རབ་གནས་ཀྱི་བཤད་སྦྱར་

༄༅། །བདེ་བར་གཤེགས་པའི་སྐུ་གསུང་ཐུགས་ཀྱི་རྟེན་ལ་རབ་ཏུ་གནས་པ་ཇི་ལྟར་བྱ་བའི་གཞུང་གི་བཤད་སྦྱར་བཞུགས་སོ། ། ༄༅། །༼རབ་གནས་ཀྱི་རྒྱུད་ལས། གང་ཚེ་གཟའ་ནི་ཕན་འདོགས་དོན། །དེ་ཚེ་མར་གྱི་ངོ་ལ་བརྩམས། །ཞེས་གསུངས། མཆན། ཞེས་འདུག །༽ གང་ཞིག་བདེ་བར་གཤེགས་རྣམས་ཀྱི། །ཕྱག་རྒྱ་གང་གིས་འཇིག་རྟེན་དུ། །སྐྱེ་བོ་བྱིན་གྱིས་བརླབ་པའི་ཕྱིར། །ཆོ་ག་རྣམ་ཕྱེ་བཤད་པ་ལས། །ཕྱག་རྒྱས་ཕྱག་རྒྱ་བྱིན་བརླབས་ཏེ། །ཡུན་དུ་དགེ་ཤིས་བརྟན་འདོད་པས། །སྔགས་དང་ཕྱག་རྒྱ་ཇི་སྙེད་པས། །གང་ཞིག་བརླབ་ཀྱང་སྐྱོན་མེད་དེ། །ཇི་སྙེད་ལྷ་སྔགས་ཕྱག་རྒྱ་ཀུན། །ཆོས་ཉིད་རྣམ་གྲོལ་མཚོན་པར་གཅིག །གཞན་ཡང་ཕྱག་རྒྱ་གཅིག་པུའང་། །རྣམ་གྲོལ་མཐའ་ཡས་མཚོན་སྒོར་གྱུར། །ལས་དང་དངོས་གྲུབ་ཐམས་ཅད་པ། །དེ་ཕྱིར་ཉེས་སྐྱོན་ཡོད་མིན་ཀྱང་། །གང་ཞིག་ཉེ་བར་བསྟན་པ་རྣམས། །ཅུང་ཟད་འདི་རུ་བརྗོད་པར་བྱ། །དེ་ལ་འདི་ལྟར་སྐུ་གཟུགས་སམ་རི་མོའི་རྒྱུད་དམ། མཆོད་རྟེན་དང་གླེགས་བམ་ལྟ་བུ་ཕྱི་རོལ་གྱི་ཕྱག་རྒྱར་བསྟན་པ། བསོད་ནམས་བསགས་པ་དང་། དངོས་གྲུབ་བསྒྲུབ་པ་དང་། ལས་སྣ་ཚོགས་བསྒྲུབ་འདོད་པའི་ཕྱིར་བཞེངས་སུ་གསོལ་བ་རྣམས་ལ། ཡུན་དུ་བརྟན་ཞིང་བསམ་པ་ཇི་ལྟ་བ་བཞིན་དུ་དགེ་ཤིས་དང་ལྡན་པར་བསྒྲུབ་པར་བྱ་བའི་ཕྱིར། བྱིན་གྱིས་བརླབ་ཅིང་བཀྲ་ཤིས་བསྒྲུབ་པའི་ཆོ་ག་འཇིག་རྟེན་དུ་གྲགས་པ་དང་མཐུན་པར་བྱ་བ་ལ། འདི་སྐད་དུ་རབ་གནས་ཀྱི་ཆོ་ག་ཞེའམ། དེ་བཞིན་དུ་༼མཆོད་རྟེན་ལ། ༽མངའ་དབུལ་བ་ཞེའམ། ༼གསུང་རབ་ལ། ༽ཞལ་བསྲོ་བ་ཞེའམ། སྐུ་གཟུགས་ལྟ་བུ་ལ་སྤྱན་དབྱེ་བའི་ཆོ་ག་ཞེས་བྱ་བར་གྲགས་པ་རྣམས་ལ། རྒྱུད་རྣམས་ལས་ཉེ་བར་བསྟན་པ་ཙམ་ཉུང་ཤས་བསྡུས་པ་དེ་ལ་བྱིན་གྱིས་བརླབ་པ་དང་ཞལ་བསྲོ་བ་ཞེས་གྲགས་པ་ལ། བྱིན་གྱིས་བརླབ་པ་ཁྱད་པར་དུ་ཉེ་བར་བསྟན་པ་རྣམས་འདིར་བསྟན་པ། འདི་ལྟར་སྐུ་གཟུགས་དང་རི་མོའི་རྒྱུད་རྣམས་ལ་བྱིན་རླབས་ཉུང་ཤས་ཙམ་བྱེད་པར་འདོད་ན། སྤྱིའི་མཆོད་པ་དང་། ཇི་སྐད་དུ་བསྟན་པའི་བྱ་བ་རྣམས་བྱས་ལ། སྔགས་པ་སྐུ་གཟུགས་ཀྱི་མདུན་དུ་ཉེ་བར་འདུག་སྟེ། དང་པོར་བསྲུང་བ་ཆེན་མོ་རྣམས་ཀྱི་སྔགས་ཀྱིས་སྤྱིར་བསྲུང་བ་བྱས་པའི་རྗེས་སུ། དམ་ཚིག་གསུམ་གྱི་སྔགས་དང་ཕྱག་རྒྱས་དམ་ཚིག་ལས་མི་འདའ་བར་བྱིན་གྱིས་བརླབ་པ་དང་། དེ་ནས་ཆོས་ཀྱི་དབྱིངས་ཀྱི་སྔགས་དང་ཕྱག་རྒྱས་སྐུ་གཟུགས་དེ་ཉིད་དང་། ཆོས་ཐམས་ཅད་ཀྱང་ཆོས་ཀྱི་དབྱིངས་ཀྱི་རང་བཞིན་དུ་བྱིན་གྱིས་བརླབ་པ་དང་། དེ་ནས་སྐུ་གསུང་ཐུགས་ཡོངས་སུ་རྫོགས་པའི་སངས་རྒྱས་ཀྱི་སྐུ་དེ་ཉིད་བསྐྱེད་དེ་བྱིན་གྱིས་བརླབ་པ་དང་། དེ་ཉིད་དུ་སྐུ་གསུང་ཐུགས་རྫོགས་ཀྱང་ལྷག་པར་བྱིན་གྱིས་བརླབ་པར་བྱ་བའི་ཕྱིར། ཐུགས་ཡོངས་སུ་རྫོགས་པར་བྱིན་གྱིས་བརླབས་པ་དང་། གསུང་ཡོངས་སུ་རྫོགས་ པར་བྱིན་གྱིས་བརླབ་པ་དང་། འོད་ཀྱི་དཀྱིལ་འཁོར་བྱིན་གྱིས་བརླབ་པ་དང་། གདན་བྱིན་གྱིས་བརླབ་པ་སྟེ། འདི་དག་ཙམ་གྱིས་ཀྱང་བྱིན་གྱིས་བརླབ་པ་རྫོགས་སུ་རུང་སྟེ། དེའི་རྗེས་ལ་བཀྲ་ཤིས་དང་མཆོད་པ་རྣམས་བྱའོ། །དེ་ལ་དང་པོར་བསྲུང་བ་ཆེན་མོས་བསྲུང་བ་ནི། འདི་ལ་རྣམ་སྣང་མངོན་བྱང་གི་ཏནྟྲ་ནས་སྔགས་དང་ཕྱག་རྒྱ་གཉིས་ཀ་འབྱུང་། སྔགས་པ་བདག་ཉིད་གོང་དུ་དཀོན་མཆོག་སྤྱིའི་མཆོད་པའི་གྲངས་སུ། རང་གི་ལྷའི་ཏིང་ངེ་འཛིན་དང་ལྡན་པ་དེ་ཉིད་ཀྱི་ཤུགས་ཀྱིས་རང་གི་ལྷར་བྱས་པས་བར་དུ་གཅོད་པ་ཐམས་ཅད་བསྲུང་བར་བྱ་བའི་ཕྱིར། ལག་པ་ཐལ་མོ་ཁོང་སྟོང་དུ་སྦྱར་ལ་གུང་མོ་གཉིས་ནང་དུ་དགུག །མཐེ་བོ་གཉིས་བསྒྲེང་། མཛུབ་མོ་དང་མཐེའུ་ཆུང་ཅུང་ཟད་དགུག །སྲིན་ལག་གཉིས་བསྒྲེང་ངོ་། །༼རྟགས་འདི་ནས་འོག་གི་རྟགས་ཀྱི་བར་སྒྱུ་འཕྲུལ་དབང་བྱུང་ནས་མཚན་མར་གནང་ལ་འདིའི་ཧོར་ཁོངས་ཕྱི་མོ་གཞན་ནས་བསབ། ༽༼བསྟབ་པས་ནི། ས་བཅུ་ཀུན་ལ་དབང་བ་དང་། །ཐེག་པ་མཐའ་དག་སྟོན་པ་ཡི། །ཆོས་ཀྱི་རྒྱལ་པོ་ཆེན་པོར་ཤོག །འཁོར་ལོར་སྒྱུར་བའི་རྒྱལ་པོའི་རྐྱེན། གླང་པོ་རིན་པོ་ཆེ་ཚུལ་ཇི་ལྟ་བུ་དང་ལྡན་ཞེ་ན། ༼འདི་ནས་འོག་གི་སྐར་མའི་རྒྱལ་པོ་པ་བ་སངས་ཀྱི་སྐར་མ་ཐམས་ཅད་ཅེས་པའི་བར། འདིའི་ཤོག་བུ་གཉིས་པའི་དོད་དུ། གཞན་ཅིག་འདྲེས་པར་འདུག་གོ ། ༽གླང་པོ་རིན་པོ་ཆེ་མདོག་ཐལ་དཀར་དུ་འདུག་པ། ཡན་ལག་བདུན་ཤིན་ཏུ་མཐོ་བར་གནས་པ། གསེར་གྱིས་བརྒྱན་པ། གསེར་གྱིས་དྲ་བས་བརྒྱན་པ་ནམ་མཁའ་ལ་འགྲོ་བ། ལྷ་དང་ལྷ་མ་ཡིན་དང་གཡུལ་འགྱེད་པ་ན། གཡུལ་དེ་དག་ལས་རྒྱལ་བར་ནུས་པའོ། །དེ་ལྟར་དེ་བཞིན་དུ་གླང་པོ་ཆེས་དབང་བསྐུར་བས་འགྲོ་བ་རིགས་དྲུག་གི་སེམས་ཅན་རྣམས། ཐེག་པ་ཆེན་པོའི་གནས་སུ་འདེགས་པའི་སྟོབས་དང་ལྡན་པའི་དབང་ཐོབ་པར་གྱུར་ཅིག །གླང་པོ་རིན་ཆེན་བསྟབས་པས་ནི། །སྟོབས་བཅུ་ཀུན་ལ་དབང་བ་དང་། །ཐེག་པ་མཐའ་དག་སྟོན་པ་དང་། །དབང་མཆོག་དམ་པ་ཐོབ་པར་ཤོག ། འཁོར་ལོས་སྒྱུར་བའི་རྒྱལ་པོའི་རྒྱན། ནོར་བུ་རིན་པོ་ཆེ་ཚུལ་ཇི་ལྟ་བུ་དང་ལྡན་ཞེ་ན། ནོར་བུ་རིན་པོ་ཆེ་ཐམས་ཅད་དུ་སྔོ་བ། བཻཌཱུརྱའི་རང་བཞིན་དུ་གནས་པ། ཟུར་བརྒྱད་སུལ་གསུམ་དང་ལྡན་པ། འོད་རབ་ཏུ་འབར་བ་སྟེ། རྒྱལ་པོས་སད་པའི་ཕྱིར། མཚན་མོ་སྨག་གི་མུན་རུམ་ན། འོད་མའི་ཚལ་དུ་རྒྱལ་མཚན་གྱི་རྩེ་མོ་ལ་གཙུགས་ན། དཔག་ཚད་གཅིག་ཚུན་ཆད་དུ་ཉིན་པར་གྱི་འདུ་ཤེས་སྐྱེ་བར་གྱུར་ཏོ། །དེ་ལྟར་དེ་བཞིན་དུ་ནོར་བུ་རིན་པོ་ཆེས་དབང་བསྐུར་བས། ཕྱི་ནང་ཐམས་ཅད་གསལ་ཞིང་མུན་པ་མེད་དེ་གསལ་བཞིན་དུ་འབྱུང་བའི་ཡོན་ཏན་ལྡན་པའི་དབང་ཐོབ་པར་གྱུར་ཅིག །ནོར་བུ་རིན་ཆེན་བསྟབས་པས་ནི། འཇིག་རྟེན་དག་ཏུ་དེ་བཞིན་གཤེགས། །དཔེ་བྱད་མཚན་གྱིས་བརྒྱན་པ་ཡི། །གསེར་གྱི་སྐུ་མདོག་ཐོབ་པར་ཤོག ། འཁོར་ལོས་སྒྱུར་བའི་རྒྱལ་པོའི་རྐྱེན་རྟ་རིན་པོ་ཆེ་ཚུལ་ཇི་ལྟ་བུ་དང་ལྡན་ཞེ་ན། མདོག་ནམ་ནངས་པའི་མདོག་གི་ཁ་དོག་འདྲ་བ། མགོ་གནག་པ། རྔོག་མ་ལྕང་ལོར་འཁྱིལ་བ། ནམ་ཀ་ལ་འགྲོ་བ། ཏ་ལ་ཧ་ག་ཞེས་བགྱི་སྟེ། རྒྱལ་པོས་སད་པའི་ཕྱིར་ནང་པར་སྔར་རྟ་ལ་ཞོན་ཏེ། གླིང་བཞི་རྒྱ་མཚོ་དང་བཅས་པའི་མཐའ་བསྐོར་ནས། སླར་ཁྱེའུ་སུས་ཀྱི་དགའ་བ་ཉམས་སུ་མྱོང་བར་གྱུར་ཏོ། །དེ་ལྟར་དེ་བཞིན་དུ་རྟ་རིན་པོ་ཆེས་དབང་བསྐུར་བས། མི་གནས་པའི་མྱ་ངན་ལས་འདས་པའི་དབྱིངས་སུ་ཐོགས་པ་མེད་པར་སྒྲོལ་ནུས་པའི་དབང་ཐོབ་པར་གྱུར་ཅིག །རྟ་མཆོག་རིན་ཆེན་བསྟབས་པས་ནི། རྫུ་འཕྲུལ་རྐང་པའི་དབང་ཐོབ་ནས། །ཉོན་མོངས་རྒྱ་མཚོ་སྒྲོལ་བ་ཡི། །ཐར་པའི་འབྲས་བུ་ཐོབ་པར་ཤོག ། འཁོར་ལོས་སྒྱུར་བའི་རྒྱལ་པོའི་རྒྱན་བཙུན་མོ་རིན་པོ་ཆེ་ཚུལ་ཇི་ལྟ་བུ་དང་ལྡན་ཞེ་ན། ཧ་ཅང་མི་རིང་ཧ་ཅང་མི་ཐུང་ལ། ཧ་ཅང་མི་སྦོམ་ཧ་ཅང་མི་འཕྲ་ཞིང་། ཧ་ཅང་མི་དཀར་ཧ་ཅང་མི་གནག་སྟེ། རན་པ་ཕུན་སུམ་ཚོགས་པ་དང་ལྡན་པ། པགས་པའི་མདོག་མེ་ཏོག་པྲི་ཡང་ཀུ་དང་འདྲ་བ། ཁ་ནས་ཨུཏྤལའི་ངད་ལྡན་པ། གྲང་བའི་དུས་རེག་ན་དྲོ་བ། ཚ་བ་ཚ་བའི་དུས་ན་རེག་ན་བསིལ་བ། ཡིད་ཀྱི་འགྱུ་ཆ་ལ་ཡང་འཁོར་ལོས་སྒྱུར་བའི་རྒྱལ་པོའི་སེམས་དང་འགལ་བར་མི་བྱེད་ན། ལུས་དང་ངག་གི་ལྟ་ཅི་སྨོས་ཏེ། དེ་ནི་བུད་མེད་ཐམས་ཅད་ཀྱི་སྐྱོན་སེལ་བར་སྟེ། དཔེར་ན་སྐར་མའི་རྒྱལ་པོ་པ་བ་སངས་ཀྱི་སྐར་མ་ཐམས་ཅད། ༽བཞུགས་སུ་གསོལ་ནས། ཕྱི་ནང་གི་མཆོད་པས་མཆོད་པ་དང་། ལྷ་གང་ཡིན་པ་སོ་སོ་རང་རང་གི་༼སྐུ་གསུང་ཐུགས་དང་ཡན་ལག་ཉིང་ལག་དང་སྐྱེ་མཆེད་དང་བཅས་པ། ༽སྔགས་དང་ཕྱག་རྒྱས་བྱིན་གྱིས་བརླབས་ཏེ་གཞག་པ་དག་ཁྱད་པར་དུ་བྱེད་དོ། །དེ་ལ་དམ་པ་ཆོས་ཀྱི་སྐུ་གཟུགས་དང་རི་མོའི་རྒྱུད་དང་། མཆོད་རྟེན་དང་། གླེགས་བམ་དང་། དྲི་གཙང་ཁང་དང་བཅས་པ་རྣམས་ཀྱང་དངོས་སུ་ན་འཕགས་པ་དཀོན་མཆོག་གསུམ་གྱི་རྟེན་བཙུགས་པ་ཡིན་པས་ལྷ་རྟེན་གྱི་ཁོངས་སུ་གཏོགས་སོ། །དེ་ཡང་ཇི་ལྟ་ཞེ་ན། སངས་རྒྱས་འཇིག་རྟེན་དུ་མངོན་དུ་བྱུང་སྟེ། དམ་པ་ཆོས་ཀྱི་འཁོར་ལོ་མངོན་དུ་བསྐོར་ནས་འཕགས་པའི་དགེ་འདུན་མང་པོའང་ཞལ་བཞུགས་ཙམ་ན། མཆོད་པའི་རྟེན་གུད་དུ་བཅའ་མི་དགོས་ཏེ། འཕགས་པ་ཉིད་ལ་མཆོད་པ་ལས། དེ་ནས་སངས་རྒྱས་མྱ་ངན་ལས་འདས་ནས་འཕགས་པའི་དགེ་འདུན་རྣམས་ཀྱང་མྱ་ངན་ལས་འདས་ཏེ། འཇིག་རྟེན་ན་འཕགས་པ་ཞལ་མི་བཞུགས་པའི་འོག་ཏུ་རྟེན་ལ་མཆོད་པ་བྱེད་པར་འགྱུར་ཏེ། དེ་ཡང་འདི་ལྟར་སྟོན་པ་ཉིད་ཀྱིས་བྱིན་གྱིས་བརླབས་པའི་བྱང་ཆུབ་ཀྱི་ཤིང་དང་། རྡོ་རྗེ་གདན་ལྟ་བུ། སྟོན་པ་མྱ་ངན་ལས་འདས་ནས་སྐུ་གདུང་བརྒྱད་དུ་བགོས་ནས་མཆོད་རྟེན་བྱས་པ་རྣམས་དང་། སྟོན་པ་མྱ་ངན་ལས་འདས་ནས་ལོ་སུམ་བརྒྱ་ལོན་ནས་རྒྱལ་པོ་ངྷརྨཱ་ཨ་ཤོ་ཀ་ཞེས་བྱ་བ་བྱུང་བས། བྱང་ཆུབ་ཀྱི་སྙིང་པོ་རྡོ་རྗེ་གདན་དུ་བཅོམ་ལྡན་འདས་ཀྱི་སྐུ་གཟུགས་བཞེངས་སུ་གསོལ་བ་དང་། སྡེ་སྣོད་གསུམ་གྱི་ཆོས་ཀྱང་དེ་ཡན་ཆད་དུ་གང་ཟག་གི་བློ་ལ་གནས་པ་ལས། རྒྱལ་པོ་དེས་དག་ཅིང་ཡུན་དུ་བརྟན་པར་བྱ་བའི་ཕྱིར། ༼བཀའ་བསྡུས་ནས། ༽གླེགས་བམ་ལ་བཀོད་དེ་དྲི་གཙང་ཁང་དུ་བཞུགས་སུ་གསོལ་ལོ། །འདི་ནི་ཐུན་མོང་གི་མཆོད་པའི་རྟེན་ཚུལ་ལོ། ། གསང་སྔགས་ཀྱི་ཚུལ་ལས། སངས་རྒྱས་སྤྱོད་ཡུལ་དུ་མི་འགྱུར་བ་རྣམས་ཀྱི་དོན་དུ་ཕྱག་རྒྱ་འཇིག་རྟེན་དུ་བཞག་སྟེ་སེམས་ཅན་གྱི་དོན་བྱེད་དོ། །དེ་ཡང་༼དག་མ་དག་གི ། ༽ཕྱག་རྒྱ་ཇི་སྙེད་པ་རྣམས་ཀྱང་སྐུ་གསུང་ཐུགས་ཀྱི་ཕྱག་རྒྱ་ཙམ་དུ་འདུས་ཏེ། དེ་ཡང་ཕྱི་རོལ་གྱི་དབང་པོའི་སྤྱོད་ཡུལ་དུ་༼མངོན་སུམ་དུ། ༽གྱུར་པ་ལ་བྱིན་གྱིས་བརླབས་པ་ནི། རྡུལ་ཚོན་གྱི་དཀྱིལ་འཁོར་དང་། སྐུ་གཟུགས་དང་། རི་མོའི་རྒྱུད་དང་། མཆོད་རྟེན་དང་། གླེགས་བམ་ལྟ་བུ་མིག་དང་ལུས་ཀྱི་སྤྱོད་ཡུལ་དུ་གྱུར་པ་དང་། གསང་སྔགས་ཀྱི་སྒྲ་དང་། དམ་པ་ཆོས་ཀྱི་ཡི་གེ་དང་། མིང་དང་ཚིག་ཏུ་ཕྱུང་བའི་སྒྲ་ལྟ་བུ་རྣ་བའི་དབང་པོའི་སྤྱོད་ཡུལ་དུ་གྱུར་པ་དང་། གཞན་ཡང་ཡིད་ཀྱིས་བསམ་ཤིང་དམིགས་པའི་ཕྱག་རྒྱ་ལྟ་བུས་བསྡུས་པ། ༼ལག་ན་འོད་འབར་སྣང་བ་པོ། །ཞེས་པས། ༽ཆ་ཤས་ཡོངས་སུ་རྫོགས་པའམ། མ་རྫོགས་པའམ། འདྲ་བའམ། མི་འདྲ་བའམ། མདོར་ན་བཟོ་བྱས་པ་དང་། ཚུལ་དུ་ལག་གི་འདུ་བྱེད་ཀྱིས་བཅའ་བ་དང་། བརྗོད་པ་དང་། བསམ་པས་བསྡུས་པ་ཐམས་ཅད་ཀྱང་། ལྷ་དང་སྔགས་དང་ཕྱག་རྒྱ་གསུམ་དུ་འདུས་ཏེ། འདི་གསུམ་ཚོགས་པས་སེམས་ཅན་གྱི་དོན་བྱེད་དོ། །ཇི་སྐད་དུ། ཕྱག་ན་རྡོ་རྗེ་དབང་བསྐུར་བའི་ཏན་ཏྲ་ལས། འཇམ་དཔལ། གསང་སྔགས་ཀྱི་༼གཟུགས་དང་ཡི་གེ་གསུམ། ༽ཆོས་ཉིད་དེས་༼དཔེ་དོན་དམ་པའི། ༽ཆོས་ཉིད་སྟོན་ཏེ། དེས་ཚིག་གི་རྣམ་པ་བསྟན་པ་ན་བྱ་བ་ནུས་པར་འགྱུར་རོ། །འཇམ་དཔལ། བརྟེན་པའི་ཆོས་ཉིད་བྱ་བ་ནུས་པར་འགྱུར་བ་ལ་ལྟོས། དཔེར་ན་གཙུབ་སྟན་རྟེན་ནས་སུ། །གཙུབ་ཤིང་གཙུབས་པ་བྱས་པ་ཡིས། །མི་ཡིས་རྩོལ་བ་བྱས་རྒྱུ་ལས། །སྟོབས་དང་ལྡན་པའི་མེ་འབྱུང་ངོ་། །དེ་བཞིན་སྔགས་དང་ཕྱག་རྒྱ་ལྷ། །གསུམ་ནི་འདུས་པར་གྱུར་པ་ལས། །༼དོན་དམ་པའི་འབྲས་བུ། ༽ཆེན་པོ་དག་ནི་འབྱུང་འགྱུར་ཏེ། །བྱུང་ནས་ཡིད་ལ་གང་འདོད་པའི། །དགོས་པ་ཐམས་ཅད་བྱེད་པར་འགྱུར། །ཞེས་གསུངས་པ་ལྟ་བུའི་དོན་ཡིན་ནོ། །དེ་ལྟར་དོན་བྱེད་ནུས་པའི་ཕྱག་རྒྱ་དེ་ཡང་རྡུལ་ཚོན་གྱི་དཀྱིལ་འཁོར་དུ་བཀོད་པའི་དུས་ན། ཡི་གེ་བཀོད་པ་ནི་གསུང་ཆོས་ཀྱི་ཕྱག་རྒྱར་བསྡུ་བར་འགྱུར་རོ། །གླེགས་བམ་དུ་བཀོད་ན་ནི་དམ་ཚིག་གི་ཕྱག་རྒྱར་བསྡུ་བར་འགྱུར་རོ། །མཆོད་རྟེན་ཡང་དམ་ཚིག་གི་ཕྱག་རྒྱའི་ཁོངས་སུ་བསྡུའོ། །སྐུ་ཡོངས་སུ་རྫོགས་པ་ནི་ཕྱག་རྒྱ་ཆེན་པོའོ། །དེ་བཞིན་དུ། སྐུ་གཟུགས་དང་རི་མོའི་རྒྱུད་ཀྱང་ཕྱག་རྒྱ་ཆེན་པོའོ། །རྡུལ་ཚོན་ལ་མ་བརྟེན་པའི་མཆོད་རྟེན་གུད་དུ་བཞེངས་པའང་། ཆོས་ཀྱི་སྐུའི་གཟུགས་བརྙན་ཏེ། ཆོས་ཀྱི་དབྱིངས་སམ། གཉིས་སུ་མེད་པའི་ཡེ་ཤེས་སམ། རྣམ་པར་གྲོལ་བའི་འབྲས་བུའམ་སྐུ་ཞེས་གྲགས་པའི་ཕྱག་རྒྱར་བསྟན་པས། སྐབས་ཁ་ཅིག་ཏུ་སངས་རྒྱས་ཀྱི་ཕོ་བྲང་དུའང་བསྟན་ཏེ། གཉིས་མེད་ཡེ་ཤེས་དེ་ཉིད་ནི། །དེ་བཞིན་གཤེགས་པ་ཀུན་གྱི་གནས། །ཞེས་གསུང་པ་དང་དོན་འདྲ་སྟེ། ཨེ་༼ཆོས་འབྱུང་། ༽གྲུ་གསུམ་དང་། གཙུག་ཏོར་གྱི་ཕྱག་རྒྱ་དང་། མཆོད་རྟེན་རྣམས་ཐུགས་དམ་ཚིག་གི་ཕྱག་རྒྱའི་ཁོངས་སུ་བསྡུའོ། །དེ་ལས་ཁྱད་པར་དུ་མཆོད་རྟེན་དང་། གཙུག་ཏོར་གྱི་ཕྱག་རྒྱ་དང་། འཁོར་ལོ་རྣམས་ནི་དེ་བཞིན་གཤེགས་པའི་རིགས་ཀྱི་དམ་ཚིག་གི་ཕྱག་རྒྱར་གསུངས་སོ། །སརྦ་བུདྡྷ་ས་མ་ཡོ་ག་ལས། ༼སངས་རྒྱས་ཐམས་ཅད་དང་མཉམ་པར་སྦྱོར་བ། ༽རིགས་དྲུག་གི ། དེ་བཞིན་གཤེགས་པའི་རིགས་ཀྱི་དམ་ཚིག་གི་ཕྱག་རྒྱ་དཀྱིལ་འཁོར་དུ་འགོད་པའི་སྐབས་སུ་གསུངས་པ། ཆོས་གོས་དང་ནི་ལྷུང་བཟེད་དང་། །དེ་བཞིན་དུ་ནི་འཁར་གསིལ་དང་། །དམ་པའི་ཆོས་ཀྱི་གླེགས་བམ་དག །མཚན་མའི་ཕྱག་རྒྱ་ཚོགས་གཞན་ནོ། །ཞེས་གསུངས་པས་གླེགས་བམ་ཡང་དམ་ཚིག་གི་ཕྱག་རྒྱར་གསུངས་ལ། འཁར་གསིལ་གྱི་དོན་ཡང་ལམ་དང་འབྲས་བུ་བཅས་པའི་མཆོད་རྟེན་གྱི་དོན་དུ་གསུངས་ཏེ། འདི་ལྟར་བཅོམ་ལྡན་འདས་ཀྱིས་འཁར་གསིལ་བསྣམས་ཏེ་གྲོང་ཁྱེར་དུ་བསོད་སྙོམས་ལ་གཤེགས་པའི་ཚེ། འཁར་གསིལ་གྱི་དོན་དང་ཆེ་བ་བསྒྲགས་པ་ན། འདི་སྐད་དུ། གླིང་བཞི་ལེགས་པར་བརྒྱན་པའི་སྤྱི་བསྡུས་ལ། །རྣམ་གྲོལ་འབྲས་བུ་སྨིན་པའི་མཆོད་རྟེན་བཞུགས། །སྟོང་པ་མཚན་མ་མེད་པའི་སྦུ་གུ་རུ། །མི་རྟོག་དཀའ་ཐུབ་འཆང་བའི་དྲང་སྲོང་སྩལ། ། ཞེས་བྱ་བ་ལ་སྩོགས་པ་གསུངས་པའི་དོན་གྱིས། མཆོད་རྟེན་ནི་རྣམ་པར་གྲོལ་བའི་སྐུའི་ཕྱག་རྒྱ་ཡིན་ལ། སྦུ་གུ་དང་དྲང་སྲོང་ནི་ལམ་དང་གང་ཟག་གི་ཕྱག་རྒྱའོ། །མདོར་ན་གླེགས་བམ་དང་མཆོད་རྟེན་ནི་དེ་བཞིན་གཤེགས་པའི་ཕྱག་རྒྱ་དང་མཚན་ནོ། །དེ་བས་ན་འདི་རྣམས་བཞེངས་སུ་གསོལ་བའི་དུས་སུ། རབ་གནས་ཀྱི་ཆོ་ག་བྱ་བ་ཡང་སྤྱི་ཐུན་མོང་གི་ཆོ་ག་ནི་སྤྱི་ཉིད་ལ་ལྟོས་པར་ཟད། ཁྱད་པར་དུ་བྱིན་གྱིས་ བརླབ་པའི་ཆོ་ག་ནི། བྱ་བའི་རྒྱུད་དག་ན་ཞིབ་པ་ལས། དེ་ཡང་ཁྱད་པར་དུ་གསལ་བར་མཐོང་བ། བྱ་བའི་རྒྱུད་དུ་གཏོགས་པ་ཁྲོ་བོ་རྣམ་པར་རྒྱལ་བའི་རྟོག་པ་འཇམ་དཔལ་གསང་བའི་རྒྱུད་ལས། རྡུལ་ཚོན་གྱི་དཀྱིལ་འཁོར་ལ་དགོས་པའི་བྱ་བ་བཞི་གསུངས་པ། རྟག་ཏུ་བདག་ཉིད་མཆོད་པའི་ཕྱིར་དང་། ལས་ཕྲ་མོ་བསྒྲུབ་པའི་ཕྱིར་དང་། དངོས་གྲུབ་ཆེན་པོ་བསྒྲུབ་པའི་ཕྱིར་དང་། སློབ་མ་གཞུག་པའི་ཕྱིར་བྲི་བར་གསུངས་པ་ལས། འདི་ལ་དཀྱིལ་འཁོར་བྱེ་བྲག་ཏུ་གྱུར་པ་མེད་དེ། ཡི་དྭགས་ཕལ་ཆེན་གྱི་དཀྱིལ་འཁོར་གྱི་ཚད་ཁྲུ་གང་བ་ནས། ཁྲུ་བརྒྱད་པའི་བར་དུ་གསུངས་པ་ལས། དེ་ལ་རྟག་ཏུ་བདག་ཉིད་མཆོད་པ་ནི་ཁྲུ་གང་བ། དངོས་གྲུབ་བསྒྲུབ་པ་ནི་ཁྲུ་བརྒྱད་པ། ལྷག་མ་ནི་ལས་ཕྲ་མོ་བསྒྲུབ་པར་གསུངས་ཏེ། སློབ་མ་གཞུག་པའང་དེ་ལས་གུད་དུ་མ་གསུངས་སོ། །དེ་བས་ན་གཞུང་ལ་ལ་ལས། དམ་ཚིག་གི་དཀྱིལ་འཁོར་དུ་སློབ་མ་གཞུག །དེ་བཞིན་དུ་ལས་ཀྱི་དཀྱིལ་འཁོར་དང་། སྒྲུབ་པའི་དཀྱིལ་འཁོར་དང་། མཆོད་པའི་དཀྱིལ་འཁོར་རྣམས། སོ་སོར་བྱ་བ་སྐད་དུ་འབྱུང་བ་ཡོད་པའང་ཡང་དག་པར་ན་དེ་ལྟར་ངེས་པ་མེད་པར་ཤེས་པར་བྱ་སྟེ། དཀྱིལ་འཁོར་གྱི་བྱ་བ་བཞི་ཐུན་མོང་དུ་འགྱུར་རོ། །གཞན་ཡང་སྐུ་གཟུགས་དང་རི་མོའི་རྒྱུད་རྣམས་དངོས་གྲུབ་བསྒྲུབ་པ་ལ་ཤས་ཆེར་གསུངས་ཀྱང་། སློབ་མ་གཞུག་པའི་བྱ་བ་ལ་ཡང་ཐུན་མོང་དུ་འབྱུང་ངོ་། །གཞན་ཡང་ལྷའི་དེ་ཁོ་ན་ཉིད་ཤེས་པ་ནི། དངོས་གྲུབ་ཀྱི་རྒྱུར་གསུངས་ཏེ། དེ་ཡང་ཕྱག་རྒྱ་ཐམས་ཅད་དང་ལྡན་པའི་ལྷའི་མཚན་ཉིད་དང་། ཡོན་ཏན་ཕྲིན་ལས་ཀྱི་ཆེ་བ་དག་དང་ལྡན་པར་ཤེས་པའོ། །༼ཏིང་ངེ་འཛིན་གྱི་དཀྱིལ་འཁོར་དུ། ༽ལྷ་ཇི་ལྟ་བ་བཞིན་དུ་༼ལུས་ཡན་ལག་བྱིན་གྱིས་བརླབ་པ་དང་། ༽བདག་ལ་བྱིན་གྱིས་བརླབས་ཤིང་ཕྱག་རྒྱ་༼སྐུ་གསུང་ཐུགས་བྱིན་གྱིས་རློབ་པ་ལ་སོགས་པའོ། །༽བཀོད་ཅིང་རྒྱས་བཏབ་པས་ནི་བདག་བྱིན་གྱིས་བརླབས་པར་འགྱུར་རོ། །བདག་ཇི་ལྟ་བ་བཞིན་དུ་རྡུལ་ཚོན་༼ས་ཡར། ༽གྱི་དཀྱིལ་འཁོར་དུ་བཀོད་པའི་ཕྱག་རྒྱ་དང་། གཞན་ཡང་སྐུ་གཟུགས་དང་རི་མོའི་རྒྱུད་རྣམས་ལ། ལྷ་སྤྱན་དྲངས་ཏེ་དེར་བཞུགས་སུ་གསོལ་ནས། མཆོད་པ་བྱས་ཏེ། དེ་ལ་ཕྱག་རྒྱ་བཀོད་ཅིང་བྱིན་གྱིས་བརླབས་པས། དམ་ཚིག་ཅན་གྱི་སྐྱེ་བོ་ལ་བསྟན་ན་དེ་དག་རིག་འཛིན་དམ་ཚིག་ཅན་དུ་བྱིན་གྱིས་རློབ་པར་འགྱུར་རོ། །ཞེས་འབྱུང་ངོ་། །མདོར་ན་ལྷ་བཞིན་དུ་བདག་བྱིན་བརླབ། བདག་བཞིན་དུ་དཀྱིལ་འཁོར་དང་སྐུ་གཟུགས་བྱིན་གྱིས་བརླབ། དེས་སྐྱེ་བོའི་ཚོགས་བྱིན་གྱིས་རློབ་པར་བྱེད་ནུས་པར་འགྱུར་རོ། །ཞེས་བྱ་བའི་དོན་ཏོ། །ད་ནི་དེ་དག་ཉིད་གང་ཟག་རྣམས་ཡིད་ཆེས་པར་བྱ་བའི་ཕྱིར། གཞུང་གི་ཚིག་ཉིད་བསྟན་པར་བྱ་སྟེ། དེ་ཡང་༼འཇམ་དཔལ། ༽གསང་བའི་རྒྱུད་ཉིད་ལས། དང་པོ་ལྷའི་དངོས་པོར་ཤེས་པ་དངོས་གྲུབ་ཀྱི་རྒྱུར་བསྟན་པའི་སྐབས་ནས། ས་བོན་ཁྲོ་བོའི་གཟུགས་ཡིན་ཏེ། །དེ་ཉིད་ཕལ་ཆེར་རབ་ཏུ་གྲགས། །༼ཁྲོ་བོའི་རང་བཞིན། ༽གཅིག་པུ་མཚོན་ཆ་དུ་མའི་མཆོག །རྟག་ཏུ་མཚོན་ཆ་འབར་བར་བྱེད། །ཅེས་བྱ་བ་ནས། འདི་ནི་ཁྲོ་བོའི་ཞལ་༼དངོས་དང་འདྲ་བའི་དོན། ༽ཡིན་གསུངས། །འདི་ནི་ཐོག་མ་ཉིད་ཀྱི་གཟུགས། །དེའི་མཐུ་ཡང་ཅི་འདྲ་བ། །ཚུལ་བཞིན་དུ་ནི་འདིར་བཤད་དོ། །ཞེས་གསུངས་ནས། དེ་ནས་མཐུའི་ཆེ་བ་དང་མཚན་ཉིད་དག་ཀྱང་བཤད་ནས། དེ་ལྟར་ཁྲོ་བོའི་རྒྱལ་པོའི་གཟུགས། །ས་བོན་ཞེས་སུ་བྱ་བ་ཡི། །སྔགས་ཀྱི་དངོས་པོ་ཤེས་ནས་ནི། །༼ལྷ་དང་དངོས་གྲུབ་ལ་སོགས་པ་སྔགས་སུ་གསུངས་པ། གསང་འདུས་ལས། དེ་བཞིན་སྔགས་རྣམས་ཐམས་ཅད་ལ། །རྨད་དུ་བྱུང་བའི་གཏོར་མ་འབུལ། །ཞེས་སོ། །ལྷ་སྔགས་སུ་བཤད། ༽སྔགས་པས་དངོས་གྲུབ་ཐོབ་པར་འགྱུར། །ཞེས་གསུངས་ཏེ། འདིའི་དོན་ནི་བཅོམ་ལྡན་འདས་དཔལ་གཤིན་རྗེ་གཤེད་པོའི་ཡེ་ཤེས་ཆེན་པོ་ཉིད་ས་བོན་གྱི་ཡི་གེར་གྱུར་པ་ཡིན་པས། དེ་བས་ན་ས་བོན་གྱི་ཡི་གེ་ནི་ཁྲོ་བོ་ཆེན་པོའི་སྐུ་ཉིད་ཡིན། མཚོན་ཆ་མ་ལུས་པ་ཡིན། ཁྲོ་བོའི་ཞལ་ཉིད་ཡིན་པས། མདོར་ན་དེ་བཞིན་གཤེགས་པ་ཉིད་ཡིན་པས། དེའི་ཕྱིར་ས་བོན་གྱིས་སྐུ་བསྐྱེད་པ་དང་། སྙིང་པོ་ལ་སོགས་པའི་ཡན་ལག་ལྔ་བྱིན་གྱིས་བརླབ་པ་བྱས་ན། དེ་བཞིན་གཤེགས་པ་ཉིད་དུ་བྱིན་གྱིས་རློབ་པར་ནུས་པས། ས་བོན་ལས་བསྒྲུབས་པའི་སྐུ་ལ་ས་བོན་བཀོད་པའི་ཚུལ་འདི་ནི་གསང་སྔགས་ཀྱི་ལྷའི་དངོས་པོ་ཤེས་པ་ཡིན་པས་དངོས་གྲུབ་ཀྱི་རྒྱུར་གསུངས་པའོ། །དེ་ནས་ལྷ་བཞིན་དུ་བདག་བྱིན་གྱིས་བརླབས་ཏེ། གཟུགས་བརྙན་ལ་སོགས་པ་ལ་ལྷ་སྤྱན་དྲངས་ནས་མཆོད་པ་བྱ་བར་གསུངས་པ། འདི་སྐད་དུ། ༼གསང་རྒྱུད་ལས། ༽ས་བོན་བཀོད་པའི་ཚུལ་བཞིན་དུ། །བདག་གི་ལུས་ལ་སྦྱར་བར་བྱ། །གཟུགས་ལ་གཟུགས་ནི་བཞག་ནས་སུ། །མཚོན་ཆ་དེ་ཉིད་ལག་ན་ཐོགས། །ས་བོན་རྣམས་ཀྱང་ཁར་བཞག་སྟེ། །རྐང་པ་གཉིས་ཀྱང་ཚམ་ངམ་བྱ། །དེ་ནས་ཀུན་ཏུ་ཁྲོས་ནས་སུ། །རང་གི་ས་བོན་དགོད་པར་བྱ། །ཐོག་མར་བདག་ལ་མ་ཡེངས་པར། །བསྲུང་བ་དེ་ལྟར་བྱས་ནས་སུ། །དཀྱིལ་འཁོར་དུ་ནི་སྤྱན་དྲངས་ཏེ། །དེ་ནས་མདུན་དུ་མཆོད་པར་བྱ། །ཞེས་གསུངས་པ་ཉིད་ཀྱིས་བསྟན་ཏོ། །དེ་ནས་བདག་ལ་ས་བོན་བཀོད་པ་བཞིན་དུ་མདུན་དུ། མཆོད་པའི་ལྷ་རྡུལ་ཚོན་ཡིན་ཡང་རུང་། སྐུ་གཟུགས་སམ་རི་མོ་ཡིན་ཡང་རུང་སྟེ། མདུན་དུ་མཆོད་པའི་ལྷ་དེ་ལ་ཡང་ས་བོན་ཡན་ལག་ལྔ་པ་བཀོད་དེ། དེ་དམ་ཚིག་ཅན་གྱི་སྐྱེ་བོ་ལ་བསྟན་པས་དེ་དག་རིག་འཛིན་དམ་ཚིག་ཅན་དུ་བྱིན་གྱིས་རློབ་པར་འགྱུར་བར་གསུངས་པ་ཡང་། ཇི་སྐད་དུ། དེར་ནི་མཆོད་པ་བྱས་ནས་ཀྱང་། །དཀྱིལ་འཁོར་དག་གམ་རི་མོ་ལ། །རང་གི་ཡན་ལག་དགོད་པ་དང་། །དམ་ཚིག་ཅན་ལ་བསྟན་ན་ནི། །རིག་འཛིན་དམ་ཚིག་ཅན་དུ་འགྱུར། །ཞེས་གསུངས་སོ། །དེ་བས་ན་འབྲེལ་བ་གསུམ་པོ་འདི་ཚུལ་མཐུན་པ་ལ་ཐེ་ཚོམ་བཟར་མི་རུང་ངོ་། །འབྲེལ་བ་གསུམ་མདོར་བསྡུས་ན། ཡེ་ཤེས་ཀྱི་ལྷ་གདུལ་བྱ་རྣམས་ལ་སྣང་བ་བཞིན་དུ་བདག་བྱིན་གྱིས་བརླབ། བདག་བྱིན་གྱིས་བརླབས་པ་བཞིན་དུ་དཀྱིལ་འཁོར་དང་སྐུ་གཟུགས་ལ་སྤྱན་དྲངས་ཏེ་བཞུགས་སུ་གསོལ་བའི་ལྷ་ལ་བྱིན་གྱིས་བརླབས་ཏེ། ༼དེས། ༽ སྐྱེ་བོ་བྱིན་གྱིས་རློབ་ནུས་པར་བྱའོ། །ཞེས་བྱ་བ་འདི་གཞུང་ལས་མངོན་དུ་༼གོང་དུ། ༽བསྟན་པས། ཐེ་ཚོམ་གྱི་གནས་མ་ཡིན་ནོ། །ཞེས་བྱ་བའི་དོན་ཏོ། །དེ་ལྟར་འབྲེལ་པ་གསུམ། མཐུན་པར་བྱ་བར་ལུང་བསྟན་ནས། ད་ནི་བདག་བྱིན་གྱིས་བརླབ་པའི་རིམ་པ་བསྟན་པར་བྱ་སྟེ། ༼གསང་རྒྱུད་ལས། ༽རྒྱུད་དེ་ཉིད་ལས། ༼འདི་ལས་ཀྱི་སེམས་དཔའ་བསྐྱེད་པ། ༽ཐོག་མའི་ཁྲོ་བོའི་རྒྱལ་པོ་ཡིས། །ཁྲུས་ཀྱི་ཆོ་ག་ཉིན་རེ་བྱ། །དེ་ནས་ཁྲོ་བོ་བསྐུལ་བ་ཡི། །བསྲུང་བ་རང་གི་ལུས་ལ་བྱ། །༼རང་གི་ཁྱད་པར་གྱི་ལས། ༽ བམ་གྱི་ས་བོན་ལས་བྱུང་༼འདི་དམ་ཚིག་སེམས་དཔའ་སྐྱེད་པའི་ཚུལ་༽པའི། །ཡིད་ཀྱི་པདྨའི་སྟན་ལ་འདུག །བདག་ཉིད་དེའི་སྟེང་དུ་ཡང་། །ས་བོན་ཧཱུྃ་ལས་བསྒྱུར་བའི་སྐུ། །བརྟག་པར་བྱ་སྟེ་བརྟགས་ནས་ཀྱང་། །༼ལུས་བྱིན་གྱིས་བརླབ་པ། ༽བདག་གི་སྤྱི་བོར་ཡི་གེ་ཨོཾ། མིག་གཉིས་སུ་ནི་ཡི་གེ་ཨས། །བསྲུང་བར་བྱས་ཏེ་དེ་ནས་ཡང་། །༼ཨ་ཀྲོ། ༽སྔགས་ནི་ཡི་གེ་བཅུ་བདུན་པོ། །བཟླས་ཤིང་དེ་བཞིན་ཤེས་དྲན་ནས། །རང་གི་ལུས་ལ་སྔགས་བཞག་པ། །སྙིང་ཁར་ཡི་གེ་ཧཱུྃ་གཞག་བྱ། །དེ་ནས་ཁྲོ་བོའི་མཚོག་མ་ཡིས། །བདག་གི་༼ཁྲོ་བོ། ༽མཚོག་མར་རེག་པར་བྱ། །ཁྲོ་བོའི་གཙོ་བོའི་སྤྱི་གཙུག་ཀྱང་། །ཕྱིས་ནི་གཙུག་ཏུ་གཞག་པར་བྱ། །དེ་ནས་ལུས་ལ་གོ་ཆ་ཡང་། །སྔགས་པས་ཆོ་ག་བཞིན་དུ་བྱ། །དེ་ནས་བདག་གི་ལག་གཉིས་ལ། །བློ་དང་ལྡན་པས་མཚོན་ཆ་དགོད། །༼ང་རྒྱལ་དང་། ༽ རང་གི་དམ་ཚིག་ལྡན་པའི་༼ཕྱག༽རྒྱ། །༼འདི་ཡེ་ཤེས་སེམས་དཔའ་སྤྱན་དྲངས་པ། ༽ མཁས་པས་ཆོ་ག་བཞིན་བཅིངས་ནས། །ཁྲོ་བོ་མཆོད་ལ་འཇུག་པར་བྱ། །ཞེས་གསུངས་སོ། །དེ་ལྟར་བྱིན་གྱིས་བརླབས་པའི་མཆོད་པའི་གནས་ཀྱང་། དཀྱིལ་འཁོར་དང་། སྐུ་གཟུགས་དང་། རི་མོ་རྣམས་ཐུན་མོང་ཡིན་པར་གསུངས་ཏེ། འདི་སྐད་དུ། ༼ཡང་དེ་ཉིད་ལས། ༽ ཁྲོ་བོའི་མཆོད་པ་བཤད་པ་ནི། །འདོད་པ་ཐམས་ཅད་སྟེར་བ་སྟེ། །ཡི་དྭགས་ཕལ་ཆེན་དཀྱིལ་འཁོར་དང་། །གཞན་ཡང་རྟག་པར་སྐུ་གཟུགས་དང་། །ཇི་སྲིད་བསྟན་པའི་རི་མོ་ལ། །ཡིད་ཀྱིས་མཆོད་པ་བྱ་བར་བསྒྲགས། །ཞེས་གསུངས་པའོ། །མཆོད་པའི་གནས་དེ་དག་ཀྱང་གང་ཡང་རུང་བ་གཅིག་ལ་མཆོད་པ་ལས། ཀུན་ཚང་བར་མཆོད་དགོས་པར་ངེས་པ་མེད་དེ། འདི་སྐད་དུ། ༼ཡང་དེ་ཉིད་ལས། རྫས་བསྟན་པ། ༽ ལྷ་ཡི་མེ་ཏོག་དྲི་ཞིམ་དང་། །བིལ་པའི་ལོ་མ་བཟང་པོ་དང་། །སྤོས་ཆུ་དག་གི་ས་ལའམ། །ཡང་ན་སྐུ་གཟུགས་དག་ལ་མཆོད། །ཅེས་གསུངས་པའི་ཕྱིར་རོ། །གཉིས་པ་ལྷན་དུ་མཆོད་ཀྱང་རུང་སྟེ། འདི་སྐད་དུ། ཡང་ན་ཕྱག་རྒྱའི་དཀྱིལ་འཁོར་དུ། །རི་མོ་བཀྲམ་ནས་མཆོད་པར་བྱ། །ཞེས་གསུངས་པའི་ཕྱིར་རོ། །འདི་དག་གིས་ནི་བདག་བྱིན་གྱིས་བརླབ་པའི་ཚུལ་དང་། དཀྱིལ་འཁོར་དང་སྐུ་གཟུགས་དང་རི་མོ་རྣམས་ལ་མཆོད་པའི་བྱེ་བྲག་མེད་པར་བྱ་བ་གྲུབ་བོ། ། ད་ནི་དེ་རྣམས་སུ་མཆོད་པའི་ལྷ་ལ་མཆོད་པའི་དུས་སུ། བདག་དང་༼ཏིང་འཛིན་གྱི་དཀྱིལ་འཁོར་དང་། ༽མཐུན་པར་༼དེས། ༽བྱིན་གྱིས་བརླབ་པ་ཇི་ལྟར་བྱ་བའི་ཁུངས་བསྟན་པར་བྱ་སྟེ། དེ་ཡང་དང་པོར་སྤྱན་དྲངས་པའི་ལྷའི་མཚན་ཉིད་ཇི་ལྟ་བ་བཞིན་དུ་ལེགས་པར་བསམ་ནས། སྤྱན་དྲངས་ཏེ། བཞུགས་སུ་གསོལ་ནས། དང་པོར་ཡོན་ཆབ་ཕུལ། དེའི་འོག་ཏུ་དྲི་ཆབ་ཕུལ། དེའི་འོག་ཏུ་ལྷ་བཤོས་དབུལ། དེའི་འོག་ཏུ་མེ་ཏོག་འཕྲེང་བ་ཕུལ་ནས། སྐབས་དེར་ལྷ་དེ་བདག་བཞིན་ཏུ་བྱིན་གྱིས་བརླབ་པར་བྱ་སྟེ། དེ་ཡང་ཡན་ལག་ལྔ་པའི་གསང་སྔགས་མེ་ཏོག་ལ་བསྔགས་ཤིང་། ཡིད་ཀྱིས་ལྷའི་གནས་སུ་བཞག་པའི་བྱིན་གྱིས་རློབ་པར་འགྱུར་རོ། །དེ་ནས་བདུག་པ་དབུལ། དེ་ལ་ཕྱོགས་བརྒྱད་དུ་༼ཕྱིར་མི་ལྡོག་པའི་ཕྱིར། ༽མར་མེ་བསྟམ། དེ་ནས་ཁྲོ་བོ་ལ་འབྱུང་པོའི་གཏོར་མ་དབུལ། དེ་ནས་ཕྱི་རོལ་དུ་ཕྱུང་སྟེ་སྨེ་གཏོར་རྣམས་བྱིན་ནས། དེའི་རྗེས་སུ་སློབ་མ་གཞུག་པ་ལ་སོགས་པ་དཀྱིལ་འཁོར་བྱ་བ་བཞི་པོ་གང་ཡང་རུང་བ་ལ་སྦྱར་བར་བྱའོ། །ཞེས་ཤེས་པར་བྱའོ། །དེ་ཡང་འདི་སྐད་དུ། ༼རྒྱུད་དེ་ཉིད་ལས། ༽ དེ་ལྟར་ཆོ་ག་བཞིན་བསམ་ནས། །འཇུག་ཏུ་ཁྲོ་བོ་གཤིན་རྗེ་གཤེད། །སྔགས་བརྗོད་༼ཨོཾ་ཡ་མཱནྟ་ཀ་ཧཱུཾ༴༴ཅེས་པ། ༽པས་ནི་སྤྱན་དྲངས་ནས། །རང་གི་སྙིང་པོས་བཞུགས་སུ་གསོལ། །༼སྐུའི་ཚུལ་ནི། ༽ ཁྲོ་བོ་འཁྲུགས་པ་འཇིགས་མཛད་པ། །གཟི་བརྗིད་འཕགས་པ་བསམ་པ་ནི། །ཞེས་ཁྲོ་བོའི་ཚུལ་དང་མཚན་ཉིད་བསྟན་ནས། དེ་ལྟར་བསམ་ནས་ལེགས་པར་ནི། །སྙིང་པོས་སྤྱན་དྲངས་ཡོན་ཆབ་དབུལ། །ཡོན་ཆབ་ཆོ་ག་བཞིན་ཕུལ་ནས། །ཡི་དྭགས་ཀྱི་ནི་སྤྱི་བོར་ཡང་། །༼ཕྱག་རྒྱ། ༽མེ་ཏོག་དམར་པོ་གཞག་པར་བྱ། །དེ་ནས་ཙནྡན་དམར་དབུལ་བ། །བློ་ལྡན་གྱིས་ནི་ཁྲོ་བོ་ལའོ། །དྲི་ཡི་འོག་ཏུ་ལྷ་བཤོས་དག །ཙན་དན་གྱིས་ནི་གཏོར་བའོ། །མེ་ཏོག་དག་གི་ཕྲེང་བ་ཡང་། །མེ་ཏོག་སྔགས་ཀྱིས་དབུལ་བར་བྱ། །མེ་ཏོག་ཆོ་ག་བཞིན་ཕུལ་ནས། །དེ་ལྟར་སྙིང་པོའི་སྔགས་ཀྱིས་ཀྱང་། །ཁྲོ་བོ་གཙོ་བོའི་སྙིང་ག་དང་། །ཁྲོ་བོ་ཡི་ནི་སྤྱི་བོར་ཡང་། །སྙིང་པོ་རྣམ་པར་དགོད་པར་བྱ། །མཚོག་མ་དེའི་མཚོག་མ་དང་། །དེའི་གཙུག་ཏུ་སྤྱི་གཙུག་བཞག །དེའི་ལུས་ལ་གོ་ཆ་དང་། །མཚོན་ཆའི་གནས་སུ་མཚོན་ཆའོ། །མེ་ཏོག་ཡིད་ཀྱིས་གཞག་པ་ནི། །ཇི་ལྟར་གསུང་བ་བཞིན་ཏུ་བྱ། །དེ་ལྟར་མཆོད་ནས་བདུག་པ་ནི། །སྔགས་ཀྱིས་བཏབ་སྟེ་དེ་ལ་དབུལ། །དེ་ནས་མེ་མར་རབ་འབར་བ། །ཕྱོགས་བརྒྱད་དུ་ཡང་དགོད་པར་བྱ། །འབྱུང་པོའི་གཏོར་མ་ཁྲོ་བོ་ལ། །ཕུལ་ནས་ཡི་དྭགས་ཕལ་ཆེན་གྱི། །ཕྱི་རོལ་དུ་ནི་མཁས་པ་ཡིས། །སྨེ་གཏོར་རྣམས་ནི་སྦྱིན་པར་བྱ། །ཞེས་གསུངས་སོ། །མཆོད་པའི་རིམ་པ་འདི་ལྟ་བུ་ནི་ཡོན་ཆབ་དང་པོར་དབུལ་བ་ངེས་པ་ཙམ་ལས་རིམ་པ་གཞན་ལྷག་པར་ངེས་པ་མེད་དེ། རེ་ཤིག་འདིར་ཇི་ལྟར་གསུངས་པ་བཞིན་དུ་བསྟན་པར་ཟད་དོ། །དེ་ལྟར་བྱིན་གྱིས་བརླབ་པའི་རིམ་པ་འདི་ཡང་། རྡུལ་ཚོན་དང་སྐུ་གཟུགས་ཀྱི་ཁྱད་པར་ནི། ལྷ་གཤེགས་སུ་གསོལ་མི་གསོལ་གྱི་བྱེ་བྲག་དང་། རྣལ་འབྱོར་གྱི་རྒྱུད་ལས་ཕྱག་རྒྱ་དགྲོལ་བའི་སྐབས་དག་ལས། ཕྱག་རྒྱ་རང་གི་གནས་སུ་དགྲོལ། །ཞེས་བསྟན་པའི་ཤུགས་དང་སྐུ་གཟུགས་དང་མཆོད་རྟེན་དང་གླེགས་བམ་ལྟ་བུ་དམིགས་པས་ཡུན་རིང་དུ་བརྟན་པར་བཞུགས་པར་བྱིན་གྱིས་བརླབ་པ་རྣམས་ལ། རབ་གནས་ཀྱི་ཆོ་གའི་དུས་སུ་ལྷ་སླར་གཤེགས་སུ་མི་གསོལ་ཞིང་། ཕྱག་རྒྱ་མི་དགྲོལ་ཞེས་གྲགས་པ་དང་སྦྱར་ན། སྐུ་གཟུགས་དང་རི་མོའི་རྒྱུད་ལ་ནི་༼ཆ་ཤས་ཙམ་མ་ཡིན་ཏེ། ༽ཡོངས་སུ་རྫོགས་པའི་ལྷ་ཉིད་ཡིན་པས། ཕྱག་རྒྱ་དགྲོལ་བ་ཅུང་ཟད་ཀྱང་མི་དགོས་པར་རིགས་སོ། །མཆོད་རྟེན་དང་གླེགས་བམ་ལ་ནི། སྤྱན་དྲངས་ཞིང་བྱིན་གྱིས་བརླབ་པའི་དུས་སུ། ༼སྐབས་དེར། ༽ཆ་ཤས་ཡོངས་སུ་རྫོགས་པའི་ལྷར་བྱིན་གྱིས་བརླབས་ཀྱང་། ཕྱག་རྒྱ་དགྲོལ་བའི་སྐབས་སུ་ཡོངས་སུ་རྫོགས་པའི་ཕྱག་རྒྱ་ཆེན་པོ་ཉིད་དམ་ཚིག་གི་ཕྱག་རྒྱར་བསྡུས་ལ། དེ་ནས་མི་དགྲོལ་བར་བརྟན་པར་བཞུགས་པར་རིགས་སོ། །སློབ་དཔོན་ལ་ལ་དག་ན་རེ། བདག་གི་མདུན་དུ་བྱིན་གྱིས་བརླབས་པའི་ལྷའི་ཕྱག་རྒྱ་དགྲོལ་བ་མ་བྱས་ན། བདག་ཉིད་བྱིན་གྱིས་བརླབས་པའི་ཕྱག་རྒྱ་ཡང་དགྲོལ་དུ་མི་རུང་སྟེ། སྔགས་པ་ལྕགས་སུ་བཅུག་པ་ཡིན་ནོ། །ཞེས་སྔོན་ཐོས་ན། འདི་ལྟ་བུ་ནི་གཞུང་ནས་ཀྱང་མ་མཐོང་། ༼དེ་ལྟར་ཡིན་ན་སྔགས་པ་ཉིད་དེར་ལྷའི་དཀྱིལ་འཁོར་དུ་ཏིང་ངེ་འཛིན་གྱིས་སྣང་བ་ཡིན་ན། ཐམས་ཅད་དུའང་མིན་ཕྱག་རྒྱ་དེ་ཉིད་ནི་ལྷ་དང་མི་གཉིས་དང་སྐབས་ཐམས་ཅད་ལྷ་ལྟར་སྣང་བ་དང་འགལ་ལོ། །༽རིགས་པས་ཀྱང་མ་དམིགས་སོ། །ཡང་ལ་ལ་ན་རེ། དང་པོ་སངས་རྒྱས་ཀྱི་སྐུར་བསྐྱེད་ལ། མཆོད་པ་རྫོགས་ནས་སངས་རྒྱས་རྣམས་འོད་དུ་ཞུ་སྟེ། གླེགས་བམ་ལ་སོགས་པར་གྱུར་པར་བྱའོ། །ཞེས་ཐོས་ན། འདི་ལྟ་བུ་ནི་རྒྱུད་ནས་ལུང་བསྟན་པ་ཡང་མ་མཐོང་ལ། །རིགས་པས་འགལ་བ་ཡང་མ་མཐོང་ངོ་། །ཡང་ལ་ལ་དག་ན་རེ། སློབ་མ་དབང་བསྐུར་བའི་ཆོ་ག་དང་འདྲའོ། །ཞེས་ཐོས་ན། འདི་ལྟ་བུ་ནི་རྒྱུད་ནས་ལུང་བསྟན་པ་ཡང་མ་མཐོང་ལ། །རིགས་པས་འཐད་པ་ཡང་མ་མཐོང་སྟེ། འདི་ལྟར་སློབ་མ་ལ་ནི་བྱང་ཆུབ་ཀྱི་སེམས་བསྐྱེད་པ་དང་། སྡོམ་པ་བཟུང་བ་ནས་བརྩམས་ནས། ཐ་མ་སངས་རྒྱས་ཀྱི་ས་ལ་ལུང་བསྟན་ཅིང་འབྲས་བུའི་ཆོས་ཀྱི་གོ་འཕང་སྦྱིན་པའི་བར་དུ། གོ་འཕང་གི་ཆོས་རྒྱུད་ལ་བསྐྱེད་ཅིང་སྦྱིན་པ། སྦྱིན་པའི་ཕ་རོལ་དུ་ཕྱིན་པའི་ཁོངས་སུ་གཏོགས་པ་ཡིན་ལ། སློབ་མས་ཐོབ་པའང་བཀའ་ཐོབ་པའི་མཚན་ཉིད་ཡིན་ནོ། །སྐུ་གཟུགས་བྱིན་གྱིས་བརླབ་པ་འདི་ནི། ཡེ་ཤེས་ཀྱི་ལྷ་རྣམས་འགྲོ་བའི་དོན་དུ་འཕྲུལ་པ་སྟོན་པས་ན། སྐུ་གསུང་ཐུགས་ཀྱི་ཕྱག་རྒྱ་འཇིག་རྟེན་དུ་བཞག་པ་རྣམས་ལས། ཕྱག་རྒྱའི་གཟུགས་སུ་བྱས་པ་ལ། སྔགས་དང་ཕྱག་རྒྱ་དང་ཏིང་ངེ་འཛིན་དང་མཆོད་པའི་སྒོ་ནས། །ཕྱག་རྒྱ་ལ་ཕྱག་རྒྱའི་མནན་ཏེ་བྱིན་གྱིས་བརླབ་པ་ཙམ་དུ་ཟད་པས། འདི་གཉིས་མཐུན་པའི་རིགས་པའང་མ་མཐོང་ངོ་། །སྐུ་གཟུགས་དང་རི་མོར་བྲིས་པ་དག་ལ། ལྷ་གང་ཡིན་པའི་རང་རང་གི་ས་བོན་ལས། རང་རང་གི་སྐུར་བསྐྱེད་ཅིང་དམིགས་ཏེ་བཟླས་བརྗོད་བྱས་པས། སངས་རྒྱས་ཀྱི་གོ་འཕང་གི་བར་དུ་ཐོབ་པར་འགྱུར་བ་ནི། རྒྱུད་ལས་གསུངས་ཏེ། འདི་ལྟར་རྣམ་པར་སྣང་མཛད་སྒྱུ་འཕྲུལ་དྲྭ་བ་ལས། འདི་སྐད་དུ། ལག་ན་རྡོ་རྗེ། རས་སམ་རྩིག་པ་ལ་སོགས་པ་ལ། དམིགས་པ་གང་གིས་གསང་སྔགས་འཆང་རྣམས་ཀྱི་ཡེ་ཤེས་རྫོགས་པར་འགྱུར་ཞིང་། ཡེ་ཤེས་རྫོགས་པས་སངས་རྒྱས་ཉིད་བདེ་བླག་ཏུ་ཐོབ་པར་འགྱུར་ན། དངོས་གྲུབ་གཞན་ལྟ་སྨོས་ཀྱང་ཅི་དགོས་པའི་གསང་སྔགས་ཀྱི་ཚོགས་ཐམས་ཅད་ཀྱི་ཏིང་ངེ་འཛིན་གསང་ཆེན་བཤད་པར་བྱ་བ་ཉོན་ཅིག །ཨོཾ་གྱི་ཡེ་ཤེས་ཀྱིས་བསྒྲུབས་པ། །རྒྱལ་ཆེན་རྣམ་པར་སྣང་མཛད་ནི། །ཤེས་རབ་ཡེ་ཤེས་རབ་རྒྱས་པ། །ཞེས་བྱ་བ་ལ་སོགས་སྐུའི་མཚན་ཉིད་གསུངས་ནས། ནང་གི་གསང་སྔགས་བཟླས་བརྗོད་ཅིང་། །དེ་ཉིད་སྤྱོད་ཡུལ་བསྒོམ་པར་གྱིས། །ཞེས་བྱ་བ་ལ་སོགས་པ་ལྷ་ཐམས་ཅད་སྙིང་པོ་ལས་སྐུར་བསྐྱེད་ཅིང་བསྒོམ་པ་དང་བཟླས་པ་གསུངས་པས། འདི་ལྟ་བུ་ནི་ལུང་གིས་འགྲུབ་པའི་ཕྱིར། འདི་ལྟར་བྱེད་འདོད་ན་ཡང་དེ་བཞིན་དུ་བསྒྲུབ་པར་བྱའོ། །མདོར་ན་སྐུ་གཟུགས་དང་གླེགས་བམ་དང་མཆོད་རྟེན་རྣམས་ཀྱི་ཐ་མལ་པའི་གཟུགས་ཉིད་ལ། ཡི་གེ་ལ་སོགས་པའི་ལྷས་བྱིན་གྱིས་བརླབས་ཏེ། མཆོད་པ་དང་། གཞི་དེ་ལས་ས་བོན་༼ཨོཾ་དང་ཧཱུཾ་ལ་སོགས་པ། ༽ལས་སྐུར་བསྐྱེད་དེ་མཆོད་པ་དང་། ཆོས་ཀྱི་དབྱིངས་རྣམ་པར་དག་པའི་ངང་ལས་སྐད་ཅིག་གཅིག་༼ཆུ་དང་པ་ལ་ཉི་ཟླའི་གཟུགས་བརྙན་མ་བརྩལ་བར་སྣང་བ། ༽ཙམ་གྱིས་སྐུར་བསྐྱེད་དེ་མཆོད་པ་རྣམས་ནི། སྒྱུ་འཕྲུལ་དྲ་བའི་རྒྱུད་ཉིད་ཀྱི་གཞུང་ཉིད་དང་སྦྱར་ན་ལྷའི་རྣལ་འབྱོར་རྣམ་པ་གསུམ་གསུངས་པས། དེའི་དབང་གིས་སྐུ་གཟུགས་ལ་སོགས་པ་ལ་ཡང་ཚུལ་རྣམ་པ་གསུམ་གང་ཡང་རུང་བ་ལ་སྦྱར་ཡང་འགལ་བ་མེད་པར་རིགས་སོ། །ལུང་གིས་ཀྱང་སྔར་བསྟན་པ་བཞིན་དུ་གྲུབ་བོ། །དེ་ལ་རྣལ་འབྱོར་རྣམ་པ་གསུམ་ནི། འདི་སྐད་དུ། ༼སྒྱུ་འཕྲུལ་དྲྭ་བ་ལས། ༽རྣལ་འབྱོར་རྣམ་གསུམ་ཞེས་བྱ་སྟེ། །བྱིན་གྱིས་བརླབ་དང་ཡོངས་བརྟགས་དང་། །གཟུགས་ཉིད་རྫོགས་པར་གྱུར་པ་ནི། །རྣལ་འབྱོར་ཡིན་ཞེས་སངས་རྒྱས་གསུངས། །ཞེས་གསུངས་པའོ། །དེ་ཉིད་ཇི་ལྟར་ཡིན་པར་བསྟན་པ་ནི། འདི་སྐད་དུ། ༼དེ་ཉིད་ལས། ༽སྔགས་ཀྱི་བྱིན་རླབས་ཡ་མཚན་བསྐྱེད། །རྣལ་འབྱོར་བྱིན་བརླབ་ཡིན་པར་གསུངས། །བྱང་ཆུབ་སེམས་ནི་དག་པ་དང་། །གསང་སྔགས་ས་བོན་སྐྱེ་བ་ཆེ། །ཕྱག་རྒྱའི་ཚོགས་སུ་བརྟགས་པ་ཡིས། །༼ཆོ་ག་རིམ་གྱིས་བསྐྱེད་པ། ༽རིམ་གྱིས་གཟུགས་ནི་རྫོགས་བྱས་པ། །དེ་ནི་བརྟགས་པར་བརྗོད་པ་སྟེ། །རྣལ་འབྱོར་ཆོ་ག་༼ཏིང་ངེ་འཛིན་གྱི་དཀྱིལ་འཁོར། ༽ཡིན་པར་གསུངས། །བསྡུ་དང་སྤྲོ་བར་བྱས་པ་ལས། །༼ཏིང་ངེ་འཛིན་གྱི་དཀྱིལ་འཁོར་གྱི་ཚུལ་ཇི་ལྟ་བ་བཞིན་རང་བཞིན་དཀྱིལ་འཁོར། ༽རྣམ་པའི་མཆོག་ཀུན་ལྡན་པ་དག །༼རིག་པ། ༽སྐད་ཅིག་ཡེ་ཤེས་ཀྱིས་རྫོགས་པ། །༼རང་བཞིན་གྱི་དཀྱིལ་འཁོར། ༽རྫོགས་པའི་རྣལ་འབྱོར་ཞེས་བརྗོད་དོ། །ཞེས་གསུངས་པ་ཡིན་ནོ། །རྣལ་འབྱོར་འདི་གསུམ་གྱི་གཞིར་གྱུར་པ་བདག་གི་དེ་ཁོ་ན་ཉིད་གཞི་ཡི་གཞུང་གང་དང་མཐུན་པ་ཡིན་ཞེ་ན། འདི་ལྟར་དང་པོར་ཕྱི་རོལ་གྱི་དོན་ཡོད་པར་༼ཉན་ཐོས་པའི་གཞུང་། ༽སྨྲ་བའི་ཚུལ་དང་། གཉིས་པ་༼ནང་སེམས་སུ་འདོད་པ་སེམས་ཙམ། ༽རྣལ་འབྱོར་སྤྱོད་པ་བའི་ཚུལ་དང་། །གསུམ་པ་༼དོན་སེམས་གཉིས་མེད་དུ་འདོད་པ། ༽དབུ་མའི་ཚུལ་ཏེ། འདི་གསུམ་གྱི་ཚུལ་དང་མཐུན་པར་བདག་གི་དེ་ཁོ་ན་ཉིད་གཞིར་བྱས་ཏེ། ལྷའི་རྣལ་འབྱོར་བསྒོམ་པར་གསུངས་པ་ཡིན་ནོ། །དེ་ཉིད་གསུངས་པ། ༼ཡང་དེ་ཉིད་ལས། ༽དང་པོ་དམ་ཚིག་བྱིན་བརླབ་པ། །རྣལ་འབྱོར་སྤྱོད་པ་དག་གིས་བརྟགས། །དབུ་མ་རྫོགས་པར་བྱ་བ་དག །འདི་ནི་རྣལ་འབྱོར་ཆོ་གར་བཤད། ཅེས་གསུངས་པ་སྟེ། དེ་ལ་དམ་ཚིག་ཅེས་བྱ་ནི། ས་མ་ཡ་ཞེས་བྱ་བའི་སྒྲ་ཚུལ་ཁྲིམས་དང་སྡོམ་པ་ལ་༼མི་༽འཇུག་ཅིང་། སྤྱིའི་གཞུང་ལ་འཇུག་པའི་དུས་སུ་གཞུང་ལུགས་ཞེས་མིང་གདགས་སོ། །ཞེས་སྔོན་གྱི་སྒྲ་བསྒྱུར་གྱི་སྐད་ཀྱི་དཀར་ཆག་ལས་འབྱུང་བས། དེ་དག་དང་མཐུན་པར་ཚིག་འདི་དག་བོད་ཀྱི་སྐད་དང་མཐུན་པར་གོ་བདེ་བར་སྦྱར་ན། ཚིག་འདི་སྐད་དུ། བྱིན་བརླབས་གཞུང་ལུགས་དང་པོ་སྟེ། །བརྟགས་པ་རྣལ་འབྱོར་སྤྱོད་པ་ཡི། །དབུ་མ་རྫོགས་པར་བྱ་བ་དག །འདི་ནི་རྣལ་འབྱོར་ཆོ་གར་བཤད། ཅེས་ཚིག་རྣམ་པར་སྦྱར་ན། དོན་མཐུན་ཡང་ཅུང་ཟད་གོ་བདེ་བར་སྣང་ངོ་། །དོན་ནི་འདི་ཡིན་ཏེ། གཞུང་ལུགས་དང་པོ་ཕྱི་རོལ་གྱི་དོན་ཡོད་པར་སྨྲ་བ་དང་མཐུན་པའི་བདག་གི་དེ་ཁོ་ན་ཉིད་ནི། དེ་ལ་བདག་ཅེས་བྱ་བ་ནི་ཕུང་པོ་ལྔའི་དོན་བློས་རྣམ་པར་མ་ཕྱེ་བ་ཙམ་ལ་བདག་ཅེས་གདགས། དེའི་དེ་ཁོ་ན་ཉིད་ནི་ཕུང་པོའི་བསྡུས་པའི་ཕྱི་ནང་གི་དངོས་པོ་འདི་དག་ལ། མུ་སྟེགས་ཅན་དག་གིས་ཀུན་ཏུ་བརྟགས་པའི་བདག་དང་བདག་གི་བ་དང་། རྟག་པ་དང་ཆད་པ་ལ་སྩོགས་པར་༼འདོད་པ་དེ་ལས་ཉན་ཐོས་པས། ༽ཀུན་ཏུ་བརྟགས་པས་སྟོང་པ། ཕུང་པོ་དང་ཁམས་དང་སྐྱེ་མཆེད་ཀྱི་ཆོས་ཙམ། ཡང་དག་པའི་ཤེས་པས་མངོན་དུ་གྲུབ་པ་འདི་མེད་པར་སྐུར་པ་གདབ་ཏུ་མི་རུང་བ་འདི་ནི་བདག་གི་དེ་ཁོ་ན་ཉིད་དོ། །དེ་བྱིན་གྱིས་བརླབ་པར་བྱ་བའི་གཞིར་བྱས་ཏེ། ལྷའི་དེ་ཁོ་ན་ཉིད་དུ་གཏོགས་པ་ཆོས་ཉིད་རྣམ་པར་དག་པ་དང་། །རྣམ་པར་མི་རྟོག་པའི་ཡེ་ཤེས་དང་། དེ་གཉིས་སུ་མེད་པའི་ཏིང་ངེ་འཛིན་དང་། ཡི་གེ་དང་། སྐུ་དང་། ཕྱག་རྒྱ་དག་གིས་བྱིན་གྱིས་བརླབས་ཤིང་བསྒོས་ཏེ། གསེར་གྱི་གླེགས་བམ་ལ་དངུལ་ཆུ་ཞུན་མ་ཐིམ་པ་བཞིན་དུ། ལྷས་བསྒོས་ཤིང་བྱིན་གྱིས་བརླབས་ཏེ་ལྷར་བསྒོམ་པ་འདི་ནི། བྱིན་གྱིས་བརླབས་པའི་རྣལ་འབྱོར་ཞེས་བྱའོ། ། ཚུལ་དེ་དང་མཐུན་པར་བསྒོམ་པར་འདོད་ན། བདག་ཉིད་དམ་ཚིག་སེམས་དཔར་བསྐྱེད་པ་དང་། རྡུལ་ཚོན་གྱི་དཀྱིལ་འཁོར་དུ་ཕྱག་རྒྱའམ་སྐུ་ཙ་ཀ་ལི་བཀོད་པ་དང་། སྐུ་གཟུགས་དང་རི་མོའི་རྒྱུད་ལ་སོགས་པ་ལ་ཡང་། དང་པོ་བདག་གི་དེ་ཁོ་ན་ཉིད་རྣམ་པར་སྨིན་པའི་གཟུགས་ཀྱི་དབྱིབས་ཀྱི་བྱེ་བྲག་བཟོ་བྱས་པ་ཉིད་ལ། ཡི་གེ་དང་ཕྱག་རྒྱ་དང་སྐུ་ལ་སོགས་པའི་ལྷས་བྱིན་གྱིས་བརླབས་ཏེ་ལྷར་གྱུར་པར་བྱ་བ་འདི་ཡང་། ལུང་དང་རིགས་པས་གྲུབ་པའི་ལྷའི་རྣལ་འབྱོར་ཕྱོགས་གཅིག་ཡིན་ནོ། །གཉིས་པ་༼སེམས་ཙམ། ༽རྣལ་འབྱོར་སྤྱོད་པ་དང་མཐུན་པའི་ཡོངས་སུ་བརྟགས་པའི་རྣལ་འབྱོར་གྱི་ཚུལ་ལྟར་ན། བདག་གི་དེ་ཁོ་ན་ཉིད་ཀྱང་བདག་གི་ཐ་སྙད་གདགས་པ་ནི་སྔ་མ་དང་འདྲ། ༼བདག༽དེའི་དེ་ཁོ་ན་ཉིད་ནི་ཕྱི༼ཡུལ། ༽ནང་༼སེམས། ༽གི་དངོས་པོ་འདི་དག་ལ། མུ་སྟེགས་ཅན་གྱིས་ཀུན་ཏུ་བརྟགས་པས་སྟོང་པར་མ་ཟད་ཀྱི། ཕྱི་རོལ་གྱི་དོན་ཡོད་པར་སྨྲ་བ་རྣམས་ཀྱིས་༼ཕྱི། ༽གཟུང་བ་དང་འཛིན་པའི་དངོས་པོ་ཇི་ལྟར་སྣང་བ་དེ་བཞིན་དུ་ཡང་དག་པར་ཡོད་པར་ཀུན་ཏུ་བརྟགས་པས་ཀྱང་སྟོང་བ། ༼ནང་། ༽སེམས་དང་སེམས་ལས་བྱུང་བ་རང་རིག་པ་ཙམ་པོ་གང་གིའང་གཟུང་བ་མ་ཡིན་པ། གང་ལ་ཡང་འཛིན་པར་བྱེད་པ་མ་ཡིན་པ། ཡེ་ཤེས་རང་རིག་པ་ཙམ་པོ་འདི་ནི། བདག་གི་དེ་ཁོ་ན་ཉིད་དོ། །དེ་ཡང་ཇི་ལྟ་བ་བཞིན་དུ་ཚད་དུ་ཆུད་ན་ནི། དེ་བཞིན་གཤེགས་པ་ཉིད་ཡིན་ཏེ། འོན་ཀྱང་སེམས་ཅན་གྱི་དུས་ན་ཡང་དག་པ་མ་ཡིན་པའི་ཀུན་ཏུ་རྟོག་པས་སྒྲིབ་པ་ཙམ་མོ། །དེ་ཉིད་གཞིར་བྱས་ཏེ་ལྷའི་རྣལ་འབྱོར་སྒོམ་པར་བྱེད་པའི་ཚེ། དང་པོར་ཆོས་ཐམས་ཅད་རང་བཞིན་གྱི་རྣམ་པར་དག་པའོ། །ཞེས་བྱ་བ་ལ་སོགས་པའི་གསང་སྔགས་ཀྱི་སྒོ་ནས། ངོ་བོ་ཉིད་དག་པར་མོས་པས་གཟུང་བ་དང་འཛིན་པའི་དངོས་པོར་བལྟ་བའི་བག་ཆགས་ཐམས་ཅད་དག་པར་བྱས་ནས། ཡེ་ཤེས་ཡོངས་སུ་དག་པ་ཙམ་ལ་དམིགས་ཏེ། དེ་ལ་བསོད་ནམས་ཀྱི་ཚོགས་ཀྱི་བག་ཆགས་ཀྱིས་ཡོངས་སུ་བསྒོས་པའི་དབང་གིས། ཟླ་བའི་དཀྱིལ་འཁོར་ཉིད་དུ་གྱུར་པར་བྱས་ཏེ། དེ་ལ་ས་བོན་གྱི་ཡི་གེ་དང་། ཐུགས་མཚན་གང་ཡིན་པ་དང་། སོ་སོའི་སྐུ་ཡོངས་སུ་རྫོགས་པར་བསྐྱེད་ནས་དེ་ལ་ཡང་༼ཀ་ཝཱ་ཙ། ༽བྱིན་གྱིས་བརླབ་ཅིང་དབང་༼ཡེ་ཤེས་ཀྱིས། ༽བསྐུར་བ་ལས་སོགས་པའི་སྒོ་ནས། ཤིན་ཏུ་ཡོངས་སུ་རྫོགས་པར་བྱ་བ་འདི་ནི། ཡོངས་སུ་བརྟགས་པའི་རྣལ་འབྱོར་གྱི་ཚུལ་ལོ། །ཚུལ་འདི་དང་མཐུན་པར་རྡུལ་ཚོན་དང་སྐུ་གཟུགས་ལ་སོགས་པ་ལ་ཡང་ཡི་གེ་ནས་རིམ་གྱིས་གཟུགས་ཀྱི་སྐུ་ཡོངས་སུ་རྫོགས་པར་བྱ་བ་འདི་ནི། སྒྱུ་འཕྲུལ་དྲ་བའི་རྒྱུད་འདི་ཉིད་ཀྱི་གཞུང་གི་ཚུལ་ཡང་ཡིན་ནོ། །གསུམ་པ་དབུ་མ་དང་སྒོ་མཐུན་པའི་རྫོགས་པའི་རྣལ་འབྱོར་གྱི་ཚུལ་གྱི་བདག་གི་དེ་ཁོ་ན་ཉིད་ནི། རྣལ་འབྱོར་སྤྱོད་པ་རྣམས་ཀྱིས་ཡོངས་སུ་དག་པའི་ཡེ་ཤེས་༼རང་རིག་པ་ཙམ་འདི། ༽ཡང་དག་པར་ཡོད་པར་འདོད་པ་ཡང་ཀུན་ཏུ་བརྟགས་པ་ཙམ་སྟེ། ཕྱི་ནང་གི་དངོས་པོ་འདི་དག་ནི་རྒྱུ་རྐྱེན་རྟེན་འབྲེལ་ཙམ་ལས་སྐྱེ་བར་དམིགས་པས། ཡང་དག་པར་ན་གཅིག་དང་དུ་མའི་ངོ་བོ་ཉིད་བློས་ཕྱེ་ན། རྙེད་པ་མ་ཡིན་པས། ཆོས་ཐམས་ཅད་ནི་སྤྲོས་པ་ཉེ་བར་ཞི་བའི་མཚན་ཉིད་དེ། རྒྱུད་འདི་ཉིད་ལས་ཀྱང་། འདི་སྐད་དུ། གང་ལ་དངོས་རྣམས་དངོས་མེད་ཅིང་། །མཐའ་གཉིས་ཀྱི་ནི་མཚན་མ་མེད། །དབུས་ལ་དཔྱད་པ་མེད་པ་དག །དུས་གསུམ་འདས་པ་ནམ་མཁའ་འདྲ། །ཞེས་གསུངས་པ་ལྟ་བུ་དང་། ཤེས་རབ་ཕ་རོལ་ཕྱིན་པ་ལས། ཚུ་རོལ་ཕ་རོལ་མཐའ་ལ་མིན། །དེ་དག་བར་ན་མི་གནས་ཤིང་། །དུས་རྣམས་མཉམ་པ་ཉིད་ཤེས་པ། །ཤེས་རབ་ཕ་རོལ་ཕྱིན་པར་འདོད། །ཅེས་གསུངས་པ་ལྟ་བུ་དོན་འདྲ་སྟེ། དུས་གསུམ་གྱིས་དངོས་པོ་ཐམས་ཅད་བསྡུས་པ་ཡིན་ཏེ། དངོས་པོ་ཐམས་ཅད་གདོད་མ་ནས་རྣམ་པར་དག་ཅིང་སྤྲོས་པ་ཉེ་བར་ཞི་བའི་མཚན་ཉིད་གང་ཡིན་པ་འདི་ནི། བདག་གི་དེ་ཁོ་ན་ཉིད་དོ། །ལྷའི་དེ་ཁོ་ན་ཉིད་ཀྱང་དེ་ཉིད་ཡིན་ཏེ། དེ་བས་ན་བདག་དང་སངས་རྒྱས་རང་བཞིན་མཉམ་པ་འདི་ནི། ཀུན་རྫོབ་སྒྱུ་མ་ཙམ་དུ་སྣང་བ་ཐམས་ཅད་ཀྱི་གཞིའོ། །གཞི་དེ་ལས་བདག་ལྷའི་རྣལ་འབྱོར་སྒོམ་པའི་ཚེ། ༼རྒྱུ་རྐྱེན་རྟེན་འབྲེལ་ཙམ་ལ་སྐྱེ་བ། ༽མཚོ་དང་བ་ལ་ཉི་ཟླའི་གཟུགས་བརྙན་རིམ་པ་མེད་པར་དུས་གཅིག་ཏུ་འཆར་བར་སྣང་བ་བཞིན་དུ། ཆོས་ཉིད་རྣམ་པར་དག་པའི་ངང་དུ་བསྒོམས་པའི་ངང་ལས། གཟུགས་ཀྱི་སྐུ་ཡོངས་སུ་རྫོགས་པ་ཆ་ཤས་ཐམས་ཅད་ཡོངས་སུ་རྫོགས་པའི་དྲྭ་བ་ཅན་སྐད་ཅིག་གིས་ཡོངས་སུ་རྫོགས་པར་བསྒོམ་པའོ། །རྣལ་འབྱོར་གྱི་ཚུལ་༼གསུམ་པོ། ཞེས་མཆན་འདུག་མོད་མི་འབྱོར། གསུམ་པ་ཞེས་པ་ནི་རུང་བ་ཙམ་མོ། །མཆན་འདི་ལའང་དགོས་པ་སྤུ་ཉག་གི་རྩེ་མོ་ཙམ་ཡང་མེད་དོ། །༽ འདི་དང་མཐུན་པར་འཇུག་པར་འདོད་ན། བདག་དེ་ལྟར་བསྒོམས་པའི་འོག་ཏུ་རྡུལ་ཚོན་དང་སྐུ་གཟུགས་ལ་སོགས་པ་དག་ལ་ཡང་། ཐོག་མར་སྟོང་པ་ཉིད་དུ་བསྒོམས་ཏེ། དེའི་ངང་ལས་ཇི་ལྟར་འདོད་པའི་སྐུ་རུ་བསྐྱེད་པར་རིགས་སོ། །དེ་ལྟར་རྡུལ་ཚོན་དང་སྐུ་གཟུགས་ལ་སོགས་པ་ལ། བདག་བྱིན་གྱིས་བརླབ་པ་དང་མཐུན་པར་བྱིན་གྱིས་བརླབས་པ་ལུང་དང་རིགས་པ་གཉི་ག་དང་མཐུན་པར་བརྗོད་ནས། ད་ནི་གཞི་རྣམས་ལ་སྤྱན་དྲངས་ཞིང་བཞུགས་སུ་གསོལ་བའི་ལྷ་རྣམས་ལ་ཡང་། བདག་བྱིན་གྱིས་བརླབ་པ་དང་མཐུན་པར། གོ་ཆ་དང་མཚོན་ཆ་དང་དབང་དང་བྱིན་རླབས་ཐམས་ཅད་བྱིན་གྱིས་བརླབ་ཅིང་བསྒྲུབ་པ། སྒྱུ་འཕྲུལ་དྲ་བའི་རྒྱུད་ལས་གསུངས་པའི་ལུང་གི་ཁུངས་བརྗོད་པར་བྱ་སྟེ། དེ་ལ་བདག་བྱིན་གྱིས་བརླབས་པའི་སྐབས་སུ། འདི་སྐད་དུ། འོད་ཀྱི་དཀྱིལ་འཁོར་གྱིས་བརྒྱན་པ། །ཆ་ཤས་ཀྱི་ནི་དྲྭ་བ་ཅན། །ཡེ་ཤེས་སེམས་དཔའ་རྫོགས་པར་བརྟག །དེ་འོག་ལག་པའི་ཕྱག་རྒྱ་ཡིས། །གོ་ཆ་མཚོན་ཆ་ལ་སོགས་བྱ། །རྫོགས་སངས་རྒྱས་ལྔས་དབང་བསྐུར་ཏེ། །ཅོད་པན་འཕྲེང་བ་རྣམས་ཀྱིས་ཀླུབས། །ཞེས་གསུངས་པ་དང་མཐུན་པར། སྤྱན་དྲངས་པའི་ལྷ་ལ་ཡང་བྱ་བར་གསུངས་པ། ལག་པ་བསྟོད་དེ་བསྐོར་བ་ཡི། །ལྕགས་ཀྱུ་ཡིས་ནི་སྤྱན་དྲངས་ཡང་། །བྱོན་ནས་དང་པོར་ཕྱོགས་བཅིངས་ཏེ། །དམ་ཚིག་དག་ཀྱང་དབུལ་བར་བྱ། །གདན་རྣམས་སོ་སོར་ཕུལ་ནས་སུ། །མཆོད་ཡོན་དབུལ་བའི་སྦྱོར་བ་བྱ། །དབང་བསྐུར་མཚོན་ཆ་གོ་ཆ་སོགས། །སིལ་སྙན་མཆོད་སོགས་ངོ་བོར་བྱ། །རྣམ་པ་ཀུན་གྱིས་མཉེས་བྱས་པ། །རྣལ་འབྱོར་བདག་ཉིད་ཅན་གྱིས་བརྟག །ཅེས་གསུངས་པའོ། །དེ་ལ་འདིར་དབང་བསྐུར་བ་ཞེས་བྱ་བ་ནི། གོང་དུ་བདག་ཉིད་བྱིན་གྱིས་བརླབ་པའི་སྐབས་སུ། རྫོགས་སངས་རྒྱས་ལྔས་དབང་བསྐུར་ཏེ། །ཅོད་པན་འཕྲེང་བ་རྣམས་ཀྱིས་ཀླུབས། །ཞེས་གསུངས་པ་དང་མཐུན་པར། སྔགས་དང་ཕྱག་རྒྱའི་སྒོ་ནས་སངས་རྒྱས་ལྔའི་ངོ་བོ་ཉིད་ཀྱི་དབུ་རྒྱན་གྱི་དབང་བསྐུར་ཏེ། དར་གྱི་ཅོད་པན་དང་། མེ་ཏོག་གི་འཕྲེང་བས་ཀྱང་དབུ་རྒྱན་དེ་ལ་བརྒྱན་ཅིང་དཔྱངས་པའོ། །སིལ་སྙན་མཆོད་སོགས་ངོ་བོར་བྱ། །ཞེས་བྱ་བ་ནི། དུང་དང་གླིང་བུ་ལ་སོགས་པའི་སིལ་སྙན་དང་། རྔ་ཡབ་དང་བསིལ་ཡབ་དང་། རྒྱལ་མཚན་དང་། རིན་པོ་ཆེ་ཚོན་སྣ་ཚོགས་ཀྱིས་སྤྲས་པའི་ས་གཞི་དང་། ཁང་པ་བརྩེགས་པའི་གཞལ་ཡས་ཁང་དང་། གོང་གི་དབུ་རྒྱན་གྱི་རྗེས་སུ་སྙན་ཆ་དང་། མགུལ་རྒྱན་དང་། ཕྱག་དང་། ཞབས་ཀྱི་གདུབ་རྒྱན་གཉིས་དང་། སྐུ་ཉིད་ཀྱི་རྒྱན་རྣམ་པ་ལྔ་གནས་ལྔར་གཞག་པ་དང་། སྟོད་གཡོགས་དང་སྨད་དཀྲིས་ལ་སོགས་པའི་ན་བཟའ་དང་། དེ་ནས་དེའི་སྟེང་དུ་གདུགས་དང་བླ་རེ་དང་། གཞལ་ཡས་ཁང་གི་གྲྭ་རྣམས་སུ་ཡང་པདྨའི་ཕྲེང་བ་དང་། དྲིལ་བུ་གཡེར་ཀའི་དྲྭ་བས་བརྒྱན་པ་ལ་སོགས་པའི་མཆོད་པ་རྣམས་སྔགས་དང་ཕྱག་རྒྱ་ཉིད་ཀྱིས་བསམ་ཞིང་དབུལ་བར་བྱའོ། །དངོས་སུ་བཤམས་པ་རྣམས་ལ་ནི་དེ་ཉིད་ཀྱི་སྟེང་དུ། སྔགས་དང་ཕྱག་རྒྱས་མེ་ཏོག་ལ་བསྔགས་ཤིང་བཞག་ན། ལྷག་པར་བྱིན་གྱིས་རློབ་པར་འགྱུར་རོ། །ཞེས་གཞན་ལས་ཀྱང་གསུངས་སོ། །དེ་ ནས་རྡོ་རྗེ་གླུའི་མཆོད་པ་དག་ཀྱང་བྱའོ། །ཇི་སྐད་དུ་སྨོས་པ་འདི་དག་བསྟན་པ་ནི། བྱིན་གྱིས་རློབས་ཅིང་བཀྲ་ཤིས་པར་བྱ་བའི་རྫས་ཀྱི་མཆོད་པ་ཁྱད་པར་དུ་བསྟན་པ་ཙམ་དུ་ཟད་དེ། སྤྱིར་མཆོད་པ་ན་གསང་བའི་མཆོད་པར་གཏོགས་པ། སྒེག་མོ་ལ་སོགས་པའི་གར་གྱི་མཆོད་པ་དང་། མེ་ཏོག་ལ་སོགས་པ་གར་གྱི་མཆོད་པ་དང་། ལྷ་བཤོས་ལ་སོགས་པ་ཉེ་བའི་མཆོད་པ་རྣམས་ཀྱང་ཐུན་མོང་དུ་རྒྱུད་དེ་ཉིད་ལས་གསུངས་སོ། །གཞན་ཡང་རྡོ་རྗེ་གར་གྱི་ཚུལ་གྱིས་སེམས་མ་བཞིའི་སྔགས་དང་ཕྱག་རྒྱས། ཆོ་འཕྲུལ་བཞིའི་ཚུལ་གྱིས་བྱིན་གྱིས་བརླབ་ཅིང་དབང་བསྐུར་བ་ལ་སོགས་པ་བྱ་བ་དང་། ཏིང་ངེ་འཛིན་གྱི་མཆོད་པ་སངས་རྒྱས་ཀྱི་ཞིང་ཐམས་ཅད་ཡོངས་སུ་དག་པའི་ཞིང་དུ་བྱིན་གྱིས་བརླབ་ཅིང་ཡོངས་སུ་གང་བར་ཡང་གསུངས་ཏེ། འདི་སྐད་དུ། རྡོ་རྗེ་ཁུ་ཚུར་གཉིས་ཀྱིས་ནི། །རྒྱབ་ཏུ་མདུད་པ་ལྟར་འདོར་ཞིང་། །རྡོ་རྗེ་སེམས་དཔའ་ལ་སོགས་པའི། །རིན་ཆེན་ཅོད་པན་འཕྲེང་དབང་བསྐུར། །ཏིང་འཛིན་གནས་པ་འཁོར་ལོ་ཅན། །འཁོར་ལོ་མངའ་བའི་ལྷ་རྣམས་ལ། །སངས་རྒྱས་ས་ནི་རབ་འགེངས་པ། །གསང་བའི་མཆོད་པ་འབྱུང་བར་བསམ། །ཞེས་གསུངས་པའི་འོག་ཏུ་སྒེག་མོ་ལ་སོགས་པའི་ལྷ་མོ་བརྒྱད་ཀྱི་གར་གྱི་མཆོད་པ་རྫོགས་པའི་རྗེས་ལ། གོང་དུ་སྨོས་པའི་སིལ་སྙན་ལ་སོགས་པའི་བཀྲ་ཤིས་ཀྱི་རྫས་རྣམས་ཀྱི་ཕྱག་རྒྱ་དང་སྔགས་གསུངས་པ། དེ་ལ་རྡོ་རྗེ་ལས་བསྒྱུར་ཏེ་མཆོད་པའི་ཕྱག་རྒྱ་བཅའ་བ་ནི། འདི་སྐད་དུ། དེ་ནས་སིལ་སྙན་ཚུལ་གྱིས་སུ། །ལག་གཉིས་སིལ་སྙན་ལེགས་པར་བརྡུང་། །དུང་དང་གླིང་བུ་བུད་པ་དང་། །ལག་པ་ཡིས་ནི་རྔ་ཡབ་གཡབ། །བསིལ་ཡབ་ཚུལ་གྱིས་བསིལ་ཡབ་དང་། །རྩེ་མོ་གཉིས་ནི་རྒྱལ་མཚན་བྱ། །ཚོན་དགྱེའི་ཚེ་ན་ལྕུག་ཕྲན་ལྟར། །བསྐྱོད་ཅིང་ཚོན་ཕྱེ་འཕྲེད་པ་དགྱེ། །ལག་གཡོན་སྣོད་ཀྱི་ཚུལ་བྱས་ལ། །གཡས་པ་ཡིས་ནི་ལྷ་བཤོས་དབུལ། །ཁང་པ་བརྩེགས་པ་བཞག་ནས་སུ། །གོས་ཀྱི་ཚུལ་གྱིས་གོས་རྣམས་དང་། །གདུ་བུ་དོ་ཤལ་རྐང་རྒྱན་དང་། །རྣ་ཆ་གནས་ལྔ་རྣམས་སུ་གཞག །དེ་ནས་གདུགས་ཀྱི་ཚུལ་གྱིས་སུ། །ལྷ་རྫས་གདུགས་ནི་ལེགས་པར་གཟུགས། །བསམ་གཏན་ཚུལ་གྱི་ལག་པ་དག ། ནམ་མཁའ་ལ་ནི་མཛེས་བསྐོར་ན། །སངས་རྒྱས་ཞིང་རབ་འགེངས་བྱེད་པའི། །བླ་རེ་རྣམ་པ་སྣ་ཚོགས་འགྱུར། །གྲྭར་ནི་པདྨའི་འཕྲེང་བ་དང་། །དྲིལ་བུ་གཡེར་ཀའི་དྲ་བས་བརྒྱན། །ཞེས་གསུངས་པའི་ཕྱག་རྒྱ་རྣམས་ཀྱིས་དབུལ་བར་བྱའོ། །དེ་ནས་ལག་པ་གཡས་པ་རྡོ་རྗེ་གསོར་ཞིང་། གཡོན་པས་རྡོ་རྗེ་དྲིལ་བུ་བསིལ་ནས་རྡོ་རྗེ་དྲིལ་བུ་གསང་སྔགས་འདིས་བྱིན་གྱིས་བརླབས་ཏེ། རྡོ་རྗེ་གླུའི་བསྟོད་པ་དག་བྱའོ། །དེ་ལ་རྡོ་རྗེ་དྲིལ་བུའི་གསང་སྔགས་ནི། ཨོཾ་བཛྲ་གྷན་ཌེ་ར་ཎི་ཏ། པྲ་ར་ཎི་ཏ། སམ་པྲ་ར་ཎི་ཏ། སརྦ་བུདྡྷ་ཀྴེ་ཏྲཾ་པྲ་ཙ་ལི་ཏེ་པྲཛྙཱ་པ་ར་མི་ཏཱ་ནཱ་ད་སྭ་བྷཱ་བེ་བཛྲ་ངྷརྨ་ཧྲི་ད་ཡ། སན་ཏོ་ཥ་ཎི་ཧཱུཾ་ཧཱུཾ་ཧཱུཾ། ཞེས་པ་འདིའོ། །མཆོད་པའི་ཕྱག་རྒྱའི་སྐབས་སུ། ཚོན་དགྱེས་ཚེ་ན་ལྕུག་ཕྲན་ལྟར། །ཞེས་གསུངས་པ་འདི་ནི། དཀྱིལ་འཁོར་འབྲི་བའི་ཚེ་ཙམ་དུ་སྨོས་པར་མ་ཟད་དེ། མཆོད་པ་ཉིད་ཀྱི་དུས་སུ་རྒྱལ་མཚན་དང་གདུགས་ལ་སོགས་པ་བཙུགས་པའི་རྗེས་ལ། ས་གཞི་ཉེ་འཁོར་དུ་རིན་པོ་ཆེའི་ཚོན་འབྲི་བ་ལྟར་བྱ་ཞིང་། ཏིང་ངེ་འཛིན་གྱིས་རིན་པོ་ཆེའི་གཞི་ལ་རིན་པོ་ཆེའི་ཚོན་བརྒྱ་རྩ་གཅིག་པ་ལ་སོགས་པས། མིག་མང་རིས་དང་ཐོ་ལོ་རིས་སུ་སྤྲས་པ་འབྱུང་བར་བསམ་མོ། །དེ་ལ་མིག་མང་རིས་ནི་ཕྱོགས་ཀུན་ཏུ་འབྲེལ་བའོ། །ཐོ་ལོ་རིས་ནི་ཁོར་བུ་དང་གེགས་༼རྫོགས་ཆེན་ཤིང་པར་དུ་བེགས་དང་འདྲ་བོ་ཞིག་འདུག་ལགས། ༽ལིང་དུ་སྤྲས་པའོ། །དེའི་གཏན་ཚིག་འདི་ཉིད་ནས་ཀྱང་། མཆོད་པའི་སྐབས་སུ། སྒེག་མོ་གླུ་དང་གར་རྣམས་དང་། །རྒྱལ་མཚན་ལ་སོགས་ཚོན་དགྱེ་དང་། །སིལ་སྙན་མཆོད་པ་རྣམ་པ་ནི། །སྣ་ཚོགས་རྣམས་ཀྱིས་མཆོད་པར་བྱ། །ཞེས་གསུངས་པ་ཉིད་ཀྱི་ཡང་ཕྱིར་རོ། །མཆོད་པའི་ཕྱག་རྒྱ་འདི་རྣམས་ཀྱི་གསང་སྔགས་ནི། མཆོད་པའི་སྤྲིན་རབ་འབྱམས་ཐམས་ཅད་བྱིན་གྱིས་རློབས་པར་འགྱུར་བའི་རིགས་སྔགས་འདི་ཡིན་ཏེ། ཨོཾ་ཨ་ནུཏྟ་ར་སརྦ་པཱུ་ཛ་མེ་གྷ། ཨུཏྒ་ཏེ། སྥ་ར་ན་ཧི་མཾ། ག་ག་ན་ཁཾ་ཧཱུྃ་ཕཊ་སྭཱ་ཧཱ། ཞེས་བྱ་བ་འདི་སརྦ་༼ཐམས་ཅད། ༽ལ་སྦྱར་བར་བྱའོ། །འདི་དག་ནི་རྣམ་པར་སྣང་མཛད་སྒྱུ་འཕྲུལ་དྲྭ་བ་ལས་གསུངས་པའི་ལུང་གི་ཁུངས་དང་། རིགས་པ་བརྗོད་པ་ཡིན་ནོ། །གཞན་ཡང་དཀྱིལ་འཁོར་བྱིན་གྱིས་བརླབས་པའི་ཚུལ་དང་ཏིང་ངེ་འཛིན་གྱི་མཆོད་པ་རྒྱ་ཆེན་པོའི་ཚུལ་འདི་ཆ་མཐུན་པར་འབྱུང་སྟེ། ཇི་སྐད་དུ། ༼སྙིང་པོ་ལས། ༽ ཡི་གེའམ་གདན་ནམ་སྙིང་པོའམ། །ཕྱག་རྒྱའམ་སྐུ་གསུང་ཐུགས་ལྡན་པར། །བྱིན་རླབས་ཡ་མཚན་རྨད་པོ་ཆེ། །འགྲུབ་འགྱུར་སངས་རྒྱས་ཀུན་གྱི་དམ། །ཞེས་གསུངས་ཏེ་དཀྱིལ་འཁོར་དུ་སྐུ་གསུང་ཐུགས་ཀྱི་མཚན་མ་གང་བཀོད་ཀྱང་རུང་སྟེ། ཐམས་ཅད་ལ་སྐུ་གསུང་ཐུགས་གསུམ་ཅར་ལྡན་པར་བྱིན་གྱིས་བརླབས་ན་དངོས་གྲུབ་ཏུ་འགྱུར་རོ་ཞེའོ། །ཏིང་ངེ་འཛིན་གྱི་མཆོད་པའི་ཚུལ་ཡང་། འདི་སྐད་དུ། ༼སྙིང་པོ་ལས། ༽མཆོད་པའི་ཕྱག་རྒྱ་ཆེན་པོ་ནི། །སེམས་ཀྱི་ཡིད་བཞིན་སྤྲིན་ཚོགས་ཀྱིས། །ཕྱོགས་བཅུ་ཐམས་ཅད་སངས་རྒྱས་ཞིང་། །མཉེན་འཇམ་རེག་ན་བདེ་བ་ཡི། །སྣ་ཚོགས་རིན་པོ་ཆེ་ཡི་གཞི། །མཛེས་པར་བྲིས་ཤིང་སྤྲས་པ་དང་། །ཀུན་འབྱུང་རིན་ཆེན་ཕུང་པོ་འབར། །དབྱིབས་ལེགས་རྫིང་བུ་བྲོ་མཆོག་བསིལ། །རིན་ཆེ་ཁང་པ་སྣ་ཚོགས་དང་། །རྒྱན་དང་དཔག་བསམ་ལྗོན་པའི་ཚལ། །གླུ་དབྱངས་ཚིགས་སུ་བཅད་པའི་སྒྲ། །བླ་རེ་ན་བཟའ་རྒྱལ་མཚན་གདུགས། །དོ་ཤལ་དཔུང་རྒྱན་སེ་མོ་དོ། །བཟའ་དང་བཏུང་བའི་མཆོག་རྣམས་ཀྱིས། །རང་ལ་མཛེས་པར་བརྒྱན་པ་ཡི། །ལྷ་དང་ལྷ་མོ་རྡུལ་སྙེད་ཀྱི། །བྲོ་གར་ལ་སོགས་བསམ་ཡས་ཀྱིས། །ཕྱོགས་བཅུ་ནམ་ཀའི་ཁམས་བཀང་ནས། །དཀྱིལ་འཁོར་ཀུན་ལ་རྒྱས་པར་འབུལ། །ཞེས་གསུངས་པ་དང་དོན་མཐུན་ཏེ། ཅུང་ཟད་བྱེ་བྲག་ཏུ་ན། སྔ་མ་ནི་ཕྱག་རྒྱ་དང་སྔགས་དང་ཏིང་ངེ་འཛིན་དང་ལྡན་པར་དབུལ་བར་གསུངས་ལ། འདི་ནི་ཏིང་ངེ་འཛིན་ཙམ་གྱིས་དབུལ་བར་གསུངས་པའོ། །འདི་ཉིད་ལ་ཡང་། སྔོན་གྱི་ མཁན་པོ་རྣམས་ཀྱི་གདམས་ངག་བརྒྱུད་པ་ལས། སངས་རྒྱས་ཀྱི་ཞིང་དང་གཞལ་ཡས་ཁང་དུ་བཅས་པ་ནི་ཡི་གེ་བྷྲཱུཾ་ལས་སྤྲོས་ཏེ་དབུལ། རིན་པོ་ཆེའི་རྒྱན་གྱི་ཁྱད་པར་རྣམས་ནི་ཡི་གེ་ཏྲཱཾ་ལས་སྤྲོས་ཏེ་དབུལ། གླུ་དབྱངས་དང་སིལ་སྙན་ལ་སོགས་པའི་སྒྲའི་མཆོད་པ་རྣམས་ཡི་གེ་ཧྲཱི་ལས་སྤྲོས་ཏེ་དབུལ། ཁྲུས་ཀྱི་རྫིང་བུ་ལ་སོགས་ས་ཆུའི་ལོངས་སྤྱོད་ཀྱི་རྐྱེན་གྱི་བྱེ་བྲག་ནི་ཡི་གེ་ཁཾ་ལས་སྤྲོས་ཏེ་དབུལ། བདུད་རྩི་ཟས་དང་བཏུང་བ་ནི་ཡི་གེ་ཨ་ལས་སྤྲོས་ཏེ་དབུལ། ན་བཟའ་དང་བླ་བྲེ་དང་རྒྱལ་མཚན་དང་བ་དན་ལ་སོགས་པའི་ལྷབ་ལྷུབ་དང་། དྲི་ལ་སོགས་པ་འདོད་སྤྱོད་ཀྱི་མཆོད་པ་ཕལ་པོ་ཆེ་རྣམས་ནི། ཡི་གེ་ཨོཾའམ་ཧཱུཾ་ལས་སྤྲོས་ཏེ་དབུལ། བྲོ་གར་ལ་སོགས་པའི་འདུ་འཕྲོ་རྣམས་ནི། ཡི་གེ་ཧཾ་ལས་སྤྲོས་ཏེ་དབུལ་ལོ། །ཞེས་བཤད་དོ། །ཚུལ་འདི་དག་དང་སྦྱར་ན་མཆོད་པ་འདི་ལྟ་བུ་ལ་སྔགས་དང་ཕྱག་རྒྱ་དང་ཏིང་ངེ་འཛིན་དང་། ས་བོན་དང་བཅས་པར་མཆོད་ཀྱང་འགལ་བ་མེད་ཀྱི་སྟེང་དུ་ཤིན་ཏུ་ཡང་བྱིན་གྱིས་རློབ་པར་འགྱུར་བར་འཐད་པ་ཉིད་ཡིན་ནོ། །གཞན་ཡང་བཀྲ་ཤིས་ཀྱི་རྫས་ཁྱད་པར་དུ་སྨོས་པ་ནི། སྟོན་པ་བཅོམ་ལྡན་འདས་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུས་བརྒྱན་པའི་ཕྱིར། ཤིན་ཏུ་བཀྲ་ཤིས་པའི་མཚན་དང་ལྡན་པར་འཇིག་རྟེན་དུ་གཤེགས་པའི་ཚེ། ཡེ་ཤེས་ཆེན་པོ་དེའི་ཕྱག་རྒྱ་གཟུངས་ཀྱི་ཚུལ་དུ་བྱིན་གྱིས་བརླབ་པ་ནི། བཀྲ་ཤིས་ཀྱི་ལྷ་མོ་བརྒྱད་ཡིན་ཏེ། དེ་བས་ན་སྐུ་གཟུགས་བྱིན་གྱིས་བརླབ་པ་ལ་ལྷ་མོ་འདི་བརྒྱད་ཀྱི་སྔགས་དང་ཕྱག་རྒྱའི་གཟུགས་ཀྱིས་བརླབ་པ་ནི། ཤིན་ཏུ་ཡང་རིགས་པ་ཡིན་ནོ། །དེ་ཡང་རྒྱལ་མཚན་ནི་སྐུ་ཉིད་ཀྱི་རྟགས་སོ། །གདུགས་ནི་དབུ་གཙུག་ཏོར་གྱིའོ། །དུང་དང་པད་མ་བུམ་པ་ནི་ཚེམས་དང་ལྗགས་དང་