རལ་ཁ་
རལ་ཁ་ཞེས་པ་ནི་གཡུལ་ངོར་རལ་གྲིའི་གཅོད་རེས་སྤྲད་པ་ལ་གོ། སྤྱོད་འཇུག་གི་འགྲེལ་པ་ཁག་ཏུ་བག་ཡོད་ལྷུར་བླང་བའི་དཔེ་དོན་དུ་འཐབ་མོ་བྱེད་མཁན་གྱིས་དགྲ་བོ་དང་གཡུལ་སྤྲད་པའི་ཚེ་རལ་གྲིའི་གཅོད་རེས་སྤྲད་པ་དེ་རལ་ཁ་ལྷགས་པ་ཞེས་བརྗོད་པ་ཡིན།
སྒྲ་བཤད།
[རྩོམ་སྒྲིག]རལ་ཁ་ནི་རལ་གྲི་དང་ཁ་གཉིས་ཀྱི་འདུས་ཚིག་ཡིན། ཁ་ཞེས་པ་ནི་ཁར་རེས་སྤྲད་པའམ་གཏུབ་པ་ལ་གོ །རལ་ཁ་ལྷགས་པ་ཞེས་པ་ནི་རལ་གྲིའི་གཅོད་རེས་ཚུར་ཕར་སྤྲད་པའམ་གཏུབ་པ་ལ་གོ་དགོས།
ནང་དོན།
[རྩོམ་སྒྲིག]གཡུལ་ངོར་རལ་གྲིའི་གཅོད་རེས་སྤྲད་པ། "འཐབ་མོ་བ་རྙིང་པ་མཚོན་ཆའི་ལས་དང་དགྲ་ཐབས་ལ་མཁས་པའི་སྐྱེ་བོ་དགྲ་དང་ལྷན་ཅིག་ཏུ་གཡུལ་ངོར་རལ་ཁ་ལྷགས་པའི་ཚེ་ན་རང་མཚོན་ལས་བཟུར་ཞིང༌། དགྲ་ལ་མཚོན་འདེབས་པ་"[༡]ཞེས་གསུངས་པ་ལྟར། འཐབ་མོ་བྱེད་མཁན་གྱིས་དགྲ་བོ་དང་གཡུལ་ངོར་རལ་གྲི་དང་རལ་གྲིའི་ཁར་རེས་སྤྲད་པའི་ལས་ལ་ཟེར།
གོམས་པ་དང་མཁས་པ་ལ་བརྟེན་པ། "དཔེར་ན་འཐབ་མོ་བྱེད་པའི་ལས་དེ་ལ་སྔ་ནས་གོམས་ཤིང་འདྲིས་པས་རྙིང་པར་གྱུར་པ་མཚོན་ཆའི་ལས་དང་དགྲ་ཐབས་ལ་མཁས་པའི་སྐྱེ་བོ་དག་ཕ་རོལ་གྱི་དགྲ་དང་ལྷན་ཅིག་ཏུ་གཡུལ་ངོར་རལ་ཁ་ལྷགས་པའམ་རལ་ཁ་འགྱེད་པ་"[༢]ཞེས་གསུངས་པ་ལྟར། འཐབ་མོ་བྱེད་པའི་ལས་ལ་རྙིང་པར་གོམས་ཤིང་མཁས་པ་རྣམས་ཀྱིས་གཡུལ་ངོར་རལ་ཁ་ལྷགས་པ་སམ་རལ་ཁ་འགྱེད་པ་ཞེས་བྱེད།
རལ་གྲི་ཤོར་ནས་མྱུར་དུ་ལེན་པ། "གཡུལ་དུ་ལག་ནས་རལ་གྲི་ལྷུང་བར་གྱུར་ན་གཞན་གྱིས་བསད་དོགས་པའི་འཇིགས་པས་མྱུར་དུ་ལེན་པ་"[༣]ཞེས་གསུངས་པ་ལྟར། གཡུལ་ངོར་རལ་ཁ་ལྷགས་པའི་ཚེ་རལ་གྲི་ཤོར་ནས་ལྷུང་བ་ན་དགྲས་བསད་ཀྱིས་དོགས་པའི་འཇིགས་པས་མྱུར་དུ་བླང་དགོས།
རང་སྲུང་དང་གཞན་འཇོམས་པ། "དགྲ་དང་ལྷན་ཅིག་ཏུ་གཡུལ་ངོར་རལ་ཁ་ལྷགས་པ་ན་རང་ལ་མཚོན་གྱིས་མི་འཕོག་པ་དང་ཕར་འཇོམས་པར་བྱེད་པ་"[༤]ཞེས་གསུངས་པ་ལྟར། གཡུལ་ངོར་རལ་ཁ་ལྷགས་པ་ན་རང་ལ་མཚོན་ཆས་མི་ཕོག་པར་བཟུར་ཞིང་ཕར་དགྲ་བོ་ལ་འཇོམས་པར་བྱེད་དགོས།
དཔེ་དོན།
