འཚང་རྒྱ་
འཚང་རྒྱ་ཞེས་པ་ནི་སྒྲིབ་པ་ཐམས་ཅད་སྤངས་ཤིང་ཡེ་ཤེས་ཐམས་ཅད་རྫོགས་པར་གྱུར་ཏེ་སངས་རྒྱས་ཀྱི་གོ་འཕང་ཐོབ་པའི་དོན་ཏེ། "མངོན་པར་རྫོགས་པར་འཚང་རྒྱ་བར་སེམས་ཅན་རྣམས་ལ་ནི་འདོད་"[༡]ཅེས་གསུངས་པ་ལྟར་བྱང་ཆུབ་སེམས་དཔའ་རྣམས་ཀྱིས་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ལ་འགོད་པར་འདོད་པའི་དམ་བཅའ་མཛད་པ་ལ་གོ་དགོས། "སེམས་ཅན་རྣམས་ལ་ཕན་ཞིང་བདེ་བ་སྐྱེད་ལ་འཚང་རྒྱ་བའི་ཐབས་ཀྱི་དམ་པ་"[༢]ཞེས་བྱང་ཆུབ་ཀྱི་སེམས་ནི་འཚང་རྒྱ་བའི་ཐབས་དམ་པ་ཡིན་པར་གསུངས་སོ། །
འཚང་རྒྱ་བའི་རྣམ་གྲངས།
[རྩོམ་སྒྲིག]"འཇིག་རྟེན་གསུམ་གྱིས་མཆོད་པའི་གནས་འཚང་རྒྱ་བར་སེམས་ཅན་རྣམས་ནི་འདོད་"[༣]ཅེས་དང་། "བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་ཤོག་ཅིག་"[༤]ཅེས་གསུངས་པ་ལྟར་མངོན་པར་རྫོགས་པར་འཚང་རྒྱ་བ་ཞེས་པའང་རྣམ་གྲངས་སུ་འཇོག་གོ །
འཚང་རྒྱ་བའི་རྒྱུ།
[རྩོམ་སྒྲིག]འཚང་རྒྱ་བའི་རྒྱུ་བྱང་ཆུབ་ཀྱི་སེམས་ཡིན་པར་གསལ་ཏེ། "སེམས་དེ་སྐྱེས་ན་མཐའ་གཉིས་ལ་མི་གནས་ཏེ་མྱུར་དུ་མངོན་པར་རྫོགས་པར་འཚང་རྒྱ་བར་འགྱུར་རོ། །"[༥]ཞེས་བྱང་ཆུབ་ཀྱི་སེམས་བསྐྱེད་པ་ལས་འཚང་རྒྱ་བར་གསུངས་སོ། །
ཕ་རོལ་ཏུ་ཕྱིན་པ་དང་འཚང་རྒྱ་བའི་འབྲེལ་བ།
[རྩོམ་སྒྲིག]བྱང་ས་ལས། "བྱང་ཆུབ་སེམས་དཔའ་རྣམས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བར་འགྱུར་རོ། །"ཞེས་གསུངས་པ་ལྟར་ཕ་རོལ་ཏུ་ཕྱིན་པ་དྲུག་རྫོགས་པར་བྱས་པ་ལས་འཚང་རྒྱ་བར་གསུངས། དེ་ཡང་། དཀོན་མཆོག་སྤྲིན་ལས། "སྦྱིན་པ་ནི་བྱང་ཆུབ་སེམས་དཔའི་བྱང་ཆུབ་བོ། །"ཞེས་སྦྱིན་པ་ལ་སོགས་པའི་ཕར་ཕྱིན་རྣམས་འཚང་རྒྱ་བའི་རྒྱུ་ཡིན་པར་གསུངས་སོ། །
འཚང་རྒྱ་བའི་གནས།
[རྩོམ་སྒྲིག]"བྱང་ཆུབ་སྙིང་པོ་ནི་ཆོས་སྐུ་མངོན་དུ་བྱེད་པའི་གནས་ཏེ། ལོངས་སྐུར་འཚང་རྒྱ་བའི་གནས་འོག་མིན་དང་མཆོག་གི་སྤྲུལ་སྐུར་འཚང་རྒྱ་བའི་གནས་རྡོ་རྗེའི་གདན་བྱང་ཆུབ་ཀྱི་ཤིང་དྲུང་ལྟ་བུའི་བྱང་ཆུབ་སྙིང་པོ་དེ་དང་དེར་མཆིས་པའམ་གཤེགས་ཀྱི་བར་དང༌།"[༦] ཞེས་འཚང་རྒྱ་བའི་གནས་ཁྱད་པར་ཅན་རྣམས་གསུངས་སོ། །
འཚང་རྒྱ་བ་དང་སེམས་ཅན་གྱི་འབྲེལ་བ།
[རྩོམ་སྒྲིག]"རྒྱལ་པོ་ལྟ་ཞིག་མགུ་ན་ཡང་སེམས་ཅན་མགུ་བར་བྱས་པ་ཡིས་ཐོབ་པར་འགྱུར་བ་གང་ཡིན་པའི་འབྲས་བུ་སངས་རྒྱས་ཉིད་རྒྱལ་པོ་དེས་སྦྱིན་མི་སྲིད་དོ། །"[༧]ཅེས་གསུངས་པ་ལྟར་སེམས་ཅན་མགུ་བར་བྱས་པ་ལས་སངས་རྒྱས་ཀྱི་གོ་འཕང་ཐོབ་པར་གསུངས། "གང་ཞིག་གཞན་གྱི་འབྱོར་བ་ལ་ཁྲོ་བ་དེ་ལ་བྱང་ཆུབ་སེམས་ནི་ག་ལ་ཡོད་དེ་མེད་དོ། །"[༨]ཞེས་སེམས་ཅན་ལ་བྱམས་བརྩེ་མེད་ན་འཚང་རྒྱ་བའི་རྒྱུ་བྱང་ཆུབ་ཀྱི་སེམས་མི་འབྱུང་བར་གསུངས་སོ། །