མགུལ་གྱི་རྟགས་ཏེ། གསུང་གི་ཕྱག་རྒྱའོ། །དཔལ་བེའུ་ནི་ཐུགས་ཀྱི་ཕྱག་རྒྱའོ། །འཁོར་ལོ་དང་ཉ་ནི་ཕྱག་དང་ཞབས་ཀྱི་མཐིལ་འཁོར་ལོའི་མཚན་དང་ལྡན་པ་དང་། སོར་མོ་རྣམས་ཟླུམ་ཞིང་བྱིན་གྱིས་ཕྲ་བའི་རྟགས་ཏེ། མཛད་པའི་ཕྱག་རྒྱའོ། །དེ་བས་ན་རྫས་འདི་རྣམས་ཀྱིས་ཀྱང་རང་རང་གི་གནས་སུ་གཏུག་ཅིང་བྱིན་གྱིས་བརླབ་པར་བྱའོ། །གཞན་ཡང་སྟོན་པ་སངས་རྒྱས་བཅོམ་ལྡན་འདས་ཀྱིས་བྱང་ཆུབ་ཀྱི་སྙིང་པོ་རྡོ་རྗེ་གདན་དུ་སྲོད་ལ་བདུད་བཏུལ། ཐོ་རངས་མངོན་པར་རྫོགས་པར་སངས་རྒྱས་ཏེ། ཤིན་ཏུ་བཀྲ་ཤིས་པར་མཛད་པའི་དུས་སུ། དཔལ་ཕྱག་ན་རྡོ་རྗེ་ལ་སོགས་པས་དུང་ལ་སོགས་པའི་བཀྲ་ཤིས་ཀྱི་རྫས་རྣམས་ཕྱག་ཏུ་ཕུལ་ཏེ། བཀྲ་ཤིས་པར་བྱིན་གྱིས་བརླབས་པའི་རྫས་རྣམས་བྱ་བ་ཐམས་ཅད་ལ་ཡང་བཀྲ་ཤིས་གསོལ་བ་ཡིན་ན། འདིར་སྐུ་གཟུགས་ལ་སོགས་པ་བྱིན་གྱིས་བརླབ་ཅིང་བཀྲ་ཤིས་གསོལ་བའི་དུས་སུ་ལྟ་སྨོས་ཀྱང་ཅི་དགོས། གཞན་ཡང་ལྷ་མཆོད་པའི་དུས་སུ་ཡོན་བདག་རྣམས་ལ་ཡང་བུམ་པ་ལས་ཁྲུས་ཆབ་ནོད་ཅིང་དབང་ཅི་རིགས་སུ་བསྐུར་བ་ཡང་བྱ་དགོས་ཏེ། རྡུལ་ཚོན་གྱི་དཀྱིལ་འཁོར་དུ་འཇུག་པ་དང་ཚུལ་མཐུན་པ་ཡིན་ནོ། །དེའི་དུས་སུ་ཁ་ཟས་བཟང་པོ་སྤྱན་གཟིགས་སྣ་ཚོགས་ཀྱིས་སྤྲས་པ་རྣམས་ཀྱིས་ཀྱང་། གང་ཟག་རྣམས་ངོ་བསྲོ་ཞིང་བཀྲ་ཤིས་ཚིགས་སུ་བཅད་པ་བརྗོད་པར་བྱའོ། །ཚུལ་འདི་ལྟ་བུ་ལ་གང་ཟག་རྣམས་འཇུག་པར་འགྱུར་བའི་རྒྱུ་ནི། རང་ཡིད་ཆེས་པའི་ལུང་དང་མཐུན་པ་ཡིན་ཏེ། དེ་བས་ན་གང་ཟག་རྣམས་མོས་པ་ཐ་དད་པས། རྒྱུད་ཀྱི་གཞུང་ཉིད་ནས་འབྱུང་བ་ཅུང་ཟད་ཙམ་སྦྱར་བར་བྱ་སྟེ། གང་ཟག་གི་སློབ་དཔོན་རྣམས་ཀྱིས་མཛད་པའི་མཛད་བྱང་རྣམས་ལ་ནི་ཀུན་མཐུན་པར་ཡིད་བརྟན་པར་མི་བྱེད་པའི་ཕྱིར་རོ། །དེ་ལ་སྐུ་གཟུགས་དང་རི་མོའི་རྒྱུད་རྣམས་ལས་དང་དངོས་གྲུབ་ཀྱི་ཆོ་གའི་དབང་དུ་ཤས་ཆེར་གསུངས་ཀྱང་། དེ་དག་ཏུའང་སློབ་མ་གཞུག་པའི་བྱ་བར་བསྟན་པའི་ལུང་གི་ཁུངས་ཀྱང་། དཔལ་སངས་རྒྱས་མཉམ་སྦྱོར་ལས་ཀྱང་གསུངས་ཏེ། འདི་སྐད་དུ། ཁམས་ཀྱི་ངོ་བོ་ཐམས་ཅད་དང་། །དེ་བཞིན་སྲོག་དང་རྩ་ལས་བྱུང་། །རང་གི་ལྷའི་ཆ་ལུགས་སུ། །བསྒྲུབ་པའི་ཕྱག་རྒྱ་རབ་ཏུ་བྱ། །དཀྱིལ་འཁོར་གང་དང་གང་བསྟན་པར། །སྣ་ཚོགས་ཕྱག་རྒྱའི་མཆོད་པ་ཡིས། །སློབ་མའི་ཚོགས་ཀུན་དེ་དང་དེར། །མཆོད་པ་བྱས་ནས་དེ་བསྒྲུབས་སོ། །ཞེས་གསུངས་སོ། །དེ་ལ་སྣ་ཚོགས་ཕྱག་རྒྱའི་མཆོད་པ་ཞེས་པ་ནི། སྒྱུར་བྱེད་ཀྱི་ཕྱག་རྒྱ་ཉི་ཤུ་རྩ་བརྒྱད་ཀྱིས་བསྡུས་པ་སྟེ། །དེ་ལ་སྒྱུར་བྱེད་ཅེས་བྱ་བ་ནི། །ལྕགས་ལ་གསེར་འགྱུར་གྱི་རྩིས་བསྒྱུར་བ་བཞིན་དུ། རྣམ་པར་སྨིན་པའི་ཆོས་སུ་གྲགས་པའི་དངོས་པོ་རྣམས་ལ། སྒྱུར་བྱེད་ཀྱི་ཕྱག་རྒྱ་འདི་རྣམས་ཀྱིས་བཅས་ཤིང་བསམ་སྟེ། ལྷར་བྱིན་གྱིས་བརླབས་ན། སངས་རྒྱས་ཉིད་དུ་བྱིན་གྱིས་རློབ་པར་འགྱུར་བའི་ཕྱིར་དེ་སྐད་ཅེས་བྱའོ། །དེ་ཡང་ཚུལ་འདི་ལྟར་རྒྱུད་དེ་ཉིད་ལས། རྒྱ་འདི་བཅིངས་པ་ཙམ་གྱིས་ནི། །སངས་རྒྱས་ཐམས་ཅད་བྱིན་གྱིས་རློབ། །ཤིན་ཏུ་བྱིན་གྱིས་བརླབས་ནས་ནི། །སངས་རྒྱས་ཐམས་ཅད་འདུལ་བར་འགྱུར། །སངས་རྒྱས་ཀུན་དང་མཉམ་སྦྱོར་བས། །སངས་རྒྱས་ཀུན་དང་མཉམ་པར་འགྱུར། །སངས་རྒྱས་ཀུན་དང་མཉམ་པའི་ཕྱིར། །སངས་རྒྱས་ཐམས་ཅད་འགྲུབ་པར་འགྱུར། །ཞེས་གསུངས་པ་ལྟ་བུ་སྟེ། མདོར་ན་བྱིན་གྱིས་བརླབས་པ་དང་། རང་བཞིན་གཅིག་པ་དང་། གོམས་པའི་མཐུར་གྱུར་པ་གསུམ་གྱི་མཐུ་ལས་གྲུབ་པར་འགྱུར་རོ། །འདི་ནི་གསང་སྔགས་སྤྱིར་བཏང་བའི་དོན་ཡིན་ནོ། །དེ་ལ་ཁྱད་པར་དུ་བྱིན་གྱིས་བརླབ་པ་ནི། རིགས་དྲུག་གི་སརྦ་རྡོ་རྗེ་ཡེ་ཤེས་ཀྱི་ཕྱག་རྒྱ་རྣམས་ཀྱི་སྒོ་ནས་བྱིན་གྱིས་བརླབ་པ་སྟོན་ཏོ། །དེ་བཞིན་དུ་ཕྱག་རྒྱས་དབང་བསྐུར་བ་ཡེ་ཤེས་ཀྱི་ཕྱག་རྒྱ་རྣམས་ཀྱི་སྒོ་ནས་དབང་བསྐུར་བ་བསྟན་ཏོ། །དེའི་ཚེ་ཆོས་ཀྱི་ཕྱག་རྒྱ་རྣམས་བརྗོད་པར་ཡང་བཞེད་དོ། །མཆོད་པ་ནི་ཕྱག་རྒྱ་ཐམས་ཅད་ཀྱང་མཆོད་པར་གསུངས་སོ། །རྒྱུད་དེའི་གཞུང་གི་ལྷའི་ཕྱག་རྒྱ་བཅིངས་ཤིང་བསམ་པ་ཙམ་གྱིས། ལྷར་བྱིན་གྱིས་རློབ་པར་བཞེད་དེ། མདོར་བསྡུ་ན་ལྷ་རྣམས་ལ་ཕྱག་རྒྱའི་མཚན་མ་ཇི་ལྟར་ལྡན་པ་བཞིན་དུ། ཕྱག་རྒྱ་བཅས་པས་འགྲུབ་པར་འགྱུར་བར་གསུངས་ཏེ། འདི་སྐད་དུ། སྨིན་མ་མིག་དང་སོ་དང་མཆུ། །ཁ་དང་ལུས་དང་རྐང་ལག་གིས། །ཆ་ལུགས་བཞིན་དུ་གར་བྱེད་པས། །རབ་ཏུ་བདེ་བ་འགྲུབ་པར་འགྱུར། །ཅེས་གསུངས་པ་ཡིན་ཏེ། མདོར་ན་ལྷའི་ཆ་ལུགས་བཞིན་དུ་ཕྱག་རྒྱ་བཅས་ཤིང་བསམས་པས་འགྲུབ་ཅེས་བྱ་བའི་དོན་ཏོ། །ལྷ་རྣམས་ལ་རྡོ་རྗེ་གོ་ཆའི་བསྲུང་བ་བྱའོ་ཞེས་གྲགས་པ་ཡང་། དེ་ཉིད་ལས། རྡོ་རྗེ་སེམས་དཔའ་དཔལ་སྦྱོར་བ། །ཇི་ལྟའི་ཚུལ་བཞིན་བྱེད་པ་ཡིས། །རྡོ་རྗེ་ཁུ་ཚུར་གཉིས་བཅིངས་ནས། །གོ་ཆ་བགོ་བའི་ཚུལ་དུ་བྱ། །སྤྱི་བོ་དང་ནི་དཔྲལ་བ་གཉིས། །གློ་གཉིས་དང་ནི་རྒྱབ་ཏུ་གཉིས། །རྡོ་རྗེ་འཕྲེང་བས་བཅིངས་པ་དང་། །སངས་རྒྱས་གཙུག་གི་ནོར་བུ་དག ། དར་བཅིང་ཐབས་སུ་བཅིངས་ནས་ནི། །འགྱིང་དང་བཅས་པས་མཐའ་ནས་དགྲོལ། །དར་དཔྱང་པ་ཡི་ཐབས་བྱས་ནས། །ཐལ་མོ་བརྡབ་པར་བརྟན་པར་བྱ། །འདི་ཡིས་བསྲུང་བ་བྱས་ནས་ནི། །རྡོ་རྗེ་སེམས་དཔའ་དཔལ་དང་འདྲ། །མི་ཆོད་པ་དང་མི་ཕྱེད་པའི། །རྡོ་རྗེ་སྐུ་ནི་རབ་ཏུ་འགྲུབ། །དཔལ་རྡོ་རྗེ་གོ་ཆ་ཞེས་པའི་ཕྱག་རྒྱའོ། །ཞེས་གསུངས་སོ། །ཁུངས་སྨོས་པ་འདི་དག་གིས་ནི། སྤྱིར་སྐུ་གཟུགས་བྱིན་གྱིས་བརླབ་པའི་ཚུལ་དང་ལས་དག་ལ། ཐེ་ཚོམ་ཟ་བ་བསལ་བའི་ཕྱིར་དང་། རྒྱུད་འདི་ཉིད་ཀྱི་གཞུང་དུ་རབ་གནས་བྱེད་ན་ཡང་ཚུལ་འདི་ལྟར་བྱའོ། །ཞེས་ཤེས་པར་བྱའོ། །ཞེས་ཤེས་པར་བྱ་བའི་ཕྱིར་སྨོས་པའོ། །འདི་ནི་ཕྱི་རོལ་གྱི་ཕྱག་རྒྱ་གཙོར་སྨོས་པའི་གཞུང་ངོ་། །ནང་སེམས་ཀྱི་ཏིང་ངེ་འཛིན་གཙོར་བྱེད་པའི་དཔལ་གསང་བ་འདུས་པ་ལྟ་བུ་ལས་ནི། རང་བྱིན་གྱིས་བརླབ་པའི་རིམ་པ། བསྙེན་བསྒྲུབ་ཡན་ལག་བཞིའི་ཏིང་ངེ་འཛིན་གྱི་སྒོ་ནས་བྱིན་གྱིས་བརླབ་པར་གསུངས་ཏེ། འདི་སྐད་དུ། བསྙེན་དུས་གཙུག་ཏོར་ཆེན་པོ་ཡི། །གཟུགས་སུ་དམིགས་པ་ཉིད་དུ་སྦྱོར། །ཉེ་བར་བསྒྲུབ་པ་བསྒྲུབ་མཆོག་ལ། །རྡོ་རྗེ་སྐྱེ་མཆེད་རྣམ་པར་དཔྱད། །སྔགས་ཀྱི་བདག་པོ་བསྒོམ་པ་ལ། །བསྒྲུབ་པའི་ཚེ་ན་བསྐུལ་བར་གསུངས། །བསྒྲུབ་པ་ཆེན་པོ་བྱེད་པའི་ཚེ། །རང་སྔགས་རྡོ་རྗེ་ཅན་གྱི་གཟུགས། །དབུ་རྒྱན་ལ་ནི་བདག་པོ་བསམ། །ཡེ་ཤེས་རྡོ་རྗེ་གྲུབ་པར་འགྱུར། །ཞེས་གསུངས་པའི་ཕྱིར། བདག་འདི་ལྟར་བྱིན་གྱིས་རློབ་པ་ཡིན་པས། སྐུ་གཟུགས་ལ་འདི་ལྟར་བྱའོ། །ཞེས་ལུང་བསྟན་པ་མ་མཐོང་ཡང་། འདི་ལྟར་བྱིན་གྱིས་བརླབ་པར་རིགས་པར་མཐོང་ངོ་། །སྤྱིར་རྡུལ་ཚོན་གྱི་དཀྱིལ་འཁོར་དང་། སྐུ་གཟུགས་དང་། མཆོད་རྟེན་དང་། གླེགས་བམ་ལ་སོགས་པ་ཆ་ཤས་ཡོངས་སུ་རྫོགས་པའམ། རྡོ་རྗེ་དང་འཁོར་ལོ་ལ་སོགས་ཏེ། ཆ་ཤས་མ་རྫོགས་པ་ཡང་རུང་སྟེ། ཕྱག་རྒྱ་ཐམས་ཅད་ཀྱང་ཆོས་ཀྱི་དབྱིངས་རྣམ་པར་དག་པ་དང་། ཡེ་ཤེས་ཆེན་པོའི་གཟུགས་བརྙན་དུ་གྱུར་པ། རྣམ་པར་ཐར་པའི་སྒོ་མཐའ་ཡས་པ་མཚོན་པའི་གནས་སུ་གྱུར་པ། ལས་དང་དངོས་གྲུབ་ཐམས་ཅད་པ་ཡིན་པར་ཤེས་པར་བྱའོ། །དེ་ལ་ཆོས་ཀྱི་སྐུ་ཞེས་བྱ་བ་ཡང་། ཕལ་ཆེར་གཉིས་སུ་མེད་པའི་ཡེ་ཤེས་ལ་བྱ་བར་བཞེད་ལ། ཡེ་ཤེས་དེ་ཡང་ལམ་དང་འབྲས་བུར་བཅས་པའི་ཆོས་ཐམས་ཅད་ཀུན་ནས་བསགས་ཤིང་ཡོངས་སུ་རྫོགས་པའི་ལུས་ཡིན་པས། ཆོས་ཀྱི་སྐུ་ཞེས་ཀྱང་བཤད་དོ། །ཡེ་ཤེས་ཆེན་པོ་དེ་ཉིད། སྔོན་གྱི་སྨོན་ལམ་དང་ཐུགས་རྗེ་ཆེན་པོའི་ཤུགས་ཀྱིས་གདུལ་བྱ་རྣམས་ལ་ལོངས་སྤྱོད་རྫོགས་པ་དང་སྤྲུལ་པའི་གཟུགས་ཀྱི་མཚན་ཉིད། དབང་པོའི་སྤྱོད་ཡུལ་དུ་རུང་བར་བྱིན་གྱིས་བརླབ་པས། གཟུགས་ཀྱི་སྐུ་ཞེས་བྱའོ། །དེ་ལྟར་ཆོས་ཀྱི་སྐུ་དང་གཟུགས་ཀྱི་སྐུ་གཉིས་ཕན་ཚུན་མཚོན་བྱ་མཚོན་བྱེད་དུ་སྟོན་པའི་ཚེ། རེས་འགའ་ནི་ཆོས་ཀྱི་སྐུའི་ཡོན་ཏན་གྱི་ཆོས་དེ་ཉིད་མཚན་མའི་གཟུགས་སུ་བྱིན་གྱིས་བརླབས་སོ། །ཞེས་ཆོས་ཀྱི་སྐུའི་རྟགས་སུ་གཟུགས་ཀྱི་སྐུ་སྟོན་ཏོ། །རེས་འགའ་ནི་གཟུགས་ཀྱི་སྐུའི་མཚན་མ་དང་འདྲ་བར་ཆོས་ཀྱི་སྐུ་ལ་འདི་ལྟ་བུའི་ཡོན་ཏན་གྱི་ཆོས་མངའ་འོ། །ཞེས་གཟུགས་ཀྱི་སྐུ་དཔེར་སྟོན་ཏོ། །ཚུལ་འདི་གཉིས་དང་སྦྱར་ན་རབ་གནས་ཀྱི་ཆོ་གའི་དུས་སུ་ཡང་། སྐུ་གཟུགས་དང་རི་མོའི་རྒྱུད་ལྟ་བུ་སྐུ་རྫོགས་པར་བྱུང་བ་ལ་ནི། རབ་གནས་ཀྱི་ཆོ་ག་བྱེད་པའི་དུས་སུ་སྐུའི་མཚན་མ་སྣ་ཚོགས་ཇི་ལྟར་བསྟན་པ་དེ་ཉིད་ཡེ་ཤེས་ཆེན་པོ་ཉིད་དེར་བྱིན་གྱིས་བརླབས་པ་ཡིན་ནོ། །ཞེས་མོས་པ་བསྐྱེད་པར་རིགས་ལ། མཆོད་རྟེན་དང་གླེགས་བམ་ལྟ་བུ་དམ་ཚིག་གི་ཕྱག་རྒྱའི་དབྱིབས་ཡིན་པ་དང་། གལ་ཏེ་གླེགས་བམ་ཆོས་ཀྱི་ཕྱག་རྒྱར་སྒྲུབ་ཀྱང་རུང་སྟེ། འདི་ལྟ་བུ་ལ་རབ་གནས་ཀྱི་ཆོ་ག་བྱེད་པའི་ཚེ་ནི། སྐུའི་མཚན་མ་སྣ་ཚོགས་དང་མཐུན་པའི་ཆོས་ཀྱི་དོན་གྱི་ལུས། སངས་རྒྱས་ཀྱི་གཉིས་སུ་མེད་པའི་ཡེ་ཤེས་ལ་མངའ་སྟེ། ཡེ་ཤེས་དེ་ཉིད་མཆོད་རྟེན་དུ་བྱིན་གྱིས་བརླབ་པའོ། །ཞེས་མོས་པ་བསྐྱེད་པར་རིགས་སོ། །གང་གི་ཕྱིར་ཞེ་ན། མདོ་སྡེ་རབ་ཏུ་གནས་པའི་ལེའུ་ལས། གཟུགས་ཀྱི་མཚན་མ་དང་མཐུན་པའི་ཆོས་ཀྱི་སྐུའི་ལུས་བཤད་དེ། འདི་སྐད། བསྡུ་བའི་དངོས་པོ་བཞིས་བསྡུས་དབུ་བཞི་ལྡན། །སུམ་ཅུ་རྩ་བདུན་བྱང་ཆུབ་ཕྱོགས་ཆོས་རལ་པར་བྱས། །རིག་པ་བསམ་གཏན་ཡེ་ཤེས་ཟེ་བ་སྣ་ཚོགས་ཅན། །ཏིང་འཛིན་སྣ་ཚོགས་ཟེའུ་འབྲུ་རྡུལ་དང་རྣམ་བྲལ་བ། །སྟོང་ཉིད་རྣམ་ཐར་གསུམ་གྱི་ཁ་གདངས་པ། །ཚངས་པའི་གནས་བཞིའི་མཆེ་བ་སོ་དྲང་སྙེར། །ཤེས་རབ་ཡེ་ཤེས་ཉི་ཟླ་འོད་ཟེར་དག་པའི་པད་མ་འདབ་བརྒྱ་ལ། །ཞི་གནས་ལྷག་མཐོང་ཤིན་ཏུ་རྣམ་པར་དག་པའི་མིག་དང་ལྡན། །ཕ་རོལ་ཕྱིན་དྲུག་བདག་གཞན་དོན་བསྒྲུབ་ཤིན་ཏུ་འཇམ་པའི་ཕྱག་དྲུག་དང་། །ཤིན་ཏུ་མགྱོགས་པའི་ཤུགས་དང་ལྡན་པའི་རྫུ་འཕྲུལ་རྐང་པ་བཞི། །འཕགས་པའི་བདེན་བཞི་ཐུགས་སུ་ཆུད་པའི་ཡན་ལག་སྡེར་མོ་རྣོ། །རྟེན་འབྲེལ་བཅུ་གཉིས་རིམས་བརྒྱུད་བཅུ་གཉིས་ལྷུན་འཕགས་གཟུགས། །སྲོག་འཛིན་དབུགས་ལ་མངའ་མཛད་ཤིན་ཏུ་བསྒྲགས་པའི་ཤངས། །དད་པས་རྒྱུད་ལ་རྣ་ལྷགས་གསན་པ་མ་འགགས་བྱམས་དང་ཐུགས་རྗེའི་ཉན་རྣ་ཅན། །བསམ་གཏན་ཏིང་འཛིན་སྙོམས་འཇུག་རི་སུལ་ཕུག་ན་གནས། །ཞེས་གསུངས་པ་ལྟ་བུའི་དོན་གྱིས་ཆོས་ཀྱི་སྐུ་ལ་ཕར་ལྡན་དུ་སྦྱར་ཏེ། དེ་ལྟ་བུའི་ལམ་འབྲས་བུར་བཅས་པའི་ཆོས། ཆོས་དང་ལྡན་པའི་བདག་ཉིད་ཆོས་ཀྱི་སྐུ་དེ་ཉིད་ལམ་དང་འབྲས་བུའི་རིམ་པའི་ཚུལ་དུ་མཆོད་རྟེན་གྱི་དབྱིབས་སུ་བྱིན་གྱིས་བརླབས་སོ། །ཞེས་སམ། ལམ་དང་འབྲས་བུའི་ཆོས་དེ་ཉིད་སྟོན་པའི་སྒྲ་དང་སྒྲ་མཚོན་པའི་ཡི་གེའི་དབྱིབས་རྣམས་ཀྱི་གཞི་གླེགས་བམ་དུ་བསྟན་པ་འདི་ཡིན་ནོ། །ཞེས་བྱ་བར་འགྱུར་རོ། །ཡོངས་སུ་རྫོགས་པའི་སྐུ་གཟུགས་ལ་ནི། ཆོས་ཀྱི་སྐུའི་ཡོན་ཏན་དེ་ཉིད་ལྷ་དང་མིའི་གཟུགས་དང་མཐུན་པའི་སངས་རྒྱས་ཀྱི་སྐུ་གཟུགས་ལ། འདི་ལྟར། དབུ་དང་། དབུ་སྐྲ་དང་། དབུ་རྒྱན་དང་། དབུ་རྒྱན་གྱི་ཟེའུ་འབྲུ་དང་། སྤྱན་དང་། སྙན་དང་། ཤངས་དང་། ཞལ་དང་། ཚེམས་དང་། ཕྱག་དང་། ཞབས་དང་། སོར་མོ་སེན་མོས་བརྒྱན་པ་དང་། དེ་ལྟ་བུ་དང་ལྡན་པའི་སྐུ་ཉིད་དང་། བཞུགས་པའི་གནས་གཞི་གདན་དང་བཅས་པ་འདི་ལྟ་བུ་རྣམས་སུ་བྱིན་གྱིས་བརླབ་པའོ། །ཞེས་མོས་པ་བསྐྱེད་ཅིང་། དེ་དག་གི་སྔགས་དང་ཕྱག་རྒྱ་རྒྱུད་ན་བཞུགས་པ་རྣམས་དང་། སྔོན་གྱི་མཁན་པོ་རྣམས་ཀྱིས་མཛད་པའི་མཛད་བྱང་ན་བཞུགས་ཀྱང་རུང་། དེ་ལྟ་བུའི་སྔགས་དང་ཕྱག་རྒྱ་དང་མི་ལྡན་ཡང་། གང་ཟག་རྣམས་ཀྱིས་བཀུར་སྟིའི་ཚུལ་གྱི་རིམ་གྲོ་མཆོད་པར་བསྟན་པ། དབུ་བཤད་པ་དང་། དབུ་རྒྱན་དབུལ་བ་དང་། དེ་ལ་དར་ཆིངས་དང་། མེ་ཏོག་གི་འཕྲེང་བ་གདགས་པ་དང་། སྐུ་ལ་ན་བཟའ་གསོལ་བ་དང་། སྤྱན་དབྱེ་བ་དང་། སྙན་དང་། ཤངས་དང་། ཞལ་དང་། ལྗགས་དང་། ཚེམས་ཀྱི་རྡུལ་བསལ་བ་ལྟ་བུ་རྣམས་ལ་ཡང་མོས་པ་སྨོན་ལམ་དུ་བཅས་པ་བརྗོད་ཅིང་། ལག་གི་ཕྱག་རྒྱས་དེ་ལྟ་བུའི་ཚུལ་དུ་བྱས་པ་ཉིད་ཕྱག་རྒྱ་ཡིན་ཏེ། དེ་ཡང་རྣམ་པར་སྣང་མཛད་སྒྱུ་འཕྲུལ་དྲྭ་བ་དང་། སརྦ་བུདྡྷ་༼སངས་རྒྱས་མཉམ་སྦྱོར། སརྦ་བུདྡྷ་ས་མ་ཡོ་ག །༽ལས་ཀྱང་གོང་དུ་བསྟན་པ་ཉིད་ཀྱིས་གྲུབ་པ་ཡིན་ལ། ཕྱག་ན་རྡོ་རྗེས་དབང་སྐུར་བའི་ཏན་ཏྲ་ལས་ཀྱང་། རང་གི་ལུས་ངག་ཡིད་གསུམ་དབྱེར་མེད་པར་རྟོགས་ནས་ལྷའི་སྐུ་གསུང་ཐུགས་ཀྱང་དེ་བཞིན་དུ་རྟོགས་ཏེ། ལྷ་དང་བདག་སྐུ་གསུང་ཐུགས་རྡོ་རྗེ་ལྟར་མཉམ་པར་སྦྱར་བ་ནི། སྔགས་པ་མཉམ་པར་གཞག་པ། ཞེས་བྱ་སྟེ། དེའི་ཚེ་ལུས་ཀྱི་བསྐྱོད་པ་ཐམས་ཅད་ནི་ཕྱག་རྒྱ་ཡིན་ལ། ངག་གིས་སྨྲས་པའི་ཚིག་ཐམས་ཅད་ནི་གསང་སྔགས་ཡིན་ནོ། །ཞེས་གསུངས་པ་འདི་ལྟ་བུས་ཀྱང་། ལུང་གིས་གྲུབ་པའང་མཐོང་ལ། ཡོན་ཏན་ཡང་མཐོང་སྟེ། འགལ་བ་ནི་མ་མཐོང་ངོ་། །སྤྱིར་བྱ་བ་དང་། རྣལ་འབྱོར་དང་། རྣལ་འབྱོར་ཆེན་པོའི་རྒྱུད་རྣམས་ནས། སྐུ་གཟུགས་བྲི་བའི་ཆོ་ག་མང་དུ་བཤད་པ་རྣམས་ལ་ཡང་། ཁ་ཅིག་ལས་ནི་མཆོད་པ་དང་བཟླས་པ་ཙམ་བཤད། ཁ་ཅིག་ལས་ནི་སློབ་མ་གཞུག་པའང་བཤད། ཁ་ཅིག་ལས་ནི་སྐུ་གཟུགས་དེ་ཉིད་ལ་བརྟེན་ཏེ་ས་བོན་གྱི་ཡི་གེ་ལས་ལྷའི་སྐུར་བསྐྱེད་པའང་བཤད། ཁ་ཅིག་ལས་ནི་སྐུ་གཟུགས་མངོན་པར་མཆོད་དེ་སྤྱན་དབྱེ་བ་བྱས་ཤིང་བདེན་པའི་བྱིན་རླབས་དམིགས་ལ། མཚན་མ་བརྟགས་ནས་སྔགས་དང་ཕྱག་རྒྱས་བྱིན་གྱིས་བརླབས་ཏེ། མཆོད་པའི་ཆོ་ག་བྱས་ནས་བཟླས་པ་ལ་འཇུག་པ་ལྟ་བུའང་བཤད་ན། དེ་ལ་ཕལ་ཆེར་ནི་གོང་དུ་རྒྱས་པར་བཤད་དོ། །སྤྱན་དབྱེ་བ་ལ་སོགས་པའི་ཆོ་ག་ནི་ངན་སོང་སྦྱོང་བ་ལས། འདི་སྐད་དུ། རས་ལ་བཅོམ་ལྡན་འདས་ཐམས་ཅད་རིག་པ་དེ་བཞིན་དུ་བྲིས་ལ། ཞེས་བྱ་བ་ལས་སོགས་པའི་རི་མོའི་ཆོ་ག་ལེགས་པར་བྲིས་ཟིན་པའི་རྗེས་སུ། དེ་ནས་རི་མོའི་སྐུ་གཟུགས་དེ་མངོན་པར་མཆོད་དེ། བདག་ཉིད་ཀྱིས་སྤྱན་དབྱེ་བ་བྱ་ཞིང་བདེན་པའི་བྱིན་རླབས་དམིགས་པར་བྱའོ། །དེ་ནས་ཅི་སྟེ་མཚན་མ་ཞིག་མཐོང་ན་ནི། མྱུར་དུ་དངོས་གྲུབ་ཐོབ་པར་འགྱུར་རོ། །འོན་ཏེ་མ་མཐོང་ན་ནི་རིང་མོ་ཞིག་ནས་དངོས་གྲུབ་ཏུ་འགྱུར་ཏེ། བཞད་པ་དང་ནི་རྔ་སྒྲ་དང་། །དྲིལ་བུའི་སྒྲ་དང་དེ་བཞིན་འབྲུག ། དགེ་སློང་བྲམ་ཟེའི་བུ་མོ་དང་། །འབྲས་བུ་མཐོང་ན་མྱུར་དུ་ནི། །མཆོག་དང་བར་དང་ཐ་མ་འགྲུབ། །དེ་ནས་གཟུགས་དེ་བྱིན་བརླབས་ཏེ། །སྔགས་དང་ཕྱག་རྒྱས་བྱིན་བརླབས་ནས། །ཅི་བདོག་པས་ནི་མཆོད་པར་བྱ། །ཞེས་གསུངས་ནས། དེ་ནས་བདག་བསྲུང་ནས་བཟླས་པ་ལ་འཇུག་པར་གསུངས་ཏེ། དེ་ལ་སྤྱན་དབྱེ་བ་ནི་རི་མོ་འབྲི་བའི་དུས་སུ་སྤྱན་མ་བྲིས་བར་༼མདོ་ལས། མིག་མ་བྲིས་པར་རྔན་པ་མི་ཐོབ་བཞིན། །གསུངས། ༽བཞག་པ་དེ། རབ་གནས་ཀྱི་དུས་སུ་སྔགས་པ་བདག་ཉིད་ཀྱི་སྔགས་དང་ཕྱག་རྒྱ་དང་ཏིང་འཛིན་གྱིས། སྤྱན་དབྱེ་བ་བྱས་པའི་རྗེས་སུ་རི་མོ་མཁན་དེ་ཉིད་བཀུག་སྟེ། དེས་སྤྱན་བྲིས་ནས་ཁ་ཟས་དང་ཡོན་གྱིས་མཆོད་དེ། མགུ་བར་བྱས་ནས་སླར་བཏང་ངོ་། །ཞེའོ། །བདེན་པའི་བྱིན་རླབས་དམིགས་པ་ནི། འདི་སྐད་དུ། །དཀོན་མཆོག་གསུམ་གྱི་བདེན་པའི་བྱིན་གྱི་བརླབས་ཀྱིས་སྐུ་གཟུགས་འདི་ལ། བདེན་པའི་བྱིན་རླབས་འབྱུང་བ་འགྲུབ་པར་གྱུར་ཅིག །བདག་གི་དངོས་གྲུབ་ཏུ་འགྱུར་བ་ཞིག་ན་ནི། མཚན་མ་འགའ་ཞིག་སྣང་བར་གྱུར་ཅིག །ཅེས་བརྗོད་དེ་སྤྱན་དབྱེ་བའི་ལས་ལ་འཇུག་གོ ། གལ་ཏེ་བདག་སྐལ་བ་དང་ལྡན་པ་ཞིག་ན་ནི། ཇི་སྐད་གསུངས་པའི་མཚན་མ་དེ་དག་རྣ་ལམ་དུ་གྲགས་པ་དང་། མིག་ལམ་དུ་སྣང་བར་འགྱུར་རོ་ཞེའོ། །དེ་ལ་སྔགས་དང་ཕྱག་རྒྱས་བྱིན་གྱིས་བརླབ་པ་ནི། ལྷ་གང་ཡིན་པའི་སོ་སོའི་སྔགས་ཕྱག་རྒྱས་ལྷ་དེ་ཉིད་དུ་བྱིན་གྱིས་བརླབ་པ་དང་། སྐུ་གསུང་ཐུགས་ལ་སོགས་པའི་ཡན་ལག་བྱིན་གྱིས་བརླབ་ཅིང་དབང་བསྐུར་བ་དག་ཡིན་ནོ། །དེ་ཡང་བྱ་བ་དང་། རྣལ་འབྱོར་དང་། རྣལ་འབྱོར་ཆེན་པོ་དག་གི་གཞུང་སྤྱིར་བསྡུ་ན། ཡན་ལག་བྱིན་གྱིས་བརླབ་པའི་སྐབས་སུ། སྐུ་གསུང་ཐུགས་སུ་བྱིན་གྱིས་བརླབ་པ་འདི་ནི། ཐུན་མོང་དུ་སྣང་ངོ་། །གཞན་ཡང་། གཙུག་ཏོར། སྤྱན། ལྗགས། གོ་ཆ་སྟེ་ཡན་ལག་བཞིས་བྱིན་གྱིས་བརླབ་པ་འདི་ཡང་ཐུན་མོང་དུ་སྣང་ངོ་། །ཁྱད་པར་ནི་བྱ་བའི་རྒྱུད་ལྟར་ན་ཡིག་འབྲུའི་སྒོ་ནས་ཡན་ལག་ལྔའི་ཚུལ་གྱིས་བརླབ་པ་འདི་གཙོ་བོར་གསུངས་ཏེ། འདི་ལྟར་སྙིང་པོ་དང་། མཚོག་མ་དང་། སྤྱི་གཙུག་དང་། གོ་ཆ་དང་། མཚོན་ཆའོ། །རྒྱུད་ཁ་ཅིག་ལས། དེ་ལས་ལྷག་པར་གནས་མང་དུ་བྱིན་གྱིས་བརློབ་པ་ཡང་ཡོད་དེ། གཙོ་བོར་ཡིག་འབྲུའི་སྒོ་ནས་ལྷར་བྱིན་གྱིས་རློབ་པར་གསུངས་སོ། །རྣལ་འབྱོར་དང་རྣལ་འབྱོར་ཆེན་པོའི་རྒྱུད་ཐུན་མོང་དུ་ནི། ཆོ་འཕྲུལ་བཞིའི་ཚུལ་གྱིས་བྱིན་གྱིས་བརླབ་པ་ལ། སེམས་མ་བཞིའི་སྔགས་དང་ཕྱག་རྒྱའི་སྒོ་ནས་བརླབ་པར་གསུངས་ཏེ། ཏིཥྛ་ཞེས་བྱ་བའི་སྒྲ་ཡང་། །བརྟན་ཞིང་མི་འགྱུར་བ་ལ་ཡང་འཇུག་གོ །ཕྱག་རྒྱ་ཞེས་བྱ་ཡང་བརྟན་པར་བྱིན་གྱིས་བརླབ་པའི་དོན་ཏེ། དེ་བས་ན་སེམས་མ་བཞིའི་ཕྱག་རྒྱའི་གཟུངས་ཀྱི་ཆོ་འཕྲུལ་བཞིའི་ཚུལ་བརྟེན་པར་བྱེད་པའོ། །ངན་སོང་སྦྱོང་བ་ལས་ནི། རིགས་བཞིའི་འཁོར་ལོ་བསྒྱུར་བ་བཞིའི་སྒོ་ནས། ལྷ་རྣམས་བརྟན་པར་བྱིན་གྱིས་བརློབ་པའང་གསུངས་ཏེ། འདི་སྐད་དུ། དེ་ནས་བཅོམ་ལྡན་འདས་ཕྱག་ན་རྡོ་རྗེ་སྔགས་དང་། རིག་པ་དང་། སྙིང་པོ་དང་། ཕྱག་རྒྱ་ཐམས་ཅད་བརྟན་པར་བགྱི་བའི་ཕྱིར། ཉིད་ཀྱི་སྙིང་པོ་འདི་བཤད་དོ། །ཞེས་གསུངས་པའོ། །དེ་ལ་སྤྱིར་རྒྱུད་ཐམས་ཅད་དུ་ཆ་མཐུན་པར་སྐུ་གསུང་ཐུགས་སུ་བྱིན་གྱིས་བརླབ་པའི་སྙིང་པོ་ནི། སྤྱི་བོར་ཨོཾ། ལྕེ་ལ་ཨཱཾ། སྙིང་གར་ཧཱུྃ་གཞག་པའོ། །དེ་ལས་ལྷའི་སྐུར་བསྐྱེད་པ་ཡང་ཁ་ཅིག་ལས་བཤད་དོ། །དེ་ལ་རྣལ་འབྱོར་ཆེན་པོའི་རྒྱུད་ཐམས་ཅད་ཀྱི་ཕྱི་མའི་ཕྱི་མར་གྲགས་པ། རྣམ་པར་སྣང་མཛད་སྒྱུ་འཕྲུལ་དྲྭ་བ་ལས། སྐུ་གསུང་ཐུགས་བྱིན་གྱིས་བརླབ་པའི་ཕྱག་རྒྱ་བསྟན་པ་ནི། འདི་སྐད་དུ། གང་ཞིག་བཅིངས་པ་ཙམ་གྱིས་སུ། །སྡིག་པ་ཀུན་ལས་རྣམ་གྲོལ་ཞིང་། །འདིར་ནི་ལུས་ནི་བྱིན་བརླབས་ཏེ། །རང་གི་གཟུགས་སུ་རྣམ་བསྒོམས་ན། །སངས་རྒྱས་ཉིད་ཀྱང་ཐོབ་འགྱུར་ན། །དངོས་གྲུབ་གཞན་ལྟ་སྨོས་ཅི་དགོས། །ལག་པ་གཉིས་ཁུ་ཚུར་བཅངས་པ་ལས། མཐེ་བོ་གཉིས་བཏེགས་པ་ནི། དེ་བཞིན་གཤེགས་པའི་སྟེ། སྐུ་བྱིན་གྱིས་བརླབ་པའི་ཕྱག་རྒྱའོ། །དེ་གཉིས་ལས་གཡོན་པའི་མཐེ་བོང་ནང་དུ་བཅུག་སྟེ་གཡས་པའི་མཐེ་བོང་བཏེག་པ་ནི། འཇིག་རྟེན་དབང་ཕྱུག་གི་སྟེ། གསུང་བྱིན་གྱིས་བརླབ་པའི་ཕྱག་རྒྱའོ། །དེ་ཉིད་ལས་གཡས་པའི་མཐེ་བོང་ནང་དུ་བཅུག་སྟེ། གཡོན་པའི་མཐེ་བོང་བཏེག་པ་ནི། རྡོ་རྗེ་འཆང་གི་སྟེ། ཐུགས་བྱིན་གྱིས་བརླབ་པའི་ཕྱག་རྒྱའོ། །གསང་སྔགས་ནི། ཨོཾ་ཨཱ་རྣམ་པར་སྣང་མཛད་དོ། །ཨོཾ་ཧྲཱིཿའོད་དཔག་མེད་དོ། །ཨོཾ་ཧཱུཾ་མི་འཁྲུག་པའོ། །གསང་སྔགས་ཀྱི་ཡི་གེའི་སྙིང་པོའོ། །ཡང་ན་ས་བོན་གྱི་སྔགས་ཀྱིས་བྱེད་ན། ཨོཾ་རྣམ་པར་སྣང་མཛད་ཀྱིའོ། །ཨཱཿའཇིག་རྟེན་དབང་ཕྱུག་གིའོ། །ཧཱུཾ་རྡོ་རྗེ་འཆང་གིའོ། །ཁྱད་པར་དུ་རྡོ་རྗེ་འཆང་ལ། ཟླ་བའི་གཟུགས་ལ་བསྒོམ་ཞེས་བཤད། ཆོ་འཕྲུལ་བཞིའི་ཚུལ་གྱིས་བྱིན་གྱིས་བརླབ་པ་ནི། དེ་ཉིད་ལས། བྱིན་བརླབ་དམ་ཚིག་དབང་བསྐུར་ལ། །རྡོ་རྗེ་སེམས་མ་རིན་ཆེན་དང་། །ཆོས་མ་རྡོ་རྗེ་ལས་མ་བཞི། །སྦྱོར་བ་བས་ནི་རྟག་ཏུ་སྦྱར། ཞེས་གསུངས་པ་སྟེ། རྡོ་རྗེ་བསྡམས་པ་ལས་གུང་མོ་གཉིས་བསྒྲེང་སྟེ། ལྷའི་ཐུགས་ཀར་གཏད་ནས། ཨོཾ་ས་ཏྭ་བཛྲཱི་ཧཱུཾ་ཞེས་བརྗོད་པས། སེམས་དཔའི་རྡོ་རྗེ་བརྟན་པར་བྱིན་གྱིས་བརླབ་པོ། །དེ་ཉིད་ལས་ཚིགས་དབུས་མ་བཅག་སྟེ་རིན་པོ་ཆེ་ལྟར་བྱས་ནས། ལྷ་རྣམས་ཀྱི་དཔྲལ་བར་གཏད་དེ། ཨོཾ་རཏྣ་བཛྲཱི་ཏྲཱཾ་ཞེས་བརྗོད་པས། རིན་པོ་ཆེ་འབར་བའི་དབུ་རྒྱན་དུ་གྱུར་ཏེ། ཁམས་གསུམ་གྱི་ཆོས་ཀྱི་རྒྱལ་པོར་དབང་བསྐུར་བར་བསམ་མོ། །དེ་ཉིད་ལས་པདྨའི་དབྱིབས་སུ་བྱས་ཏེ། ལྷ་རྣམས་ཀྱི་ལྗགས་ལ་གཏད་ནས། ཨོཾ་ངྷརྨ་བཛྲཱི་ཧྲི་ཞེས་བརྗོད་པས། ལྗགས་པདྨ་ལ་སོ་སོའི་ཆོས་ཀྱི་ཡི་གེ་གསལ་བར་གྱུར་ཏེ། དམ་པའི་ཆོས་འབྱུང་བ་ལ་མངའ་བརྙེས་པར་བསམ་མོ། །དེ་ཉིད་ལས་མཐེ་བོང་དང་མཐེའུ་རྩེ་སྤྲད་དེ་ཕྱིར་འགྱེད་ནས། ལྷ་རྣམས་ཀྱི་ཐུགས་གར་གཏད་དེ། ཨོཾ་ཀརྨ་བཛྲཱི་ཨཿཞེས་བརྗོད་པས། ལྷ་རྣམས་ཀྱི