་དོན་ཀུན་འགྲུབ་པས་བཟང་། །འཇིགས་མེད་ཟུར་ལྔ་མིག་ནད་གདོན་ལ་བསྔགས། །བདུད་རྩི་ཤ་མཐུག་སྐེམ་པོ་ཤ་འཕེལ་བྱེད། །འཕེལ་བྱེད་ཟླུམ་པོ་བུམ་འདྲ་རྨ་ལ་བསྔགས། །སྐེམ་པོ་སུལ་མང་བྱིས་པའི་མཁྲིས་ནད་སེལ། །བ་རུ་ར་ཡིས་བད་མཁྲིས་ཆུ་སེར་སེལ། །སྐྱུ་རུ་ར་ཡིས་བད་མཁྲིས་ཁྲག་ནད་སེལ། །སྙིང་དང་མཁལ་མ་གླ་གོར་ཞོ་ཤ་གསུམ། །སྙིང་ཚད་མཁལ་ཚད་མཆེར་ཚད་སེལ་བར་བྱེད། །ཨ་འབྲས་སྲ་འབྲས་འཇམ་འབྲས་མཁལ་ནད་སེལ། །འབྲ་གོས་བད་ཀན་སྨུག་སེར་ཕོ་ནད་སེལ། །མ་ནུ་པ་ཏྲས་རླུང་ཁྲག་ཚ་བ་སེལ། །པུཥྐར་མཱུ་ལས་བད་ཀན་ཚ་བ་སེལ། །རུ་རྟས་རླུང་ཁྲག་ཕོ་བ་སྦོས་པ་སེལ། །གློ་ནད་གག་པ་ཤ་རོ་གཅོད་པར་བྱེད། །ཡུང་བས་དུག་སེལ་རུལ་གཅོད་གཉན་ནད་འཇོམས། །ཤུ་དག་མ་ཞུ་དྲོད་སྐྱེད་གག་ལྷོག་སེལ། །པུ་ཤེལ་སྐྱུགས་གཅོད་བད་ཀན་ཚ་བ་སེལ། །ཁྱུང་སྡེར་དཀར་སྨུག་དུག་ཚད་སེལ་བར་བྱེད། །དཔའ་བོ་དཀར་སེར་དཔའ་རྒོད་དེ་བཞིན་ནོ། །བོང་ང་དཀར་པོས་རིམས་དུག་མཁྲིས་ཚད་སེལ། །བོང་ང་དམར་སེར་ཤ་དུག་བཙན་དུག་སེལ། །ཤིང་མངར་གློ་ནད་རྩ་ནད་སེལ་བར་བྱེད། །སླེ་ཏྲེས་ཀཎྜ་ཀ་རིས་རླུང་ཚད་སེལ། །ག༌བྲ་དག་ཀྱང་དེ་བཞིན་རིམས་ལ་ཕན། །ཏིག་ཏས་མཁྲིས་པའི་ཚད་པ་མ་ལུས་སེལ། །བ་ཤ་ཀ་ཡིས་ཁྲག་ཚད་མ་ལུས་སེལ། །བ་ལེ་ཀ་ཡིས་གློ་མཆིན་སྣོད་ཚད་སེལ། །ག་དུར་རིམས་དང་གློ་ཚད་རྩ་ཚད་སེལ། །སྟབ་སེང་རུས་ཆག་སྦྱོར་ཞིང་རུས་ཚད་སེལ། །སྒྲོན་ཤིང་བད་རླུང་ཆུ་སེར་གྲང་བ་སེལ། །སྐྱེར་པ་སེ་རྒོད་དུག་སྡུད་ཆུ་སེར་སེལ། །སེང་ལྡེང་ཁྲག་དང་ཆུ་སེར་སྐེམ་པར་བྱེད། །སོ་ཆས་ནད་ཀུན་གྱེན་འདྲེན་སྐྱུགས་སྨན་མཆོག །དན་རོག་ཤྲཱི་ཁཎྜས་དྲག་པོར་སྦྱོང་། །དོང་གས་མཆིན་ནད་སེལ་ཞིང་འཇམ་པོར་འཁྲུ། །ཀ་པེད་ད་ཏྲིག་སྨག་དང་མོན་ཆ་རས། །འཁྲུ་བའི་ནད་རྣམས་ཚ་གྲང་མེད་པར་གཅོད། །སྔོ་ཡི་སྨན་གྱི་ནུས་པ་བསྟན་པ་ནི། །ཧོང་ལེན་ཁྲག་སྐེམ་འཁྲུགས་ཚད་དོན་ཚད་སེལ། །སྤང་རྩི་དོ་བོས་རིམས་དུག་རྙིངས་ཚད་སེལ། །རེ་སྐོན་ཁྲག་སྐེམ་སྨུག་པོ་རྩ་ཚད་སེལ། །ཀྱི་ལྕེས་སྣོད་ཚད་མཁྲིས་ཚད་སེལ་བར་བྱེད། །སུམ་ཅུ་ཏིག་གིས་མཆིན་མཁྲིས་ཚ་བ་སེལ། །པྲི་ཡངྐུ་ཡིས་ཕོ་མཆིན་ཚ་བ་སེལ། །ཟངས་ཏིག་ལྕགས་ཏིག་མཁྲིས་པའི་ཚ་བ་སེལ། །སྲོ་ལོ་སུག་འདྲས་གློ་ཡི་ཚད་པ་སེལ། །གཡའ་ཀྱི་མ་ཡིས་མཁྲིས་པ་ཞི་སྦྱོང་བྱེད། །གང་ག་ཆུང་གིས་དུག་དང་ཚད་འཁྲུ་གཅོད། །བྱ་རྒོད་སྤོས་ཀྱིས་གདོན་དུག་རིམས་ཚད་སེལ། །སྲོལ་གོང་པ་ཡིས་མགོ་ཆག་དུག་ཚད་སེལ། །ཡུ་མོ་མདེ་འབྱིན་བུ་རོ་ཟུག་རྔུ་འབྱིན། །དར་ཡ་ཀན་གྱིས་བྱང་ཁོག་ཆུ་སེར་སྐེམ། །མགོ་བོའི་རུས་ཆག་སྦྱོར་ཞིང་ལྷ་བ་འཛིན། །རྟ་ལྤགས་ལྷ་བ་འཛིན་ཞིང་ཆུ་སེར་འདྲེན། །ཨ་བི་ཥ་ཡིས་མགོ་ཆག་དུག་ཚད་སེལ། །སྟག་ཤས་རྨ་འདྲུབ་གཉན་གསོད་དུག་ནད་སེལ། །སྤང་རྒྱན་དཀར་པོས་གྲེ་བའི་དུག་ཚད་སེལ། །ཡུ་གུ་ཤིང་གིས་རྨ་སྦྱོར་དུག་ཚད་སེལ། །རྩད་དང་རྒུ་ཐུབ་ལྡུམ་སྟག་དུག་ནད་སེལ། །ཨ་བྱག་མགོ་ཆག་གསོ་ཞིང་ཆུ་སེར་སྐེམ། །ཚེར་སྔོན་རུས་ཆག་གསོ་ཞིང་ལྷ་བ་འདེགས། །སྨུག་ཆུང་མདན་ཡོན་དག་ཀྱང་དེ་བཞིན་ནོ། །གསེར་སྐུད་གློ་མཆིན་རྩ་ཚད་དུག་ཚད་སེལ། །ལུག་རུ་སྨུག་པོས་དུག་སྡུད་ཤ་དུག་སེལ། །ལུག་རུ་སེར་པོ་ཆུ་རུག་ཆུ་འཐུང་བྱེད། །སེ་བའི་མེ་ཏོག་མཁྲིས་སེལ་རླུང་ཁ་གནོན། །འབུ་སུ་ཧང་གིས་རྨ་འདྲུབ་གློ་ནད་སེལ། །སྒོང་ཐོག་པ་ཡིས་ཤ་དུག་འཁྲུགས་ཚད་སེལ། །ཨ་ཀྲོང་གློ་ཡི་ཚད་པ་སེལ་བར་བྱེད། །ཚར་བོང་གྲེ་བའི་ཚད་པ་གློ་ནད་སེལ། །ཏང་ཀུན་སྙིང་གི་ཚད་པ་དུག་ནད་སེལ། །སེ་རྒོད་འབྲས་བུས་དུག་ཚད་མཆིན་ཚད་སེལ། །ཤུག་པ་ཚེར་ཅན་མཁལ་ཚད་ལྷོག་པ་སེལ། །སྐྱེར་པའི་མེ་ཏོག་འབྲས་བུས་འཁྲུ་བ་གཅོད། །ཐང་ཕྲོམ་ལང་ཐང་ཙེ་ཡིས་སྲིན་ནད་སེལ། །སྲིན་ཤིང་སྣ་མའི་འབྲས་བུ་དེ་བཞིན་ནོ། །དྲེས་མའི་གེ་སར་སྲིན་གསོད་གླང་ཐབས་འཇོམས། །དཀར་པོ་ཆིག་ཐུབ་དུག་སྡུད་གཉན་སྲིན་འཇོམས། །ཨ་ཝ་བྱང་ཁོག་རྨ་དང་མིག་ལ་ཕན།ཞིམ་ཐིག་ལེ་ཡིས་མིག་གི་ལིང་ཐོག་ལེན། །པར་པ་ཏ་ཡིས་རིམས་དང་དུག་ཚད་སེལ། །དྭ་བའི་རྩ་བས་སྲིན་གསོད་རུས་མཛེར་འགོགས། །འདམ་བུ་ཀ་རས་གློ་མཆིན་རྩ་ཚད་སེལ། །འབྲི་ཏ་ས་འཛིན་རྣག་ཁྲག་ཆུ་སེར་འདྲེན། །བྱ་པོ་ཙི་ཙིས་བུད་མེད་ཟླ་མཚན་གཅོད། །ཤུ་མོ་ཟ་ཡིས་གློ་རྣག་འཁྲུ་བ་གཅོད། །སྙི་བ་ལུག་མུར༌བྲང་ཚ་ཆམ་པ་སེལ། །གཡེར་ཤིང་པ་ཡིས་འབྲུམ་པའི་ཚ་བ་སེལ། །མེ་ཏོག་སེར་ཆེན་རྨ་འདྲུབ་རྩ་རུལ་གསོ། །བྲག་སྐྱ་ཧ་བོས་དུག་སེལ་ཚད་འཁྲུ་གཅོད། །བྲག་སྤོས་རྨ་འདྲུབ་རྣག་སྐེམ་ལྷ་བ་འཛིན། །རྒྱ་སྤོས་སྤང་སྤོས་ཚད་རྙིང་དུག་ཚད་སེལ། །མྱང་རྩི་སྤྲས་ཀྱིས་ཆུ་འཐུང་རིམས་ཚད་སེལ། །རྒུ་དྲུས་རྨ་འདྲུབ་རྩ་འཐུད་རྒྱུ་གཟེར་སེལ། །འབམ་པོས་སྐྲངས་འཇོམས་ཁོང་འབྲས་བཤིག་པར་བྱེད། །མེ་ཏོག་ལུག་མིག་དུག་དང་རིམས་ནད་སེལ། །མཁན་པས་ཁྲག་གཅོད་ཡན་ལག་སྐྲངས་པ་འཇོམས། །ཆུ་མ་རྩི་ཡིས་ཆུ་སེར་དམུ་ཆུ་སྦྱོང་། །བྱི་ཚེར་རིམས་དུག་མཁལ་མའི་ཚ་བ་སེལ། །དེ་བས་རིམས་སེལ་རྩ་མཁྲིས་མཁྲིས་ནད་སེལ། །རེ་རལ་འོམ་བུས་ཤ་དུག་སྦྱར་དུག་སེལ། །ཞུ་མཁན་ཚོས་བཙོད་གློ་མཁལ་འགྲམས་ཚད་སེལ། །ལྕམ་པས་ཆུ་འགགས་སྐོམ་དད་འཁྲུ་བ་སེལ། །བྲག་ལྕམ་རྨ་འདྲུབ་རྟ་རྨིག་རྩ་སྒོ་འགེག །གྲ་མའི་རྩ་བས་ཤ་ཚད་རྩ་ཚད་སེལ། །མཛོ་མོས་ཁྲག་འཁྱགས་འཇུ་ཞིང་ཁྲག་ཚད་སེལ། །ཕང་མའི་འབྲས་བུས་སྙིང་ཚད་མོ་ནད་སེལ། །སྲད་དཀར་བ་ཡིས་དམུ་ཆུ་སྐྱ་རྦབ་སྦྱོང་། །བྱི་རུག་རྨ་ཡི་འབུ་སྲུང་སྲིན་ཕོལ་སེལ། །མཚེ་ལྡུམ་རྩ་ཡི་ཁྲག་གཅོད་མཆིན་ཚད་སེལ། །བྲེ་གས་གློ་དང་མཁལ་མའི་ཚ་བ་སེལ། །ལུག་ཆུང་རིམས་དུག་སྨུག་པོ་རྩ་ཚད་སེལ། །ལུག་ངལ་དུག་སེལ་ཡན་ལག་སྐྲངས་པ་འཇོམས། །ཟངས་རྩི་བ་ཡིས་མཁྲིས་ནད་མིག་སེར་སེལ། །རྙ་ལོས་རྒྱུ་ལོང་སྣོད་ཀྱི་ཚ་བ་སེལ། །ཤོ་མང་རྨ་ཡི་ཚ་བ་སེལ་བར་བྱེད། །པ་ཡག་རྩ་བས་གློ་གསོ་གློ་ནག་འདྲེན། །བྱེའུ་ལ་ཕུག་ཤ་དུག་སེལ་བར་བྱེད། །ཨུག་ཆོས་རྣ་བའི་ནད་སེལ་སྦོས་པ་སྦྱོང་། །སྐྱི་བའི་འབྲས་བུས་མཁྲིས་པ་གྱེན་ལ་འདྲེན། །ས་རྫི་ཀ་ཡིས་ཕོ་བའི་མེ་དྲོད་སྐྱེད། །སྲུབ་ཀ་རུལ་གཅོད་དྲོད་སྐྱེད་ཆུ་སེར་འདྲེན། །ལྕེ་ཚ་དབྱི་མོང་གཉིས་ཀྱང་དེ་བཞིན་ནོ། །བ་ལུས་བད་ཀན་ཚ་གྲང་འཐབ་པ་སེལ། །གོ་སྙོད་རླུང་ཚད་དུག་དང་མིག་ནད་སེལ། །ཐ་རམས་ན་རམས་བྱ་རྐང་འཁྲུ་བ་གཅོད། །སོག་ཀ་པ་ཡིས་སྐྱུག་པ་མ་ལུས་གཅོད། །དབང་པོ་ལག་པས་ལུས་སྟོབས་ཁུ་བ་སྐྱེད། །རི་ཤོས་མཁྲིས་པ་སྤྱང་ཚེར་བད་ཀན་འདྲེན། །དུར་བྱིད་ཐར་ནུས་ཚ་གྲང་ནད་ཀུན་སྦྱོང་། །སྔོན་བུས་ཆུ་སེར་ཁྲོན་བུས་མཁྲིས་པ་སྦྱོང་། །ལྕུམ་རྩས་དུག་ཚད་སྣོད་ཚད་བད་ཀན་སྦྱོང་། །ཆུ་རྩས་གཉན་སྦྱོང་རྨ་ཡི་སྐམ་རྩི་བྱེད། །རེ་ལྕག་པ་ཡིས་འབྲས་འདུལ་གཉན་ནད་སྦྱོང་། །ལྕ་བས་ཆུ་སེར་མཁལ་རྐེད་གྲང་བ་སེལ། །ཉེ་ཤིང་ར་མཉེས་ཚེ་བསྲིང་ཆུ་སེར་སེལ། །ཨ་ཤོ་གནྡྷས་སྨད་གྲང་ཆུ་སེར་སེལ། །གཟེ་མས་གཅིན་སྲི་གྲུམ་བུ་མཁལ་ནད་སེལ། །སྲོག་ཆགས་ལས་བྱུང་རྭ་དང་རུས་པ་དང་། །ཤ་ཁྲག་མཁྲིས་ཚིལ་ཀླད་པ་ལྤགས་སེན་སྤུ། །ཆུ༌བྲུན་བུབས་རིལ་ལུས་དང་བཅུ་གསུམ་འབྱུང་། །དེ་དག་གང་ལ་གང་ཕན་ནུས་པ་བསྟན། །བསེ་རུས་བྱང་ཁོག་རྣག་ཁྲག་ཆུ་སེར་སྐེམ། །ཁ་ཤ་ཤ་བའི་རྭ་ཡང་དེ་དང་འདྲ། །གཙོད་དང་དགོ་བའི་རྭ་ཡིས་འཁྲུ་བ་གཅོད། །རྒྱ་རུ་ལུག་ཐུག་རྭ་ཡིས་བུ་འབྱིན་བྱེད། །རྒོད་གཡག་རྭ་ཡིས་དྲོད་སྐྱེད་སྐྲན་ནད་བཤིག །གཉན་གྱི་རྭ་ཡིས་རིམས་ནད་སེལ་བར་བྱེད། །མི་ཡི་དུར་ཐོད་ཆུ་སེར་སྐེམ། །མི་རུས་བཙའ་མ་སོག་ཐལ་གྱིས། །ཚད་རྙིང་ལུས་ལ་ཞེན་པ་འགོགས། །མི་ཡི་དཔྱི་རུས་ལྷོག་པ་གསོད། །འབྲུག་རུས་རུལ་གཅོད་རྨེན་པ་འདྲུབ། །སྟག་གི་རུས་པས་ལྷ་བ་འགུགས། །འགྲོན་བུ་ཁྲག་གཅོད་རྣག་ཆུ་སྐེམ། །ཐོག་གིས་བསད་པའི་རུས་པ་དང་། །རྒྱུ་གཟེར་ཐོད་པས་རྒྱུ་གཟེར་འཇོམས། །ཕག་པའི་རུས་པས་སྨུག་པོ་སེལ། །ལུག་གི་རུས་པས་རླུང་ནད་སེལ། །སེར་བ་རུས་ཀྱིས་ཆུ་འགགས་སེལ། །ཟེར་མོའི་རུས་པས་ཁྲག་ཤོར་གཅོད། །སྤྲེའུའི་རུས་པས་བུ་འབྱིན་བྱེད། །འབུ་སྐྱོགས་སྲིན་སེལ་དམུ་ཆུ་སྦྱོང་། །བཤུལ་ཆགས་རུས་པས་ཆུ་སེར་སེལ། །མི་ཤས་འབྲས་འདུལ་རླུང་དུག་གཉན་ནད་འཇོམས། །སྦྲུལ་ཤས་འདྲིལ་བཤིག་འགགས་འབྱིན་མིག་ལ་ཕན། །བྱ་རྒོད་ཤ་ཡིས་དྲོད་སྐྱེད་ལྦ་བ་འཇིག །རྨ་བྱའི་ཤ་ཡིས་མཁྲིས་པ་དུག་ནད་འཇོམས། །ད་བྱིད་ཤ་ཡིས་མཁལ་རྐེད་གྲང་བ་སེལ། །སྲམ་གྱི་མཆིན་པས་ཆུ་འགགས་སེལ་བར་བྱེད། །འཕྱི་བའི་མཆིན་པས་རུས་པ་གས་པ་སྦྱོར། །ར་ཡི་མཆིན་པས་མིག་ལ་མཆོག་ཏུ་ཕན། །གློ་སྙིང་མཆིན་མཆེར་མཁལ་ཤས་རང་ནད་སེལ། །སྤྱང་ཀིའི་ཕོ་བས་དྲོད་སྐྱེད་མ་ཞུ་འཇུ། །སྤྱང་ཀིའི་ལྕེ་ཡིས་ལྕེ་སྐྲངས་འཇོམས། །ཕག་པའི་ལྕེ་ཡིས་རུས་མཛེར་འགོགས། །ཁྱི་ཡི་ལྕེ་ཡིས་རྨ་རྣམས་འདྲུབ། །བོང་བུའི་ལྕེ་ཡིས་འཁྲུ་བ་གཅོད། །ཐུག་འབྲས་རོ་ཙ་ཁྱི་རླིག་བུ་རོགས་འབྱིན། །ཝ་དང་ཁུག་རྟའི་གློ་བས་གློ་རྡོལ་གཅོད། །བྱ་ཝང་ཤ་ཡིས་སྐྱུག་པ་གཅོད་པར་བྱེད། །མཆིལ་པ་ནས་ཟན་རྩངས་པས་ཁུ་བ་སྐྱེད། །ངུར་པའི་ཤ་ཡིས་ཉྭ་ལོག་སེལ་བར་བྱེད། །ཤ་བའི་ཁྲག་གིས་སྲིན་སེལ་མངལ་ཁྲག་གཅོད། །ར་ཡི་ཁྲག་གིས་རེག་དུག་འབྲུམ་ནག་སེལ། །གཡག་རྒོད་ཁྲག་དང་གཙོད་ཁྲག་འཁྲུ་བ་གཅོད། །ཕག་ཁྲག་དུག་དང་སྨུག་པོ་བྱེར་བ་སྡུད། །བོང་ཁྲག་གྲུམ་བུ་ཚིགས་མིག་ཆུ་སེར་སེལ། །བྱ་ཡི་ཟེ་ཁྲག་ཤ་གསོ་ལྷ་བ་འཛིན། །མངལ་ཁྲག་རྩ་སྡོམ་ཤ་འུ་སྐྱེད་པར་བྱེད། །མཁྲིས་པའི་རིགས་རྣམས་ཐམས་ཅད་རྩ་ཁ་སྡོམ། །རུལ་གཅོད་ཤ་གསོ་དུག་སེལ་མིག་ལ་ཕན། །སྦྲུལ་གྱི་ཚིལ་བུས་མདེའུ་འབྱིན། །ཤ་ཚིལ་སྲིན་སྲེལ་དུག་ནད་སྲུང་། །ཕག་ཚིལ་དུག་སྡུད་ཤུ་ཐོར་སེལ། །མི་ཚིལ་རླུང་འཇོམས་ཤུ་ཐོར་སེལ། །ར་ཀླད་ཆུ་རྒྱུས་ཆད་པ་གསོ། །ལུག་ཀླད་མགོ་འཁོར་འཚོ་འཁྱོམས་གསོ། །རི་དྭགས་ཀླད་པས་འཁྲུ་བ་གཅོད། །རི་བོང་ཀླད་པས་རྒྱུ་གཟེར་སེལ། །མི་ཀླད་སྐྲངས་འཇོམས་ཆུ་སེར་འཇིག སྦྲུལ་ལྤགས་ཤ་བཀྲ་གླང་ཤུ་སེལ། །བསེ་ཀོ་གླང་ཀོ་འབྲུམ་ནག་སེལ། །བྱི་བའི་པགས་པས་རྣག་སྣ་འདྲེན། །ཆུ་སྲིན་སྡེར་མོས་རུས་ཚད་སེལ། །བོང་བུའི་རྨིག་པས་ཆུ་འགགས་སེལ། །རྟ་ཡི་རྨིག་པས་སྐྲན་ནད་སེལ། །རྟ་བོན་པ་ཡིས་ཉ་ལོག་འཇོམས། །རྨ་བྱའི་མདོངས་དུག་གློ་རྣག་སེལ། །སོ་བྱའི་སྒྲོ་ཡིས་ཆུ་འགགས་འབིགས། །འུག་པའི་སྒྲོ་ཡིས་དམུ་ཆུ་སེལ། །བྱ་མ་བྱིའི་སྒྲོས་མངལ་ནད་འབྱིན། །གནའ་བའི་སྤུ་ཡིས་དུག་ནད་སེལ། །ར་ཐུག་རྨོངས་སྤུས་ལྷོག་པ་འཇོམས། །མི་ཆུས་གཉན་སྲིན་སེལ་རིམས་སྲུང་། །བ་ཆུས་ཆུ་སེར་ཚད་རྙིང་སྦྱོང་། །རྒོད༌བྲུན་དྲོད་སྐྱེད་སྐྲན་བཤིག་སྐྲངས་པ་འགུགས། །ཕག༌བྲུན་མ་ཞུ་གཉན་རིམས་མཁྲིས་སྐྲན་སེལ། །མི༌བྲུན་མཁྲིས་སྐྲན་དུག་སེལ་སྐྲངས་པ་འཇོམས། །རྟ་སྦངས་སྲིན་སེལ་མཁྲིས་རླུང་སྐྱུག་པ་གཅོད། །རི་བོང༌བྲུན་གྱིས་དམུ་ཆུ་སྦྱོང་བར་བྱེད། །ཁྱི་སྤྱང་གོང་མོའི༌བྲུན་གྱིས་སྐྲངས་པ་འཇོམས། །བྱ༌བྲུན་བྱི༌བྲུན་གཉིས་ཀྱིས་རྣག་སྣ་འདྲེན། །ཕུག་རོན༌བྲུན་གྱིས་སྐྲངས་པ་རྣག་ཏུ་འགུགས། །བྱང་པས་རྩ་ཡི་ནད་རྣམས་སྦྱོང་བར་བྱེད། །སྡིག་སྲིན་ཆུ་སྦུར་གཉིས་ཀྱིས་ཆུ་འགགས་སེལ། །བསེ་སྦུར་བྱིང་བྱིང་ཐུ་ལུས་གླང་ཐབས་འཇོམས། །སྤྲུ་མའི་འབུ་ཡིས་རྩ་ཁྲག་ཤོར་བ་སྡོམ། །ན་བུན་བུ་མོས་ཀླད་པ་འཛག་པ་གཅོད། །ཆུ་བྱི་རྦ་བྱིའི་ཤ་ཡིས་ཤ་དུག་སེལ། །རྨིགས་པས་སྲིན་ནད་དུག་ནད་སེལ་བར་བྱེད། །སྨན་རྟ་བུ་རམ་གྲང་རླུང་སེལ་བའི་རྟ། །ཀ་ར་ཁྲག་མཁྲིས་ཚ་བ་སེལ་བའི་རྟ། །སྦྲང་རྩི་ཆུ་སེར་བད་ཀན་སེལ་བའི་རྟ། །དེ་དག་སོ་སོའི་སྨན་གྱི་ནུས་པ་སྟེ། །དྲང་སྲོང་རྣམས་ཀྱིས་འདི་ལ་གཅེས་པར་ཟུངས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྨན་གྱི་ནུས་པ་བསྟན་པའི་ལེའུ་སྟེ་ཉི་ཤུ་པའོ།། །།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །སྦྱར་ཐབས་སྡེ་ཚན་རོ་སྦྱོར་ནུས་པར་སྦྱར། །ནད་གང་སེལ་བ་སྨན་གྱི་སྡེ་བསྟན་པ། །ག་བུར་ཙན་དན་དཀར་པོ་གི་ཝཾ་དང༌། །ཅུ་གང་གུར་ཀུམ་ཨུཏྤལ་སྔོན་པོ་རྣམས། །ཚ་བ་ཐུན་མོང་སྤྱིར་འཇོམས་སྨན་སྡེ་ཡིན། །ཏིག་ཏ་གསེར་གྱི་མེ་ཏོག་དུག་མོ་ཉུང༌། །བོང་ང་དཀར་པོ་རྩ་མཁྲིས་གཡའ་ཀྱི་མ། །ཀྱི་ལྕེ་སྐྱེར་པ་མཁྲིས་པ་སེལ་བའི་སྡེ། །ཙན་དན་དམར་པོ་མཛོ་མོ་སེང་ལྡེང་དང༌། །ཧོང་ལེན་བ་ཤ་ཀ་དང་སྐྱུ་རུ་ར། །རེ་སོན་སྤང་རྩི་དོ་བོ་བཙོད་དང་ཚོས། །ཁྲག་ནད་སེལ་བར་བྱེད་པའི་སྨན་སྡེ་ཡིན། །གི་ཝཾ་གསེར་གྱི་མེ་ཏོག་བོང་ང་དཀར། །ག་དུར་བྱི་ཚེར་དེ་བ་པར་པ་ཏ། །ཁྲག་རྐང་རིམས་ནད་སེལ་བའི་སྨན་སྡེ་ཡིན། །གླ་རྩི་བོང་ང་དཀར་སེར་དམར་པོ་གསུམ། །ཁྱུང་སྡེར་དཀར་སྨུག་དཔའ་བོ་དཀར་སེར་རྩད། །རྣམ་པར་རྒུ་ཐུབ་སྟག་ཤ་ཧ་བོ་དང༌། །ཡུང་བ་གང་ག་ཆུང་དང་རེ་རལ་དང༌། །འོམ་བུ་སྤང་རྒྱན་སྤང་རྩི་དོ་བོ་དང༌། །སེ་རྒོད་སྐྱེར་པའི་བར་ཤུན་དུག་སྨན་སྡེ། །ཅུ་གང་ཤིང་མངར་རྒུན་འབྲུམ་སྟར་བུ་དང༌། །རུ་རྟ་ག་དུར་ཨ་ཀྲོང་སྲོ་ལོ་དཀར། །སུག་འདྲ་ལ་སོགས་གློ་སྨན་སྡེ་ཚན་ཡིན། །སླེ་ཏྲེས་ཀཎྜ་ཀ་རི་ཨ་ག་རུ། །གོ་སྙོད་རུ་རྟ་གུ་གུལ་སྒོག་སྐྱ་རྣམས། །རླུང་དང་ཚད་པར་ལྡན་པའི་སྨན་སྡེ་ཡིན། །བསེ་ཡབ་མ་ནུ་འུ་སུ་སྟར་བུ་དང༌། །ཨུཏྤལ་སེ་འབྲུ་སྒ་སྐྱ་སྐྱུ་རུ་ར། །བད་ཀན་ཚ་བ་སེལ་བའི་སྨན་སྡེ་ཡིན། །སྨན་སྒ་སྒ་སྐྱ་ཤིང་ཀུན་ཁ་རུ་ཚྭ། །བཙོང་སྒོག་བད་རླུང་སེལ་བའི་སྨན་སྡེ་ཡིན། །སེ་འབྲུ་ཕོ་བ་རིས་དང་པི་པི་ལིང༌། །སྨན་སྒ་ཙི་ཏྲ་ཀ་དང་ཀ་ཀོ་ལ། །སུག་སྨེལ་ཤིང་ཚ་འཇམ་འབྲས་བྱི་ཏང་ག །ད་ལིས་ཟི་ར་ནག་པོ་ལ་ལ་ཕུད། །དབྱི་མོང་སྲུབ་ཀ་ལྕེ་ཚ་ཙབས་རུ་ཚྭ། །རྒྱ་ཚྭ་རྒྱམ་ཚྭ་རྭ་ཚྭ་ཐལ་ཚྭ་རྣམས། །བད་ཀན་གྲང་བ་སེལ་བའི་སྨན་སྡེ་ཡིན། །ཛཱ་ཏི་བུ་རམ་རུས་སྣ་རླུང་སྨན་ཡིན། །སྤོས་དཀར་ཐལ་ཀ་རྡོ་རྗེ་སོ་མ་ར། །སེང་ལྡེང་སྐྱེར་པ་ཆུ་སེར་སྨན་གྱི་སྡེ། །གླ་རྩི་ཤིང་ཀུན་སྒོག་སྐྱ་མ་རུ་ཙེ། །ཐང་ཕྲོམ་ལང་ཏང་ཙེ་དང་བྱི་ཏང་ག །དྲེས་འབྲུ་འབུ་སྐྱོགས་ཕུར་ཐལ་སྲིན་ཤིང་འབྲུ། །དྭ་བ་གཡེར་མ་སྤྲུ་མ་སྲིན་སྨན་སྡེ། །ཀ་པེད་བིལ་བ་ད་ཏྲིག་མོན་ཆ་ར། །སྨག་དང་ཐ་རམས་ན་རམས་རྒྱ་སྐྱེགས་ཤིང༌། །གཙོད་ཁྲག་བྱ་རྐང་འཁྲུ་གཅོད་སྨན་སྡེ་ཡིན། །རྒྱ་ཚྭ་རྒྱམ་ཚྭ་གསེར་གྱི་བྱེ་མ་དང༌། །སྡིག་སྲིན་སུག་སྨེལ་ཉི་དགའ་ཆུ་སྨན་སྡེ། །སོན་ཆ་རི་ཤོ་སྤྱང་ཚེར་ཤུ་དག་དང༌། །གསེར་ཕུད་འབྲི་ཏ་ས་འཛིན་སྐྱི་འབྲུ་དང༌། །གཡའ་ཀྱི་ཡུངས་ཀར་ལ་སོགས་སྐྱུགས་སྨན་སྡེ། །ཨ་རུ་དནྡ་དོང་ག་ཤྲཱི་ཁཎ། །དུར་བྱིད་ཐར་ནུ་ལྕུམ་རྩ་སྔོན་བུ་དང༌། །ཁྲོན་བུ་ཙི་སྟག་རེ་ལྕག་ཆུ་རྩ་རྣམས། །འཁྲུ་བར་བྱེད་པའི་སྨན་གྱི་སྡེ་ཚན་ཡིན། །སྦྱར་ཐབས་རོ་སྦྱོར་ནུས་པར་སྦྱོར་བ་གཉིས། །རོ་བསྡེབས་སྦྱོར་བ་ལྔ་བཅུ་རྩ་བདུན་ཏེ། །གཉིས་པར་སྦྱར་ལ་མངར་ལྔ་སྐྱུར་བ་བཞི། །ལན་ཚྭ་གསུམ་ལ་ཁ་གཉིས་ཚ་བ་གཅིག །གསུམ་དུ་སྦྱར་ལ་མངར་བཅུ་སྐྱུར་བ་དྲུག །ལན་ཚྭ་གསུམ་ལ་ཁ་བ་གཅིག་པུ་ཉིད། །བཞི་སྦྱར་མངར་བཅུ་སྐྱུར་བཞི་ལན་ཚྭ་གཅིག །ལྔ་སྦྱོར་མངར་བ་ལྔ་ལ་སྐྱུར་བ་གཅིག །བཞི་པ་གཉིས་པ་བཅོ་ལྔ་ལྔ་པ་དྲུག །གསུམ་པ་ཉི་ཤུ་དྲུག་ཏུ་སྦྱར་བ་གཅིག །རྐྱང་པ་དྲུག་སྟེ་དྲུག་ཅུ་རྩ་གསུམ་མོ། །འཕེལ་ཟད་བདུན་ཅུ་རྩ་བཞིའི་གཉེན་པོར་སྦྱོར། །ནུས་པར་སྦྱར་ལ་ཞི་དང་སྦྱང་བ་གཉིས། །ཞི་བྱེད་སྨན་སྦྱོར་སྡེ་ཚན་ལྔ་འམ་བདུན། །ཐང་ཕྱེ་རིལ་བུ་ལྡེ་གུ་སྨན་མར་ལྔ། །སྨན་ཆང་འབྲི་ཏ་གཉིས་ཏེ་བདུན་དུ་བཤད། །སྦྱོང་བྱེད་འཇམ་རྩི་བཤལ་སྐྱུགས་ནི་རུ་ཧ། །སྣ་སྦྱོངས་ཉེས་གསུམ་འདུས་པ་མགོ་ནད་འབྱིན། །བཞི་བརྒྱ་རྩ་བཞི་ནད་ཀྱི་གཉེན་པོར་སྦྱོར། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྡེ་ཚན་དང་སྦྱར་ཐབས་བསྟན་པའི་ལེའུ་སྟེ་ཉི་ཤུ་རྩ་གཅིག་པའོ།། །།

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །ཆ་བྱད་དཔྱད་ཀྱི་གནས་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག །ནད་ལས་གསོ་བར་བྱེད་པའི་གཉེན་པོ་ཡི། །ཆ་བྱད་དཔྱད་ཀྱི་གནས་ལ་བསླབ་པ་ནི། །དཔྱད་དང་དཔྱད་ཀྱི་ཆ་བྱད་རྣམ་པ་གཉིས། །ལུས་ཀྱི་ཕྱི་ནས་ནད་རྣམས་འབྱིན་པ་དང༌། །ཞི་བར་བྱེད་པ་གང་ཡིན་དཔྱད་ཡིན་ཏེ། །དེ་ཡང་འཇམ་དང་རྩུབ་དང་དྲག་པོ་གསུམ། །འཇམ་པོའི་དཔྱད་ལ་དུགས་ལུམས་བྱུག་པ་གསུམ། །རྩུབ་པའི་དཔྱད་ལ་གཏར་བསྲེག་དབུག་པ་གསུམ། །དྲག་པོ་འདྲལ་གཅོད་འདྲུད་དང་འབྱིན་པ་བཞི། །དེ་ཡི་ཆ་བྱད་ཟུག་རྔུ་བརྟག་པའི་དཔྱད། །སྐམ་པ་གཙགས་བུ་ཐུར་མ་ཕྲན་བུའོ། །དེ་ལ་དང་པོ་ཟུག་རྔུ་བརྟག་པའི་དཔྱད། །རྩེ་ཞབས་མེད་པའི་ཟླུམ་པོ་སྲིད་སོར་དྲུག །ཁབ་མགོ་ཞེས་བྱ་མགོ་བོའི་རུས་ཆག་བརྟག །མགོ་ཟླུམ་བྲ་བོ་རྩེ་ཀྱོག་རྩེ་གུག་པ། །སྦྲུལ་མིག་ཟངས་དུང་ཁ་འདྲ་སོར་བཅུ་གཉིས། །ཕྲ་ལ་འཇམ་པས་ཡན་ལག་ཟུག་རྔུ་བརྟག །སོར་བརྒྱད་དབལ་ལྡན་རྩེ་མོ་སྐར་ཁུང་ཅན། །སྐྲངས་པ་རྣག་ཏུ་སྨིན་ནམ་མ་སྨིན་བརྟག །སྦུབས་ཅན་བ་ནུ་འདྲ་བ་སོར་གསུམ་པ། །སྦོམ་སོར་ཕོ་ལ་ལྔ་སྟེ་མོ་ལ་དྲུག །ནད་བལྟ་བ་ལ་བུ་ག་གཉིས་པར་བྱ། །ལས་ལ་བུ་ག་གཅིག་པ་གློ་དཀར་ཅན། །དེ་འདྲ་གཞང་འབྲུམ་བལྟ་དང་གཅོད་ལ་སྦྱར། །ཟུག་རྔུ་འབྱིན་པ་སྐམ་པའི་སྡེ་ཚན་ནི། །སེང་གེ་ཁ་དང་ཀང་ཀ་བྱ་རོག་མཆུ། །སྲིད་སོར་བཅོ་བརྒྱད་འབྲེལ་མཚམས་གཟེར་བཏབ་པ། །རྩ་བ་ལྕགས་ཀྱུའི་དབྱིབས་ལྡན་ཨ་ལོང་བཏགས། །རུས་ལ་ཟུག་པའི་ཟུག་རྔུ་འབྱིན་ལ་སྦྱར། །དེ་འདྲ་སོར་བརྒྱད་མཐིང་རིལ་མཆུ་འདྲ་བ། །ཤིན་ཏུ་ཕྲ་བས་ཤ་རྒྱུས་ཟུག་རྔུ་དབྱུང༌། སྦུབས་ལྡན་སྲིད་སོར་བཅུ་གཉིས་གསང་ལ་མཁྲང༌། །ནང་ནས་སྡོམ་པ་འདམ་བུའི་མཆུ་ཞེས་བྱ། །རྨ་གཏིང་ལུས་པའི་ཟུག་རྔུ་དབྱུང་ལ་སྦྱར། །སོ་ཕྲ་རྩ་བ་གདུ་བུས་བསྡམས་པ་ནི། །ཙུ་མོ་ཏི་སྟེ་རྩ་རོ་རྒྱུས་པ་དབྱུང༌། །ཤ་འདྲལ་ཁྲག་དབྱུང་གཙགས་བུའི་སྡེ་བསྟན་པ། །བྱེའུ་སྦུ་གུའི་སྒྲོ་འདྲ་སོར་དྲུག་པ། །ཤ་གསེབ་ཁྲག་རྩ་རྐྱང་པ་འདེབས་ལ་སྦྱར། །ལྟག་ཉལ་རྩེ་རྣོ་སྣོད་ཀ་རྩེ་ཆུང་གཏར། །སྟ་རེ་ཁ་འདྲ་རུས་སྟེང་རྩ་ལ་གཏར། །ཆུ་གྲི་འདྲ་བས་སྐྲངས་ལ་ཞལ་ཞལ་བྱ། །སོར་བརྒྱད་ཟོར་བའི་དབྱིབས་ཀྱིས་ལྕེ་སྐྲངས་གཤག །གཙགས་འདྲ་བྲང་བ་ཅན་གྱིས་མགོ་རྨ་འདྲ། །དབུག་པའི་ཐུར་དཔྱད་སྲིད་སོར་དྲུག་པ་ལ། །མགོ་འོག་ལུས་ཤོང་ཐུར་ཞབས་ལྡིག་པར་བྱ། །སྦུབས་ཐུར་སྦལ་མགོ་གློ་དཀར་ཡོད་པ་ཡིས། །རླངས་འཁྱིམས་གསེང་དང་སྙིང་ཆུ་མཆིན་ཆུ་གཙག །སྦུབས་ཐུར་སྨྱུ་གུ་ཁ་ཡིས་དམུ་ཆུ་གཙག །བྱིད་པོའི་མཆུ་འདྲས་བྱང་ཁོག་རྣག་གསང་དབྱེ། །ནས་འདྲའི་ཐུར་མ་སྒལ་ཚིགས་སྐྲན་ལ་སྦྱར། །གློ་སྙིང་རྒྱུ་ལོང་མཁལ་མར་སྦལ་མགོ་བསྔགས། །ཟངས་ཐུར་བྲ་བོ་འདྲ་བས་མིག་སྤྲིན་དབུག །མཐོ་གང་འབྲི་ལྕེ་ཁ་ཡིས་ཅུར་འབྱིན་བྱ། །མདུང་རྩེའི་སོ་ཡིས་ཡན་ལག་རྣག་ཆུ་དབུག །གཞན་ཡང་ཆ་བྱད་ཕྲན་བུའི་སྡེ་བསྟན་པ། །སྟེ་ཁ་སོ་གཉིས་པ་དང་བེ་ལེ་ཁ། །རྐོ་མའི་མཆུ་འདྲ་སོར་དྲུག་ཡུ་བ་ཅན། །ལྕགས་བཟང་ངར་ལྡན་མགོ་ཡི་རུས་པ་འབྲད། །སོག་ལེ་ཞེང་དུ་སོར་གཉིས་སོ་ཞིབ་པ། །སྲིད་སོར་བཅུ་པས་རུས་པ་ལྷག་པ་འབྲེག །ཆན་པ་རྣོ་བས་རྨ་ཡི་རྩ་རྒྱུས་བཅད། །སྦུབས་ཅན་སོར་ལྔ་སོག་ལེའི་ཁ་འདྲ་བ། །འཁོར་ལོ་ལྡན་པ་རུས་པ་འབུགས་པའི་གསོར། །སོར་བཅུ་བེ་ལེ་ཁ་འདྲ་རྩེ་གུག་པ། །རྣ་བ་སྣ་དང་གྲེ་བའི་འབྲུམ་པ་བཅད། །མངལ་ཐུར་མཐོ་གང་རྩེ་གུག་བུ་ཤི་དབྱུང༌། །ཆ་བྱད་སྦྲུལ་མགོས་རྡེའུ་དབྱུང་བར་བྱ། །གྲོ་སོག་འབྲིང་ཚད་མཁྲང་གསང་འཇམ་པ་ལ། །སོར་བཅུ་གཉིས་པའི་འཕྲུལ་ཐུར་ཆུ་འགགས་གཙག །རྩེ་ཀྱོག་སྲིད་སོར་བཅུ་པས་སོ་སྲིན་བསྲེག །སོར་བཅུ་རྩ་བའི་བུ་ག་སོར་མོ་ལྔ། །རྩེ་མོ་ཁ་དབྲག་ཁ་སྣར་དུ་བ་རྔུབ། །སྦུབས་ཅན་སོར་བཅུ་ཐེམ་བུ་ལྟ་བུའི་ཁ། །གྲེ་བར་སྨན་གདབ་ལྕེ་ཆུང་བསྲེག་ལ་སྦྱར། །རྩ་བའི་སྦུབས་ལ་མཐེ་བོང་ཤོང་བ་ལ། །རྩེ་བུག་སྲན་མ་ཤོང་ཙམ་སོར་བརྒྱད་པ། །རྐེད་པ་རྩ་བར་འཁོར་ལོ་དཀྲིས་པ་ནི། །གཅེ་འུ་ཞེས་བྱས་འཇམ་རྩི་ནི་རུ་བཏང༌། །དེ་འདྲ་ཕྲ་མོ་རྨ་བཀྲུ་བ་ལ་སྦྱར། །རྔབས་རྭ་དཔངས་སུ་སོར་ལྔ་ཁ་སོར་གསུམ། །རྩེ་བུག་ཡུངས་ཀར་ཤོང་བས་ཆུ་སེར་དྲང༌། །བུམ་པ་འཁྱུད་འཁོར་སོར་ནི་བཅོ་བརྒྱད་ལ། །སྲིད་སོར་བཅུ་གཉིས་ཁ་ཟླུམ་སོར་བཞི་པ། །ཕྱི་སྐྲན་འཇུ་ཞིང་འདྲེན་ལ་སྦྱར་བར་བྱ། །མེ་ལོང་སྤུ་གྲི་ཟླ་ཚེས་ལྟ་བུ་ཡིས། མགོ་བོའི་སྐྲ་བཞར་ཡོག་ཐོད་མགོ་ལྟ་བུ། །སྲིད་སོར་བཅུ་པ་ཏེལ་པ་ཞེས་བྱ་སྟེ། །འབྲས་དང་ལྷོག་པ་སྐྲངས་པ་བསྲེག་པར་བྱ། །དབལ་ལྡན་ཕྲ་འཇམ་གུག་པོ་ཤ་ཡི་ཁབ། །ཤ་དང་པགས་པ་རལ་བ་བཙེམ་ལ་སྦྱར། །དེ་ལྟར་ཆ་བྱད་ནད་དང་གང་མཁོ་སྤྱད། །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གཉེན་པོ་ཆ་བྱད་བསྟན་པའི་ལེའུ་སྟེ་ཉི་ཤུ་རྩ་གཉིས་པའོ།། །།

   དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས། །ནད་མེད་ཐ་མལ་གནས་ལ་ཇི་ལྟར་བསླབ་པར་བགྱི། འཚོ་མཛད་སྨན་པའི་རྒྱལ་པོས་བཤད་དུ་གསོལ། ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག །རྣམ་པར་མ་གྱུར་ཐ་མལ་ལུས་པོ་ལ། །མི་ན་གནས་དང་རིང་དུ་འཚོ་བར་བྱ། །དང་པོར་མི་ན་གནས་པར་བྱ་བ་ནི། །ནད་ཀུན་རྒྱུ་ལས་རྐྱེན་གྱིས་བསླང་ལས་འབྱུང༌། །རྐྱེན་མེད་རྒྱུ་ལས་འབྲས་བུ་འབྱུང་མི་སྲིད། །དེ་ཕྱིར་ནད་རྣམས་ཀུན་གྱི་རྐྱེན་སྤང་བྱ། །དུས་དང་དབང་པོ་སྤྱོད་ལམ་རོ་ནུས་རྣམས། །དམན་དང་ལོག་པ་ལྷག་པས་ནད་སྐྱེད་ལ། །ཡང་དག་སྦྱོར་བ་ནད་མེད་གནས་པའི་རྒྱུ། །དེ་ཕྱིར་སྤྱོད་ལམ་ཟས་སྨན་རྣམ་གསུམ་པོ། །ཡང་དག་བསྟེན་པས་ནད་མེད་བདེར་གནས་འགྱུར། །ལོ་ཟླ་འདས་ཏེ་ལུས་ཟུངས་སྟོབས་འགྲིབ་པ། །ཚེ་ཟད་རྒས་པའི་ནད་ལས་བསྲིང་བ་ནི། །བཅུད་ལེན་ཕན་ཡོན་གནས་རྟེན་བྱ་ཐབས་བཞི། །ཕན་ཡོན་ཚེ་རིང་ན་ཚོད་དར་ལ་འཇོག །ལུས་མདངས་སྟོབས་སྐྱེད་དབང་པོ་གསལ་བར་བྱེད། །གནས་གཙང་དབེན་དགའ་བར་ཆད་མེད་པ་དེར། །རྟེན་ནི་ཧ་ཅང་རྒས་པ་མ་ཡིན་པས། །ཆགས་སྤང་བརྩོན་པས་གཟའ་སྐར་བཟང་དུས་འཇུག །བྱ་ཐབས་གཙོར་བླང་ཞར་སྤྱད་རྣམ་པ་གཉིས། གཙོ་བོར་སྤྱད་པ་སྔོན་འགྲོ་དངོས་གཞི་གཉིས། །སྔོན་འགྲོ་སྣུམ་འཆོས་རྗེས་ལ་ཁྲུས་བྱས་ལ། འབྲས་བུ་གསུམ་དང་རྒྱམ་ཚྭ་པི་པི་ལིང༌། །བཅའ་སྒ་ཤུ་དག་ཡུང་བ་བྱི་ཏང་ག །བུ་རམ་བ་ཆུ་སྦྱར་བས་ཁོང་པ་སྦྱང༌། །མ་སྦྱངས་དྲི་བཅས་ཚོས་ལྟར་དོན་མེད་འགྱུར། །དངོས་གཞི་སྒོག་སྐྱ་ཞུན་མར་སྦྱར་བྱས་ལ། །ནས་སྣོད་བདུན་གསུམ་བཞག་ལ་ཞག་གྲངས་བསྟེན། །རླུང་གི་ནད་སེལ་ཚེ་འཕེལ་བྱེད་པ་ཡིན། །བྲག་ཞུན་ལེགས་བཏུལ་གསེར་དངུལ་ཟངས་ལྕགས་རྣམས། །ལྕགས་སྣོད་འཕྲོད་སྨན་སྦྱར་བ་རིམ་བསྐྱེད་བཟའ། །ནད་འཇོམས་ཚེ་འཕེལ་མོན་སྣེ་རྒྱ་སྲན་སྤང༌། །ཙི་ཏྲ་ཀ་དང་མར་སྦྲང་སྦྱར་བ་བསྟེན། །ཚེ་རིང་ལུས་རྒྱས་མེ་དྲོད་འབར་བར་བྱེད། །བ་གཅིན་སྦྱར་བསྟེན་ཤ་བཀྲ་མཛེ་ནད་སེལ། །ཨ་རུ་བར་སྐྱུར་འབྲས་བུའི་སྨན་མར་གྱིས། །དབང་པོ་གསལ་ཞིང་སྟོབས་སྐྱེད་རྒས་ཀ་སྲ། །ཀུན་ལ་ནད་དང་གང་འཕྲོད་ཟས་སྤྱོད་བསྟེན། །རུལ་སྐྱུར་སྔོ་ངད་མི་འཕྲོད་སྤང་བར་བྱ། །ཟླ་བ་གསུམ་དྲུག་ལོ་གཅིག་འབྲས་བུ་འགྲུབ། །དེ་མ་ལྕོགས་ན་ཞར་ལ་སྤྱད་བྱས་པས། །གནས་སྐབས་འབྲས་བུ་འབྱུང་བར་ནུས་པ་ཡིན། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མི་ན་བ་གནས་པར་བྱ་བའི་ལེའུ་སྟེ་ཉི་ཤུ་རྩ་གསུམ་པའོ།། །།

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས། ངོས་བཟུང་རྟགས་ཀྱི་གནས་ལ་ཇི་ལྟར་བསླབ་པར་བགྱི། འཚོ་མཛད་སྨན་པའི་རྒྱལ་པོས་བཤད་དུ་གསོལ། ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག །ངོས་བཟུང་རྟགས་ལ་བསླབ་པ་ནི། །མེ་དང་དུ་བ་ཇི་བཞིན་དུ། །ནད་ཀྱི་ངོས་ནི་རྟགས་ལ་བཟུང༌། །བརྟག་ཐབས་མེད་པའི་སྨན་པ་ཡིས། །རྟགས་ཉིད་རྟགས་སུ་མི་ཤེས་ཏེ། །དུ་བ་རླངས་པར་འཁྲུལ་དང་འདྲ། །སྤྲིན་འདུས་ཆར་འབྱུང་ཟེར་བ་ལྟར། །མ་ངེས་རྟགས་སུ་བྱེད་པ་ཡོད། །དེ་ཕྱིར་ངོས་འཛིན་བརྟག་ཐབས་མན་ངག་གཅེས། །ཁ་དམར་བཅོས་ལ་དགོས་པའི་ཕྱིར། །ཉེས་པ་དངོས་སྟོན་བརྟག་པ་དང༌། །སྐྱེ་བོ་མཁས་ཟེར་མགུ་བྱའི་ཕྱིར། །ངན་གཡོ་སྐྱོན་གྱིས་བརྟག་པ་དང༌། །གསོ་ཚེ་བླང་དོར་བྱ་བའི་ཕྱིར། །སྤང་བླང་མུ་བཞིར་བརྟག་པའོ། །ཉེས་པ་དངོས་སུ་སྟོན་པའི་བརྟག་པ་ལ། །སློང་བ་རྒྱུ་ཡི་སྒོ་ནས་བརྟག་པ་དང༌། །མཚན་ཉིད་རྟགས་ཀྱི་སྒོ་ནས་བརྟག་པ་དང༌། །ཕན་གནོད་བསྟེན་པའི་སྒོ་ནས་བརྟག་པའོ། །སློང་བ་རྒྱུ་རྐྱེན་ཟས་དང་སྤྱོད་ལམ་རྣམས། །གང་ཟོས་གང་བྱས་ནད་ཀུན་རྟོགས་པར་ནུས། །ཁྱད་པར་སློང་བའི་རྐྱེན་གྱིས་ཤེས་པར་བྱ། །ཅི་ཕྱིར་རྒྱུ་ལས་འབྲས་བུ་འགལ་མི་སྲིད། །མཚན་ཉིད་རྟགས་ལ་བརྟག་གཞི་བརྟག་ཡུལ་དང༌། །བརྟག་སྒོ་བརྟག་པའི་ཚུལ་དང་རྣམ་པ་བཞི། །གཞི་ནི་རླུང་དང་མཁྲིས་པ་བད་ཀན་གསུམ། །མཚན་ཉིད་འཕེལ་ཟད་གསོག་ལྡང་འཁྲུགས་པའི་རྟགས། །ཚ་གྲང་གཉིས་སུ་དྲིལ་ལ་བརྟག་པར་བྱ། །བརྟག་ཡུལ་དབང་པོ་ཡུལ་ལྔ་དྲི་མ་ལྔ། །དབང་པོ་མིག་དང་རྣ་བ་སྣ་ལྕེ་ལུས། །ཡུལ་ནི་གཟུགས་སྒྲ་དྲི་རོ་རེག་བྱ་ལྔ། །དྲི་མ་ལུད་པ་འཁྲུ་སྐྱུགས་ཆུ་ཁྲག་བརྟག །བརྟག་སྒོ་ཡུལ་དུས་རང་བཞིན་ན་ཚོད་དང༌། །ཉིན་ཞག་ཟས་ཟོས་གནས་ལས་མ་འཁྲུལ་རྟོགས། །བརྟག་ཚུལ་བལྟ་དང་རེག་པ་དྲི་བས་བརྟག །བལྟ་བ་མིག་ཡུལ་བོངས་དབྱིབས་ཁ་དོག་བརྟག །ཁྱད་པར་ལྕེ་དང་ཆུ་ལ་བརྟག་པར་བྱ། །འདི་ནི་མཐོང་བ་ཡུལ་རིག་བརྟག་པ་ཡིན། །རེག་པ་ལུས་ཡུལ་ཚ་གྲང་འབུར་འཇམ་བརྟག །ཁྱད་པར་བརྡ་སྦྱོར་འཕྲིན་པ་རྩ་ལ་བརྟག །འདི་ནི་དཔྱོད་པ་དོན་རིག་བརྟག་པ་ཡིན། །དྲི་བས་བརྟག་པ་རྣ་བའི་ཡུལ་ཀུན་ཏེ། །གང་གིས་གང་ལྟར་གང་ན་གང་དུ་གང༌། །ཁྱད་པར་རྒྱུ་གནས་མཚན་ཉིད་དྲིས་ལ་བརྟག །རྒྱུ་ལ་ཉེས་པ་གནས་ལ་འཇུག་པའི་སྒོ། །མཚན་ཉིད་ནད་རིགས་བྱེ་བྲག་ཕྱེད་པར་འགྱུར། །དེ་ཕྱིར་བརྟག་པ་ཀུན་ལ་དྲི་བ་གཅེས། །འདི་ནི་ཐོས་པ་སྒྲ་རིག་ཅེས་སུ་བཤད། །ཕན་གནོད་བསྟེན་པ་ཟས་སྤྱོད་སྨན་དཔྱད་བཞི། །རྒྱུ་དང་ནད་ཀྱི་ངོ་བོ་མཐུན་མི་མཐུན། །འཕྲོད་མི་འཕྲོད་ལས་ནད་ཀུན་ཤེས་པར་འགྱུར། །ལྟར་སྣང་མ་ཡིན་བསྲིངས་པས་རྟོགས་འགྱུར་ཏེ། །སྨན་པས་ཉམས་རྙེད་ནད་པའི་གསོ་དོན་ཤེས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཉེས་པ་དངོས་སུ་སྟོན་པ་བརྟག་པའི་ལེའུ་སྟེ་ཉི་ཤུ་རྩ་བཞི་པའོ།། །། དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ངན་གཡོ་སྐྱོན་གྱི་སྒོ་ནས་བརྟག་པ་ནི། །མཚན་ཉིད་ཤེས་བྱ་མཚང་འབྲུ་དེ་དུས་བསྲིང༌། །སྔར་རྗེས་བཅད་དང་བཅུད་ལ་བོར་བ་དང༌། །ཁ་བཅིང་སྤོ་ལ་གདོན་དང་ཐབས་འོག་གཞུག །དང་པོ་མཚན་ཉིད་ཤེས་པར་བྱ་བ་ནི། །ནད་ཀུན་སྤྱི་དང་ཁྱད་པར་རྟགས་ཤེས་པས། །འདི་ན་ཙམ་ལས་འདི་འོང་རྟོགས་པར་འགྱུར། །དེ་ཕྱིར་འདི་ལ་གོམས་ཤིང་འདྲིས་པ་གཅེས། །རིན་ཆེན་ལ་སོགས་བཟང་ངན་ཤེས་པ་ཡང༌། །བསྟན་བཅོས་མ་ཡིན་དེ་མེད་པར་ཡང་མིན། །མཚང་འབྲུ་ཕོ་ཉ་འབྲེལ་བ་ཐབས་ཀྱི་ཕྱིར། །ཅི་ན་ཇི་ལྟར་གང་བཏང་སུ་ཡིན་དང༌། །ཞག་གྲངས་དཔྱད་པས་མི་སྨྲ་མངོན་པར་ཤེས། །དུས་བསྲིང་རིངས་སྟབས་མ་ཡིན་ཐང་ཅིག་གནས། །དེ་བར་ལུས་ངག་མ་ཡེངས་གཏམ་ལ་དཔྱད། །རྗེས་བཅད་གཏར་བསྲེག་སྨན་སྦྱོར་ཅི་བྱས་བཙལ། །བརྙེད་པ་ཙམ་གྱིས་ཚ་གྲང་ཕྱོགས་མཐུན་རྟོགས། །བཅུད་ལ་བོར་བ་མི་སྨྲ་མ་རྟོགས་ན། །སྒྲོག་ཕྱིར་ངན་པ་མི་བྱ་གདོན་བཅོས་དགོས། །སྨན་ཅིག་སྦྱར་ན་ཕན་ཞེས་བྱིང་པོར་སྨྲ། །ངང་གིས་མི་ཐུབ་འདི་ན་ཅི་བྱ་འབྱིན། །ཁ་བཅིང་ཞེས་པ་ཁ་ཅིག་ཕྲད་པའི་ཚེ། །སྨྲ་བར་བྱེད་པ་སྨོས་པས་ཚུད་བྱས་ཏེ། །ཅི་ན་སྨན་པས་ཤེས་ཀྱི་བཤད་མི་དགོས། །གསལ་བར་བརྗོད་པས་སྐྱེ་བོ་ངོ་མཚར་ཟེར། །སྤོ་ལ་གདོན་པ་ཐབས་ཀྱིས་རྟོགས་གྱུར་ན། །གཞན་དག་རྩ་ཆུ་ན་ལུགས་མང་བརྟག་དགོས། །ང་ལ་མ་ཡིན་གཅིག་ལ་ཁ་དམར་གདགས། །མིག་བལྟས་ཙམ་གྱིས་ཆོག་ཅེས་གྲགས་པ་འབྱུང༌། །ཡང་ན་ཞིབ་ཏུ་དཔྱད་པས་བརྟག་མཁས་ཟེར། །ཐབས་འོག་གཞུག་པ་ཀུན་གྱིས་སྐད་མི་སྟེར། །རྣམ་པའི་ཁ་དམར་བཏགས་ལ་རྫོང་ལ་བྲོས། །དང་པོ་ཟས་སྤྱོད་མི་འཕྲོད་གདོན་གྱིས་རྐྱེན། །རུལ་སྐྱུར་དྲག་ཤུལ་རྗེན་ཟས་གནོད་ཅེས་བྱ། །གཉེན་པོ་ཕན་གནོད་མེད་པའི་སྙོམས་པ་དབོག །རྫོང་ལ་འབྲོས་པ་ནད་དང་སྨན་གྱི་མིང༌། །སྔ་ན་མ་གྲགས་མི་ཤེས་ངོ་མཚར་བརྗོད། །དེ་ཡིས་མ་རྟོགས་གྱུར་ཀྱང་མཁས་ཁྱད་འབྱིན། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ངན་གཡོ་སྐྱོན་གྱི་སྒོ་ནས་བརྟག་པའི་ལེའུ་སྟེ་ཉི་ཤུ་རྩ་ལྔ་པའོ།། །།

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །སྤང་བླང་མུ་བཞིའི་སྒོ་ནས་བརྟག་པ་ནི། །གསོ་སླ་གསོ་དཀའ་གསོ་ཙམ་སྤང་བ་བཞི། །གསོ་སླ་བ་ནི་ཡན་ལག་ལྡན་པ་དང༌། །གང་ཟག་ནད་ཀྱི་སྒོ་ནས་གསོ་སླ་བ། །ཡན་ལག་སྒོ་ནས་གསོ་བར་སླ་བ་ནི། །སྨན་པ་སྨན་དང་ནད་གཡོག་རྣམ་པ་གསུམ། །སྨན་པ་མཁས་པའི་སྟེགས་ལ་འཛེགས་པ་དང༌། །གཞུང་གི་དོན་ཤེས་ལས་རྣམས་མཐོང་ཞིང་གཙང༌། །སྨན་ནི་ཆོ་ག་ཡོན་ཏན་མང་དུ་ལྡན། །ཕུན་སུམ་ཚོགས་ཤིང་འཕྲོད་པར་སྦྱར་བའོ། །ནད་གཡོག་སྒྲིན་བརྩེ་གཙང་སྦྲ་བློ་དང་ལྡན། །ཡན་ལག་བཅུ་གཉིས་ལྡན་ན་གསོ་བ་སླ། །གང་ཟག་ནད་པ་སྐྱེས་བུ་གཞོན་ཞིང་དུལ། །སྙིང་སྟོབས་ལྡན་ཞིང་སྨན་ཀུན་བཟོད་པའི་ལུས། །རྫས་ཕྱུག་བསྒོ་བ་ཉན་ལ་ཤེས་པར་ནུས། །དྲིས་པའི་ནད་རྟགས་ཟློས་མཁས་གསོ་སླའི་ཡུལ། །ནད་ཀྱི་སྒོ་ནས་གསོ་བར་སླ་བ་ནི། །རྒྱུ་དང་སྔར་ཚུལ་མཚན་ཉིད་ཆུང་བ་དང༌། །གནོད་བྱ་ཡུལ་དུས་རང་བཞིན་མི་མཚུངས་དང༌། །གནོད་མེད་ལམ་གཅིག་རྐྱང་པ་གསར་གསོ་སླ། །འོན་ཀྱང་རིམས་ལ་ཡུལ་དུས་མཚུངས་པ་དང༌། །ཆུ་འགགས་ནད་ལ་གནོད་བྱ་མཉམ་པ་དང༌། །ཁྲག་སྐྲན་རྙིང་པ་གསོ་བ་སླ་ཞེས་བྱ། །གསོ་དཀའ་བ་ནི་སླ་བ་དེ་དག་འདྲེས། །ཐབས་མང་ཡུན་རིང་གསོ་བ་དགོས་པའོ། །དེ་ལས་གོ་ལྡོག་གྱུར་ལ་གོམས་ཕན་ཉིད། །ཚེ་ཡི་ལྷག་མ་ལུས་སྲིད་གསོ་བ་ཙམ། །སྤང་བར་བྱ་ལ་གསོ་ཐབས་ཡོད་མེད་གཉིས། །རྒྱལ་པོ་དགེ་བའི་བཤེས་དང་འགྲོ་ལ་སྡང༌། །སྨན་པས་བྱས་པ་མི་གཟོ་བརྙས་པ་བྱེད། །བྲེལ་དང་འབྱོར་པ་མི་ལྡན་ཉན་མི་བཏུབ། །ཚེ་ཟད་མྱ་ངན་གྱིས་མནན་བསྟན་པ་བཤིག །སྐྱེ་བོའི་ཡ་ག་ངན་པ་འབྱུང་བའི་ཕྱིར། །གསོ་ཐབས་ཡོད་ཀྱང་སྤང་བར་བཤད་པ་ཡིན། །གསོ་ཐབས་མེད་པས་སྤང་བར་བྱ་བ་ནི། །ཤིན་ཏུ་ཕྱིན་ཅི་ལོག་དང་འཆི་ལྟས་སྣང༌། །སྲོག་གཅོད་ནད་དགུས་དེ་ལུས་བཟུང་བ་སྤང༌། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྤང་བླང་མུ་བཞིར་བརྟག་པའི་ལེའུ་སྟེ་ཉི་ཤུ་རྩ་དྲུག་པའོ།། །།
