ཡི་གེ་སྤྱི་རྣམ་བློ་གསལ་འཇུག་ངོགས་ཀྱྱི་སུམ་ཅུ་བའི་སྡོམ་ཚིག
ཡི་གེ་སྤྱིའི་རྣམ་བཞག[རྩོམ་སྒྲིག]
མཁས་མཆོག་ཐོན་མི་སམ་བྷོ་ཊས།།
རྒྱ་གར་ཡི་གེ་དཔེར་བླངས་ནས།།
བོད་ཡིག་འབྲི་བའི་སྲོལ་ཆེན་བཏོད།།
དབྱངས་བཞི་གསལ་བྱེད་སུམ་ཅུ་དང་།།
གསལ་བྱེད་ནང་ནས་རྗེས་འཇུག་བཅུ།།
ག་ང་ད་ན་བ་མ་འ།།
ར་ལ་ས་དང་དེའི་ནང་ནས།།
ག་ད་བ་མ་འ་ལྔ་བོ།།
སྔོན་དུ་འཇུག་པའི་ཡི་གེ་ཡིན།།
ད་ས་གཉིས་ནི་ཡང་འཇུག་ཡིན།།
སྔོན་དུ་འཇུག་པའི་ཡི་གེ་ཡིན།།
ད་ས་གཉིས་ནི་ཡང་འཇུག་ཡིན།།
རྗེས་འཇུག་མིང་གཞི་ཀུན་ལ་འཇུག།
མིང་གཞི་རྐྱང་བ་འཕུལ་ཅན་ལ།།
འ་མཐའ་ངེས་པར་ཐོབ་པ་ཡིན།།
དབྱངས་ལྡན་མགོ་དང་འདོགས་ཅན་ལ།།
འ་མཐའ་སྤངས་དགོས་ཤེས་པར་བྱ།།
ཡང་འཇུག་ད་ནི་ན་ར་ལ།།
ས་ནི་ག་ང་བ་མ་བཞིར།།
སྔོན་འཇུག་ག་ནི་ཅ་ཉ་ཏ།།
ད་ན་ཙ་ཞ་ཟ་ཡ་ཤ།
ས་བཅས་བཅུ་གཅིག་སྔོན་དུ་འཇུག།
ད་ནི་ཀ་ག་ང་པ་བ།།
མ་སྟེ་དྲུག་གི་སྔོན་དུ་འཇུག།
བ་ཡིག་ཀ་ག་ང་ཅ་ཇ།།
ཉ་ཏ་ད་ན་ཙ་ཛ་ཞ།།
ཟ་ར་ཤ་ས་བཅས་བཅུ་དྲུག།
མ་ཡིག་ཁ་ག་ང་ཅ་ཇ།།
ཉ་ཐ་ད་ན་ཚ་ཛ་བཅས།།
བཅུ་གཅིག་ཁོ་ནའི་སྔོན་དུ་འཇུག།
འ་ཡིག་ཁ་ག་ཆ་ཇ་ཐ།།
ད་ཕ་བ་ཚ་ཛ་སྟེ་བཅུ།།
ར་ལ་ས་ཡི་མགོ་ཅན་དང་།།
ཡ་ར་ལ་ཝའི་འདོགས་ཅན་བཅས།།
ར་མགོ་བཅུ་གཉིས་ལ་མགོ་བཅུ།།
ས་མགོ་བཅུ་གཅིག་ཡ་བཏགས་བདུན།།
ར་བཏགས་བཅུ་གཅིག་ལ་བཏགས་དྲུག།
ཝ་ཟུར་ཅན་ནི་བཅུ་གཉིས་སོ།།
རྣམ་དབྱེ་དང་ཚིག་ཕྲད།[རྩོམ་སྒྲིག]
རྣམ་དབྱེ་བརྒྱད་ནི་གོ་རིམ་བཞིན།།
དང་བོ་ངོ་བོ་གཉིས་པ་ལས།།
གསུམ་པ་བྱེད་པ་བཞི་བ་དགོས།།
ལྔ་བ་འབྱུང་ཁུངས་དྲུག་འབྲེལ།།
བདུན་པ་གནས་གཞི་བརྒྱད་པ་འབོད།།
གང་ཞིག་ངོ་བོ་ཙམ་བརྗོད་པ།།
རྣམ་དབྱེ་དང་བོ་ཡིན་ཏེ་དཔེར།།
བུམ་པ་ཀ་བ་ཞེས་བརྗོད་བཞིན།།
