རིགས་དབྱེ།:བསྟན་འགྱུར།

སྟོན་པ་སངས་རྒྱས་ཀྱིས་གསུངས་པའི་ཆོས་ལ་«བཀའ་»ཟེར་ཞིང་། བཀའ་དེ་དག་གི་དགོངས་དོན་འགྲེལ་བཤད་བྱེད་པའི་གཞུང་ལ་«བསྟན་བཅོས་»ཟེར། དེར་བརྟེན་རྒྱ་གར་གྱི་པཎྜི་ཏ་དང་སློབ་དཔོན་རྣམས་ཀྱིས་བརྩམས་པའི་བསྟན་བཅོས་ཁག་སྔོན་གྱི་བོད་ཀྱི་ལོ་ཙཱ་བ་རྣམས་ཀྱིས་བོད་སྐད་དུ་བསྒྱུར་བ་རྣམས་ཕྱོགས་གཅིག་ཏུ་བསྒྲིགས་པའི་གླེགས་བམ་གྱི་ཚོགས་ལ་«བསྟན་འགྱུར»ཞེས་འབོད། བསྟན་འགྱུར་ལ་པར་གཞི་མི་འདྲ་བ་ཁ་ཤས་ཡོད་དེ། ཡོངས་སུ་གྲགས་པ་ནི་«སྡེ་དགེ་བསྟན་འགྱུར»དང་། «སྣར་ཐང་བསྟན་འགྱུར»། «ཅོ་ནེ་བསྟན་འགྱུར»། «པེ་ཅིང་བསྟན་འགྱུར»། «གསེར་བྲིས་མ»སོགས་ཡོད། པར་གཞི་མི་འདྲ་བའི་དབང་གིས་པོ་ཏིའི་གྲངས་འབོར་ལ་ཅུང་ཟད་མི་འདྲ་བ་ཡོད་ཀྱང་། སྤྱིར་བཏང་པོ་ཏི་ ༢༡༣ ནས་ ༢༢༥ བར་ཡོད་ཅིང་། ཆོས་ཚན་སྟོང་ཕྲག་ལྷག་བཞུགས་ཡོད།