ཡོན་ཏན་

ཡོན་ཏན་ཞེས་པ་ནི་"གང་ཞིག་ཡོད་ན་ཕན་ཐོགས་པ་དང་བཟང་པོའི་ཁྱད་ཆོས། སེམས་ཅན་འམ་ཞབས་ཏོག་གང་ཞིག་ལ་ཕན་པ་དང་མདུན་ལྟ་ན་སྡུག་པ་སྦྱིན་ཅིང་རང་ཉིད་ཀྱང་བསྟོད་འོས་སུ་བཟོ་བའི་ཁྱད་ཆོས་ཚང་བ་ཞིག་ལ་ཟེར། དེ་ཡང་"གཞན་དགའ་བ་དེ་ནི་རིན་གྱིས་ཉོ་ནའང་དཀོན་པའི་བྱ་བ་ཡིན་ནོ། །"ཞེས་གསུངས་པ་ལྟར་ཡོན་ཏན་ནི་དཀོན་མཆོག་ལྟ་བུ་ཡིན་ནོ། །

ནང་དོན།

བྱང་ཆུབ་སེམས་དཔའི་ཡོན་ཏན་གྱི་ཚད་མེད་པ། "ཚད་མེད་པ་སྒོམ་པ་ཙམ་ཡང་བསོད་ནམས་ཆེ་ན་སེམས་ཅན་གྱི་དོན་སྦྱོར་བས་སྒྲུབ་པ་སྨོས་ཅི་དགོས་ཏེ།" ཞེས་གསུངས་པ་ལྟར་བྱང་ཆུབ་སེམས་དཔའ་རྣམས་ཀྱི་ཡོན་ཏན་ནི་ཚད་མེད་པ་ཡིན། "བྱང་ཆུབ་སེམས་དཔའ་རྣམས་ཀྱིས་ནམ་མཁའ་དང་མཉམ་པའི་སེམས་ཅན་ཐམས་ཅད་ལ་རེ་རེའི་སྟེ་རང་རང་སོ་སོ་བཞིན་དུ་འདི་ཕྱིའི་སྡུག་བསྔལ་ལམ་མི་བདེ་བ་དཔག་ཏུ་མེད་པ་མཐའ་དག་མ་ལུས་པར་བསལ་བར་འདོད་ཅིང་། དེ་དག་རེ་རེ་ལའང་གནས་སྐབས་དང་མཐར་ཐུག་གི་ཡོན་ཏན་དཔག་ཏུ་མེད་པ་དང་ལྡན་པ་ཉིད་དུ་བསྒྲུབ་པར་འདོད་པ་ལ་བསོད་ནམས་དཔག་ཏུ་མེད་པ་དང་ལྡན་པར་འགྱུར་བ་ལྟ་སྨོས་ཀྱང་ཅི་དགོས་སོ། །"ཞེས་གསུངས་པ་ལྟར་སེམས་ཅན་ཐམས་ཅད་ཀྱི་སྡུག་བསྔལ་སེལ་ཞིང་ཡོན་ཏན་དང་ལྡན་པར་འདོད་པ་ལ་བསོད་ནམས་ཚད་མེད་པ་འབྱུང་ངོ་། །

ཡོན་ཏན་བརྗོད་པའི་ཚུལ། "ཁ་བསག་ཏུ་དོགས་པ་ལྡོག་པའི་ཕྱིར་ཀློག་ནས་ཡོན་ཏན་བརྗོད་པར་བྱ་ཞིང་། གཞན་དག་གཞན་གྱི་ཡོན་ཏན་མངོན་དུ་བརྗོད་ན་དེའི་རྗེས་སུ་བརྗོད་ཅིང་བྱང་སེམས་རང་གི་ཡོན་ཏན་བརྗོད་ན་དེས་བདག་གི་ཡོན་ཏན་དུ་ཤེས་པར་རིགས་པར་བྱ་ཡི་རང་ཁེངས་པར་མི་བྱའོ། །"ཞེས་གསུངས་པ་ལྟར་ཡོན་ཏན་བརྗོད་པ་ལའང་ཚུལ་ཡོད་དོ། །

