རུས་རྒྱན།

སངས་རྒྱས་ཆོས་ལུགས་ཀྱི་གསང་སྔགས་བླ་མེད་ཀྱི་གཞུང་ལས་བཤད་པའི་ལྷ་སྐུའི་རྒྱན་ཆ་རིགས་ཤིག་སྟེ། དེ་ལ་ནང་གསེས་དྲུག་ཡོད། ༡.དབུ་རྒྱན། ༢.སྙན་རྒྱན། ༣.མགུལ་རྒྱན། ༤.གདུ་བུ། ༥.སྐ་རགས། ༦.མཆོད་ཕྱིར་ཐོགས་བཅས་ཡབ་ཀྱི་ཕྱག་རྒྱ་དྲུག་དང་། ཡུམ་ལ་མཆོད་ཕྱིར་ཐོགས་ཕུད་པའིཕྱག་རྒྱ་ལྔ་ཡོད། དེ་རྣམས་ཀྱི་བཟོ་སྟངས་དང་ཆ་ཚད་སོགས་ཞིབ་པར་མཁས་གྲུབ་རིན་པོ་ཆེ་དགེ་ལེགས་དཔལ་བཟང་གིས་མཛད་པའི《རྣལ་འབྱོར་རོལ་པའི་དགའ་སྟོན》དང་སོག་པོ་དམ་ཚིག་རྡོ་རྗེས་མཛད་པའི《གསང་སྔགས་ཀྱི་དམ་ཚིག་རྫས་དང་ཡོ་བྱད་ཀྱི་རྣམ་བཞག》ལས་གསལ།དུང་དཀར་ཚིག་མཛོད་ཆེན་མོ་༽ལས་བཏུས།