རབ་ཏུ་གནས་པའི་ཆོ་ག་ཚོགས་ཡིག་ཆེན་པོ་

༄༅། །རབ་ཏུ་གནས་པའི་ཆོ་ག་ཚོགས་ཡིག་ཆེན་པོ་ཞེས་བྱ་བ་བཞུགས།

༄༅། །གང་ཞིག་བདེ་བར་གཤེགས་རྣམས་ཀྱི། །ཕྱག་རྒྱ་གང་གིས་འཇིག་རྟེན་དུ། །སྐྱེ་བོ་བྱིན་གྱིས་བརླབས་པའི་ཕྱིར། །ཆོ་གའི་རྣམ་དབྱེ་བཤད་པ་ལས། །ཕྱག་རྒྱས་ཕྱག་རྒྱ་བྱིན་བརླབས་ཏེ། །ཡུན་དུ་དགེ་ཤིས་བརྟན་འདོད་པས། །སྔགས་དང་ཕྱག་རྒྱ་ཇི་སྙེད་པས། །གང་ཞིག་བརླབས་ཀྱང་སྐྱོན་མེད་དེ། །ཇི་སྙེད་ལྷ་སྔགས་ཕྱག་རྒྱ་ཀུན། །ཆོས་ཉིད་རྣམ་གྲོལ་མཚོན་པར་གཅིག །གཞན་ཡང་ཕྱག་རྒྱ་གཅིག་པུ་ཡང་། །རྣམ་གྲོལ་མཐའ་ཡས་མཚོན་སྒོར་གྱུར། །ལས་དང་དངོས་གྲུབ་ཐམས་ཅད་པ། །དེ་ཕྱིར་ཉེས་སྐྱོན་ཡོད་མིན་ཡང་། །གང་ཞིག་ཉེ་བར་བསྟན་པ་རྣམས། །ཅུང་ཟད་འདི་རུ་བརྗོད་པར་བྱ། །སྐུ་གཟུགས་དང་མཆོད་རྟེན་དང་གླེགས་བམ་རྣམས་ཞལ་བསྲོ། མངའ་དབུལ། བྱིན་གྱིས་བརླབ། རབ་གནས་བྱ་བ་ལ་སོགས་པའི་ཐ་སྙད་ཀྱིས་བསྟན་པ། མདོར་ན་དགེ་ཤིས་སམ་བཀྲ་ཤིས་སྒྲུབ་པར་གྲགས་པའི་ཆོ་ག་འདི་ལ། པྲ་ཏིཥྛ་བི་ངྷི་ཞེས་བྱ་བའི་སྒྲ། པྲ་ནི་དོན་ལྷག་པར་སྟོན་པའི་ཚིག་གི་ཕྲད་དུ་ཟད། ཏིཥྠ་ནི་བརྟན་པའམ་ཡུན་རིང་དུ་གནས་པ་ལ་བྱ། བི་ངྷི་ནི་ཆོ་ག་སྟེ་རབ་གནས་ཀྱི་ཆོ་ག་ཞེས་བཏགས། རྣམ་པ་གཅིག་ཏུ་པྲ་རིང་དུ་དྲངས་པའི་སྒྲའི་ཁོང་ན་ཨའི་སྒྲ་ཡོད་དེ། དེ་ལྟར་ན་ཨ་ངྷི་ཥྛན་ཞེས་བྱ་བ་བྱིན་གྱིས་བརློབས་པ། ཨ་ངྷི་ཥྛཏེ་ཞེས་བྱ་བ་བྱིན་གྱིས་བརླབས་པ་སྟེ། མདོར་ན་བརྟན་ཞིང་བྱིན་ཆེ་ལ་དགེ་ཞིང་བཀྲ་ཤིས་པར་བྱ་བའི་ཆོ་ག་སྟེ། བྱིན་གྱིས་བརླབས་པ་ཞེ་འམ། ཞལ་དྲོ་བར་བྱ་ཞེ་འམ། བཀྲ་ཤིས་བསྒྲུབ་པའི་སྔགས་ལ། ན་མཿ སརྦ་ཏ་ཐཱ་གཏེ་བྷྱཿསརྦ་བྷ་ཡ་བི་ག་ཏེ་བྷྱོ། བི་ཤྭ་མུ་ཁེ་བྷྱཿ སརྦ་ཐཱ་ཧཾ་ཁཾ། རཀྵ་མ་ཧཱ་བ་ལ། སརྦ་ཏ་ཐཱ་ག་ཏ་པུ་ཎྱ་ནི་རྫ་ཏེ་ཧཱུཾ་ཧཱུཾ་ཏྲཊ་ཏྲཊ་ཨ་པྲ་ཏི་ཧ་ཏེ་སྭཱ་ཧཱ། །འདིས་ཐམས་ཅད་དུ་བསྲུང་བར་བསམ་མོ། །དེ་ནས་དམ་ཚིག་ལས་མི་འདའ་བར་བྱ་བ་ནི། ལག་པ་གཉིས་ཐལ་མོ་ཁོང་སྟོང་དུ་སྦྱར་ལ། །མཐེ་བོང་གཉིས་བསྒྲེང་ངོ་། །རྒྱ་འདི་ཕྱག་རྒྱ་ཆེན་པོ་སྟེ། །སངས་རྒྱས་སྐྱོབ་པ་ཀུན་གྱི་ཡིན། །སངས་རྒྱས་ཀུན་གྱི་དམ་ཚིག་ནི། །ཕྱག་རྒྱ་འདི་ལ་རབ་ཏུ་གནས། །སྔགས་ལ། ན་མཿས་མནྟ་བུདྡྷ་ནཱཾ། ཨ་ས་མེ། ཏྲི་ས་མེ། མ་ཧཱ་ས་མ་ཡེ་སྭཱ་ཧཱ། འདིས་སངས་རྒྱས་ཐམས་ཅད་ཀྱིས་སྟོན་པར་བྱེད་པའི་སྐུ་གསུང་ཐུགས་ཀྱི་ཆོས་ལས་མི་འདའ་བ། ས་དང་ཕ་རོལ་ཏུ་ཕྱིན་པ་ཐམས་ཅད་རྫོགས་པར་བྱེད་ནུས་པའི་མཐུ་དང་ལྡན་པར་སྐུ་དེ་ཉིད་གྱུར་པར་བསམ་མོ། །དེ་ནས་ལག་པ་གཉིས་ཁུ་ཚུར་བཅངས་ཏེ་མཐེ་བོ་གཉིས་ནང་དུ་གཞུག །མཛུབ་མོ་གཉིས་བསྒྲེང་ངོ་། །རྒྱ་འདི་ཕྱག་རྒྱ་ཆེན་པོ་སྟེ། ཆོས་དབྱིངས་རྣམ་པར་སྦྱོང་བའོ། །སྔགས་ལ། ན་མཿས་མནྟ་བུདྡྷ་ནཱཾ། ངྷརྨཱ་དྷཱ་ཏུ་སྭ་བྷཱ་ཝ་ཨཏྨཱ་ཀོ་྅་ཧཾ། འདིས་དེ་ཉིད་ཆོས་ཀྱི་དབྱིངས་ཀྱི་རང་བཞིན་དུ་བསམ་མོ། །དེ་ནས་སྐུ་གཟུགས་སམ་རི་མོའི་རྒྱུ་དེ་ཉིད་ལྷ་གང་གི་སྐུ་ཡིན་པ་དེའི་ཕྱག་རྒྱ་དང་སྙིང་པོ་བརྗོད་དེ། སྐུ་ཡོངས་སུ་རྫོགས་པར་བསྐྱེད་དོ། །ཡང་ན་ལྷ་ཐམས་ཅད་ལ་ཐུན་མོང་དུ་འཁོར་ལོ་སྒྱུར་བའི་ཕྱག་རྒྱ་དང་རང་རང་གི་སྔགས་ཀྱིས་བསྐྱེད་པར་བྱ་སྟེ། དེ་ལ་ཕྱག་རྒྱ་ནི། ལག་པ་བསྣོལ་ཏེ་སོར་མོ་རྣམས་རྒྱབ་སྦྱར་ནས་མཐེ་བོང་གཉིས་སྤྲད་དོ། །ཕྱག་རྒྱ་དཔལ་དང་ལྡན་པ་འདི། །ཆོས་ཀྱི་འཁོར་ལོ་ཞེས་སུ་བསྒྲགས། །འཇིག་རྟེན་མགོན་པོ་སྐྱོབས་རྣམས་ཀྱི། །འཁོར་ལོ་རབ་ཏུ་འདིས་བསྐོར་རོ། །སྔགས་ནི་ལྷ་རང་རང་གི་སྙིང་པོ་བརྗོད་པར་བྱ་སྟེ། རེ་ཤིག་མཚོན་པ་ཙམ་སྦྱར་ན། ན་མཿས་མནྟ་བུདྡྷཱ་ནཱཾ། ཨོཾ་ཨཱཿརྣམ་པར་སྣང་མཛད་ཀྱིའོ། ན་མཿས་མནྟ་བུདྡྷཱ་ནཱཾ། ཨོཾ་བྷ་ཤཱཀྱ་ཐུབ་པའི་འོ། །ནམཿསནྟ་བུདྡྷཱ་ནཱཾ། ཨོཾ་པ། སྤྱན་རས་གཟིགས་དབང་ཕྱུག་གིའོ། །ན་མཿས་མནྟ་བུདྡྷཱ་ནཱཾ། ཨོཾ་བ། ཕྱག་ན་རྡོ་རྗེའི་འོ། །ན་མཿས་མནྟ་བུདྡྷཱ་ནཱཾ། ཨོཾ་མཾ། འཇམ་དཔལ་ཀྱིའོ། །ན་མཿས་མནྟ་བུདྡྷཱ་ནཱཾ། ཨོཾ་ངྷི། ཤེས་རབ་ཀྱི་ཕ་རོལ་ཏུ་ཕྱིན་མའི་འོ། །ན་མཿསམནྟ་བུདྡྷཱ་ནཱཾ། ཨོཾ་གཾ།སངས་རྒྱས་སྤྱན་གྱི་འོ། །ན་མཿས་མནྟ་བུདྡྷཱ་ནཱཾ། ཨོཾ་བཾ། གོས་དཀར་ཅན་གྱིའོ། །ན་མཿས་མནྟ་བུདྡྷཱ་ནཱཾ། ཨོཾ་མཾ། མཱ་མ་ཀཱིའི་འོ། །འདི་དག་མཚོན་པ་ཙམ་དུ་ཟད་དེ། ལྷ་སོ་སོའི་སྙིང་པོས་སྦྱར་བར་བྱའོ། །འདིས་སྐུ་གསུང་ཐུགས་ཡོངས་སུ་རྫོགས་པའི་ལྷར་གྱུར་པར་བསམ་མོ། །དེ་ནས་རྡོ་རྗེ་རྩེ་ལྔ་པའི་ཕྱག་རྒྱ་བཅིངས་ཏེ་ཐུགས་ཀར་གཏད་ལ། །སངས་རྒྱས་ཀུན་གྱི་རྡོ་རྗེའི་རྒྱ། །མི་ཤེས་གྲོང་ཁྱེར་འཇོམས་པར་བྱེད། །སངས་རྒྱས་རྣམས་ཀྱི་ཡེ་ཤེས་ནི། །ཉིད་ཀྱིས་བྱིན་གྱིས་བརླབས་ཏེ་བསྟན། སྔགས་ལ། ན་མཿས་མནྟ་བུདྡྷཱ་བཛྲ་ནན་ཧཱུཾ། །དེ་ནས་གསུང་དང་ལྡན་པར་བྱིན་གྱིས་བརླབ་པ། ལག་པ་གཉིས་ཁོང་སྟོང་དུ་སྦྱར་ཏེ། མཛུབ་མོ་གཉིས་ཀྱི་མཐེ་བོ་གཉིས་སོ་སོར་དཀྲིས་ལ། དུང་ལྟ་བུར་བྱས་ཏེ་ཞལ་དུ་གཏད་ལ། །ཕྱག་རྒྱ་དཔལ་ལྡན་དམ་པ་འདི། །ཆོས་ཀྱི་དུང་ཞེས་རྣམ་པར་བསྒྲགས། །འདི་ནི་འཇིག་རྟེན་འདི་དག་ན། །སངས་རྒྱས་བྱང་ཆུབ་སེམས་དཔའ་རྣམས། །ཞི་བ་མྱ་ངན་འདས་འགྲོ་བ། རྡུལ་དང་བྲལ་བའི་ཆོས་འཆད་དོ། །སྔགས་ལ། ན་མཿས་མནྟ་བུདྷཱ་ནཾ། སརྦ་ཐཱ་ཨཾ། དེ་ནས་འོད་ཀྱི་དཀྱིལ་འཁོར་བྱིན་གྱིས་བརླབ་པ་ནི། བསྲུང་བ་ཆེན་མོའི་ཕྱག་རྒྱ་ལས་མཛུབ་མོ་གཉིས་བརྐྱང་ལ་མཐེ་བོ་གཉིས་ནང་དུ་གཞུག་གོ། །འདི་ནི་སངས་རྒྱས་ཐམས་ཅད་ཀྱི། །འོད་ཟེར་འབར་བའི་འཕྲེང་བ་སྟེ། །འདི་ནི་བཅིངས་པ་ཙམ་གྱིས་ཀྱང་། །མ་རིག་མུན་པ་སེལ་བར་བྱེད། སྔགས་ལ། ན་མཿས་མནྟ་བུདྷཱ་ནཱཾ། ཛྭ་ལ་མཱ་ལི་ན་ཏ་ཐཱ་ག་ཏ་ཨརྩི་སྭཱ་ཧཱ། གདན་བྱིན་གྱིས་བརླབ་པ་ནི། ལག་པ་གཉིས་ཐལ་མོ་སྦྱར་བ་ལས་བརྐྱང་སྟེ་པདྨ་ལྟར་བྱས་ལ། མཐེ་བོ་གཉིས་དང་མཐེའུ་ཆུང་གཅིག་ཏུ་སྤྲད་དེ། མཛུབ་མོ་གཉིས་དང་གུང་མོ་སྤྲད་དོ། །པདྨ་དམ་པ་དཔལ་ལྡན་འདི། །སངས་རྒྱས་སྐྱོབས་པ་ཐམས་ཅད་ཀྱི། །མི་ཤིག་རྡོ་རྗེའི་གདན་ཡིན་ཏེ། །དེར་ནི་འདྲེན་པ་འཚང་རྒྱ་ཞིང་། །རྒྱལ་བ་སྲས་རྣམས་ཐམས་ཅད་ནི། །འདི་ལས་སྐྱེས་དང་བྱང་ཆུབ་འགྱུར། སྔགས་ལ། ན་མཿས་མནྟ་བུདྡྷཱ་ནཱཾ། ཨ། དེ་ལྟར་བྱིན་གྱིས་བརླབས་ཏེ་བཀྲ་ཤིས་དང་མཆོད་པའི་ཆོ་ག་རྣམས་བྱའོ། །མདོར་བསྡུས་པ་ནི་འདིས་ཀྱང་ཡོངས་སུ་རྫོགས་པར་འགྱུར་རོ། །ཅུང་ཟད་དེ་བས་རྒྱས་པར་བྱེད་པར་འདོད་ན། དེ་རྣམས་བྱས་པའི་སྟེང་དུ་ཡང་། བྱིན་གྱིས་བརླབ་པའི་ཆོ་ག་འདི་བསྣན་པར་བྱ་སྟེ། དབུ་གཙུག་ཏོར་དང་ལྡན་པ་དང་། ཞལ་མཛོད་སྤུ་དང་། དེ་བཞིན་དུ་སྤྱན་དང་། ལྗགས་དང་། གོ་ཆ་རྣམས་ཀྱིས་མནན་པར་བྱའོ། །དེ་ལ་དབུ་གཙུག་ཏོར་བྱིན་གྱིས་བརླབ་པ་ནི། ལག་པ་གཉིས་ཁུ་ཚུར་བཅིངས་ལ། གུང་མོ་གཤིབས་ཏེ་བསྒྲེང་། མཛུབ་མོ་གཉིས་ངོས་ནས་བཀུག་སྟེ་སྦྱར་རོ། །ཕྱག་རྒྱ་དེ་སྐུའི་དབུ་སྟེང་དུ་གཏུགས་ཏེ། གཙུག་ཏོར་ཕྱག་རྒྱ་རྒྱ་ཆེན་ཏེ། །གཙུག་ཏོར་ཞེས་ནི་བསྒྲགས་པ་ཡིན། །འདི་ནི་བཅིངས་པ་ཙམ་གྱིས་ཀྱང་། རྒྱལ་བའི་མཆོག་ཏུ་གྱུར་པ་ཡིན། །སྔགས་ལ། ན་མཿས་མནྟ་བུདྡྷཱ་ནཱཾ། ཧཱུཾ་ཧཱུཾ། འདིས་དབུ་གཙུག་ཏོར་རིན་པོ་ཆེ་མཐོན་འཐིང་ཆེན་པོའི་ཁ་དོག་དང་དབྱིབས་འདྲ་བ། རབ་ཏུ་འབར་བ་འོད་ཟེར་ཁ་དོག་བརྒྱ་ཕྲག་དུ་མ་འཕྲོ་བ། རྩེ་མོ་བལྟར་མི་མངོན་པ། སངས་རྒྱས་ཐམས་ཅད་ཀྱིས་རྣམ་པར་དག་པའི་ཆོས་གཟིགས་པའི་མཐུ་ལས་སྐྱེས་པ། འདི་ལྟ་བུ་དང་ལྡན་པར་བསམ་མོ། །དེ་ནས་ཞལ་མཛོད་སྤུ་དང་ལྡན་པར་བྱིན་གྱིས་བརླབ་པ་ནི། ལག་པ་གཡས་པ་ཁུ་ཚུར་བཅངས་ལ། སྐུ་གཟུགས་ཀྱི་སྨིན་མཚམས་སུ་བཞག་སྟེ། རྒྱལ་བ་དམ་པས་ཕྱག་རྒྱ་འདི། །མཛོད་སྤུ་ཞེས་ནི་རབ་ཏུ་བསྒྲགས། །འདི་ནི་བཅིངས་པ་ཙམ་གྱིས་སུ། །རྒྱལ་བའི་མཆོག་ཏུ་གྱུར་པ་ཡིན། །སྔགས་ལ། ན་མཿས་མནྟ་བུདྡྷཱ་ནཱཾ། ཨ་ཧཾ་ཛ། འདིས་ཞལ་མཛོད་སྤུ་གཡས་སུ་འཁྱིལ་བ་ཤེལ་ལྟར་དག་པ། ནོར་བུ་རིན་པོ་ཆེ་ལྟ་བུའི་འོད་དང་ལྡན་པར་བསམ་མོ། །དེ་ནས་སྤྱན་བྱིན་གྱིས་བརླབ་པ། ལག་པ་གཡས་པ་ཁུ་ཚུར་བཅངས་ལ་གུང་མོ་དང་སྲིན་ལག་གཉིས་བརྐྱང་སྟེ། མཐེ་བོང་དྲུང་དུ་བཞག་གོ། །དེ་སྐུ་གཟུགས་ཀྱི་སྤྱན་གཉིས་ལ་གཏུགས་ལ། །འདི་ནི་སངས་རྒྱས་མགོན་རྣམས་ཀྱི། །ཐུགས་རྗེ་ལས་བྱུང་སྤྱན་ཡིན་ཏེ། །མིག་གི་སྟེང་དུ་མཁས་པས་བཞག །དེ་ལས་སངས་རྒྱས་སྤྱན་དུ་འགྱུར། སྔགས་ལ། ན་མཿས་མནྟ་བུདྡྷཱ་ནཾ། ག་ག་ན་པ་ར་མ་ཀྵ་ཎ་ཀ་རུ་ཎ་མ་མ་ཏ་ཐཱ་ག་ཏ་ཙཀྵུཿསྭཱ་ཧཱ། འདིས་ཡེ་ཤེས་དང་ཐུགས་རྗེའི་སྤྱན་དང་ལྡན་པར་བསམ་ཞིང་། དུས་དེར་རི་མོ་མཁན་ནམ་བཟོ་པོ་གང་ཡིན་པ་དེ་བཀུག་སྟེ། ཇི་ལྟར་ཁས་བླངས་པའི་ཡོན་ལས་ཅི་ནུས་དཔགས་ཏེ་ཕུལ་ལ། མཆོད་འགྲོན་བྱས་ཏེ་སྤྱན་སྔར་གསལ་བར་མ་བྱས་པ་དེ་ལེགས་པར་གསལ་བར་བྱས་ཏེ། དེ་ཡང་གསེར་གྱི་ཐུར་མས་ཕྱེད་དུ་གཞུག་པར་གྲགས་པས། སྤྱན་དབྱེ་བ་འདི་དབང་པོ་རྣམས་ཀྱི་མཆོག་ཡིན་པས་འདི་ལས་མཚན་མར་བཙུགས་ཏེ། བྱིན་གྱིས་བརླབ་པའི་ཆོ་ག་ཐམས་ཅད་ལ། སྐུ་གཟུགས་སྤྱན་དབྱེ་བའི་ཆོ་ག་ཞེས་ཀྱང་གྲགས་སོ། །ལྗགས་བྱིན་གྱིས་བརླབ་པ་ནི། རྡོ་རྗེ་གོ་ཆའི་ཕྱག་རྒྱ་ལས། སྲིན་ལག་གཉིས་དང་མཐེ་བོ་གཉིས་དང་མཐེའུ་ཆུང་གཉིས་གཅིག་ཏུ་སྦྱོར། སྐུ་གཟུགས་ཀྱི་ལྗགས་ལ་གཏད་དེ། རྒྱ་འདི་བདེ་བར་གཤེགས་རྣམས་ཀྱི། །དམ་ཆོས་རབ་གནས་ལྗགས་ཡིན་ཏེ། །འདི་ནི་བཅིངས་པ་ཙམ་གྱིས་སུ། །བདེན་པའི་ཆོས་ལ་དབང་བར་འགྱུར། །སྔགས་ལ། ན་མཿས་མནྟ་བུདྡྷཱ་ནཱཾ། ཏ་ཐཱ་ག་ཏ་ཛི་ཧྭཱ་ས་ཏྱ་ངྷརྨ། །པྲ་ཏིཥྛ་ཏེ་སྭཱ་ཧཱ། དེ་ནས་གོ་ཆ་བྱིན་གྱིས་བརླབ་པ་ནི། ལག་པ་གཉིས་ཐལ་མོ་ཁོང་སྟོང་དུ་སྦྱར་ལ། མཛུབ་མོ་གཉིས་ཀྱི་ངོས་ནས་དཀྲིའོ། །དེ་སྐུ་གཟུགས་ཀྱི་བྲང་དུ་གཏུགས་ཏེ། འདི་ནི་བདེ་བར་གཤེགས་པ་ཡི། །རྡོ་རྗེ་འབར་འཕྲོ་གོ་ཆ་སྟེ། །རབ་གཏུམ་ཕྱག་རྒྱ་འདི་བཅིངས་པས། །རྡོ་རྗེ་མི་ཕྱེད་སྐུར་བསྒོམ་མོ། །སྔགས་ལ། ན་མཿས་མནྟ་བུདྡྷཱ་ནཱཾ། པྲ་ཙཎྜ་བཛྲ་ཛྭ་ལ་བི་སྥུ་ར་ཧཱུཾ། ཅིས་ཀྱང་མི་ཕྱེད་པའི་སྐུར་གྱུར་པ་བསམ་མོ། །དེ་ལྟར་ཕྱག་རྒྱ་སྔ་མ་བདུན་དང་། ཕྱི་མ་ལྔས་མནན་ཏེ། ཕྱག་རྒྱ་བཅུ་གཉིས་ཀྱིས་བྱིན་གྱིས་བརླབས་པ་བསྟན་པས་ཚུལ་ཡིན་ནོ། །འདི་ལྟ་བུར་བྱིན་གྱིས་བརླབས་པ་ལ། ཡན་ལག་ལྔ་པའི་གསང་སྔགས་ཀྱིས་བྱིན་གྱིས་བརླབ་པ་ཞེས་བྱ་བའང་གྲགས་ཏེ། ཡན་ལག་ལྔ་ནི། སྙིང་པོ་དང་། མཚོག་མ་དང་། སྤྱི་གཙུག་དང་། གོ་ཆ་དང་། མཚོན་ཆ་དང་། དེ་ལས་སྙིང་པོ་ནི་སྙིང་གར་རོ། མཚོག་མ་དང་སྤྱི་གཙུག་ནི་དེ་ཉིད་དུའོ། མཚོན་ཆ་ནི་ལག་པ་ལའོ། །འདི་དག་ནི་ལྷ་རེ་རེ་ལ་སྔགས་མི་འདྲ་བ་རེ་རེ་ཡོད་པས་སྤྱི་ཐུན་མོང་དུ་མི་འཇུག་པའི་ཕྱིར་འདིར་མ་བཀོད་དེ། ལྷ་སོ་སོའི་སྒོའི་ཆོ་ག་ལ་དེ་ལྟར་བསྟན་པ་ཡོད་པའི་གཞུང་དུ་བསྒྲུབ་པར་འདོད་ན། དེ་དག་གིས་ཀྱང་འདིར་བྱིན་གྱིས་བརླབ་པར་བྱའོ། །གཞན་ཡང་དབང་པོ་ལྔ་ཆར་བྱིན་གྱིས་བརླབ་པར་འདོད་ན་སྐུ་དང་སྤྱན་དང་ལྗགས་གསུམ་ནི་སྔ་མ་ལ་མ་ལྟོས་པས་ཆོག་གོ། །སྙན་དང་ཤངས་བྱིན་གྱིས་བརླབ་པ། མཐེའུ་ཆུང་བསྒྲེང་བའི་ཚུལ་གྱིས་སུ། །ལག་པ་དེ་ཉིད་བཏེག་ནས་ནི། །སྔགས་པས་རྣ་བ་གཉིས་ཀར་ཡང་། །ཧ་ཞེས་བྱ་བ་བཞག་པར་བྱའོ། །འདི་ནི་སངས་རྒྱས་ཐམས་ཅད་ཀྱི། །རྡོ་རྗེ་རྩེ་མོ་འཛིན་བྱེད་པ། །ཐོས་པ་འཛིན་བྱེད་དམ་པ་ནི། །གཟུངས་ནི་སྦྱིན་པར་བྱེད་པའོ། །སྔགས་ལ། བཛྲ་ཧོ་ཧ་སྭཱ་ཧཱ། གཟུངས་ཐམས་ཅད་ཀྱི་སྙན་མངའ་བར་བསམ་མོ། །ཤངས་བྱིན་གྱིས་བརླབ་པ་ནི། ལག་པ་དེ་ཉིད་གཏེགས་ནས་སུ། །ཧ་ཞེས་བྱ་བ་སྟོབས་ལྡན་པར། །ཐེའུ་ཆུང་བསྒྲེང་བའི་ཚུལ་གྱིས་སུ། །རྡོ་རྗེ་སྣ་ལ་བཞག་པར་བྱ། །ཕྱག་རྒྱ་དེ་སྐུ་གཟུགས་ཀྱི་ཤངས་ལ་གཏད་དེ། འདི་ནི་སངས་རྒྱས་ཐམས་ཅད་ཀྱི། །རྡོ་རྗེ་ཤུགས་འཛིན་མཆོག་ཡིན་ཏེ། །འདི་ནི་བཅིངས་པ་ཙམ་གྱིས་ཀྱང་། །ཡིད་བཞིན་མགྱོགས་པ་འཛིན་པར་འགྱུར། །སྔགས་ལ། བཛྲ་ཧོ་ཧ་སྭཱ་ཧཱ། དེ་དག་གིས་ནི་དབང་པོ་ལྔ་ཡོངས་སུ་ རྫོགས་པར་འགྱུར་རོ། །ད་ནི་ཤིན་ཏུ་སྤྲོས་པ་ལ་དགའ་བ་རྣམས་ཀྱི་དོན་དུ། དེ་བཞིན་གཤེགས་པ་རྣམས་ཀྱི་སྐུའི་ཡན་ལག་དང་། ཉིང་ལག་ཐམས་ཅད་བྱིན་གྱིས་བརླབ་པ་དང་། ཐུགས་ཡེ་ཤེས་ཀྱི་ཡོན་ཏན་གྱི་ཆེ་བ་ཐམས་ཅད་དང་ལྡན་པར་བྱིན་གྱིས་བརླབ་པ་དང་། དེ་བཞིན་དུ་གསུང་གི་ཡན་ལག་ཐམས་ཅད་དང་། གཞན་ཡང་གཞལ་ཡས་ཁང་བཀོད་པ་དང་། བྱང་ཆུབ་ཀྱི་ཤིང་ལྟ་བུ་གནས་བྱིན་གྱིས་བརླབ་པ་དང་། བླ་རེ་ལ་སོགས་པ་མཆོད་པའི་རྒྱན་བྱིན་གྱིས་བརླབ་པ་དང་། མཆོད་པའི་ཡོ་བྱད་བྱིན་གྱིས་བརླབ་པ། རྒྱུད་རྣམས་ལས་ཇི་སྐད་གསུངས་པ་ཅི་རིགས་ཙམ་ཅིག་བསྡུ་བར་བྱ་སྟེ། ཤིན་ཏུ་རྒྱས་པ་ནི་ཡི་གེའི་གཞུང་དུ་བསྡུ་བར་ནུས་ཀྱང་། སྔགས་པ་རྣམས་ཀྱིས་ཆོ་ག་ལ་སྦྱོར་བར་དཀའ་ བས་མ་བྲིས་སོ། །ཅི་རིགས་ཙམ་བཀོད་པ། དེ་ལ་ཡན་ལག་གི་དམ་པ་དབུ་སྤྱིར་བྱིན་གྱིས་བརླབ་པ། ལག་པ་ཁུ་ཚུར་བཅངས་ལ། མཐེ་བོ་གཉིས་དང་མཛུབ་མོ་གཉིས་ནང་དུ་བཅུག་པ་ནི་བཅོམ་ལྡན་འདས་ཀྱི་དབུའི་ཕྱག་རྒྱའོ། །ན་མཿསརྦ་ཏ་ཐཱ་ག་ཏེ་བྷྱོཿ བི་ཤྭ་མུ་ཁེ་བྷྱཿ སརྦ་ཐཱ་དུཾ་སྭཱ་ཧཱ། དབུ་སྤྱིར་བྱིན་གྱིས་བརླབ་པའོ། །དེ་ནས་ལག་པ་གཡས་པ་བཏེག་སྟེ། མཚོག་མར་བཞག་ལ་དེར་ཡི་གེ་ཁཾ་འབར་བར་བསམས་ཏེ། བཛྲ་ཧོ་ཁཾ་སྭཱ་ཧཱ། ཞེས་བརྗོད་དོ། །མཚོག་མ་བྱིན་གྱིས་བརླབ་པའོ། །ལག་པ་གཉིས་ཟླ་བ་ལྟར་བྱས་ཏེ་དཔྲལ་བར་གཏད་ལ། ཙཎྜ་ཨུ་ནནྡྷ་ར་སྭཱ་ཧྭ། དཔྲལ་བ་བྱིན་གྱིས་བརླབ་པའོ། །ལག་པ་མཛུབ་མོ་བསྒྲེང་སྟེ་སྨིན་མ་ལ་གཏད་ལ་ཡི་གེ་ཧ་བསམས་ཏེ། བཛྲ་ཧོ་ཧཱུཾ་སྭཱ་ཧཱ། སྨིན་མ་བྱིན་གྱིས་བརླབ་པའོ། །མཐེ་བོང་བསྒྲེང་སྟེ་གཏད་ནས་མཁུར་ཚོས་ལ་གཏུགས་ཏེ། ཡི་གེ་ཧོ་བསམས་ནས་བཛྲ་ཧོ་ཧོ་སྭཱ་ཧཱ། མཁུར་ཚོས་བྱིན་གྱིས་བརླབ་པའོ། །གུང་མོ་བཏེག་སྟེ་མཆུ་གཉིས་ལ་བཞག་ནས་ཡི་གེ་ཧ་བསམས་ཏེ། བཛྲ་ཧོ་ཧཱུཾ་སྭཱ་ཧཱ། མཆུ་བྱིན་གྱིས་བརླབས་པའོ། །ལྗགས་ཀྱི་ཕྱག་རྒྱ་ལས་གུང་མོ་གཉིས་དང་སྲིན་ལག་གཉིས་བཀུག་ལ་ནང་དུ་སྦྱར། མཐེ་བོང་གཉིས་བསྒྲེང་ལ་ཅུང་ཟད་བཀུག་སྟེ། རྩེ་མོ་གུང་མོ་ལ་ཕྱོགས་པར་བྱ། མཐེའུ་གཉིས་སྔ་མ་བཞིན་ནོ། །སྔགས་ལ། ཏ་ཐ་ག་ཏ་མ་ཧཱ་ཝཀྟ་སྭཱ་ཧཱ། ཞལ་བྱིན་གྱིས་བརླབ་པའོ། །ཕྱག་རྒྱ་དེ་ཉིད་ལས་མཛུབ་མོ་དེ་ཉིད་བཀྲོལ་ལ་ནང་དུ་བཅུག་སྟེ་ཚེམས་མཆེ་བ་ལ་གཏད་ལ། ཏ་ཐཱ་ག་ཏ་མ་ཧཱ་དཾ་ཥྚ་སྭཱ་ཧཱ། ཚེམས་བྱིན་གྱིས་བརླབ་པའོ། །དེ་ནས་ཁུ་ཚུར་ཀོ་སྐོ་ལ་གཏད་དེ། བཛྲ་མཱུརྟི་སྭཱ་ཧཱ། ཀོ་སྐོ་བྱིན་གྱིས་བརླབ་པའོ། །དེ་དག་ནི་དབུའི་ཡན་ལག་དང་ཉིང་ལག་ཡོངས་སུ་རྫོགས་པར་བྱ་བའོ། །དེ་ནས་ཐུགས་བྱིན་གྱིས་བརླབ་པར་བྱ་བ་ལ། རྡོ་རྗེ་རྩེ་གསུམ་འཁྱིལ་བའི་ཕྱག་རྒྱ་བཅས་ཏེ་ཐུགས་ཀར་བཞག་ལ། བཛྲ་ཧོ་རི་སྭཱ་ཧཱ། ཐུགས་ཀ་ན་དཔལ་བེའུ་རྡོ་རྗེ་འཁྱིལ་བ་དང་འདྲ་བ་འབར་བ་བསམ་མོ། །ད་ནི་ཐུགས་ཡེ་ཤེས་ཀྱི་ཡོན་ཏན་གྱི་ཆོས་རྫོགས་པར་བྱིན་གྱིས་བརླབ་པ། ཤུནྱ་ཏ་བཛྲ་སྭཱ་ཧཱ། སྟོང་པ་ཉིད་ཐུགས་སུ་ཆུད་པར་བྱིན་གྱིས་བརླབ་པའོ། །སརྦ་ངྷརྨ་ས་མནྟ་བཛྲ་སྭཱ་ཧཱ། རྡོ་རྗེ་མཉམ་པ་ཉིད་ཐུགས་སུ་ཆུད་པར་བྱིན་གྱིས་བརླབ་པའོ། །དེ་བཞིན་དུ་གཞན་ཡང་། ན་མཿས་མནྟ་བུདྡྷཱ་ནཾ། ཐཾ། བྱམས་པ་ཆེན་པོ་འབྱུང་བའོ། །ན་མཿས་མནྟ་བུདྡྷཱ་ནཾ། ཨཾ། སྙིང་རྗེ་ཆེན་པོ་འབྱུང་བའོ། །དེ་ནས་བྱང་ཆུབ་ཀྱི་ཕྱོགས་ཡོངས་སུ་རྫོགས་པར་བྱིན་གྱིས་བརླབ་པ་ནི། །ན་མཿས་མནྟ་བུདྡྷཱ་ནཱཾ། ཏ་ཐཱ་ག་ཏ་སྨྲྀ་ཏི་ས་ཏྭ་ཧི་ཏ་སྭཱ་ཧཱ། དྲན་པ་ཉེ་བར་བཞག་པའི་འོ། །ན་མཿས་མནྟ་བུདྡྷཱ་ནཱཾ། སརྦ་ངྷརྨ་ས་མནྟ་པྲ་སྟ་སྭཱ་ཧཱ། ཆོས་ཐམས་ཅད་མཉམ་པ་ཉིད་དུ་རྟོགས་པར་བྱེད་པའི་དབང་པོ་དང་སྟོབས་ཀྱིའོ། །ན་མཿསརྦ་ཏ་ཐཱ་ག་ཏེ་བྷྱཿ སརྦ་མུ་ཁེ་བྷྱཿ སརྦ་ཐཱ་བཛྲ་བོ་དྷྱངྒ་ཧྲྀ་ད་ཨ་ཤ་ཡ་ས་སརྦ་བུདྡྷཱ་སྭཱ་ཧཱ། རྡོ་རྗེ་བྱང་ཆུབ་ཀྱི་ཡན་ལག་གིའོ། །ན་མཿསརྦ་ཏ་ཐཱ་ག་ཏེ་བྷྱཿ སརྦ་མུ་ཁེ་བྷྱཿ སརྦ་ཐཱ་མརྒ་བི་ཤོ་ངྷ། ད་ཀ་ད་ཀ།ཙ་ར་ཙ་ར་སྭཱ་ཧཱ། འཕགས་པའི་ལམ་རྣམས་ཀྱིའོ། །ན་མཿསརྦ་ཏ་ཐཱ་ག་ཏེ་བྷྱཿ སརྦ་མུ་ཁེ་བྷྱཿ སརྦ་ཐཱ། ས་ཏྱ་བ་ཀ་ས་མུད་དཱ་ཀ་བུདྡྷཱ་རཱུ་པ་ངྷ་ར་སྭཱ་ཧཱ། འཕགས་པའི་བདེན་པ་རྣམས་ཀྱིའོ། །ན་མཿསརྦ་ཏ་ཐཱ་ག་ཏེ་བྷྱཿ སརྦ་མུ་ཁེ་བྷྱཿ སརྦ་ཐཱ་པ་ར་མི་ཏ་གར་བྷ་སརྦ་ཏྲ་ཨ་ཏི་ཧ་ཏ་བཛྲ་ཙི་ན་ཧ་སྭཱ་ཧཱ། ཕ་རོལ་དུ་ཕྱིན་པའི་འོ། །ན་མཿསརྦ་ཏ་ཐཱ་ག་ཏེ་བྷྱཿ སརྦ་མུ་ཁེ་བྷྱཿ སརྦ་ཐཱ། བཛྲ་དྷཱ་ར་ནི། ཤ་ར་དྷཱ་ར་དྷཱ་ར་བཛྲ་སྭཱ་ཧཱ། གཟུངས་རྣམས་ཀྱིའོ། །ན་མཿ ས་མནྟ་བུདྡྷཱ་ནཱཾ། ཨ་ཙིནྟྱ་ཨདྦྱ་ཏ་རཱུ་པ་ཝཱ་ཀ་ས་མ་ཏ། པྲཱསྟ་བི་ཤུདྡྷ་སྭ་ར་སྭཱ་ཧཱ། དེ་བཞིན་གཤེགས་པའི་སོ་སོ་ཡང་དག་པར་རིག་པའི་འོ། །ན་མཿས་མནྟ་བུདྡྷཱ་ནཱཾ། ད་ཤ་བ་ལཱངྒ་ངྷ་ར་ཧཱུཾ་སཾ་ཇ་སྭཱ་ཧཱ། སྟོབས་བཅུའོ། །ན་མཿསརྦ་ཏ་ཐཱ་ག་ཏེ་བྷྱཿ སརྦ་མུ་ཁེ་བྷྱཿ སརྦ་ཐཱ། ཨ་བེ་ཎི་ཀ་བཛྲ་སཾ་བྷ་བ་བུདྡྷ་སུ་ཏྲ་སྭཱ་ཧཱ། སངས་རྒྱས་ཀྱི་ཆོས་མ་འདྲེས་པའི་འོ། །ན་མཿསརྦ་ཏ་ཐཱ་ག་ཏེ་བྷྱེཿསརྦ་མུ་ཁེ་བྷྱཿ སརྦ་ཐཱ། བེ་ཤ་ར་ད་བཛྲ་མརྒྷ་ནི་ར་དརྴ་ཀ་སྭཱ་ཧཱ། མི་འཇིགས་པ་རྣམས་ཀྱིའོ། །ན་མཿསརྦ་ཏ་ཐཱ་ག་ཏེ་བྷྱཿ སརྦ་མུ་ཁེ་བྷྱཿསརྦ་ཐཱ། ཏྲི་རཏྣ་སཾ་སྟ་བ་ཀ་བུདྡྷཱ་རཱུ་པངྷ་ར་སྭཱ་ཧཱ། དཀོན་མཆོག་གསུམ་གྱི་སྟེ། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པའི་ཆོས་ཀྱི་སྐུ་བརྙེས་པའི་ཐུགས་ཀྱི་བདག་ཉིད་དུ་བྱིན་གྱིས་བརླབ་པ་སྟེ། འདི་ནི་གཟུགས་སམ་རི་མོའི་རྒྱུད་བྱིན་གྱིས་བརླབ་པའི་སྐབས་སུ་སྨོས་པ་སྟེ། མཆོད་རྟེན་མངའ་དབུལ་བའི་དུས་སུ་ནི། དང་པོ་སྟོང་པ་ཉིད་དུ་བྱིན་གྱིས་བརླབ་པ་ནས་དཀོན་མཆོག་གསུམ་གྱི་ཡོན་ཏན་ཡོངས་སུ་རྫོགས་པར་བྱིན་གྱིས་བརླབ་པའི་བར་འདིས་བྱིན་གྱིས་བརླབ་པ་ཙམ་གྱིས་ཆོག་སྟེ། ཅུང་ཟད་བྱེ་བྲག་ཏུ་ན་ཕྱག་རྒྱ་ནི། རྡོ་རྗེ་དབྱིངས་ཀྱི་དབང་ཕྱུག་མའི་ཕྱག་རྒྱ། ཆོས་ཀྱི་དབྱིངས་ལ་མངའ་བརྙེས་པར་བྱིན་གྱིས་རློབ་པ་མཆོད་རྟེན་གྱི་ཕྱག་རྒྱ་བཅས་ཏེ། །སྔགས་འདི་དག་གིས་སྦྱར་ཞིང་བྱིན་གྱིས་བརླབ་པར་བྱའོ། །འདི་དག་ལ་རང་རང་གི་ཕྱག་རྒྱ་སོ་སོར་སྦྱར་བར་རྒྱུད་ལས་གསུངས་པ་ཡོད་ནའང་སྔགས་པ་རྣམས་ཀྱིས་ལྕོགས་པར་དཀའ་བས་སྤྱིའི་ཕྱག་རྒྱ་ལ་བརྟེན་པ་ཡིན་ནོ། །མཆོད་རྟེན་བྱིན་གྱིས་བརླབ་པའི་སྐབས་འདིར་སྨོས་པ་ནི་རྟོགས་པར་སླ་བའི་ཕྱིར་སྐབས་འཕྲོས་སུ་བསྟན་པ་སྟེ་ཆོག་གོ། །གཞུང་ཉིད་ལ་འཇུག་པར་བྱ་སྟེ། དེ་ལྟར་ཐུགས་བྱིན་གྱིས་བརླབ་ནས་གསུངས་བྱིན་གྱིས་བརླབ་པ་ནི། གོང་དུ་ཞལ་དང་ལྗགས་དང་ཚེམས་དང་མཆུ་རྣམས་བྱིན་གྱིས་བརླབ་པ་ཉིད་་ཡིན་མོད་ཀྱི། ཆོས་ཐམས་ཅད་བརྗོད་པའི་སྔགས་དང་ཕྱག་རྒྱ་འདིས་མནན་ཏེ་བྱིན་གྱིས་བརླབ་པར་བྱའོ། །ལྗགས་ཀྱི་ཕྱག་རྒྱའམ་དུང་གི་ཕྱག་རྒྱའམ་མགུར་བུམ་པའི་ཕྱག་རྒྱ་བཅས་ཏེ། ཞལ་ལ་གཏད་ལ། ན་མཿ སརྦ་ཏ་ཐཱ་ག་ཏེ་བྷྱཿ སརྦ་མུ་ཁེ་བྷྱཿ སརྦ་ཐཱ། པྲ་བརྟ་ཡ་བཛྲ་ཛྙཱ་ན་སཱ་ག་རཱ་ན་ཏ་སྭ་ཧཱ། འདིས་ཆོས་ཀྱི་ཕུང་པོ་ཐམས་ཅད་སྟོན་པར་མཛད་པར་བྱིན་གྱིས་བརླབ་བོ། །དེ་ནས་བྲང་ལ་སོགས་པའི་སྐུ་ཡན་ལག་རྣམས་བྱིན་གྱིས་བརླབ་པར་བྱ་སྟེ། ཕྱག་རྒྱ་རྡོ་རྗེ་རྩེ་གཅིག་པ་བཅས་ལ། ན་མཿསརྦ་ཏ་ཐཱ་ག་ཏེ་བྷྱཿ སརྦ་མུ་ཁེ་བྷྱཿ སརྦ་ཐཱ། བཛྲ་བ་ར་ངྷ་རི་བུ་ར་བཛྲོ་རྟ་མ་སྭཱ་ཧཱ། བྲང་བྱིན་གྱིས་བརླབ་པའོ། །ན་མཿསརྦ་ཏ་ཐཱ་ག་ཏེ་བྷྱཿ སརྦ་མུ་ཁེ་བྷྱཿ སརྦ་ཐཱ། བཛྲ་བ་ཧཱུརྦྷ་བ་བཛྲ་བ་ཧུ་ཤུ་རཱངྒ་མ་སྭཱ་ཧཱ། ཕྱག་བྱིན་གྱིས་བརླབ་པའོ། །ན་མཿསརྦ་ཏ་ཐཱ་ག་ཏེ་བྷྱཿསརྦ་མུ་ཁེ་བྷྱཿ སརྦ་ཐཱ་ཧྲིཾ། ཞབས་བྱིན་གྱིས་བརླབ་པའོ། །དེ་ནས་འཁོར་ལོའི་ཕྱག་རྒྱ་ཕྱག་དང་ཞབས་ལ་གཏུགས་ཏེ། ན་མཿསརྦ་ཏ་ཐཱ་ག་ཏེ་བྷྱཿ སརྦ་མུ་ཁེ་བྷྱཿ སརྦ་ཐཱ་ཨོཾ། ཕྱག་དང་ཞབས་འཁོར་ལོའི་མཚན་དང་ལྡན་པར་བྱིན་གྱིས་བརླབ་པའོ། །དཔལ་བེའུའི་ཕྱག་རྒྱ་ལས་གུང་མོ་གཉིས་བཀྱེད་དེ་བརྐྱང་ལ། མཐེ་བོ་གཉིས་ནང་དུ་བཅུག་སྟེ། སྐུ་གཟུགས་ཀྱི་ལྟེ་བ་ལ་གཏུགས་ཏེ། ན་མཿསརྦ་ཏ་ཐཱ་ག་ཏེ་བྷྱཿསརྦ་མུ་ཁེ་བྷྱོཿ སརྦ་ཐཱ་ཧྲིཾ། སྐུ་ལྟེ་བའི་དཀྱིལ་འཁོར་བྱིན་གྱིས་བརླབ་པའོ། །སྐུ་ཡན་ལག་དང་ཉིང་ལག་བྱིན་གྱིས་བརླབ་པ་ཕྲ་མོ་གཞན་ཡང་ཡོད་མོད་ཀྱི། འདི་དག་ཙམ་དུ་འདུས་པར་སྣང་བས་མ་བཀོད་དོ། །དེ་ལ་གཙུག་ལག་ལྟ་བུ་གནས་དང་བཅས་པ་ལྷའི་དཀྱིལ་འཁོར་མང་པོ་དང་ལྡན་པར་བྱིན་གྱིས་རློབ་པར་བྱེད་པའི་ཚེ་ནི། སྙིང་པོའི་དཀྱིལ་འཁོར་གང་རིགས་ཙམ་ཅིག་ཇི་སྐད་དུ་བསྟན་པ་ལྟར་བྱིན་གྱིས་བརླབས་ཏེ། ཇི་སྙེད་པ་གཞན་དག་ནི་སྤྱིའི་སྔགས་ཙམ་གྱིས་ཐམས་ཅད་དུས་གཅིག་ཏུ་བསྐྱེད་པར་བསམ་ལ། བྱིན་གྱིས་བརླབ་པ་དུས་གཅིག་ཏུ་བྱའོ། །དེ་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་གསང་སྔགས་ནི། ན་མཿས་མནྟ་བུདྡྷཱ་ནཱཾ། སརྦ་བུདྡྷཱ་བོ་ངྷི་ས་ཏྭ་ཧྲྀ་ད་ཡཾ་ནི་བེ་ཤ་ནི་ན་མཿསརྦ་བིཧྱཱ་སྭཱ་ཧཱ། སངས་རྒྱས་དང་བྱང་ཆུབ་སེམས་དཔལ་ཐམས་ཅད་ཀྱིའོ། །ན་མཿས་མནྟ་བུདྡྷཱ་ནཱཾ། ཧེ་ཏུ་པྲཏྱ་ཡ་བི་ག་ཏ་ངྷརྨཱ་ནི་རྫ་ཏ་ཧཱུཾ། ཉན་ཐོས་རྣམས་ཀྱིའོ། །ན་མཿས་མནྟ་བུདྡྷཱ་ནཱཾ། རང་སངས་རྒྱ་རྣམས་ཀྱིའོ། །ན་མཿས་མནྟ་བུདྡྷཱ་ནཱཾ། སརྦ་ཏ་བ་མ་ཏི་བི་ཏི་ར་ན་ངྷརྨ་དྷཱ་ཏུ་ནི་རྫཏ་སཾ་སཾ་སྭཱ་ཧཱ། བྱང་ཆུབ་སེམས་དཔའ་ཐམས་ཅད་ཀྱིའོ། །ན་མཿས་མནྟ་བུདྡྷཱ་ནཱཾ། ལོ་ཀ་ལོ་ཀ་ཀ་ར་ཡ། སརྦ་དེ་བ་ནཱ་ག་ཡཀྵ། གནྡྷརྦ། ཨ་སུ་ར། ག་རུ་ཊ། ཀིཾ་ན་ར། མ་ཧོ་རཱ་ག །ཧྲྀ་ད་ཡ་ན། ཨ་ཀ་རི་ཤ་ཡ། བི་ཙི་ཏྲ། ག་ཏི་སྭཱ་ཧཱ། ལྷ་ལ་སོགས་པའི་འགྲོ་བ་ཐམས་ཅད་ཀྱི་སྙིང་པོའོ། །སྙིང་པོ་འདི་དག་གིས་དུས་གཅིག་དུ་བྱིན་གྱིས་བརླབས་ལ། དེ་ནས་ཇི་སྐད་དུ་སྨོས་པའི་སྔགས་དང་ཕྱག་རྒྱས་བྱིན་གྱིས་བརླབ་པར་བྱ་སྟེ། དེ་ལ་སངས་རྒྱས་རྣམས་ལ་ནི་ཇི་སྐད་དུ་བསྟན་པ་ཐམས་ཅད་ལྡན་པར་བྱིན་གྱིས་བརླབ་པོ། །བྱང་ཆུབ་སེམས་དཔའ་རྣམས་ནི་རྣམ་པར་ཐར་པའི་སྒོ་དེ་དག་ཡོངས་སུ་མ་རྫོགས་པ་ཙམ་དུ་་བྱིན་གྱིས་བརླབ་པོ། །ཉན་ཐོས་རྣམས་ལ་ནི། རྒྱུ་དང་རྐྱེན་དང་བྲལ་བའི་ཆོས་ལས་སྐྱེས་པར་བྱིན་གྱིས་བརླབ་པོ། །རང་སངས་རྒྱས་རྣམས་ནི་ངག་གི་ལམ་དང་བྲལ་བའི་ཆོས་ལས་སྐྱེས་པར་བྱིན་གྱིས་བརླབ་པོ། །འཇིག་རྟེན་པའི་ལྷའི་གཙོ་བོ་རྣམས་ནི། དེ་བཞིན་གཤེགས་པའི་ཞལ་མཐོང་བའི་སྐལ་བ་དང་ལྡན་ཞིང་། སྟོང་པ་ཉིད་དང་སྙིང་རྗེས་བརླན་པ། སེམས་ཅན་ཐམས་ཅད་ཡོངས་སུ་སྐྱོང་བའི་བཀའི་ཐུགས་དམ་ལ་གནས་པར་བྱིན་གྱིས་བརླབ་པོ། །འགྲོ་བ་རིས་དྲུག་ཐ་མལ་པ་ཐམས་ཅད་ནི། བྱང་ཆུབ་ཀྱི་སྙིང་པོ་ཅན་གྱི་རང་བཞིན་ལ། འཕགས་པ་ཐམས་ཅད་ཀྱི་ཕྱག་རྒྱས་བཏབ་པར་བྱིན་གྱིས་བརླབ་པོ། །དེ་ལྟར་བྱིན་གྱིས་བརླབ་པ་ཟིན་པའི་རྗེས་ལ། གཙོ་བོ་གང་ཡིན་པ་དེ་ཉིད་བྱང་ཆུབ་ཀྱི་སྙིང་པོ་ལས་མི་གཡོ་བར་བཞུགས་བཞིན་དུ། སངས་རྒྱས་ཀྱི་ཞིང་མཐའ་ཡས་པར་བདུད་ཕམ་པར་མཛད་ཅིང་། བྱང་ཆུབ་ཀྱི་སྙིང་པོ་རྡོ་རྗེ་གདན་མནན་པར་བྱིན་གྱིས་བརླབ་པར་བྱ་སྟེ། ལག་པ་གཉིས་སྦྱར་ཏེ། གུང་མོ་གཉིས་བཀུག་ལ། ནང་དུ་བཅུག་སྟེ་གདན་ལ་གཏད་ལ། ན་མཿསརྦ་ཏ་ཐཱ་ག་ཏེ་བྷྱཿསརྦ་མུ་ཁེ་བྷྱཿསརྦ་ཐཱ། ཨ་ད་ར་བཛྲ་ས་མ་ཡ། མ་ནུ་པ་ལ་ཡ་སྭཱ་ཧཱ། པདྨའི་གདན་ནི་གང་དུ་སྨོས་པས་བྱ་སྟེ། སྤྱིར་རྟག་ཏུ་ལྡན་པའི་ལོངས་སྤྱོད་ཀྱི་རྐྱེན་དྲུག་ཏུ་གྲགས་པ་ལ། བཞུགས་པའི་གདན་དང་སྐུའི་ན་བཟའ་གཉིས། དབུའི་གདུགས་དང་སྟེང་གི་བླ་རེ་གཉིས་ཏེ་བཞི། བཞུགས་པའི་གཞལ་མེད་ཁང་ཆེན་པོ་དང་། གཤེགས་བཞུགས་ཀྱི་ལྡིང་ཁང་གཉིས་ཏེ་དྲུག་གོ །དེ་ལ་གདན་བསྟབ་ནས། ན་བཟའ་བྱིན་གྱིས་བརླབ་པ། ལག་པ་ལ་ཡི་གེ་བཾ་བསམས་ནས་རང་གི་ལྕེ་རྩེར་ཧཱུཾ་བསྒོམས་ཏེ་ལན་གསུམ་མྱོང་ངོ་། །ཞེས་གཏོར་ཆུང་འཇམ་མགོན་ལས་བཤད། ཐབས་མཆོག་ལས་ནི། རང་གི་ལྕེ་རྩེར་རྡོ་རྗེ་དཀར་པོ་འབར་བ་ནས་འབྲུ་ཙམ་ཅིག་བསམས་ནས་ལན་གསུམ་དམ་ཚིག་བླངས་ཏེ། པདྨའི་གདན་གྱི་ཕྱག་རྒྱ་ལས། ༼ལག་པ་གཉིས་རྟིང་པ་སྤྲད་དེ་སོར་མོ་གཉིས་ཕྱིར་བཀྱེད་དེ་ཡིད་ཙམ་བཀུག་པའོ། །༽ རྒོད་མ་ཁའི་ཕྱག་རྒྱར་བྱས་ཏེ་སྣོད་བཟུང་ནས།༼ལག་པ་གཉིས་མཐེ་བོ་དང་སྲིན་ལག་གཉིས་ཀྱིས་སྣོད་བཟུང་ནས་འཐུང་བའོ། །༽ ཇི་ལྟར་འདོད་པ་བཞིན་དུ་བསམ་ཞིང་ཅི་རན་དུ་བཏུང་། དེ་ནས་དཀྱིལ་འཁོར་གྱི་ལྷ་རྣམས་ལ་མཆོད། ཕྱི་ནང་གི་རྣལ་འབྱོར་མའི་ཚོགས་རྣམས་ལ་ཡང་མཆོད། སློབ་མའི་འཁོར་རྣམས་ལ་ཡང་རྒྱལ་ཚབ་ནས་རིམ་པ་བཞིན་བསྟབ་ཅིང་མཆོད། ཅེས་བཤད། དེ་ལ་ཕྱག་རྒྱ་གསུམ་གསུངས་པ་ལས། དང་པོ་རྡོ་རྗེའི་ཕྱག་རྒྱ་ནི། སོར་མོ་གཞན་རྒྱབ་ཏུ་བསྣོལ། གུང་མོ་གཉིས་ནང་དུ་ལྟོ་སྦྱར་ཏེ་བསྒྲེང་། མཐེའུ་ཆུང་དང་མཐེ་བོ་རྩེ་སྤྲད་ནས་ཁ་ཕར་བསྟན་པའོ། །པདྨའི་སྟན་ནི། ལག་པ་གཉིས་རྟིང་བ་སྤྲད་དེ། སོར་མོ་ཕྱིར་བཀྱེད་ནས་ཡིད་ཙམ་བཀུག་པ་ནི་པདྨའི་གདན་ནོ། །དེ་ལ་ལག་པ་གཉིས་མཐེ་བོང་དང་སྲིན་ལག་གཉིས་ཀྱིས་སྣོད་བཟུང་ནས་འཐུང་བ་ནི་རྒོད་མ་ཁའོ། །དེ་ནས་ཤ་རྣམ་པ་ལྔ་ལ་སོགས་པ་ཞལ་ཟས་གཞན་ཐམས་ཅད་རིལ་སྤྱི་སྤུངས་སུ་བཞག་ནས་བྱིན་གྱིས་བརླབ་པར་བྱ་སྟེ། དེ་ཡང་ཐབས་མཆོག་དབྱིག་གི་སྒྲོན་མ་ལས་ནི་སྐབས་འདིར་དྲི་ཆབ་བྱིན་གྱིས་བརླབས་ཏེ་རྫས་ལ་གདབ་ཅིང་བསང་ཞེས་བཤད། ཐབས་མཆོག་དཔག་གིས་མི་ལང་བའི་མདོ་ལས་ནི་སྔོན་དུ་བརྗོད་པ་བཞིན་དུ་ཛ་གད་བྱིན་གྱིས་བརླབས་པའི་གོང་དུ་རྫས་ཐམས་ཅད་ལ་དྲི་ཆབ་ཀྱིས་བསང་ཞེས་བཤད། ཧེ་ཆུང་ལས་ནི་སྤྱན་དྲངས་པའི་རྗེས་ལ་དྲི་ཆབ་ཀྱིས་རྫས་རྣམས་བསངས་ཏེ་མཆོད་པ་དབུལ་ཞེས་བཤད། འཇམ་མགོན་ལས་ནི་ལྷའི་དཀྱིལ་འཁོར་བསྒོམ་ནས་སྤྱན་དྲངས་ཀྱི་སྔོན་དུ་དྲི་ཆབ་བྱིན་གྱིས་བརླབས་ཏེ། རྫས་ཐམས་ཅད་བསང་ཞེས་བཤད་དེ། འདི་དག་གང་ལྟར་བྱས་ཀྱང་འགལ་བ་མེད་དོ། །རེ་ཤིག་འདིར་དྲི་ཆབ་ཀྱིས་བསངས་ཀྱང་རུང་། གོང་དུ་བསངས་ཀྱང་རུང་སྟེ། དེ་ནས་སྤྱི་སྤུངས་སུ་བཞག་པ་དེ་ལ་མ་ལས་ཉི་མའི་དཀྱིལ་འཁོར་དུ་གྱུར་པའི་སྟེང་དུ་ཡི་གེ་ཧཱུཾ་མཐིང་ཀ་འབར་བས་རྣམ་པར་རྟོག་པ་དེ་དག་ཐམས་ཅད་བསྲེགས་ནས་སྟོང་པ་ཉིད་དུ་བསམ། དེ་ནས་ཨ་ལས་ཟླ་བའི་དཀྱིལ་འཁོར་དུ་གྱུར་པའི་སྟེང་དུ་ཡི་གེ་ཨཾ་དམར་པོ་འབར་བ་ལས་འོད་ཟེར་སྣ་ལྔ་ཕྱོགས་བཅུར་འཕྲོས་པས་སྣོད་བཅུད་ཀྱི་བདུད་རྩི་ཐམས་ཅད་བསྡུས་ནས་ཟླ་བའི་སྟེང་དུ་བསྡུས་པས་སླར་ཟླ་བ་ལྟ་བུར་གྱུར་པའི་དབུས་སུ་ཡི་གེ་ཨོཾ་དཀར་པོ་འབར་བ་གཅིག་ཏུ་གྱུར་པར་བསམས་ཏེ། སྐུ་གསུང་ཐུགས་རྡོ་རྗེའི་ངོ་བོར་གྱུར་པར་བསམ། ཨོཾ་དཀར་པོ་འབར་བ་དེ་ལས་འདོད་པ་ལྔའི་ལྷ་མོ་བྱུང་སྟེ། སྣ་ལ་གཟུགས་ཀྱི་ལྷ་མོ་སྐུ་མདོག་དཀར་མོ། ཕྱག་གཉིས་ན་མེ་ལོང་བསྣམས་པ་མང་པོ་བསམ་གྱིས་མི་ཁྱབ་པ་བྱུང་བས་མེ་ལོང་ལས་གཟུགས་ཀྱི་མཆོད་པ་སྣ་ཚོགས་འཕྲོས་ཏེ། དཀྱིལ་འཁོར་གྱི་ལྷ་དང་འདུས་པའི་རྣལ་འབྱོར་དང་མ་མོ་དང་མཁའ་འགྲོའི་ཚོགས་ལ་མཆོད་ནས་ལྷ་མོ་དེ་དག་གི་སྤྱན་ལ་ཐིམ་པར་བསམ། དེ་ནས་ཡང་ཨོཾ་ལས་སྒྲའི་ལྷ་མོ་མཐིང་ཁ་ཕྱག་ན་པི་ཝང་བསྣམས་པ་མང་པོ་བྱུང་སྟེ། པི་ཝང་གི་སྒྲ་ལས་སྒྲའི་མཆོད་པ་སྣ་ཚོགས་བྱུང་བས། ཡང་མཆོད་པ་ཐམས་ཅད་ཀྱི་སྙན་ལ་ཐིམ། ཡང་ཨོཾ་ལས་དྲིའི་ལྷ་མོ་སེར་མོ། ཕྱག་ན་དྲི་སྣོད་དུང་ཕོར་འཛིན་པ་མང་པོ་ལས་དྲིའི་མཆོད་པ་བསམ་གྱིས་མི་ཁྱབ་པས་མཆོད་ནས་ཐམས་ཅད་ཀྱི་ཤངས་ལ་ཐིམ། ཡང་ཨོཾ་ལས་རོའི་ལྷ་མོ་དམར་མོ་བདུད་རྩིའི་སྣོད་ཐོགས་ཏེ་བྱུང་བས། དེ་ལས་རོའི་མཆོད་པ་ཞལ་ཟས་སྣ་ཚོགས་ཀྱི་ཐམས་ཅད་མཆོད་ནས་ལྗགས་ཀྱི་དབང་པོ་ལ་ཐིམ། དེ་ཡང་ཨོཾ་ལས་རེག་གི་ལྷ་མོ་ལྗང་གུ་ཕྱག་གཉིས་ན་རྡོ་རྗེ་བསྣམས་ཏེ་དཔུང་བར་འཁྱུད་པ་ལས། རེག་གི་མཆོད་པ་མང་པོ་བྱུང་ནས་ཐམས་ཅད་ལ་མཆོད་ནས་སྐུ་ལ་ཐིམ། ཡང་ཨོཾ་ལས་ཆོས་ཀྱི་དབྱིངས་ཀྱི་ལྷ་མོ་སྐུ་མདོག་དཀར་མོ། ཕྱག་ན་རྡོ་རྗེ་དང་དྲིལ་བུ་བསྣམས་པ་མང་པོ་འཕྲོས་པས། འཕགས་པ་ཐམས་ཅད་ཀྱང་རིལ་རྡོ་རྗེ་སེམས་དཔར་གྱུར་ནས། དེ་དག་རེ་རེ་ལ་ཡང་ཀུན་ཏུ་བཟང་མོ་རེ་རེས་མཆོད་པས། ཐམས་ཅད་གཉིས་སུ་མེད་ཅིང་བྱང་ཆུབ་ཀྱི་སེམས་ཀྱི་རོའི་བདེ་བ་བསྟར་ནས་མཉེས་པར་བསམ། དེ་ནས་གར་དང་དབྱངས་ལ་སོགས་པ་ལྷའི་མཆོད་པ་སྣ་ཚོགས་པ་རྣམས་ཀྱིས་ཀྱང་མཆོད་པར་བྱ་སྟེ། སྣོད་རྣམས་ཀྱང་ཁ་ཕྱེ་ལ། བུད་མེད་བཞི་༼ཞེས་པ་མེ་ཏོག་ལ་སོགས་ལྷ་མོ་བཞི་ལ་བྱ། ༽དང་བཅས་པ་ལག་པ་གཡས་གཡོན་མཛེས་པའི་གར་༼གར་གྱི་ཕྱག་རྒྱ་ལས་དང་སྟབས་ཀྱི་ཕྱག་རྒྱ་བྱས་ལ་སྤྱི་བོར་དགྲོལ། ༽བྱ་ཞིང་། རྡོ་རྗེ་ཐལ་མོ་གྱེན་དུ་ཕྱེ་སྟེ། མཆོད་པ་ཐམས་ཅད་༼ཡིད་བཞིན་གྱི་བདུད་རྩི་རྒྱ་མཚོའི་སྤྲིན་སྙེད་ཀྱི་ལྷ་དང་ལྷ་མོའི་མཆོད་པ་འཕྲོ་བར་བསམ་མོ། །༽དབུལ་བར་བྱ་ཞིང་། དབྱངས་འདི་དག་ཀྱང་བླང་ངོ་། །ཨོཾ་ཨཱཿ་ཧཱུཾ་སུ་ར་ཏ་ཏི་པ་ཡོ་༼མཆོད་པ། ༽ག །ཀ་མ་ལེ། ཨ་མ༼ཕྲེང་བ། ༽་ལེ། བཛྲ་ཨ་མྲྀ་ཏ། ཧ་ར་ཎ་པྲ་ཏཱི་ཙྪ། ༼བསྟབ་པའི། ༽བྷ་ག་བན་༼བཅོམ་ལྡན་འདས། ༽ཛཿཧཱུཾ་བཾ་ཧོཿ༼སྤྱན་དྲངས། ༽ ཨ་ལ་ལ་ཧོཿ༼དགྱེས་པ། ༽པ་ན་བེ་པུ་ནུ། ༼མཆོད་པ། ༽ སུ་ར་ཏི་ཏི་བ་ར་མུ། ༼འདི་ཀུན་མཆོད་པ། ༽ཏ་ཐཱ་ག་ཏུ་༼དེ་བཞིན་གཤེགས་པ། ༽སིད་དྷུ། ཨོཾ་ཧཱུཾ་པ་ར་མུ། ཏ་ཐཱ་ག་ཏ་སིང་དྷུ། ས་མ་ཡོ་ད་མུ། ས་བ་བུ། མ་ཧཱ་སུ་ཧུ་སིདྡྷ་ད་བུ། ཨོཾ་ཧཱུཾ་ས་བ་བུ། མ་ཧཱ་སུ་ཧུ་སིད་དབུ་ཨོཾ་ཧཱུཾ། ཡང་ན། གར་བྱ་ཞིང་། དང་པོ་མེ་ཏོག་གི་ཕྱག་རྒྱ་བཅིངས་ནས་མཆོད་དེ། དབྱངས་འདི་སྐད་བྱའོ། །རབ་ཏུ་དགའ་བའི་བདག་ལ་ཕྱག་འཚལ་ལོ། །དེ་བཞིན་གཤེགས་པའི་༼ཐམས་ཅད་ཟེར། ༽དམ་པ་གྲུབ་པར་མཛོད། ཨོཾ་ཧཱུཾ། ༼བར་དུ་ཨཾ་ཟེར། ༽ དེ་ནས་བདུག་པའི་ཕྱག་རྒྱ་བཅིངས་ལ། ཡང་དེ་བཞིན་གཤེགས་པའི་དམ་པ་གྲུབ་པར་མཛོད། ཨོཾ་ཧཱུཾ། ༼བར་དུ་ཨཾ་ཟེར། ༽ དེ་ནས་མར་མེའི་ཕྱག་རྒྱ་བཅིངས་ཏེ། དམ་ཚིག་དམ་པ་གྲུབ་པར་མཛད་དུ་གསོལ། མཆོད་པ་ཆེན་པོ་ཐམས་ཅད་དག་པར་མཛོད། ཨོཾ་ཧཱུཾ། ༼བར་དུ་ཨཾ་ཟེར། ༽ ཡང་དྲིའི་ཕྱག་རྒྱ་བཅིངས་ནས། མཆོད་པ་ཆེན་པོ་ཐམས་ཅད་གྲུབ་པར་མཛོད། ཨྃ་ཧཱུཾ་༼བར་དུ་ཨཾ་ཟེར། ༽མཆོད་པ་མང་པོ་མི་འབྱོར་ན་དེ་དག་ཙམ་གྱིས་མཆོད་པ་ཐམས་ཅད་བྱས་པར་འགྱུར་རོ། །ཞེས་དཔལ་མཉམ་སྦྱོར་ལས་བཤད། དེ་ནས་ཅུང་ཟད་རྒྱས་པར་བྱ་བར་འདོད་ན་འདི་དག་བརྗོད་དེ། བླ་མེད་མཆོག་གི་མཆོད་པ་དམ་པར་སྦྱར་བ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཚིག་གསང་བའི་མཆོད་པ་བཞེས་སུ་གསོལ། །ཡེ་ཤེས་དབྱིངས་མ་ཡུམ་གྱི་གཞལ་ཡས་སུ། །རྒྱལ་བའི་དཀྱིལ་འཁོར་མ་ལུས་མཆོག་བཀོད་དེ། །ཐབས་དང་ཤེས་རབ་འབྲེལ་པའི་སྦྱོར་མཆོད་ཀྱིས། །འཕགས་པ་ཀུན་ལ་མཉེས་པའི་མཆོད་པ་འབུལ། །ཞེས་པ་དང་། ཨེ་མའོ། །ཀུན་ཏུ་བཟང་པོའི་རིག་པ་རྒྱ་ཆེ་བསམ་གྱིས་མི་ཁྱབ་ལ། །དངོས་ཉིད་མེད་པའི་ཆོས་ལ་དགའ་བའི་རོལ་བས་གཟུངས་སུ་གྱུར། སངས་རྒྱས་ཀུན་གྱི་བདེ་མཆོག་བདུད་རྩི་ར་ས་ཡན། །ཇི་ལྟར་བདེ་ལ་བསྟེན་ཅིང་ཀུན་དུ་སྣང་བར་མཛོད། །ཀྱེ་བདེ་མཆོག་བདེ་བས་རོལ་པ་ཚུལ་བཞིན་མཛོད། །སྡུག་བསྔལ་འགྲོ་བའི་ལས་ཅན་བདེ་བས་ཚིམ་པར་མཛོད། །བྱམས་པའི་སྤྱན་ཅན་ཐུགས་རྗེའི་ཉི་མས་འགྲོ་བ་ཀུན་ལ་སྣང་མཛད་དེ། །གཏི་མུག་འཐིབས་པོའི་མུན་ནག་བྱང་ཆུབ་སེམས་ཀྱིས་གསལ་བར་སྟོན། །དེ་ནི་འདུས་པའི་ཚོགས་ལ་བདེ་སྦྱིན་རིག་པའི་རྒྱལ་པོས་གསུངས། །བྱང་ཆུབ་མཆོག་གི་སེམས་དེ་སྙིང་པོའི་མཆོག་ཏུ་དབང་བསྐུར་ཅིག །དབྱངས་ཀྱི་རྒྱལ་པོ་འདི་ཡིས་སྐད་ཅིག་བསྐུལ་བས་ནི། །རབ་ཏུ་དགྱེས་པའི་བདག་ཉིད་མངོན་དུ་གྱུར་ཏེ་དངོས་གྲུབ་སྩོལ། །རྣམ་པ་ཀུན་ཏུ་སྐྱེ་བ་མེད་པའི་བདེ་བས་རོལ་ཅིང་ཆུབ་མཛད་པ། །བདག་དང་གཟུངས་ཀྱི་དམ་དང་བཅས་ཏེ་རྣལ་འབྱོར་འགྱུར་བ་མེད་པའི་ཡིད། །བདེ་མཆོག་བྱང་ཆུབ་སེམས་ནི་རྣམ་པ་ཀུན་ཏུ་སྡུག་བསྔལ་ཡོངས་བྲལ་ཏེ། །ཆེ་བའི་ཡེ་ཤེས་ལྷུན་གྲུབ་མཆོག་ལྡན་པ། །བདེ་སྤྱོད་བདེ་ལ་རོལ་བ་ཚུལ་བཞིན་མཛོད། །ཅེས་བརྗོད་ནས། ལྷ་མོ་བཅུ་དྲུག་གི་གར་དང་དབྱངས་ཀྱིས་མཆོད་དེ། དེ་ལ་གར་གྱི་ཚུལ་ནི་འདི་ཡིན་ཏེ། ཆུ་སྐྱེས་ཞལ་ནི་འཛུམ་བཅས་པ། །ཡངས་པའི་སྤྱན་གྱིས་གར་མཛད་དེ། །ཕྱག་དང་ཞབས་ནི་བསྒྱུར་བ་ཡིས། །རབ་ཏུ་དགྱེས་ལྡན་སྨིན་མ་སྒྱུར། །ཡིད་ཙམ་འཛུམ་པའི་སྤྱན་ཟུར་གཟིགས། །ཤ་རྒྱས་བརླ་ནི་ནུ་མར་འདུད། །སྐེད་པའི་དབྱིབས་ནི་རྣམ་པར་ཡངས། །སྣམ་གྱི་ངོས་ཀྱང་ཆེ་ལ་མཛེས། །ཆགས་པ་ཅུང་ཟད་ཚེམས་ཀྱིས་གནོན། །ཚེམས་ཀྱི་ཕྲེང་བ་ཀུན་ད་ཟླ། །མི་དྲག་བཟློག་པའི་དབུགས་འབྱིན་ཅིང་། །རབ་ཏུ་དགའ་ཆེ་དགྱེས་པས་བསྟོད། །ཕྱག་གཉིས་གར་དང་བཅས་པ་ཡིས། །མདུན་དུ་ཐལ་མོ་བཞག་པར་བྱ། །སོར་མོ་ཀུན་གྱི་རྩེ་མོ་ལ། །ཕ་རོལ་ཕྱིན་པའི་ཚོགས་རྣམས་བསམ། འདི་ལྟ་བུའི་གར་དང་ལྡན་པའི་ལྷ་མོ་བཅུ་དྲུག་གི་གར་བྱ་ཞིང་། སྔགས་དང་ཕྱག་རྒྱ་ལ་སྦྱར་བར་བྱའོ། །རྡོ་རྗེ་ཐལ་མོ་ལས་རྡོ་རྗེ་བཅིང་བར་བྱ་སྟེ། སྲིན་ལག་གཉིས་བརྐྱང་སྟེ་མདའི་ཚུལ་དུ་བཟུང་བར་བྱའོ། །འདི་ནི་རབ་དགྱེས་གཙོ་བོ་ཡི། །ཕ་རོལ་ཕྱིན་མཆོག་བསྡུད་པ་ཡིན། །སངས་རྒྱས་རྣམས་ཀྱི་མྱོས་བྱེད་པ། །དཔའ་བོ་ཐམས་ཅད་རྨོངས་པར་བྱེད། །ཨོཾ་སུ་ར་ཏ་མ་ནོ་བྷ་བ་ཧྲཱིཿ། །ཕྱག་རྒྱ་འདི་ཡིས་རྒྱས་བཏབ་པས། །གསང་བའི་སྙིང་གི་པདྨོ་ལ། །ཤིན་དུ་དགྱེས་པས་མཉེས་པར་གྱུར། །ཡང་རྡོ་རྗེ་གར་ལས་ཕྱག་རྒྱ་དེ་ཉིད་སྙིང་གར་བཙུགས་ཏེ། རྒྱ་འདིས་ལས་ཀུན་བྱེད་འགྱུར་ཏེ། །བདུད་རྣམས་ཐམས་ཅད་འཇིགས་པར་བྱེད། །རྒྱལ་བ་འདོད་ཆགས་བྲལ་སྤྱད་པའང་། །ཐམས་ཅད་འདི་ཡིས་སློང་བར་བྱེད། །ཨོཾ་སུ་ར་ཏ་བཛྲ་ཀི་ལི་ཀི་ལི་ཧཱུཾ། ཕྱག་རྒྱ་འདི་ཡིས་རྒྱས་བཏབ་སྟེ། །རྡོ་རྗེ་པདྨོ་ཕྱེ་བ་ཡིས། །ནམ་མཁའི་དཀྱིལ་འཁོར་མཐའ་དག་ཏུ། །མཛེས་པའི་སྤྱན་དང་རོལ་ཅིང་འགྲོ། །དེ་ནས་ཐལ་མོ་དེ་ཉིད་བཅིངས་ལ་གྱེན་དུ་བཟུང་སྟེ། མཐེའུ་ཆུང་གཉིས་བསྒྲེང་། མཐེ་བོང་གཉིས་བརྐྱང་ངོ་། །ཕྱག་རྒྱ་འདི་ནི་ཆུ་སྲིན་ཞེས། །རྒྱལ་མཚན་ལྡན་པར་བཤད་པ་ཡིན། །རྡོ་རྗེ་སེམས་དཔའི་སྤྲུལ་པ་སྟེ། །འདོད་ཆགས་བྲལ་བར་བསྒྲུབ་པ་ཡིན། །ཨོཾ་སུ་ར་ཏ་བཛྲ་སྨྲེ་ཧ་ཧྲཱིཿ། །འདི་ནི་ཆགས་པ་ཐམས་ཅད་ལ། །འདོད་ཆགས་བདེ་བྱེད་སྙོམས་པ་འཐོབ། །འདི་ཡིས་འགྲོ་བ་གསུམ་དག་ཏུ། །དངོས་གྲུབ་མྱུར་དུ་འཐོབ་པར་བྱེད། །དེ་ནས་ཐལ་མོ་དེ་ཉིད་མཉམ་དུ་གཟུང་ནས། འགྱིང་ཞིང་འགྱིང་བས་གར་བྱས་ཏེ། ཁུ་ཚུར་གཉིས་དཀུག་ཡོན་དུ་འགྱིང་བས་བརྟན་པར་བྱའོ། །ཕྱག་རྒྱ་འདི་ནི་རྒྱལ་ལ་སོགས། །བདེ་བ་དམ་པས་མཆོད་བྱས་ཏེ། །འགྱིང་བའི་སྦྱོར་བས་གར་བྱས་ན། །དངོས་གྲུབ་ཐམས་ཅད་སྒྲུབ་པར་བྱེད། །ཨོཾ་སུ་ར་ཏ་བཛྲ་གརྦྷེ་ཧཱུཾ། ཕྱག་རྒྱ་འདི་ཡིས་རྒྱས་བཏབ་པས། །སྡིག་པ་སྐད་ཅིག་མེད་པར་འགྱུར། །ཁམས་གསུམ་འདི་ནི་དངོས་གྲུབ་ཆེ། །དཔལ་གྱི་བསྒྱིངས་པ་ཐོབ་པར་འགྱུར། །དེ་ནས་ཕྱག་རྒྱ་དེ་ཉིད་མཉམ་དུ་གཟུང་སྟེ། ལག་པའི་འདབ་མ་གར་དང་བཅས་པས། མྱུར་དུ་སྟེང་དུ་དོར་བར་བྱའོ། །འདི་ནི་སངས་རྒྱས་ཐམས་ཅད་ཀྱི། །རྨད་བྱུང་དམ་པ་མཆོད་བྱས་པ། །སྦྱོར་བ་གར་གྱི་མཆོད་པ་ཡིས། །ཐམས་ཅད་ལས་བྱེད་དངོས་གྲུབ་པོ། །ཨོཾ་སུ་ར་ཏ་བཛྲ་མ་དུ་ག་རེ་གུང་གུང་། འདི་ནི་སངས་རྒྱས་ཐམས་ཅད་ཀྱི། །རབ་དགྱེས་ཐོབ་པ་རྨོངས་བྱེད་མ། །རྡོ་རྗེ་ཡེ་ཤེས་ཐུགས་གནས་པའི། །དངོས་གྲུབ་ཐམས་ཅད་སྒྲུབ་བྱེད་པའོ། །དེ་ནས་ཕྱག་རྒྱ་དེ་ཉིད་འོག་གི་ཕྱོགས་སུ་དོར་ཏེ་སྟེང་དུ་ཅུང་ཟད་བསྒྱུར་བར་བྱའོ། །འདི་ནི་སངས་རྒྱས་ཐམས་ཅད་ཀྱི། །བདེ་མཆོག་ཡིད་ནི་ཚིམ་བྱེད་པ། །འདི་ནི་བཅིངས་པ་ཙམ་གྱིས་ཀྱང་། །བདུད་རྣམས་ཤིན་ཏུ་རིང་བར་འགྱུར། །ཨོཾ་སུ་ར་ཏ་བཛྲ་མེ་བྷེ་ཏམ་ཏམ། འདི་ནི་སངས་རྒྱས་ཐམས་ཅད་ཀྱི། །ཡིད་ཀྱི་དངོས་གྲུབ་ཐོབ་བྱེད་དེ། །འདི་ནི་འདོད་པ་ཐམས་ཅད་རྣམས། །ཡི་གེས་སྐད་ཅིག་སྒྲུབ་པར་བྱེད། །དེ་ནས་ཐལ་མོ་དེ་ཉིད་མཐེ་བོ་བསྒྲེང་སྟེ། ལྷག་མ་ཉི་མ་བཞིན་བྱའོ། །འདི་ནི་སངས་རྒྱས་ཐམས་ཅད་ཀྱི། །ཡེ་ཤེས་མཆོག་ཏུ་སྣང་བྱེད་པ། །ཐོག་མ་མེད་ནས་དྲི་མས་བསྒོས། །འདི་ཡིས་གཏི་མུག་འཕྲོག་བྱེད་དོ། །ཨོཾ་སུ་ར་ཏ་བཛྲ་ཤ་ར་ད་ཨཿཨཿ། འདི་ནི་སངས་རྒྱས་ཐམས་ཅད་ཀྱི། །ཡེ་ཤེས་སྣང་བ་རབ་སྒྲུབ་པ། །ཡི་གེ་ཕྱག་རྒྱ་འདིས་བཏབ་ན། །སངས་རྒྱས་ཡེ་ཤེས་མཆོད་པར་བྱེད། །དེ་ནས་ལག་པ་གཡས་གཡོན་བརྗིད་པའི་གར་བྱ་ཞིང་ཐལ་མོ་མཉམ་པོར་བྱས་ཏེ། གཡོན་གྱི་ཁུར་ཚོས་ནས་སྤྱི་བོར་བཞག་གོ།རྒྱལ་བ་རྣམས་ཀྱི་ཕྱག་རྒྱ་འདི། །མཆོད་པ་ཐམས་ཅད་སྒྲུབ་བྱེད་དེ། །ཐམས་ཅད་དོན་རྣམས་གྲུབ་པས་དགེ།བཀྲ་ཤིས་རྣམ་རྒྱལ་ཐོབ་པར་བྱེད། །ཨོཾ་སུ་ར་ཏ་བཛྲ་ཤེ་ཤྲི་ཧོ་ཧཿ། འདི་ནི་སངས་རྒྱས་ཐམས་ཅད་ཀྱི། །སྣ་ཚོགས་ཆེན་མོ་མདུན་དུ་འགྲོ། །སྣ་ཚོགས་ཆེན་མོ་འདི་ཡིས་ནི། །སྣ་ཚོགས་ཡེ་ཤེས་དངོས་གྲུབ་བོ། །དེ་ནས་རྡོ་རྗེ་ཁུ་ཚུར་མཉམ་པར་བཞག་སྟེ་དཀུའི་ཕྱོགས་སུ་བཞག་གོ། །འདི་ནི་སངས་རྒྱས་ཀུན་གྱི་སྒེག །ཤིན་ཏུ་དགྱེས་པའི་སྒྲུབ་བྱེད་ཡིན། །པདྨོའི་ཚུལ་གྱིས་སྒེག་པ་ཡིས། །རྡོ་རྗེ་ཆེན་པོ་དེ་དངོས་གྲུབ། །ཨོཾ་ཧེ་མ་ཧཱ་སུ་ར་ཏ་བི་ལཱ་པི་ནི་ཏྲ་ཏྲ། འདི་ནི་སངས་རྒྱས་ཐམས་ཅད་ཀྱི། །སྒེག་པར་བྱ་བ་སྤྲུལ་པ་ཡིན། །འདི་དང་མཉམ་པར་སྦྱོར་བ་ཡི། །སྒེག་མོས་ཡེ་ཤེས་བསྐྱེད་པར་བྱེད། །དེ་ནས་རྡོ་རྗེ་ཐལ་མོ་མཉམ་པར་སྦྱར་ཏེ། དགོད་པའི་ཚུལ་དུ་ཀུན་ཏུ་བསྐོར་བར་བྱའོ། །འདི་ནི་སངས་རྒྱས་ཐམས་ཅད་ཀྱི། །བཞད་མོར་ཡོངས་སུ་བསྒྲགས་པ་ཡིན། །རྣལ་འབྱོར་གསང་བའི་དབང་ཕྱུག་ལ། །གསང་བ་ཆེན་པོས་མགུ་བར་བྱེད། །ཨོཾ་ཧེ་མ་ཧཱ་སུ་ར་ཏ་བཛྲ་ཧཱ་སྱ་ཧཿཧཿ། ཡི་གེ་ཕྱག་རྒྱ་འདི་ཡིས་ནི། །ཉིད་ཀྱི་སྙིང་ལ་རྒྱས་བཏབ་ན། །ཕྲེང་བ་རྒྱན་གྱི་རྣམ་པར་བརྒྱན། །དཔལ་ལྡན་དེ་མ་ཐག་ཏུ་འགྱུར། །དེ་ནས་ཐལ་མོ་གཉིས་སུ་བྱས་ཏེ། གཡོན་གྱིས་པི་ཝང་གི་ཚུལ་དུ་བྱས་ལ། གཡས་ཀྱི་མཛུབ་མོའི་རྩེ་མོས་བརྡུང་བ་ལྟར་བྱའོ། །ཇི་སྙེད་ཡིད་འོང་གླུ་དག་ནི། །འཇིག་རྟེན་གྲགས་པའི་བདེ་བ་དག །སྒྲ་ཡིས་བསྐྱེད་པ་རྣམ་སྒྱུར་བ། །དེ་མཐུན་དབྱངས་འདིར་སྒྲུབ་པར་བྱེད། །ཨོཾ་ཧེ་མ་ཧཱ་སུ་ར་ཏ་བཛྲ་གཱི་ཏི་ཏེ་ཏེ། སེམས་ཀྱི་ཕྱག་རྒྱའི་ཡི་གེ་འདི། །འདི་ཡིས་བྱིན་བརླབ་དག་པ་དག །སྦྱོར་བ་འདི་ཡིས་སྦྱར་བ་ཡིས། །འདོད་བྱེད་ཐམས་ཅད་ཐོབ་པར་འགྱུར། །དེ་ནས་ཐལ་མོ་དེ་ཉིད་མཉམ་པར་སྦྱར་ཏེ། རྡོ་རྗེ་གར་གྱི་སྦྱོར་བས་བསྒྱུར་ནས། ཐ་མར་ཐལ་མོ་ཁོང་སྟོང་དུ་སྦྱར་ཏེ་སྤྱི་བོར་བཞག་གོ། །ཇི་སྙེད་གར་གྱི་གཙུག་ལག་ལས། །འགྱུར་བར་བྱེད་པ་བཤད་པ་དང་། །ཇི་སྙེད་དེ་སྙེད་ཕྱག་རྒྱའི་རྣམས། །གཉིས་མེད་འདུས་པས་འདི་དངོས་གྲུབ། །ཨོཾ་ཧེ་མ་ཧཱ་སུ་ར་ཏ་བཛྲ་ནྲྀ་ཏི་སེ་བ་སེ་བ། རྣལ་འབྱོར་འདི་ཡིས་རྒྱས་བཏབ་ན། །བདེ་ལྡན་གར་ནི་བྱེད་ཅིང་སྤྲོ། །འོག་མིན་གྱི་ནི་གནས་ཆེན་དུ། །སངས་རྒྱས་རྣམས་དང་ཐབས་གཅིག་འགྲོགས། །དེ་ནས་ལག་པ་གཉིས་རྡོ་རྗེ་བསྡམས་པ་བྱས་ཏེ། མཛུབ་མོ་ལྕགས་ཀྱུ་ལྟར་བྱ། མཐེ་བོང་གཉིས་དབུས་སུ་བཞག་གོ།འདི་ཡིས་སངས་རྒྱས་ཐམས་ཅད་ཉིད། །ཤིན་ཏུ་རྨད་བྱུང་ཐོབ་པར་འགྱུར། །རྣལ་འབྱོར་ཀུན་གྱི་བདེ་འབྲེལ་པ། །རྡོ་རྗེ་བློ་མཆོག་དངོས་གྲུབ་བོ། །ཨོཾ་སུ་ར་ཏ་བཛྲ་མ་ཧཱ་བི་ཤྭ་རཱུ་པེ་ཛཿཛཿ། ཕྱག་རྒྱ་ཡེ་ཤེས་རྨད་བྱུང་བ། །འདི་ནི་ཐབས་ཀྱིས་མཉམ་བཞག་ན། །ནམ་མཁའི་ཉི་མ་འབུམ་འདྲ་བ། །དེ་ནི་དེ་མ་ཐག་ཏུ་འགྱུར། །དེ་ནས་ཕྱག་རྒྱ་དེ་ཉིད་ལས། མཛུབ་མོའི་རྩེ་མོ་ཞགས་པ་ལྟར་སྦྱར་རོ། །བུད་མེད་པདྨོ་ཨུཏྤལ་དང་། །མ་ལུས་རྒྱལ་བ་རྣམས་དང་རྩེན། །རྡོ་རྗེ་པདྨོར་སྦྱོར་བས་ན། །དགའ་བྱེད་མྱུར་དུ་དངོས་གྲུབ་བོ། །ཨོཾ་སུ་ར་ཏ་བཛྲ་མ་ཧཱ་ཤཔྟ་སུ་ཀེ་ཧཱུཾ་ཧཱུཾ། ཕྱག་རྒྱ་འདི་ནི་བདེ་མཆོག་སྟེ། །བར་ཆད་མེད་པར་ཐོས་པར་འགྱུར། །ཁམས་གསུམ་ངོ་བོ་ཐམས་ཅད་ན། །སྒྲ་ཡི་ཐོས་པ་དངོས་གྲུབ་པོ། །དེ་ནས་ཕྱག་རྒྱ་དེ་ཉིད་ལས་མཛུབ་མོ་དང་མཐེ་བོ་ལུ་གུ་རྒྱུད་ལྟར་སྦྲེལ་བར་བྱའོ། །འདི་ནི་བློ་ལྡན་རབ་དགྱེས་པའི། །རྡོ་རྗེ་དཔེ་མེད་དྲི་དང་ལྡན། །དགའ་བྱེད་ལྷན་ཅིག་རྩེན་བྱས་ན། །དབང་ཕྱུག་དམ་པའི་དངོས་གྲུབ་འགྱུར། །ཨོཾ་སུ་ར་ཏ་བཛྲ་མ་ཧཱ་གནྡྷ་སུ་ཀེ་བཾ་བཾ། འདི་ནི་སངས་རྒྱས་ཐམས་ཅད་ཀྱི། །སྣ་ཚོགས་ཡེ་ཤེས་གྲུབ་འགྱུར་ཏེ། །བདག་ཉིད་རྡོ་རྗེས་བརྒྱན་པ་ཡི། །དེ་ནི་མཚན་ལྡན་ཀུན་དང་རྩེན། །དེ་ནས་བཅིངས་པ་དེ་ཉིད་དམ་པོར་བྱས་ཏེ། མཐེའུ་ཆུང་དང་སྲིན་ལག་གི་མཚམས་སུ་མཐེ་བོང་བཅུག་ལ་བསྐྱོད་དོ། །བཅོམ་ལྡན་རྡོ་རྗེ་སེམས་དཔའ་ཉིད། །དཔལ་ལྡན་དཔེ་མེད་བདེ་བ་དང་། །སྣ་ཚོགས་སྦྱོར་བ་སྣ་ཚོགས་བདག །འདི་ཡིས་རབ་ཏུ་དགྱེས་པར་འགྱུར། །ཨོཾ་སུ་ར་ཏ་བཛྲ་མ་ཧཱ་ར་སེ་ཧོཿཧོཿ། དགྱེས་པ་ཆེན་པོའི་དྲི་མཆོག་གི།རྒྱལ་མཚན་ལྡན་མ་ཞེས་བྱ་བ། །སངས་རྒྱས་ཀུན་གྱི་རོལ་པ་ཡིས། །མཆོད་པ་མི་ཟད་བྱེད་པར་འགྱུར། །དེ་ལྟར་ལྷ་མོ་རྣམས་ཀྱི་གར་གྱིས་མཆོད་ནས། ཡང་ལྷ་མོ་རྣམས་ཀྱི་དབྱངས་འདི་ལེན་ཞིང་། སྦྱོར་བ་ཆེན་པོ་ལ་བསྐུལ་བར་བྱའོ། །དགྱེས་རབ་གདོན་མི་ཟ་ལ་བཞུགས། །དགྱེས་མཆོག་དགྱེས་མཛོད་སེམས་དཔའ་ཆེ། །སངས་རྒྱས་ཐམས་ཅད་མཉམ་སྦྱོར་བ། །ཟླ་གསང་ཐིག་ལེར་ལྡན་པའོ། །བདག་ཅག་ཀུན་ཀྱང་ཐ་ཚིག་ཅན། །དད་རབ་དགྱེས་རབ་སྐྱོན་མེད་པའོ། །སེམས་དཔའ་ཆེན་པོ་དགྱེས་པར་མཛོད། །རྣལ་འབྱོར་མ་ཡི་དཀྱིལ་འཁོར་དུ། །དགྱེས་རབ་ལོངས་སྤྱོད་བསྟེན་པར་མཛོད། །ཅེས་དབྱངས་ཀྱིས་བསྐུལ་བས། བདེ་བ་སྐྱེད་པར་བྱ་སྟེ། ཨོཾ་སུ་ར་ཏ་བཛྲ་ཝཱ་ཀ་སུ་ཁེ་ཧཱུཾ། ཞེས་པས་བདེ་བ་དེ་བརྟན་པར་བྱའོ། །དེ་ནས་ལྷ་མོ་རྣམས་ལ་རྡོ་རྗེ་བལྟ་བས་བལྟས་ཏེ་བདེ་བ་སྐྱེས་པར་བྱས་ལ། ཨོཾ་སུ་ར་ཏ་བཛྲ་དྲྀཥྚི་སུ་ཁེ་ཧྲཱིཿ། ཞེས་བྱ་བས་བདེ་བ་བརྟན་པར་བྱའོ། །དེ་ནས་རྡོ་རྗེ་སེམས་དཔའི་ཏིང་འཛིན་གྱིས། བདེ་བར་རེག་པའི་སྦྱོར་བས་སྤྱད་པར་བྱ་སྟེ། ཨོཾ་སུ་ར་ཏ་བཛྲ་ཀཱ་ཡསུ་ཁེ་ཧཱུཾ། ཞེས་བྱ་བས་བརྟན་པར་བྱའོ། །དེ་ནས་སངས་རྒྱས་ཐམས་ཅད་དང་གཉིས་སུ་མེད་པའི་བདེ་བ་ལ་མཚུངས་པར་གནས་ཏེ། ཨོཾ་མ་ཧཱ་སུ་ཁ་ཧཱུཾ། ཞེས་བརྗོད་པས་མི་རྟོག་པའི་བདེ་བ་ཆེན་པོ་ལ་གནས་པར་བྱའོ། །དེ་ནས། ཕཊ་ཅེས་བརྗོད་པས། སངས་རྒྱས་རྣམས་ཀྱི་གཟུགས་ཕྱུང་སྟེ། དཀྱིལ་འཁོར་ཐམས་ཅད་ལ་ཡང་མཆོད་དེ། གསང་སྔགས་འདིས་བདག་ཉིད་བླང་བར་ཡང་བྱའོ། །ཨོཾ་སུ་ར་ཏ་བཛྲ་ཨ་མྀ་ཏ་ད་ད་ཧཱུཾ་ཨཿ། འདི་ནི་ལྷ་མོ་བཅུ་དྲུག་གི་མཆོད་པ། སྐུ་གསུང་ཐུགས་ཀྱི་གསང་བ་དང་ལྡན་པའོ། །དེ་ནས་ཚོགས་ལ་རོལ་བར་བྱ་བའི་ཕྱིར། གླུ་འདིས་ཞལ་ཟས་ཀྱི་ལོངས་སྤྱོད་རོལ་བར་བསྐུལ་ལོ། །བདེ་བ་མཆོག་གི་རྒྱ་ཆེན་དགོངས་སུ་གསོལ། །བསམ་གྱིས་མི་ཁྱབ་བདེ་མཆོག་དབྱིངས་དང་ལྡན། །མི་གཡོ་གསུང་དང་བྲལ་བའི་དབྱངས་སྙན་པ། །གཟུངས་ལ་རོལ་ཅིང་བདེ་ལ་བཞེས་སུ་གསོལ། །ངོ་མཚར་ཆེན་པོའི་ཆོ་འཕྲུལ་སྣང་མཛད་པ། །འགྲོ་རྣམས་བྱང་ཆུབ་མཆོག་ཏུ་ལུང་སྟོན་ཏེ། །རྒྱུད་རྣམས་ཡང་དག་གང་ལའང་མི་གནས་པ། །བདེ་བ་མཆོག་གི་གཟུངས་ཀྱིས་རོལ་པར་མཛོད། །ཀྱེ་སེམས་ཅན་ཀུན་ལ་ཕན་པར་དགྱེས་པ་དེ་དག་ལ་ནི་བདག་བསྐུལ་བ། །སེམས་ཅན་ཀུན་གྱི་དོན་མཆོག་དམ་ཚིག་བཞིན་དུ་འདིར་སྩོལ་ཅིག །དེ་ནས་ཕྱོགས་ཀྱི་མཆེ་བའི་ཕྱག་རྒྱས་མཆོད་པ་ལ་གཏུགས། ཨོཾ་ཨེ་ས་༼ཚུར་སྤྱོན། ༽ཧཱུཾ། བེ་ས་༼འདིར་བཞུགས། ༽ཧཱུཾ། ས་མ་ཡ་བྷ་ཀྵ་༼དམ་ཚིག་གི་མཆོད་སྟོན་གསོལ། ༽ཧཱུཾ། རུ་ལུ་རུ་ལུ་ཧཱུཾ་བྷྱོ་༼སུ་ལ་གསོལ་ན། དཔལ་ཆེན་པོ་འཁོར་དང་བཅས་པ་ལ། ༽ཧཱུཾ། ཛཿཧཱུཾ་བཾ་ཧོཿ༼སྤྱན་དྲངས། ༽ཨོཾ་པྲ་ཏཱིཙྪ་ཧོཿ། ༼ལས་གྲུབ་པར་མཛོད། ༽ཞེས་ལན་གསུམ་བརྗོད་ནས་བཤགས་པ་བགྱི་སྟེ། ༼གར་གྱི་སྨོན་ལམ། ༽ཧོཿབསམ་གྱིས་མི་ཁྱབ་པའི་སངས་རྒྱས་ཀྱི་ཞིང་ཁམས་ན། གང་དག་སྐུ་གསུང་ཐུགས་རྡོ་རྗེའི་བདག་པོ། རྣལ་འབྱོར་དབང་ཕྱུག་ཆེན་པོའི་གྲལ་ཐོབ་པ། ཡེ་ཤེས་བླ་མའི་ས་ནོན་པ། བཅོམ་ལྡན་འདས་རིགས་ལྔ་ཐབས་ཀྱི་ཡབ་དང་ཤེས་རབ་ཀྱི་ཡུམ་དང་། སེམས་དཔའ་དང་སེམས་མ། མཆོད་པའི་ལྷ་མོ་དང་། ཁྲོ་བོ་དང་ཁྲོ་མོ་དང་། ཕོ་ཉ་དང་མངག་གཞུག་དང་། བྲན་ཕོ་དང་བྲན་མོ་དང་། དཔལ་རྡོ་རྗེ་གནོད་སྦྱིན་བཛྲ་ཀིཾ་ཀ་ར་ལ་སོགས་ཏེ། འགྲོ་བ་མཐའ་དག་གི་དོན་ལ་རྩེ་གཅིག་ཏུ་མཛད་པ། འབར་བའི་ཀློང་ཆེན་པོ་ཡེ་ཤེས་ཀྱི་དཀྱིལ་འཁོར་ལ་རྟག་ཏུ་མཉམ་པར་བཞུགས་པའི་འཕགས་པ། འཁོར་རྒྱ་མཚོ་དང་བཅས་པ་ཐམས་ཅད་དགོངས་སུ་གསོལ། ཡོན་བདག་ལ་སོགས་པས་རྣལ་འབྱོར་གྱི་མཆོད་པ་གཞུང་བཞིན་དུ་སྦྱར་ཏེ། ཆོས་ཀྱི་དབྱིངས་ཀྱི་མུར་ཐུག་པ་ཕོ་བྲང་གི་དཀྱིལ་འཁོར་དུ་ཀུན་ཏུ་བཟང་པོའི་མཆོད་པའི་སྤྲིན་ཕུང་དུ་བསྟབས་ཏེ་འབུལ་ཞིང་མཆིས་ན། གཉིས་སུ་མེད་པའི་བྱིན་གྱིས་བརླབས་དང་། ཐུགས་རྗེ་ཆེན་པོས་དགོངས་ཏེ་བཞེས་སུ་གསོལ་ལོ། །འདིས་སྐུ་གསུང་ཐུགས་ཀྱི་རྒྱུད་མཉེས་ཤིང་ཚིམ་པར་གྱུར་ཅིག །དེ་ལྟར་མཆོད་ཡོན་དམ་པར་བསྔོས་ཤིང་བསྟབས་པས། མཉེས་པའི་བྱིན་བརླབས་ཀྱིས་མཐའ་ཡས་པའི་སེམས་ཅན་ཐམས་ཅད་རྣལ་འབྱོར་མཆོག་གི་སྐལ་བ་དང་ལྡན་པར་གྱུར་ཅིག ། ཕྱོགས་བཅུ་ན་མཆེད་ལྕམ་དྲལ་བཞུགས་སོ་འཚལ་གྱི་དམ་ཚིག་ཉམས་པ་ཐམས་ཅད་དིང་ནུབ་བསྐོངས་ཏེ་ཆོ་ག་བཞིན་དུ་ཡོངས་སུ་རྫོགས་པར་གྱུར་ཅིག །ཡོན་བདག་ཆེ་གེ་མོ་དང་བདག་ཅག་ཚོགས་ཀྱི་དཀྱིལ་འཁོར་འདིར་འདུས་པ་རྣམས་ཀྱིས་དང་པོར་གསང་བའི་ཐེག་པ་འདིའི་སྒོར་ཁས་འཆེས་ཏེ། དམ་ཚིག་གཉན་པོ་མནོས་པ་ལས་གཞུང་བཞིན་བསྒྲུབ་པར་རྔོ་མ་ཐོགས་ཏེ། ཏིང་ངེ་འཛིན་ལེ་ལོར་གྱུར་པ། སྔགས་དང་ཕྱག་རྒྱ་རྒྱུན་བཅད་པ། གསང་བའི་མན་ངག་གཞན་ལ་སྤེལ་བ། རྡོ་རྗེ་སློབ་དཔོན་དང་། མཆེད་ལྕམ་དྲལ་ལ་གདུང་སེམས་རྒྱུན་ཆད་པ། མི་སྨད་པ་སྨད་པ། མི་སྤང་པ་སྤངས་པ། དམ་ཚིག་ངོ་མ་འཚལ་བ། དམ་ཚིག་ཁྱད་དུ་བསད་པ་ལ་སོགས་པ་ནོངས་འཁྲུལ་ཆག་ཉམས་ཅི་མཆིས་པ་ཐམས་ཅད་རབ་ཏུ་གནོང་བའི་སེམས་ཀྱིས་མཐོལ་བཤགས་ཤིང་མཆིས་ན། ཐུགས་རྗེ་ཆེན་པོས་བཟོད་པར་བཞེས་ཏེ། ཚངས་པ་ཡིད་བཞིན་དུ་སྩལ་དུ་གསོལ་ལོ། །བདག་ཅག་གིས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་གདུང་བསབ་པ་དང་། འགྲོ་བ་མཐའ་དག་གི་དོན་བགྱི་བའི་སླད་དུ། ཆོས་ཆེན་པོ་རྣལ་འབྱོར་གྱི་ཐེག་པ་འདི་བསྒྲུབ་པར་དམ་བཅས་པ་ལ། མི་དང་མི་མ་ཡིན་པའི་དགྲ་དང་ནད་བགེགས་ལ་སོགས་པ་བར་ཆད་ཅི་ཡང་མི་འབྱུང་ཞིང་། བསམ་པ་ཐམས་ཅད་ཡིད་བཞིན་དུ་གྲུབ་པར་མཛད་དུ་གསོལ་ལོ། །འཇིག་རྟེན་འདིར་ཆོས་ཆེན་པོ་རྣལ་འབྱོར་གྱི་ཐེག་པ་འདི་ཡང་དར་ཞིང་རྒྱས་པ་དང་། བརྟན་ཞིང་མི་འགྱུར་བར་ཡུན་རིང་དུ་གནས་པ་དང་། རྒྱལ་མཚན་གྱི་རྩེ་མོ་ལྟར་ནུབ་པའི་དུས་མེད་པ་དང་། རྡོ་རྗེ་སྙིང་པོ་ལྟར་འཇིག་པའི་དུས་མེད་པར་སྨོན་ཏོ། །དེ་ནས་སློབ་དཔོན་གྱིས་ཚོགས་ལ་རོལ་པར་དབང་བསྐུར་ལ། ཡོན་བདག་གང་ཡིན་པས་ཞལ་ཟས་དམ་པའི་ཕུད་རྣམས་ལས། དང་པོར་རྡོ་རྗེ་སློབ་དཔོན་ལ་གུས་པར་བསྟབས། དེ་ནས་གཞན་ལ་ཡང་རིམ་བཞིན་བསྟབས་ཏེ་ཅི་བདེར་ལོངས་སྤྱད་ཅེས་ཐབས་མཆོག་ལས་འབྱུང་། ཚོགས་ཆེ་ཆུང་གི་ཡི་གེ་ལས་ནི། དང་པོ་ཕུད་ལས་བདེ་བར་གཤེགས་པ་མཆོད་ཅིང་། བཤགས་པ་དང་བསྟབས་པ་དག་ཀྱང་བྱའོ། །ཞེས་འབྱུང་ན། རང་གི་བློ་དང་ཇི་ལྟར་འཚམ་པ་བཞིན་བྱའོ། །ཡོང་ནི་ཚོགས་ཀྱི་མཆོད་པའི་སྐབས་འདིར། ཕྱོགས་བཅུའི་སངས་རྒྱས་ཐམས་ཅད་དང་། དེའི་འཁོར་ན་གནས་པའི་ཕྱི་ནང་གི་རྣལ་འབྱོར་ཐམས་ཅད་དང་། འདུས་པའི་རྣལ་འབྱོར་པ་ཐམས་ཅད་དབྱེར་མེད་པར་ལོངས་སྤྱོད་ཆེན་པོའི་ཚོགས་ལ་མཉམ་པ་ཉིད་ཀྱི་མཛད་སྤྱོད་དུ་རོལ་པ་ཡིན་ལ། ལྷ་དང་སློབ་དཔོན་ཡང་གཞུང་ཁ་ཅིག་ལས་སློབ་དཔོན་གཉན་པར་བཀུར་བ་འབྱུང་། ཁ་ཅིག་ལས་ལྷ་གཉན་པར་བཀུར་བ་འབྱུང་། རྣལ་འབྱོར་པའི་དགོངས་པའང་། ཁ་ཅིག་ལས་བདག་ཉིད་མ་ནོར་པའི་དབང་ཕྱུག་ཏུ་བལྟས་ཏེ། སྔོན་ལ་བདག་ཉིད་རོལ་བར་འབྱུང་། ཁ་ཅིག་ལས་སྔོན་ལ་ལྷ་མཆོད་པར་འབྱུང་སྟེ། གང་ལྟར་ཡང་འགལ་བ་མེད་པས་ཇི་ལྟར་རང་གིས་དམ་ཚིག་མནོས་པ་བཞིན་དུ་བྱའོ། །དེ་ལ་རེ་ཤིག་བདག་ཉིད་རོལ་པར་འདོད་ན་ནི། རྣལ་འབྱོར་པ་རྣམས་ཀྱིས་ལྷ་དང་ལྷ་མོའི་ཏིང་ངེ་འཛིན་གསལ་བར་བགྱིས་ཏེ། སངས་རྒྱས་ཐམས་ཅད་དང་མི་གཉིས་པའི་ཏིང་ངེ་འཛིན་གྱིས་རྣལ་འབྱོར་ཕ་དང་རྣལ་འབྱོར་མ་རྣམས་གཅིག་ལ་གཅིག་གསོལ་ཞིང་བསྟབས་པས་འཕགས་པ་ཐམས་ཅད་མཉེས་པར་བསམ་ཞིང་། དེའི་བྱིན་གྱིས་བརླབས་ཀྱིས་ཕྱི་ནང་གི་རྣལ་འབྱོར་རྣམས་དང་ཁམས་གསུམ་གྱིས་སེམས་ཅན་ཡང་ཚིམ་པར་བསམ་ཞིང་ཚོགས་ལ་རོལ་བར་བྱའོ། །གལ་ཏེ་སྔོན་ལ་ལྷ་མཆོད་ཅིང་གུད་དུ་མཆོད་པར་འདོད་ན་ནི་དམ་རྫས་སྣ་ཚོགས་ལས་སྦྱར་བའི་གཏོར་མ་ཡང་བཤམས་ཏེ། མེ་ཏོག་ལ་སོགས་པའི་ཉེ་བའི་མཆོད་པ་རྣམ་པ་ལྔ་དང་བཅས་པས། ཚོགས་ཆེན་པོ་ཕུད་༼ཞི་བའི་དཀྱིལ་འཁོར་ཆེན་པོ་ལ་ནི། གོང་དུ་བླ་མེད་མཆོག་གི་མཆོད་པ་དམ་པར་སྦྱར་བ་འདི། །ཞེས་པས་ཅི་རིགས་སུ་མཆོད། ཁྲོ་བོ་ལ། སྒེག་པ་དཔའ་བ་འཇིགས་སུ་རུང་བ་དང་། །ཞེས་མཆོད། ༽དང་བཅས་ཏེ། བདེ་བར་གཤེགས་པ་ཞི་ཁྲོའི་དཀྱིལ་འཁོར་ཐམས་ཅད་དང་ཕྱོགས་བཅུའི་རྣལ་འབྱོར་ཕ་དང་རྣལ་འབྱོར་མ་དང་། རྡོ་རྗེ་ནམ་མཁའ་ལ་འགྲོ་བ་དང་། ནམ་མཁའ་ལ་འགྲོ་མ་ཐམས་ཅད་ལ་མཆོད་པ་དང་དམ་ཚིག་གི་བཤགས་པ་བྱ་བ་༼ཡིད་ལ་ཇི་ལྟར་འཚམས་པ། ༽དང་། གདུག་པ་༼ཇི་ལྟར་འཚམས་པའི། ༽འདུལ་བ་ལ་སོགས་པ་ཕྲིན་ལས་བཅོལ་བ་བྱ་སྟེ། དེ་ནས་གདོད་ཚོགས་ལ་རོལ་བར་བྱའོ། །དེ་ལ་མཆོད་པ་ཡང་ཞི་བའི་དཀྱིལ་འཁོར་ལ་ནི། གོང་དུ་སྤྱིའི་མཆོད་པར་སྨོས་པའི། བླ་མེད་མཆོག་གི་མཆོད་པ་དམ་པར་སྦྱར་བ་འདི། །ཞེས་བྱ་བ་ལ་སོགས་པ་ཅི་རིགས་ཀྱིས་མཆོད་པར་བྱའོ། །ཁྲོ་བོའི་དཀྱིལ་འཁོར་ལ་མཆོད་པ། སྒེག་པ་དཔའ་བ་འཇིགས་སུ་རུང་བ་དང་། །རྒོད་དང་གཤེ་དང་འཇིག་པར་བྱེད་པ་དང་། །སྙིང་རྗེ་ངམ་དང་ཞི་བ་ལ་སོགས་པ། སྐུའི་དངོས་པོ་ཤིན་ཏུ་བསྒྱུར་བ་ཡིས། །གར་བྱ་གྲུབ་པོ་རྣལ་འབྱོར་པ། །གར་གྱི་དབང་ཕྱུག་གཙོ་བོ་ཆེ། །ཟླ་བ་ལ་སོགས་སྙིང་པོ་ཅན། །མཱཾ་ས་ལ་སོགས་རོ་མཆོག་གསོལ། །མེ་ཏོག་ལ་སོགས་ཙནྡན་ཕྲེང་། །བཟང་དགུ་འབུལ་ལོ་བཞེས་སུ་གསོལ། མི་མོ་རྣམས་ཀྱི་རེག་བྱ་མཆོག །བྱིན་གྱིས་རློབ་ཤིག་རྣལ་འབྱོར་པ། བསྒྲུབ་པའི་རྫས་འདི་ཐམས་ཅད་ལ། །ཧཱུཾ་དང་ཕཊ་ཀྱིས་ལྡན་པར་མཛོད། །ནང་གི་མཆོད་པ་དབུལ་བ། བདུད་རྩི་ལ་སོགས་དམར་ཆེན་སྙིང་པོ་ལྔ། །མཱཾ་ས་ལ་སོགས་ཚེ་འཕེལ་དཔའ་བོའི་མཆོག །མ་ཙ་མེ་ཙ་རཀྟ་རུཀྟི་ར། །ཉེ་བར་སྒྲུབ་པའི་མ་ལུས་སྒྲུབ་རྫས་རྣམས། །དྲི་མེད་གཟི་ལྡན་མཆོག་གི་མཆོད་པ་དམ་པར་སྦྱར་བ་འདི། །ཡེ་ཤེས་རྒྱ་མཚོ་ཐམས་ཅད་དགྱེས་ཤིང་རོལ་དུ་གསོལ། །ཞེས་པ་དང་། གཟིགས་པ་རྣམ་པ་སྣ་ཚོགས་འགྱུར་བའི་རྒྱས་ཐོབ་ལ། །རྣམ་པ་སྣ་ཚོགས་འོ་བྱེད་འཁྱུད་པས་རྨོངས་མཛད་དེ། །རྣམ་པ་སྣ་ཚོགས་བདེ་བའི་མཆོད་སྟོན་ཀུན་གསོལ་ལ། །རྣམ་པ་སྣ་ཚོགས་བདེ་མཆོག་ངོ་མཚར་བསྟན་དུ་གསོལ། །རྒྱས་བཏབ་རྨོངས་བྱས་མནབས་སུ་གསོལ། །བདེ་མཆོག་ངོ་མཚར་བདེ་བས་བཞུགས། །ཧཱུཾ་ཨ་ལ་ལ་ཧོཿ། སྣང་བར་མཛོད། རྣལ་འབྱོར་བདེ་མཆོག་སྒྱུར་མས་སྤྲུལ། །དམ་ཚིག་དག་ལ་འཇུག་ཏུ་གསོལ། །ཉོན་མོངས་ཀུན་ལས་རྒྱལ་བར་མཛོད། །མ་ལུས་པ་དག་མནབས་སུ་གསོལ། །ཉོན་མོངས་ཐམས་ཅད་བསལ་བར་མཛོད། །དེ་ནས་བཤགས་པ་དང་ཕྲིན་ལས་བཅོལ་བ་དག་ཀྱང་ཇི་ལྟར་འཚམ་པ་བཞིན་བགྱི། དེ་ནས་ཚོགས་ལ་རོལ་ཏེ། རྗེས་ཆད་པ་དང་ཀིཾ་རྣམས་བོས་ཏེ་སྩལ། དེ་ནས་ལྷག་མའི་མཆོད་པ་བྱ་སྟེ། མཆོད་པའི་ལྷག་མ་རྣམས་དང་མེ་ཏོག་སྙིང་པོ་ལ་སོགས་པའི་ཕྱག་དར་རྣམས་གཅིག་ཏུ་བསྡུས་ཏེ། ༼ཚོགས་ཀྱི་དཀྱིལ་དུ་བཞག་ལ། ཕྱི་ནང་གི་རྣལ་འབྱོར་གྱི་འཁོར་ན་ལྷག་མ་དང་ཕྱག་དར་དང་ཁ་ཆུ་དང་དྲི་མ་ལ་དབང་ཞིང་དགའ་བ་ཡོད་པས། ༽དེ་དག་བྱིན་གྱིས་བརླབས་ཤིང་མཆོད་པ་དང་། གཞན་ཡང་མེ་ཏོག་དང་དྲི་དང་བདུག་པ་དང་གླུ་གར་དང་རོལ་མོ་རྣམས་ཀྱིས་ཀྱང་སྔ་མ་བཞིན་དུ་རྒྱ་ཆེར་མཆོད་པ་དང་། བཤགས་པ་དང་ཕྲིན་ལས་བཅོལ་བ་དག་ཀྱང་བགྱི། གཞུང་ཁ་ཅིག་ལས་སྔོན་ལ་ཕུད་སྤགས་ཏེ་ཕྱིས་ལྷག་མ་དང་བསྲེ་ཞེས་ཀྱང་བཤད། ཁ་ཅིག་ལས། གང་ལྟར་བྱས་ཀྱང་ཉེས་པ་མེད་དོ། །ཞེས་ཀྱང་བཤད་དོ། །དེ་ལ་ལྷག་མ་བྱིན་གྱིས་བརླབ་པ་ནི། རྣལ་འབྱོར་གྱི་འཁོར་ཁ་ཅིག་ལྷག་མ་ལ་དགའ་