ཡིད་སྨོན་
ཡིད་སྨོན་ཞེས་པ་ནི་སེམས་ལ་གང་ཞིག་འབྱུང་བར་འདོད་པའམ་མངོན་པར་འདོད་པའི་བློ་ཞིག་ལ་གོ་དགོས། དཔྱད་གཞིར་བཏོན་པའི་སྤྱོད་འཇུག་གི་འགྲེལ་བཤད་ཁག་ལ་གཞིགས་ན། ཡིད་སྨོན་ཞེས་པ་ནི་མངོན་པར་འདོད་པའི་སེམས་ཞིག་ཡིན་ལ། དེ་ཡང་གཞན་ལ་གནོད་པའམ་སྡུག་བསྔལ་འབྱུང་བར་སྙམ་དུ་ཡིད་ལ་བསམ་ཞིང་ངག་ཏུ་ཞུས་པའི་བློ་གྲོས་ཤིག་ལ་ངེས་པར་དུ་འཇོག་དགོས།
རྒྱས་བཤད།
[རྩོམ་སྒྲིག]ཡིད་སྨོན་ཞེས་པའི་ནང་དོན་ཁ་གསལ་གྱི་འགྲེལ་བཤད་མང་པོ་ཞིག་སྣང་ཡོད། "སྔོན་གྱི་ལས་མེད་ན་ཁྱོད་ཀྱིས་དགྲ་ལ་གནོད་པ་དང་སྡུག་བསྔལ་འབྱུང་བར་གྱུར་ཅིག་སྙམ་དུ་ཡིད་ལ་སྨོན་པ་ཙམ་གྱིས་ནི་དགྲ་དེ་ལ་གནོད་པའི་རྒྱུར་ཅུང་ཟད་ཀྱང་མི་འགྱུར་ལ། ཁྱོད་ཀྱིས་འདོད་པའི་དོན་དེ་འགྲུབ་པ་ལའང་དེ་ལྟར་བསམ་པས་ཅུང་ཟད་ཀྱང་མི་ཕན་པས་ན་དེ་ལྟར་སྨོན་པ་ལ་དགོས་པའི་དོན་མེད་པར་མ་ཟད་རང་ལ་དེ་ཙམ་དུ་གནོད་པའི་རྒྱུར་འགྱུར་རོ། །"[༡]ཞེས་གསལ་བ་ལྟར། ཡིད་སྨོན་ཞེས་པ་ནི་གཞན་ལ་མི་འདོད་པའམ་གནོད་པ་འབྱུང་བར་སེམས་ལ་འདོད་ཅིང་བསམ་པའི་བློ་ཞིག་ལ་གོ་དགོས། དེ་བཞིན་དུ་"གལ་ཏེ་དགྲ་ལ་སྡུག་བསྔལ་མ་བྱུང་ན་ནི་སེམས་ཁྱོད་ཀྱིས་དགྲ་བོ་སྡུག་བསྔལ་ན་ཅི་མ་རུང་སྙམ་པའི་བློ་ཡིད་སྨོན་ཙམ་དེས་ནི་དགྲ་ལ་གནོད་པར་མི་འགྱུར་གྱི་རང་ཉིད་ཀྱི་ཡིད་མི་བདེ་བར་ཟད་དོ། །"[༢]ཞེས་པ་ལས་ཡིད་སྨོན་ཞེས་པ་ནི་སེམས་ལ་གང་ཞིག་འདོད་ཅིང་བསམ་པའི་བློ་ཞིག་ཡིན་པ་ཤེས་ཐུབ།
མཚན་ཉིད།
[རྩོམ་སྒྲིག]"ཁྱོད་ཀྱིས་ཡིད་སྨོན་ནི་འདོད་པ་སྟེ་མངོན་པར་འདོད་པ་ཞེས་བྱ་བའི་དོན་ཏོ། །"[༣]ཞེས་གསལ་བ་ལྟར། ཡིད་སྨོན་ཞེས་པའི་མཚན་ཉིད་ནི་མངོན་པར་འདོད་པའི་བློ་ཞིག་ལ་གོ་དགོས།
ཕན་གནོད་ཀྱི་སྒོ་ནས་འགྲེལ་པ།
[རྩོམ་སྒྲིག]"དེ་ཙམ་གྱིས་རྒྱུར་མི་འགྱུར་ན་འདི་ལ་རྒྱུ་ཡོད་པ་མ་ཡིན་པ་ནི་རྒྱུ་མེད་པའི་དོན་ཏེ། མི་འགལ་བའི་མི་འབྱུང་ངོ་། །"[༤]ཞེས་པ་ལས་ཡིད་སྨོན་ཞེས་པ་ནི་འབྲས་བུ་སྒྲུབ་པའི་རྒྱུར་མི་འགྱུར་བའི་སེམས་ཀྱི་འདོད་པ་ཞིག་ཡིན་པ་གསལ་པོ་རེད། "དགྲ་ལ་གནོད་པ་བྱུང་ན་སྙམ་པའི་ཁྱོད་ཀྱི་ཡིད་སྨོན་ཙམ་གྱིས་ནི་དགྲ་དེ་ལ་གནོད་པའི་རྒྱུར་མི་འགྱུར་བས་ཁྱོད་ཀྱི་འདོད་དོན་ཅུང་ཟད་ཀྱང་མི་འགྲུབ་པས་ཁྲོ་བར་མི་རིགས་སོ། །"[༥] ཞེས་གསལ་བ་ལྟར། ཡིད་སྨོན་ཞེས་པ་ནི་རང་རེ་བའི་འབྲས་བུ་སྒྲུབ་པའི་ནུས་པ་མེད་པའི་སེམས་ཀྱི་འདོད་པ་ཞིག་ཡིན་པར་ཤེས་དགོས།