སྐྱོན་སྤོང་བ།
[རྩོམ་སྒྲིག]"སྔོན་སངས་རྒྱས་དཔག་མེད་འདས་པས་བདག་མ་བཏུལ་བ་བ་འདི་ཡིན་ན་ད་དུང་རང་གིས་རང་སྣོད་མ་ཡིན་པར་བྱས་ན་ངན་འགྲོར་ལྟུང་གི་སངས་རྒྱས་དང་ཕྲད་པར་མི་འགྱུར་རོ། །"[༩]ཅེས་སངས་རྒྱས་མང་པོ་བྱོན་ཡང་རང་ཉིད་སྣོད་དུ་མ་གྱུར་ན་འཚང་རྒྱ་བ་དཀའ་བར་གསུངས་སོ། །
བསྡུས་དོན།
[རྩོམ་སྒྲིག]འཚང་རྒྱ་ཞེས་པ་ནི་སངས་རྒྱས་ཀྱི་གོ་འཕང་མངོན་དུ་བྱེད་པའམ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པ་ལ་གོ་དགོས། འདིའི་རྒྱུ་གཙོ་བོ་ནི་བྱང་ཆུབ་ཀྱི་སེམས་དང་ཕ་རོལ་ཏུ་ཕྱིན་པ་དྲུག་རྫོགས་པར་བྱས་པ་ཡིན། འཚང་རྒྱ་བའི་གནས་ནི་ལོངས་སྐུའི་དབང་དུ་བྱས་ན་འོག་མིན་དང་སྤྲུལ་སྐུའི་དབང་དུ་བྱས་ན་རྡོ་རྗེ་གདན་ཡིན། བྱང་ཆུབ་སེམས་དཔའ་རྣམས་ཀྱིས་སེམས་ཅན་ཐམས་ཅད་སངས་རྒྱས་ཀྱི་གོ་འཕང་ལ་འགོད་པར་འདོད་པས་སེམས་ཅན་ལ་ཕྲག་དོག་དང་གནོད་སེམས་བྱས་ན་འཚང་རྒྱ་བའི་རྒྱུ་ཉམས་པར་འགྱུར་བས་བཟོད་པ་བསྒོམ་དགོས་པར་གསུངས་སོ། །
ལུང་ཁུངས།
[རྩོམ་སྒྲིག]- ↑ མཁན་པོ་ཀུན་དཔལ། སྤྱོད་འཇུག་གི་ཚིག་འགྲེལ་འཇམ་དབྱངས་བླ་མའི་ཞལ་ལུང་། ཤིང་དཔར། ཤོག་ངོས་ ༣༤༠
- ↑ ཐུབ་བསྟན་ཆོས་གྲགས། སྤྱོད་འཇུག་གི་འགྲེལ་བཤད་རྒྱལ་སྲས་ཡོན་ཏན་བུམ་བཟང་། ཤིང་དཔར། ཤོག་ངོས་ ༤༧
- ↑ རྒྱལ་ཚབ་དར་མ་རིན་ཆེན། སྤྱོད་འཇུག་གི་རྣམ་བཤད་རྒྱལ་སྲས་འཇུག་ངོགས། ཤིང་དཔར། ཤོག་ངོས་ ༡༤༡
- ↑ དཔའ་བོ་གཙུག་ལག་ཕྲེང་བ། སྤྱོད་འཇུག་གི་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། ཤིང་དཔར། ཤོག་ངོས་ ༤༤
- ↑ དཔའ་བོ་གཙུག་ལག་ཕྲེང་བ། སྤྱོད་འཇུག་གི་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། ཤིང་དཔར། ཤོག་ངོས་ ༨༤
- ↑ ཐུབ་བསྟན་ཆོས་གྲགས། སྤྱོད་འཇུག་གི་འགྲེལ་བཤད་རྒྱལ་སྲས་ཡོན་ཏན་བུམ་བཟང་། ཤིང་དཔར། ཤོག་ངོས་ ༡༡༥
- ↑ རྒྱལ་ཚབ་དར་མ་རིན་ཆེན། སྤྱོད་འཇུག་གི་རྣམ་བཤད་རྒྱལ་སྲས་འཇུག་ངོགས། ཤིང་དཔར། ཤོག་ངོས་ ༡༥༦
- ↑ རྒྱལ་སྲས་ཐོགས་མེད་བཟང་པོ། སྤྱོད་འཇུག་གི་འགྲེལ་པ་ལེགས་བཤད་རྒྱ་མཚོ། ཤིང་དཔར། ཤོག་ངོས་ ༡༠༧
- ↑ དཔའ་བོ་གཙུག་ལག་ཕྲེང་བ། སྤྱོད་འཇུག་གི་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། ཤིང་དཔར། ཤོག་ངོས་ ༣༣༦