བར་མ་ཟད་ཀྱི། ཁ་ཆུ་ལ་དགའ་བ་ཡང་ཡོད་ལ། ཁ་ཅིག་དྲི་མ་ལ་དགའ་བ་ཡང་ཡོད་པས་ལྷག་མའི་ཕྱོགས་གཅིག་གུད་དུ་བྱས་ལ། དཔལ་ཆེན་པོའི་ཏིང་ངེ་འཛིན་དུ་ཞུགས་ཏེ། དཔལ་ཆེན་པོའི་དམ་ཚིག་གི་ཕྱག་རྒྱ་བཅས་ལ། ཁ་ཆུ་དམ་ཚིག་ཡེ་ཤེས་ཀྱི་འོད་ཟེར་དུ་དམིགས་ལ་གདབ། དེ་ནས་ལྷག་མའི་གཏོར་མ་ལ་ལག་པ་གཡོན་པས་རེག་༼གུ་ཡ་ལག་གི་ཕྱག་རྒྱས། ༽སྟེ། སྔགས་འདི་ལན་གསུམ་གདབ་བོ། རྟ་མགྲིན་གྱི་ཕྱག་རྒྱ་བཅིངས་༼གཡོན་པའི་སྲིན་མཐེབ་སྦྱར་ཏེ། གཏོར་མ་ལ་རེག་སྟེ། ༽ཏེ། ལྕེའི་རྩེ་མོར་ཧཱུཾ་དམར་པོ་བསྒོམ་ནས། གསང་སྔགས་འདིས་བདུད་རྩིར་བྱིན་གྱིས་བརླབ་པར་བྱའོ། །ཨོཾ་བཛྲ་ཨ་མྲྀ་ཏ་ཨ་ངྷི་ཏིཥྛ་མུཾ་ཧཱུཾ་ཧྲཱིཿཋ། དེ་ནས་མཐེ་བོང་དང་སྲིན་ལག་གི་བར་དུ་ཉི་མའི་དཀྱིལ་འཁོར་ལ་ཧྲཱིཿདམར་པོ་བསམས་ཏེ། ལྷག་མའི་གཏོར་མ་དེ་ཉིད་ལས་ལན་གསུམ་བླངས་ཏེ་བཟའ་བར་བྱའོ། །དེ་ནི་དམ་ཚིག་བླང་བའོ། །དེ་ནས་ཕྱི་ནང་གི་མཁའ་འགྲོ་མ་སྤྱན་དྲང་བར་བྱ་སྟེ། ཧེ་རུ་ཀའི་དམ་ཚིག་གི་ཕྱག་རྒྱ་དཔྲལ་བར་བཅིངས་ནས་སྤྱུགས་པ་བརྗོད་དེ། །ཨོཾ་ཨེ་ས་ཧུཔཻ་སཧུ་ས་མ་ཡ་བྷཀྵ་ཧཱུཾ། རུ་ལུ་རུ་ལུ་ཧཱུཾ་བྷྱོ་ཧཱུཾ་བྷྱོ། ཞེས་བརྗོད་དེ་སྤྱུགས་པ་དྲག་པོ་བླང་། ལྷག་མ་ལ་དབང་བ་རྣམས་འདིར་གཤེགས་ཤེས་བརྗོད་ཅིང་ཚིག་འདི་ཡང་བརྗོད་དེ། ཨ་ར་ལི་ཡི་རིགས་ནི་མཐིང་ཀ་འབར་བའི་མདོག །༼ཚོགས་ཀྱང་།༽ཞལ་བཟང་མཆེ་བ་གཙིགས་པས་དྲག་པོར་བཞད་པར་མཛོད། །རྣལ་འབྱོར་མ་ཡི་དཀྱིལ་འཁོར་མཆོག་སྦྱིན་གསོལ་མཛད་པའི། །དིང་ཉིད་གནས་མཆོག་འདིར་ནི་འཁོར་དང་བཅས་ཏེ་གཤེགས། །ཤེས་བརྗོད་དེ་ཀུན་ཏུ་བཟང་པོའི་མཆོད་སྤྲིན་རྒྱ་ཆེ་བར་བྱིན་གྱིས་བརླབས་ཏེ། མེ་ཏོག་ལ་སོགས་པ་མཆོད་པ་སྣ་ཚོགས་ཀྱི་གར་དང་། དབྱངས་དང་རོལ་མོ་མཛེས་པ་རྣམས་ཀྱིས་སྔ་མ་བཞིན་དུ་རྒྱ་ཆེར་མཆོད་པར་བགྱིའོ། །དེ་ནས་ཕྱི་ནང་གི་མཁའ་འགྲོ་མ་རྣམས་ལས་ལ་གཞུག་ཅིང་དངོས་གྲུབ་ཐམས་ཅད་དབང་དུ་བྱ་བའི་ཕྱིར། དཔལ་ཧེ་རུ་ཀའི་སྔགས་དང་༼ཐམས་ཅད་འགུགས་པའི། ༽ཕྱག་རྒྱ་དང་། དེ་བཞིན་དུ་ཌ་ཀྐི་རྒྱལ་པོ་༼ལས་དང་དངོས་གྲུབ་ལ་སྦྱོར་བའི། ༽དང་། རྟ་༼དངོས་གྲུབ་ཆེན་པོ་ཐམས་ཅད་ལྷུན་གྱིས་གྲུབ་པའི། ༽མགྲིན་རྣམས་ཀྱིས་སྦྱར་བར་བྱ་སྟེ། དེ་ལ་དང་པོར་རྡོ་རྗེ་ཐལ་མོ་ཇི་ལྟ་བ་བཞིན་དུ་བཅིངས་ཏེ། མཛུབ་མོ་གཉིས་ལྕགས་ཀྱུ་ལྟར་བྱས་པ་གཅིག་ལ་གཅིག་མཁྱུད། མཐེ་བོ་གཉིས་ཕན་ཚུན་རྩེ་སྦྱར། གུང་མོ་གཉིས་ཀྱང་རབ་ཏུ་སྦྱར་ཏེ། ལྷག་མ་རྣམས་བརྐྱང་སྟེ་འོད་ཟེར་ལྟར་བཏང་བ་འདི་ནི་དཔལ་ཧེ་རུ་ཀའི་ཕྱག་རྒྱ་སྟེ། བཅིངས་པ་ཙམ་གྱིས་འགུགས་ཤིང་འཛུད་པར་བྱེད་པའོ། །ཕྱག་རྒྱ་འདི་ནི་གཟི་བརྗིད་ཆེ། །ལྷ་དང་ལྷ་མིན་ཕྱག་བྱས་པ། །སངས་རྒྱས་རྡོ་རྗེ་འཛིན་ལ་སོགས། །བསྔགས་ཤིང་མཆོད་པ་བྱས་པ་ཡིན། །བཅིངས་པ་ཉིད་ཀྱིས་འབེབས་པ་དང་། །ཐམས་ཅད་ཚོགས་ནི་འཛུད་པར་བྱེད། །ཨོཾ་ཤྲཱི་ཧེ་རུ་ཀ་མ་ཧཱ་བཛྲ། ཨཱ་ག་ཙྪཱ་ཡ་ཨཱ་ག་ཙྪཱ་ཡ། པྲ་བེ་ཤ་ཡ་པྲ་བེ་ཤ་ཡ། བནྡྷ་ཡ་བནྡྷ་ཡ། ཏོ་ཥ་ཡ་ཏོ་ཥ་ཡ། སརྦ་བཛྲ་ཌཱ་ཀི་ནཱི་ནཱཾ་ཧྲི་ད་ཡ་ཧཱུཾ་ཧཱུཾ་ཕཊ། དཔལ་ཧེ་རུ་ཀའི་སྔགས་དང་ཕྱག་རྒྱ་སྟེ། ཐམས་ཅད་དགུགས་ཤིང་ལས་དང་དངོས་གྲུབ་སྣ་ཚོགས་ལ་འཛུད་པར་བྱེད་དོ། །དེ་ནས་རྡོ་རྗེ་བཅིངས་པ་གཉིས་སུ་བྱས་ཏེ་རྒྱབ་སྦྱར། མཐེའུ་ཆུང་གཉིས་བརྐྱང་སྟེ་ཕན་ཚུན་བསྣོལ། མཛུབ་མོ་གཉིས་བསྒྲེང་སྟེ་སྙིང་གར་བརྟེན་ནས་བརྐྱང་བསྐུམ་གྱི་ཚུལ་དུ་གནས་པ་འདི་ནི། ལས་ཐམས་ཅད་བྱེད་པའོ། །འདི་ཡིས་ཐམས་ཅད་ལས་ཀྱི་རྣམས། །ཇི་ཙམ་ཡིད་འདོད་བྱེད་པར་འགྱུར། །ཚེ་འདིར་སྡིག་པ་གང་བྱས་པ། །འདི་ཡིས་ཐམས་ཅད་འཕྲོག་པར་བྱེད། །དེ་དག་ཐམས་ཅད་མྱུར་འགྱུར་ཏེ། །དངོས་གྲུབ་ཡིད་བཞིན་རིན་ཆེན་འབྱུང་། །ཨོཾ་ཌཱ་ཀི་ཨཱ་ཀརྵ་ཡ་ཨཱཀརྵ་ཡ། པྲ་བེ་ཤ་ཡ་པྲ་བེ་ཤ་ཡ། བནྡྷ་ཡ་བནྡྷ་ཡ། ཏོ་ཥ་ཡ་ཏོ་ཥ་ཡ། མོ་ཧ་ཡ་མོ་ཧ་ཡ། སརྦ་བཛྲ་ཌཱ་ཀི་ནཱི་ནཾ། ཧྲི་ད་ཡ་ན། ཧཱུཾ་བཛྲ་ཛཿཧཱུཾ་བཾ་ཧོཿ། ཌཀྐི་ཧཱུཾ་ཛཿ། ཌ་ཀྐི་རྒྱལ་པོའི་སྔགས་དང་ཕྱག་རྒྱ་སྟེ། ལས་དང་དངོས་གྲུབ་རྣམས་ལ་སྦྱོར་བར་འགྱུར་རོ། །དེ་ནས་དངོས་གྲུབ་ཆེན་པོ་ལ་སྦྱར་བའི་ཕྱིར། ཐལ་མོ་མཉམ་པར་སྦྱར་ཏེ། མཐེ་བོང་གཉིས་དབུས་སུ་སྦྱར། ལྷག་མ་འདབ་མ་ཁ་ཕྱེ་བ་ལྟར་བྱས་པ་ནི་པདྨའི་སྟན་ནོ། །དེ་ལས་མཐེ་བོང་གཉིས་རྩེ་མོ་ཐུར་དུ་བཏུད་པ་ནི་རྟ་གདོང་གིའོ། །གང་གིས་སྦྱར་བྱས་སྐད་ཅིག་ཏུ། །དེ་ཡི་དངོས་གྲུབ་ཆེན་པོར་འགྱུར། །བཅིངས་མ་ཐག་ཏུ་འཕུར་འགྱུར་བ། །འདོད་པ་བཞིན་དུ་ཉེ་བར་འགྲོ། །ས་ལ་སོགས་དངོས་འདོད་པ་བཞིན། །མྱུར་དུ་སླར་ཡང་ལྡོག་པར་འགྱུར། །ཨོཾ་བཛྲ་པདྨ་བ་ཌ་བ་མུ་ཁ་ཨཱ་ཀརྵ་ཡ་ཨཱ་རྵ་ཡ། པྲ་བེ་ཤ་པྲ་བེ་ཤ་ཡ། བནྡྷ་ཡ་བནྡྷ་ཡ། ཏོ་ཥ་ཡ་ཏོ་ཥ་ཡ། མོ་ཧ་ཡ་མོ་ཧ་ཡ། སརྦ་བཛྲ་ཌཱ་ཀི་ནཱི་ནཱཾ། ཧྲི་ད་ཡ་ཧ་ཧ་ཧི། ཨོཾ་ཨཱཿཧཱུཾ། དཔལ་རྟ་མགྲིན་གྱི་སྔགས་དང་ཕྱག་རྒྱ་སྟེ། དངོས་གྲུབ་ཆེན་པོ་ཐམས་ཅད་ལྷུན་གྱིས་གྲུབ་པར་འགྱུར་རོ། །དེ་ནས་ལྷག་མ་དང་ཕུད་གཅིག་ཏུ་བསྲེས་ནས། གཏོར་མ་བརྫང་ཞིང་བསྐྱལ་བར་བྱ་སྟེ། དཔལ་ཧེ་རུ་ཀའི་ཐོད་པའི་ཐལ་མོ་ཞེས་བྱ་བའི་ཕྱག་རྒྱ་མཆོད་པ་དང་། གཏོར་མ་ཐམས་ཅད་དབུལ་བར་བྱེད་པ་བཅས་ཏེ། གསང་སྔགས་འདི་དག་བརྗོད་པར་བྱའོ། །བུདྡྷ་ཊཱ་ཀི་ནཱི་པྲ་ཏཱི་ཙྪེ་མཾ་བ་ལིནྟ་ཨོཾཿཕཊ། ཨོཾ་བཛྲ་ཊཱ་ཀི་ནཱི་པྲ་ཏིཙྪཾ་མཾ་བ་ལིནྟ་ཧཱུཾ་ཕཊ། ཨོཾ་རཏྣ་ཊཱ་ཀི་ནཱི་པྲཏཱིཙྪེ་མཾ་བ་ལིནྟ་ཏྲཱཾ་ཕཊ། ཨོཾ་པདྨ་ཊཱ་ཀི་ནཱི་པྲ་ཏཱིཙྪམཾ་བ་ལིནྟ་ཧྲཱིཿཕཊ། ཨོཾ་བི་ཤྭ་ངྷ་ཀི་ནི་པྲ་ཏཱི་ཙྪེ་མཾ་བ་ལིནྟ་ཨཱཿཕཊ། ཅེས་བརྗོད་དེ་གཏོར་མ་བསྐྱལ། གླུ་གར་དང་མཆོད་པ་རྣམ་པ་མང་པོས་ཕྱི་ནང་གི་མཁའ་འགྲོ་དམ་ཅན་རྣམས་དགྱེས་ཤིང་ཚིམ་པར་བྱའོ། །འདི་དག་ཙམ་ནི་སྔོན་གྱི་མཁས་པ་རྣམས་ཀྱིས་མཛད་པའི་མཆོད་པའི་ཡི་གེ་དག་དང་། རྒྱུད་དག་ལས་ཀྱང་སྣང་། སླད་ནས་བོད་ཀྱིས་མཛད་པའི་ཚོགས་རྒྱས་འབྲིང་གི་ཡི་གེ་དག་ལས་ནི་དབང་ཕྱུག་མ་ལ་མཆོད་པ་དང་ལས་བཅོལ་བར་འབྱུང་། བོད་ཀྱིས་མཛད་པའི་གཏོར་མ་བསྔོ་བའི་ཡི་གེ་ཕལ་ལས་ནི། དཔལ་ཆེན་པོའི་ལྷག་མ་དང་། རྣལ་འབྱོར་བའི་ལྷག་མ་རྣམ་གཉིས་ཀྱིས་འགྲོན་མར་གྱི་གནས་བདུན་མཆོད། ཅེས་ཀྱང་འབྱུང་། ལས་མནར་བ་ཅིག་བྱེད་ན། ལས་ཀྱི་བཟླས་པ་བྱ། ཞེས་ཀྱང་འབྱུང་སྟེ། འདི་དག་ལ་ཡང་གཅིག་ཏུ་ཆད་པའི་ངེས་པ་མེད་པས་གལ་ཏེ་སྔ་མས་ཡིད་མི་ཚིམ་ཞིང་། སོ་སོར་མཆོད་པ་དང་ཕྲིན་ལས་བཅོལ་བར་འདོད་ན་ཡང་རང་རང་གི་བློ་ལ་ཇི་ལྟར་འཚམ་པ་བཞིན་དུ་བྱའོ། །དེ་ནས་ལྷ་གཤེགས་སུ་གསོལ་ཏེ། ཁྱེད་ཀྱི་སེམས་ཅན་དོན་ཀུན་མཛད། །གྲུབ་པ་ཚུལ་བཞིན་སྩལ་ལགས་ཀྱིས། །སངས་རྒྱས་ཡུལ་དུ་གཤེགས་པར་མཛོད། །སླར་ཡང་གཤེགས་པར་མཛད་དུ་གསོལ། །ཞེས་བརྗོད། གསང་བའི་མཆོད་པའི་སྒོ་ནས་དཀྱིལ་འཁོར་བསྡུ། རྣམ་པར་མི་རྟོག་པ་ཅུང་ཟད་བསྒོམ། སློབ་དཔོན་ལ་ཕྱག་བྱས་ཏེ་བཟོད་པ་གསོལ། མཆེད་ལྕམ་དྲལ་ནང་ཕན་ཚུན་བཟོད་པ་གསོལ། ཆོས་དོན་ཟབ་མོ་དག་བླ་མ་ལ་ཞུ། གླུ་གར་དང་བྲེ་མོའི་གཏམ་ལ་སོགས་པ་དགའ་བའི་ལོངས་སྤྱོད་རྣམས་ཀྱང་བླ་མ་རྣམས་ལ་ཞུས་ཏེ་བྱའོ། །དེ་དག་ཐམས་ཅད་ཀྱང་སེམས་དང་ཡེ་ཤེས་རང་སྣང་བའི་མཚན་ཉིད་ཙམ་སྟེ། དམིགས་སུ་མེད་པར་ཤེས་པར་བྱའོ། །ཚོགས་ཡིག་ཆེན་པོ་ཞེས་བྱ་བ། དཔལ་རོང་པ་ཆེན་པོ་ཆོས་ཀྱི་བཟང་པོས་མཛད་པ་རྫོགས་སོ། །བླ་མའི་མན་ངག་ཐུན་མོང་མ་ཡིན་པའོ། །