ཁྱབ་ཚད།
[རྩོམ་སྒྲིག]"གལ་ཏེ་དགྲ་ཞིག་ལ་མི་ཤི་ཕྱུགས་འཐོར་དགྲ་བརྒྱབ་པ་ལ་སོགས་པའི་མི་དགའ་བའམ་སྡུག་བསྔལ་བར་གྱུར་ནའང་དེ་ལ་ཁྱོད་དགར་ཏེ་ཁྱོད་དགའ་བར་བྱས་པ་ལ་དོན་ཅི་ཞིག་ཡོད་དེ་ཁྱོད་ལ་ཕན་པ་ཅི་ཡང་མེད་དོ། །གལ་ཏེ་ཡོད་དུ་ཆུག་ནའང་ཁྱོད་ཀྱི་དགྲ་ལ་མི་ཤི་བའམ་དགྲ་བརྒྱབ་ན་ཅི་མ་རུང་སྙམ་པ་སོགས་ཡིད་ལ་སྨོན་ཅིང་ངག་ཏུ་སྨྲས་པ་ཙམ་གྱིས་ནི་དགྲ་དེ་ལ་འདི་ཕྱིར་གནོད་པའི་རྒྱུར་ཅུང་ཟད་ཙམ་ཡང་མི་འགྱུར་བས་དོན་མེད་དོ། །"[༦]ཞེས་གསལ་བ་ལྟར། ཡིད་སྨོན་ཞེས་པ་ནི་ཡིད་ལ་སྨོན་ཅིང་ངག་ཏུ་སྨྲས་པ་རེད་ལ། དེ་ནི་འདོད་དོན་སྒྲུབ་པའི་ནུས་པ་མེད་པ་ཞིག་ཡིན།
བསྡུས་དོན།
[རྩོམ་སྒྲིག]ཡིད་སྨོན་ཞེས་པ་ནི་སེམས་ལ་གང་ཞིག་འབྱུང་བར་མངོན་པར་འདོད་པའི་བློ་ཞིག་ལ་གོ། དཔེར་ན། གཞན་ལ་གནོད་པའམ་སྡུག་བསྔལ་འབྱུང་བར་ཡིད་ལ་བསམ་ཞིང་ངག་ཏུ་སྨྲས་པ་ལྟ་བུ། དེ་ནི་རང་རེ་བའི་འབྲས་བུ་སྒྲུབ་པའི་ནུས་པ་མེད་པའི་སེམས་ཀྱི་འདོད་པ་ཞིག་ཡིན་ལ། ཕན་པའི་ཚབ་ཏུ་རང་ལ་གནོད་པའི་རྒྱུར་འགྱུར་བའི་སེམས་ཀྱི་སྤྱོད་པ་ཞིག་ཡིན་པར་ནམ་མཁའ་སྟེང་གི་ཐུབ་པ་དང་རབ་འབྱམས་པ་རྣམས་ཀྱིས་བསྟན་ཡོད།
ལུང་ཁུངས།
[རྩོམ་སྒྲིག]- ↑ ཐུབ་བསྟན་ཆོས་གྲགས། སྤྱོད་འཇུག་གི་འགྲེལ་བཤད་རྒྱལ་སྲས་ཡོན་ཏན་བུམ་བཟང་། ཤིང་དཔར།
- ↑ དཔའ་བོ་གཙུག་ལག་ཕྲེང་བ། སྤྱོད་འཇུག་གི་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། ཤིང་དཔར།
- ↑ ཤེས་རབ་འབྱུང་གནས་བློ་གྲོས། སྤྱོད་འཇུག་གི་དཀའ་འགྲེལ། ཤིང་དཔར།
- ↑ ཤེས་རབ་འབྱུང་གནས་བློ་གྲོས། སྤྱོད་འཇུག་གི་དཀའ་འགྲེལ། ཤིང་དཔར།
- ↑ རྒྱལ་ཚབ་དར་མ་རིན་ཆེན་ཆེན། སྤྱོད་འཇུག་གི་རྣམ་བཤད་རྒྱལ་སྲས་འཇུག་ངོགས། ཤིང་དཔར།
- ↑ མཁན་པོ་ཀུན་དཔལ། སྤྱོད་འཇུག་གི་ཚིག་འགྲེལ་འཇམ་དབྱངས་བླ་མའི་ཞལ་ལུང་། ཤིང་དཔར།