་ཐུགས་ཀར་རྡོ་རྗེ་རྒྱ་གྲམ་ལྗང་ཁུ་འོད་འབར་བར་བསམ་ཏེ། འཕགས་པ་མཆོད་པ་དང་འགྲོ་བའི་དོན་བྱེད་པ་བཅས་སངས་རྒྱས་ཀྱི་མཛད་པ་སརྦ་ལྷུན་གྱིས་གྲུབ་པར་མཛད་པ་ལ་མངའ་བརྙེས་པར་བསམ་མོ། །དེའི་འོག་ཏུ་ཡང་སོ་སོ་རང་རང་གི་སྔགས་དང་ཕྱག་རྒྱས་ཀྱང་བྱིན་གྱིས་བརླབ་པོ། །ཞེས་ཀྱང་བཤད་དོ། །ངན་སོང་སྦྱོང་བ་ལས། བདག་ཉིད་ལྷའི་སྐུར་བྱིན་གྱིས་བརླབ་པའི་རིམ་པ་གསུངས་པ་ནི། འདི་སྐད་དུ། ཆོས་རྣམས་ཐམས་ཅད་དངོས་མེད་པར། །སེམས་ཀྱིས་བསྒོམ་པ་བྱས་ནས་ཀྱང་། །ཨ་ལས་ཟླ་བའི་དཀྱིལ་འཁོར་བསམ། །རང་གི་ས་བོན་དེ་དབུས་སུ། །བསམ་ནས་དམ་ཚིག་ཕྱག་རྒྱ་ཡང་། །བསམ་ཞིང་དེ་བཞིན་དུ་ཉིད་དུ། །སྒྲུབ་པ་པོ་ནི་བསྒྱུར་བར་བྱ། །ལྷའི་རྣལ་འབྱོར་ཚུལ་དུ་བསྒྱུར། །དེ་ནས་རང་གི་ས་བོན་དང་། །ཕྱག་རྒྱས་ཕྱག་རྒྱ་དེ་བཞིན་བརླབ། །ལྟག་འོག་གོ་རིམ་ཇི་བཞིན་དུ། །སངས་རྒྱས་རྣམས་ཀྱི་དབང་བསྐུར་རོ། །དེ་ནས་ང་རྒྱལ་བསྐྱེད་ནས་ཀྱང་། །མཁས་པ་ཡིས་ནི་བསྒྲུབ་བྱས་ན། །དེ་བཞིན་གཤེགས་ཀྱང་འགྲུབ་འགྱུར་ན། །དངོས་གྲུབ་གཞན་ལྟ་སྨོས་ཅི་དགོས། །ཞེས་གསུངས་པ་འདི་ཡིན་ཏེ། འདི་ལ་སྔོན་གྱི་མཁན་པོ་རྣམས་ཀྱིས་མངོན་པར་བྱང་ཆུབ་པ་རྣམ་པ་ལྔ་དང་། ཆོ་འཕྲུལ་ཆེན་པོ་བཞིས་རྫོགས་པར་བྱིན་གྱིས་བརླབ་པའི་ཏིང་ངེ་འཛིན་ཡིན་ནོ། །ཞེས་ཀྱང་བཤད། ལ་ལ་ན་རེ། དེ་ལྟར་བསྟན་པ་མེད་དེ་ཆོ་ག་རྣམ་པ་ལྔ་དང་ལྡན་པར་བསྐྱེད་པའི་ལྷ་ལ། བྱིན་གྱིས་བརླབ་པ་དང་དབང་བསྐུར་བ་ཙམ་བྱས་པར་ཟད་དོ། །ཞེས་ཟེར་ན། འདི་ནི་ཚུལ་གཉི་གར་དྲང་དུ་རུང་ན། རྒྱུད་འདིའི་ཚུལ་ནི་བྱ་བའི་རྒྱུད་དང་མཐུན་པར་ཁོག་ཕུབ་ལ། རྣལ་འབྱོར་གྱི་ཚུལ་དང་མཐུན་པ་ཡང་ཡོད་པས། སྤྱིའི་རྒྱུད་དུ་སྣང་སྟེ། གང་དུ་ཡང་ཉེས་པ་མ་མཐོང་ངོ་། །དེ་ལ་གཞུང་འདི་ཉིད་དུ་སྐུ་གསུང་ཐུགས་བྱིན་གྱིས་བརླབ་པའི་སྔགས་དང་ཕྱག་རྒྱ་ལ། ཕྱག་རྒྱ་ནི་གསལ་བ་ཉིད་དུ་གསུངས་སྟེ། འདི་སྐད་དུ། ལག་པ་གཡོན་པ་ཐལ་མོ་གན་རྐྱལ་དུ་པང་དུ་བཞག་ལ། དེའི་སྟེང་དུ་གཡས་པ་བཞག་སྟེ། མཐེ་བོང་གཉིས་རྩེ་སྤྲད་པ་ལ་ཞི་བའི་ལྟ་བས་ལྟ་བ་ནི། དེ་བཞིན་གཤེགས་པའི་རིགས་ཀྱི་ཏིང་ངེ་འཛིན་གྱི་ཕྱག་རྒྱ་སྟེ། དམ་ཚིག་ཡིན་པར་བཤད་དོ། །དེ་ཉིད་ལས་བཟློག་སྟེ། ལྟག་འོག་བསྣོལ་ལ་མཐེ་བོང་དང་མཐེའུ་ཆུང་གཉིས་གཅིག་ལ་གཅིག་ལུ་གུ་རྒྱུད་དུ་བསྣོལ་ལ། སྙིང་གར་བཞག་པ་འདི་ནི་རྡོ་རྗེ་རིགས་ཀྱི་དམ་ཚིག་གི་ཕྱག་རྒྱའོ། །ཐལ་མོ་རྫོགས་པར་སྦྱར་བ་ལས། ལྷག་མ་རྣམས་བརྐྱང་པ་འདི་ནི། པདྨ་རིགས་ཀྱི་པདྨའི་ཕྱག་རྒྱའོ། །ཞེས་གསུངས་པ་འདི་ཡིན་ནོ། །འདིའི་གསང་སྔགས་ནི་ཚོམ་གཅིག་ཏུ་མ་གསུངས་ཀྱང་། སྤྱིར་རྒྱུད་འདི་དཀྱིལ་འཁོར་སརྦ་རིགས་གསུམ་གྱི་ཚུལ་གྱིས་བསྡུས་པར་གསུངས་པས། དེ་བཞིན་གཤེགས་པའི་རིགས་ཀྱི་སྔགས་ནི། བཅོམ་ལྡན་རྣམ་པར་སྣང་མཛད་དམ། ཤཱཀྱ་ཐུབ་པའི་སྙིང་པོ་གང་ཡང་རུང་བ་གཅིག་དང་སྦྱར་བར་བྱ་བའམ། ཡང་ན་སངས་རྒྱས་སྤྱན་གྱི་སྙིང་པོ་གཞུག །རྡོ་རྗེ་རིགས་ཀྱི་གསང་སྔགས་ནི་རྡོ་རྗེ་འཆང་གི་གསང་སྔགས་གང་ཡང་རུང་བ་ཞིག་གམ། ཡང་ན་མཱ་མ་ཀཱིའི་སྙིང་པོའོ། །པད་མ་རིགས་ཀྱི་ཚེ་དཔག་མེད་ཀྱི་སྙིང་པོའམ་ཡང་ན་གོས་དཀར་མོའི་འོ། །གཞན་ཡང་རྒྱུད་འདི་ཉིད་ལས། རིགས་བཞིའི་དེ་བཞིན་གཤེགས་པ་བཞི་གསལ་བར་གསུངས་པ་ནི། ཚེ་དཔག་མེད་ཀྱི་དཀྱིལ་འཁོར་ལས་གསུངས་པའི་དེ་བཞིན་གཤེགས་པ་མི་འཁྲུགས་པའི་སྔགས་དང་། སྣང་བ་མཐའ་ཡས་ཀྱི་གསང་སྔགས་དང་སྦྱར་ཏེ། དེ་བཞིན་གཤེགས་པ་སྔ་མ་བཞིན་དུ་སྦྱར་ཡང་ཉེས་སྐྱོན་མེད་དོ། །རྡོ་རྗེ་གཙུག་ཏོར་གྱི་དཀྱིལ་འཁོར་ཉིད་ཀྱི་དབང་ཕྱུག་བྱས་ནས་བྱིན་གྱིས་བརློབ་པར་འདོད་ན། ཨོཾ་བྲྀ་ཏ་བྲྀ་ཏ་སརྦ་ཨ་བ་ར་ཎ་ནི་ཧཱུཾ་ཕཊ། ཨོཾ་ཏྲ་ཐ་ཏྲ་ཐ་སརྦ་ཨ་བ་ར་ཎ་ནི་ཧཱུཾ་ཕཊ། བི་དྲ་བ་བི་དྲ་བ་སརྦ་ཨ་བ་ར་ཎ་ནི་ཧཱུཾ་ཕཊ། ཅེས་བྱ་བ་འདི་དང་སྦྱར་རོ། །དེ་ནས་བྱིན་གྱིས་བརླབ་པ་ལ་སོགས་པ་འཁོར་ལོ་སྒྱུར་བ་བཞིའི་སྔགས་དང་ཕྱག་རྒྱས་བྱ་བ་ནི། ལག་པ་གཡས་གཡོན་གྱི་གུང་མོ་གཤིབས་ཏེ་བསྒྲེང་ལ། མཛུབ་མོ་གཉིས་རྩེ་སྤྲད་དེ་ཟླུམ་པོར་བྱས་ལ་གུང་མོར་གཞར། སྲིན་ལག་བསྣོལ་མཐེ་བོང་དང་མཐེའུ་ཆུང་སོ་སོར་བསྒྲེང་བ་ནི། ལག་ན་རྡོ་རྗེའི་ཕྱག་རྒྱ་སྟེ། ཨོཾ་བྷྲཱུཾ་དྲུཾ༼འ་ཆུང་ཡོད་པ་ནན་ཐབས་བྲལ། ༽་བཛྲ་པཱ་ཎི་དྲི་ངྷ་ཏིཥྛ་ཧཱུཾ། ཨོཾ་ཧཱུཾ་ཨོཾ། འདིས་ནི་སྤྱིར་བྱིན་གྱིས་བརླབ་པའོ། །ཨོཾ་བཛྲ་ཧཱུཾ་ཕཊ་ཐུགས་བྱིན་གྱིས་བརླབ་པའོ། །དེ་ཉིད་ཀྱི་མཛུབ་མོའི་ཚིགས་བར་མ་བཅག་པ་ནི་དབང་བསྐུར་བ་སྦྱིན་པར་བྱེད་པ་སྟེ། ནམ་མཁའི་སྙིང་པོའི་ཕྱག་རྒྱའོ། །དེ་ཉིད་དཔྲལ་བར་གཏད་དེ། ཨོཾ་དྷྀ་ངྷ་བཛྲ་ཧཱུཾ། ཞེས་བརྗོད་པས་རིན་པོ་ཆེའི་དབུ་རྒྱན་གྱིས་དབང་བསྐུར་བར་བསམ་མོ། །དེ་ཉིད་ལས་མཛུབ་མོ་བསྡམ་ལ་སྲིན་ལག་པདྨ་འདྲ་བར་བྱས་པ་འདི་ནི་པདྨ་ལས་བྱུང་བའི་ཕྱག་རྒྱ་སྟེ། ལྗགས་ལ་གཏད་ལ། ཨོཾ་བཛྲ་ཧཱུཾ་ཅེས་བརྗོད་པས། ཆོས་འབྱུང་བ་ལ་མངའ་བརྙེས་པར་བྱིན་གྱིས་བརླབ་བོ། །གུང་མོ་གཤིབས་ལ་མཛུབ་མོ་དང་སྲིན་ལག་ནང་དུ་བཀུག་སྟེ། ཐ་མ་བཞི་བསྒྲེང་བ་ནི་སྣ་ཚོགས་རྡོ་རྗེ་གཟི་ཅན་གྱི་ཕྱག་རྒྱ་སྟེ། ཐུགས་ཀར་གཏད་ལ། ཨོཾ་བཛྲ་ཧཱུཾ་ཨ་ཞེས་བརྗོད་པས། ཐུགས་ཀར་སྣ་ཚོགས་རྡོ་རྗེ་གཟི་ཅན་བསམས་ཏེ། ཨོཾ་བཛྲ་ཧཱུཾ་ཨཱ། ཞེས་བརྗོད་པས། འཕགས་པ་མཆོད་པ་དང་སེམས་ཅན་གྱི་དོན་བྱེད་པའི་མཛད་པ་ལ་མངའ་བརྙེས་པར་བསམ་མོ། །བྱ་བའི་རྒྱུད་དུ། ཁྱད་པར་དུ་གསུངས་པའི་ཡན་ལག་ལྔ་པའི་སྔགས་རྣམས་ནི། ལྷ་སོ་སོ་རེ་རེ་ལ་ཡན་ལག་ལྔ་པ་ཐ་དད་རེ་རེ་ཡོད་པས་འདིར་མ་བསྡུས་ཏེ། འོན་ཀྱང་སྐུ་གཟུགས་གཞུང་གང་དུ་བཞེངས་སུ་གསོལ་བ་དེའི་ས་བོན་རྣམས་བླངས་ཏེ་སོ་སོར་སྦྱོར་ཅིག །དེ་མི་ནུས་པ་རྣམས་ཀྱི་དོན་དུ། སྤྱི་ཙམ་སྦྱར་ན། སྙིང་པོ་ནི། ཨོཾ་ཨཱཿཧཱུཾ་ཞེས་བྱ་བ་སྤྱིར་འཇུག་པས། སྤྱི་བོར་ཨོཾ། མིག་གཉིས་སུ་ཨཱཿ སྙིང་གར་ཧཱུཾ་གཞག་གོ ། མཚོགས་མ་དང་སྤྱི་གཙུག་ནི་རང་གི་ལྷའི་སྙིང་པོ་གང་ཡིན་ཉིད་གཞག་གོ །གོ་ཅ་ནི་བྲང་དུ་ཏྲུཾ་༼འདི་ཡང་ནན་ཐབས་བྲལ་བས་བཞག །༽གཞག་གོ །མཚོན་ཆ་ནི་ལག་པ་གཉིས་ལ་ཕཊ་གཞག་གོ ། གཙུག་ཏོར། སྤྱན། ལྗགས། གོ་ཅ་བྱིན་གྱིས་བརླབ་པ་ནི་རྣལ་འབྱོར་ཆེན་པོའི་གཞུང་ལྟར་ན། སརྦ་བུདྡྷ་ལས། རྡོ་རྗེ་ཐལ་མོ་མཉམ་སྦྱར་ནས། །མཛུབ་མོ་གཉིས་ཀྱི་རྩེ་མོ་དགུག །མཐེ་བོང་རྩེ་མོ་མཉམ་པར་གཞག །ཁོང་སྟོང་མི་འགྱུར་དམ་པའོ། །སྤྱི་བོའི་མཚམས་སུ་རབ་བཞག་ནས། །འདི་ཡིས་བསྲུང་བར་བྱས་ན་ནི། །སངས་རྒྱས་དངོས་གྲུབ་མ་ལུས་པ། །ལུས་པ་མེད་པ་ཡོངས་སུ་གྲུབ། །གསང་སྔགས་ནི། ན་མ་སྟུ་སརྦ་བུདྡྷ་བྷྱཿཞེས་བརྗོད་པས། དབུ་གཙུག་ཏོར་བྱིན་གྱིས་བརླབ་པར་འགྱུར་རོ། །སྤྱན་བྱིན་གྱིས་བརླབ་པ་ནི། མཛུབ་མོས་མཐེ་བོ་མནན་ནས་ནི། །རང་གི་མཐེ་བོས་མཛུབ་མོ་མནན། །དཔལ་གྲུབ་སྤྱན་གྱི་ཕྱག་རྒྱ་སྟེ། །མཛུབ་མོ་མིག་གི་འབྲས་བུར་བྱ། །རྡོ་རྗེ་ཐལ་མོ་མཉམ་སྦྱར་ནས། །རྡོ་རྗེ་སྤྱན་ནི་གཉིས་དག་ཏུ། །ཁོང་སྟོང་དུ་ནི་སྦྱར་བར་བྱ། །དཔལ་གྲུབ་རྡོ་རྗེ་སྤྱན་ཡིན་ནོ། །གསང་སྔགས་ནི། ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷི་ལོ་ཙ་ན་སརྦཱརྠ་སཱ་ངྷ་ནི་སྭཱ་ཧཱ། འདིས་སྤྱན་ལ་བྱིན་གྱིས་བརླབས་པས། ཡེ་ཤེས་ཀྱི་སྤྱན་དང་ལྡན་པར་འགྱུར་རོ། །ཡང་ན་སྤྱན་གྱི་ཕྱག་རྒྱ་ནི། དཔལ་ལྡན་གཡོན་པ་འགྱིང་དང་བཅས། །དཔལ་ལྡན་ལག་པ་གཡས་པ་ཡི། །པདྨོ་ཁུ་ཚུར་དཔྲལ་བར་བཞག །བདག་གི་མིག་ནི་གྱེན་དུ་བལྟ། །འདི་ནི་རྡོ་རྗེ་སེམས་དཔའི་ཕྱག་རྒྱ་ཐམས་ཅད་རབ་སྒྲུབ་པའོ། །དཔལ་རྡོ་རྗེ་པདྨོ་གྱེན་དུ་འབར་བའི་སྤྱན་ཞེས་བྱ་བའི་ཕྱག་རྒྱའོ། །པདྨའི་ཁུ་ཚུར་ཅེས་བྱ་བ་ནི། རྡེག་པའི་ཁུ་ཚུར་བཅངས་པ་ལས། །མཐེ་བོང་དག་ལ་གུང་མོ་གཞག །པདྨོའི་ཁུ་ཚུར་གྲུབ་པ་སྟེ། །སརྦ་དག་པའི་ལས་ལ་སྦྱར། །ཞེས་པ་འདི་ཡིན་ནོ། །ལྗགས་བྱིན་གྱིས་བརླབ་པ་ནི། རྡོ་རྗེ་ཐལ་མོ་མཉམ་སྦྱར་ནས། །གུང་མོ་མཉམ་པར་རབ་ཏུ་བསྒྲུབ། །མཐེ་བོ་མཐེའུ་ཆུང་འདབ་མ་བཞི། །པདྨ་དྲི་མེད་རབ་ཏུ་རྒྱས། །དཔལ་པདྨོའི་རྒྱལ་པོའི་ཕྱག་རྒྱའོ། །འདི་ལྗགས་ལ་གཏད་དེ་སྔགས་ནི། ཨོཾ་ཤྲི་བཛྲ་པདྨ་བ་ད་བ་མུ་ཁ་ཡོ་གཱི་ཤྭ་ར་ཧི་ཧི་ཧི་ཧི། ཞེས་བརྗོད་ན། ཆོས་ཀྱི་ལྗགས་བྱིན་གྱིས་བརླབ་པར་འགྱུར་རོ། །རྣལ་འབྱོར་རམ་རྣལ་འབྱོར་ཆེན་པོའི་རྒྱུད་སྤྱིར་འབྲངས་ན། དེ་བཞིན་གཤེགས་པའི་སྔགས་དང་ཕྱག་རྒྱས་ནི། གཙུག་ཏོར་བྱིན་གྱིས་བརླབས་པར་འགྱུར་རོ། །སངས་རྒྱས་སྤྱན་གྱི་སྔགས་དང་ཕྱག་རྒྱས་ནི། སྤྱན་བྱིན་གྱིས་བརླབ་པར་འགྱུར་རོ། །རྡོ་རྗེ་ཆོས་ཀྱི་སྔགས་དང་ཕྱག་རྒྱས་ནི། ལྗགས་བྱིན་གིས་བརླབ་པར་འགྱུར་རོ། །རྡོ་རྗེ་བསྲུང་བའི་སྔགས་དང་ཕྱག་རྒྱས་ནི། གོ་ཅ་བྱིན་གྱིས་བརླབས་པར་འགྱུར་རོ། །དེ་ལ་སངས་རྒྱས་སྤྱན་གྱི་གསང་སྔགས་ནི། ཨོཾ་ག་ག་ལོ་ཙ་ནི་སྭཱ་ཧཱ། ཨོཾ་བུདྡྷ་ལོ་ཙ་ནི་ཧཱུཾ་སིདྡྷ་ན་སྭཱ་ཧཱ། ཞེས་གང་ཡང་རུང་བ་སྦྱར་རོ། །དེ་བཞིན་གཞན་ལས་གསུངས་པ་སྦྱར་ཡང་ཉེས་སྐྱོན་མེད་དོ། །འདི་ལྟར་སྐུ་གཟུགས་ལ་སོགས་པ་བྱིན་གྱིས་རློབ་པའི་ཚེ་སྐུ་གཟུགས་དེ་ཉིད་རྒྱུད་གང་གི་གཞུང་དུ་བཞེངས་སུ་གསོལ་བ་དེ་ཉིད་ཀྱི་བྱིན་གྱིས་བརླབས་པའི་རིམ་པས་བྱིན་གྱིས་བརླབས་ན། སརྦ་སྐྱོན་མེད་ཅིང་འཚམ་པར་འགྱུར་རོ། །སརྦ་བུདྡྷ་ལས། རང་གི་ལྷའི་རྣལ་འབྱོར་གྱིས། །བདག་དང་གཞན་ཡང་མཆོད་པར་བྱ། །ཞེས་འབྱུང་བས། རང་ཉིད་ལྷག་པའི་ལྷའི་ཏིང་ངེ་འཛིན་དུ་གནས་པའི་རྣལ་འབྱོར་པས། རང་གི་ལྷའི་རྒྱུད་དུ་གཏོགས་པ་ལ་མཆོད་པ་མ་གཏོགས་པ་ལྷ་གཞན་དང་གཞན་དག་ལ་ཡང་མཆོད་དུ་རུང་བ་སྐད་དུ་འབྱུང་སྟེ། འོན་ཀྱང་སྐུ་གཟུགས་སོགས་པ་ལ། བྱིན་གྱིས་བརླབ་པ་དང་བསྟུན་དུ་མི་རུང་བས། བྱིན་གྱིས་བརླབ་པ་ནི། སོ་སོའི་གཞུང་ལྟར་བྱས་ན་འཚམས་པར་འགྱུར་རོ། །སངས་རྒྱས་ཐམས་ཅད་དབྱེར་མེད་པ་ཡིན་ནོ། །ཞེས་མོས་པ་གཙོར་བྱས་པ་ཙམ་གྱིས་ཆོ་ག་ཐམས་ཅད་བསྲེས་ན་ཆེན་པོར་མི་རུང་ངོ་། །ལེའུ་དང་པོ་མིག་གི་ཚུལ་རྫོགས་སོ།། །། བླ་མ་ལོ་ཙཱ་བ་རོང་ཟོམ་ཆོས་ཀྱི་བཟང་པོས་མཛད་པའོ། །