ཡེ་ཤེས་མེད། ཐོབ་པ་མེད། མ་ཐོབ་པ་ཡང་མེད་དོ་

ཡེ་ཤེས་མེད་ཐོབ་པ་མེད། མ་ཐོབ་པ་ཡང་མེད་དོ། ཞེས་པའི་ནང་དོན་རྒྱས་པ། མཚན་མ་མེད་པའི་ཏིང་ངེ་འཛིན་གྱི་སྒོ་ནས་འགྲེལ་པ། ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་ནང་དུ་ཡེ་ཤེས་མེད། ཞེས་གསུངས་པ་ནི། མཚན་མའི་བདག་ཉིད་ཀྱི་སྐྱོན་སྤངས་པའི་ཕྱིར་ཡེ་ཤེས་ཀྱང་རང་གི་ངོ་བོ་དོན་དམ་པར་གྲུབ་པ་མེད་དོ་ཞེས་བསྟན་པའི་ཕྱིར་རོ། ། ཡི་གེ་ཁ་ཅིག་ལས་མི་ཤེས་པ་མེད་དོ་ཞེས་ཀྱང་འབྱུང་སྟེ་དེའི་དོན་ནི་འདི་ཡིན་ཏེ། གལ་ཏེ་སྟོང་པ་ཉིད་ལ་མཚན་མའི་ཀུན་ནས་ཉོན་མོངས་པའི་སྐྱོན་དང་བྲལ་བའི་ཕྱིར་ཡེ་ཤེས་མེད་ན། འོ་ན་མི་ཤེས་པ་རྨོངས་པའི་མཚན་ཉིད་ཡོད་དོ་སྙམ་ན། མི་ཤེས་པ་མེད་དོ་ཞེས་གསུངས་ཏེ། རང་གི་ངོ་བོ་སྟོང་པ་ཉིད་ཤེས་པ་ལ་འདི་ག་ལ་སྲིད།

སྒྲ་བཤད།

ཡེ་ཤེས་མེད།ཅེས་པ་ནི་འཇིག་རྟེན་དང་འཇིག་རྟེན་ལས་འདས་པའི་ཆོས་ཐམས་ཅད་རང་བཞིན་གྱིས་སྟོང་པ་ཉིད་དུ་རྟོགས་པར་བྱེད་པའི་ཡུལ་ཅན་གྱི་ཡེ་ཤེས་དེ་ཉིད་ཀྱང་དོན་དམ་པར་རང་གི་ངོ་བོས་གྲུབ་པ་མེད་པར་བསྟན་པ་ཡིན། མདོར་ན་འདི་ནི་རྟོགས་བྱེད་ཀྱི་ཤེས་རབ་དང་ཡེ་ཤེས་རང་བཞིན་གྱིས་སྟོང་པ་ཉིད་དུ་བསྟན་པའི་དོན་ཡིན། དེ་ནི་རྣམ་པར་མི་རྟོག་པའི་ཡེ་ཤེས་དང་། རྣམ་པ་སྣ་ཚོགས་ཤེས་པའི་ཡེ་ཤེས་སོགས་སྟོང་པ་ཉིད་ལ་མེད་པར་བསྟན་པའོ། ། ཐོབ་པ་མེད།ཅེས་པ་ནི་དོན་དམ་པར་ཐོབ་པར་བྱ་བའི་འབྲས་བུ་སྟེ། སངས་རྒྱས་ཀྱི་ས་དང་། ཡོན་ཏན་སོ་སོ་ཡང་དག་པར་རིག་པ་དང་། སྟོབས། མི་འཇིགས་པ་ལ་སོགས་པའི་ཡོན་ཏན་རྣམས་ཀྱང་རང་བཞིན་གྱིས་གྲུབ་པ་མེད་པར་བསྟན་པ་ཡིན། མདོར་ན་ཐོབ་བྱ་ཐམས་ཅད་ཀྱི་ངོ་བོ་ཉིད་རང་བཞིན་གྱིས་སྟོང་པར་བསྟན་པའི་དོན་ཡིན། དེ་ཡང་སོ་སོ་ཡང་དག་པར་རིག་པ་དང་། སྟོབས་དང་མི་འཇིགས་པ་ལ་སོགས་པའི་ཡོན་ཏན་རྣམས་ཐོབ་པར་བྱེད་པའི་རང་གི་ངོ་བོ་མེད་ན་ཐོབ་པ་ཞེས་བྱ་བ་འཐད་པ་མ་ཡིན་པར་བསྟན་པའི་ཕྱིར་རོ། ། མ་ཐོབ་པ་ཡང་མེད། ཞེས་པ་ནི་ཐོབ་པའི་རྣམ་པར་རྟོག་པ་དགག་པའི་ཕྱིར་རོ། །འདིས་ནི་ཡེ་ཤེས་དང་མི་ཤེས་པ་དང་། ཐོབ་པ་དང་མ་ཐོབ་པ་ལས་འདས་སྒྲོ་འདོགས་པ་དང་། སྐུར་པ་འདེབས་པའི་མཐའ་དང་བྲལ་བའི་དོན་ཟབ་མོ་བསྟན་པར་རིག་པར་བྱའོ། །

མཉམ་བཞག་གི་གཟིགས་སྣང་གི་སྒོ་ནས་འགྲེལ་པ།

སྤྱན་རས་གཟིགས་ཀྱིས་ཤེར་ཕྱིན་ལ་བསླབ་ཚུལ་གསུངས་པ་ནི། གཟུགས་མེད་པ་ནས་ཐོབ་པའི་འབྲས་བུ་མེད་པར་རྟོགས་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ཅིང་གནས་པར་བྱ་བར་གདམས་པ་ཡིན་ནོ། ། ཐོབ་བྱའི་འབྲས་བུ་མེད་པར་བསྟན་པ་ནི། ཐོབ་པ་མེད་ཅེས་པའོ། །ཀུན་རྫོབ་ཏུ་འབྲས་བུ་ཐོབ་པ་ཡོད་པར་བསྟན་པ་ནི། མ་ཐོབ་པ་ཡང་མེད་ཅེས་པའོ། འདིས་མཚོན་ནས་ཕུང་པོ་ལྔ་དང་། སྐྱེ་མཆེད་བཅུ་གཉིས་དང་། ཁམས་བཅོ་བརྒྱད་དང་། འཁོར་འདས་གྱི་རྟེན་འབྲེལ་བཅུ་གཉིས་དང་། ཡུལ་བདེན་པ་བཞི་དང་། ཡུལ་ཅན་ཡེ་ཤེས་རྣམས་ཀྱང་ཀུན་རྫོབ་ཏུ་ཡོད་པར་བསྟན་ཏོ། །

སྒྲོ་འདོགས་སྐུར་འདེབས་ཀྱི་མཐའ་དང་བྲལ་བ།

དེ་བཞིན་དུ་སོ་སོ་ཡང་དག་པར་རིག་པ་དང་། སྟོབས་དང་མི་འཇིགས་པ་ལ་སོགས་པའི་ཡོན་ཏན་རྣམས་དང་། དེ་ཐོབ་པར་བྱེད་པའི་རང་གི་ངོ་བོ་མེད་ན་ཐོབ་པ་ཞེས་བྱ་བ་འཐད་པ་མ་ཡིན་པར་བསྟན་པའི་ཕྱིར། ཐོབ་པ་མེད་དོ་ཞེས་བྱ་བ་གསུངས་སོ། ། དེ་ལྟར་ཐོབ་པའི་རྣམ་པར་རྟོག་པ་དགག་པའི་ཕྱིར་མ་ཐོབ་པ་མེད་དོ་ཞེས་གསུངས་སོ། །འདིས་ནི་ཡེ་ཤེས་དང་མི་ཤེས་པ་དང་། ཐོབ་པ་དང་མ་ཐོབ་པ་ལས་འདས་སྒྲོ་འདོགས་པ་དང་། སྐུར་པ་འདེབས་པའི་མཐའ་དང་བྲལ་བའི་དོན་ཟབ་མོ་བསྟན་པར་རིག་པར་བྱའོ། །

དབུ་མའི་ལུགས་ཀྱི་འགྲེལ་པ།

ཐལ་འགྱུར་པ་ལྟར་ན། གཟུགས་སུ་སྣང་བས་ན་མེད་པའོ། །མེད་པས་ན་གཟུགས་སུ་སྣང་བའོ། །གཟུགས་སུ་སྣང་བ་འདི་ག་རང་མེད་པ་ཡིན་གྱི་དེའི་མེད་པ་དེ་ལས་གཞན་དུ་བཙལ་དགོས་པ་མ་ཡིན། དེ་མེད་བཞིན་དུ་གཟུགས་སུ་སྣང་བ་ཡིན་པས་དེ་ལས་གཟུགས་ལོགས་སུ་ཡོད་པ་མ་ཡིན་ཞེས་པའི་དོན་ནོ། ། གང་ཟག་དང་ཆོས་ཀྱི་བདག་མེད། ཕུང་པོའི་ཚོགས་པ་རང་རྒྱུན་གང་ལའང་བཏགས་པ་མ་ཡིན་པའི་གང་ཟག་རང་རྐྱ་པ་ཆོས་ཅན། རང་བཞིན་གྱིས་མེད་དེ། ཕུང་པོ་དང་གཅིག་དང་ཐ་དད་གང་དུ་ཡང་མེད་པའི་ཕྱིར། དཔེར་ན་རི་བོང་རྭ་བཞིན་ཞེས་པའི་རིགས་པས་འགོག་གོ །

མཇུག་བསྡུ།

ཡེ་ཤེས་མེད། ཐོབ་པ་མེད། མ་ཐོབ་པ་ཡང་མེད་དོ། ཞེས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོའི་གཙོ་བོའི་དོན་སྟོང་པ་ཉིད་ལ་སོགས་པ་རྣམ་པར་ཐར་པའི་སྒོ་གསུམ་གྱི་ནང་ནས། རྣམ་པར་ཐར་པའི་སྒོ་སྨོན་པ་མེད་པ་བསྟན་པ་ཡིན་ཏེ། འདིར་སྐྱོན་སྤངས་པའི་ཕྱིར་རམ། ཡོན་ཏན་ཐོབ་པར་བྱ་བའི་ཆེད་དུ་སྨོན་པར་བྱེད་ལ་དེ་གཉི་ག་བཀག་པས་སྨོན་པ་མེད་པ་ཉིད་ཡིན་ནོ། ། དེ་ལྟར་གོང་དུ་བསྟན་པའི་རྣམ་པས་འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཆོས་གང་ཡང་ཐོབ་པ་མེད་པ་དེའི་ཕྱིར་བྱང་ཆུབ་ཀྱི་ཆེད་དུ་སེམས་པ་དང་། ལྷག་པར་ཆགས་པ་དང་། བསམ་པ་གང་ཡིན་པ་དེ་ཤེས་རབ་ཀྱི་ཕ་རོལ་ཏུ་ཕྱིན་པ་ཇི་སྐད་དུ་བསྟན་པའི་མཚན་ཉིད་བསྒོམ་པའི་ལམ་དང་རབ་ཏུ་ལྡན་པ་ལ་རྟེན་ཅིང་ཤིན་ཏུ་བརྟེན་ནས་བརྩོན་འགྲུས་ཁྱད་པར་ཅན་གྱིས་ཞུགས་ཤིང་གནས་ཏེའོ། །