རས་ཆུང་བ་རྡོ་རྗེ་གྲགས།

རྗེ་འདི་ཉིད་རབ་བྱུང་དང་པོའི་ཤིང་བྱི(༡༠༨༤）ལོར་ལ་སྟོད་གུང་ཐང་དུ་སྐུ་འཁྲུངས། སྐུ་ཆུང་དུས་ཀློག་ལེགས་པར་མཁྱེན། དགུང་ལོ་བཅུ་གཅིག་ལ་ཕེབས་སྐབས་རྗེ་བཙུན་མི་ལ་བསྟེན་ནས་ཆོས་ཀྱི་རྐང་ཚུགས། དགུང་ལོ་བཅོ་ལྔར་ཕེབས་སྐབས་སྐུ་ལ་མཛེ་ནད་ཕོག་པས་རྗེ་བཙུན་གྱི་དྲུང་དུ་མ་བཞུགས་པར་ཁང་སྟོང་རྣམས་སུ་ཉལ་ཞིང་བཞུགས། དེའི་ཚེ་ཨ་ཙ་ར་གསུམ་བྱུང་ནས་དེ་རྣམས་ཀྱིས་སྙིང་རྗེ་བྱས་ཏེ་རྒྱ་གར་དུ་ཁྲིད་ནས་བླ་མ་བ་ལ་ཙནྡྲ་ལ་གཏུགས། བ་ལ་ཙནྡྲས་གཏུམ་པོ་ཁྱུང་ཤམ་ཅན་གནང་ནས་བཟླས་པ་བྱས་པས། རིང་པོར་མ་ལོན་པར་མཛེ་ནད་ལྷག་མ་མེད་པར་སོས། དེ་ནས་བལ་པོར་ཕེབས་ནས་ཨ་ཏུ་ལ་ད་ཤ་ལ་སོགས་པ་ནས་བདེ་མཆོག་ལ་སོགས་པའི་རྒྱུད་འགའ་རེ་ཡང་གསན། སླར་རྗེ་བཙུན་གྱི་དྲུང་དུ་འཁོར་བ་ན། རྗེ་བཙུན་གྱིས་རས་ཆུང་པ་རྒྱ་གར་དུ་ཆོས་སྐོར་ལེན་པར་མངགས། རས་ཆུང་པས་བླ་མའི་གསུང་ལ་མཉན་ཏེ་སླར་རྒྱ་གར་དུ་བྱོན་ནས་ནཱ་རོ་པ་དང་མེེ་ཏྲི་གཉིས་ཀྱི་དངོས་སློབ་ཏི་ཕུ་བ་ལ་ལུས་མེད་མཁའ་འགྲོའི་ཆོས་སྐོར་ཆ་ཚང་བ་ཞུས། གཞན་ཡང་གདམས་པ་མང་དུ་བཙལ་ནས་བླ་མའི་དྲུང་དུ་བྱོན། ཆོས་སྐོར་དགུ་པོ་ཆ་ཚང་བ་མི་ལར་ཕུལ། མི་ལས་ངམ་རྫོང་སྟོན་པ་ལ་གནང་། ངམ་རྫོང་བས་དེ་ལ་ཡིག་སྣ་ཡང་བརྩམས་ཤིང། དེ་ནས་མཆེད་པ་ལ་བདེ་མཆོག་སྙན་བརྒྱུད་ཟེར་ཞིང་། རས་ཆུང་པ་ཉིད་ནས་གཞན་ལ་མཆོད་པ་ལ་རས་ཆུང་སྙན་བརྒྱུད་དུ་གྲགས། དེ་ལྟར་རས་ཆུང་པས་རྗེ་བཙུན་མི་ལ་བསྟེན་ནས་རྟོགས་པ་ཁྱད་པར་ཅན་བརྙེས། དེ་ནས་རྗེ་བཙུན་ལ་ཞུས་ནས་དབུས་སུ་བྱོན། གཉལ་དང་ལོ་རོ་གཉིས་སུ་བཞུགས་ནས་སྒོམ་སྒྲུབ་བྱས་ཏེ་ཉམས་མགུར་མང་པོ་དང་མི་ལ་རས་པའི་རྣམ་ཐར་ཡང་གསུངས། ཞལ་སློབ་མང་དུ་བསྐྲུན། མཐར་དགུང་ལོ་བདུན་ཅུ་རྩ་བརྒྱད་པ་རབ་བྱུང་གསུམ་པའི་ལྕགས་སྦྲུལ(༡༡༦༡）ལོར་སྐུ་གཤེགས་སོ། །འདི་ཉིད་ལ་སློབ་མ་མང་དུ་ཡོད་པ་ལས། ཐུགས་ཀྱི་སྲས་བཅུ་གསུམ་ནི། ལོ་བྱི་མགོ་བ། གཙང་པ་སུམ་པ། བྱར་བོ་པར་ཤེར་སྣང། ལོ་རོ་གླན་བྱི་མགོ་བ་བླ་མ་སྒོམ་ཆོས། ལོ་རོ་མི་སྣ་བ་སུམ་སྟོན་ཆོས་དར། བུར་སྒོམ་ནག་པོ། ལ་སྟོད་པ་ཟངས་རི་རས་པ། གཡེ་ཆེན་མོ་བ་འབྲི་སྒོམ་དོན་གྲུབ། གྲ་ཕྱི་བ་གཉལ་རྡོ་རྗེ་འོད། གཉལ་སྨད་པ་ཅུང་སྟོན་རྒྱན་ནི། གཉལ་སྨད་པ་ཅུང་སྟོན་རྒྱས་པ། གཡེ་ཆུང་བ་དགེ་བཤེས་ཁྱུང་པོ་བཅས་བཅུ་གཉིས་ཀྱིས་དབང་ཡང་རྫོགས་ལ། ཡེ་ཤེས་ཀྱང་ངོས་ཟིན། ཡར་ལུང་པ་ལྷ་རྗེ་ལྷ་འབར་གྱིས་ནི་དབང་རྫོགས་ཀྱང་ཡེ་ཤེས་ངོས་མ་ཟིན་ཟེར།༼དུང་དཀར་ཚིག་མཛོད་ཆེན་མོ་༽ལས་བཏུས།