དེ་དང་འབྲེལ་བའི་རྫོགས་ཚིག་ནི།།
གོ་ངོ་དོ་ནོ་བོ་མོ་འོ།།
རོ་ལོ་སོ་ཏོ་བཅུ་གཅིག་གོ།
སླར་སྡུད་ཟླ་སྡུད་ཅེས་ཀྱང་བྱ།།
ལ་དོན་རྣམ་པབདུན་ཡོད་དེ།།
སུ་རུ་དུ་ཏུ་ན་ར་ལ།།
གཉིས་པ་བཞི་བ་བདུན་པ་དང་།།
དེ་ཉིད་ཚེ་སྐབས་རྣམས་ལ་འཇུག།
ས་སུ་ག་བ་ད་དྲག་ཏུ།།
ང་ད་ན་མ་ར་ལ་དུ།།
འ་དང་མཐའ་རྟེན་མེད་མཐར་རུ།།
འདི་དང་ར་མཐའ་བྱ་བ་གཅིག།
ན་ལ་གཉིས་ནི་སྐབས་དང་སྦྱར།།
རྣམ་དབྱེ་སྦྱར་སའི་གཞི་དེ་ལ།།
བྱ་བ་བྱས་དང་བྱེད་པ་ཙམ།།
སྟོན་པ་རྣམ་དབྱེ་གཉིས་པ་ཡིན།།
རྣམ་དབྱེ་སྦྱར་སའི་གཞི་དེ་ཡི།།
ཆེད་དུའམ་དགོས་པ་སྟོན་པ་དེ།།
རྣམ་དབྱེ་བཞི་བ་དགོས་ཆེད་ཡིན།།
རྣམ་དབྱེ་སྦྱར་སའི་གཞི་དེ་ལ།།
ཆོས་ཤིག་གནས་ཙམ་སྟོན་པ་དེ།།
རྣམ་དབྱེ་བདུན་པ་གནས་གཞི་ཡིན།།
རྣམ་དབྱེ་སྦྱར་ས་དེ་ཉིད་ཀྱི།།
ངོ་བོ་ཉིད་དུ་གྲུབ་སྟོན་པ།།
དེ་ཉིད་ཅེས་བྱའི་ཚིག་ཕྲད་དོ།།
དུས་ཙམ་སྟོན་པའི་ལ་དོན་དེ།།
ཚིག་ཕྲད་ཚེ་སྐབས་ཞེས་བྱ་ཡིན།།
དྲུག་པ་འབྲེལ་སྒྲ་ཁྱད་གཞི་དང་།།
ཁྱད་ཆོས་གང་དག་འབྲེལ་བྱེད་པའི།།
ཀྱི་གི་གྱི་འི་ཡི་ལྔ་བོ།།
རྣམ་དབྱེ་གསུམ་པ་བྱེད་པ་ནི།།
བྱེད་པོ་གང་གིས་བྱ་བ་ཞིག།
བྱས་དང་བྱེད་པ་སྟོན་བྱེད་པའི།།
ཀྱིས་གིས་གྱིས་འིས་ཡིས་རྣམས་སོ།།
ད་བ་ས་ཀྱི་ག་ང་གི།།
ན་མ་ར་ལའི་རྗེས་སུ་གྱི།།
འ་དང་མཐའ་རྟེན་མེད་མཐར་འི།།
རྐང་བ་སྐོང་ཚེ་ཡི་ཞེས་ཐོབ།།
རྒྱན་སྡུད་ཀྱང་འང་ཡང་གསུམ་ནི།།
རྒྱན་སྡུད་ཀྱང་འང་ཡང་གསུམ་ནི།།
མཐུན་དང་མི་མཐུན་ཆོས་གཉིས་ནི།།
གཞི་གཅིག་ལ་ནི་ཉེར་སྡུད་ཅིང་།།
ཁྱད་པར་ཚིག་གི་མཛེས་བྱེད་ལ།།
མཐུན་དང་མི་མཐུན་རྒྱན་གཉིས་ཟེར།།
ག་ད་བ་ས་ད་དྲག་མཐར།།
ཀྱང་ཐོབ་ང་ན་མ་ར་ལའི།།
མཐའ་རུ་ཡང་ནི་སྦྱོར་བ་སྟེ།།