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། གསོ་བྱེད་ཐབས་ཀྱི་གནས་ལ་ཇི་ལྟར་བསླབ་པར་བགྱི། འཚོ་མཛད་སྨན་པའི་རྒྱལ་པོས་བཤད་དུ་གསོལ། ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག །ནད་དེ་རྟོགས་ནས་ཇི་ལྟར་གསོ་བའི་ཕྱིར། །གསོ་བར་བྱེད་པའི་ཐབས་ཀྱི་གནས་བསྟན་པ། །དེ་ལ་གསོ་བའི་ཚུལ་དང་གསོ་ཐབས་གཉིས། །དང་པོ་ནད་ཀྱི་གསོ་ཚུལ་བསྟན་པ་ནི། །ནད་ལ་གསོ་ཐབས་དཔག་ཏུ་མེད་མོད་ཀྱང༌། །གསོ་ཚུལ་མེད་ན་མུན་པར་མདའ་འཕེན་འདྲ། །དེ་ལ་གསུམ་སྟེ་སྤྱི་ཡི་གསོ་ཚུལ་དང༌། །བྱེ་བྲག་པ་དང་ཁྱད་པར་གསོ་ཚུལ་ལོ། །དང་པོ་ཇི་ལྟར་གསོ་དང་གང་གིས་གསོ། །སོས་པའི་ཚད་དང་རྣམ་པ་གསུམ་གྱིས་བསྟན། །དང་པོ་རླུང་ལ་སོགས་པ་ཇི་སྙེད་ནད། །རང་གནས་གསོག་པའི་དུས་སུ་བསལ་བར་བྱ། །ལངས་ཤིང་རྒྱས་ནས་ནད་གཞན་འཁྲུག་བྱེད་ཕྱིར། །གཞན་ལ་གནོད་པ་མེད་པའི་སྦྱོར་བས་གསོ། །ནད་གཞན་སྐྱེས་ན་ནད་སྟོབས་གང་ཆེ་བཅོས། །གསོ་བའི་གཉེན་པོ་ཞི་དང་སྦྱང་བ་གཉིས། །གསོག་དུས་ཞི་ལ་ལངས་ནས་སྦྱང་བས་བཅོས། །ཞི་དུས་ཟས་སྤྱོད་གཟབ་ཅིང་མི་འཁྲུགས་བྱ། །འོན་ཀྱང་འཕྲལ་རྐྱེན་དུས་མིན་གསོག་ལྡང་ནད། །དུས་འདས་གསོ་དཀའ་འགྱུར་ཕྱིར་འཕྲལ་དུ་བསལ། །སྨན་ཡང་ཉིན་ཞག་ཟས་དུས་རིགས་པ་ཡིས། །ནད་དང་སྦྱར་ཏེ་བཏང་ཚུལ་བཅུ་རུ་བཤད། །ཟས་མ་ཟོས་དང་ཟས་སྔོན་དབུས་དང་མཐར། །ཟས་ཁམ་ཟས་མཚམས་དུས་མེད་ཙེ་གུར་དང༌། །ཟས་བཅས་ཟས་མནན་མཚན་མོ་བཏང་བའོ། །ནད་དང་མི་སྦྱོར་ཀུན་ལ་ཞུ་དུས་གཏོང༌། །རྨོངས་པའི་ལུགས་ཏེ་ནད་ཐོག་འབབ་པ་དཀའ། །དུས་ལས་མ་འདས་རྡེའུ་ངོས་འཛིན་འདྲ། །ནད་གང་གསོ་དཔྱད་སྦྱར་ཡང་མཆིལ་སྣབས་མང༌། །ལུས་ལྕི་དང་ག་མི་བདེ་ཟས་མི་འཇུ། །རྒྱུན་སྐམ་ཁོང་འདྲུལ་བཤང་གཅི་དུས་མིན་འབྱུང༌། །ཤེད་ཆུང་སྐད་དམའ་ནད་རྩེ་མ་ཞིལ་རྟགས། །ནད་གང་ཞི་དུས་གོང་ལས་ལྡོག་རྟགས་འབྱུང༌། །མ་ཞི་བཅོས་ཤིང་ཞི་ནས་ལྷག་མི་སྦྱར། །བྱེ་བྲག་གསོ་བའི་ཚུལ་ལ་རྣམ་པ་གསུམ། །མ་ཞུར་བཅས་དང་རང་རྒྱུད་གཞན་དབང་ངོ༌། །དང་པོ་དྲོད་ཆུང་ཟས་སྐོམ་མ་ཞུ་བ། །དེ་ཉིད་རླུང་སོགས་གནོད་བྱར་འདྲེས་པ་རྣམས། །སྨིན་དང་དྲོད་སྐྱེད་སྨན་གྱིས་རྩེ་བཅིལ་ལ། །རྟགས་ཐོབ་གང་དང་ཉེ་བའི་གནས་ནས་སྦྱང༌། །སྟེང་འོག་རང་བྱུང་སྨན་གྱིས་དགག་མི་བྱ། །མ་སྨིན་མི་སྦྱང་ཞེན་ཕྱིར་ལུས་ཟུངས་འཇོམས། །དཔེར་ན་མ་ལངས་ཆང་ལ་ཆུ་བསིངས་བཞིན། །མ་ཞུ་མེད་པའི་རང་རྒྱུད་ནད་རྐྱང་དེ། །ནད་ཀུན་སྐྱེད་པར་བྱེད་པའི་རྒྱུ་བསྟེན་པས། །ཐོག་མར་རླུང་འཇུག་དེ་ནས་གཞན་འཇུག་སྟེ། །དེ་དག་ཟས་སྤྱོད་སློང་བའི་དུས་མ་འཛོམས། །རང་གནས་གསོག་ཅིང་རིང་སྡོད་ཤུགས་མི་ཕྱིན། །དཔེར་ན་འཁྲུག་པ་བྱེད་པའི་ཤི་བོ་བཞིན། །བཙིར་ཡང་མི་ལྡོག་བར་དུ་མི་ལྡང་ཞིང༌། །རྐྱེན་ཕྲད་ནུས་པ་རྙེད་དེ་གནས་ལས་ལྡང༌། །དེ་དག་ཐོག་མར་རླུང་ཞུགས་ནད་འཁྲུགས་ཕྱིར། །འཇིག་ཅིང་འཇུ་བྱེད་ཟས་ཀྱིས་སྨིན་བྱས་པས། །ནད་འཐོར་རླུང་དེ་ཚར་གཅོད་ཁོང་པར་བསྡུ། །དཔེར་ན་ཆར་པ་འབེབས་པའི་རླུང་གནོན་འདྲ། །དེ་ནས་གང་དང་ཉེ་བའི་ལམ་ནས་སྦྱང༌། །ཡན་ལག་ཕྱིར་གནས་ཁོང་དུ་མ་འདུས་ན། །རྩ་སྒོ་ཕྱི་དང་ནང་ནས་སྦྱངས་ལ་དབྱུང༌། །གཞན་དབང་བླ་གཉན་བཅས་པའི་ནད་ཡིན་ཏེ། །རང་གི་གནས་ནས་ལངས་ནས་གནས་གཞན་ཕྱིན། །ཕྱིན་ནས་རང་གནས་སྔ་མ་ལ་གནོད་འཁྲུག །དེ་སྟོབས་ཆུང་ན་རང་གནས་སྔ་མ་གསོ། །ཕྱི་མ་སྟོབས་ཆེ་བླ་གཉན་དེ་བཅོས་པས། །རང་གནས་གནས་པ་བཅོས་མི་དགོས་པར་འཚོ། །དཔེར་ན་རྐུན་མོ་བསྟེན་པའི་རྗེ་བོ་བཞིན། །ཁྱད་པར་གསོ་བའི་ཚུལ་ལ་རྣམ་པ་དགུ། །མ་རྟོགས་དོགས་བཅས་གདེངས་མ་ཐོབ་བའི་ནད། །བྱི་ལ་འཇབ་པ་ལྟ་བུའི་སད་མདས་བཅོས། །ངོས་ཟིན་ངེས་པ་རྙེད་ཅིང་གདེངས་ཐོབ་ན། །སྤོ་ལ་དར་འཕྱར་ལྟ་བུར་དངོས་སུ་བཅོས། །གཉེན་པོ་ཐོག་ཏུ་མི་འབབ་ནད་ལམ་གཟུང༌། །རྟ་རྒོད་དཀྱུས་སུ་འཛུད་པ་ལྟ་བུར་བཅོས། །སྔར་བཅོས་ནད་ལ་དམན་ལྷག་ལོག་པ་གསུམ། །བརྟགས་ལ་སྐྱར་མོ་ཉ་ལེན་བཞིན་དུ་བཅོས། །སྟོབས་ཆེན་ནད་ལ་སྨན་དཔྱད་ཟས་སྤྱོད་བཞི། །ལག་གཏོད་མི་ཤ་འཕྲང་ཕྲད་ལྟ་བུར་བཅོས། །སྟོབས་ཆུང་ནད་ལ་སྤྱོད་ལམ་ཟས་སྨན་དཔྱད། །སྐས་གདང་ལྟ་བུར་མས་འཛེག་རིམ་པས་བཅོས། །རྐྱང་པའི་ནད་ལ་དཔའ་བོས་དགྲ་འདུལ་བཞིན། །དེ་གཞིལ་གཞན་ལ་གནོད་མེད་སྦྱོར་བས་བཅོས། །ལྡན་འདུས་ནད་ལ་འདུ་བ་ཆ་སྙོམས་གཅེས། །གཙོ་བོས་དམེ་ཤོར་འཁྲུགས་ཟླུམས་ལྟ་བུར་བཅོས། །ཀུན་ལ་གནོད་བྱ་ལ་སོགས་ཆོས་བཅུར་སྦྱར། །མཛོ་ཁལ་ལུག་ཁལ་ལྟ་བུར་འཚམ་པས་བཅོས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གསོ་ཚུལ་སྤྱིར་བསྟན་པའི་ལེའུ་སྟེ་ཉི་ཤུ་རྩ་བདུན་པའོ།། །།
དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །ཁྱད་པར་གསོ་ཚུལ་མདོར་བསྟན་རྣམ་དགུ་པོ། །དེ་དག་རྒྱས་པར་བཀྲོལ་ན་ཇི་ལྟར་ལགས། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཉོན་ཅིག །ཁྱད་པར་གསོ་ཚུལ་རྒྱས་པར་བཤད་པ་ནི། །དང་པོར་ནད་རྟགས་དཔྱད་ལ་ཐེ་ཚོམ་ན། །རླུང་གི་ནད་ལ་སད་མདའ་སྲེ་ལོང་ཐང༌། །མཁྲིས་པའི་ནད་ལ་སད་མདའ་ཏིག་ཏའི་ཐང༌། །བད་ཀན་ནད་ལ་སད་མདའ་རྒྱམ་ཚྭ་གསུམ། །ཕོ་ལོང་གཉན་སྲིན་སད་མདའ་བྱ་ཁྱུང་ལྔ། །ཁྲག་འཁྲུག་རླུང་གཟེར་སད་མདའ་མ་ནུ་བཞི། །སྦྱར་བའི་དུག་ལ་སད་མདའ་སྡུད་སྨན་བཏང༌། །ཚ་གྲང་འདྲེས་པའི་སད་མདའ་གོམས་པ་བསྟེན། །བཤལ་གྱི་སད་མདའ་སྣ་སེལ་འཁྲོག་ཐང་བཏང༌། །མེ་བཙའི་སད་མདའ་སྣུམ་ལྡན་དྲོད་དུགས་དང༌། །གཏར་གའི་སད་མདའ་རྡོ་གྲང་ཆུ་ལྕག་བྱ། །རྣག་གི་སད་མདའ་མེ་ཐུར་མིག་ཅན་བརྡེག །གཞན་ཡང་ནད་དེ་འདི་ཡིན་སྙམ་པ་ཡི། །གཉེན་པོའི་སྦྱོར་བ་ཆུང་ངུའི་སད་མདའ་བསྟེན། །འཁྲིག་དང་ལྡན་པའི་ལྟར་སྣང་ཀུན་བསྡུར་ལ། །གཉེན་པོ་གང་ལེན་དེ་ཉིད་བཅོས་པ་གཅེས། །ཁ་དམར་མི་སྨྲ་ཁ་ཅོལ་ཆུང་བར་འགྱུར། །འདི་དུས་གསལ་བར་མི་སྒྲོག་བྱིངས་པོར་སྨྲ། །ནད་ལ་ངེས་པ་བརྙེད་ཅིང་གདེངས་ཐོབ་ན། །ནད་དེ་འདི་ཡིན་རྒྱུ་རྐྱེན་འདི་ཡིས་སྐྱེད། །ད་ལྟ་འདི་ན་མཐའ་གཞུག་འདི་རུ་འགྱུར། །བཅོས་ཀ་འདི་བྱེད་དུས་ཚོད་འདི་ནས་སོས། །ཡང་ན་མི་ཐུབ་འཆི་བའི་དུས་ཚིགས་བོར། །སྤོ་དར་འཕྱར་བཞིན་ཀུན་གྱིས་གོ་བར་སྨྲ། །གཉེན་པོ་ཐོག་ཏུ་མི་འབབ་ལམ་གཞུག་དཀའ། །མ་སྨིན་ཚ་བའི་གཉེན་པོ་གྲོགས་ཐོག་འབབ། །གྲོགས་འཕེལ་བས་ནི་ཚ་བ་ཉིད་འཕེལ་བྱེད། །དེ་ཕྱིར་བད་རླུང་གྲོགས་དེ་ཐང་གིས་དབྱེ། །ནད་ཁྲག་ཟུངས་ཁྲག་འོ་མ་ཆུ་འདྲེས་འདྲ། །འབྲས་བུ་གསུམ་གྱིས་ཁྲག་ངན་ཕྱེ་ལ་གཏར། །དེ་ལྟར་མ་ཕྱེད་ནད་ལུས་ཟུངས་ལ་གནོད། །བད་ཀན་དུག་ཚད་བྱེར་བ་བསྡུས་ལ་བསད། །མ་འདུས་གཉེན་པོས་མི་གསོད་སླར་འགྲམས་འགྱུར། །གབ་ཚད་གྲང་བའི་མགོ་ཕུར་དྲོད་ཀྱིས་བཤུ། །ཅི་ཕྱིར་གྲང་བས་གཉེན་པོ་ལེན་མི་འགྱུར། །མ་ཞུའི་ནད་ཀུན་སྨིན་དང་དྲོད་སྐྱེད་སྨན། །རྩེ་བཅིལ་རྟགས་ཐོབ་གང་ཉེའི་ལམ་ནས་སྦྱང༌། །བཤལ་གྱི་སྔོན་འགྲོ་སྨན་གྱིས་ནད་ཀུན་སློང༌། །ནད་མ་ལྷོངས་ན་འཁྱག་ཐོག་ཆུ་འབེབས་འདྲ། །སྨན་པ་གཞན་གྱིས་སྔར་བཅོས་ནད་དེ་ལ། །དམན་ནམ་ལོག་གམ་ལྷག་གམ་ལེགས་བརྟགས་ལ། །དམན་པས་ནད་མ་ཞི་ན་གཉེན་པོ་བསྐྱེད། །ལོག་ནས་ནད་སྟོབས་སྐྱེས་ན་སྦྱོར་བ་བསྒྱུར། །ལྷག་ནས་ནད་གཞན་ལངས་ན་གང་ལངས་མནན། །ཚ་བ་སྟོབས་ཅན་ནད་ལ་ཆུ་བཞི་དབབ། །ག་བུར་རྩེ་ཆུང་སྨན་དང་དཔྱད་ཀྱི་ཆུ། །ཁ་ཟས་ཡེན་ལ་གཏད་པ་ཟས་ཀྱི་ཆུ། །བསིལ་སར་སྡོད་པ་སྤྱོད་ལམ་ཆུ་ཡིས་བཅོས། །གྲང་བ་སྟོབས་ཅན་ནད་ལ་མེ་བཞི་སྤོར། །དྲོད་དགུ་སྦྱར་བ་སྨན་གྱི་མེ་ཡིན་ཏེ། །མེ་བཙའ་དཔྱད་མེ་དྲོད་བཅུད་ཟས་ཀྱི་མེ། །གནས་གོས་དྲོ་བ་སྤྱོད་ལམ་མེ་ཡིས་བཅོས། །དེ་ལྟར་མ་བཅོས་ནད་རྒྱས་སྲོག་ལ་གཏོད། །སྟོབས་ཆུང་ནད་ལ་དང་པོ་སྤྱོད་ལམ་གཟབ། །དེས་མ་ཞི་ན་ཕན་གནོད་ཟས་ཀྱིས་བཅོས། །དེས་མ་ཞི་ན་བསིལ་དྲོད་སྨན་གྱིས་བཅོས། །གསུམ་གས་མ་ནོན་དཔྱད་ཀྱིས་ནད་ཡུལ་དབྱུང༌། །རླུང་དང་མཁྲིས་པ་བད་ཀན་ནད་རྐྱང་ལ། །དེ་ཉིད་ཞི་བྱ་གཞན་མ་ལངས་པར་བཅོས། །དེ་མ་ཤེས་ན་ལྡོག་རྒྱུ་བཅུ་གཉིས་འགྱུར། །ལོག་པས་རང་མ་ཞི་བར་གཞན་སྐྱེད་དེ། །རླུང་གི་ནད་ལ་ཁ་ཚའི་རོ་བསྟེན་ན། །རླུང་མ་ཞི་བར་བད་ཀན་མཁྲིས་པར་ལྡོག །མཁྲིས་པའི་ནད་ལ་ལན་ཚྭ་ཚ་བ་བསྟེན། །མཁྲིས་པ་མ་ཞི་བད་རླུང་གཉིས་སུ་ལྡོག །བད་ཀན་ནད་ལ་ཁ་དང་ལན་ཚྭ་བསྟེན། །བད་ཀན་མ་ཞི་རླུང་མཁྲིས་གཉིས་སུ་ལྡོག །མི་འཕྲོད་རྐྱེན་གྱིས་འདུས་པར་ལྡོག་པ་ཡོད། །ལྷག་པས་ནད་དེ་ཞི་ནས་གཞན་སློང་སྟེ། །མངར་དང་ལན་ཚྭས་རླུང་ཞི་བད་མཁྲིས་སྐྱེད། །ཚ་སྐྱུར་བད་ཀན་ཞི་ནས་རླུང་མཁྲིས་སྐྱེད། །མངར་ཁས་མཁྲིས་པ་ཞི་ནས་བད་རླུང་སྐྱེད། །ལྡན་འདུས་ནད་ལ་འདུ་བ་ཆ་མཉམ་པ། །ཨ་རུ་བྲག་ཞུན་འདུ་བ་སྤྱི་རུ་སྙོམས། །གནས་དང་ནད་གཞི་སོ་སོའི་ཁ་འཛིན་ནི། །སྙིང་ལ་ཛཱ་ཏི་གློ་ལ་ཅུ་གང་སྟེ། །མཆིན་པར་གུར་ཀུམ་སྲོག་རྩར་ལི་ཤི་བཏང༌། །མཁལ་མར་སུག་སྨེལ་མཆེར་པར་ཀ་ཀོ་ལ། །ཕོ་བའི་ཁ་འཛིན་སེ་འབྲུ་པི་པི་ལིང༌། །མཁྲིས་པའི་ཁ་འཛིན་ཏིག་ཏ་གསེར་མེ་ཏོག །རླུང་ལ་ཛཱ་ཏི་སླེ་ཏྲེས་རུས་བཅུད་གསུམ། །བད་ཀན་མ་ནུ་འུ་སུ་བསེ་ཡབ་བཏང༌། །ཁྲག་ལ་བ་ཤ་ཀ་དང་ཧོང་ལེན་ཏེ། །ཆུ་སེར་སྤོས་དཀར་ཐལ་རྡོར་སོ་མ་ར། །གཉན་དང་གདོན་ལ་གླ་རྩི་གུ་གུལ་ནག །དེ་དག་གང་དང་གང་དགོས་རྟགས་དང་སྦྱར། །ཐམས་ཅད་འདུས་ན་ཀུན་ལ་ཁ་གནོན་བཏང༌། །ལྡན་འདུས་ཆ་མཉམ་གང་ཤས་ཆེ་བ་ལ། །གཉེན་པོའང་དེ་དང་བསྟུན་ལ་གང་མཐོ་མནན། །ཡང་ན་སྔ་ཕྱི་རེ་མོས་བཅོས་པའམ། །ཡང་ན་ལྟག་པ་སྤྲད་ལ་དུས་གཅིག་གཞོམ། །ཉིན་དགུང་མཚན་དགུང་མཁྲིས་པའི་ཚ་བ་བསད། །བསིལ་སྨན་བསིལ་ཟས་ཚ་བའི་དུས་དེར་བསྟེན། །སྲོད་དང་སྔ་དྲོ་ཕོ་བའི་མེ་དྲོད་གསོ། །དྲོད་སྨན་དྲོད་ཟས་བད་ཀན་གྲང་བ་གཞིལ། །དགོང་དང་ཐོ་རངས་རླུང་ལ་བརྔན་པ་སྦྱིན། །དྲོད་བཅུད་ཟས་སྨན་ཐོར་བུའི་རླུང་སྣ་བསླན། །ལྷག་ན་གང་ལྷག་དགྲར་ལྡང་ཕ་སྤུན་འདྲ། །ཆད་ན་གང་ཆད་སྐྱོང་དགོས་མོ་ངན་འདྲ། །དེས་ན་འདུ་བ་ལྷག་ཆད་མེད་པར་མཉམ། །ལུས་ཟུངས་བཟོ་རྒྱུ་འདྲ་བས་ཆུད་མི་གསན། །ཕོ་བ་ཞིང་ས་འདྲ་བས་མེ་དྲོད་གསོ། །དེ་ལྟར་ཤེས་ན་འཚོ་བྱེད་སྨན་པར་འགྱུར། །གནོད་བྱ་ཡུལ་དུས་རང་བཞིན་ན་ཚོད་དང༌། །ནད་ཁམས་གནས་དང་མེ་དྲོད་ཉམས་སྟོབས་དང༌། །གོམས་པ་འདི་བཅུས་ཕྲ་མོ་ཡན་ཆད་བརྟག །ཐམས་ཅད་མཚུངས་ན་གཉེན་པོས་ནོན་པར་བཏང༌། །དེ་མ་ཡིན་ན་འཚམ་ཚད་བསྟེན་པར་བྱ། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཁྱད་པར་གྱི་བཅོས་ཚུལ་རྒྱས་པར་བཤད་པའི་ལེའུ་སྟེ་ཉི་ཤུ་རྩ་བརྒྱད་པའོ།། 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །གང་གིས་གསོ་བའི་གསོ་ཐབས་མང་ཡོད་ཀྱང༌། །ཐུན་མོང་བ་དང་ཁྱད་པར་གཉིས་ཀྱིས་གསོ། །ཐུན་མོང་གསོ་ཡུལ་གཉིས་ཕྱིར་གསོ་ཐབས་གཉིས། །སྟོབས་སྐྱེད་བརྟ་བྱ་ཉམས་དམད་སྨྱུང་བའོ། །བརྟ་བར་བྱ་བ་ཡུལ་དང་གང་གིས་བརྟ། །ཕན་ཡོན་དྲགས་སྐྱོན་དེ་ཡི་བཅོས་ཐབས་ལྔ། །དེ་ཡུལ་རླུང་ཆེ་ཟུངས་ཟད་ཁྱིམ་གསར་དུབ། །སྦྲུམ་མ་བཙས་རྗེས་ཁྲག་ཟགས་གློ་རྡོལ་རྒས། །གཉིད་མེད་མྱ་ངན་དཀའ་ཐུབ་རྩོལ་བས་དུབ། །སོ་གའི་དུས་རྣམས་ཕལ་ཆེར་བརྟ་བས་གསོ། །དེ་ཟས་ལུག་ཤ་བུ་རམ་ཀ་ར་མར། །འོ་མ་ཞོ་ཆང་ལ་སོགས་བཅུད་ཀྱིས་བརྟ། །སྨན་སྦྱོར་ནད་དང་གང་འཕྲོད་སྨན་མར་བསྟེན། །དཔྱད་དུ་འཇམ་རྩི་ཁྲུས་དང་བསྐུ་མཉེ་བྱ། །སྤྱོད་ལམ་གཉིད་ལོག་དལ་དང་སེམས་དགའ་བརྟ། །དེ་ཡིས་སྟོབས་འཕེལ་ནད་ཀུན་ཟིལ་གནོན་ནུས། །དཔེར་ན་ཁ་ཉེན་པོ་ཡིས་ནུས་རྙེད་བཞིན། །ཐལ་དྲགས་འཚོ་ཆེས་འབྲས་དང་རྨེན་བུ་དང༌། །རྨོངས་བག་གཅིན་སྙི་ལུད་པ་བད་ཀན་འཕེལ། །དེ་ལ་བད་ཚིལ་ཟད་བྱེད་ཟས་སྨན་ཕན། །གུ་གུལ་བྲག་ཞུན་སྐྱེར་པའི་ཁཎྜ་དང༌། །སྦྲང་སྦྱར་འཚོ་ཆེས་ནད་ཀུན་སེལ་བར་བྱེད། །འབྲས་བུ་གསུམ་དང་སྦྲང་རྩི་སྦྱར་བའམ། །བཅའ་སྒ་ཡ་བཀྵ་ར་བྱི་ཏང་ག །སྐྱུ་རུ་ནས་ཕྱེ་སྦྲང་སྦྱར་འཚོ་ནད་སེལ། །འཚོ་བས་སྐེམ་བཟང་བརྟ་བ་ཚོད་ཟིན་བྱ། །སྨྱུང་བར་བྱ་ལ་ཡུལ་དང་གང་གིས་དམད། །ཕན་ཡོན་དྲགས་སྐྱོན་དེ་ཡི་བཅོས་ཐབས་ལྔ། །དེ་ཡུལ་མ་ཞུ་སྣུམ་ཟོས་བརླ་རེངས་ནད། །རིམས་དང་གཅིན་སྙི་ཁོང་འབྲས་དྲེག་གྲུམ་མཆེར། །ལྐོག་ཀླད་སྙིང་ནད་ཚད་འཁྲུ་སྐྱུག་པ་དང༌། །ལུས་ལྕི་དང་ག་མི་བདེ་བཤང་གཅི་འགགས། །འཚོ་ཆེས་ཆུ་སེར་བད་མཁྲིས་རྒྱས་པའི་ནད། །སྟོབས་ལྡན་དར་བབ་དགུན་དུས་སྨྱུང་བས་བཅོས། །དེ་ཡི་སྨན་དུ་ཞི་དང་སྦྱང་བ་གཉིས། །མ་སྙོམས་སྙོམས་པར་བྱེད་པ་ཞི་བ་སྟེ། །སྦྱོར་བ་ཟས་སྨན་སྤྱོད་ལམ་དཔྱད་ཀྱིས་བཅོས། །ཉམ་སྟོབས་ཆུང་ལ་ཟས་ཀྱི་བཀྲེས་སྐོམ་བྱ། །དེ་འོག་ཡང་ཞིང་འཇུ་སླ་ཅུང་ཟད་བསྟེན། །ཉམ་སྟོབས་འབྲིང་ལ་ཐང་དང་ཕྱེ་མ་སོགས། །དྲོད་སྐྱེད་སྨིན་བྱེད་སྦྱོར་བ་གང་ཡིན་བསྟེན། །སྟོབས་ལྡན་ཉིན་མཚན་རྩོལ་བཅག་རྔུལ་དབྱུང་ཞིང༌། །མེ་བཙའ་དུགས་ལུམས་གཏར་ག་དཔྱད་ཀྱིས་བཅོས། །སྦྱང་པ་ནད་སློང་ཕྱིར་འབྱིན་བྱེད་པ་སྟེ། །སྦྱོར་བ་མ་ཞུའི་གནས་ལ་སྐྱུགས་ཀྱིས་སྦྱང༌། །ཞུ་བའི་གནས་ལ་ནི་རུ་ཧ་ཡིས་དྲང༌། །ལུས་སྤྱིར་བཤལ་ལ་རྩ་ནད་རྩ་སྦྱོངས་བྱ། །ཞི་སྦྱང་ཉམ་དམད་ཕན་ཡོན་དབང་པོ་གསལ། །ལུས་ཡང་ཡི་ག་བདེ་ལ་བྱ་བྱེད་བརྩོན། །བཀྲེས་སྐོམ་དུས་འབྱུང་བཤང་རླུང་བདེ་བར་རྒྱུ། །དྲགས་ན་ཟུངས་འཛད་ཤ་སྐེམ་མགོ་བོ་འཁོར། །གཉིད་མེད་མདངས་ཤོར་སྐད་གདངས་དབང་པོ་ཉམས། ཁ་སྐོམ་དང་ག་འགག་དང་བྱིན་པ་བརླ། །གཞུག་ཏོ་རྩིབ་ལོགས་སྙིང་ག་ཀླད་པ་ན། །རིམས་འདེབས་སྐྱུག་འདོད་རླུང་ནད་སྐྱེད་པར་བྱེད། །དེ་ལ་བརྟས་པར་བྱེད་པ་ཐམས་ཅད་ཕན། །ཁྱད་པར་ཤ་ཟའི་ཤ་དང་འཇམ་རྩི་དང༌། །ཟས་འགྲངས་གཉིད་ལོག་ཕག་འདྲར་ལུས་རྒྱས་འགྱུར། །ལུས་རྒྱས་འཚོ་བྱེད་ཤ་འདྲ་གང་ཡང་མེད། །མདོར་ན་བརྟ་བྱའི་ཡུལ་ལ་ཉམ་མི་དམད། །གལ་ཏེ་སྦྱང་བ་དགོས་ལ་འཇམ་པོས་བྱ། །ཉམ་དམད་དགོས་ལ་བརྟས་པར་བྱེད་པ་སྤང༌། །རླུང་འཕེལ་ནད་གང་ཟད་པ་བརྟ་བས་གསོ། །རླུང་ཟད་བད་མཁྲིས་འཕེལ་བ་སྨྱུང་བས་བཅོས། །རྟེན་དང་བརྟེན་པ་འཕེལ་ཟད་བཅོས་ཐབས་གཅིག །ཅེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གསོ་ཐབས་གཉིས་བསྟན་པའི་ལེའུ་སྟེ་ཉི་ཤུ་རྩ་དགུ་པའོ།། །།


  དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ཁྱད་པར་ཉེས་གསུམ་སོ་སོར་བཅོས་པ་ནི། །ཟུང་འཇུག་རླུང་ལ་ཏིལ་མར་མཆོག་ཡིན་ཏེ། །བུ་རམ་ཆང་དང་མར་རྙིང་ལུག་ཤ་ཡིབ། །འཕྱི་བ་རྟ་བོང་མི་ཤ་སྒོག་བཙོང་སོགས། །ལྕི་སྣུམ་འཇམ་དྲོའི་ཟས་ཀྱིས་བཅོས་པར་བྱ། །སྤྱོད་ལམ་མུན་ཁུང་དྲོ་བའི་གནས་སུ་བསྡད། །ཡིད་འོང་ཚིག་སྙན་གཉིད་ལོག་གོས་དྲོན་བགོ། །སྨན་དུ་རུས་བཅུད་གསུམ་གྱི་ཁུ་བ་དང༌། །ལུག་མགོ་རྙིང་པའི་མགོ་འཁྲོལ་སྦྱོར་བ་བྱ། །བཅུད་བཞིའི་ཐང་དང་ཤིང་ཀུན་གསུམ་ཐང་བཏང༌། །ཕྱེ་མ་ཛཱ་ཏི་ཤིང་ཀུན་ཅུར་ནིས་བསྟེན། །དཀར་འདོན་ཤ་འདོན་སྒོག་འདོན་སྐྱུར་འདོན་དང༌། །ཛཱ་ཏི་སྒོག་སྐྱ་བཙན་དུག་རུས་ཆེན་དང༌། །འབྲས་བུ་གསུམ་དང་རྩ་བའི་སྨན་མར་སྦྱར། །མདོར་ན་མངར་སྐྱུར་ལན་ཚྭ་སྣུམ་དྲོས་བཅོས། །ཁྱད་པར་མར་རྙིང་དྲོད་ཀྱི་འཇམ་རྩི་བསྔགས། །དཔྱད་དུ་ལོ་མར་རྙིང་པའི་བསྐུ་མཉེ་བྱ། །སྣུམ་ལྡན་དུགས་ཀྱིས་གཟེར་བའི་གནས་སུ་བདུག །སྤྱི་གཙུག་ལ་སོགས་རླུང་གསང་མེ་ཡིས་མནན། །མཁྲིས་པའི་ནད་ལ་མར་གསར་མཆོག་ཡིན་ཏེ། །བ་ལང་རི་དྭགས་ཤ་གསར་ཆུ་བསིལ་ཇ། །བ་རའི་ཞོ་དར་སྐྱབས་དང་ཁུར་ཚོད་དང༌། །ཆག་ཚེ་ཕྱེ་ཐུག་བསིལ་བའི་ཟས་ཀྱིས་བཅོས། །སྤྱོད་ལམ་བསེར་བུ་ཤིང་གྲིབ་ནིའུ་གསིང་བསྟེན། །ཆུ་འགྲམ་བསིལ་གནས་མ་འཁྲུགས་དལ་བར་བསྡད། །དྲི་བཟང་བསིལ་ཞིང་ཡིད་དུ་འོང་བས་བྱུག །སྨན་དུ་སྔོ་ཐང་རྩི་སྨན་ཐུན་མོང་གསུམ། །ག་བུར་ཙན་དན་གི་ཝཾ་ཚ་སྟོབས་སྦྱར། །མདོར་ན་མངར་ཁ་བསྐ་བསིལ་སྨན་གྱིས་བཅོས། །ཁྱད་པར་མངར་བའི་བཤལ་གྱིས་སྦྱང་བ་བསྔགས། །དཔྱད་དུ་རྔུལ་དབྱུང་ཆུ་ཡི་འཕྲུལ་འཁོར་བསྐོར། །གང་རྒྱས་རྩ་ལ་གཏར་ཞིང་བསིལ་གྱིས་བདུག །བད་ཀན་ནད་ལ་སྦྲང་རྩི་མཆོག་ཡིན་ཏེ། །ཉ་ལུག་གཡག་རྒོད་གཡི་དང་བྱ་རྒོད་ཤ །འབྲུ་རྙིང་ཟན་དྲོན་ཆང་ནར་ཕྱིན་པ་དང༌། །ཆུ་སྐོལ་སྒ་ཆུ་ལ་སོགས་ཡང་ཞིང་རྩུབ། །དྲོ་ལ་ཆུང་བའི་ཟས་ཀྱིས་བཅོས་པར་བྱ། །སྤྱོད་ལམ་མེ་ཉིས་སྲོ་ཞིང་གོས་དྲོར་གཡོག །སྐམ་སར་ལུས་སེམས་རྩོལ་སྤྱད་གཉིད་མི་ལོག །སྨན་ལ་ལན་ཚྭ་ཚ་བའི་བསྡུས་ཐང་བཏང༌། །ཕྱེ་མ་སེ་འབྲུ་ད་ལིས་ཐལ་སྨན་སྦྱར། །མདོར་ན་ཚ་སྐྱུར་ཡང་རྩུབ་རྣོ་བ་བསྟེན། །ཁྱད་པར་རྣོ་ལ་རྩུབ་པའི་སྐྱུགས་སྨན་བསྔགས། །དཔྱད་དུ་ཚྭ་དང་བོང་བ་སྤུ་དུགས་བསྟེན། །ཤིན་ཏུ་རྒྱས་ལ་མེ་བཙའ་ཐུར་མ་བྱ། །མདོར་ན་རླུང་ནད་འཇམ་རྩི་བཅུད་ཀྱིས་བཅོས། །མཁྲིས་པའི་ནད་ལ་བཤལ་དང་བསིལ་གྱིས་བཅོས། །བད་ཀན་ནད་ལ་སྐྱུགས་དང་དྲོད་ཀྱིས་བཅོས། །རླུང་དང་མཁྲིས་པར་ལྡན་ལ་བསིལ་བཅུད་བསྟེན། །བད་མཁྲིས་ལྡན་ལ་བསིལ་ལ་ཡང་བས་བཅོས། །བད་རླུང་ལྡན་ལ་དྲོ་ལ་བཅུད་པས་བཅོས། །འདུས་པའི་ནད་ལ་བསིལ་བཅུད་ཡང་བས་བཅོས། །མདོར་བསྡུས་ཚ་བ་ཐམས་ཅད་བསིལ་གྱིས་བཅོས། །གྲང་བའི་ནད་གཞི་ཐམས་ཅད་བད་ཀན་ལྟར། །རླུང་ནི་ཚ་གྲང་གང་འབྲེལ་སྣུམ་དྲོས་བཅོས། །ཞེས་གསུངས་སོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གསོ་ཐབས་དངོས་བསྟན་པའི་ལེའུ་སྟེ་སུམ་ཅུ་པའོ།། །།

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ། །ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས། །བྱ་བྱེད་སྨན་པའི་གནས་ལ་ཇི་ལྟར་བསླབ་པར་བགྱི། །འཚོ་མཛད་སྨན་པའི་རྒྱལ་པོས་བཤད་དུ་གསོལ། །ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཡིད་ལས་སྐྱེས། །དེ་ལྟར་གསོ་བར་བྱེད་པའི་གསོ་བ་པོ། །བྱ་བ་བྱེད་པ་སྨན་པའི་གནས་བསྟན་པ། །རྒྱུ་དང་ངོ་བོ་ངེས་ཚིག་དབྱེ་བ་དང༌། །ལས་དང་འབྲས་བུ་རྣམ་པ་དྲུག་གིས་བསྟན། །རྒྱུ་ནི་བློ་ལྡན་བསམ་པ་དཀར་བ་དང༌། །དམ་ཚིག་ལྡན་ཞིང་རྣམ་པ་བཟོ་བ་དང༌། །བྱ་བ་ལ་བརྩོན་མི་ཆོས་མཁས་དང་དྲུག །དེ་ལ་དང་པོ་བློ་དང་ལྡན་པ་ནི། །བློ་ཆེ་བློ་བརྟན་བློ་གཟེག་གསུམ་ལྡན་པས། །གསོ་དཔྱད་མདོ་རྒྱས་མ་ལུས་ཁོང་དུ་ཆུད། །ལག་ལེན་ཀུན་ལ་ཐོགས་བརྡུགས་ཉམ་ང་མེད། །རིག་པས་དཔྱོད་ཤེས་མངོན་ཤེས་ཕྲ་མོ་འཆར། །དེ་ཉིད་རྒྱུ་ཡི་ནང་ནས་མཆོག་ཅེས་བྱ། །བསམ་པ་དཀར་བ་བྱང་ཆུབ་སེམས་ལྡན་པ། །སྦྱོར་བ་དངོས་གཞི་འཇུག་ལས་དང་པོ་ནི། །སྡུག་བསྔལ་མཐོང་དང་ཕན་འདོགས་དད་པ་དང༌། །བཟང་ངན་བྱམས་སྡང་ཞེ་ནས་སྙོམས་པ་ཡིས། །སྙིང་རྗེ་བྱམས་པ་དགའ་བ་བཏང་སྙོམས་བཞི། །སྨོན་པ་བྱང་ཆུབ་མཆོག་ཏུ་སེམས་བསྐྱེད་དེ། །དངོས་གཞི་འཇུག་པ་ཚད་མེད་ཉམས་སུ་བླང༌། །འཇུག་པ་བསྔགས་པར་བལྟ་ཞིང་ཁོན་འཛིན་མེད། །དེ་ལྡན་གསོ་སླ་འཚོ་མང་གྲོགས་སུ་འགྱུར། །དམ་ཚིག་ལྡན་པ་བློ་བཞག་རྣམ་པ་དྲུག །བཟུང་བྱ་གཉིས་དང་ཤེས་བྱ་གསུམ་དུ་བཤད། །དང་པོ་སློབ་དཔོན་གསུང་དང་གསོ་དཔྱད་དང༌། །མཆེད་དང་ནད་པ་རྣག་ཁྲག་རྣམ་དྲུག་ལ། །སངས་རྒྱས་དྲང་སྲོང་གསུང་དང་བཀའ་རྒྱུད་དང༌། །གྲོགས་སྤུན་བུ་ཚ་ཁྱི་ཕག་ལྟ་བུར་ནི། །བློ་བཞག་པ་ཡི་དམ་ཚིག་དྲུག་བསྲུང་བྱ། །གཉིས་པ་སྨན་གྱི་རིག་འཛིན་ཆ་བྱད་རྣམས། །བཀའ་སྲུང་ཕྱག་ཆ་ལྟ་བུར་བཟུང་ཞིང་བསྲུང༌། །གསུམ་པ་སྨན་རྣམས་ནོར་བུ་བདུད་རྩི་དང༌། །མཆོད་རྫས་ཤེས་པར་བྱ་བ་གསུམ་ཡིན་ཏེ། །དགོས་འདོད་འབྱུང་བའི་ནོར་བུར་ཤེས་པར་བྱ། །ནད་རྣམས་སེལ་བའི་བདུད་རྩིར་ཤེས་པར་བྱ། །ཕུད་ཀྱིས་རིག་འཛིན་མཆོད་པའི་རྫས་སུ་ཤེས། །དང་པོ་རིན་པོ་ཆེ་དེ་བཙལ་ལ་བཅང༌། །གཉིས་པ་ལེགས་པར་སྦྱར་ལ་བྱིན་གྱིས་བརླབ། །རང་ཉིད་བཻཌཱུརྱ་འོད་རྒྱལ་པོ་དང༌། །སྨན་གྱི་སྣོད་ནི་བདུད་རྩི་ལྷུང་བཟེད་བསམ། །སྨན་བླ་དྲང་སྲོང་རྣམས་ཀྱིས་ཤིས་པ་བརྗོད། །འཚོ་མཛད་སྨན་པའི་རྒྱལ་པོ་བཅོམ་ལྡན་འདས། །དུག་གསུམ་ནད་སེལ་སངས་རྒྱས་སྨན་གྱི་བླ། །སྐུ་མདོག་མཐིང་ག་བཻཌཱུརྱ་ཡི་འོད། །སྤྲུལ་པའི་སྐུ་ལ་མཚན་དང་དཔེ་བྱད་ལྡན། །རླུང་མཁྲིས་བད་ཀན་ནད་ཀྱིས་གདུངས་པ་ལ། །ནད་ཀྱི་གཉེན་པོ་ཕྱག་གཡས་ཨ་རུ་ར། །ཕྱག་གཡོན་བདུད་རྩིའི་ལྷུང་བཟེད་པར་པུ་བསྣམས། །བཻཌཱུརྱ་ཡི་འོད་ལ་ཕྱག་འཚལ་ལོ། །རིག་པའི་གནས་མཆོག་བཅོ་བརྒྱད་ཐུགས་སུ་ཆུད། །ཚེ་ལ་དབང་བའི་བཅུད་ལེན་དངོས་གྲུབ་བརྙེས། །མངོན་ཤེས་སྙིང་རྗེས་འགྲོ་མཆོག་འདུ་བ་སྙོམས། །དྲང་སྲོང་རིག་འཛིན་རྣམས་ལ་ཕྱག་འཚལ་ལོ། །ལྷ་རྣམས་ཀྱི་ནི་བདུད་རྩི་ལྟ་བུ་དང༌། །ཀླུ་རྣམས་ཀྱི་ནི་གཙུག་ནོར་ལྟ་བུ་དང༌། །དྲང་སྲོང་རྣམས་ཀྱི་བཅུད་ལེན་ལྟ་བུར་ནི། །ཁྱེད་ལ་སྨན་འདི་ཉེ་བར་གནས་གྱུར་ཅིག །རླུང་མཁྲིས་བད་ཀན་བཞི་བརྒྱ་རྩ་བཞིའི་ནད། །ཚེ་ལ་བར་དུ་གཅོད་པ་ཞི་བ་དང༌། །གནོད་པའི་བགེགས་རིགས་སྟོང་ཕྲག་བརྒྱད་ཅུ་དང༌། །ཡེ་འབྲོག་སུམ་བརྒྱ་དྲུག་ཅུ་ལ་སོགས་པ། །བསམས་པའི་བར་དུ་གཅོད་པ་ཞི་བར་མཛོད། །ཨོཾ་ན་མོ་བྷ་ག་ཝ་ཏེ་བྷཻ་ཥ་ཛྱེ་གུ་རུ་བཻ་ཌཱུརྱ་པྲ་བྷ་རཱ་ཛཱ་ཡ་ཏ་ཐཱ་ག་ཏཱ་ཡ་ཨརྷ་ཏེ་སམྨྱཀྶཾབུདྡྷཱ་ཡ། ཏདྱ་ཐཱ། ཨོཾ་བྷཻ་ཥ་ཛྱེ། བྷཻ་ཥ་ཛྱེ། མཧཱ་བྷཻ་ཥ་ཛྱེ། བྷེ་ཥ་ཛྱེ་རཱ་ཛཱ་ཡ། ས་མུངྒ་ཏེ་སྭཱ་ཧཱ། །བདུན་བཟླས་བདུད་རྩིར་བསམས་ཏེ་རིག་འཛིན་མཆོད། །དངོས་གྲུབ་བླངས་པས་རང་གི་ནད་གདོན་བསལ། །ནད་པས་བསྟེན་པས་འཆི་བ་སོས་པར་བསམ། །དམ་ལྡན་བྱིན་འབེབས་བཀྲ་ཤིས་བསོད་ནམས་འབྱུང༌། །རྣམ་པ་བཟོ་བ་ལུས་ངག་ཡིད་དང་གསུམ། །ལག་པ་བཟོ་བས་སྨན་དཔྱད་བཟོ་ལ་མཁས། །ངག་ཚིག་སྙན་པས་ནད་པ་སྤྲོ་སྐྱེད་ནུས། །རིག་པ་བཀྲ་བས་ཡིད་ལ་མ་རྨོངས་གསལ། །དེ་ཤེས་བཟོ་རྣམས་ཀུན་གྱི་དཔོན་དུ་འགྱུར། །བྱ་བ་ལ་བརྩོན་བདག་དང་གཞན་གཉིས་ཏེ། །བདག་ཉིད་བྱ་བ་བརྩོན་པ་རྒྱུ་ལ་བསླབ། །རྐྱེན་བསྟེན་གྲོགས་ལ་བརྩོན་བྱ་གོམས་མཐར་དབྱུང༌། །རྒྱུ་ནི་འདྲི་ཀློག་མཐའ་རུ་ཕྱིན་པར་བསླབ། །ཆོད་དང་མི་ཆོད་དེ་ལ་བརྟེན་པར་སྣང༌། །དེ་རྐྱེན་སློབ་དཔོན་བསྟེན་ཏེ་མཚན་ཉིད་དང༌། །བསྟེན་པའི་ཐབས་དང་བསྟེན་པའི་དགོས་པ་གསུམ། །མཚན་ཉིད་རྒྱ་ཆེ་མཁས་དང་མན་ངག་ལྡན། །ངང་རིང་གསོག་ཆུང་བརྩེ་ལ་བཀུར་འོས་བསྟེན། །བསྟེན་ཐབས་དོགས་པ་མེད་པར་བློ་གཏད་ལ། །ངོ་ལྐོག་མེད་པར་བྱ་བ་བསྒྲུབ་པར་བྱ། །སྤྱོད་པ་ཐམས་ཅད་དེ་ཡི་ཡུལ་དང་བསྟུན། །དྲིན་དུ་ཚོར་བས་རྒྱུན་དུ་བསྲིང་བར་བྱ། །དགོས་པ་མྱུར་བར་ལོབས་དང་མཁས་པར་འགྱུར། །གྲོགས་ལ་བརྩོན་བྱ་ཞུ་དང་དྲི་བ་དང༌། །བཟུང་དང་བསམ་པ་ལེ་ལོ་བྱ་བ་མིན། །ཅི་ཡི་ཕྱིར་ན་དེ་ཉིད་བར་གཅོད་དགྲ། །གོམས་པ་མཐར་དབྱུང་མཐོང་ཐོས་བླང་བ་སྟེ། །ཐམས་ཅད་ཞེན་འདྲིས་ཐེ་ཚོམ་སྤོང་བར་བྱེད། །གཞན་གྱི་བྱ་བ་ལ་བརྩོན་ནད་པ་དེ། །དེ་དོན་ཕྱི་བཤོལ་བར་དུ་མ་ཆོད་པར། །གྱང་ཐོག་མར་ཕོར་བོ་ན་གསོད་བསྡིགས་བཞིན། །སྨན་དཔྱད་དུས་ལས་མ་འགྱངས་བརྩོན་པས་སྒྲིམས། །མི་ཡི་ཆོས་ལུགས་མཁས་པར་བྱ་བ་ནི། །མི་ཆོས་པ་དང་དམ་པ་ཐུན་མོང་གསུམ། །དང་པོ་མཁས་པར་བསླབ་ལ་གཉེན་གྱིས་བཙའ། །གྱོང་གིས་འདུལ་གསུམ་ལྡན་ན་འདོད་པ་འགྲུབ། །དམ་པའི་ཆོས་ལུགས་སྣ་དུལ་འགྲོགས་པ་བདེ། །ཆོག་ཤེས་གྱུར་ན་རང་གཞན་ཕན་ཐོགས་འགྱུར། །ཐུན་མོང་ཕོངས་པ་རྣམས་ལ་སྙིང་རྗེས་བཟུང༌། །མཐོན་པོ་རྣམས་ཀྱིས་རང་གིས་མདོ་དོན་སྒྲུབ། །ཚོགས་པ་དྲུག་ལྡན་འབྲས་བུ་ཐེ་ཚོམ་མེད། །ཉེས་པ་གནོད་བྱ་གཉེན་པོའི་མཚན་ཉིད་རྣམས། །ཅི་རིགས་ཁོང་དུ་ཆུད་པ་ངོ་བོར་འདོད། །ངེས་ཚིག་ནད་གསོ་ལུས་ལ་ཕན་ཕྱིར་སྨན། །ནད་སྟེང་དཔྱད་དཔའ་འགྲོ་ལ་ཕ་ལྟར་སྐྱོབ། །རྒྱལ་པོ་རྣམས་ཀྱིས་རྗེ་རུ་འཁུར་བར་བྱེད། །དབྱེ་བ་སྨན་པ་བླ་ན་མེད་པ་དང༌། །ཁྱད་པར་ཅན་དང་ཕལ་པ་གསུམ་ཡིན་ཏེ། །དུག་གསུམ་རྒྱུ་འབྲས་ནད་སེལ་གོང་ན་མེད། །གཞན་རིག་མངོན་ཤེས་བྱམས་ལྡན་དྲང་པོར་སྲོང༌། །གནང་རིགས་རྗེས་སྦྱངས་ལས་གོམས་འགྲོ་བའི་གཉེན། །འདོད་པས་འཕྲལ་དུ་ཆ་བཟུང་སྲོག་གི་གཤེད། །འོན་ཀྱང་མཆོག་དང་ཐ་མར་གྲགས་པ་སྟེ། །གདུང་བཙུན་བློ་དང་ལྡན་ཞིང་དམ་ལ་གནས། །གཞུང་གི་དོན་མཁས་མན་ངག་གནད་དུ་རྡེག །གོམས་ཐོག་གཙོ་བོར་ཆོས་གཉེར་འདོད་པ་སྤངས། །དུལ་ཞིང་བཟོ་མཁས་འགྲོ་ལ་བྱམས་སེམས་ཆེ། །གཡེལ་མེད་གཞན་གྱི་དོན་ལ་རང་དོན་སེམས། །གསོ་དཔྱད་ཀུན་ལ་རྨོངས་མེད་སྨན་པ་མཆོག །འགྲོ་བ་ནད་པ་རྣམས་ཀྱི་མགོན་གཅིག་པུ། །རིག་འཛིན་དྲང་སྲོང་རྣམས་ཀྱི་རྒྱུད་འཛིན་སྲས། །འཚོ་མཛད་སྨན་པའི་རྒྱལ་པོའི་སྤྲུལ་པར་བཤད། །དེ་ལྟར་མི་ལྡན་ཐ་མའི་སྐྱོན། །རིགས་རྒྱུད་མེད་པའི་སྨན་པ་དེ། །ཝ་ཡིས་རྒྱལ་ས་བཟུང་བ་ལྟར། །ཀུན་གྱིས་སྤྱི་བོར་བཀུར་མི་འགྱུར། །གཞུང་དོན་མི་ཤེས་སྨན་པ་དེ། །དམུས་ལོང་དག་ལ་རྫས་བསྟན་བཞིན། །ནད་རིགས་བཅོས་ཐབས་ཤན་མི་ཕྱེད། །མཐོང་གོམས་མེད་པའི་སྨན་པ་དེ། །རྒྱུས་མེད་ལམ་དུ་ཞུགས་པ་བཞིན། །ནད་རྟགས་དཔྱད་ལ་ཐེ་ཚོམ་འགྱུར། །བརྟག་ཐབས་མི་ཤེས་སྨན་པ་དེ། །གཉེན་མེད་བྱེས་སུ་འཁྱམས་པ་འདྲ། །ནད་ངོ་ཤེས་པ་གཅིག་མི་འབྱུང༌། །རྩ་ཆུ་མི་ཤེས་སྨན་པ་དེ། །བྱ་པས་བྱ་གཏོང་མི་ཤེས་འདྲ། །ཚ་གྲང་ནད་ཀྱི་སྐད་མི་སྟེར། །ཁ་དམར་མི་ཤེས་སྨན་པ་དེ། །གཙོ་བོས་སྨྲ་བ་མི་ཤེས་འདྲ། །རང་སྐྱེངས་གྲགས་པ་ངན་པ་འཕོག །བཅོས་ཚུལ་མི་ཤེས་སྨན་པ་དེ། །མུན་ཁུང་འབེམ་ལ་བརྡེག་པ་འདྲ། །གཉེན་པོ་ནད་ཐོག་འབབ་མི་འགྱུར། །ཟས་སྤྱོད་མི་ཤེས་སྨན་པ་དེ། །རང་སྲིད་དགྲ་ལ་ལོག་པ་འདྲ། །ནད་ཀྱི་སྟོབས་སྐྱེད་ལུས་ཟུངས་འཇོམས། །ཞི་སྦྱོར་མི་ཤེས་སྨན་པ་དེ། །སོ་ནམ་མི་ཤེས་ཞིང་པ་འདྲ། །དམན་ལྷག་ལོག་པས་ནད་སྐྱེད་འགྱུར། །སྦྱོང་བྱེད་མི་ཤེས་སྨན་པ་དེ། །བྱེ་མའི་རི་ལ་ཆུ་འབེབས་འདྲ། །ནད་དང་ལུས་ཟུངས་མ་རུངས་བྱེད། །ཆ་བྱད་སྨན་མེད་སྨན་པ་དེ། །གོ་མཚོན་མེད་པའི་དཔའ་བོ་འདྲ། །ནད་ཀྱི་དགྲ་དཔུང་ཆོམས་མི་འགྱུར། །གཏར་བསྲེག་མི་ཤེས་སྨན་པ་དེ། །ནང་ཡན་མེད་པའི་རྐུན་མོ་འདྲ། །ནད་དང་དཔྱད་དུ་འཛོལ་བར་འགྱུར། དེ་ཕྱིར་སྨན་པ་ངན་པ་ནི། །ལྕི་ཡང་ལོག་པར་རྟོགས་པ་ཡིས། །གསོ་བ་ལོག་པ་དག་ཏུ་འགྱུར། །བདུད་ཉིད་སྨན་པའི་ཆ་བྱད་ཅན། །གཤིན་རྗེའི་ཞགས་པ་ཐོགས་པས་ན། །སྲོག་གི་གཟུ་བ་ཡིན་པའི་ཕྱིར། །འབྲེལ་བ་མི་བྱ་འཁོར་རྣམས་འཕུང༌། །སྨན་པའི་ལས་ལ་ཐུན་མོང་ཁྱད་པར་གཉིས། །དང་པོ་ལུས་ངག་ཡིད་ཀྱི་བྱ་བའི་ལས། །ལུས་ཀྱིས་སྨན་དང་ཆ་བྱད་ཚོགས་པར་བསག །ནད་པའི་བྱ་བ་གང་ཡིན་དོན་དུ་གཉེར། །ངག་གི་ལས་ནི་ཁ་དམར་གདགས་པ་སྟེ། །རྟོགས་ན་ཁྲོམ་དུ་དུང་འབུད་ལྟ་བུར་གདགས། །འཚོ་བར་ཁས་བླངས་འཆི་བར་དུས་བཏབ་གཅེས། །ཉམས་མ་ལོངས་ན་སྦྲུལ་ལྕེ་ལྟ་བུར་གདགས། །གཉིས་ལ་ཞོན་ནས་གང་བཟང་སྟེང་དུ་བྲོས། །ཡང་ན་མཐུན་པར་སྣང་བ་གསལ་གདབ་ཅིང༌། །བློ་ཡི་ཆོད་པ་ཡུལ་དང་བསྟུན་པ་དང༌། །སྲིད་པའི་སྒོ་མི་བགག་པར་རྫོང་ལ་བྲོས། །དང་པོ་ནད་པས་དོགས་དང་སྨན་པས་རྟོགས། །གཅིག་པར་མཐུན་ན་དེ་ཉིད་གསལ་པོར་བརྗོད། །གཉིས་པ་ནད་པས་དུག་ཏུ་དོགས་པ་ལ། །གཞན་བཟུང་ཐོག་ཏུ་མ་བྱུང་ཟེར་སྲིད་ཕྱིར། །བློ་བསྟུན་དེར་བཏགས་ནད་གང་ཡིན་པ་བཅོས། །གསུམ་པ་འཚོ་འཆི་ཉེན་ཆེ་ཉེན་ཆུང་རྣམས། །ཀླུང་རྟ་ལས་དབང་བསོད་ནམས་རྐྱེན་དབང་གིས། །ཇི་འདྲ་འཆི་ལ་ཇི་འདྲ་འཚོ་བའི་ཕྱིར། །ཁ་དམར་ཧ་ཅང་གསལ་བ་སྨྲ་མི་བཏུབ། །ཉེན་ཆེར་ཡོད་ཀྱང་གསོ་རུ་ཡོད་པར་སྨྲ། །ཉེན་ཆུང་ཚོར་ཡང་བྱ་ར་དགོས་པར་སྨྲ། །ལར་ཡང་མི་ཆོས་འཇིག་རྟེན་དག་དང་བསྟུན། །ཡིད་ལས་མ་འཁྲུལ་བརྩོན་པས་བསམ་ཞིང་གཞིག །ཁྱད་པར་ལས་ནི་ལྟ་སྒོམ་སྤྱོད་པ་གསུམ། །ལྟ་བ་ཆོས་རྣམས་ཀུན་ལ་དབུ་མར་རྟོགས། །དམན་མཐའ་ལྷག་མཐའ་ལོག་པའི་མཐའ་སྤངས་པའི། །ཡང་དག་དབུ་མར་བལྟ་བ་ལྟ་བའི་མཆོག །སྒོམ་པ་ཚད་མེད་བཞི་ཡི་ངང་དུ་གནས། །ལོག་པའི་གོལ་ས་བཞི་རུ་མ་ཤོར་གཅེས། །སྤྱོད་པ་སྤང་བླང་གཉིས་ལས་མི་དགེ་སྤང༌། །སྨྱོ་འཆལ་ཐོ་ཅོ་སྡིག་པ་ངན་སྤྱོད་དོར། །སྦྱིན་དང་ཚུལ་ཁྲིམས་བཟོད་པ་བརྩོན་འགྲུས་སྤྱད། །སྨན་པའི་འབྲས་བུ་གནས་སྐབས་མཐར་ཐུག་གཉིས། །གནས་སྐབས་འབྲས་བུ་ཚེ་འདིར་སྐྱིད་པ་དང༌། །དབང་དང་ལོངས་སྤྱོད་དགའ་བདེ་ལྡན་པར་འགྱུར། །དེ་དག་སྒྲུབ་པར་བྱེད་པ་སྨན་ཡིན་པས། །དེ་ཡང་རང་གི་ཡོན་ཏན་མི་ལ་འཕྱར། །འཚེ་བའི་མི་ལའང་སྤུན་བཞིན་བག་ཕབ་ལ། །བརྟག་ཅིང་ཚོད་བླང་སྤྱོད་པ་བསྟུན་ལ་བཅོས། །དེ་ཡིས་བསོད་ནམས་གྲགས་པ་ཐོབ་པར་འགྱུར། །འདོད་པའི་ཟས་དང་ལོངས་སྤྱོད་ཤུགས་ལས་འབྱུང༌། །འདི་དུས་བག་དང་ལྡན་པས་བཙའ་བར་བྱ། །བྲིན་པའི་དུས་སུ་ཟས་ནོར་གཤེར་ཞིང་བླངས། །འགྱངས་ན་དྲིན་བྱས་བརྗེད་ནས་ལན་མི་ཁྱེར། །མཐར་ཐུག་འབྲས་བུ་གཡོ་སྒྱུ་འདོད་པ་རྣམས། །སྤངས་ནས་ནད་པ་གསོ་བ་ལ་འཇུག་པ། །བླ་མེད་སངས་རྒྱས་ས་ལ་བགྲོད་འགྱུར་ཞེས། །འཚོ་མཛད་སྨན་པའི་རྒྱལ་པོས་བཤད་པ་ཡིན། །ཞེས་གསུངས་ནས་རིག་པའི་ཡེ་ཤེས་དེ་སྨན་པའི་རྒྱལ་པོའི་དབུའི་གཙུག་ཏུ་ཐིམ་པར་གྱུར་ཏོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གསོ་བ་པོ་སྨན་པའི་ལེའུ་སྟེ་སུམ་ཅུ་རྩ་གཅིག་པའོ། །བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་བཤད་པའི་རྒྱུད་ཅེས་བྱ་བ་རྫོགས་སོ།། །།