རྒྱལ་བ་མ་ཕམ་པ་

རྒྱལ་བ་མ་ཕམ་ཞེས་པ་ནི་རྗེ་བཙུན་བྱམས་པ་མགོན་པོའི་མཚན་ཡིན། དེ་ཡང་ཉོན་མོངས་པའི་བདུད། འཆི་བདག་གི་བདུད། ཕུང་པོའི་བདུད། ལྷའི་བུ་ཡི་བདུད་བཅས་བདུད་བཞིའི་གཡུལ་ལས་རྣམ་པ་རྒྱལ་བས་ན་རྒྱལ་བ་ཞེས་མཚན་ཐོགས།

སྔོན་བདག་ཅག་གི་སྟོན་པ་དགའ་ལྡན་དུ་དམ་པ་ཏོག་དཀར་གྱི་སྐྱེ་བ་བཞེས་ནས་ཕྱིས་འཛམ་བུ་གླིང་དུ་འབྱོན་པར་བརྩམས་པ་ན་དེར་བཞུགས་པའི་ལྷ་རྣམས་ཐུགས་སྐྱོ་ནས་སྨྲེང་ངག་བཏོན་པས་ན་སྟོན་པས་རྒྱལ་བ་བྱམས་པ་རྒྱལ་ཚབ་ཏུ་དབང་བསྐུར་ནས་ལྷ་དེ་དག་ཐུགས་མ་ཕམ་པ་མཛད་པས་མ་ཕམ་པ་ཞེས་མཚན་ཐོགས་པ་ཡིན་ནོ།། རྒྱལ་བ་མི་ཕམ་མགོན་པོ་ཞེས་པ་ཡང་ཁོང་ཉིད་ཡིན།།