རབ་ཏུ་དགྲོལ་

རབ་ཏུ་དགྲོལ་ཞེས་པ་ནི་སངས་རྒྱས་ཀྱི་ཆོས་ཀྱི་འཁོར་ལོ་ལས་གསུངས་པའི་གདུལ་བྱ་སེམས་ཅན་རྣམས་ཀྱི་ཕན་བདེ་དང་འབྲེལ་བའི་གལ་ཆེ་བའི་ཐ་སྙད་ཅིག་ཡིན། དེ་ཡང་སེམས་ཅན་རྣམས་ལས་དང་ཉོན་མོངས་པའི་ཀུན་འབྱུང་གི་འཆིང་བ་དང་སྡུག་བསྔལ་གྱི་རང་བཞིན་ཅན་གྱི་འཁོར་བའི་བཙོན་ར་ལས་ཡོངས་སུ་ཐར་ནས་རྫོགས་པའི་བྱང་ཆུབ་ཀྱི་གོ་འཕང་ལ་འགོད་པའི་དོན་དུ་ཡིན།

ནང་དོན།

འཇུག་སེམས་ཀྱི་ཁྱད་པར་དུ་འགྲེལ་པ་"སེམས་ཅན་གྱི་ཁམས་མཐའ་ཡས་པ་རྣམས་ལས་དང་ཉོན་མོངས་པའི་ཀུན་འབྱུང་གི་འཆིང་བ་དང་སྡུག་བསྔལ་གྱི་རང་བཞིན་ཅན་གྱི་འཁོར་བའི་བཙོན་ར་ལས་རབ་ཏུ་སྒྲོལ་ཞིང་རྫོགས་པའི་བྱང་ཆུབ་ལ་འགོད་པར་བྱ་བའི་ཕྱིར་"ཞེས་གསུངས། "སེམས་ཅན་གྱི་ཁམས་མཐའ་ཡས་ཤིང་མུ་མེད་པ་སྲིད་ཞིའི་སྡུག་བསྔལ་ལས་རབ་ཏུ་དགྲོལ་བའམ་བསྒྲལ་ཏེ་སངས་རྒྱས་ཐོབ་པའི་ཕྱིར་"ཞེས་གསུངས། ཐ་སྙད་ཀྱི་ཁྱད་པར་གསལ་བཤད་"རབ་ཏུ་གྲོལ་བའི་ཕྱིར་ནི་རབ་ཏུ་དགྲོལ་བར་བྱ་བའི་དོན་དུ་སྟེ། སྡུག་བསྔལ་ཐམས་ཅད་ཉེ་བར་ཞི་བར་བྱ་བའི་རྒྱུ་མཚན་དུའོ། །"ཞེས་སྡུག་བསྔལ་ཞི་བར་བྱ་བའི་གཙོ་གནད་ཀྱིས་འགྲེལ་བ་གནང་ཡོད། སེམས་ཅན་གྱི་ཁམས་མཐའ་ཡས་པ་"གང་ལ་མཐའ་སྟེ་འདི་ཙམ་ཞེས་བྱར་མེད་པ་དེ་ནི་མཐའ་ཡས་པ་སྟེ། དེ་ནི་ནམ་མཁའི་ཁམས་ཀྱིས་ཁྱབ་པའི་སེམས་ཅན་གྱི་ཁམས་སོ། །"ཞེས་གསུངས།

སྒྲ་བཤད།

རབ་ཏུ་ཞེས་པ་ནི་ཡོངས་སུ་རྫོགས་པའམ་ཚང་བའི་དོན་ཏེ། དགྲོལ་ཞེས་པ་ནི་ཐར་པའམ་གྲོལ་བའི་དོན་ཡིན། དེས་ན་རབ་ཏུ་དགྲོལ། ཞེས་པ་ནི་ཡོངས་སུ་རྫོགས་པའི་ཐར་པའམ་ཚང་བའི་གྲོལ་བ་ཞེས་པའི་དོན་ཡིན།

ངེས་ཚིག

"དུས་གང་ནས་བཟུང་སྟེ་སེམས་ཅན་གྱི་ཁམས་མཐའ་ཡས་པ་རྣམས་ལས་དང་ཉོན་མོངས་པའི་ཀུན་འབྱུང་གི་འཆིང་བ་དང་སྡུག་བསྔལ་གྱི་རང་བཞིན་ཅན་གྱི་འཁོར་བའི་བཙོན་ར་ལས་རབ་ཏུ་སྒྲོལ་ཞིང་རྫོགས་པའི་བྱང་ཆུབ་ལ་འགོད་པར་བྱ་བའི་ཕྱིར་དུ་སྲིད་པ་ཇི་སྲིད་བར་དུ་གཞན་དོན་ལས་ནམ་ཡང་ཕྱིར་མི་ལྡོག་པ་ཡི་སེམས་ཀྱིས་སུ་འཇུག་པ་སེམས་བསྐྱེད་དེ་ཡང་དག་པར་རང་རྒྱུད་ལོ་བླངས་པར་གྱུར་པ་ན་"ཞེས་གསུངས། "མི་ལྡོག་པ་ཡི་སེམས་ཀྱིས་ཏེ། འཇུག་པ་ཉམས་པ་མེད་པའི་སེམས་ཀྱིས་སོ། །"ཞེས་གསུངས།