[རྩོམ་སྒྲིག]སྤྱོད་འཇུག་གི་འགྲེལ་པ་ཁག་ཏུ་བརྩོན་འགྲུས་དང་བག་ཡོད་ལྷུར་བླང་བའི་དཔེ་དོན་དུ་རལ་ཁ་ཞེས་པའི་ཚིག་འདི་སྤྱོད་པ་ཡིན། "དཔེར་ན་འཐབ་མོ་རྙིང་པ་དེ་ལ་ཤིན་ཏུ་གོམས་པ་དག་དགྲ་དང་ལྷན་ཅིག་ཏུ་གཡུལ་ངོར་རལ་ཁ་ལྷགས་པ་ན་རང་ལ་མཚོན་གྱིས་མི་འཕོག་པ་དང་ཕར་འཇོམས་པར་བྱེད་པ་ལྟར། ཉོན་མོངས་མཚོན་ལས་གཟུར་བར་བྱ་ཞིང་ཉོན་མོངས་རྣམས་ནི་འཇེབས་པར་བཏགས་ཏེ་དེས་སླར་གནོད་མི་ནུས་པར་བྱའོ། །"[༥]ཞེས་གསུངས་པ་ལྟར། ཉོན་མོངས་པའི་གཉེན་པོར་བག་ཡོད་དེ་བསྟེན་དགོས་པའི་ཚུལ་སྟོན། གཞན་ཡང་"ཉོན་མོངས་པའི་དགྲ་ལས་རྣམ་པར་རྒྱལ་བའི་དབང་དུ་བྱས་ཏེ་རལ་གྲི་བཞིན་དུ་བརྗེད་ངས་པ་མེད་པར་དྲན་པ་མ་ཉམས་པར་བཟུང་བར་བྱས་ཤིང་མངོན་དུ་བྱའོ། །"[༦]ཞེས་གསུངས་པ་ལྟར་བརྩོན་འགྲུས་དང་བག་ཡོད། དྲན་ཤེས་ཀྱི་བྱ་བ་སྒྲུབ་པ་ལྷུར་བླང་ནས་ཉོན་མོངས་པའི་མཚོན་ཆ་སོགས་འཇོམས་པར་བྱེད་པའི་དཔེ་རུ་བཀོད།
བསྡུས་དོན།
[རྩོམ་སྒྲིག]རལ་ཁ་ཞེས་པ་ནི་གཡུལ་ངོར་རལ་གྲིའི་གཅོད་རེས་སྤྲད་པ་ལ་གོ་ཞིང་། སྤྱིར་འཐབ་མོ་བྱེད་མཁན་གྱིས་དགྲ་བོ་དང་གཡུལ་ངོར་རལ་གྲི་བརྡེག་རེས་བྱེད་པ་ལ་ཟེར། སྤྱོད་འཇུག་གི་འགྲེལ་པ་ཁག་ཏུ་ནི་བག་ཡོད་ལྷུར་བླང་བ་དང་ཉོན་མོངས་པ་སེལ་བའི་དཔེ་དོན་དུ་སྤྱོད་པ་ཡིན།
ལུང་ཁུངས།
[རྩོམ་སྒྲིག]- ↑ རྒྱལ་ཚབ་དར་མ་རིན་ཆེན། སྤྱོད་འཇུག་གི་རྣམ་བཤད་རྒྱལ་སྲས་འཇུག་ངོགས། ཤིང་དཔར། ཤོག་ངོས། ༡༧༩
- ↑ ཐུབ་བསྟན་ཆོས་གྲགས། སྤྱོད་འཇུག་གི་འགྲེལ་བཤད་རྒྱལ་སྲས་ཡོན་ཏན་བུམ་བཟང་། ཤིང་དཔར། ཤོག་ངོས། ༧༢༤
- ↑ རྒྱལ་ཚབ་དར་མ་རིན་ཆེན། སྤྱོད་འཇུག་གི་རྣམ་བཤད་རྒྱལ་སྲས་འཇུག་ངོགས། ཤིང་དཔར། ཤོག་ངོས། ༡༨༠
- ↑ རྒྱལ་སྲས་ཐོགས་མེད་བཟང་པོ། སྤྱོད་འཇུག་གི་འགྲེལ་པ་ལེགས་བཤད་རྒྱ་མཚོ། ཤིང་དཔར། ཤོག་ངོས། ༡༣༤
- ↑ རྒྱལ་སྲས་ཐོགས་མེད་བཟང་པོ། སྤྱོད་འཇུག་གི་འགྲེལ་པ་ལེགས་བཤད་རྒྱ་མཚོ། ཤིང་དཔར། ཤོག་ངོས། ༡༣༤
- ↑ ཤེས་རབ་འབྱུང་གནས་བློ་གྲོས། སྤྱོད་འཇུག་གི་དཀའ་འགྲེལ། ཤིང་དཔར། ཤོག་ངོས། ༢༡༦