རུ་ཐོག་དགོན

མཚན་རྒྱས་པར་རུ་ཐོག་དགོན་བསམ་གཏན་འཕེལ་རྒྱས་གླིང་ཞེས་ཞུ། མལ་གྲོ་གུང་དཀར་རྫོང་ནས་སྣུམ་ནག་འཁོར་ལམ་བརྒྱུད་སྤྱི་ལེ་༥༥ཙམ་སོང་ན་དམར་གཞུང་ལ་འདབས་སུ་བཀྲ་ཤིས་ཐང་ངང་དམར་ཐང་ཐང་ཞེས་པའི་བྱང་ངོས་ཀྱི་རི་ལྡེབས་སུ་དགོན་དེ་མཇལ་རྒྱུ་ཡོད། དམར་ཐང་ཐང་ཞེས་པ་ནི། སྔོན་ཇུན་གར་དམག་གིས་ཐང་དེར་དགོན་པའི་འབྲི་གཡག་མང་པོ་བསད་པས་དབུ་མཛད་རུ་རིང་ཞེས་བསླབ་གསུམ་དང་ལྡན་པ་ཞིག་ཡོད་པ་དེས་མགོན་པོའི་སྐུ་བརྙན་བྱིན་ཅན་ཞིག་ཡོད་པ་དེ་སྒེའུ་ཁུང་ནང་ནས་གཡུགས་པར་བརྩམ་སྟེ་ད་འདིས་ཀྱང་ལག་རོ་བཀག་རོགས་རེད་ཅེས་གསུངས་པས། མགོན་པོས་དེ་འདྲ་མི་དགོངས་ང་ཡིས་ཆོ་འཕྲུལ་སྟོན་ཆོག་གསུངས་ཏེ་འབྲི་གཡག་བསད་པའི་ཤ་སྦྲུལ་དུ་གྱུར། ཤ་ཟ་མི་རྣམས་དམར་བཤལ་རྒྱབ་པས་དེ་ནས་བཟུང་ཐང་དེ་ལ་དམར་ཐང་ཐང་ཞེས་ཐོགས། ཇུན་དམག་རྣམས་གནས་དེ་ནས་ཐོན་ཞེས་ཟེར། དགོན་དེ་ནི་ཐོག་མར་ཞང་ཚལ་པའི་སློབ་མ་རྟོགས་ལྡན་བདེ་བ་གཞོན་ནུ་ཞེས་པས་ཕྱག་འདེབས་གནང་མཛད། རྒྱལ་བ་དགེ་འདུན་རྒྱ་མཚོའི་དུས་དགེ་ལྡན་ལུགས་སུ་འགྱུར། དགའ་ལྡན་བྱང་རྩེའི་དགོན་ལག་ཡིན། འདུ་ཁང་ཀ་བ་བརྒྱད་ཀྱི་ནང་སྨན་འདམ་གྱི་དུས་གསུམ་སངས་རྒྱས་ཐོག་སོ་གཅིག་ཙམ་དང་། རྗེ་ཙོང་ཁ་པ། སྲུང་མ་ཁང་ནང་མཁས་གྲུབ་བདེ་བ་གཞོན་ནུའི་སྐུ་བརྙན། མཐེང་ཤོག་གསེར་ཡིག་ཅན་གྱི་བླ་མ་ཞང་གི་གསུང་འབུམ་པོད་བཞི། ནང་རྟེན་དུ་ཞང་མི་རུང་གྲགས་ཅེས་པའི་སྐུ་བརྙན་མཁྱིད་གང་ཙམ་བྱས་པ། དགེ་འདུན་སུམ་ཅུ་ལྷག་གིས་བདེ་གསང་འཇིགས་གསུམ་ཕྱག་བཞེད་མཛད་དེ་ལོ་ལྟར་བོད་ཟླ་༡ཚེས་༢༨.༢༩སོ་སོར་གར་འཆམ་བསྐྱོན་སྲོལ་ཡོད། ད་ལྟ་སྔོན་གྱི་འདུ་ཁང་གི་བརྩིག་གདན་སྟེང་གསར་བཞེངས་གནང་བའི་འདུ་ཁང་ནང་འཇིམ་གྱི་དུས་གསུམ་སངས་རྒྱས་ཀྱི་སྐུ་བརྙན་གསར་བཞེངས་གནང་བ་མཇལ་རྒྱུ་ཡོད།