རྗེས་འཇུག་མེད་དང་འ་ཡིག་མཐར།།
འང་དང་ཡང་གཉིས་ཅི་རིགས་སྦྱོར།།
ཡང་ནི་བསྐྱར་དང་བསྣན་ལའང་འཇུག།
སྟེ་ཏེ་དེ་གསུམ་ནས་ལ་བཅས།།
བསྟན་བྱ་ཚིག་གི་ལྷག་མ་ཙམ།།
འདྲེན་པའི་ལྷག་བཅས་ལ་འཇུག་གོ།།
ད་དེ་ན་ར་ལ་ས་དང་།།
ད་དྲག་ཅན་མཐར་ཏེ་རྐྱང་འཐོབ།།
ག་ང་བ་མ་འ་རྣམས་དང་།།
མཐའ་རྟེན་མེད་མཐར་ས་སྟེ་འཐོབ།།
ལ་དང་ནས་ནི་རང་དབང་ཅན།།
འབྱེད་སྡུད་སྐབས་སུ་རྗེས་འཇུག་བཅུ།།
རང་འདྲར་མ་ཡིག་སྦྱར་བ་དང་།།
ད་དྲག་ཐོབ་མཐར་ཏ་དང་སྦྱར།།
ནས་ལས་གཉིས་ནི་འབྱུང་ཁུངས་དང་།།
དགར་དང་སྡུད་པ་གསུམ་ལ་འཇུག།
གང་ཞིག་གང་ལས་བྱུང་སྟོན་པའི།།
ནས་ལས་གཉིས་ནི་འབྱུང་ཁུངས་ཡིན།།
ཀྱེ་དང་ཀྭ་ཡེ་འབོད་པའི་སྒྲ།།
ཕལ་ཆེར་མིང་གི་ཐོག་མར་སྦྱར།།
སྐབས་འགར་མཐའ་མར་སྦྱར་བའང་ཡོད།།
ཚིག་ཕྲད་རང་དབང་ཅན་དང་ཚེག་ཤད་སྦྱོར་ཚུལ།[རྩོམ་སྒྲིག]
ནི་སྒྲ་དགར་དང་ནན་ཏན་གྱི།།
བརྣན་པ་གཉིས་ལ་འཇུག་པ་ཡིན།།
དང་སྒྲ་སྡུད་དང་འབྱེད་པ་དང་།།
རྒྱུ་མཚན་ཚེ་སྐབས་གདམས་ངག་ལྔའོ།།
གང་སུ་ཅི་ཇི་སྤྱི་སྒྲ་ཡིན།།
གང་ནི་ཀུན་གྱི་སྤྱི་སྒྲ་ལ།།
སུ་སྒྲ་གང་ཟག་ཅི་ཇི་གཉིས།།
རིམ་བཞིན་དོན་དང་དཔེའི་སྤྱི་སྒྲ།།
པ་བ་པོ་བོ་ཅན་ལྡན་རྣམས།།
བདག་པོ་སྟོན་བྱེད་བདག་སྒྲ་ཡིན།།
ག་ད་ན་བ་མ་ས་དང་།།
ད་དྲག་ཅན་མཐར་པ་དང་པོ།།
ང་འ་ར་ལ་མཐའ་མེད་མཐར།།
བ་དང་བོ་ཉིད་སྦྱོར་བའོ།།
ཅན་ལྡན་ངེས་མེད་སྐབས་དང་སྦྱར།།
མ་མི་མེད་མིན་རྣམས་དགག་སྒྲ།།
མ་མི་གཉིས་ནི་སྔོན་ལ་སྦྱར།།
མེད་མིན་གཉིས་ནི་མིང་མཐར་སྦྱོར།།
དེ་སྒྲ་དོན་དགུ་ལ་འཇུག་སྟེ།།
ཐ་སྙད་དབང་དུ་བྱས་པ་གསུམ།།
དངོས་པོའི་དབང་དུ་བྱས་པ་བཞི།།
དུས་ཀྱི་དབང་གིས་གཉིས་ཏེ་དགུ།།
དང་བོ་ཐ་སྙད་འདས་པ་དང་།།
