ཡུལ་ན་མི་གནས་

ཡུལ་ན་མི་གནས་ཞེས་པ་ནི་ཉོན་མོངས་པ་རྣམས་ཕྱིའི་ཡུལ་གཟུགས་སོགས་ཀྱི་སྟེང་ན་རང་བཞིན་གྱིས་གནས་པ་མེད་པ་སྟོན་པའི་ཐ་སྙད་ཅིག་ཡིན། འདི་ནི་དབུ་མ་པའི་ལྟ་བའི་ནང་ནས་ཉོན་མོངས་པ་རྣམས་ཀྱི་གནས་ལུགས་འཆད་པའི་གྲུབ་མཐའི་གནད་གལ་ཆེན་པོ་ཞིག་ཡིན།

ནང་དོན།

རིགས་པའི་སྒོ་ནས་བརྟག་དཔྱད། "རིགས་པ་ཡང་དག་གིས་བརྟགས་ཤིང་དཔྱད་ན་ཉོན་མོངས་པ་རྣམས་ནི་གཟུགས་སོགས་ཕྱི་རོལ་གྱི་ཡུལ་གྱི་སྟེང་ན་རང་བཞིན་གྱིས་མི་གནས་ལ།" ཞེས་སོ། །འདིའི་དོན་ནི་ཕྱིའི་ཡུལ་གཟུགས་སོགས་ལ་ཞིབ་ཏུ་རིགས་པས་བརྟགས་ན་ཉོན་མོངས་པ་རྣམས་དེ་དག་གི་ཁོངས་སུ་རང་བཞིན་གྱིས་གནས་ཚུལ་མེད་པ་ཤེས་ཐུབ་པ་ཞིག་ཡིན། གལ་ཏེ་ཡུལ་ན་གནས་ན་ཐལ་འགྱུར། "ཆགས་སྡང་སོགས་ཉོན་མོངས་རྣམས་ནི་ཕྱི་ཡུལ་དགྲ་གཉེན་ལ་སོགས་པ་དེ་དག་གི་སྟེང་ན་མི་གནས་ཏེ་དེ་དག་མེད་ཀྱང་སྐྱེ་བ་ཡོད་པའི་ཕྱིར་རོ། གལ་ཏེ་ཡོད་ན་དེ་དག་གང་ཟག་གཞན་སུས་མཐོང་ན་བདག་ལྟར་ཆགས་སྡང་སོགས་སྐྱེ་བར་འགྱུར་དགོས་ནའང་མི་སྐྱེ་བའི་ཕྱིར་དེ་ན་མེད་དོ། །"ཞེས་སོ། །འདིས་གསལ་པོར་བསྟན་པ་ནི་གལ་ཏེ་ཉོན་མོངས་པ་ཡུལ་གྱི་ནང་དུ་རང་བཞིན་གྱིས་ཡོད་ན་གང་ཟག་སུ་ལ་བརྟེན་ནའང་ཆགས་སྡང་སྐྱེ་དགོས་པ་ལ། དེ་ལྟར་མ་ཡིན་པས་ཡུལ་ལ་རང་བཞིན་གྱིས་མི་གནས་པར་ཤེས་ཐུབ། དགྲ་བཅོམ་པའི་དཔེ། "ཉོན་མོངས་པ་རྣམས་ནི་གཟུགས་ལ་སོགས་པའི་ཡུལ་ན་རང་བཞིན་གྱིས་མི་གནས་ཏེ། དེ་ལྟར་ན་དགྲ་བཅོམ་པ་རྣམས་ཀྱིས་ཀྱང་གཟུགས་མཐོང་བ་ལ་སོགས་པའི་ཚེ་ན་ཉོན་མོངས་སྐྱེ་བར་ཐལ་བའི་ཕྱིར་རོ། །"ཞེས་སོ། །འདིས་དགྲ་བཅོམ་པ་རྣམས་ཀྱིས་ཕྱིའི་ཡུལ་མཐོང་ཡང་ཉོན་མོངས་པ་སྐྱེ་བ་མེད་པ་དེ་ཡུལ་ན་རང་བཞིན་གྱིས་མི་གནས་པའི་སྒྲུབ་བྱེད་དུ་བསྟན་པ་ཡིན།

ནང་དབང་པོ་ལ་ཡང་མི་གནས།

དབང་པོའི་ཚོགས་ལ་མི་གནས། "མིག་གི་དབང་པོ་ལ་སོགས་པ་ནང་དབང་པོའི་ཚོགས་ལའང་རང་བཞིན་གྱིས་གནས་པ་མིན་ཞིང་།"ཞེས་སོ། །འདིས་ཉོན་མོངས་པ་རྣམས་ནང་གི་མིག་རྣ་སོགས་དབང་པོའི་ཚོགས་ལའང་རང་བཞིན་གྱིས་གནས་པ་མེད་པ་གསལ་བཤད་བྱས་པ་ཡིན། ཆོས་སེམས་པའི་སྐབས། "མིག་ལ་སོགས་པའི་དབང་པོའི་ཚོགས་ལ་ཡང་དེ་ལྟར་གནས་པ་མིན་ཏེ། གནས་ལུགས་ཀྱི་དོན་སེམས་པའི་ཚེ་མིག་ཡོད་ཀྱང་ཉོན་མོངས་མ་དམིགས་པའི་ཕྱིར་རོ། །" ཞེས་སོ། །འདིས་ཆོས་ལ་སེམས་པའི་སྐབས་སུ་དབང་པོ་ཡོད་ཀྱང་ཉོན་མོངས་པ་མ་དམིགས་པ་དང་བསྟུན་ནས་དབང་པོ་ལ་རང་བཞིན་གྱིས་མི་གནས་པ་བསྟན་པ་ཡིན།

