རྒྱ་ཡེ་བློ་བཟང་ཉི་མ་

དེ་ཡང་གུས་པ་མཚོ་སྔོན་སློབ་ཆེན་བོད་ལུགས་གསོ་རིག་སློབ་གླིང་གི་༢༠༠༧ལོའི་རབ་འབྱམས་ཞིབ་འཇུག་སློབ་མ་ཡིན་སྐབས། མཛུབ་སྟོན་སློབ་དཔོན་བྱ་མདོ་ཀླུ་བྱམས་རྒྱལ་གྱི་ཐུགས་བཀོད་ལྟར་ཞིང་ཆེན་བོད་སྨན་ཁང་དུ་དངོས་སྦྱོང་ལ་ཕྱིན་ཏེ། སྨན་རམས་པ་རྒྱ་ཡེ་ཉི་མའི་དྲུང་དུ་ལོ་གཅིག་དང་ཟླ་གསུམ་ལ་གཞུང་ལུགས་ཀྱི་བཤད་པ་དང་མཐོང་བ་བརྒྱུད་པའི་ཕྱག་ལེན་ཐེངས་མང་མཐོང་ཐོས་ཀྱི་སྐལ་བཟང་ཐོབ། སྐབས་དེར་སློབ་མའི་གྲས་སུ་སྐུ་ཚ་བློ་བཟང་མཆོག་གྲུབ་དང་། སེར་ཤུལ་སྨན་པ་ཐུབ་དར་དང་ཕྲན་བཅས་ཡོད། འདིར་སློབ་དཔོན་གང་ཉིད་དང་ཆོས་འབྲེལ་ཐོགས་པ་ནས་བཟུང་ཁོང་གིས་དཔལ་ལྡན་གསོ་བ་རིག་པའི་ལུང་རྒྱུན་སྤེལ་ཚུལ་གྱི་རེག་ཟིག་ཐོར་བུ་བཀོད་པ་གཤམ་གསལ་ལྟར།