"རང་གིས་གཞན་གྱི་ཡོན་ཏན་བརྗོད་པའི་དུས་དངོས་སུ་བརྗོད་ན་ཁ་གསག་ཏུ་འགྱུར་གྱིས་དོགས་པའི་ཚེ་ལྐོག་ན་དེའི་ཡོན་ཏན་བརྗོད་པའི་སྒོ་ནས་བསྟོད་པར་བྱ་ཞིང༌།" ཞེས་གསུངས་པ་ལྟར་ཡོན་ཏན་བརྗོད་པ་ལ་ཁ་གསག་ཏུ་དོགས་པ་ཡོད་ན་ལྐོག་ནས་བརྗོད་པར་བྱ་དགོས་པ་ཡིན།

སངས་རྒྱས་དང་སེམས་ཅན་གྱི་ཡོན་ཏན་མཉམ་པ། "སངས་རྒྱས་དང་སེམས་ཅན་རང་རང་གི་བསམ་པའི་ཡོན་ཏན་ཏེ་སེམས་རྒྱུད་ཀྱི་ཡོན་ཏན་དེ་གང་རུང་གིས་དེ་གཉིས་འདྲ་བའམ་མཉམ་པ་ཡིན་ནོ་ཞེས་བརྗོད་པ་མིན་ན། འོ་ན་ཅི་ཞེ་ན་དེ་གཉིས་ལ་བརྟེན་ནས་འབྲས་བུ་སངས་རྒྱས་ཀྱི་ཆོས་རང་རྒྱུད་ལ་འགྲུབ་པའི་ཆ་ནས་འདྲ་བ་ལས་མཉམ་པར་བརྗོད་པ་ཡིན་ཏེ་དེས་ན་སངས་རྒྱས་རྣམས་དང་མཚུངས་པར་སེམས་ཅན་རྣམས་ལའང་རང་རྒྱུད་ལ་སངས་རྒྱས་བསྐྱེད་པའི་ཡོན་ཏན་ཡོད་པ་དེའི་ཕྱིར་སངས་རྒྱས་དང་སེམས་ཅན་དེ་དག་འདྲ་བའམ་མཉམ་པར་བཤད་པ་ཡིན་ནོ། །"ཞེས་གསུངས་པ་ལྟར་སངས་རྒྱས་དང་སེམས་ཅན་གྱི་ཡོན་ཏན་ནི་འབྲས་བུ་སངས་རྒྱས་ཀྱི་ཆོས་སྐྱེད་ནུས་པའི་ཆ་ནས་མཉམ་པ་ཡིན་ནོ། །

ཡོན་ཏན་ཅུང་ཟད་ཀྱང་མཆོད་འོས། "སྙིང་རྗེའི་སེམས་ཀྱིས་སེམས་ཅན་ཉུང་ཟད་རྣམས་ཀྱི་ཀླད་ནད་ཙམ་སྨན་ལ་སོགས་པས་བསལ་ལོ་སྙམ་དུ་བསམ་ན་ཡང་ཕན་འདོགས་བསམ་པ་དང་ལྡན་ཏེ། བསོད་ནམས་དཔག་ཏུ་མེད་པ་དང་ལྡན་པར་འགྱུར་ན་"ཞེས་གསུངས་པ་ལྟར་ཡོན་ཏན་ཅུང་ཟད་ཀྱང་དཔག་ཏུ་མེད་པའི་བསོད་ནམས་ཀྱི་རྒྱུ་ཡིན། "སྟོབས་བཅུ་ལ་སོགས་པའི་ཡོན་ཏན་མཆོག་ཏུ་གྱུར་པའི་ཚོགས་ལ་འགྲན་ཟླ་མེད་པས་གཅིག་པུ་ཡི་ཡོན་ཏན་གྱི་ཆ་ཤས་ཕྲ་མོ་ཅུང་ཟད་ཙམ་ཞིག་སེམས་ཅན་འགའ་ཞིག་ལ་སྣང་ནའང་སེམས་ཅན་དེ་ལ་མཆོད་པའི་དོན་དུ་ཁམས་གསུམ་གྱི་འབྱོར་པའམ་རིན་པོ་ཆེ་སྣ་བདུན་གྱིས་བཀང་སྟེ་ཕུལ་ཡང་ཆུང་པར་འགྱུར་བས་ན་"ཞེས་གསུངས་པ་ལྟར་ཡོན་ཏན་ཅུང་ཟད་ཀྱང་ཞིང་ཁམས་གསུམ་གྱི་རིན་པོ་ཆེས་མཆོད་ན་ཡང་ཆུང་པར་འགྱུར་རོ། །

