རྒྱལ་བ་རྣམས་ཀྱི་ཡུམ་
རྒྱལ་བ་རྣམས་ཀྱི་ཡུམ་ཞེས་པ་ནི་བོད་བརྒྱུད་ནང་པའི་གཞུང་ལུགས་སུ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་སྡེ་ལ་བཏགས་པའི་མཚན་གནས་ཤིག་ཡིན། འདི་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ལས་སངས་རྒྱས་ཐམས་ཅད་སྐྱེ་བ་དེའི་ཕྱིར་མ་ཞེས་བརྗོད་པ་ལས་བྱུང་བའི་ཐ་སྙད་ཅིག་ཡིན།
སྒྲ་བཤད།
[རྩོམ་སྒྲིག]རྒྱལ་བ་ཞེས་པ་ནི་སྡུག་བསྔལ་དང་ཉོན་མོངས་པ་རྣམས་ལ་རྒྱལ་བ། བདུད་བཞི་རྣམས་ལ་རྒྱལ་བ། ཐམས་ཅད་མཁྱེན་པའི་སངས་རྒྱས་ཀྱི་གོ་འཕང་ལ་ཟུང་འཇུག་གི་སྒོ་ནས་རྒྱལ་བ་སྟེ་སངས་རྒྱས་རྣམས་ལ་ཟེར། རྣམས་ཞེས་པ་ནི་སྔོན་དང་ད་ལྟར་དང་མ་འོངས་པའི་དུས་གསུམ་དུ་བྱུང་བ་དང་འབྱུང་བ་དང་འབྱུང་འགྱུར་བའི་སངས་རྒྱས་ཐམས་ཅད་ལ་ཟེར། ཡུམ་ཞེས་པ་ནི་ཐམས་ཅད་མཁྱེན་པའི་ཡེ་ཤེས་འདྲེན་པ་དང་སྐྱེད་པར་བྱེད་པས་ཡུམ་སྟེ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཟེར།
ནང་དོན།
[རྩོམ་སྒྲིག]སངས་རྒྱས་སྐྱེད་པའི་ཡུམ་"རྒྱལ་བ་རྣམས་ཀྱི་ཡུམ་ནི་བཅོམ་ལྡན་འདས་ཏེ། སྐྱེད་པས་ན་ཡུམ་ནི་བཅོམ་ལྡན་འདས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ་"[༡] ཞེས་གསུངས། འདིས་ཤེས་རབ་ཀྱི་ཕ་རོལ་ཏུ་ཕྱིན་པ་ནི་སངས་རྒྱས་ཐམས་ཅད་ཀྱི་སྐྱེད་པའི་རྒྱུ་ཡིན་པའི་ཕྱིར་ཡུམ་ཞེས་བྱ་ཞེས་གསལ་པོར་བསྟན།
འགྲེལ་བཤད།
[རྩོམ་སྒྲིག]དཔེ་མཚོན་གྱི་སྒོ་ནས་ཤེས་ཐབས། བྱང་ཆུབ་སེམས་དཔའ་གང་གིས་བསྟན་མ་ཐག་པའི་ཆོས་དེ་ལྟ་བུ་ཤེས་པ་དེ་ལ་སྣ་ཚོགས་པའི་འདུ་ཤེས་ནི་སྐྱེས་བུ་རྫས་དང་བཏགས་པར་ཡོད་པའི་འདུ་ཤེས་མོས་པ་ཡིད་ལ་བྱེད་པའི་སྟོབས་ཀྱིས་བྲལ་བ་སྟེ། སྤངས་པ་དེ་བས་ན་མྱ་ངན་ལས་འདས་པ་དང་རྗེས་སུ་མཐུན་པའི་སྤྱོད་པ་དང་ལྡན་པས་ན་ཉེ་བར་ཞི་བའོ། །གང་ཞིག་མོས་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། འགྲོ་བ་མ་ལུས་པ་བདག་མེད་པའི་རང་བཞིན་ཡིན་ཏེ། རིམ་གྱིས་ཐོབ་པའི་རྒྱུ་ཡིན་པའི་ཕྱིར་གནས་པར་བྱེད་པ་ཡིན་ནོ། །
དགོས་པ།
[རྩོམ་སྒྲིག]བཟོད་པ་སྐྱེད་པའི་དགོས་པ།ཤེས་རབ་ཀྱི་ཕ་རོལ་ཏུ་ཕྱིན་པ་ལ་རྒྱལ་བ་རྣམས་ཀྱི་ཡུམ་ཞེས་བཏགས་པས་སེམས་ཅན་རྣམས་ལ་སྟོང་པ་ཉིད་ཀྱི་ཆོས་འདི་ལ་བཟོད་པ་སྐྱེད་པའི་དགོས་པ་ཡོད། "རྒྱལ་བ་རྣམས་ཀྱི་ཡུམ་ཤེར་ཕྱིན་ཐོས་ན་ཡིད་སྐྲག་པར་ཡོད་ཡེ་མི་འགྱུར་"[༢] ཞེས་གསུངས།