ཕྱི་ལོ་༢༠༠༩ལོའི་ཟླ་༤ཚེས་༡༠ཉིན་ནས་བཟུང་ཟླ་གཅིག་ལྷག་གི་རིང་ལ། མཚོ་སྔོན་སློབ་ཆེན་བོད་ལུགས་གསོ་རིག་སློབ་གླིང་གི་༢༠༠༩ལོའི་ཨ་མེ་རི་ཀའི་ཕྱི་འགྲིམས་སློབ་མ་བདུན་དང་། སྐུ་ཚ་བློ་བཟང་མཆོག་གྲུབ། ཕྲན་བཅས་ལ་དཔལ་ལྡན་རྒྱུད་བཞི་ཡོངས་གཏད་དང་བཅས་པའི་ལྗགས་ལུང་བསྩལ། དེའི་བཀླག་ལུང་གི་བརྒྱུད་པ་ནི། རྒྱལ་དབང་སྐུ་ཕྲེང་བཅུ་གསུམ་པའི་བླ་སྨན་པ་བཀྲས་ཁང་བྱམས་པ་ཐུབ་དབང་༡༨༦*-༡༩༢༢ལས་ཞྭ་དམར་དགེ་འདུན་བསྟན་འཛིན་རྒྱ་མཚོའི་༡༨༥༢-༡༩༡༢དངོས་སློབ་འཇུ་བློ་བཟང་འོད་ཟེར་རྒྱ་མཚོ། དེ་ལས་ངང་རུང་མཁན་སྤྲུལ་སྐུ་ཕྲེང་ལྔ་པ་འཇམ་དབྱངས་མཁྱེན་རབ་རྒྱ་མཚོ༡༩༠༣-༡༩༥༨། དེ་ལས་དྷཱི་ཚ་ཚུལ་ཁྲིམས་རྒྱ་མཚོ༡༩༡༢-༡༩༨༡། དེ་ལས་རྒྱ་ཡེ་ཉི་མ་༡༩༣༢- ལའོ། །ཡང་བརྒྱུད་པ་གཞན་ཞིག་ནི། ཕྱི་ལོ་༡༩༨༣ལོའི་ཧོར་ཟླ་༨པར་མཚོ་སྔོན་ཞིང་ཆེན་འཕྲོད་བསྟེན་ཐིན་གྱིས་སྐུ་འབུམ་བྱམས་པ་གླིང་དུ་སྒྲུབ་པའི་གསོ་རིག་ཟབ་སྦྱོང་འཛིན་གྲྭ་ཐེངས་དང་པོའི་སྐབས་སུ་དྷཱི་ཚ་ཡེ་ཤེས་རྒྱ་མཚོའི་༡༩༡༧-༡༩༩༥མདུན་ནས་རྒྱ་ཡེ་ཉི་མས་གསན། གཞན་ཡང་མཁན་ཆེན་ཁྲོ་རུ་ཚེ་རྣམ་༡༩༢༦-༢༠༠༤དང་མཛོད་དགེ་ཨ་ཁུ་བསྟན་ཁོའམ་བསྟན་འཛིན་དོན་གྲུབ་༡༩༣༣-༢༠༡༨ཀྱི་མདུན་ནས་ཀྱང་རྒྱུད་ཆུང་གསུམ་གྱི་ལྗགས་ལུང་ཞུས་པར་ཞལ་སྔ་ནས་གསུངས། ཕྱི་ལོ་༢༠༡༢ལོའི་ཟླ་༣ཚེས་༢༩ནས་ཟླ་༥ཚེས་༣༡ལ། མཚོ་སྔོན་སློབ་ཆེན་བོད་ལུགས་གསོ་རིག་སློབ་གླིང་གི་༢༠༡༢ལོའི་ཨ་མེ་རི་ཀའི་ཕྱི་འགྲིམས་སློབ་མ་བཅུ་གཉིས་དང་སློབ་གླིང་གི་དགེ་རྒན་དོན་གཉེར་ཅན་ཁ་ཅིག མཚོ་སྔོན་ཞིང་ཆེན་བོད་སྨན་ཁང་གི་སྨན་པ་ཡོངས་ལ་དཔལ་ལྡན་རྒྱུད་བཞི་ཡོངས་གཏད་དང་བཅས་པའི་ལྗགས་ལུང་བསྩལ།

ཕྱི་ལོ་༢༠༡༢ལོའི་ཟླ་༦ཚེས་༡༢ནས་ཟླ་༨ཚེས་༡༤བར། མཚོ་སྔོན་ཞིང་ཆེན་བོད་སྨན་ཁང་གི་སྨན་པ་ཡོངས་ལ། ཐུགས་བརྩེ་བ་ཆེན་པོའི་སྒོ་ནས་དར་མོ་སྨན་རམས་པ་བློ་བཟང་ཆོས་གྲགས་ཀྱིས་མཛད་པའི་མན་ངག་བཀའ་རྒྱ་མའི་ལྗགས་ལུང་བསྩལ། དེའི་བཀླག་ལུང་གི་བརྒྱུད་པ་ནི། ངང་རུང་མཁན་སྤྲུལ་སྐུ་ཕྲེང་ལྔ་པ་འཇམ་དབྱངས་མཁྱེན་རབ་རྒྱ་མཚོ་ལས་དྷཱི་ཚ་ཚུལ་ཁྲིམས་རྒྱ་མཚོ། དེ་ལས་རྒྱ་ཡེ་ཉི་མ་ལའོ།།

ཕྱི་ལོ་༢༠༡༣ལོའི་ཟླ་༦ཚེས་༨ཉིན་ནས་བཟུང་ཟླ་འགའི་ལས་ཞོར་གྱི་དུས་ཚོད་སྤྱད་དེ། མཚོ་ལྷོ་འཁྱམ་རུ་དགོན་བཀྲ་ཤིས་དགེ་འཕེལ་གླིང་གི་ལྷ་རམས་དགེ་བཤེས་འཇམ་དབྱངས་རྒྱ་མཚོ་དང་། ཨ་ལགས་སྤྲེལ་ནག་ཚང་། སྐུ་ཚ་བློ་བཟང་མཆོག་གྲུབ། དགོན་པའི་གྲྭ་པ་འགའ་དང་ཆབ་ཆ་ནས་ཡིན་པའི་སྨན་པ་དོན་གཉེར་ཅན་ཁ་ཅིག་ལ་དཔལ་ལྡན་རྒྱུད་བཞི་ཡོངས་གཏད་དང་བཅས་པའི་ལྗགས་ལུང་བསྩལ།

ཕྱི་ལོ་༢༠༡༤ལོའི་ཟླ་༥ཚེས་༥ནས་ཟླ་༥ཚེས་༧བར། མཚོ་སྔོན་ཞིང་ཆེན་བོད་སྨན་ཁང་གིས་ཟིན་ཏིག་བདུད་རྩིའི་ཐིགས་པའི་ཟབ་སྦྱོང་འཛིན་གྲྭ་ཆེད་དུ་བཙུགས་ནས་སྨན་པ་ཡོངས་ལ་འཇམ་མགོན་ཀོང་སྤྲུལ་བློ་གྲོས་མཐའ་ཡས་ཀྱིས་མཛད་པའི་ཟིན་ཏིག་བདུད་རྩིའི་ཐིགས་པའི་ལྗགས་ལུང་བསྩལ། དེའི་བཀླག་ལུང་གི་བརྒྱུད་པ་ནི། འབྲུ་འཇམ་དབྱངས་གྲགས་པའི་ཞལ་སློབ་ལྷ་རྗེ་འཆི་མེད་རྡོ་རྗེ་དང་། ཀཿ ཐོག་དགེ་རྩེ་འགྱུར་མེད་བསྟན་པ་རྣམ་རྒྱལ་གྱི་ཞལ་སློབ་མཁན་ཆེན་ཁྲོ་རུ་ཚེ་རྣམ་གཉིས་ལས་གོ་འཇོ་དབང་འདུས། དེ་ལས་རྒྱ་ཡེ་ཉི་མ་ལའོ།།

ཕྱི་ལོ་༢༠༡༦ལོའི་ཟླ་༤ཚེས་༣༠ནས་ཟླ་༥ཚེས་༢བར། མཚོ་སྔོན་ཞིང་ཆེན་བོད་སྨན་ཁང་གི་སྨན་པ་ཡོངས་ལ་དཔལ་ལྡན་གསོ་བ་རིག་པའི་རྒྱུད་ཆུང་གསུམ་དང་། ཟིན་ཏིག་བདུད་རྩིའི་ཐིགས་པའི་ལྗགས་ལུང་བསྩལ།

ཕྱི་ལོ་༢༠༡༨ལོའི་ཟླ་༥ཚེས་༢༡ཉིན་ལ། མཚོ་སྔོན་སློབ་ཆེན་བོད་ལུགས་གསོ་རིག་སློབ་གླིང་དུ། ༢༠༡༨ལོའི་ཨུ་རུ་སུའི་ཕྱི་འགྲིམས་སློབ་མ་བཅུ་དྲུག་དང་སློབ་གླིང་གི་དགེ་རྒན་གཞོན་སྐྱེས་ཡོངས། འབུམ་རམས་དང་རབ་འབྱམས་ཞིབ་འཇུག་སློབ་མ་ཡོངས། དངོས་གཞི་སློབ་མ་དོན་གཉེར་ཅན་ཁ་ཅིག་ལ་རྩ་བའི་རྒྱུད་ཀྱི་ལྗགས་ལུང་བསྩལ་ཏོ།།