རྣམ་གྲངས་གཞན་བརྗོད་ལྷག་བཅས་གསུམ།།
གཉིས་པ་བདེན་དང་གསང་བ་དང་།།
བདག་གི་བ་དང་ཕ་རོལ་བཞི།།
གསུམ་པ་འདས་དང་མ་འོངས་གཉིས།།
དེ་སྒྲ་དངོས་པོ་བདག་དང་དུས།།
ད་ལྟ་བ་ལ་མི་འཇུག་གོ།།
འདི་ཞེས་བྱ་བའི་ཚིག་ཕྲད་དེ།།
དུས་གསུམ་ནང་ནས་ད་ལྟ་བ།།
དངོས་པོ་ཉེ་རིང་གཉིས་ལས་ནི།།
ཉེ་བ་ཁོ་ནར་འཇུག་པ་ཡིན།།
མངོན་ལྐོག་གཉིས་ལས་མངོན་གྱུར་དང་།།
བདག་གཞན་གཉིས་ལས་གཞན་ལ་འཇུག།
འདི་སྒྲ་ལ་ནི་ཉེ་ཚིག་དང་།།
དེ་སྒྲར་རིང་ཚིག་ཟེར་བའོ།།
ད་ཞེས་བྱ་བའི་ཚིག་ཕྲད་དེ།།
བརྗོད་བྱ་སྟོན་པ་སྐབས་བབ་པའི།།
ཚིག་ཕྲད་ཡིན་ཕྱིར་དུས་གསུམ་གྱི།།
ད་ལྟ་བ་ལ་འཇུག་པ་ཡིན།།
འདས་དང་མ་འོངས་ལ་མི་སྦྱོར།།
ཅིང་སོགས་ཚིག་ཕྲད་སྦྱོར་ཚུལ་ནི།།
ག་ད་བ་དང་ད་དྲག་མཐར།།
ཅིང་ཅེས་ཅེ་འོ་ཅེ་ན་ཅིག།
ང་ན་མ་འ་ར་ལ་དང་།།
མཐའ་རྟེན་མེད་པའི་རྗེས་དག་ཏུ།།
ཞིང་ཞེས་ཞེ་འོ་ཞེ་ན་ཞིག།
ས་མཐར་དམིགས་བསལ་ཞེས་མ་གཏོགས།།
ཤིང་ཤེས་ཤེ་འོ་ཤེ་ན་ཤིག།
འོ་འུ་འམ་གྱི་ཚེག་ཁྱིམ་ཡང་།།
རྐང་བ་སྐོང་དང་མི་སྐོང་དབྱེ།།
འཕགས་ཡུལ་ཡི་གེ་ཇི་བཞིན་དུ།།
ཡིག་མགོར་དབུ་ཁྱུད་འབྲི་སྲོལ་ཡོད།།
ལྷུག་པའི་རྣམ་གྲངས་སོ་སོ་དང་།།
དོན་ཚན་མཐའ་ལ་ཆིག་ཤད་དང་།།
ཚིགས་སུ་བཅད་པའི་རྐང་མཐའ་དང་།།
རྫོགས་ཚིག་ཅན་མཐར་ཉིས་ཤད་བྱ།།
སྡེ་ཚན་ཆེན་པོ་རྫོགས་མཚམས་དང་།།
ལེའུ་མཚམས་ལྟ་བུར་བཞི་ཤད་འཐོབ།།
ཕྱི་རྐང་ཅན་གྱི་ཡི་གེ་རྣམས།།
མཐར་བྱུང་རྐང་བ་ཤད་རེར་བརྩི།།
རྐང་མཐར་ང་ཡིག་མ་གཏོགས་པའི།།
ཤད་གོང་རྣམས་སུ་ཕྱི་ཚེག་སྤངས།།
རིན་ཆེན་སྤུངས་ཤད་སྦྲུལ་ཤད་དག།
སྐབས་ཐོབ་སྦྱར་ཚུལ་ཤེས་པར་བྱ།།
ཞེས་པ་འདི་ནི་དམུ་དགེ་བསམ་གཏན་རྒྱ་མཚོས་མཛད་པའི་བོད་ཀྱི་ཡི་གེ་སྤྱི་རྣམ་བློ་གསལ་འཇུག་ངོགས་ལས་བཏུས།