ཡེ་ཤེས་སྐུ་མཆོག་རྣམ་བཤད་

༄༅། །སྔགས་པ་ལ་སྤྲིང་པའི་གཏམ་བཤགས་ལེ་བཞི་པའི་ཊཱི་ཀ་དམ་ཚིག་རྒྱལ་མཚོའི་གསལ་བྱེད་ཅེས་བྱ་བ། དཔལ་རྡོ་རྗེ་ཅན་ལ་ཕྱག་འཚལ་ལོ། །དབྱིངས་ཀྱི་རྟག་པ་རྡོ་རྗེའི་སྐུ། །ཀུན་ནས་ཀུན་ཏུ་བཟང་པོའི་ཞལ། །ངོ་བོ་ཉིད་མེད་ཡེ་ཤེས་སྐུ། །བདེ་ཆེན་བྱང་ཆུབ་སེམས་ལ་འདུད། །འདིར་ཆོས་རྒྱལ་ལུང་བསྟན་རྡོ་རྗེའི་ཆོས་ཆར་ཏནྟྲ་ཆེན་པོ་སྡེ་བཅོ་བརྒྱད་དུ་གྲགས་པའི་ནང་ཚན་གླང་པོ་ཆེ་རབ་ཏུ་འབོག་པ་སྟེ། སྐྱེས་བུ་རྣམས་ཀྱི་སྲོག་རྩར་རླུང་ཞུགས་ཏེ་སྨྱོ་པའི་ཕྱི་ནས་དབུ་མར་སེམས་འདུས་པའི་ཆོས་ཉིད་ངོ་མ་འཕྲོད་པ་ལ་བོག་པར་འདོགས་པ་ལྟར། འདིར་བླ་ན་མེད་པའི་རྒྱུད་སྡེ་རིན་པོ་ཆེ་ཀུན་རྫོབ་ཀྱི་ཚིག་ཙམ་ལ་མི་རྟོན་པར་ཆོས་ཉིད་ཀྱི་དོན་རྣམ་པར་མི་རྟོག་པ་ལ་གཙོ་བོར་རྟོན་པའི་ཆོས་ཀྱི་རབ་ཏུ་བྱེད་པ་ལས། བཤགས་པའི་རྒྱུད་ཀྱི་ལེའུ་བཞི་པའི་དོན་བརྗོད་མེད་དོན་བཤགས་ཀྱི་ཊཱི་ཀས་གསལ་བར་བསྟན་པ་ལ། ཨོཾ་ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི། །ཟླ་རྒྱས་བཞིན་དུ་སྤྲོས་པ་མི་མངའ་ཡང་། །ཐུགས་རྗེའི་ཉི་གསལ་འོད་བཞིན་སྙོམས་མཛད་པ། །འདིར་གཤེགས་བདག་ལ་དགོངས་ཤིང་བཞུགས་སུ་གསོལ། །ཅེས་པ་ནི། སངས་རྒྱས་ཆོས་ཀྱི་སྐུ་རྟག་ཏུ་སྤྲོས་པ་ཐམས་ཅད་དང་བྲལ་བའི་དབྱིངས་ནས་ཡེ་ཤེས་ཀྱི་འཁོར་ལོ་སད་པར་བྱས་ཏེ་ཚོགས་ཞིང་དྲང་བའི་དོན་ཏེ། ཡུལ་དང་ཡུལ་ཅན་གྱི་རྟོག་དཔྱོད་ལ་མི་འཇུག་ཅིང་། བདེ་བར་གཤེགས་པའི་ཁམས་ཀྱི་ཡེ༵་ཤེ༵ས་རང་གསལ་བའི་ཆོས་ཉིད་ནི་གཟུགས་ཀྱི་སྐུ་ལས་འདས་པས་ཆོས་ཀྱི་སྐུ༵འི་མཆོག༵་སྟེ་སུས་ཀྱང་མ་བཅོས་པར་རང༵་བཞི༵ན་གྱི་དཀྱི༵ལ་འཁོ༵ར་ཆེན་པོའི་བདག་ཉིད་ནི༵་ཟླ༵་བའི་དཀྱིལ་འཁོར་འོད་སྣང་ཕྱིར་གསལ་དུ་རྒྱས༵་པ་བཞི༵ན་དུ༵་རྟོག་པ་སྣ་ཚོགས་ཀྱི་སྤྲོས༵་པ༵་མི༵་མང༵འ་ཡང༵་ཕྱོགས་རིས་བྲལ་བའི་ཐུག༵ས་རྗེ༵འི་རང་གཟུགས་ཉི༵་མ་ལྟར་གསལ༵་ཞིང་བྱམས་པའི་འོད༵་ཟེར་སེམས་ཅན་ལ་བུ་བཞི༵ན་དུ་སྙོམ༵ས་པར་འཇུག་པར་མཛ༵ད་པ༵་གང་ཞིག་གཟུགས་ཀྱི་སྐུ་རྣམ་པ་ཐམས་ཅད་པའི་བདག་ཉིད་ཅན་དུ་དེང་འདི༵ར་གཤེ༵གས་ནས་བད༵ག་ཅག་ལ་སོགས་པ་ཐམས་ཅད་ལ༵་དགོ༵ངས་ཤིང༵་བཞུག༵ས་སུ༵་གསོ༵ལ། ཅེས་སོ། །བརྗོད་མེད་ཤེས་རབ་མི་གཡོ་ཆོས་ཀྱི་སྐུ། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེར་རོལ་པ་ཡི། །ཞི་ཁྲོ་སྤྲུལ་པའི་སྐུ་ལ་ཕྱག་འཚལ་ལོ། །ཞེས་པ་ནི། ཡོད་མེད་རྟག་ཆད་ཀྱི་དོན་ལ་བརྗོད༵་དུ་མེད༵་པའི་ངོ་བོ་ཉིད་ཀྱི་ཤེས༵་རབ༵་ཀུན་ནས་མི༵་གཡོ༵་མི་འགྱུར་བ་ཆོས༵་ཀྱི༵་སྐུ༵་རྣམ་པ་ཐམས་ཅད་པ་གང་ཞིག །སྡུག་བསྔལ་བ་དང་། ཀུན་འབྱུང་བ་ལ་སོགས་ཏེ་ཟག་པ་ཐམས་ཅད་དང་བྲལ་བའི་བདེ༵་བ་ཆེན་པོའི་རང་བཞིན་ལ་ངེས་པ་ལྔ་ལྡན་དུ་ལོང༵ས་སྤྱོད༵་ཅིང་ཡོན་ཏན་ཐམས་ཅད་རྫོ༵གས་པའི་སྐུ༵་དེ་བཞིན་གཤེགས་པ་རིག༵ས་ལྔ༵འི་བདག་ཉིད་ནི་གཙོ༵་བོ་སྟེ། གང་གི་ཐུགས༵་རྗེ༵་ཆེན་པོ་དང་ཐབས་ལ་མཁས༵་པས་གདན་གསུམ་ཚང་པའི་དཀྱིལ་འཁོར་གྱི་རྣམ་པ་རྒྱ༵་ཆེ༵ར་རོལ༵་པ༵འི༵་སྐུར་སྟོན་པ་ནི་ཞི༵་བ་བཞི་བཅུ་རྩ་གཉིས་དང་། ཁྲོ༵་བོ་ལྔ་བཅུ་རྩ་བརྒྱད་དེ་སྤྲུལ༵་པའི༵་སྐུ༵་དཀྱིལ་འཁོར་གྱི་བདག་ཉིད་ཅན་རྣམས་ལ༵་ཕྱག༵་འཚལ༵་ལོ༵་ཞེས་པའི་དོན་ནོ། །དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །ཀུན་ཏུ་བཟང་པོ་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེར་ཡོངས་བཀོད་དེ། །ཕྱི་ནང་གསང་བའི་མཆོད་པ་རྒྱ་མཚོས་མཆོད། །ཅེས་པ་ནི། བླ་ན་ཡོད་པ་དངོ༵ས་སུ༵་འབྱོར༵་པ་དང༵་། བླ་ན་མེད་པ་ཡིད༵་ཀྱི༵ས་རྣ༵མ་པར་སྤྲུལ༵་པའི༵་བྱང་ཆུབ་སེམས་དཔའ་ཀུན༵་ཏུ༵་བཟ༵ང་པོ༵འི་ཏིང་ངེ་འཛིན་རྣམ་པ་ཐམས་ཅད་པས་བླ༵་ན་མེད༵་པར་སྤྲུལ་པའི་མཆོད༵་སྤྲིན༵་གྱིས༵་རྣམ་ཐར་གསུམ་དང་ལྡན་པའི་ཀུན་ཏུ་བཟང་མོའི་མཁའ༵་དབྱིང༵ས་ཆོས་ཉིད་ཀྱི་ནམ་མཁའ་རྣ༵མ་པར་དག༵་པའི་ཁྱོན་ཐམས་ཅད་རྒྱ༵་ཆེར༵་ཡོང༵ས་སུ་བཀོད༵་དེ༵། དབང་པོས་ཡུལ་ལ་སྤྱོད་པ་ཕྱིའི༵་མཆོད་པ་དང་། དབང་ཤེས་ཀྱིས་བདེ་སྟོང་དུ་སྤྱོད་པ་ནང༵་གི་མཆོད་པ་དང་། དེ་དག་གི་ངོ་བོ་མཆོད་བྱ་མཆོད་བྱེད་ལས་འདས་པར་རྟོགས་པ་དེ་ཁོ་ན་ཉིད་གསང༵་བའི༵་མཆོད༵་པ༵་དེ་དག་ཐམས་ཅད་ཀྱང་རྣམ་པ་རྒྱ་ཆེ་ལ་དོན་དབྱིངས་ཟབ་པའི་ཆ་ནས་རྒྱ༵་མཚོ༵ས་མཆོ༵ད་ཅེས་སྨོས་པའོ། །ཀུན་ཏུ་བཟང་མོ་གསང་བའི་བྷ་ག་ལ། །རྒྱལ་བའི་དཀྱིལ་འཁོར་མ་ལུས་རབ་འབྱམས་ཀུན། །འདུ་འབྲལ་མེད་པའི་ངང་དུ་རོ་གཅིག་པས། །གཉིས་མེད་བྱང་ཆུབ་སེམས་ཀྱིས་མཉེས་གྱུར་ཅིག །ཅེས་པ་ནི། མཆོད་པའི་ཕྱག་རྒྱ་ཆེན་པོ་སྟེ། དེ་ལ་ཀུན་རྫོབ་དང་དོན་དམ་གཉིས་ལས། དང་པོ་ནི། རྣམ་བཅས་ལྷ་མོ་ལ་བསྟེན་ནས་ཀུན༵་ཏུ༵འམ་དུས་གསུམ་གྱི་རྟོགས་པ་འགགས་པར་བྱེད་པས་ན་བཟང༵་མོ༵་སྟེ། དེ་ཉན་ཐོས་ཀྱི་ཐེག་པ་ཅན་ལ་སོགས་སྐལ་མེད་ལ་གསང༵་བའི༵་དོན། རྣམ་ཐར་སུམ་ལྡན་གྱི་བདག་ཉིད་ཅན་དུ་མཚོན་པའི་བྷ༵་གའི༵་དབྱིངས་ག་ལ༵་བར་རྒྱལ༵་བའི༵་དཀྱིལ༵་འཁོར༵་མ༵་ལུས༵་ཤིང་ལུས་པ་མེད་པ་རབ༵་ཏུ་འབྱམས་ཀླས་པ་ཀུན༵་གདན་གསུམ་འདུ༵་འབྲ༵ལ་མེད༵་པའི༵་ངང༵་དུ༵་རོ༵་གཅིག༵་པས༵་བཞུགས་པ་ལ། ཞུ་བ་དེས་དྲངས་པའི་ཡབ་ཡུམ་གཉི༵ས་སུ་མེད༵་པའི་བྱང༵་ཆུབ༵་སེམ༵ས་ཀྱི༵་དམ་པས༵་མཉེས༵་པར་གྱུར༵་ཅིག༵་སྟེ་ལྷན་སྐྱེས་ཀྱི་བདེ་ཆེན་དང་མཇལ་བའི་དོན་ཏོ། །གཉིས་པ་ལྟར་ན། དུས་གསུམ་ཀུན༵་ཏུ༵་རྟོག་པ་དང་བྲལ་བས་ན་བཟང༵་མོ༵་སྟེ། དེ་ཉིད་སོ་སོ་སྐྱེ་བོ་རྣམས་ལ་རང་བཞིན་གྱིས་གབ་པས་ན་གབ་པའི་གསང་བ་དང་། དབང་བསྐུར་མ་ཐོབ་པ་དང་། སྐལ་མེད་ལ་སྦ་བའི་ཕྱིར་ན་སྦས་ཏེ་གས༵ང་བའི༵་དོན་སྟོང་པ་ཉིད་དང་། མཚན་མ་མེད་པ། སྨོན་པ་མེད་པའི་དབྱིངས་རྡོ་རྗེ་བཙུན་མོའི་བྷ༵་ག༵་ལ༵་རྒྱལ༵་བའི༵་དཀྱིལ༵་འཁོར༵་མ༵་ལུས༵་ཤིང་རབ༵་ཏུ་འབྱམ༵ས་ཀླས་པ་ཀུན༵་ཆོས་ཉིད་བརྗོད་པ་དང་བྲལ་བའི་ཀློང་ཆེན་པོར་དུས་གསུམ་འདུ༵་འབྲལ༵་མེད༵་པའི༵་ངང༵་དུ༵་ཆོས་མཉམ་པར་རོ༵་གཅིག༵་པ༵ས་ན། གཉིས༵་སུ་མེད༵་པ་དོན་དམ་པའི་བྱང༵་ཆུབ་སེམས༵་ཀྱི་རྟོགས་པ་ཁྱད་པར་ཅན་གྱིས༵་མཉེ༵ས་པར་གྱུ༵ར་ཅིག༵་ཅེས་པའོ། །སེམས་ཀྱི་རང་བཞིན་ཆོས་ཉིད་ནམ་མཁའ་ཆེ། །ཆོས་རྣམས་རྣམ་དག་ཡེ་ནས་འོད་གསལ་ཞིང་། །རྣལ་འབྱོར་ཉིད་དབྱིངས་སྨྲ་བསམ་བརྗོད་ལས་འདས། །མཉམ་ཉིད་བྱང་ཆུབ་སེམས་ལ་རྟག་ཏུ་འདུད། །ཅེས་པ་ནི། བསྟོད་པའི་ཕྱག་རྒྱ་ཆེན་པོ་སྟེ། སེམ༵ས་ཀྱི༵་རང༵་བཞིན༵་ནམ་མཚན་ཉིད་ནི་མཚོན་བྱེད་དཔེའི་ནམ་མཁའ་སྟོང་ལ་གོ་འབྱེད་པ་ཙམ་མ་ཡིན་པར། མཚོན་བྱ་ཆོས༵་ཉིད༵་ཀྱི་ནམ༵་མཁའ༵་ཆེན༵་པོ། ཀུན་རྫོབ་དང་མཚན་མའི་ཆོས༵་ཅན་རྣམ༵ས་རྣ༵མ་པར་དག༵་པའི་ཆོས་ཉིད་ཡེ༵་ནས༵་རང་བཞིན་གྱི་འོད༵་གསལ༵་ཞིང༵་ཞི་བ་ཆེན་པོའི་བདག་ཉིད་ཅན་དེ་ཁོ་ན་ཉིད་ལ་རྣལ༵་དུ་འབྱོར༵་པའི་སྟོང་པ་ཉིད༵་ཀྱི་དབྱི༵ངས་ཚིག་ཏུ་སྨྲ༵་བ་དང་། བློས་བསམ༵་པ་དང་། རྗོད་བྱེད་ཀྱིས་མཚོན་པའི་ཡུལ་ལས༵་འད༵ས་པ༵་སྟེ། འཁོར་འདས་རོ་མཉམ༵་གྱི་ཆོས་ཉིད༵་དོན་དམ་པའི་བྱང༵་ཆུབ༵་ཀྱི་སེམ༵ས་ལ༵་དྲན་པ་ཉེ་བར་གཞག་པས་རྟག༵་ཏུ༵་འདུད༵་ཅེས་པའི་དོན་ཏོ། །ཀུན་བཟང་རྫོགས་ཆེན་ཡེ་ནས་གདལ་བ་ལ། །ཕྱི་ནང་གསང་བའི་དཀྱིལ་འཁོར་བཀོད་པ་ནི། །ཞེས་པ་ནི། དུས་གསུམ་གྱི་རྟོག་པ་དང་བྲལ་བ་དུས་མེད་ཀུན༵་ཏུ་བཟང༵་པོ། རང་བཞིན་རྫོག༵ས་པ་ཆེན༵་པོ་ཡེ༵་ནས༵་ཀུན་ཁྱབ་ཏུ་གདལ༵་བ༵་ལ༵། ཕྱི༵་བུམ་དབང་གི་དམ་ཚིག་དང་འབྲེལ་པའི་བསྐྱེད་རིམ། ནང༵་གསང་དབང་དང་གསུམ་པའི་དམ་ཚིག་དང་འབྲེལ་བ་རྫོགས་རིམ། གསང༵་བ༵་བཞི་པ་ཚིག་དབང་དང་འབྲེལ་བ་ལྷན་ཅིག་སྐྱེས་པའི༵་ཡེ་ཤེས་ཏེ། དཀྱིལ༵་འཁོ༵ར་གསུམ་གྱི་བདག་ཉིད་ཅན་སྟོན་པའི་བཀོད༵་པ༵་ནི༵། སྣང་སྲིད་རྣམ་དག་ལྷ་དང་ལྷ་མོའི་དབྱིངས། །བྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས། །ཞེས་པས་ཕྱིའི་དཀྱིལ་འཁོར་བསྟན་ཏེ། དེ་ཡང་རྒྱལ་བའི་ཁམས་ལ་སྣང༵་སྲིད༵་སྣོད་བཅུད་དུ་འཛིན་པའི་རྟོགས་པ་རང་མ ཚན་པ་མེད་ཅིང་། མ་དག་པ་དང་ཅུང་ཟད་དག་པ་ལ་སོགས་པའི་ཆ་ལས་འདས་པ་དག་པ་རབ་འབྱམས་ཆེན་པོའི་ཆོས་ཉིད་དུ་རྣམ༵་པར་དག༵་པས་ཞིང་ཁམས་རྒྱ་མཚོ་ལྷ༵་དང༵་ལྷ༵་མོའི༵་དཀྱིལ་འཁོར་དུ་ཡེ་ནས་སངས་རྒྱས་པའི་དབྱིང༵ས། ཕུང་པོ་ལྔ་དང་། འབྱུང་བ་ལྔ་ནི་གཤེགས་པ་གཤེགས་མ་དབང་པོ་དང་དབང་ཤེས། ཡུལ་དུས་སྐྱེ་མཆེད་རྣམས་ནི་རྒྱལ་སྲས་སངས་རྒྱས་འཕགས་པའི་རྣམ་པ་ཅན་དུ་གདོད་ནས་དག་པ་ལས་གནས་འགྱུར་གྱི་ཚུལ་དུ་མ་ཡིན་པས་ན་བྱུང༵་བ་ད༵ང་། འཁོར་བའི་ཁམས་ཀྱང་བདེ་གཤེགས་སྙིང་པོའི་རང་བཞིན་ཅན་ཡིན་པས་གདོད་ཀྱི་གདན་གསུམ་ཚང་བའི་དཀྱིལ་འཁོར་དུ་གནས་འགྱུར་གྱི་ཚུལ་དུ་འཚང་རྒྱ་བའི་ཕྱིར་ན་འབྱུང༵་འགྱུར༵་ཏེ། དེ་ཐམས་ཅད་ཀྱང་སྣང་སྟོང་ཐབས་ཤེས་ཟུང་དུ་འཇུག་པས་ཡབ༵་ཡུམ༵་གྱི་ཚུལ་དུ་ལྷུན༵་གྱིས་རྫོག༵ས་པ་རྣམས༵་སོ། །གསང་ཆེན་རབ་དགྱེས་གཟུངས་ཆེན་བདག་ཉིད་མའི། །མཁའ་དབྱིངས་ཀློང་ཡངས་པདྨོར་འཁྱིལ་བ་ལ། །གཉིས་མེད་ཐིག་ལེ་ཆེན་པོར་འོད་གསལ་ཞིང་། །ཞེས་པས་ནང་གི་དཀྱིལ་འཁོར་བསྟན་ཏེ། གསང༵་བ་ཆེན༵་པོ་མཆོག་ཏུ་མི་འགྱུར་བའི་བདེ་ཆེན་ལ་རབ༵་ཏུ་དགྱེས༵་ཤིང་དགའ་བ་བཞིའི་ཡེ་ཤེས་དམ་པའི་གཟུང༵ས་ཅན༵་ཀུན་ཏུ་བཟང་མོའི་བདག༵་ཉིད༵་མའི༵། རྡོ་རྗེ་བཙུན་མོའི་མཁའ༵་ནམ་མཁའི་དབྱིང༵ས་ལྟར་ཀློང༵་ཡང༵ས་ཤིང་། པ༵དྨ་ལྟར་འཁོར་བའི་འདམ་རྫབ་ཀྱིས་མ་གོས་པར་རྣམ་ཐར་སུམ་ལྡན་གྱི་རང་བཞིན་ཉིད་དུ་འཁྱིལ༵་བ༵་ལ༵། དེ་བཞིན་གཤེགས་པ་རྣམས་ཀྱང་བདེ་སྟོང་གཉིས༵་སུ་མེ༵ད་པའི་ཡེ་ཤེས་ཀྱི་ཐིག༵་ལེ༵་ཆེན༵་པོ༵ར་ཐར་པ་བསྟེན་པར་མཛད་ཅིང་ཆོས་ཉིད་བསམ་གྱིས་མི་ཁྱབ་པའི་ངང་དུ་འོད༵་གས༵ལ་ཞིང༵་ཞི་བ་ནི་ནང་གི་དཀྱིལ་འཁོར་རོ། །མ་བཅོས་སྤྲོས་མེད་བྱང་ཆུབ་སྙིང་པོའི་སྐུ། །ཅིར་ཡང་སྣང་བ་བདེ་ཆེན་གཡུང་དྲུང་ལྷ། །ཞེས་པས་གསང་བའི་དཀྱིལ་འཁོར་བསྟན་ཏེ། །དེ་ཁོ་ན་ཉིད་ཀྱི་དོན་རྟོག་གེའི་བློས་མ༵་བཅོས༵་ཤིང་། རྟག་ཆད་ཀྱི་སྤྲོས༵་པ་དང་སྐྱེ་འགག་གཉིས་སུ་མེད༵་པ་ནི་བྱང༵་ཆུབ༵་སྙིང༵་པོའི༵་སྐུ༵་སྟེ། ནམ་མཁའ་སྟོངས་པ་ལས་ཆོ་འཕྲུལ་སྣ་ཚོགས་སུ་ཤར་བ་ལྟར། ཆོས་ཉིད་དེའི་རང་བཞིན་ཅིར༵་ཡང༵་སྣང༵་ཞིང་ཀུན་ཏུ་འགྲོ་བ༵་ཅན་ཡིན་ཡང་། ངོ་བོའི་ཆ་ནས་མཆོག་ཏུ་མི་འགྱུར་བ་བདེ༵་བ་ཆེན༵་པོའི་བདག་ཉིད་རྣམ་པ་ཐམས་ཅད་པའི་མཆོག་ལྡན་ལ་གཡུང༵་དྲུང༵་གི་ལྷའི༵་སྒྲས་གཞོམ་གཞིག་འཕོ་འགྱུར་དང་བྲལ་བ་ནི་གསང་བ་དེ་བཞིན་ཉིད་ཀྱི་དཀྱིལ་འཁོར་རོ། །འདི་ནས་མར་ཚིག་དོན་གོ་སླ་བས་གཞུང་འགྲེལ་སྟབས་གཅིག་ཏུ་བཤད་པར་བྱ་སྟེ། དེ་ལྟར་དཀྱིལ་འཁོར་གྱི་ཐ་སྙད་གསུམ་དུ་བཞག་པའང་ངོ་བོ་ཉིད་ཀྱི་ཀློང་ན་འདུ༵་འབྲལ༵་མེ༵ད་ཅིང་ཆོས་མཉམ་པ༵་ཉིད་ཀྱང་བསོད་ནམས་དམན་པ་རྣམས་ལ་གབ་པ་ལྟར་བཞུགས་པས་གསང༵་བའི༵་དཀྱིལ༵་འཁོར༵་ནི༵་ཞེས་སྨོས་པ་སྟེ། སྤྲུལ་གཞི་བདག༵་ཉིད༵་ཆེན༵་པོ༵་ཀུན་བཟང་ཡབ་ཡུམ་དང་། མཛད་པ་ཡོངས་སུ་རྫོགས་པའི་རིག༵ས་ལྔ༵་ཡབ༵་ཡུམ༵་དང༵་། བྱང༵་ཆུབ༵་ལྕམ༵་དྲལ༵་ཏེ་རང་དོན་གྱི་མཛད་པ་བརྟུལ་ནས་གཞན་དོན་གྱི་མཛད་པ་ལ་ཞུགས་པའི་བྱང་ཆུབ་སེམས་དཔའ་ཡབ་ཡུམ་བརྒྱད་ཚན་གཉིས་དང་། དེ་བཞིན་དུ་ཁྲོ༵་བོ༵་དང་ཁྲོ༵་མོ༵་ཡབ་ཡུམ་བཅུའི༵་ཚོགས༵། རྡོ༵་རྗེ༵་ལྷ༵་མོ༵་སྟེ་རིགས་མ་བཅུ་དྲུག་དང་། ཚོག༵ས་རྗེ༵་ཚོག༵ས་ཀྱི༵་བདག༵་པོ་སྟེ་རིག༵ས་ལྔ༵་དང་ལྡན་པའི་སྤྱི་དཔལ༵་ཆེན༵་པོ་དང་། མི་དགེ་བཅུ་གནས་དག་པའི་ཁྲོ༵་རྒྱལ༵་ཡབ༵་ཡུམ༵་བཅུ༵། ཕྱི་ལྟར་དུ་གན༵ས་སུམ་ཅུ་རྩ་གཉིས་དང༵་། ཡུལ༵་ཉེར་བཞིའི་དཔའ་བོ་རྣམས་ལ་རང་རང་གི་རིགས་ཀྱི་ཡུམ། རྣལ་འབྱོར་མ་མིང་ཅན་རེ་ཡོད་པ་རྣམས་ནི་ལས་ཀྱི་ཕྱག་རྒྱའི་བདག་ཉིད་ཅན་དང་། དེ་ཡང་ནང་ལྟར་དུ་སྤྱི་བོ་ཛ་ལནྡྷ་ར་སོགས་རྡོ་རྗེ་ལུས་ཀྱི་གྲོང་ཁྱེར་ཆེན་པོའི་རྩ་ཡོངས་སུ་གྱུར་པ་ལས་དཔའ་བོ་དང་། ཁམས་ཡོངས་སུ་གྱུར་པ་ལས་རྣལ་འབྱོར་མ་སྟེ། སྣང་སྟོང་ཐབས་ཤེས་ཟུང་དུ་འབྲེལ་བའི་སྟོང་གཟུགས་ནི་ལྷར་སྣང་ཕྱག་རྒྱ་ཆེན་པོ་དང་། གསང་བ་ལྟར་ན་དེ་དག་ཀྱང་ཧེ་རུ་ཀའི་གནས་བཅུར་བསྡུས་ནས་ས་བཅུའི་ངོ་བོ་ཉིད་དུ་མཚོན་པ་ནི་ཆོས་ཀྱི་ཕྱག་རྒྱ་དང་དཀྱིལ་འཁོར་ཡོངས་རྫོགས་ཀྱི༵་ཐུགས་རྗེ་ཡུལ་ལ་འཇུག་པའི་སྒོ་ནི་ཚད་མེད་བཞི་དང་། དེའི་བདག་ཉིད་ཕྲིན་ལས་རྣམ་བཞི་ཡིན་པས་ན་དམ་ཚིག་གི་ཕྱག༵་རྒྱ༵་ཅན་སྒོ༵་མ༵་བཞི༵། གཞན་ཡང་ཡེ༵་ཤེས༵་ལས་སྤྲུལ༵་པའི༵་ལྷ༵་ཚོག༵ས་མང༵་པོ༵་ཀུན་ཀྱང་དམ་ཚིག་ཅན་དང༵་དམ་ཚིག་གི་རྗེས་སུ་ཞུགས་པ་རྣམས་ལ་མ༵་ལྟར༵་བྱམ༵ས་ཤི༵ང་སྲིང༵་ལྟར༵་དུང༵་བ་ལ༵་སོག༵ས། ལེག༵ས་ཉེས༵་བདེན་ཤན་གྱི་སྟང༵ས་འཛི༵ན་ཅིང་དམ༵་ཚིག༵་གི་རྗེས༵་གཅོད༵་པའི༵་ཕྱི༵་གནས་ཡུལ་ཁྱད་པར་ཅན་ལ་ཡུལ་དང་ཡུལ་ཅན་གཉིས་མེད་དུ་སྤྱོད་ཅིང་། ན༵ང་རྡོ་རྗེ་ལུས་ཀྱི་རྩ་གནས་སོ་སོའི་ཁམས་དང་རོ་གཅིག་ཏུ་འདུ་བའི་དཔའ་བོ་དང་མཁའ༵་འགྲོ༵་རྣལ༵་འབྱོར༵་མ༵འི༵་ཚོག༵ས་ལ་སོགས། མདོར་ན་ཀུན་ཏུ་ཐོགས་མེད་ཀྱི་སྤྱན་དང་ལྡན་པས་དཔང༵་གྱུར༵་ཚད་མ་རྡོ༵་རྗེའི༵་དམ༵་ཚིག་ཅན༵་རྣམས་ཀྱི་ཐུགས་རྗེའི་ཡུལ་ལ་འཇུག་པའི་ཕྱིར་དགོང༵ས་སུ༵་གསོལ༵་ཅེས་སྨོས་ནས། སངས་རྒྱས་རྣམས་ཀྱི་ཐུག༵ས་རྗེའི༵་ཕྲིན་ལས་རྒྱུན་མི་འཆད་པའི་གདུང༵་འཚོབ༵་ཅིང་། མེ་ཏོག་གང་ལ་འཕོག་པའི་ལྷ་སོ་སོའི་རིགས་ཀྱི་བདག་ཉིད་འཛིན༵་པ༵་བདག༵་ཅག༵་གིས༵། འགྲོ༵་བ་ཀུན་ལ་ཕན་པའི༵་དོན༵་དུ༵་ཀུན་རྫོབ་སྨོན་འཇུག་གཉིས་དང་། སྔགས་ཀྱི་དོན་དམ་པའི་རྡོ་རྗེའི་རྣལ་འབྱོར་བྱང༵་ཆུབ༵་ཏུ་སེམ༵ས་བསྐྱེད༵་དེ༵། བསྟན་པ་ལ་རིམ་གྱིས་ཞུགས་ཀྱང་ཐོབ་བྱའི་འབྲས་བུའི་བླ༵་ན་མེད༵་པའི་བྱང༵་ཆུབ༵་ཆེན་པོའི་གོ༵་འཕ༵ང་བགྲོད༵་པར་བྱ༵་བའི༵་ཕྱིར༵་བསྟན༵་པ༵་རྒྱ༵་མཚོ༵་སྟེ། ཀུན་འབྱུང་འདྲེན་པའི་ཐེག་པ་སྡེ་སྣོད་གསུམ་ལས། འཁོར་ལོ་དང་པོའི༵་དགོངས་པ་སོ༵་སོ༵་ཐར་པའི་ཚུལ་ཁྲིམས་ཀྱི་བསླབ་པ་ལ་བརྟེན་ནས་རང་རྒྱུད་ཀྱི་ཉེས་སྤྱོད་སྡོམ་ཞིང་བདེན་པ་བཞིའི་ལམ་ལ་བསྙེན་པ་དང་། འཁོར་ལོ་བར་མཐའི་དགོངས་པ་དེའི་སྟེང་དུ་དགེ་བ་ཆོས་སྡུད་དང་། སེམས་ཅན་དོན་བྱེད་ཀྱི་ཚུལ་ཁྲིམས་བསྣན་ནས་སྨོན་འཇུག་གི་བྱང་སེམས་དང་ལྷག་པ་ཏིང་ངེ་འཛིན་དང་ཤེས་རབ་ཀྱི་བསླབ་པའི་གནས་ལ་སློབ་པ་སྟེ་བ སླབ་པ་གསུམ། དེ་བཞིན་དུ་དཀའ་ཐུབ་རིག་བྱེད་ཀྱི་ཐེག་པ། བྱ་རྒྱུད་སྤྱོད་རྒྱུད་རྣལ་འབྱོར་ཏེ་གསང་སྔགས་ཕྱི་པ་གསུམ་གྱིས་ཁྲུས་དང་གཙང་སྦྲ་ལ་སོགས་ཏེ་རང་རང་གི་དམ་ཚིག་དང་སྡོམ་པའི་གནས། ཁྱད་པར་དབང་སྒྱུར་ཐབས་ཀྱི་ཐེག་པ། རྣལ་འབྱོར་བླ་མེད་ཕྱི་བསྐྱེད་པ་མ་ཧཱ་ཡོ་ག །ནང་ལུང་ཨ་ནུ་ཡོ་ག །གསང་བ་རྫོགས་ཆེན་ཨ་ཏི་ཡོ་ག་གསུམ་གྱིས་བསྐྱེད་རྫོགས་རྫོགས་ཆེན་གྱི་དོན་ལ་འཇུག་ཅིང་། དེ་ཀུན་ཀྱང་ཉན་ཐོས་ཀྱིས་སྤོང་། བྱང་སེམས་ཀྱིས་བསྒྱུར། སྔགས་ཀྱིས་ལམ་དུ་སྤོང་བ་གསུམ་གྱི་ཉོན་མོངས་པའི་ཚོགས་འདུལ་བས་ན་འདུལ༵་ཁྲིམ༵ས་དང༵་། དེ་ཐམས་ཅད་ཀྱང་མཐར་ཐུག་རྡོ་རྗེ་ཐེག་པ་ཐུན་མོང་མ་ཡིན་པའི་སྡོམ་པའི་རང་བཞིན་དངོས་པོ་གནས་འགྱུར། ཡོན་ཏན་ཡར་འཕེལ། དགག་དགོས་ཡོངས་རྫོགས་ཀྱང་། སྐུ༵་ཕྱག་རྒྱ་ཆེན་པོ། གསུང༵་བརྗོད་མེད་ནཱ་ད། ཐུག༵ས་ཟབ་ཞི་སྤྲོས་བྲལ་གྱི་ངང་དུ་མཉམ༵་པར་སྦྱོར༵་བས་ན་སྡོམ༵་པའི༵་མཆོག༵་སྟེ། གསང་བ་སྔགས་ཀྱི་ལས་ཐམས་ཅད་ནི་གཞོམ་གཞིག་དང་བྲལ་ཞིང་ཁྱད་ཆོས་བདུན་ལྡན་ཡིན་པས་རྡོ༵་རྗེ༵་དང་། དེའི་རང་བཞིན་ནི་སྡོམ་པ་ལྟར་བྱ་བ་དང་མི་བྱ་བའི་ངེས་པ་ཅན་མ་ཡིན་པར་ནམ་དུའང་དེ་ལས་འད༵འ་བར་དཀའ༵་བའི་ཕྱིར་ན་དམ༵་ཚིག༵་སྟེ། དུས་གཏན༵་གྱི༵་དོན་དུ་གཉེར༵་བྱ་ཡིན་ལ། དེ་ཡང་ལེའུ་ལྔ་པ་དང་དྲུག་པས་གསལ་བར་བསྟན་པའི་དམ་ཚིག་ཉི་ཤུ་རྩ་ལྔ་སོགས་མདོར་བསྡུ་ན་རིགས་ལྔ་དང་རྩ་ལྟུང་བཅུ་བཞིའི་མཚོན་སྤྱི༵་དང༵་ཁྱད༵་པར༵་ལྷག༵་པའི་དམ༵་ཚིག༵་ཅེས་འགག་བསྡམས་པ་རྣམ༵ས། དུས་སྔ༵་མའི་ཚེའམ་ཕྱི༵་ཕྱིར་ནོས༵་ཤིང༵་གཉེར༵་དུ༵་སྨྲས༵་སོ༵་འཚལ༵་རྣམས་ལོ་ཟླ་ཞག་དུས་ཀྱི་ངེས་པས་ཉམས་པ་དང་། འགལ་བ་དང་། རལ་བ་ལ་སོགས་པའི་ཡུན༵་དུ༵་མི༵་གཏོང༵་ཞིང་གསོར་མི་རུང་བའི་གནས་སུ་འདའ༵་བར༵་མི༵་བགྱི༵ད་པའི་དམ་བཅས་པ་ལ༵། བདུད་ཀྱིས་ཕྱོགས་བསླད་པའི་དབང་དུ་སོང་ནས་དོན༵་ལས༵་གོལ༵་ཞིང༵་གཏན་ནས་ལྡོག༵་པའི་སེམ༵ས་མ༵་མཆི༵ས་ཀྱང༵་། གདོ༵ད་བྱ༵་སྟེ་སླན་ཆད་ལ་བཤོལ་ཞིང་ལོ༵ང་ཡོད༵་སྙམ༵་པའི༵་ལེ༵་ལོ༵འི་དབང་དུ་གྱུར་ནས། ཀློང༵་དུ༵་མ༵་གྱུར༵་པ་དང་། རྩལ༵་ཤུག༵ས་དང་ནུས་པ་ཆུང༵་བ༵་དང༵་། ཤེས༵་བཞི༵ན་གྱི་དྲན་པ་མི༵་ལྡན༵་པ་དང་། ཆང་དང་གཉིད་ལ་སོགས་པ་བག༵་མེ༵ད་པའི་དབང༵་དུ་གྱུར༵་ཏེ༵། བྱང་ཆུབ་ཀྱི་སེམས་དང་བསྐྱེད་རྫོགས་སྒོམ༵་པ་ལ༵་མི༵་བརྩོ༵ན་ཞིང་བསྙེན༵་པའི་དམ་ཚིག་རལ་བ་དང་། སྒྲུབ༵་པ་གཡེལ༵་བ་ལ་སོ༵གས་ཏེ། ཚོར༵་བ་དང༵་ཞེས་པས་ཉོན་མོངས་པའི་གཞན་དབང་དུ་གྱུར་པ་དང་། མ༵་ཚོར༵་བ་སྟེ་མ༵་རི༵ག་པའི་གཞན་དབང༵་གི༵ས་ན༵། སྟོན༵་པ༵འི་བཀའ༵་བདེ་གཤེགས་བཀའ་འདས་ཀྱི་རྩ་ལྟུང་དང༵་། རྡོ་རྗེ་སློབ་དཔོན་གྱིས་བསྒྲགས་པའི་དམ༵་ཚིག་ལས༵་འག༵ལ་བར་གྱུར༵་པ་སྟེ༵། འདི་ལྟར་རྣལ༵་འབྱོར༵་སྒོམ་པ་གང༵་ཞིག༵་རྡོ་རྗེའི་བླ་མ་ལ་བརྙས་པ་ལ་སོགས་རྩ་བའི་ལྟུང་བ་རྣམས་ལ་ཀུན་དཀྲིས་ཚང་བའི་ཕམ་པར་གྱུར་ནས་དམ༵་ཚིག༵་ཉམས༵་པ༵་དག་དང༵་སྐད༵་ཅིག༵་ཙམ༵་དུ་ཡང༵་ཕྲད༵་པར༵་མི༵་བྱ༵་ལ། ལུང་བ་གཅིག་གི་ཆུ་ལའང་མི་བཏུང་ངོ་ཞེ༵ས་རྒྱལ་བའི་བཀ༵འ་ཚད་མ་ལས༵་བྱུང༵་ཞིང༵་དེ༵་ལྟར༵་གྱི་ཉེས་དམིགས་རྣམས་མ༵་རྟོག༵ས་ཏེ༵། དམ་ཚིག་མེད་པ་དག་གི་མདུན་དུ་སྤྱིར་གསང་བཞི་དང་། བར་གསང་བཞི་ལ་སོགས་གསང་བར་འོས་པ་དང་། ཁྱད་པར་གཉེར་དུ་གཏད་པའི་གས༵ང་སྒོ༵་འཆོལ༵་བར་གྱུར་པས༵་དབྱེ༵་བས༵ལ་དཀའ༵་བ༵་སྟེ། དམ་ཚིག་རྒྱ་མཚོའི་གཞུང་བཤིག་པ་དང༵་། སྤྱན་དང་མངོན༵་ཤེས༵་སོ་སོ་རིག་པ་རྣམས་མེད༵་པ༵ས་དངོས་སམ་བརྒྱུད་ནས་སྐྱོན༵་ཅན༵་དུ་གྱུར་པའི་ཚུལ་རྣམས་མ༵་རྟོག༵ས་ཏེ༵། དམ་ཚིག་ཉམ༵ས་པ་དག་དང༵་ཚོག༵ས་ཀྱི་འཁོར་ལོ་འདྲེས༵་ཤིང་། ཉམ༵ས་པ༵་གང་ཞིག་ལས་ལྡོག་སེམས་ཀྱི་བློ་མེད་པ་རྣམས་བསྐ༵ང་བ༵་དང༵་། སྔན་ཆད་བླ་མར་གྱུར་བའི་གནས་དག་ལ་དམ་ཚིག་ཉམ༵ས་བཞིན་པ་སོར་མ་ཆུད་པ་ད༵ང་། རྒྱུད་སྡེ་རྣམས་ནས་སྣོད༵་མིན༵་དུ་བཤད་པ་རྣམ༵ས་ལ༵་གསང་སྔགས་ཟབ་མོའི་ཆོས༵་བཤད༵་པ་དང༵་། མདོར་ན་ཉམ༵ས་པ་ལ༵་མི༵་འཛེམ༵་ཞིང་ཉམ༵ས་པའི༵་སྐྱོ༵ན༵་དང་འགྲོགས་བཞིན་པ་ལ༵་སོག༵ས། དམ་ཚིག་ཉམ༵ས་པའི་གང་ཟག་དང༵་འགྲོག༵ས་ཤིང༵་ཉམ༵ས་པ༵་དེ༵་དག༵་གི༵་སྐྱོན་ནམ། གྲིབ་མ་ལྔའི་ནང་ན་ཐུ་བ་ཉམ༵ས་སྒྲིབ༵་ཀྱི་སྐྱོན༵་ཆེན་པོས༵་གོས༵་པར༵་གྱུར༵་ཏོ༵་འཚལ༵་ལ་བརྟེན་ཚེ༵་འདི༵འི་བདེ་ལེགས་དང་། ཡོན་ཏན་འགྲིབ་ཅིང་འཚོ་བ་ཐུང་ལ། ནད་མང་བ་ལ་སོགས་པའི་སྐྱོན༵་དང༵་ཡུན༵་གྱི༵་སྒྲིབ༵་པ། གྲུབ་པ་ཆེན་པོ་བརྒྱད་དང་། མཆོག་གི་དངོས་གྲུབ་དམ་པའི་གེགས་སུ་འགྱུར༵་བ་རྣམ༵ས་རབ༵་ཏུ་ནོང༵ས་ཤིང་འགྱོད༵་པ་དྲག་པོའི༵་སེམས༵་ཀྱིས༵་མཐོལ༵་ཞིང་བཤག༵ས་པར་བགྱིད་ན༵། ཐུགས་བྱམ༵ས་པ་ཆེན་པོ་དང་ལྡན་པའི༵་ངང་ལ་བསྙེན་བསྲིང་མི་མངའ་བའི་ཐུགས༵་རྗེ༵ས་བདག༵་ཅག་ལ༵་དགོང༵ས་པར་གྱུར་ནས༵་ཀྱང༵་། འདི་ལྟར་རང་བཞིན་རྫོགས་པ་ཆེན་པོའི་དམ་ཚིག་ལ་སྲུང་ཉམས་གཉིས༵་སུ་མེད༵་པས་ན་མེད་པ་དང་། དེའང་དབྱིང༵ས་ལ༵ས་གཞན་དུ་མི༵་འཕོ་ཞིང་མི་འགྱུར༵་བ་གཅིག་པུའི་དམ་ཚིག་ལ་བདག༵་ཅག་ཀྱང་བཀོད༵་དེ༵། དེའི་ཆོས་ཉིད་ཅིར་ཡང་མི༵་དམིག༵ས་པ་ནི་ཕྱལ་པའི་དམ་ཚིག་གི་ངོ་བོ་ཉིད་དང་། ཕྱོགས་དང་རིས་ཆད་མེད་པས་བཏང༵་སྙོམ༵ས་སམ། ཡེ་བསྲུངས་ལྷུན་གྲུབ་ཆེན་པོའི་ངང༵་དུ༵་དུས་གསུམ་སངས་རྒྱས་རྣམས་ཀྱང་རྟག་པ་རྒྱུན་གྱི་འཁོར་ལོ་མི་གཡོ་བ་བཞིན་དུ་བདག་ཅག་ལ་སོགས་པ་བདེ་གཤེགས་སྙིང་པོའི་ཆོས་ཉིད་ཅན་རྣམས་འདྲེས་ཤིང་བཞུག༵ས་པར་གྱུར་ན༵ས་ཀྱང༵་། བདེན་པ་གཉིས༵་མེད༵་ཆེན་པོའི་དོན༵་གྱི༵་ཚངས༵་པ༵་སྒྲིབ་བྲལ་ནི་སངས་རྒྱས་ཆོས་ཀྱི་སྐུ་ཡིན་པས་དེའི་རང་བཞིན་བདག་ལ་སྩལ༵་དུ༵་གསོལ༵། ཅེས་སོ། །དེ་ལྟར་ལམ་བདེན་འདུས་བྱས་པ་རྣམས་ལ་དམ་ཚིག་གི་རྣམ་པར་གཞག་པའང་དོན༵་དམ༵་པར་སྨྲ་བསམ་བརྗོད༵་མེད༵་སྤྲོས༵་པ་ཐམས་ཅད་ལས༵་འདས༵་པ༵་གང་ཞིག་ལ༵། ཀུན་ཏུ་བརྟགས་པའི་བློ་ཅན་གྱི་རྣམ༵་པར་རྟོག༵་པའི་ཆོས་གང༵་ཡང༵་དམིག༵ས་པར༵་མ༵་གྱུར༵་པའི་ཕྱིར་ན་ཉམས་དང་བཤགས་པར་བྱ་བ་གཉིས་སུ་མེད་ཀྱང༵་། ཀུན༵་རྫོབ༵་ཏུ་རྨི་ལམ་དང་། སྒྱུ༵་མ༵་མཁན་གྱིས་སྤྲུལ་པ་བྱས་པ་ལྟ༵་བུའི༵་དབང༵་གིས༵་ན༵། ནོང༵ས་པར༵་མཆི༵ས་ན༵་རབ༵་ཏུ་གནོང༵་ཞིང་འགྱོད་པ་བགྱིད་པས་བཟོ༵ད་པར༵་གསོལ༵། ཅེས་སོ། །འདི་ལ་སྔན་ཆད་འགྲེལ་པ་མ་མཐོང་ཡང་། །བརྗོད་དོན་དབྱིངས་ཆེ་དོན་ཟབ་ཚིག་བརླིང་བས། །མཐའ་ཡས་ཐེག་པའི་སྒོ་ཡིན་དེ་ཡི་ཕྱིར། །ཚིག་དོན་འགལ་བ་མཐོང་ལའང་དཔྱད་པ་བྱས། །དེང་སང་འདི་ན་སྔགས་ཀྱི་བསྟན་པ་ནི། །གཟུགས་བརྙན་ཙམ་དུ་བས་འདིའི་རྙོག་པའི་ཆ། །བགྲུངས་ཕྱིར་རྒྱལ་བའི་དགོངས་པ་ལས་བརྒྱུད་པ། །ཇི་བཞིན་དུས་མཐའི་སྔགས་པ་རྣམས་ལ་སྤྲད། །དགེ་བ་དེ་ཡིས་ཏནྟྲ་རྣམ་གསུམ་གྱི། །རྣམ་པར་རིག་པ་ཅན་དང་མ་ཡིན་པའི། །ཆོས་ཁམས་སྐྱ་རེངས་གསར་པས་དྲངས་པ་ཡི། །འོད་གསལ་སྣང་བྱེད་ཆེན་པོ་ལ་རེག་ཤོག ། ཅེས་པའང་རྭ་ལོའི་བརྒྱུད་འཛིན་ཡང་སྟེངས་པས་ནན་བསྐུལ་ཆེན་པོའི་ངོར་རྫོགས་ཆེན་པ་རང་བྱུང་རྡོ་རྗེས་ངག་ཐོག་ནས་བཀོད་པའོ།། །།