རོ་ལངས་གསེར་སྒྲུབ་ཀྱི་སྒྲུང་།

ཡོངས་གྲགས་སུ་རོ་སྒྲུང་ཟེར། འདི་ནི་རྒྱ་གར་གྱི་སློབ་དཔོན་ཆེན་པོ་ཀླུ་སྒྲུབ་ཀྱིས་རོ་ལངས་སྒྲུབ་ནས་ལུས་གསེར་དུ་བསྒྱུར་བའི་གཏམ་རྒྱུད་ལེའུ་མང་པོ་ཡོད་པ་ཞིག་ཡིན། སྒྲུང་ཤོད་མཁན་ནི་རོ་དངོས་གྲུབ་རྡོ་རྗེ་ཟེར་བའི་རོ་ལངས་དེ་སློབ་དཔོན་གྱི་སློབ་མ་བདེ་སྤྱོད་བཟང་པོས་བཏུལ་རྗེས་སྒལ་པར་ཁུར་ནས་ཁྱེར་ཡོང་བའི་ལམ་བར་དུ་རོ་དངོས་གྲུབ་རྡོ་རྗེས་བཤད་པ་ཡིན་ཟེར་སྲོལ་ཡོད། འདི་ལ་ལིའུ་ཉི་ཤུ་རྩ་གཅིག་ཡོད་པ། ཉི་ཤུ་རྩ་བདུན་ཡོད་པ། སུམ་ཅུ་སོ་བདུན་ཡོད་པ་སོགས་སྣ་ཚོགས་འདུག མཚོ་སྔོན་མི་རིགས་དཔེ་སྐྲུན་ཁང་དང་། མི་རིགས་དཔེ་སྐྲུན་ཁང་གཉིས་ནས་དཔར་སྐྲུན་བྱས་ཡོད།དུང་དཀར་ཚིག་མཛོད་ཆེན་མོ་༽ལས་བཏུས།