བར་སྣང་དང་གཞན་ན་མི་གནས།

བར་སྣང་ན་མི་གནས། "ཡུལ་དབང་དེ་དག་གི་བར་ནའང་རང་བཞིན་གྱིས་གནས་པ་མིན་ལ།" ཞེས་སོ། །འདིས་ཉོན་མོངས་པ་རྣམས་ཡུལ་དང་དབང་པོའི་བར་གྱི་སྣང་བ་ལའང་རང་བཞིན་གྱིས་གནས་པ་མེད་པ་གསལ་བཤད་བྱས། གཞན་དུ་མི་གནས། "དེ་དག་ལས་གནས་གཞན་འགའ་ཞིག་ཏུ་ཡང་གནས་པའི་ངེས་པ་མེད་དོ། །"ཞེས་སོ། །འདིས་ཡུལ་དབང་བར་སྣང་གསུམ་ལས་གཞན་དུ་ཡང་ཉོན་མོངས་པ་རྣམས་གནས་ཚུལ་མེད་པ་གསལ་བྱས།

སྒྱུ་མ་ལྟ་བུའི་གདོང་ལེན།

རང་བཞིན་མེད་ཀྱང་སྣང་བ། རྒྱལ་ཚབ་དར་མ་རིན་ཆེན་གྱིས་གསུངས་པ་ལྟར། "ཉོན་མོངས་འདི་ནི་རང་བཞིན་གྱིས་གྲུབ་པས་སྟོང་བཞིན་དུ་རང་བཞིན་གྱིས་གྲུབ་པར་སྣང་བ་སྒྱུ་མ་དང་འདྲ་བ་དེའི་ཚུལ་རང་བཞིན་གྱིས་གྲུབ་པས་རྩ་བ་ནས་སྤོང་མི་ནུས་སྙམ་དུ་སྙིང་ལ་འཇིགས་པ་སྤོང་ལ་སྟོང་ཉིད་རྟོགས་པའི་ཤེས་རབ་བསྐྱེད་ནས་ཉོན་མོངས་སྤང་བའི་ཕྱིར་བརྩོན་པ་བསྟེན་པར་རིགས།" ཞེས་སོ། །འདིས་ཉོན་མོངས་པ་རྣམས་རང་བཞིན་མེད་ཀྱང་སྣང་བ་སྒྱུ་མ་དང་འདྲ་བར་བསྟན་ཏེ། དེ་ལ་བརྟེན་ནས་སྤང་ཐུབ་པའི་རིགས་པ་གསལ་བཤད་བྱས་པ་ཡིན། རྟོགས་པའི་ཤེས་རབ། དཔའ་བོ་གཙུག་ལག་ཕྲེང་བས་གསུངས་པ་ལྟར། "དེ་ལྟར་བརྟགས་པ་ན་ཡུལ་གཟུགས་སོགས་དྲུག་ལ་མི་གནས་བདག་རྐྱེན་དབང་པོ་དྲུག་ལ་མི་གནས་ཡུལ་དབང་གི་བར་ན་མི་གནས། དེ་ལས་གཞན་ནའང་མི་གནས་ཏེ་དེ་ནི་མ་བརྟགས་པའི་དུས་ན་བདེན་པ་ལྟར་སྣང་བའི་བློ་ཕྱིན་ཅི་ལོག་གི་རང་བཞིན་ཞིག་སྟེ་བརྟགས་པ་ན་བྱུང་སོང་གནས་པ་དང་བྲལ་བ་ཅི་ཡང་མ་ཡིན་པ་ངོ་བོ་ཉིད་ཀྱིས་མ་སྐྱེས་པ་གཟོད་མ་ནས་རྣམ་པར་དག་ཅིང་། འོད་གསལ་བ་ཞིག་སྟེ་འདི་ལ་རང་བཞིན་ཅི་ཡང་མེད་དོ། །"ཞེས་སོ། །འདིས་རིགས་པས་བརྟགས་པ་ན་ཉོན་མོངས་པ་རྣམས་གང་དུ་ཡང་མི་གནས་ཤིང་། རང་བཞིན་གཟོད་ནས་དག་པ་འོད་གསལ་བའི་ངང་ལ་ཤེས་པ་ཡིན།

བསྡུས་དོན།

ཡུལ་ན་མི་གནས་ཞེས་པ་ནི་དབུ་མ་པའི་ལྟ་བའི་ནང་ནས་ཉོན་མོངས་པ་རྣམས་ཀྱི་གནས་ལུགས་གསལ་བར་བཤད་པའི་གནད་དོན་གལ་ཆེན་པོ་ཞིག་ཡིན། རིགས་པས་བརྟགས་ན་ཉོན་མོངས་པ་རྣམས་ཕྱིའི་ཡུལ། ནང་གི་དབང་པོ། ཡུལ་དབང་གི་བར་སྣང་། དེ་ལས་གཞན་གང་དུ་ཡང་རང་བཞིན་གྱིས་གནས་པ་མེད་དེ། མ་བརྟགས་པའི་དུས་ན་བདེན་པ་ལྟར་སྣང་ཡང་། རིགས་པས་བརྟགས་ན་སྒྱུ་མ་ལྟ་བུར་སྣང་ཡང་བདེན་མེད་པ་ཤེས་ཐུབ། དེས་ན་སྟོང་ཉིད་རྟོགས་པའི་ཤེས་རབ་བསྐྱེད་ནས་ཉོན་མོངས་སྤོང་ཐུབ་པར་འགྱུར་རོ། །