ཡོན་ཏན་ལ་དགའ་བའི་ཕན་ཡོན། "དེ་ལྟར་བྱས་པས་གཞན་གྱི་དགེ་བ་རྩོམ་པ་ཐམས་ཅད་བདག་གི་དགའ་བའི་རྒྱུར་གྱུར་པའི་ཕྱིར་ཏེ། དགའ་བ་དེ་ནི་རིན་གྱིས་ཉོ་ནའང་དཀོན་པ་དེ་ལྟ་བས་ན་གཞན་གྱིས་བྱས་པའི་ཡོན་ཏན་གྱིས་བདག་དགའ་བའི་བདེ་བ་སྤྱད་པར་བྱ་སྟེ།" ཞེས་གསུངས་པ་ལྟར་གཞན་གྱི་ཡོན་ཏན་ལ་དགའ་བ་ནི་རིན་གྱིས་ཉོ་ཡང་དཀོན་པའི་བདེ་བ་ཡིན། "དེ་ལས་གཞན་དུ་གཞན་གྱི་ཡོན་ཏན་ལ་ཁྲོ་བའི་ཉེས་པས་ཚེ་འདིར་ཡིད་མི་དགའ་ལ་ལུས་སྡུག་བསྔལ་ཞིང༌། ཚེ་ཕ་རོལ་ཏུ་ཡང་སྡུག་བསྔལ་ཆེན་པོ་འབྱུང་ངོ༌། །" ཞེས་གསུངས་པ་ལྟར་ཡོན་ཏན་ལ་ཁྲོ་ན་ཚེ་འདི་ཕ་རོལ་དུ་སྡུག་བསྔལ་འབྱུང་ངོ་། །

རྩོད་སྤོང་།

སེམས་ཅན་དང་སངས་རྒྱས་ཀྱི་ཡོན་ཏན་མི་མཉམ་པ། "འོན་ཀྱང་སེམས་ཅན་རྣམས་ཀྱི་ཤེས་རྒྱུད་ནི་ཆགས་སོགས་ཀྱི་དྲི་མས་བསླད་པའི་སྐྱོན་ཅན་དུ་གྱུར་ལ་སངས་རྒྱས་ལ་ནི་དེ་ལྟ་བུའི་སྐྱོན་མི་མངའ་ཞིང་དེར་མ་ཟད་ཡོན་ཏན་གྱི་ངོས་ནས་རྣམ་པ་ཀུན་ཏུ་མི་མཉམ་པས་ན་སངས་རྒྱས་བཞིན་དུ་སེམས་ཅན་ལ་གུས་པར་བྱ་མི་རིགས་སོ་ཞེ་ན། དེ་གཉིས་ལ་སྐྱོན་ཡོད་མེད་དང་བསམ་པའི་ཡོན་ཏན་ནམ་སེམས་རྒྱུད་ཀྱི་ཡོན་ཏན་རང་གིས་མཚུངས་པར་འཇོག་པ་མིན་གྱི་འབྲས་བུ་སངས་རྒྱས་ཀྱི་བྱང་ཆུབ་སྐྱེད་པའི་ནུས་པ་ལས་དེ་གཉིས་མཚུངས་པར་བཞག་པ་ཡིན་ལ། དེས་ན་སངས་རྒྱས་དང་།མཚུངས་པར་སེམས་ཅན་རྣམས་ལའང་སངས་རྒྱས་ཀྱི་ཆོས་སྐྱེད་ནུས་པའི་ཡོན་ཏན་ཡོད་པ་དེའི་ཕྱིར་དེ་དག་གཉིས་ཀའངོ་སངས་རྒྱས་ཀྱི་ཡོན་ཏན་གྱི་ལོ་ཏོག་ཕུན་སུམ་ཚོགས་པ་བསྐྲུན་པའི་ཞིང་དུ་མཉམ་པར་གསུངས་པ་ཡིན་ནོ། །"ཞེས་གསུངས་པ་ལྟར་སངས་རྒྱས་དང་སེམས་ཅན་གྱི་ཡོན་ཏན་ནི་འབྲས་བུ་སངས་རྒྱས་ཀྱི་ཆོས་སྐྱེད་ནུས་པའི་ཆ་ནས་མཉམ་པ་ཡིན་ནོ། །